مجرد صفحات !!!!أ

صفحات تطوي وتبقي وصفحات تتطاير وتتبعثر

صفحات نمزقها وصفحات نحافظ عليها

صفحات نحب معانيها وصفحات نرتجف بعيدا عنها

صفحات ننسي سطورها وصفحات نحفظ احرفها عن ظهر قلب

دموع تنسكب من بين الاسطور وضحكات تدوي بصخب فرح مجنون

معاني ترسم فرحة ومعاني تقطر بمرارة الوحشة

صفحات ومعاني ومشاعر وكلمات

نطوي بينها ابيات الشعر والفراشات والضحكات البريئه والدموع الساخنه

نطوي ذكريات وخوف نطوي مشاعر وحب

نطوي طفوله وشباب ونضج وشيخوخه

نطوي زغاريد الفرحه وعويل الحزن والوجع

هذه هي حياتنا باختصار

كل مانعيشه وعشناه مدون في كتاب كبير

يضم بين دفتيه كل ذكرياتنا ومشاعرنا

وفرحتنا واحزاننا ، وحشتنا وبهجتنا

حبنا ووجعنا وكرهنا وبلادتنا

فيه سيرتنا ووجودنا وما سيبقي منا

كتاب كبير نسطر فيه كل ثانيه ماهيتنا ووجودنا

صفحات مبعثره منظمه ممزقه

صفحات تافهه صفحات ثمينه

صفحات تنوح واخري تضحك

وكل تجربه في حياتنا ليست الا صفحه مهما طالت او قصرت

كثيره الاسطر او مكونه من سطر لم يكتمل

مكونه من اغنيه او مرثيه

من الوان قوس قزح او من اسود بهيم

من رائحه الورد او رائحه الخرس والموت

ليست الا صفحه من ضمن صفحات كثيره

حتي لو كانت الاجمل او الاسوء

حتي لو طالت اوقصرت

هي مجرد صفحه من ضمن عشرات مئات الوف الصفحات

تجربه من ضمن تجارب اكثر

هذه هي حياتنا

صفحات وتجارب وايام

هذه هي حياتنا ووجودنا

مجرد كتاب ومجرد حياة

وحين نرحل عن الدنيا

لايبقي منا الا كتابنا يوضع علي الارفف بجوار كتب كل الاخرين

انها مكتبه الانسانية التي يتركها البشر خلفهم !!!!

انها مكتبه الانسانيه ليست معارفهم ولا افكارهم

هي حياتهم ووجودهم ذاته !!!

الايام بيننا !!!!ا

لاتهرب مني ... فكل ماتأتيه لااصدقه ، لااحسك تهرب مني احسك تخاف تقترب اكثر ، احسك لست مستعدا لتقترب بحق فتهرب لانك لاتقوي علي انصاف الحلول ولا نصف الاقتراب ، تشعر نفسك قريبا لحد يخيفك فتهرب ، فاللحظه التي قررتها لتقترب وتطغي وتحتل كل كياني لم تاتي بعد ، وحتي ستأتي تظنك تهرب وتظنني لاافهم ، بل تظنني افهم لكنك واثق من صمتي وانتظاري وفهمي العميق لك ولرغباتك وجموحك وجنونك وجنوحك ولعبتك الصغيره التي تظنها سرا لم اكتشفه ، لكني استقبل كل اشاراتك وافهم خوفك وافهم فرارك وهروبك واقترب منك اكثر واكثر ... لاتهرب مني فعيناك التي تواريهما بعيدا عن قلبي يفضحاك ينطقا بما اخرست لسانك عن النطق به ، لست واهمه فانا احسك بحق ، اسمع نبضه قلبك الفاره من روحك لروحي ، اري لمعه عينيك حين تفكر في قبلما تطفأ وهجهما ، اسمع ارتعاشه احرفك وانت تكلمني وتناديني وتنطق باسمي ، لاتهرب مني فلن تهرب ، مهما فررت لن تفلح فانا احتلك ياسيدي ولاانوي اجلو عن روحك ولا اصدق ابتعادك وفرارك ، لااصدقك ياسيدي وانا التي كنت اصدقك ، لااصدقك لاني اعرفك ، احسني قريبه اليك ومنك اكثر مما تظن وتدرك ، لاتهرب مني ياسيدي وكف عن مراوغتي ، الفشل مصيرك وحضني ملاذك وروحي لصيقه روحك والايام بيننا !!

فلتمت براحة واستمتاع !!!

في عينيك رسمت عالمي وقررت بعمد نسيته انك عالمي ، نسيت اني رسمت بفرشاتي والواني ماكنت ابغيه وابحث عنه ومنحته له بطيب خاطر وكأنك تملكه ، عالم رسمه خيالي في عينيك ومنحتك قدره اسعادي وكأنك تملك مفاتيح هذا العالم الذي لاتملكه ، وكأنك تسعدني وانت لاتقوي ولا تعرف ، انه عالمي المرسوم في عينيك ، يسطع في وجهي لانه مني ولست انت كذلك ، وكذبت علي نفسي ومنحتك القابا لم تبذل جهدا لتكونها لانك لم تمنح الحياة عواطف ومشاعر لتستحقها ، هي القاب ابنة العالم المرسوم بفرشاتي وريشتي والوان ، لكن عالمك رمادي يتأرجح بين الاسود والابيض ، ومن لا ينبعث قوس قزح من روحه سيظل عالمه رمادي ويزداد مع الوقت عتمة واظلام!!!

في عالمي المرسوم في عينك ، سرت في دروبي اظنها دروبك وبرفقتك اتصورك تسعدني ، كنت تبتسم لان عصافيري تغرد في ساحاتك ولان ورودي ازهرت في حدائقك ولان اشجاري ظللت عليك من لفحات الحمي التي تضربك ، كنت سعيدا بعالمي مبتسما فتصورتك تجيد الابتسام وتصورتك عالما مورقا جميلا وفقئت عيني عن الشاحب والاصفر والرمادي البغيض ، لكن الصحراء التي تنتشر في نفسك ارسلت عواصفها لروحي ، رمال وافاعي واشجار جافه وصبار ، صحراءك التي لاتملك غيرها اصفرا شاحبا فشلت تستوعب الواني والتهمت رمالها القاتله بذور اشجاري وقتلتها عطشا وجدبا وشربت ماء عيون حياتي ولم ترتوي ، صحراءك يافارس الصحراء طغت باصفرها الشاحب فوق عالمي الملون والتهمته ، او كادت او حاولت ، وانطفئت ابتسامتك وانطفء وهج عينيك وسط الاعاصير الرملية وضاع الظل وبقيت الشمس تحرقك في صحراءك وتطمس بصرك وعينيك ومشاعرك ، و....... وفي لحظه صدق مع نفسي ادركتك وشاهدت حقيقتك الجدباء وسط الصحراء وعرفت انك لاتسمع عصافيري ولا تدرك جمال زهوري ولا تسمع صوت ناياتي في الليل ولا هديل كرواني في الفجر ، ادركتك شاحب مثل صحراءك لاتسعد فلملمت عالمي الملون وعصافيري وزهوري وابيات شعري وونس الليل ورفقه الطريق الطويل ورحلت ، ولان الاصفر طمس مشاعرك وقلبك وفقأ عينيك لم تدرك اني رحلت ومازلت تتصور بقايا خيالاتي في ذهنك وجود يستلزم منك كذبا حتي لا اراك علي حقيقتك !!!

لكني رأيتك ومازلت اراك شاحب مترب جاف كرمالك موخذك كاشجار صبارك لايمكن تمنح فرحة !!!

وانا ياما كنت اتصوره رفيق لاابحث الا عن الفرحه !!!

لقد تفرقت بنا السبل والدروب !!!!

فلتنعم في صحراءك بالموت وتتركني ابحث في الحياة عن جمالها ومعني الوجود فيها !!!

لن اودعك ، لاني لن اودعك ، فالوداع لايجدي مع الموتي !!

فقط اخبرك اني لم اعد موجوده فلتصرف عنك الاشباح وتمت براحه واستمتاع !!!

ادينا عايشين ....

علي القلب حجر

والروح مخنوقة

والنفس مقطوع

والامل بيروح ويجي

والصباح زي كل صباح

لا حلو ولا وحش

والجسم عليل

والاهه خارج من الوجع بالعافية

والوجع قديم والحلم اتسرق

و............ ادينا عايشين

القطعه المفقودة

منذ سنوات كنت انتظر هذه اللحظه واتوقعها ، حين تنطق روحك تكشفك ، تهمس واثقه اني سافهم تمتماتها ، لن تفصح لكني سادرك ، لن تقول لكني ساسمع ، لن تريحني لكني ساتنفس الصعداء ، كنت انتظر هذه اللحظه لحظه الحقيقه ، حينما اعثر علي القطعه المفقوده تكمل الصورة وتزيل الغموض واللبس والصخب وتنهي المراوغه والفرار !!!

لحظه اعرفها ضبابيه الملمح ، ربما زارتني في الحلم او رمت لي في طريقها العلامات ضبابيه رماديه كخطوات متعثره في ظلال الظلال ، ضبابيه لكني اراها تراوغني وتهرب ، لكني اقبض عليها واثقه انها قادمه مهما تراخت وتباطئت ، ولو اقسمت لي الف قسم ان خيالي خصب وحواديتي محض اوهام واحساسي لاعلاقه له بالحقيقه المخبأه خلف ركام الخديعه ، ماصدقتك ، وانتظرت تلك اللحظة مهما تلاعبت ببراعتك بكل الاشياء ، ورسمت ملامح اخري وصخب ، وفررت واختبأت من سؤالي الذي لم اسالك غيره ولم تهرب الا منه ، كنت واثقه اني ساجد اجابته مهما تأخرت ومهما ارهقت نفسك في تضليلي ، هي لحظه ضبابيه استشعر سرها وكأني املك مفتاحا للكنز وانتظر الاذن ، وكأن الشمس من وراء الغيم تتواري لكن لا الغيم افلح يخبئها ولا اشعتها سكنت للتواري ، لست ساحره ياسيدي ولست قارئه للغيب ولاافك الشفرات ولا اضرب بالمحارات ولا افتح اوراق اللعب ، استقبل جيدا ياسيدي وهذا سر المأساة التي ازعجتك وارهقتني ، ارسلت روحك مائة استغاثه والحت تخاطبني ، انقذيني من الظلام الذي احتجز فيه ، من يعرفني يخطئني ومن لايعرفني يذبحني بجهل موجع وكأني شيء لاينبض وقلبي يكاد ينفجر من تلاحق النبضات ، روحك نادتني ياسيدي تستجير باحساسي ، قسوت انت عليها حد تمردت علي كهوفك واشتاقت للشمس وللهواء الطازج العطر وللابتسامات ، كبلتها انت باختياراتك وارهقتها في محطاتك ، سكنت لجبروتك ولم تستكن ، خرست في حضرتك ولم تصمت ، ترسل اشارات وتراهن علي موجات الاثير تلتقط ذبذباتها فتعتقها من جبروتك ، وحين كادت روحك تيأس من اسرها ومنك وصلتني استغاثتها الاخيره ، استقبلت ماارسلته روحك ياسيدي ، لم اقصد ولم تقصد ، لكن التلاقي قدر وهل تختار العصافير اشجارها وهل تنتقي قطرات الندي اوراقها وهل ترسم السماء للكروانات مسارها ، لم اقصد ولم تقصد في لحظه رماديه ضبابيه خففت فيها انت سهوا او عمد ضيق احزمه القهر التي تقيد بها روحك باختياراتك ، في لحظه ارهقت انت فيها من الفرار ومن الضياع ومن كل الوجوه ، فككت قبضتك عن روحك وكانك تتمني يستشعرها وحقيقتها من مازال يشعر ، في تلك اللحظه الغريبه ، استقبلت انا ذبذبات روح معتقله في القهر ، معتقله خلف الجدران والاقنعه ومائه الف مبرر يقنعها ليل نهار ان تنتحر وتصمت ، فتوافقك ولاتصمت ، تستسلم ولاتصمت ، فالصمت موت وهي تنبض بالحياه ، هي اسيره ، مقهورة ، مغلوبه علي قوتها منكسره بقرار ومتراجعه باراده لكنها حيه تنبض بالرسائل وتنتظر فك الشفره والعتق..

و...... لم يطل انتظارها وانتظاري وكانت تلك اللحظة التي اتوقعها وانتظرها ، كنت اراها اعرفها ، المح لمعه حدقتيك رائحة خاصة ستنبعث وقتها من جلدك ، ابتسامه صغيره دافئه ستزين وجهك ، كنت انتظر هذه اللحظه التي ساراك انت فيها ، ساراك انت وليس اي وجه اخر ارتديته ، ساراك انت وليس اي شخصيه اخري حاولت بيعها كذبا لي ، كنت انتظر هذه اللحظة تحل اللغز وتفك الطلاسم تزيل التناقض المستحيل بين هذا الذي كنته وبين ماهو انت ، كنت انتظر لحظه تؤكد لي صدق احساسي وبصيرتي ، كنت انتظر تلك اللحظة اعرفها واثقه اني ساعيشها ساراها ، سالمح الحقيقي داخلك متصالحا مع شخصياتك ، سالمح الحقيقي يرتسم علي وجهك ويغير معالمك وقسماتك ، انت الحقيقي ستقفز من خلف الاقنعه ، ساسمع صوتك لاول مره صوتك الذي اعرفه وتكذبني ، كنت واثقه ان كل المعاني الناقصه في كلماتك المبتورة ستتضح ، واثقه ان كل الالغاز ستحل ، وحين جاءت اللحظه التي انتظرتها وتوقعتها كما كنت اتوقعها ، لم يفاجئني شيئا فكل ماكنت اتوقعه واراه يقينا .... عشته !!!

والحقيقه ... مااجمل الحقيقة !!!

عصفورة الاحلام !!!ا

كنت عايشه حلم جميل وخلاص صحيت من النوم حلم مصبرني علي العيشه والصعب مقويني علي روحي وعلي الهم ساندني في اللحظات القاسية لكنه حلم !!! انا مقدرش افضل نايمه علشان احلم حتي لو حلم جميل ، وانا عمري ماحلمت وانا صاحيه وانا صاحيه باجري في الحياه واتعب واقاوح واقول لما ارجع تعبانه هانام ولما هانام حاحلم حلم جميل حلقه ورا حلقه والحلم بيكبر وبيسعد وبيتعب وبيوجع وبيفرح لكن عمري ماحاعيش الحلم ولا الحلم حيعيشني ، عمره ماخدعني ولا شوفته حقيقه ، عمري ماصدقته ، عمري ماسكرت وقلت مااحلي حياه الحلم ، فالحلم مالوش حياه ، الحلم لحظه في الوهم جميل وخلاص ، نعيشها حبه ونفوق بعدها نرجع لحياتنا اللي حافظينها وفاهمينها وعارفين غلبها....

الحلم مهما كان جميل يفضل حلم وانا مقدرش افضل نايمه علشان احلم ولازم اصحي لان ورايا مليون حاجه مهمه صحيح الحلم زي البومبونه في القلب زي الشجره الضل ونسيم البحر زي بق الميه الساقعه في عز الحر زي ونس الدفا في الليل البرد زي قوس قزح الالوان وسط الاسود زي الحضن ، ياخساره كان حلم جميل وحيفضل حلم ، ولاعمره حيبقي حقيقه ولا واقع ، ومهما الليل طال حيخلص والشمس حتطلع ، والحلم حيمشي ويتبدد ، والواقع يجي برزالته بحلاوته بحقيقته ويقولك عيش وتعيش ، وتمشي في الحياه ولما التعب قوي يزيد ، وتكون وحدك يوم العيد ، والدنيا تبرد وماتدفاش ، ساعتها تفتكر الحلم وتضحك اصل الدنيا ساعات رغم قسوتها تصالحك علي الحياه وتديك امل وتسرقه منك ، وتقولك فوق ده كان مجرد حلم جميل !!!

ليل طويل عشته احلم بالسعاده ، والسعاده لما تحلم بيها تيجي ، ولما تمسك فيها تقعد ولما تاخد عليها ، الديك يأدن ويفوقك ويقولك الحلم خلص ، وخلاص حلمي خلص وباصحي منه ، والنهار شأقشق وجاي ، والعيون المفتوحه ماتعرفش تحلم ، معدش فاضل عندي منه غير شوية مشاهد وذكريات ، وابيات شعر تحت جلدي بتوجع لما افتكرها اكتر من كل اللي فات ، وورده صبرتها في كتابي وضاعت ريحتها وفراشه قصصت اجنحتها ودفنتها تحت المخده علشان تطير في الحلم ، معدش فاضل عندي غير عقد فل كان نفسي البسه في رقبتي وانا ماشيه بضحك ، معدش فاضل غير حلاوته في قلبي زي حته السكر اللي دابت اصلها مهما دابت برضه سكر!!!

وياعصفوره الاحلام هنتيني ، وبصوتك غناكي قوتيني ، وبضربه جناحك سندتيني ، ولما تطيري في السما الواسعه ابقي دايما افتكريني انا اللي كنت بحلم بيك ، وعشت معاكي اجمل احلامي وسعدتيني ، وغردي طول ماانت طايره واعرفي ان هناك بعيد واحده حايره ، مستنيه الغنا الجميل يفكرها بكل اللي كان ، والسعاده اللي كانت ، والونس اللي كان والقعده الحلوة اللي طالت ، والغروب والشروق والحنان ، غردي طول ماانت طايره ، صحيح الحلم خلص ، لكن لسه حلاوته في قلبي ، اصله السكر مهما داب يفضل ياعصفورة سكر!!!

الغربة مُرة ....

الغربه مُرة يامصر ، الغربة مُرة ومرار ، شوك وصبار ، ليه بتعملي كده فينا ؟؟ ده احنا بنحبك وانت شكلك كده بطلت بتحبينا ، ليه بطلت تحبينا ، ده احنا اجمل ولادك ، صغيرين وكبار رجاله وبنات ، كان نفسنا نكتب اسامينا علي دراعك ، ونعلق صورنا يوم نصرك علي الرايات ، ونخلي بكره بتاعك اجمل الايام ونعوضك اللي فات ، ونقرب الفرحه ونقصر المسافات ، ونهديك دمنا ورده وحب ومحبه وتقبلي منا وتفرحي بينا ولما الدنيا تصعب علينا تساعدينا وتقوينا وتشد حيلنا وتساندينا .... لكن انت خلاص بطلت تحبينا ، وسبتينا نشرب المر كاسات غربه ونحلي بالسم ، جواكي براكي مكتوب علينا الهم ، ودمعنا حاضر واحلامنا مكسوره ، وجرحنا مفتوح والدم سيال ، والوجع صاحي والغلب علي كتافنا حمول تهدل جبال ... ليه بتعملي كده فينا ؟؟؟

ده احنا اللي كنا بنحلم بيك اجمل حاجه ، وكتبنا فيك الشعر والموال وغنينا ورقصنا ، وقلنا انت اجمل مهرة وكل واحد فينا عاشق وخيال ، وحلمنا ليكي ولينا ببكره جميل ، لكن طيبتك اتحولت صبار ، مر علقم والشوك بالدم ، وابتسامتك عليله تركب قلوبنا الهم ، وبقيت قاسيه ومعذبانا وشاده كرباجك علينا ومتجاهلانا ، ومكنتش اعرف قسوتك قبل مااجرب غربتك تكوينا ، جوه وبره الغربه مكتوب سوداها ومرارها علينا ، والغربه حمل وهم وغم وتعب ودموع وكرابيج بتجلد فينا ، والاهه محبوسه في صدرنا والدمع خانقنا وسابينا ، واحنا متبعترين في الارض يتامي ولابتسالي علينا ولما نترمي في حضنك نلاقي برد ومذله ، وميتك مررت في النيل وفي القلة ، وشوارعك الطيبه مشيت وسابتنا وحاراتك الدافيه قفلت بيبانها في وشنا ودبحتنا ، وناسك اللي كنا عارفينهم وبنحبهم لبسوا وشوش غريبه ولخبطونا والتوهه هيه التوهه جوه او بره ، وايه اخرت غربتنا عن حضنك الا القهر والذله ، ليه بتعملي كده فينا !!!

يامصر ياقاسيه بقيتي قاسيه ليه ، كنت الحنان كله انت حصل لك ايه ، جبتي القساوة منين ياام الحنان ، حَكْمت علي رقابنا الغبي والندل والحرامي والجبان ، واللي من غير قلب ، وسبتينا نتبعتر ونتوجع ونشكي وانت عامله مش سمعانا ، وهمومنا مش فارق معاكي ولا علينا زعلانه ، بقيت قاسيه كده امتي ياام الطيبين ، ده احنا اجمل ولادك اللي بيحبوكي وبهواكي متعذبين ، ادينا فرصه نحبك وافتحي حضنك وضمينا ، كفايه قسوه وغربه القهره كسرتنا واستوينا !!

يتمتينا ياغاليه وسط اهالينا ، يتمتينا ومن حنانك وحبك حرمتينا ، لما جرينا لومتينا ولما رجعنا و قعدنا في حجرك طفشتينا ، واجمل ولادك بهدلتيهم وسفرتيهم وبغيابهم بهدلتينا ، وبالفراق والبعد والحسره والقهره كويتي قلوبنا وكويتنا ، ولما اشتكينا همنا ليك مارضيتش تسمعينا ـ ولما ادناك ضهرنا من ورا قلوبنا ماسالتيش فينا ، ولما الغلب فاض بينا والحسرة قسيتي اكتر علينا ، بعترتينا في بلاد غريبه وفرقتينا ، وبين ناس مانعرفهاش رمتينا ، ولما بطلنا نزورك لومتينا ، ولما جينا مشتاقين قفلت بابك في وشنا ورفضت تقابلينا ، هو قدرنا نتعذب في حبك ولا قدرنا تعذبينا ؟؟؟ ليه بتعملي يامصر كده فينا ؟؟؟

الغربه مره يامصر ، ليه بتعملي كده فينا ؟؟؟ ده احنا بنحبك وانت بطلت بتحبينا !!! قلنا مش مسافرين وقاعدين معاك عملتي مش سامعنا ومش مهتمه بينا ، جينا نشكي همنا زودتي همنا وتجاهلتينا ، وقسيت علي ولادك الطيبين ووجعتينا ، وقفلت بيبان الرحمه في وشنا واستقويت علينا ، وقسيت قلبك الطيب وعملتي انك مش مهتمه بينا ، ولما عيطنا ودموعنا سالت من القهره ضهرك ادتينا ، ولما جينا نفرحك مارضتيش تفرحينا ، ولما قلنا تعبنا من قسوتك زعلتي منك وخاصمتينا ، وكأن وجع قلبنا نصيبنا منك ونصيبتنا التقيله ... ليه بتعملي يامصر كده فينا ؟؟

الغربه مرة يامصر وبقت سم ماشي في عروقنا ، متغربين براك جواك مكويين بشوقنا ، قاعدين بعيد او جنبك ومعاكي متعذبين بطوقنا ، حبك خانق في رقابينا وفي قلوبنا ، ولا بيروينا ولا بيبل ريقنا ، ولاانتي فارق معاك حبنا ولا العمر اللي ضاع ولا الاحلام ولا قهرة قلبنا ولاكسره نفسنا ولا اليوم اللي طلع ماصَبحش علينا ولا الليل اللي مسي ومشي وسابنا ونسينا ، السم ماشي في العروق هم ، وعروقنا هربت منها ومن كتر خوفنا الدم ، وريقنا نشف واحنا بنادي ، ده احنا حبايبك ومتعذبين يابلادي ، وانت بحبك علينا بخلانه وكارهنا وتقلانه ، يامصر اسمعي صوتنا وضمينا ، وطبطبي علينا واحتوينا ، ولما نزعل من قسوتك خففي ظلمك لينا وصالحينا ، ريقنا نشف ولا بترديش علينا !!! امتي حتسمعينا وتنصفينا !!!! الغربه تعبتنا يامصر وهدت حيلنا ، وطرقك مقفوله وشنا وطال ليلنا ، كتبنا كل اللي ينفع نكتبه وقلنا ، وقدمنا روحنا هديه وانت رفضتيها ، وسبتينا محبوسين في شوارعك الظالمه ، وشمسنا مابتطلعش في ليلك الضلمه ، والامل في لسه في الروح وبنحبك صحيح متعذبين في حبك لكن بنحبك ... نموت يامصر ولا لازمينك !! ان كنا لازمينك صالحينا طيب وبطلي افترا وقسوه فينا !!!!

وداع قبل الوداع .....

ليس حزنا ياسيدي ... ليس حزنا ، ليس غضبا ياسيدي ... ليس غضبا ، يعتريني شجن موجع يثير العواصف في النفس والروح ، كلما نظرت في عينيك احسست رحيلا يقترب ووجعا يطغي، وقبلما تكتبت بنصلك الكلمه الاخيرة ، لملمت مشاعري واستعديت للرحيل ، سالت دمائي فوق الاسطر ترسم قلبا ونجمة ودمعتين ، شجنا ياسيدي كل ماتبقي لي من صفحات الايام ومحطات حياتي ، شجن يوقظ الذكريات ويداعب القلب ويستجلب الدمع ، شجنه احبه ويبكيني ، فلاتشغل راسك ياسيدي بهواجسي سيقتلها الوقت ويقتلني ووقتها لن ازعجك ، وقتها عليك تتخلص انت من ذكرياته وشجنك ومني ، وقتها ياسيدي لاتبحث عني فقد كنت هنا دائما ياسيدي وانت لم تنتبه منشغلا بالبندقيه التي تشرعها تبحث عن عصفور ملون تصطاده ، كنت هنا ياسيدي ولم تفهم معني وجودي فهل ستنتبه كالعاده بعدما يفوت الاوان ، وداع ياسيدي قبل الوداع ، فلست انت من سترحل بل انا وشجني وذكرياتي ، وساتركك علي شجره العصافير تغرد كالعصافير التي لا تشبهم ، لا تشغل قلبك ياسيدي بشجوني سيقتلها الوقت ويقتلني ووقتها لن اتذكرك ، فهل للموتي ذاكرة موجعة ؟؟ ..

وبعدما تمر الايام وستمر مهما كانت صعبه او قاسيه ، وحين تصمت عصافير شجرتك وتضيع اللغه والمفردات ويشق التفاهم والوصل ، لاتبحث عني ، ابحث عن كرواني في السماء ستجده يخاطب ربه ، اشكو لك لك لك ياصاحب الملك ، ابحث عنه وحاول تبدل شكواه فرحا ، ليس من اجلي ياسيدي بل من اجلك انت ، فمااصعب ان تفقد من لاتدرك قيمته وومااصعب ان تدرك قيمته بعد رحيله ومااصعب وخز الضمير حين يعذب صاحبه لانه عذب نفسه بغباء وحرم نفسه سعادتها بسذاجه ، مااصعب ان تضيع رصيد الايام الحقيقيه في لعبه مزيفة ساذجة ، فالالعاب تنتهي سريعا وطفولتك سينفذ حمقها ، وقتها ستتذكرني ودفئي وحناني وشجني ، وقتها لن تجد الا الشجن يوخزك فتفهم معني مااحس انا به الان ، ليس حزنا ياسيدي .... ليس حزنا ، ليس غضبا ياسيدي .... ليس غضبا ، انه الشجن الموخز ياسيدي ومازلت ساذجا لتفهم معناه ، اعذرك واشفق عليك ، وداع ياسيدي وداع قبل الوداع !!!ا

ادي الربيع عاد من تاني

وادي الربيع عاد من تاني

اوعي تمشي وتسيبينا !!!!

( 1 )

اوعي.... اوعي تمشي وتسيبنا ، نصحي من النوم الطويل نلاقيكي رحلت غضبت منا ، من قلبك محيت اسامينا ودعيتي علينا ولعنتينا وخاصمتينا وانت بتحبينا ، قلت تمشي تأديبنا وعملت مش سامعه صوتنا ورحت ماشيه واحنا بنقولك بلاش اوعي تسيبنا ، انت قررت تسيبينا خدتي معاك احلي حاجه في تاريخنا وعمرنا ، خليتي بينا وسط صحرا واتخليتي عننا ، كنا اطفال محتارين لسه بنفك الحروف ونقوي القلب علي الخوف وشنا في الحيطه واحنا مخروسين متكدرين متذنبين ، وانت ماشيه بنناديكي ، نرجوكي نصرخ عليكي ، وانت ولا بتعبرينا ولا بتردي ندانا ، وترحلي غضبانه منا ، لاننا اهملنا حبك ومعرفناش فعلا نحبك ، ولاقدرنا التاريخ ولا يوم وقفنا جنبك وفرحنا قلبك ، ولا صنا معزتك و كبرنا عزك ، واتهزمنا الف مرة ، وحاربنا واتحاربنا ، وكل نكسه نقول بكره حننتصر و كل مره تصدقيناولما تيجي مره تانيه ونتهزم تعيطي جامد علينا ونعيط احنا معاكي ، اصل نفسنا مره نسعدك وننول رضاكي ، فاصبري شويه علينا و اوعي تمشي وتسيبينا ..

( 2 )

اوعي تمشي وتسيبينا ، انت زهقت من هزايمنا الكتيرة وزهقت من كتر العياط ، من ضحكنا و لعبنا ومن اللي سافر واللي هاجر ، واللي راجع واللي في الهيصه زاط ، وزهقت من كتر المحايلة ، وزهقت من كتر الكلام ، وزهقت من كتر السلام اللي يقل المعرفه ، وزهقت من كتر الزهق والانتظار ، وزهقت من كتر التمني واشتهيت الانتصار ، وحلمت ياما ببكره جاي احلي لينا ، وانتظرت وصبرت ولما فاض بيكي زهقت من الامنيات اللي فضلت امنيات ، ولاواحده فيها اتحققت وكأننا قاسين عليك ، وكأننا قاصدين نضايقك واحنا زي ماانت عارفانا حبايبك بس مش عارفين نفرحك ، ولانحافظ عليك وعمالين نجرحك ،وانت زهقت منا ، قوليها صريحه ، اذا كنا احنا زهقنا خلاص من نفسنا ، ومن حزننا ومن همنا ، ومن غُلبنا ومن صمتنا، ومن كتر كلامنا وقلة فعلنا ، ومن الهزايم اللي عماله تحرق قلبنا ، نفسنا مره واحده ننتصر ، مش كل مره نتقهر ونتكسر ، نفسنا نعلق الرايات ونفرح ، ونرقص في الشارع معاكي ، يوم سعدك وهناكي ، بس لحظه النصر ماجاتش وانت تعبتي من الهزايم ومن اعذارنا ومن عياطنا ومن رزانه عقلنا وكتر تهريجنا وعبطنا وصممت تمشي وتسيبنا ، قلت جايز يمكن يعني بهجرك عنا تعلمينا ، ان اللي يحب بلده يحطها في نني عينه و جوة قلبه ويخاف عليها ، ولما تناديه قبل ماتكمل نداها يكون خلاص رد عليها وقدم حياته فدا احلامها وفداها ، اللي يحب بلده يعرف ازاي ينتصر علشان يفرحهاويتعلم من هزايمه القاسيه عمره تاني مايجرحها ، يتعلم من هزايمه ازاي تاني مايتهزمش واحنا حبايبك لكن ليه مابنتعلمش بنتكلم كتير ، وعمرنا مانسمع ولا نفكر بجد ولانرسم احلامنا لبكرة وكيف حيكون شكل الغد ، وانتي خلاص زهقت من كلنا زهقتي من قله حيلتنا وغلبنا وقلت ماشيه ... واحنا بنقولك اوعي تمشي وتسيبينا ، اصبري شويه علينا ...

( 3 )

قلت ماشية وانت قاصده تعلمينا ازاي نحبك ، بالعطاء مش بالكلام ، ولا برسم الكدب في الاحلام ، ولا ببيع الاوهام ، تعلمينا ازاي نحبك ، لما الوجع يوجعنا اكتر ، والضلمه تبقي ليل نهار ، والقمر يخاصمنا زيك والبرد يحتل الديار ، والوجع يخرس غنانا والحلم يرحل عن خيالنا ، ويبدل الفرحه سكوت والحياه اللي كنت اجمل حاجه فيها تتبدل خوف وموت ، والموت يبقي زي العيشة مر والحياه طبعا امر ، واحنا نفضل موجعين ، من حضنك الغالي ياغالية ومن جنة ترابك مطرودين ، ونناديك نقول يارب تسمعنا وانت سمعانا وعنيدة ولابتردي علينا وكأنك ياحبيبتي بعيدة سايبنا نتعلم من وجعنا ومن هزيمتنا سايبنا نكبر وقاعده تدعي ربنا نكسب ونفلح ، ولما طال الانتظار والزمن اصبح مرار زهقت منا وقلت تمشي وتسيبينا ، اوعي .. اوعي تمشي وتسيبينا محتاسين ، مش فاهمين الدرس لسه ولا فاهمين اخر حصة ، ولا عارفين اخرتنا فين ولاعارفين جايين منين ، طولي بالك علينا واشرحلنا مره تانيه ، قولي اخر كلمتين قبل ماتمشي ياغاليه اما نعرف ننتصر ، فترجعي ياغاليه لينا واما نفضل ميتين ، فتعيطي جامد علينا ، لكن انت خلاص زهقت من الكلام وكفرت بكل امانينا والاحلام ، قلت تمشي ويأما نعرف نفرحك فنرجعك واما تمشي للابد وتسيبنا ياحبيبتي حزنانين .... طيب وحياه خالتي ام حمادة ومرات جدي جورج بسادة وابن عمة طنط بطة وحياة فاطمة ومريم وميلاد وحياه كل البنات القمرات والولاد وحياه كل من مرعلي بابك وحبك ادينا فرصه واصبري شويه علينا واوعي تمشي وتسيبنا ....

( 4)

اوعي .... اوعي تمشي وتسيبنا وتاخدي معاك احلي الذكريات ، لما تاخدي معاك كل حاجه جميله حصلت في حياتنا وتسيبنا من غير ماضي ولا حاضر جميل ، نستحمل العيشه ازاي ياغاليه ؟؟ ونعيشها ليه ؟؟ده احنا حنبقي يتامي واهالينا عايشة ، محرومين من الدفا ومن الحنان ، والابوة والامومه والامان ، مقطوعين من شجره ماتت ، نشبه فرع ميت جدره مات قصاد عينه ، ليه ياغاليه حتسيبينا وماشيه ليه واحنا بنحبك ياغاليه ومهزومين ، ماسكين ديل جلابيتك مقهورين ، ماهو لما تمشي وتسيبنا تدبحينا ، حتسيبنا ازاي وتمشي ، توجعينا ازاي وتقسي ، ده انت لسه مامشتيش وخلاص الخوف قتلنا ، لو مشيتي ورحلتي تفتكري ازاي يبقي حالنا ؟؟ اصبري شويه علينا واوعي تمشي وتسيبنا ...

( 5 )

قولي حتاخدي ايه معاكي وانت ماشيه ، حتاخدي ماضينا اللي فات ولا كتب التاريخ والذكريات والسواقي والقناطر وكل الاهرامات ، ولا النيل الفسيح جايب الخير وات ، وبرديات الفراعنه خايفه عليها منا والتماثيل العظيمه ، والمسلات حتخلعيها ياغاليه وكل حاجه ليها قيمه ، راح تخبيها منا خايفه من ايام جايه رضية ، خايفه منا علي التاريخ وعلي الحضاره ، خايفه علي اسمك وروحك من التتار ، ناوية تاخدي معاك في رحلتك كام دير وكام كنيسه تحافظي عليهم جوه قلبك من سنواتنا الكبيسة ، ناويه تاخدي معبد ابو سمبل وطريق الكباش تحكي عن كل تاريخنا لحبايبك اللي جه زرانا وقت عزك واللي ماجاش وكحل عنين الفراعنه حتشيله للعرايس لما يوم الفرح يجي ، وابو الهول حتودعيه ويفضل اسير معانا ولا حتاخديه ياغاليه وتسيبنا خايفين حزانا ، والازهر تشيله من مكانه بعواميده الاثرية ومدارس العلم والفتوي والوسطيه وطه حسين وشهاده العالميه ، دول برضه حتاخديهم ياغاليه وتسيبنا طيب ومقام الست زينب والحسين سيدنا حتسيبهم ينفعونا في ليله صعبه يدعوا لينا ولا في الغربه حتاخديهم معاكي وتستخسريهم فينا ، ونفيسه العلم حتسيبها لمين وراكي ولا هي كمان حتاخديها معاكي ؟

والفيشاوي تقفليه وانت زعلانه علينا ، زمن الغنا والقعده والصحبه الجميله راحت عليه ، والشعر والازجال والدواوين تخرسيها ، والنايات تكسريها ، والغناوي تحرميها من المعاني وتحرمينا ، والموسيقي الحلوه تاخديها معاك وتسيبنا ، ناوية تاخدي معاك دواوين جاهين وحجاب ونجم والنديم ، واغاني شاديه وعبد الحليم ، والحجار و منير ورشدي ، وعبد الوهاب وانت عمري ، وبليغ وكل الفنانين ، ناويه تحرمينا من فرقه رضا ، لارقص خلاص حنرقص وحنقضيها بكا ، والست ام كلثوم تاخديها معاكي وتسيبنا في شرق ضلمه كوكبه سافر وراكي ، والجامعه برضه تقفليها والتلاميذ تروحيهم والكتب تحرقيهم والمدرجات تقفليهم ، محفوظ وادريس العباقرة من ابداعهم تحرمينا ، ومسرحيات عبد الصبور ونجيب سرور ، وكلام الشرقاوي وحكايات القهاوي ، والمهندس وعادل امام والريحاني ضحكهم حتحرميه وترجعيلنا الغم تاني ، وتلمي الكور الشراب من العيال وتقطعيها ، والشوارع اللي كنا نحبها ونحب فيها تغييرها ، والنكت وخفه دمنا حتسكتيها ، باختصار كل ذكري في كل قلب حتمسحيها ، وتسيبنا صفحه بيضا يكتب الزمن الاسود بحروفه عليها اسمه هو ويمحي اسمك واسامينا .. طيب اصبري شويه علينا وطولي بالك معانا واوعي تمشي وتسيبينا !!!

( 6 )

حتاخدي ايه ياغاليه معاكي ، القمح الاصفر في الغيطان ، الشمس وصوت الادان ، الامومة والحنان ، صوت هديل الكروان ، الحنة من كعب الصبايا ، وحتاخدي كمان الرحاية ، والكحل من رمش البنات والضفاير الطويلة علي الضهر تضحك ، شمع زفه العروسة ولا طرحتها الحرير ولا مفرش سفرتها ولحاف السرير ، منخل السبوع والهون والمغات ، ذكرياتنا واللي جاي واللي فات ، عوايدنا وعادتنا وتقاليدنا الجميله ، ناي ومزمار وطبله وصاجات ، والاغاني والموسيقي والنايات والمواويل الجميلة والسعاده في ليالي القمر الطويلة ، حتاخدي منا فوانيسنا القزاز والشمعه وتحرمينا من ليله الخميس وبخور صلاة الجمعه ، حتسرقي منا سهرتنا في ليالي رمضان وتحرمينا من فرحه الصيام ، ولما نخرج من الكنيسه حتحرمي علينا الكلام ، حتاخدي تكعيبه العنب البناتي ، وريحه الشوي عند الحاتي ، وعودين ياسمين وفل ، وبسمه ناوية تخطفيها من فوق وشوش الكل ، وتسيبنا موجوعين ، البنات بترقص قدام المرايه وتغني ، والحمام الطاير وقت الغروب متحني ، والحواري والكباري والتكيات القديمه والمباني الاثريه في شوارعنا العظيمه ، ناويه تاخدي الترماي القديم ومقله اللب وعربيه الحرنكش ، واغاني بياعه الدرة لما تلهلب فحمها ، ناويه تاخدي معاك كورنيش النيل ، ووقت المغربيه وقمر الليل والفرحه والحلم والمواويل ، وتسيبنا مقهورين ، قولي حتاخدي تاني ياغاليه معاكي ، بيوت الفلاحين في الصعيد ولا عرق الشقيانين ، ولا قعده مصطبتنا في يوم دفا ، ولا لمه عيلتنا وضحكها وقت الصفا ، ولاريح البحر ناويه تخطفيها وتسيبينا مخنوقين ، ولا زفه العروسه لما كنا فرحانين ، ولا نخل طريق بلدنا ناويه كمان تقطعيه ، وشجر البرتقان قبل ماتمشي تقلعيه ، والارض اللي كانت سمرا طيبه تبوريها ، والترع اللي تجري الميه فيها تنشفيها ، وتسيبينا شراقي وعطشانين ، ولانصعبش عليك مااحنا ياغاليه متعاقبين اصل زمن الحب راح ، والمحبه والاماني والوجع فتح الجراح ، وفكرنا بهزيمتنا تاني وانت خلاص زهقتي منا ومن الاماني ، طيب اصبري شويه علينا واوعي تمشي وتسيبنا !!!!

( 7 )

حتاخدي معاكي ياغاليه وانت ماشيه ، حتاخد زلعة المش وتمشي وتسيبنا حياتنا ماسخة ، حتاخدي خبيز جدتي وعيشها المرحرح ، والقراقيش اللي نقشتها بايديها ، وصاجات الكعك رصتها بفرحه ، حتاخدي معاك البتاو والعيش الشمسي وبطرمانات المخلل وصينيه القلل المعطره بالمورد ، وبطرمان اللارنج اللي خالتي زرعته شجرة اصالة وماتت وسابت لنا طعم الفرح ، ومربي الورد اللي ستي عطرتها بطيبتها ، حتاخدي معاكي الوان شم النسيم وتسيبنا في عيشه سوده مخنوقين لا نسيم قادرين نشمه ومن الوان الفرحه محرومين ، حتاخدي معاكي قدره الفول المدمس وتسيبنا نعيش من غير مزاج اصل الا الفول ياغاليه ده مزاجناوحبيبنا وتفانين نفس اجمل طباخينا ، حتمنعينا من الحمام وصواني الكنافه والباميه ورز البرام ، وتسيبلنا اكل سم نموت وناكله اكل طعمه مانعرفوش !!! الفرن القديم بتاعتنا حتردميه وكل اكل كنت جايباه لينا مخصوص حتمنعينا منه وترميه ، وتسيبنا نحكي عن ايام زمان ايام جدودنا لما كنا ولما كان ، وكانت الايام جميله بس ماحافظناش عليها ، قولي بس ناويه تاخدي ايه كمان معاك وانت ماشيه ، الطعميه والعجميه وغزل البنات وصواني البسبوسه وسكر النبات ، والفول النابت والعيش والسكر السنترافيش ، والعروسه الحلاوه والحصان دول كمان حتخديهم معاكي وتسيبي مولدنا من غير حلاوه وتسيبي لينا المر وصفه للقلوب الموجوعين طيب بس طمنيني لما حتمشي هنهون عليكي وحتسيبنا لمين ؟؟

( 8 )

ناويه تاخدي ايه معاكي تاني وانت ماشيه ، القناطر والرحلات المدرسيه ، والشجر اللي شاهد علي الغرام بين شباب زينه مجدع واجمل الصبايا ، لما كانوا بيحلموا ببكرة بتاعهم فقبل مابكره يجي امبارح خدعهم وباعهم ، ناويه تاخدي كل المراكب في الغروب وتسرقي النيل والبحر وتسرقينا ، وتردمي كل السواقي وتكسري كل الصاجات وتلغي اغانيك وكل النغمات ، الجربي حتشيله كمان من راس البر ومعاه هوا البحر وقعده البلاجات وحتسيبي لينا المشانق منصوبه علي الرمله تفكرنا بكل اللي فات ، وحتمسحي اسم الاحبة من فوق صخره ميامي ولما نيجي نشتكيليك تسيبنا وتخشي تنامي ، حتي مطروح حتقفلي سكتها وتمنعينا وتقولي هناك حمام كليوباترا وشاطيء الغرام وانتم مالكوش في المشاعر والهيام ، فسيبوا التاريخ في حاله لما تبقي تخفوا من فقدان الذاكره ابقوا تعالوا ، وتقسي علينا وتحرمينا وتمشي في الاخر وتسيبينا طيب قولي اي كلمه وطمنينا .. حتسيبنا ياغاليه وتمشي وتخلي كل ايامنا حداد ، وتقسي قلبك علينا وتعيطي علينا من ورانا ، وتستقوي قدامنا ولاكأنك من جماد ، وانت اصلا مرهفه وام الحنان حتي لما بنوحشك بتطلعي من مخبأك الهرم وتوعديه ، انك لمكانه الاصلي حترجعيه ، وحترجعي تضحكي تاني في وشوشنابعد مانكون انتصرنا بعد سبعميت مليون هزيمه ، وانت صابره وعماله تقوي فينا ، واحنا لسه بنتعلم ازاي ياغاليهنعرف نحارب ولسه ماطمرش فينا العلام ، لسه بيخدعنا الكلام !!!

( 9 )

بالحق قولي لي ياغاليه حتاخدي معاكي ايه تاني في رحلتك الللي مش ناويه منها ترجعي ، تاخدي اجمل مشاعرنا وتسيبنا في البلاده غرقانين ، وتقولي ايش فهمكم انتم في المشاعر ، وكنتوا فين لما دبحوها وباعوها وسكتم ، كنتوا فين لما ضربوا الاحبه في الشوارع وطلبوا من الحب بطاقته وهو صعلوك وصايع ، كنتوا فين لما مسحوا الاغنيات من الشرايط وركبوا الهم عليكم ، كنتوا فين لما كانوا حيهدوا الهرم والكنيسه حيشيلوا منها رنين الجرس والادان سكتوه وقالوا ده زمن الخرس والحريم شالوا منها الرحم وعقموها وكل الارض بوروها والرجاله الزين المجدع خوفوها وبلقمه العيش هددوها وبرزق العيال والسجن وجهنم الحمرا وقوايم الذنوب والفضايح صغروها ، كنتوا فين لما كل ده حصل واكتر ، كنتوا ساكتين وشاربين الهزيمه نقطه نقطه ومتخلين عن شرفكم والعزيمه ، ومستنين لما السفاحين يقتلوني الف مره ومجهزين هدومكم السودا ودموع الحزاني المكلومين خلاص بقي ارحموني ، ده اللي قلتيه لينا وانت خلاص مسافره قلت ماشيه قلت راحله قلت ياتفوقوا وتصحوا ياتروحوا في الف داهيه ، قلت ياتتعلموا الدرس الاخير ياتتهزموا تاني ، وساعتها امسحوا اسمي من علي كل اوراقكم وغيروا البطاقات ، وشوفوا خريطه تقبل بالهزيمه وتوأد البنات ، وانسوني وسيبوني ابني مجدي وارفع راياتي بعيد ، في مكان تاني اهله لسه مابقوش عبيد ، في بلاد بتفهم في الحب والفرحه والعيد ، وتحترم التاريخ والجغرافيا وتدافع عن وجودها بقلب جامد ودماغ عنيد !!! كل ده قلتيه واكتر واحنا قاعدين بنسمع، والدموع بحر جاري والحيره سم ، ونفسنا نفرحك والعيشه هم واكيد بكره حننتصر بس انت اصبري شويه علينا واوعي تمشي وتسيبنا !!!

( 10 )

قلتي ايه ياغاليه خلاص ، رضيتي علينا ولا لسه ، قاعده ليه ياغاليه تحت شباكنا ومابترديش علينا ، ولو اتكلمتني مرة من كتر ما صعبنا عليكي ، بتفكرينا بخبيتنا وتستخبي بذكرياتك وتحمي لينا ذكرياتنا ، وتقولي شدوا حيلكم واجمدوا واستحملوا وانا بكره حارجع لما ترجعوا الغنا في القهاوي وترجعوا ست الحسن في كل الحكاويوماتخافوش من ضحك البنات وتتعلموا من اللي فات ، ان اللي يسكت ويفرط في بلده تمشي وتسيبه ، وتمسح اسمها من فوق جبينه وتسيب له شلالات دموع هديه بيها تفكره وتكدره ، قلت ماشيه قلت راحله قلتي خلاص بطلوا تنادوا علي وانت قاعده بكل حبك تحت شباكنا مستنيه نناديك ، ونعرف نصالحك ونراضيك ، ونعرف نبطل نتهزم ونعرف كمان ننتصر ، ونعرف نعيش ايامك الحلوة ياحلوة وراسنا مرفوعه لفوق ، طيب وحياه عمتي سعادات وابله تريزا جارتنا الجدعه وحياه الواد الشطور نوار وحياه البت صفية العسله وحياه كل اللي بتحبيهم واللي ناويه خلاص تسيبهم وحياه غلاوتنا عندك وحبك لينا ، اصبري شوية علينا واوعي تمشي وتسيبنا الوجع جامد ياغاليه واحنا مش حمل الاسيه ، وناوين بجد ناوين نبطل نتهزم اصل الهزيمه ماتليقليناش ولاشكلنا والهزيمه مش قدرنا والنصر جاي مهما انكسرنا ، اوعي تمشي وتسيبنا اصل البلد اللي عايزين يجيبوها لينا رسمه في خريطة بلد لقيطة ، مالهاش تاريخ ولا ليها حضن يلمنا ، لاعمرنا حنحبها ، ولا عمرنا حنغني يوم باسمها ، ولاهي تشبهنا ولا احنا نشبه لها ، لا عسلها نيل ولا صبحها زيك جميل ولاابتسامتها تطيب القلب العليل ، ولا فيها كروان بيحب الغنا ولاحتقسامنا الهنا ، ولا بناتها منورين ولا رجالتها حنينين ولا حنسكر من نسيم بحرها ولا ريحه الاصاله في دربها ولا طيبه وحنينه زيك كده ومهما قالت عمرها ماتحبنا ومهما عادت عمرنا ما تحبها ، فاوعي تمشي وتسيبنا لو لسه بتحبينا ، حنذاكر الدرس بسرعه وحنفوق ونتلم ونصحي ، ونعزك قد ماتستحقي ونتعلم ازاي نبطل نتهزم وازاي نبطل نتغلب وازاي نبطل نتخدع وازاي نفكر وازاي نقرا ونكتب وازاي نقدر وازاي نحترمك زي ماانت تستحقي وازاي نقدم عمرنا فداك وانت غاليه بس اصبري علينا واستني شويه واوعي تمشي وتسيبينا !!!!