الاحلام الصغيرة والبهجة !!!ا

كتبي .... من الاربعة مدونات 

ياما دقت علي الراس طبول 

الشوارع حواديت 

ضل راجل ولا ضل حيطه 

قوس قزح ملون 

12 كتاب في ثلاث سنوات 

يبدو

ان الاحلام الصغيرة عندما تتحقق تتحول لبهجة كبيرة 

انساني

الفهم اوشك ينفذ 

الصفح اوشك يتلاشي 

والصبر انتهي الا قليله

لم يبق لك عندي الا بعض المشاعر 

ربما وهم ربما ذكريات 

لاتكن احمق بليد وتبعثرها 

لم الدك من رحمي ولست صغيري 

كنت حبيبتك وضيعتني 

تفهمت حمقك ولم تتفهم غضبي 

واليوم تحدق في بعيون بليدة زجاجية 

وكأنك ضحية  !!! 

لست ضحية ياسيدي ولست حبيبي 

افلت اصابعك المعلقة في ثوبي

دعني  وودعني  

وانساني ... 

قصه حب .... من زمااااااااان

متي ؟؟؟؟؟؟؟؟؟؟

متي ستدعوني للرقص ؟؟

فارتدي اجمل فساتيني وحذائي الجديد 

وافتح قنينه عطري التي تحب رائحتها 

واطلق شعري غجريا متمردا علي كتفي العاري 

وامسك باناملك واسير بخفه فوق ساحه الرقص 

اقترب منك فتقترب سعيدا

تقبض علي روحي بين ذراعيك وترفعني في الهواء 

وتتمتم في اذني بكلمات غرامك 

وتمنحني اجمل ابتساماتك 

وتزين جيدي بعقد ياسمين 

وشعري بورده حمراء 

وتطمئني انك ستظل تحبني بعدما استيقظ من نومي 

وتغادرني الاحلام ؟؟؟؟

لا وقت للحب !!!ا

لاتعرف وسط  كل مايحدث كيف تحبني  ؟؟!!!

هذا عذابك ووجعي 

سنوات مرت 

وانت مخطوف في عوالم الاشرار تحاربهم 

وتعطل قلبك وتبطيء دقاته حتي تنتصر عليهم 

اختياراتك واضحه اما الموت واما النصر 

والحرب طويله والعمر يجري فوق ساحات النزال 

وانت ترفع سيفك وتعالج جرحك الاجدد وتنسي الاقدم وتقاتل 

لاتقل لي لا وقت للحب ، فأنت تحبني وتنكر 

ففي خنادق الحروب لامكان للعواطف ولا للنساء 

لامكان لمروج خضراء واسعه تطلق فيها اسراب مشاعرك وتحلق 

لامكان فيها للاقواس القزحيه والدم يسيل ودخان بارود اعداءك يعمي الابصار 

وانت تحارب مغمض العينين شاهر سيفك في عين الاعداء

ولاتقبل الا هزيمتهم وانتصارك 

في خنادق الحروب لامكان للمشاعر والرهافه 

ولا وقت لقرض الاشعار ورسم اللوحات الزاهيه وممارسه الحب 

في خنادق الحروب يسترح المحاربون قليلا ليعود بمنتهي الحماسه والقوة للحرب  

وانت ادمنت الخندق والحلم 

ادمنت الخندق تلقي فيه بجروحك وتجدد خلاياك وروحك 

وتنظف سيفك من دنس الاشرار وتسنه للمره الالف لتقتلهم وتقصر ايام الانتظار 

وتنام بعين مفتوحه تنتظر الموت ، تبتسم وانت تنتظره فقد رواغك الف مره ولم يأتي 

تنام بعين مفتوحه وقلب يدميه الحب ولايسعي اليه فمن يترك سيفه ليحب ؟؟

اخبرني بالله عليك من يترك سيفه ليحب ويهزم ليعيش ؟؟

الموت يكون جميلا وقت الحرب ، يغرس بدنك رايه لمن سيأتوا من بعدك 

ويحصدوا دمك وبقايا جروحك الف نهار يذكروا فيهم اسمك 

فانت فتحت الحصن وهم انتصروا 

وانتم رحلت شهيدا وهم عاشوا مرفوعي الرأس 

انت ادمنت الخندق والحلم 

ففي وسط الليل الطويل وانت غارق في العتمة تنتظر شظيه تقتلك 

تحلم بفراش واسع وملاءة حرير ونافذه واسعه تدخل شمس النهار لحضنك 

وعصفور اخضر يوقظك بقبلات متلاحقه صغيره 

وقطرات ندي تطهر روحك من دنس القهر الذي حاربت طويلا ومازالت لتقهره وتنتصر 

والحرب سجال والمعارك تتلاحق وانت لاتملك رفاهيه ترك السيف ونسج الشعر 

ولاتملك الا ذراع تحمل به سيفك ولاتمنحه لي اتكأ عليه

وانا وحيدة انتظرك واشتاق لك والعمر يتقدم بي وانت لاتتقدم صوبي 

الايام تمر والمعارك كثيرة وسيف مازال مشهرا وجروك تنزف 

وانا انتظرك وانتظر عنوان في جريده يزف للوطن انتصاراته 

فالون شفتي بلون الشوق وانتظرك في الشرفه 

وحين اراك مازلت حيا اصفق لبطولتك 

فانت حاربت وانتصرت وعدت لي حيا 

وقتها ستغرقني في بحار غرامك وستعيش معي كل الباقي من ايامك 

كل يوم بالف الف يوم 

فالايام التي تمنحها الحياه للمحاربين بعد الانتصار غير كل الايام 

انها الايام التي تركتها لهم في ايام العمر ليعيشوا ويحتفلوا 

بعدما حاصرهم الموت طويلا 

حين تأتيني علي قدميك مبتسما وفي يدك باقه زنبق 

وسيفك في خصرك معتقلا راضيا بسكونه 

سامنحك حبي وحضني وكل احاسيسي 

وساسرقك من بقيه ايام العمر 

وسألون وجهك بالفرحه 

واقص عليك حواديتي قبل النوم 

وحين تنام كالطفل الطيب 

ساطفيء نور الغرفه وابقي بجوارك اراقب انفاسك واطرد عنك الكوابيس 

واحبك وابادلك الحب !!!! 

انهي معاركك وانتصر فقد زاد الشوق 

انهي معاركك وانتصر فقد طال انتظاري وتعبت 

انهي معاركك وانتصر وعد لحضني حيث خندقك الامن 

انهي معاركك وانتصرفالفرسان مثلك لايغمدوا سيوفهم الا وقت الانتصار او وقت الموت 

بالله عليك خض معركتك الاخيره واعتق نفسك واعتقني

فمازال في عمرك ايام للفرحه فلا تتأخر وانتصر وعد بسرعة !!! 

ثرثرة فوق النيل

• 
  

الساعه 26 

11/ 2/ 2012 

باكره موت التريقة !!! 

عمري ماشفتها خفة دم ولا لطف وظرف !!! 

باحس التريقه سخافه وهبل !!! 

وباحسها دلاله عجز رهيب عن المناقشه الحقيقه الجاده !!!! 

باحسها دلاله عجز من ناحيه ومراره من العجز من ناحيه اخري !!!! 

باكره موت التريقه !!! 

اللي مش عارف يتكلم جد لان معندوش منطق للكلام والمناقشه ، يتمسخر علي اي موضوع ، يطلع فيه القطط الفاطسه ، يتريق عليه وعلي صاحبه ، لانه عاجز عن المناقشه الجاده يحول اي موضوع جاد لهبل نضحك عليه وننساه وبس !!! 

وفيه فرق بين التريقه والفكاهه وبين التريقه وخفه الدم وبين التريقه والنكته !!!! 

ومش معني اننا نتكلم في اي موضوع جد يبقي دمنا تقيل والموضوع دمه تقيل ، مين قال كده ، اللي قال كده اللي مابيعرفوش يتناقشوا ولا يتكلموا ولا عندهم حجه حقيقيه في اي موضوع ، فاول ماتيجي تتكلم جد ، يقولك حرام عليك ياعم راسنا واجعنا ، وكان المناقشه الجاده وجع دماغ والضحك والمسخره والتريقه هي اللي بتريح الراس والنفسيه " واديها في الهايف وانا اقولك يانانننسسس !!!! "

ويحكي ان يوسف بك وهبي ذهب للمنصوره ليقدم احد مسرحياته العالميه الشهيرة وباللغه العربية الفصحي ، واثناء العرض واندماجه فيه ، صرخ رجل من القاعه ( جري ايه ياسي يوسف اللي فينا مكفينا ماتقول لنا مانالوج !!!) واصبحت قصة يتداولها الناس ساخرين من الجديه ساعين للهزل والضحك الفارغ بحجة ( اللي فينا مكفينا !!!) !!! 

( مره واحد جه يقعد علي قهوه قعد علي شاي ) دي نكته !!! كانت زمان من 40 سنه نكته لطيفه تضحك ، دلوقتي جايز باخت ومابقيتش تضحك ، لكن في الاول وفي الاخر هي نكته !!! 

لكن اللي بيحصل الايام دي واللي بنسمعه ، لاهو نكته ولا هو بيضحك ، وكلام بايخ من الاول وفي الاخر !!! 

ولايمكن يكون مقياس لمايسميه البعض ( خفه دم المصريين ) فمايقال ثقيل الظل مثل من يقولوه والمصريين وخفه دمهم ابعد ماتكون عما يحدث الان !!!! 

مايحدث الان ، لايمكن ادراجه حتي تحت تعريف ( السخريه السياسيه ) التي قال بعض المفكرين ان المصريين يواجهوا بها القهر والقمع والديكتاتورية التي تخرس السنتهم عن المناقشه الجاده فيهربوا للسخريه وسيله للتعبير عن افكارهم السياسيه وغضبهم من القهر والكبت وخرس الالسنه .. ليه ، لان الظرف السياسي اختلف واتفتحت كل الابواب علي البحري وكل الناس بتتكلم في كل حاجه واي حاجه ، حتي اخر زمن النظام القديم ومنذ 2005 تقريبا قبل الثورة كانت الناس تقول اننا نعيش عصر ديكتاتوري لايسمح الا بحريه الكلام وقد شاهدنا وقتها حدود حريه الكلام في الصحف وفي الفضائيات وقدر اتساعها !!! اذن انتم ونحن وكلنا ، لانعاني من كبت وقهر وديكتاتوريه - علي الاقل في مجال الكلام وحريته - تجبرنا علي الفرار من المناقشات الجاده ( لفداحه ثمنها ) للهزل والضحك سبيلا للتعبير !!! 

اذن لماذا يحدث مايحدث !!! 

وتحضرني عشرات بل مئات الامثله الساخره المليئه بالتريقه علي كل شيء وكل شخص وكل موضوع والتي يفيض بها الفيس بوك وتويتر " عنبر المجانين كما اسميه " والصحف والجرائد والفضائيات والمدونات ... لماذا كل هذا الهزل والعبث والسخريه والتريقه والضحك المجنون ؟؟؟؟؟؟؟؟؟؟؟؟؟ 

ليه باقول كده ، لاننا بقالنا سنه في مصر بنتسمم من التريقه ، بنتسمم من التريقه اللي ضيعت كل المعاني الجاده وسط ركام السخريه الفارغه التافهه ، بنتسمم من التريقه وبدل مانتناقش بجد في اي موضوع ، نتريق عليه ونتريق علي التريقه ونضحك ونضحك ونضحك ودماغنا تتمسح اكتر واكتر والمواضيع تتوه بين الضحك والهزار ولاحد يفهم حاجه وهو المطلوب اثباته من جيوش الساخرين المطلوقين علي راسنا يفكوا في صواميلها خطوه خطوه علشان لانفكر ولا نفهم ولانختلف ولا نتفق ولا نوصل لاي نقطه نعرف بيها احنا مع ايه وضد ايه ومع مين ضد مين ، جيوش الساخرين بتلعب في راسنا وتفك صواميلها علشان نتوه اكتر واكتر والتايه احسن زبون يتقلب ويتسرق ويتخطف ويضيع ، ماهو تايه اصلا حيجري له ايه تاني يعني؟؟؟؟؟؟؟؟؟؟؟؟؟؟

ماخبيش عليكم ، انا لما باسمع اي جمله تتقال عموما ، وجمل التريقه والمسخره خصوصا ، اسال روحي سؤال بسيط ، اللي بيقولها بيقولها ليه ، ماهو مافيش حاجه بتتقال من غير مبرر ، دي مش غازات ضاغطه علي القولون فلازم تطلع في وشنا علشان يستريح ، ولا دي حته بلغم متعلقه في الزور لازم يكح علشان يعرف ياخد نفسه ، لا دي افكار وكلمات وسياق ونسق ومعني ومترتبه بطريقه معينه وصولا لهدف معين .... 

تاني اسال روحي ، اللي بيقول اللي بيقوله ده بيقوله ليه ؟؟؟؟؟

وعلي راي الفرنساويين cherchez la famme ـ وهما طبعا مش قصدهم ( الfamme ) بالضبط يعني لكن قصدهم ابحث عن المستفيد ، مين صاحب المصلحه في - في موضوعنا - في اللي بيتقال !!!!

طيب ، جيوش الساخرين ، اللي مسكت الامواس وهاتك ياتقطيع في كل المواضيع وفي الناس تريقه وسخريه ومسخرة ونقوزه ، عايزه توصل لايه ؟؟؟ 

عايزه تبسطنا يعني ونضحك ؟؟ طيب ضحكنا وبعدين ؟؟؟

عايزانا نضحك اكتر واكتر ؟؟ ماشي حنضحك ونضحك لما نفرفر علي الارض ويجي لينا مغص من كتر الضحك ونعيط من كتر التقلصات الضاحكه ، وبعدين ؟؟؟؟؟؟؟ استفدنا ايه بقي من كل ده ؟؟؟

ضحكنا وخلصنا ضحك وبعدين ، الموضوع الاصلي اللي بنتكلم فيه راح فين ؟؟؟ فهمنا منه ايه ؟؟ استفدنا منه ايه ؟؟؟ ولا حاجه ، ده يمكن من كتر الضحك نسينا اصلا احنا كنا فاهمين ايه وعارفين ، يمكن من كتر الضحك دروخنا لغايه مافرهدنا لغايه ما تنحنا وبس ، ولا اي حاجه تانيه !!! 

هل ده الهدف ، اننا نضحك زي الهبل ونضحك ونضحك ، ونضحك تاني ونضحك ونضحك وبس !!! 

وزي الهبل ليه ، لا مااحنا لما نضحك ونضحك وبس ، نتحول لهبل بجد !!! 

هبل يعني لانفكر ولا نتناقش ولا نتكلم بجد ولا نتقدم خطوه لقدام ولا نفهم حاجه مفيده !!! 

هبل يعني راسنا كلها بالوظه وجيلي وعقل غائب وادراك بعيد ومخ سايح ونضحك لمانموت ونموت من كتر الضحك !!!! 

وكأننا في غرزه حشيش !!! 

كل واحد ضارب نفسين والوعي يغيب والضحك يشتغل !!!! وبكره من كتر الضحك حنعمل عجين الفلاحه ونضحك واللالي اللالي ياميمون ونضحك ونوم العازب ونضحك ، وامك اسمها حنفي ونضحك ، ودي مش امي دي مرات ابويا ونضحك ، واصل حروق الانسان ونضحك ، وماشربتش من طينها ونضحك و................ نبقي اراجوزات من غير سيرك ، بنضحك علي كل حاجه ولما مانلاقيش حاجه نضحك عليها ، نضحك علي نفسنا لاننا عايزين نضحك وبس !!! 

بجد بجد ، باحس كتير قوي اننا في غرزه حشيش وكل الناس ضاربه انفاس والدخان الازرق بيلف المكان وكل الناس عينيها مبرقة من كتر الغيبوبه ولاحد فاهم حاجه لكن مبتسمين او مكركعين من كتر الضحك !!! باحس اننا في غرزة حشيش و" اذا كان حرام ادينا بنحرقه واذا كان حلال ادينا بنشربه ) كل الناس عماله تتريق حتي علي نفسها وعلي بعض وعلي اي حاجه وكل حاجه وهاتك ياضحك ، ونضحك ونتشقلب علي الكراسي ونفرفر علي الارض وبطنا توجعنا من كتر الضحك ونقول جملتنا المصريه الشهيره الله مااجعله خير ، ونتعب من كتر الضحك فننام !!!! 

طيب مين بقي ، اللي قرر ، ان ده الوقت المناسب ان المصريين يفقدوا الوعي اكتر ، ويغيبوا اكتر ، مين اللي قرر ان ده الوقت المناسب بدل ماعقولنا تصحصح وتفوق ونفهم اكتر ونتحرك لقدام ، قرر ان ده الوقت المناسبه لحفله الحشيش الجماعية وزي مشهد " يحيي الفخراني " صلاح في فيلم " الكيف " لما دخل يعزي وهو ضارب سيجاره الحشيش فقعد يقلع في هدومه ويضحك ويقول للناس " انا في غايه السعاده "  و " عقبال عندكم جميعا " ، " بتضحك علي ايه - مش عارف - ياجدع امسك نفسك - مش قادر بجد امسكها معايا " وحين ساله ابن المتوفي " حضرتك جاي تعزي ولا جاي تهرج " اجابه " لا جاي اهرج" 

اهو احنا - معظم المصريين وبالذات في الفضاء النتي - زي صلاح كده ، جايين نهرج وعمالين نقول لبعض وقت المصيبه عقبال عندكم ومحدش عارف يمسك نفسه ولاحد عارف يمسكها معاه !!!!!!!! 

ليه ؟؟؟؟؟ ليه بقينا كده وبقينا عاملين كده ؟؟؟؟ 

والله يرحمه العبقري نجيب محفوظ لما عمل روايه  "ثرثره فوق النيل"  غرزه الحشيش في عوامه علي النيل ، بعد النكسه ، الشعب كرسته الهزيمه وضياع الحلم فأدمن الحشيش والغيبوبه وفقدان الوعي و...............الفلاحه ماتت ولازم نسلم نفسنا ، الهتاف الصاخب الاخير والغائبين علي الوعي يحتفلوا بقتلهم لفلاحه لم يجد بسبب غيبوبتهم اي ذره انسانيه ليحزنوا عليها وكيف يحزنوا وهم غائبي الوعي فاقدي الادراك ، الفلاحه ماتت ولازم نسلم نفسنا .... يضحكوا ويهتفوا ويرقصوا غائبين عن الوعي و............ انيس او ونيس ( مش فاكره الاسم بالضبط وان كان للاسمين دلالات دراميه لاتغيب عن فطنه وبراعه نجيب محفوظ وقت اختيارها ) يفك الحبل الذي يربط العوامه والغرزة بالارض ويطلقهم في النيل مع التيار حيثما ياخذهم ، وماداموا غائبي الوعي فاقدي الادراك فليتوهوا ايضا ويسيروا حسبما تذهب بهم الريح وتيارات المياه السريعه !!!! 

واذا كان نجيب محفوظ ، رصد حاله الشعب الذي كسرته الهزيمه فضاع مشروعه القومي وحلمه ففقد الوعي والاراده وعاش مسطول يضحك علي نفسه وعلي خيبته وعلي هزيمته يضحك ويضحك حتي التوه والضياع !!! فمالذي يدفع بعض المصريين وهم انتصروا في ثورتهم - واسقطوا النظام القديم او رأسه - مالذي يدفعهم لفقدان الوعي والغيبوبه والضحك المستمر والسخريه الدائمه والتريقه الثقيله وكأنهم مهزومين ضائعين ؟؟؟؟

بالمناسبه كل شيء قابل للتريقه والسخريه منه ، حتي نفسك شكلك اهلك امك اولادك بلدك اهم القضايا التي تشغلك مصيرك حياتك ، لكن احدا لن يستفيد شيء من تلك التريقه والسخرية وكثره الضحك !!!! 

ربما نتفق او نختلف مع الفريق شفيق ، لكن مناقشه امر بلوفره لن توضح لنا لماذا نرفضه او نقبله ؟؟؟

ربما نختلف او نتفق مع توفيق عكاشه ، لكن اختزال كل مايقوله في موضوع البط وكاكاكاكا لن يفيد احد !!!! 

ربما نختلف او نتفق مع الدكتور الكتاتني في ادارته لمجلس الشعب وربما نرفضه او نقبله لانه من حزب الحريه والعداله الجناح السياسي لجماعه الاخوان المسلمين لكن اختصاره في بومبنايه " الهوهوز " امر لن يفيد احد ، لن يوضح لماذا نختلف او نتقف لماذا نرفض او نقبل !!!! 

ربما نختلف او نتقف مع اللواء الفنجري لكن اختصاره في " صباع الفنجري " والسخريه عليه وعلي اصبعه دون مناقشه لمضمون خطابه الغاضب وقتما القاه لن يفيد احد ، سنضحك نعم لكننا لن نستفيد شيء !!!! 

ربما نختلف مع حزب الحريه والعداله ونرفض افكاره او نتقف معه ، لكن نشر صوره علي الانترنت لطفل مولود وعلي مؤخرته صوره لشعار الحزب مع " تحبيش " تلك الصورة بعبارات ساخره عن المعجزات التي خلقت رضيع بشعار الحزب علي مؤخرته ، امرا قد يضحك البعض لكنه لن يفيد شيئا في ادراك معني اختلافهم اواتفاقهم مع حزب الحريه والعداله ، سنضحك ونضحك ونزداد بلاهه وفقط !!! 

من هؤلاء ؟؟؟

من هؤلاء الذين يملئون الفضاء النتي سخريه من كل شيء وعلي اي شيء 

من هؤلاء الذي يعدون الصور الضاحكه والعبارات الساخره والمعاني الساذجه يطلقوها علي الجمهور وهو واثقين انه سيضحك ويضحك وفقط !!! 

من هؤلاء الذين يعرفون نفسيتنا وطريقه تفكيرنا واننا احفاد المواطن الذي صرخ " جري ايه ياسي يوسف اللي فينا مكفينا ماتقول لنا مانالوج " ويعرفوا اننا شعب لايقوي علي المناقشات الجاده ولا الافكار الثقيله و" مالناش تقل علي الغم " واننا بنحب الضحك وولاد نكته واننا اللي خرمنا التعريفه ودهنا الهوي دوكوا ويعرفوا اننا شعب يعتبر " الفكر " مرض يلزم العلاج منه وربنا يكفينا شره ، وان فيلم " اسماعيليه رايح جاي واغنيه كمناناه " حققوا اعلي ايراد في تاريخ السينما المصرية وان " الليمبي " صار بطلا قوميا وهو يغني " هش هش ياديك الفرخه دي مش ليك " وان قصيدته العاطفية العظيمه " بولوبيف بولوبيف " تحولت لوسيله غزل يتبادلها الاحباء في يوم الفلانتين ، من هؤلاء الذين قرروا بعد الثوره التي فرح بها معظم المصريين ، قرروا يحاصروهم في خانات الضحك التافه والسخريه العقيمه والتريقه السخيفه ويحجبوا عنهم اي مناقشات جاده " مالهمش تقل عليها " ويجيشوهم كالقطيع خلف معاني فارغه وتافهه اما مع واما ضد ، ويحشدوهم في هذا الصف او ذاك ، او هذا الفريق او ذاك بعصا السخريه والضحك والتفاهه والهبل ؟؟؟؟؟؟؟؟؟؟؟ 

من هؤلاء الدارسين لنفسيه المصريين ويعرفوا اثر الاعلام الموجه والتعليم الرديء والتعصب الكروي علي عقولهم ، فقرروا بعد الثوره حرمانهم من نتائجها الحقيقيه ، لم يتقدموا بهم خطوه واحده صوب اي شيء جاد حقيقي ، لم يقولوا لهم لماذا انتموا لهذا الحزب او ذاك ، لماذا يرفضوا هذه الافكار او تلك ، لم يقولوا لهم اقرؤا برامج الاحزاب وتاريخ الثورات ، لم يقولوا لهم معني الاشتراكيه والليبرالييه والعلمانيه ويتركوا لهم حريه الاختيار بين هذا وذاك ، لم يقولوا لهم لماذا غاضبين من شفيق موضوعيا ، لم يقولوا لهم لماذا يرفضوا توفيق عكاشه وكلامه - الذي احبه بالمناسبه - لم يقولوا لهم معني الفاشيه الدينيه والفاشيه العسكريه ومخاطرهم ، لم يقولوا لهم دور منظمات المجتمع المدني ووظيفتها ، لم يقولوا لهم معني اي شيء بشكل موضوعي جاد يترك في عقولهم اثرا ، بل حولوا الامر لمسرح كشك بيه وكابريهات عماد الدين وهاتك ياتريقه وتلسين وسخريه ومألزقه وتفاهه ، ايوه هما عارفين ان الكلام ده حيجي علي هوي معظم المصريين التي مش عايزين يتعبوا مخهم المرهق بضغوط الحياه ، ايوه الكلام ده حيجي علي هواهم لان راسهم واجعاهم وكفايه ان واحد باثق فيه يقول نكته علشان اقولها ويغني بشويه سخريه علشان ارد عليه ونبقي كلنا تافين في بق بعض ، وكاكا كاكا ، وهش هش ياديك الفرخه دي مش ليك وبدل مالناس تفوق وتمسك راسها ، تغيب اكتر واكتر وتبقي مجرد مفعول به تابع لصاحب النكته والسخريه ، هو يقول واحنا نضحك وهو يقول واحنا نضحك وبس خلاص ، والدخان الازرق ينتشر اكثر واكثر واكثر !!!!!!!!!! 

بالمناسبه ، اتخن حاجه في الدنيا ممكن نتريق عليها ونمسخرها ونتمهزء عليها !!! 

فالتريقه والسخريه ليس دلاله علي اي شيء ، ليس دلاله علي القوه ولا التمكن ولا القدره ولا صحه المواقف ولا الاختيارات !! 

بالعكس التريقه والسخريه عمال علي بطال دلاله التفاهه والهبل !!!! 

قال سيدنا النبي عليه افضل الصلاه والسلام ، كثره الضحك تميت القلب !!! 

وقال المثل الشعبي ، الضحك من غير سبب قله ادب ..

وقال احدهم ، الجد جد والهزار هزار ...

والله عيب !!!! 

ورانا حاجات مهمه جدا وقضايا كثيره تحتاج فهم واختيار وقرارات واراده 

واحنا سايبين كل ده وعمالين نضحك علي التافه والمليانه واللي يضحك واللي مايضحكش !!! 

والله عيب !!! 

واعتب اكثر مااعتب علي بعض المثقفين - او ممن يعتبروا انفسهم كذلك - لانهم سايروا الناس في حمي الضحك بل واضحكوهم عامدين الهائهم عن اهم قضاياهم بالضحك العبيط !!! فكما تعلمنا في عالم السياسه قديما ان الاكثر وعيا هو الاكثر مسئوليه !!! ويفترض في هؤلاء المثقفين انهم اكثر وعيا بقضايا وطنهم وبالتالي اكثر مسئوليهم تجاهه وتجاه اناسه ، عليهم تنويرهم عليهم نقل الوعي لعقولهم المشتاقه للفهم ، بدلا من ادخالهم في متاهات الضحك الرخيص والتفاهه الغثه !!!! 

والله عيب !!!!!!!!!!!!!!!

( اديني من وقتك ساعه - 26 ) 

محدش علي راسه ريشة !!!!!

( الساعه 25 )

9 فبراير 2012 

سافرت لاوربا علي مصر الطيران !!!!!!!!

اول مره من سنين اركب الشركه الوطنيه !!!!!! 

قلت لا مش حادي الخواجات فلوسي ، شركتنا الوطنيه اولي !!! 

واللي يحب مصر مايخربش مصر ، واللي يحب مصر يدي فلوسه لمصر ، واللي يحب مصر يدعم اقتصاد مصر وشركتنا اولي وحجا اولي بلحم توره و......... حاركب طيارات شركتنا الوطنيه !!! 

وبدأت الرحلة ....

علي باب الطياره قابلني مصريين مضيفين ومضيفات ، شبهنا بالضبط ، راجل خمري بعيون كحيله وبنات قمرات زي الشربات ، وكبيره المضيفيات ، مصريه سمرا " تخينه " زيي وزي ابله لولو وزي حضراتكم " للستات " وزي زوجات حضراتكم " للرجاله " مصريه سمرا اصيله اصيله يعني وعلي وشها ابتسامه مليانه دفا ...

طبعا المضيفين والمضيفات دول مش زي مضيفين الشركات الخواجاتي ، لااجسامهم غصن بان ولا شعرهم اصفر ولا عينيهم زرقا ، ناس من الركاب بصت للمضيفين بقرف ، ال ايه مش عاجبهم شكلهم ، ياي ياي تخان ومكعبرين ، ياي ياي سمر وبشعر اسود ، بصيت للساده القرفانين باستغراب ، هما  ُسمر زي المضيفين وشعرهم اسود من قرون الخروب ، يعني عادي دود المش منه فيه ، كلنا شبه بعض ، لكن الساده القرفانين مابيبصوش في المرايه علي نفسهم واتشطروا علي المضيفين والمضيفات بتوع مصر للطيران ، ال ايه مش عاجبنهم !!! ماعلينا !!! 

وبدأت الرحلة ............ كابتن الطيارة فتح المايك وحيانا ، و......... كلام كتير معناه اهلا بيكم وتوصلوا بالسلامه ووقت الرحله ومش عارف ايه ... والله يسلمك ياكابتن ، قلت في سري .. وبعدها قلب الكلام انجليزي يامرسي ، والراجل برابنت وهاتك ياكلام وهاتك ياتحيه وهاتك ياشرح للطريق والوقت والساعه ودرجه الحراره ، فجأ ، لمحت علي وش ست قاعده جنبي ، لمحت علي وشها تعبيرات قرف ، فيه حاجه مش عاجبها وحسيت انها شامه " ....." حاجه ريحتها مش حلوة ، قررت اركز افهم هي قرفانه ليه ، ركزت في كلام الكابتن علشان افهم  سر قرف " الوليه القرفانه اللي قاعده جنبي " والحقيقه تركيزي ماطالش ، لانها بسرعه ضحكت ضحكه ساخره اول مالكابتن قال كلمه انجليزي مش فاكرها ، قالها بال ( B ) بدل مايقولها بال ( p ) ... ااااااااااااااه ، فهمت ، المدام اللي عاوجه بوزها وقرفانه ، زعلانه من الكابتن بتاع الطياره لانه مابيعرفش ينطق ( P ) زي الانجليز والامريكان المتحضرين وبينطقها ( B ) زي المصريين البيئة !!!! 

ربطنا الاحزمه وقلنا دعاء السفر و.............الكابتن جري بالطيارة بسرعه بسرعه بسرعه اسرع اسرع و..........بقينا في الهوا ، عمل اقلاع نموذجي عظيم ، شطور الكابتن ده ، لكن ده ماشفعش له عند الوليه القرفانه ، يبقي طيار شاطر مش مهم ، المهم ينطق ال P صح وماينطقهاش B  زي الناس الجاهله البيئة !!! والطيارة طايرة والاكل نزل والمضيفات عماله تجري وتخدم الركاب وتبتسم والمضيفين بيوزعوا كروت مصلحه الجوازات وبعدين بيعرضوا علي الركاب البرفانات والسجاير المعفاه من الجمارك واخر نشاط وحلاوة ومبتسمين وبيبذلوا مجهود ....

قررت انام ، لكن انام مين ، راسي اشتغلت ، كل شويه ابص للوليه القرفانه اللي قاعده جنبي ، عايزه اخش راسها ، نفسي اسالها ، مالك ياولية قرفانه ليه ، المضيفين والمضيفات بيبذلوا جهد رهيب وماخلوش علي راي المثل فوق الجهد جهد ، والكابتن الطيار شايلنا وبيجري وسط السحاب والرحله بديعه ولا هبدنا في مطب هوا ولا وقع الطياره ، مالك قرفانه ليه ؟؟؟؟؟؟؟؟ 

وطار النوم ، وراسي هاتك ياتقليب !!!! 

قبل مااقول لكم اخر ماوصلت له راسي وهي متعلقه بين ايدين الكابتن ورحمه ربنا فوق السحاب ، حاحكي لكم حكايه تانيه ، لا حاحكي حكايتين الاول ...

الحكايه الاولي - زماااااااااااااان 1990 ، اتصلت بي صديقه تعمل في منظمه نسوية ، وقالت لي ، فيه وفد ستات هنود بيعملوا دراسات عن الاحوال الشخصيه وعايزين يقابلوكي يعملوا معاكي مناقشه عن قوانين الاحوال الشخصيه المصرية ، تحمست طبعا وقلت اهلا وسهلا ، وبعد مالميعاد اتحدد ، اكتشفت انهم طبعا حيتكلموا انجليزي يامرسي واني حاحتاس يامرسي حوسه التايه في المولد ، حاحتاس لاني مش حاعرف اشرح قوانين الاحوال الشخصيه بالانجليزي اللي اعرف بالكتير اصبح عليهم بيه ، المهم ، نزلت اشتريت قاموسين عربي انجليزي انجليزي عربي خاصين بالقوانين ، ولما جت الستات الهنود ، اعتذرت بانجليزيه ركيكه مليانه غلطات في النحو والصرف اني مش حاعرف اشرح لهم القوانين بالانجليزي بتاع بلاده ، واني يادوبك حافك الخط ولما حاحتاس في كلمه حافتح القاموس ، الستات الهنود ابتسموا ابتسامه مؤدبه وشكروني علي المجهود اللي ببذله علشان اشرح لهم القوانين ، طبعا اكيد كان كلامي زباله وال" جرامر " زبالتين والجمله متركبه بطريقه تضحك ، لكن من خلال كل ده فهموا القوانين المصريه للاحوال الشخصيه ، فهموها وشكروني علي المجهود ، وبعد مقابلتين تلاته اربعه ، وفي يوم اللقاء الاخير ، واحنا بنودع بعض ، كررت اعتذاري عن الانجليزي الرديء، فردت اصغرهم وكانت بنوته متمرده وشقيه وشكلها مقاوحه ، ردت علي بمنتهي الجديه وقالت ، انت بتتكلمي انجليزي مكسر لكن مسز تاتشر لاتنطق العربيه ، انت اشطر منها !!! وباستني ومشيت !!!! 

الحكايه التانيه - من ثلاث ايام فقط ، واثناء وجودي في سويسرا ، قابلت سيده ايرلنديه مسلمه محجبه ، متزوجه من مصر صديق لاصدقائي في سويسرا ، كانت سيده لطيفه جميله وبتتكلم عربي مكسر " علي الاخر " لكن كنا بنفهم هي بتقول ايه ، كلنا كنا مبسوطين من كلامها العربي المكسر ، محدش قرف منها  وهي بتتكلم عربي من غير ( ح ) ومن غير ( ع ) ومن غير ( هـ ) ، بالعكس ، كنا مبسوطين من كلامها ومن اصراراها الدؤوب علي الكلام بالعربي ، وحتي لما تقول حاجه محناش فاهمينها ، نقول لها بتقولي ايه ، تقول تاني وتالت وفي الاخر نفهم وهاتك ياضحك كلنا من كتر السعاده ، ولما كانت تقول للراجل ( انتي ) وتقول للست ( انت ) كان الراجل يرد عليها ومايحسش انها بتهين ذكورته ولا الست تحس انها طلعت ليها شنب ، لا عادي وعادي جدا كمان !!!! ويوم بعد العشا ، لقيناها فجأ صرخت من الفرح ( اللللللللله بلااااااا شااااااا ) مافهمناش هي فرحانه ليه ، قالت تاني ( بلا شا ) ، ( بلا شا ) برضه مافهمناش ، شاورت بايديها علي مكان في اخر الترابيزه بتاعت العشا ، بصينا وفهمنا وضحكنا ، صديقتنا كان قصدها ( بلح الشام ) لكن لا قالت ال ( ح ) بتاعت البلح ولا قالت ( م ) بتاعت الشام !!!! 

هل ياتري حد من الناس قرف من طريقتها في الكلام ، او قال انها بيئه ، او قال انها غلطانه ، ابدا ، كلنا احترمنا اصرارها وهي بتتكلم وانها بذلت مجهود علشان تعرف تتكلم عربي ، احترمنا مجهودها لانها فهمت العربي ومعانيه وبتحاول تتكلم ، طبعا لسانها معووج ، لكن مش ذنبها ان لسانها معووج ، لا ، هي رغم لسانها المعووج اللي مابيعرفش ينطق ال( ح ) و ( هــ ) و ( ع ) بتحاول بجد تتكلم عربي وتحاول تعبر عن افكارها وعن نفسها وافلحت ونجحت وتستحق كل التحية !!!!! 

نرجع بقي للولية القرفانه اللي كانت قاعده جنبي .... الولية دي ، هي مش وليه طبعا بالمعني الدارج ، هي مدام الا فرنكه غالبا خريجه مدرسه انجليزي يامرسي وغالبا متريشه هي واهلها ، وغالبا مولوده في بقها او بق ابوها معلقه دهب ، المدام دي اتعلمت في مدرسه انجليزي ، واللي درس لها مدرسين خواجات بيعرفوا بسهوله ينطقوا ال ( p ) وعارفين الفرق بينها وبين ال ( b ) ...

وقلم يعني ( pen ) وكتاب يعني ( book ) واللي في المدرسه الانجليزي يقول ( ben ) يضحكوا عليه واللي يقول ( pook ) يضحكوا عليه ويتريقوا عليه ... علشان كده طلعت المدام متعلمه صح وعارفه الفرق بين الاتنين ، اتعلمت صح وبسهوله وبقت بتنطق ولا خواجات اكسفورد ستريت !!!! 

احنا بقي ، احنا ، انا ومعظم حضراتكم والكابتن والمضيفه وبقيه الشعب المصري اللي حظه حلو وفلت من مقصله الاميه والتسرب من التعليم ، احنا كلنا اتعلمنا في مدرسه الاورمان الثانويه والناصريه الاعداديه وام المؤمنين وسيد الشهدا ، مدارس حكومه عربي والانجليزي ماده رخمه مااحناش فاهمينها ، والتيتشر بتاع الانجليزي بيحاول معانا واحنا بنحاول معاه ، وبنحفظ الكلمات ومعانيها ووبنحل التمرينات وبنكتب ( الكومبوزيشن ) و( الكومبريهينشن ) و ( الديكتيشن ) ... التيتشر مموت نفسه معانا واحنا مموتين نفسنا معاه وكلنا بنحاول ، والراجل التيتشر او الست التيتشرايه بيبذلوا مجهود معانا واحنا بنبذل مجهود معاهم علشان نخلص منهج الوزاره ونحفظ معاني ال1000 كلمه و( الاسبلنج ) بتاعهم ، طبعا وسط المحرقه دي ، لا التيتشر ولا التيتشرايه فارق معاهم الفرق بين ( b ) و ( p ) ولا الفرق بينهم ، دي اتفه حاجه في الموضوع ولاتفرق خالص وسط المصايب اللي هما فيها ، المهم تحفظوا وتعرفوا تحلوا في الامتحان وتتنيلوا علي عينكم وتنجحوا و............. قد كان ونجحنا واتخرجنا من المدرسه ووراها الجامعه وبننجح ونجيب نمر وتقديرات عاليه واتخرجنا واشتغلنا وفضلنا نقول علي ال ( p ) ، ( b ) والعكس بالعكس وعادي يعني مافيش مشكله !!!!! 

طبعا ، لما نتسحب من لسانا وننطق قدام ناس من اللي متعلمين بجد وبفلوس كتيره قوي لما ننطق قدامهم ونلخبط بين ( p ) و( b ) يبتسموا باسي وسخريه مكتومه لو كانوا مؤدبين قوي ، او يضحكوا بصفاقه لو كانوا " تنكين ومتعجرفين وقللات ادب " يضحكوا علينا ويسخروا منا ، ليه ان شاءالله ، لاننا غلطنا في البخاري ، لاننا لخبطنا الانجليزي المحترم بتاع الانجليز المحترمين اللي فرقوا بين الناس اللي تستحق الاحترام اللي تميز بين ( P ) و ( b ) وبين الناس اللي تستحق الضحك عليهم لانهم جهله مابيعرفوش يميزوا وهما بيتكلموا بين ( P ) و( b ) .......... 

طيب لما الانجليز شخصيا او الخواجات عموما ، يتكلموا عربي مكسر ويلغوا كل الحروف ( ح ) ، ( ع ) ، ( هـ ) ليه مابنتريقش عليهم ومابنتمسخرش عليهم ومابنعتبرهمش يستحقوا الضحك والسخريه ، لان العربي بتاعنا مش معيار الاحترام ولايفرق مين بينطقه ازاي ، لكن الانجليزي بتاعهم معيار الاحترام ومعيار الناس المحترمه !!!!!!! 

طيب ماتيجوا بقي نخرج من الصندوق !!! 

نخرج من الصندوق اللي حبسونا فيه !!!!

نقلع افكارهم من راسنا !!!!

ماتيجوا بقي نتحرر من احتلالهم لراسنا !!!

ونعتبر الانجليزي مجرد لغه زي العربي بالضبط !!!

ونقول ان العربي اللي بيتكلم انجليزي مكسر زيه زي الانجليزي اللي بيتكلم عربي مكسر بالضبط !!!

الاتنين يستحقوا الاحترام لانهم بذلوا مجهود علشان يتعلموا لغه تانيه جنب لغتهم الاصلية !!!! 

وبس كده !!!! 

والطيار بتاع شركتنا الوطنيه اللي بيتكلم انجليزي مع اللخبطه في ( p ) و ( b ) اكيد اشطر في اللغات من الطيار الالماني او الانجليزي اللي مابيعرفش ينطق ولا كلمه عربي لا مكسر ولا صحيح ، لان طيارنا ، بجانب شطارته في قياده الطياره والوصول بينا لبر الامان ، كمان بذل مجهود كبير علشان ينطق بالانجليزي يامرسي ويحيي الخواجات بلغتهم ، هو اشطر من الطيار الالماني ولا الانجليزي ولا الامريكاني اللي ماحاولش يتعلم لغتنا ولا يحيينا بيها ، اما لانه شايفنا لانستحق التحيه اساسا او شايف انه مش مضطر يتعلم اي لغه بجوار لغته العظيمه اللي علي العالم كله يتعلمها ويتكلم بيها ، وان كان عاجبكم !!!! 

احنا شعوب بتبذل مجهود كبير علشان تعجب محتليها وغازيها وتخضع لقواعدهم وافكارهم !!!! ورغم هذا لانعجبهم !!! 

وطار النوم طول الرحله وانا عماله افكر وابص للوليه القرفانه اللي قاعده جنبي ، ابص لها وهي بتابع المضيف وهو بيعرض البرفانات والسجاير للبيع ، واحده تساله بكام البرفان دي ، يفتح كشف في ايده علشان يعرف سعر البرفان ، سلوكه مش عاجب الوليه القرفانه ، عايزاهي بقي حافظ اسعار كل البرفانات وحافظ اساميهم وماركاتهم ، الراجل بجد بيبذل مجهود ويدور في الكشف ويوصل للمعلومه اللي عايزها ويقولها للراكبه بابتسامه لطيفه ودوده ، لكن الوليه القرفانه مش عاجبها ، يمكن لانه اسمر وشعره اسود ، يمكن لان كارفتته مش " سينيه " يمكن لانه مصري وهي اتعلمت في مدرستها الانجليزي ان الخواجه احسن من المصري والشعر الاصفر اجمل من الاسود والعيون الزرقا اجمل من السوده وان الاحتلال الانجليزي احسن لمصر من الاستقلال والسياده المصرية !!!! 

و................. ليدز اند مين ............يخرج صوت الطيار هادئا ينبه الركاب ان الطائرة علي وشك الهبوط في مطار القاهره الدولي و.......................... من غير مانحس نلاقي الطياره علي الارض ، و""لاندنج"" هايل ياكابتن وبرافوا عليك وعلي شطارتك !!!! 

وياسواق ياشاطر ودينا القناطر ، ياسواق ياشاطر ودينا القناطر .....

" ملحوظة فكرت فيها .... كان مفروض علي شركتنا الوطنيه وهي بتختار الطيارين تكون متأكده انهم مش بس بيفهموا في الطيران لا كمان بيعرفوا يتكلموا انجليزي زي بتاع بلاده ، لان صوته واجهه لينا وللوطن ولازم يكون واجهه مشرفه ويعرف يرطن زي الخواجات بالضبط !!!!! ولا مفروض ولا حاجه !!!! ماهو كل الطيارين في كل الشركات الاجنبيه مابيتكلموش عربي ، ولا فارق مع شركاتهم وقت مااختارتهم انهم يكونوا بيعرفوا يتكلموا عربي ، بيختاروهم شاطرين في الطيران مش في العربي !!! واحنا كمان بنختار طيارينا شاطرين في الطيران مش في الانجليزي !!!! واذا كان مطلوب من طيارينا يتكلموا انجليزي مطلوب من طيارينهم يتكلموا عربي ومحدش احسن من حد ومحدش علي راسه ريشه !!!!! ... خلاص ملحوظتي خلصت !!!!""""

اخرجوا من الصندوق ربنا يرضي عنكم علشان نعرف نشوف نفسنا كويس بعينينا احنا مش بالعينين الزرقا للخواجه ابو وش احمر!! 

وبجد بجد صدقوا ان محدش علي راسه ريشه !!!! 

الريشة كانت علي راس الهنود الحمر اللي ابادوهم وهما بيبنوا حضارتهم العظيمه والنظام العالمي الجديد !!!! 

اوعوا تنسوا ان " الريشة " كانت علي راس الهنود الحمر ، الله يرحمهم ويرحمنا !!!!!

( اديني من وقتك ساعه - 25 ) 

مساله حياة او موت !!!!

الساعه 24 

8 فبراير 2012 

كنت في زياره قصيره لسويسرا 

درجه الحرارة كانت 17 تحت الصفر والشمس المرسومه تزين السماء ..

فكرت وانا اسير ارتعد من وحوش الصقيع وهي تنهش في جسدي الملتحف بكل الملابس الصوفيه الممكنه ، فكرت ان التدفئه في تلك البلاد مسأله حياه او موت ، لايمكن يعيشوا ولا يتواجدوا علي ظهر الكره الارضيه الا اذا ضمنوا تدفئه دائمه ومستمره ، والا تحولوا مثل دببه القطب الشمالي والبطاريق ، يعيشوا داخل كهوف الثلج نصف اموات نصف احياء !!! 

التدفئه في تلك البلاد ، في هذا النصف من الكوره الارضيه ، مساله حياه او موت ، التدفئه ، ليس قطعتين خشب يشعلوهما لتدفئه اصابعهم المتجمده ، بل التدفئه التي تسري في عروق وشرايين المجتمع ليعيش ويتقدم وينتج ويخترع ويستمتع بحياته !!! 

وبلادنا هي التي تملك التدفئه ، تملك البترول ليضخ الدفء في عروقهم وشرايينهم ونملك الشمس الرخيصه التي منحها الله هبه لاترد ، بلادنا هي التي تملك التدفئه ، وتملك الحضاره القديمه وتملك ارض الديانات والانبياء ، هم يحتاجوا بلادنا ليعيشوا ، كمثل الكائنات الطفيليه لايمكن لهم العيش الا بمص بترولنا بشواربهم الدقيقه كالقراضه وقتما تلتصق بالجسد !!! 

يحتاجوا بلادنا ليعيشوا !!! 

في نفس الوقت ، نحن - العرب الشرق اوسطيين سكان الجنوب - بالنسبه لهم لسنا بشرا ، او علي الاقل لسنا بشرا انداد لهم ، لن يقبلوا منا نتحكم في بترولنا ودفئنا ونفاوضهم ونقايضهم ونضع رؤوسنا برؤوسهم !!! لن يقبلوا منا هذا ولم يقبلوه طيله التاريخ واحداثه خير شاهد علي حديثي !!! نحن مثل الهنود الحمر اصحاب الارض الاصليين الذين ابادوهم وابادوا حضارتهم وبنوا امجادهم فوق جماجمهم واجسادهم !!! قتلوا اصحاب الارض الاصليين وقالوا حضاره ونظام عالمي جديد !!! واليوم يسعوا لقتل اصحاب الدفء والبترول ولن تعييهم الحيل لاختراع مسمي جديد لقتلنا وابادتنا واحتلال اراضينا او علي الاقل تدجينا وتهذيبنا وادخالنا صندوقهم السحري لنري العالم بعيونهم ومعاييرهم ومواثيقهم وقوانينهم !!! 

هم يحتاجوا دفء شمس بلادنا ويحتاجوا بترولنا ويحتاجوا حضارتنا ويحتاجوا وهج انبيائنا ورسالاتهم لكنهم لايحتاجونا ولن يقبلوا نكون انداد لهم او نعلو عليهم لنتحكم فيهم ونمنحهم الدفء بقدر مانرغب بالسعر الذي نرغب فيه ، ومازلت اوربا وامريكا يتذكروا بكل الاسي الايام القليله التي قرر فيها العرب تضامنا مع مصر وقت حرب اكتوبر منع البترول عنهم ، مازالوا يتذكروا موقف الملك فيصل ملك السعوديه وقتما قرر يقطع البترول عنهم وسايرته كل الدول العربيه المنتجه للبترول ، فكانت الازمه الكبري التي عاشتها اوربا وامريكا ، مازالوا يتذكروا رعبهم الاكبر ، مازالوا يتذكروا الطوابير التي وقفوا فيها ساعات طويله ليشتروا البترول لتسيير سيارتهم ولضخ الدفء في دفايات منازلهم ، مازالوا يتذكروا قوتنا وقت توحدنا ضدهم وضد اسرائيل صنيعتهم وشوكتهم في قلبنا .... مازالوا يتذكروا ذلك الرعب وتعلموا دروسه ، ويعرفوا انهم لن يقبلوا ابدا ان يعيشوا ايامه السوداء مره ثانيه ، اذا كانت قوتكم جاءت لانكم توحدتم فالحل تفريقهم وتقسيمكم وتقزيمكم والهائهم في حروب وصراعات وانقسامات وكراهيه متبادله ، اذا كانت قوتكم جاءت لانكم تملكوا الدفء الذي نحتاجه لنعيش سنحتل بلادكم ونضع ايدينا علي الدفء نتحكم فيه بعدما نهزمكم ونشرذمكم ، وهاهي العراق تتقسم والبترول العراقي في يد امريكا وها هي ليبيا تدخل حرب اهلية والبترول الليبي في يد الناتو واوربا وامريكا وهاهي السعوديه خاضعه خانعه وهاهي قطر عميله حقيره لم تبع لهم فقط البترول بل باعت لهم الشرف والكرامه ومنحتهم ارض جزيرتها قاعده عسكريه ليضربوا منها ليبيا تاره والعراق تاره وكل القادمين في الطريق مرات اخري كمثل العاهرات اللاتي بلا ثمن يمنحهن الشارين اجسادهن لمجرد ادمان الاحساس بالمذله والخضوع !!! 

هم يحتاجوا دفء بلادنا ويحتاجونا عبيد اذلاء لانملك اراده ولا قرار ، والتاريخ يذكرنا بما فعلوه في اجدادنا وفي مشاريع نهضتنا التي اجهضوها وعاقبونا عليها ، هاهو محمد علي وقتما نهض بمصر وخرج بنهضتها خارج حدودها تكاتفت عليه دول اوربا لتحطيمه وتكسير عظامه وقوته ، فنهضه مصر تساوي نهضه العرب وافريقيا وتعني تهديد مباشر واضح لاوربا ، وقتها لم يكن امام اوربا الا ضرب محمد علي وضرب نهضه مصر والتكاتف عليه واذلال مصر !!! تعجبنا تجربه محمد علي او لا تعجبنا ، لكنه نهض بمصر وخرج خارج حدودها واسس دولة كبري ضربت بالعمد من اوربا التي لن تقبل نهضه مصر ووحدتها او سيطرتها علي الدول المجاوره واستنهاضها !!! 

وها هو جمال عبد الناصر وقتما نهض بمصر ونادي بالقوميه العربيه وعدم الانحياز وساعد علي تحرير الدول العربيه من الاستعمار الاتجليزي الفرنسي وساعد افريقا وحركات التحرر فيها علي الاستقلال والسياده الوطنيه والتحرر الاقتصادي والسياسي ، هنا ، كان لابد من ضرب مصر وكسر نهضتها ، لن تضع رأسها برؤوس الدوله الاستعماريه ولن يكون لها قرار واراده !!!! يعجبنا عبد الناصر او لايعجبنا لكنه افلح في خلق مشروع قومي عربي ، لم يكن حل لاجهاضه الا حرب 67 وهزيمتها !!!

هم يحتاجوا دف بلادنا ويحتاجونا عبيد اذلاء ، متصارعين متقاتلين منقسمين بين شيعه وسنه ومسلمين واقباط ودروز وموارنه واكراد وعرب وبربر ، يحتاجونا عبيد اذلاء لانملك اراده ولا قرار ولا قدره علي رفع سعر الدفء والتحكم في امانهم الاقتصادي الاجتماعي ، لن يسمحوا لنا بهذا - امس واليوم وغدا - مهما كلفهم الامر !!!! 

نحن ملاك الدفء والحياه وهم القتلة الذين لايمكن يعيشوا بغير دفء بلادنا ولايقبلوا يدفعوا ثمنه ولن يقبلوا منا اجبارهم بقوتنا ووحدتنا ونهضتنا وتقدمنا علي دفع الثمن الذي نريده !!! 

الدفء هناك مساله حياه او موت !!!! 

وافساد بلادنا ومحو ارادتنا الوطنيه وسيادتنا وتفتيتنا وقهر سيادتنا الوطنيه بالنسبه لهم ايضا مساله حياه او موت !!!! 

وبس !!!!!!!!!!

وعلي راي المثل المصري ، الدفا عفا والبرد لحاس القفا !!! 

وهم البرد اكل علي قفاهم وشرب حتي توحشوا وقرروا يسرقوا الدفء ولو سالت دمائنا في العالم انهارا ومحيطات !!!! 

هم لايهزروا ، فبغير الدفء وسيطرتهم عليه وبغير قهرنا وكسرنا وسيطرتهم علينا ، بغير هذا لن يستطيعوا الحياه !!! 

هذا ليس هزل ، بل هي بالنسبه لهم مساله حياه او موت !!!! 

( اديني من وقتك ساعه - 24 ) 

ابحثوا عني هناك !!!!

مدونتي .... الشوارع حواديت 

http://miro18359.blogspot.com/

مدونة ، اكتب فيها حواديت ...

وعندما اختفي من هنا ، اكون هناك !!! 

الكتابه عندي طقس يومي

فاذا لم تأتيني عفاريت الحواديت وتجذبني لهناك ، ابقي هنا واكتب 

ان اختفيت عن ناظريكم في اي يوم 

ابحثوا عني هناك ، في مدونتي ... الشوارع حواديت !!!! 

http://miro18359.blogspot.com/

الرواية الرسمية !!!!ا

( 23 ) 

الساعه الثالثه والعشرين 

25/ 1/ 2012 

الرواية الرسمية !!!! 

هي الرواية التي يقولها من يملك ان يفرضها علي الاخرين ويخرس الاخرين بالذوق او بالعافية او بالتجريس ليصمت ويبتلع روايته التي شاهدها و عرفها لانها لاتلزم احد ولن يسمعها منه الاخرون !!! 

الرواية الرسمية !!! هي الرواية التي يصرح بها " الاخ الاكبر " ويفرضها فرضا علي اخوته البنات وجيرانه ويلزم اخوته الرجال بتصديقها او قبولها او الخرس عن تكذيبها !!! 

وكيف يقوي " الاخ الاكبر " ان يفرض روايته علينا !!! 

خطه مدروسه ومعروفة ... السيطرة علي العقول !!! 

اولا .... خلق الرواية وترويجها !!! 

ايه اللي حصل ، اللي حصل هو اللي بيقوله الاخ الاكبر ، هو يرص التفاصيل ، هو يكون الصورة ، هو يسقط اللي مش عايز يشوفه ، هو يكبر اللي نفسه يشوفه ، يعيد ترتيب الاوراق والتفاصيل وشريط الزمن ، يعيد الترتيب و......... بقي فيه روايه رسمية هي الحقيقه هي الواقع هي اللي حصل ، ويقولها الاخ الاكبر ويقولها ، ويرددها ، ويحلف مره انها حصلت و....... يلعب في دماغ الناس ، مره يقول حصلت ومره يقول ازاي ماشفتوهاش ومره يقول انتم عمي ومره يقول انتم اغبيا ومره يقول انتم مغرضين ومره يقول انت مرضي نفسيين ومتلازمه استكوهولم ، والجوقه بتاعت الاخ الاكبر ، ترد عليه ، هو يقول وهي تقول امين ، هو يقول وهي تقول صادق ، هو يقول وهي تقول ياحلاوتك ، هو يقول وهي تقول وانا كمان شفت ، مره تقول في جرنان ومره تقول في برنامج ومره تقول علي الفيس بوك ومره في مره ومره في مره ، تبقي الروايه الرسميه بتاعت الاخ الاكبر هي الحقيقه وهي اللي حصلت وهي اللي كل الناس الحلوين الطيبين شافوها وعارفين انها حصلت وبيحكوها هما كمان علي لسانهم ولو حد سالهم عرفتوا منين ، يقولك الاخ الاكبر قال وهو لما يقول محدش يعرف يقول حاجه تانيه ، و..............والرواية الرسمية حقيقية مية مية !!! 

ثانيا ... الترويع والتهديد !!!

لما حد يقول مش صحيح ، مش ده اللي حصل ، يتقاله يااعمي ياللي مابتشوفش ، لما يصمم ويقول لا باشوف بس ده ماحصلش ،يتقاله ، لا ده اللي حصل ، بس انت مابتشوفهاش لانك صاحب مصلحه ، لانك اعمي القلب ، لانك مغرض ، لانك مريض نفسيا ، لانك عدو مش حبيب ، الحبيب بس اللي بيشوف اللي حصل زي ماشافه الاخ الاكبر ، لغايه كده احنا مؤدبين ، لغايه كده بنقولك انت شايف غلط ، لغايه كده بنقولك بص كويس ، لكن لو صممت بقي وزرجنت وقلت لا فيه حقيقه تانيه ، اصل واصل واصل واصل ، يبقي انت بقي اللي غاوي نكد وعلي نفسها جنت براقش وانت اللي مصمم تعادينا واحنا شعارنا مية نار علي اللي يعادينا ميه نار !!!! و......امسك مجنون الحق مخبول امسك عدو امسك حاقد امسك مريض نفسيا وادي رقم تليفونه اللي عايز يمسي عليه وادي ابوه لما اتجوز علي امه وادي امه لما كانت بتحب راجل تاني غير ابوه وادي بنته لما كانت بترقص في حفله مدرسه وهي من غير ملابس داخليه ، مبسوط كده ماقلنا لك شوف كويس ، ماقلنا لك فتح عينك تاكل ملبن ، ماقلنا لك اللي مايشوفش من الغربال يبقي اعمي ، وانت البعيد اعمي ومالكش في الملبن نصيب !!!! وتصقيف وتصفير وتطبيل ومية نار علي اللي يعادينا مية نار !!!! 

كده بقي ، بقت الروايه الرسميه هي الروايه الرسميه ، هي اللي حصلت وهي اللي كل الناس بتقول انها حصلت وكل الناس بتقول انها شافتها بعينيها وحياه طنط صفيه وراس جوز خالتي ورحمة  جدتي !!!! 

خلص الفيلم ، لا طبعا لسه بدري !!! 

يطلع واحد او واحده - مااحنا مش حنبقي اقصائيين زي البرلمان لما رفض يدخل المحاميه المسيحيه في لجنه تقصي الحقائق بمنتهي الديمقراطيه والتصويت المبدئي - يطلع واحد او واحده ويقول للاخ الاكبر ، اسمح لي يعني عفوا بجد ، اللي حضرتك بتقوله ده محصلش بالطريقه اللي قلت عليها .............

هنا تبدأ المرحله التالته من مخطط تثبيت الروايه الرسميه وتأكيدها ...

ثالثا .... الزن علي الودان امر من السحر !!!

الاخ الاكبر يتنرفز لان لسه في صراصير فيها الروح ، لكن هو الاخ الاكبر اللي مش حيرد عليهم ولا يوسخ لسانه بالكلام معاهم ، فليس وظيفه الاخ الاكبر هي الرد علي الصراصير ، لكن الاخ الاكبر عنده صراصير اكتر شراسه مستعده ترد علي الصراصير العبيطه اللي لسه فيها الروح وعنده شباشب كتيره لضرب الصراصير علي راسها وفوق نافوخها .... 

انت لسه بتقاوح ، لسه بتتكلم ، لسه بتقول بتعافر ، لسه بتقولي الروايه الرسميه ماحصلتش !!! 

طيب قول انت اللي ايه اللي حصل ، قول ، فالعبيط يقول ، يقول ، اللي بتقوله محصلش ، اصل انت نسيت اللي اتكتب في الجرنان يوم كذا ، هههههههههه ، ده كلام كذب !!! طيب واللي شفناه بعينينا في الفيديو ، ههههههههههههه ، ده فيديو فوتوشوب وصور تزيف وتلفيق !!!! طيب واللي قالته فلانه في التليفون واللي قاله فلان في التلفزيون ، انت بتصدق برضه ، دول كلهم عيله تامر بتاع شبرا او تامر بتاع غمرة ، تعرف تامر بتاع شبرا او بتاع غمرة ، ده الراجل اللي طلع يعيط في التلفزيون ، الناس دول كلهم قرايبه واهله واصدقاءه وكلهمه بيكدبوا زي مابيتنفسوا وكلهم تبع امن الدوله وتبع اللجنه الالكترونيه للحزب الوطني وتبع الفلول وتبع طره وتبع عكوشه المجنون ، اوعي تصدقهم ، ياراجل امال اصدق مين ، هههههههههههه تصدقني انا ، انا الاخ الاكبر اللي عارف مصلحتك ومصلحه البلد وحافظ التاريخ ومذاكر الجغرافيا وبحب البلد موووووووت مووووووت ، لما اقول تصدقني انا ولما يقولوا اوعي تصدقهم والا انت حر ......... حر ؟؟ طبعا ، حر جدا خالص ، حر لغايه ماتروح في داهيه ، حر لغايه ما تتنبذ برضه الصوره بتاعت عبد الحليم حافظ ، حر لغايه مانبطل نصبح عليك ، انت حر ماتصدقش روايتنا الرسميه واحنا حرين نطلع عينك وننبذك ونبطل نتكلم معاك ليه ، لان اصدقاء السوء اخطر من فيرس سي ، بيتنشروا بسمهم في الدم زي الكودافين ، يعملوا دماغ ويبوظوا العقول !!!! انت حر ماتصدقناش واحنا احرار نطلع عين امك وعين ام اللي يصدقك ونحاربك ونحاربهم ونشتمك ونتشمهم لغايه ماتقول جاااااااااي وتكتئب حبه وتزهق حبه وتتخنق حبه وبعدين تسلم وترفع الرايه البيضا وتقول ورحمه امي الروايه الرسميه بتاعت الاخ الاكبر هي اللي حصلت ، ههههههههههه ، طب ماكان من الاول ياعسل ، وانت حبيبنا وحبيب حبيبنا و.........سمعني سلام الصلح خير وسمعني الاوركسترا السيفوني وهو بيقول ويغني ويحكي ويردد الروايه الرسمية !!!! 

الروايه الرسمية يكتبها الاقوي لما يعرف يضرب الاضعف ويقص لسانه يابذهب المعز يابسيفه وستيتاته !!! 

الروايه الرسمية يكتبها المتعلم لما يعرف يلعب في دماغ الجهله الاميين !!! 

الروايه الرسمية يكتبها المستبد لما يهدد المختلفين معه بالسجن والحبس والاقصاء والعقوبات والمحاكم السياسيه !!!! 

الروايه الرسمية يكتبها اللي عنده محطه فضائيه وعنده جرنان يومي وعنده موقع علي الانترنت !!!! 

الروايه الرسميه يكتبها المنتصر علي حساب المهزوم ، لان مش كفايه خيبته انه اتهزم لاكمان يلزم فضحه وتجريسه بروايتنا الرسميه وخليه هو في خيبته وهزيمته ووكسته السوده !!! 

الرواية الرسمية التي يكشف التاريخ بعد طول زمن انها اكذوبه ملفقه مزيفه وان الواقع الذي حدث شيء والروايه الرسميه شيء اخر ، لكن الروايه الرسميه وقتما اعتمدت كروايه رسمية كان لها اهميه ووظيفه ودور مطلوب ، لان مطلوب تصديقها والايمان بها والدفاع عنها وترويجها ، لان لها دور ووظيفه في الحشد والتجييش وصناعه احداث المستقبل ....

التاريخ كله روايات رسميه تم تعميمها جبرا وبالقوة !!!! 

فالملك فاروق كان بيلعب قمار وبتاع نسوان بامر ثورة يوليو !!! 

واحزاب ماقبل ثورة يوليو افسدت الحياه السياسيه بامر الضباط الاحرار !!! 

وعبد الناصر بوظ ارض مصر اللي طبلت بسبب السد العالي بامر انور السادات !!!! 

وعبد الناصر القي الاحتياطي الذهبي في حرب اليمن بامر من مؤرخين الحقبة الساداتية!!! 
والقوميه العربيه حقيقه بامر عبد الناصر والاتحاد الاشتراكي واذاعه صوت العرب والقوميه العربيه اكذوبه بامر السادات واوراق اللعبه اللي في ايد امريكا !!!ا

وانور السادات عمل حرب تحريك وليس حرب تحرير بامر معارضي كامب ديفيد !!!! 

وحسني مبارك ............ مبدئيا افسد البلد ثلاثين سنه ولسه بقيه روايته الرسميه مااتكتبش لكن جاري الشغل عليها وكتابتها !!!! 

حركه يوليو للضباط بقت ثوره شعب لما الضباط الاحرار حكموا البلد !!!! 

وهزيمه يوليو بقت نكسه لما عبد الناصر وهيكل قرروا انها نكسة !!! 

والديقراطيه بقي ليها انياب ضد مراكز القوة لما السادات قرر ينفرد بالسلطه ويحبس رجال الاتحاد الاشتراكي بتوع عبد الناصر!!! 

و....................... شريف خيري بقي رمز الصمود لما قرروا وبقي الخاين العميل لما قرروا ، حسب الحاجه والضرورة والاحداث الدرامية والمطلوب صناعته في المستقبل !!!! 

الروايه الرسمية اكذوبه يصمت الاخرين امامها حتي تصبح حقيقه كبيرة لايقوي احد علي تكذيبها !!!! 

واللي مش عاجبه يشرب من البحر او يخبط راسه في ااقرب حيطه !!!ا 

طيب هو ايه اللي حصل بقي وايه اللي بيحصل في البلد الايام دي ؟؟؟؟؟؟؟؟؟؟؟

محدش يتسرع ويرد ، استنوا لما الاخ الاكبر يقول وكلكم تقولوا وراه وعلي راي المثل ، لسانك حصانك ان صنته صانك وان هنته هانك و.............. ربنا يديك الصحه يااخويا ويطول لنا في عمرك ... دعاء جماعي للاخ الاكبر يسمعه مبتسما وهو يلوح للجماهير سعيدا مبتسما راضيا انهم مؤدبين وبيسمعوا الكلام وبيصدقوا كل رواياته الرسمية !!!! 

( ااديني من وقتك ساعة - 23 ) 

بيكاسو يبعث من جديد !!!!ا

( 22 ) 

الساعه الثانيه والعشرين 

24/ 1/ 2012 

اكره المراجيح !!!! 

منذ طفولتي لااحب المراجيح ولم اذهب للملاهي قط ، فانا اعتبر تلك الالعاب الملونه التي تؤرجحك فين الهواء والارض ليست العابا بل ضرب من ضروب التعذيب !!!!  لااحب التأرجح مابين الهواء والارض ، لم اطمح ابدا امسك السماء بيدي ولم اسعي للتحليق صوبها واكره البعد عن الارض واكره اكثر الاختلاف العنيف بين حالتي الصعود الاحمق والهبوط الكريه !!! اكره المراجيح ، ويتملكني الغثيان وقتما افكر في المشهد وانا اطير واحلق ثم اهبط واسقط ثم اعود اطير واحلق و.........غثيان يقلص معدتي ويوجعها واغلق عيني ابحث عن ارض القي " هلبي " في قلبها تشدني لاحضانها وتنقذني من التأرجح والغثيان !!!! 

اكره المراجيح !!!! ولااعرف المتعه التي تمنحها تلك الحالة الغريبة لاصحابها ...تقلعك من جذورك وتلقيها في الهواء تبعثرك وسرعان ماتعود بك للارض وكأنك ستسقط وقبلما يتوقف قلبك من الرعب يعود بك للسماء بلا مظله وبلا اجنحه !!!! 

لااعرف المتعه في تلك الحاله !!! 

راقبت كثيرا وجوه " المتأرجحين " فلمحت علي وجوهم تعبيرات رعب غريبه يشتروها عمدا بثمن التذاكر التي يحصلوا عليها ليعيشوا تلك الحالة ، راقبت كثيرا وجوه " المتأرجحين " فلم افهم لماذا يسعوا رغم احساسهم بالرعب يسعوا عامدين لعيش لحظه تلك الرعب المؤقته ، كذا اتعجب جدا وقتما اسمع صرخات الفزع التي يطلقوها وهو يتأرجحوا فوق وتحت ، ثم اسمع ضحكاتهم تتعالي تلحق الصرخات المرعوبة ...لاافهم تلك الحاله الغريبة ولم اسعي لها ابدا ولم تسعدني ابدا !!! 

اكره التأرجح بين المتناقضات 

بين السماء والارض 

بين الامل واليأس 

بين الطمأنينه والرعب 

بين الحب والكره 

بين السكينه والصخب 

اكره التأرجح بين المتناقضات ، كأئن ارضي بنفسية الفلاحين المرتبطين بالارض وينتظروا المطر والفيضان ، هذه انا !!! 

اكره المقامرة والمغامرة والتحليق في الفراغ ، تشدني الارض لاعماقها واحسني علي وجهها " واثق الخطوه يمشي ملكا " واكره الطائرات فلست عصفورة ولن ينبت لي جناحين يحملاني للسماء السابعة ...

اكره المراجيح !!!! 

منذ كنت صغيرة ، كنت امسك كتاب قصت امي عليه قصته وقرأت عباراته وتركتني اتحدي نفسي وافك احرفه لاقرأه بنفسي مرة ثانيه وابعد عن كل الاطفال السعداء اللاهين فوق المراجيح يتأرجحوا بين السماء والارض ، انظر لهم ولااغبطهم وافكر لماذا يفعلوا في انفسهم تلك الحاله الغريبة !!!! 

اكره المراجيح و..............الحاله الغريبه التي تحملنا لها من فوق الارض الثابته لعالم الاوهام !!! 

لست عصفورة ولن اكون 

لكني كالسنديانه العجوز التي تمد جذورها تحت مجري النيل تشرب منه وتوزع ظلالها علي المتعبين !!! 

هل ستطير السنديانه وتترك جذورها وتحلق كالنسور في السماء ؟؟؟؟

لااظن وانا ايضا مثلها لن اترك جذوري واطير !!! 

اكره السفر ، بمناسبه الكراهيه ، اكره السفر ومغادره منزلي ووطني وفراشي وعالمي ، لاانتمي للاماكن الغريبه ولو بشكل مؤقت !!! 

ارتبط بوطني كمثل ارتباط السنديانه العجوز بنهر النيل الذي تشرب منه وتوزع خيره ظلالا علي روادها علي ضفاف النهر ، ارتبط بوطني مثلها ، فهل سترحل السنديانه وتزرع في ارض الجليد او تمد جذورها في رمال الصحراء !!! 

لن يحدث وانا مثلها .... 

اكره المراجيح التي تبعدني عن الارض 

واكره السفر الذي يبعدني عن الارض 

واكره التحليق في السماء ، لست عباس ابن فرناس الذي لصق جناحين فكسرت رقبته ، ولست عصفور عشي فوق الاشجار ولست نسرا محلقا في السماء ، انا من تسير علي الارض بجذور تغرس في باطنها مع كل خطوه !!!! 

ايه اللي فكرني !!!! 

اللي فكرني ان الايام دي الناس كلها بتتمرجح !!!! 

بتتمرجح بارادتها او رغم عنها !!!! 

تتمرجح بارادتها وتعوم اكثر واكثر لتصعد في الهواء وكأنها ستبقي للابد محلقه تعيش في ثوب العصفور !!! 

تتمرجح رغم عنها ، يدفعها الاخرين قهرا للسماء وهي تصرخ وهو يضحكوا وسرعان ماتعود للارض وقلبها يتبعثر رعبا وقبلما تلتقط انفاسها تدفع ثانيه للسماء !!!! 

الناس عماله تطير في الهواء ، تراها مبعثره ، تقبض باصابعها علي الهواء الطائر تستنجد به من البعثرة الجبرية التي فرضت عليها ، بعضنا يضحك ويتصور نفسه نسرا جسور ، والبعض يري جثته تتبعثر الف قطعه فوق الارض التي ابعد عنها ويتوق للعوده لها ولا يملك ، الناس عماله تطير في الهواء في مشهد عبثي كلوحه تشكيليه لبيكاسو !!! هل عاد بيكاسو للحياه ورسم مرة ثانيه لوحته الشهيرة ( غرنيكا ) وفغر فاه الحصان رعبا ومزق الاجساد التي ارتطمت بالارض وقتما عادت من رحله تحليقها الجبريه في السماء الافتراضية الوهمية !!!! 

الوهم ؟؟؟؟؟؟؟؟؟؟؟

هل التأرجح واعتلاء المراجيح ، ضربا من القبض علي الوهم اللحظي !!! 

ساطير ، ساكون عصفور ، ساكون نسر ، ساحلق في السماء ، ساخلع ارضي وحذائي واطير !!! 

و.......... طائر في بلاد العجائب وسماوات الوهم !!!! 

هل التأرجح واعتلاء المراجيح ، نوعا من الفرار من الواقع الذي لا يعجبني لوهم اعيشه ولو لحظات !!! 

ساخلع الارض واحلق في الاوهام ووقتما اعود ساحلم ثانيه بالتحليق !!! 

ربما ؟؟؟

لماذا اذن تضطرب القلوب وتكاد تنخلع والمرجيحه تأخذ راكبها للسماء ، لماذا تخاف القلوب وتفضح اصحابها ، لستم اقوياء كما تزعموا ولستم سعداء كما تزعموا والسموات المفتوحه مخيفه لكنكم تفروا من الحقيقه للوهم عامدين متعمدين تزعموا انكم سعداء وقلوبكم تفضحك ضعفكم وهشاشتكم !!!! 

لم يقل احد ابدا ( السماء الطيبه ) لكن الجميع قال ( الارض الطيبه ).. 

فالسماء هي الوهم والارض هي الحقيقه ، والاوهام مهما كانت جميله ليست ابدا طيبه والحقيقه مهما كانت موجعه دائما طيبه !!! 

الارض تحتضنك وتحتويك ، والسماء تبعثرك ....

اري بيكاسوا يقبع تحت سطح الهرم يضحك !!! 

يضحك لان المراجيح تضرب في السماء فوق الهرم دوامات واعاصير ، يكاد يقول لهم ستقتلعوا الهرم وتتبعثروا وصوت رعبكم سيوقظني من موتي لارسمكم مثل حصان " غرنيكا " مرعوبين ليس من الحرب الاهلية بل من العالم الوهمي الذي خلقتوه وتسلقتم السحب لتصلوا له ، فارتطمت السحب وهطلت الامطار وتبعثرت درجات سلمكم وسقطتم فوق سطح الهرم ممزقين مرعوبين ضحايا التحليق في عوالم الوهم !!!! 

بيكاسو يقبع تحت سطح الهرم يرسم لوحه جديده في مرحلته الزرقاء !!! 

والازرق لون الورق الشفاف الذي كنا نغطي به النوافذ وقت النكسه ليحجب الضوء عن طائرات العدو !!! 

والازرق لون ملابس السجن الموحشه الكالحه يرتديها المحكوم عليهم بلا اختيار ، انتم اسري الازرق !!! 

والازرق لون النيله الزرقاء التي كانت تصبغ بها نساء الصعيد وجهوهن وقت الحداد !!!! 

والازرق لون العيون الزجاجيه للمحتل الانجليزي الذي قبع فوق قلب مصر سبعين عاما !!!! 

والازرق لون المرحله الاكتئابيه التي رسمها بيكاسوا !!! 

رسمها وانتهي منها وظن نفسه فرغ منها ومن حزنها ، لكنه عاد لنا باقلامه الزرقاء وجلس تحت سطح الهرم ينتظر مشهدنا الاخير ليرسمه !!!! 

لماذا بعثت يابيكاسوا مصريا لترسم حاضرنا بالازرق !!! 

وكأنك تستخسر فينا بقيه الوان قوس قزح 

لكن الاخضر لون خير النيل والاحمر لون خصوبه البنات والاصفر لون ذهب اتون وقمح الحقول 

ونحن اول من لون حضاره العالم بالوان الحقيقه والخير 

فلماذا تعود لنا باقلامك الزرقاء وفقط !!! 

بيكاسوا يقبع تحت سطح الهرم يرسم لوحته المصرية الجديده بالاقلام الزرقاء !!!! 

هل سنمنحه وجوهنا المرعوبه وقلوبنا المبعثره ورعبنا الاكبر ليرسمه ازرقا ويموت مكتئبا !!! 

ام سنمنحه الوان الخير والسنابل وقرص الشمس وخدود البنات وطيبه الارض السمرة ليرسم قوس قزحيه تميته فرحا لان مصر الحضارة فرت من مرحلته الزرقاء !!!! 

هل سنظل نتأرجح في الهواء نصرخ رعبا فينبت في لوحته الجديده مائه وجه مرعوب والف صرخه ، ام سنعود للارض نمد جذورنا فيها فيرسم النيل فياضا ويشرب العطشي من لوحته الجديده فيرتوا بالحضاره والتاريخ والسعاده ؟؟؟

يابيكاسوا .... ابعد اقلامك الزرقاء عن صفحتنا !!! 

سنكف عن التأرجح ونعود للارض نغرس فيها جذرونا وارواحنا فتنبت حضارة تسعدك في قبرك !!! 

سنكف عن التأرجح وعوالم الوهم ونعود لحقيقتنا لانفسنا ونحرمك من متعه الموت مكتئبا !!!! 

اكره المراجيح واحب الارض الطيبه وابحث طيله الوقت عن جذوري تحت نهر النيل تنهل من روحه تغذي روحي بالطيبه !!!! 

اكره المراجيح والازرق وعوالم الوهم والحرب الاهلية 

واحلم بنهار جديد طيب تطير فيه العصافير والنسور وتحلق فوق رؤوسنا ونحن مغروسين في ارضنا الطيبه !!!! 

................كفاكم تأرجح وصعود وهبوط فالغثيان والاعياء يغشاني من حالتكم المرثية المرزية !!!! 

( اديني من وقتك ساعه - 22 ) 

بهية في زمن العولمة !!!!ا

( 21 ) 

الساعه الواحد والعشرين 

22/ 1/ 2012 

باتفرج علي فيلم العصفور ...

باقلب في قنوات الافلام زهق ، لقيته ، شبطت ، كل مره مااتفرجش عليه من الاول ، لكن اللي باشوفه منه بيكفيني !!! 

باحب الفيلم وباحب يوسف وبهيه وفاطمه ورؤوف واكتر واحده باحبه جوني ...

اللي ماشفش الفيلم مش حيفهم اي حاجه من اللي بقوله ، وعادي جدا ، انا كمان ساعات مابفهمش الناس بتقول ايه وهي تتكلم عن الحياه العاديه مش بس الافلام ...

ليه باحب فيلم العصفور ، يمكن لاني كان نفسي اعيش في بيت بهيه ، او اكون بهية ، او اكون فاطمه بنت بهيه اللي بتحب رؤوف وكانت حتموت نفسها لوطلعت وحشه !!! 

لكن زمن بهيه خلص ، وبقينا في زمن العولمة !!! 

ياتري لو يوسف شاهين عمل فيلم العصفور النهارده ، بهيه كانت حتبقي عامله ازاي ، حنلاقيها معانا علي الفيس بوك ، بتكتب ايه ، بتشحذ همم الناس ازاي والدنيا كابسه علي قلوبهم كلهم ، يوسف شاهين مات وسابنا في زمن العولمه البارد نتابع اخبار الدنيا المقرفه من النت وبيوتنا ساقعه وقلوبنا بترتجف !!!! 

زمن بهيه خلص ، وزمن العصفور خلص !!! وفضل زمنا الغريب ، زمن زي كباري حرب سته اكتوبر وقت العبور  ، زمن متطبق وبيتفرد فوق وش الميه ، زمن متطبق وبينقلنا من دنيا لدنيا ، من ايام جدتي والدفا لايام العولمه والصقيع واحنا محشورين في الكوبري المتطبق لاعشنا الزمن الجميل ومتنا ولا اولاد الزمن الغريب وعشنا فيه مبسوطين منه !!! 

يخرب بيت الصقيع !!! وكأن العالم يتجمد من حولي !!!! 

زي فيلم اخر العالم ، لما المناخ اتلخبط فبدأ عصر جليدي جديد !!! 

والناس اضطرت تحرق الكتب في المكتبه الكبيره علشان تتدفا وماتتجمدش !!! 

كان ناقصهم في الفيلم بلاك بيري او اي فون ، يعملوا بيه شات وهما بيحرقوا الكتب والدنيا بتتجمد من حواليهم !!! 

احنا بقي قاعدين في المكتبه الكبيرة نحرق الكتب ونترعش من السقعه وبنشات مع بعضنا نوصف لبعض المشهد وازاي بردانين !!! 

زمن العولمه القبيح يستشري وينتشر يستشري وينتشر زي مبيد الصراصير اللي كانوا بيعملوا اعلانه !!! 

ينتشر وينتشر و..........معاه صقيع فيلم اخر العالم وزمن حرق الكتب والشات !!! 

بحب فيلم العصفور وباحب جوني ، وباحب بهيه والدفا وهي مكفيه فوق ماكينه الخياطه وبحب رؤوف وهو بيطبل علي الحلقه ام قعر اسود ، دفا دفا بجد !!!!  كنت عايزه اعيش الزمن ده ، زمن الجيران اللي ابواب بيوتهم مفتوحه ، متطمنين لبعض ، زمن الجاره اللي بتزوق بنت جارتها يوم الفرح ويطلعوا يعملوا الفرح علي السطوح ، زمن البنات لما كانت بتضحك من قلبها زي فاطمه وهي نفسها رؤوف يبوسها ، دلوقتي البوس في الشات بقي افتراضي والحب حروف ينطرها الشات من صوابع لصوابع ولما الناس تتقابل تتخرس وماتعرفش تتكلم ، اصل بطلنا نتكلم وبقينا بنكتب ومن كتر الكتابه اللي هي مش كتابه بطلنا نعرف نحس ونعرف نحب وقفلنا الباب خايفين من الجيران اللي مانعرفهمش لان ولاد الحرام ماسابوش لولاد الحلال حاجه !!!! 

لو عندي فيديو فيلم العصفور ( فيديو او دي في دي ) كنت شغلت الفيلم عشر مرات ورا بعض وقفلت الدفايه !!!! 

لكن معنديش ، طيب حاتدفي ازاي ، وضحكه بهيه وغناها خلص ومافاضلش غير الشات !!!! 

حاستني ام كلثوم ، هي اللي حتدفيني !!! 

هو انا بحبها ليه الست ام كلثوم دي ، بحبها لان صوتها جميل ولا كلماتها جميله ولا ايه الحكايه ؟؟

باحبها لانها صوت مصر الدافي الصادق ، ومن قلبها لقلبي ينتشر الدفا ...

ام كلثوم بوظت الحب !!!! قصدي الحب بتاع الايام دي 

الناس مابقيتش بتعرف تحب ، مره تعتبر الحب عيب ومره تعتبره حرام ومره تعتبره موده ومره عشره ومره ضروره ومره مؤسسه ومره تعتبر الحب اصعب من عضه الكلب ومره تعتبر بيذل ، والبشر من غير حب زي الفاكهه الناشفه علي الشجر الميت ، مافيهاش حياه ، وحياه ربنا لو مافيش حب بين الستات والرجاله الدنيا تبوظ ، الحق هي باظت وخلاص وانتهي الامر !!! باتكلم عن الحب مش عن الجواز والمؤسسات واستمرار النوع والاسره السعيده ، باتكلم عن الحب اللي بيدفي القلوب ويونس ويخلي طعم الحياه حاجه تانيه لما روحين يبقوا روح واحده ويبقي كل كلام الاغاني ماسخ لان اللي بعيشوه اجمل من كل اللي بيتقال وبيتسمع !!! 

ياتري ايه اللي بوظ الحب ، زمن العولمه ولا زمن الوهابيه ولا زمن اللي معاه قرش يساوي قرش واللي ممعاهوش مايلزموش !!!! 

سالت راجل صديقي ، هي الرجاله بتعرف تحب ، ضحك وقالي كنت حاسالك نفس السؤال هي الستات بتعرف تحب !!! 

انا شخصنت السؤال واعتبرتني كل الستات وقلت له طبعا الستات تعرف تحب لما تلاقي رجاله تتحب ، ضحك وقالي وهو مشخصن سؤالي برضه ومعتبر روحه كل الرجاله ان الرجاله بتعرف تحب لما تلاقي ستات تتحب !!! 

عظيم ، فين بقي الرجاله اللي تتحب والستات اللي تتحب !!! 

اكلتهم القطه ولا ماتوا في الحرب ولا داسهم القطر ولا قاعدين قصاد الشات ومش عارفين يتكلموا لان من كتر الشات بقوا بيتهتهوا والكلام بيقف في زورهم وقلبهم بارد ومافيش كروت شحن !!!! 

فاطمه قالت لرؤوف ان بهيه بتحب يوسف ، بتحبه اوبتحب فيه اللي كان نفسها تحبه من عشرين سنه !!! 

وقفت قوي قدام الجمله واللي وقفت قدامها اكتر ، قالت هي صحيح ماما كبيره عدت الاربعين ، ضحكت وقلت في سري كده ياجو تضربني في قلبي كده من غير سبب ، انت معتبر بهيه كبرت لانها عدت الاربعين طيب واللي عدي الخمسين ياجو يبقي ايه ، وقلت فين الراجل اللي بحبه او بحب فيه اللي كان نفسي احبه من تلاتين سنه !!!! سالت السؤال وسكت ، اصل مش كل الاسئله ليها اجابات ، وطبعا في الفيلم بهيه حبت يوسف واتخرست وسكتت وانا مالقتش اللي احبه واتخرس حتي ، يااااااااااه نهار كحلي ، في زمن العولمه يبقي الواحد اخر امنياته يحب واحد مش ممكن يتحب ويتخرس سعيد لانه بيحبه وبس !!! مافيش امنيات اكتر من كده !!! يحرق ام زمن العولمه وزمن الشات !!!! 

مبسوط ياجو ، قلبت علي المواجع ........ دلوقتي اصحابي ينطوا من مكانهم ويقولوا ليه ، اضحك واقول باهيس ، يقولوا اوكي ، وهما عارفين اني باتكلم جد لكن محدش عايز يوجع قلبه ويتكلم ، عارفين اني مش باهيس وعارفين انهم مش بهيسوا وعارفين ان كلنا نفسنا نتكلم ونفضفض وان كلنا مخروسين ومعلقين صوابعنا علي زراير الكي بورد وعمالين ندق عليها ونكتب كلام اخرس زي اصحابه !!! 

طيب ماليش دعوه ، كنت عايزه اعيش في زمن بهيه ، وزمن السبت الخوص مش الشنطه البلاستيك وزمن القهوه مش الكافيه وزمن النكسه الدافي مش زمن الانتصارات الوهميه البارده .......... ماليش دعوه ياجو ، اكتشفني ، اعمل فيلم جديد وخدني امثل فيه ، اديني دور بهيه ، لا مش في زمن العولمه وحرق الكتب والصقيع المنتشر ، لا اديني دور بهيه في زمنها زمن الدفا والاحلام والامنيات اللي حتي لما بتتحققش بتونس وتدفي !!!! ااقولك ، اعمل لي فيلم جديد ، اديني فيه دور بهيه في العصفور ودور هدي سلطان في الاختيار ، يانهار اسود علي ده دور ، هدي سلطان حبيبه محمود ، هي دي الحياه ياجو ، هي دي الحياه اللي كانت بتونس ، ست قويه عفيه زي الدنيا وصوتها عالي وضحكتها من قلبها اعلي ، بتحب محمود الصياد الحر ، وبتكره سيد العبد الاسير لكل ماهو كريه ومزيف ، تصدق ياجو ، لو ماكنتش عملت غير الفيلمين دول ، العصفور والاختيار كان كفايه عليك ، تعملهم وتموت وتفضل عايش !!!! 

ياتري في زمن العولمه كنت حتعمل ايه ياجو ، افلامك كان حيبقي شكلها ايه ، ولا كان حيبقي شكلها حاجه ، كنت حتموت كمدا الحمد لله بقي انك مت لما عمرك خلص قبل العولمه ما تخيم بصقيعها علي الحياه ، كانت افلامك حتبوظ ياجو ، الحمد لله انك عملت الافلام في زمن الدفا وموت بعد ايام عمرك ماخلصت !!!! 

فيلم العصفور دافي قوي ، وايه الراجل علي الشريف ده ، يخرب بيت كده وايه الانسانيه دي ، ايوه الانسانيه ، بهيه بتغني وبنتها بتحزمها وعايزاها ترقص ورؤوف حيلزق مقالاته علي الحيطان وجوني قاعد علي القهوه والعصفور في القفص والشيخ احمد راح لنبويه والراجل عايز ولد ولما مراته خلفت بنت اقسم يسميها حنفي برضه !!!!!!!!! انسانيه محدش مكسوف منها ولاخايف حد يقوله عيب كده ، انسانيه بتتعاش مش بتتحرم وتتمنع وتدان !!!! 

دفا دفا ، يخلي الشمس تطلع وسط الليل ، ماليش دعوه بالقضايا الكبيره والمناقشات الفلسفيه ، وناس يعجبها الفيلم وناس مايعجبهاش ، ماليش دعوه بده ، انا باحب مصر بتاعت الفيلم مصر الدافيه الحميمه اللي بشرها كانوا لسه بشر قبل زمن العولمه وزمن الوهابيه ماياكلوهم ، بعضنا اكلته العولمه وبعضنا اكلته الوهابيه وبينا استخبت مصر لما نستقر علي حال ، استخبت وسابتنا وراحت عند بهيه وسكنت في دفي قلبها !!! 

طيب ياجو .... ايه حكايتك بقي !!! 

بتعرف توجع قلبي بافلامك ليه ، هي الافلام اللي بجد بتوجع القلب كده زي الحب !!!! 

يوسف شاهين ؟؟؟؟؟؟؟؟؟ عبقري ولا مجنون ولا غريب ولا جميل ولا كل ده علي بعضه !!! 

عنده لطشه تطلع في افلامه ، حاجه صادقه توجع القلب ، اصل الصدق بيوجع القلب ، الكذب جميل ومريح وبارد زي السكينه التلمه ، ماتحسش بحاجه لما تسمع حد يكذب ، ماتحسش بحاجه خالص ، لكن الصدق بيوجع القلب ويخليك نفسك تعيط ويمكن كمان تعيط !!!! 

يوسف شاهين عنده لطشه تطلع في افلامه ، تحس فيه جمله من جمل كل فيلم تخصك ، انت اللي بتقولها او كان نفسك تقولها فهو قالها واتنهد وقالك مالكش حجه اديني قلت ، قول انت بقي !!!! 

باحب فيلم العصفور وجو الدفا في الايام الساقعه ، اصل الدفا بقي صعب ، ودفا القلوب اصعب !!! 

دفا القلوب ونس ، والونس شاحح وعزيز ، لا مش حنقلبها نكد ولا غم ولا حد يقولي مالك واجمدي وشدي حيلك والسكه الغامقه دي ، مماليش ، خلاص ، يلا نتكلم كلام فاضي ، او نتكلم ليه بدام الكلام فاضي مانسكت ، ولما حد يقولك ساكت ليه ، الكذب الابيض حلال ، قوله عندي صداع وهو من باب ترييح الراس حيصدقك ويتمني لك الشفا ....

بحب فيلم العصفور وبحب فيلم الاختيار ...

الاختيار بقي موضوع تاني ، اصله طول الوقت يطرح علي السؤال اللي باهرب منه ، حنختار ايه امتي ؟؟؟

حنبقي محمود الصعلوك اللي عاش ولا سيد العبد اللي اختار مايعيش !!! 

باحب محمود البحار الصعلوك لكن طبعا مابعيش عيشته لان الاصول والقواعد والاخلاق والعائله و.............. كلهم موتوا محمود !! طيب وعيشه سيد ، لا مش عايشاها برضه ، عايشاها شويه صغيرين ومتمرده علي الباقي ، متمرده وباطلق لروحي عنانها زي محمود ، لا ماشاركتش سيد في قتل محمود لكن معرفتش احيي محمود في حياتي !!! 

منك لله ياجو ............ طيب اعترف انت كنت سيد ولا محمود ولا كنت الاتنين زينا كلنا !!! 

شرحتنا ياجو وكشفت حقيقتنا اللي بنخبيها ، مااحناش بهيه بحريتها ولا محمود بصعلكته وتشبسه بالحياه ولا احنا جوني السكران ولاسيد المتنحط في توابيت الاصول والاعراف الاجتماعيه ، احنا كل دول مع بعض وعمالين نقطع في وشنا واحنا محتاسين ومش عارفين نختار !!! 

طيب ............ العصفور جاب الاختيار والاختيار فكرني بعبد الهادي وابو سويلم وصوابعه اللي بتحرت في الارض تطرح دم ووطنيه ، وابو سويلم فكرني بكل الخيبه اللي عشناها ، لما كنا رجاله ووقفنا وقفه رجاله وبعدين مابقيناش !!! 

هو ابو سويلم لو عاش زمن الشات والانترنت كان عمل ايه ، كان عمل ارض فوتوشوب وهجانه فوتوشوب وعمل شات مع البرنس علشان يحول الطريق بعيد عن ارضه ولو البرنس ماردش عليه كان عمل له بيدج علي الفيس بوك وجمع عليها توقيعات افتراضيه ونام مبسوط ، وكانت الارض ضاعت لكن هو فضل عايش يبص علي بيدج الفيس بوك كل يوم وهو مبسوط من نفسه وكنا فقدنا مشهد سينمائي من اعظم مشاهدنا في السينما العربيه !!! الحمد لله ان ابو سويلم مات ومعاه يوسف شاهين قبل زمن العولمه والشات وفضل مشهد النهايه في فيلم الارض مشهد يخلي قلوبنا تعيط ، لا الاخطر ، يخلينا نفتكر الارض اللي بنحبها وحنفضل نحبها !!! 

طيب ............ كفايه كده النهارده !!! 

حابطل كتابه واروح اتفرج علي فيلم الارض او اسمع ام كلثوم !! 

اصل الجو برد قوي وانا عايزه ادفي ومافيش حاجه حتدفيني الا مصر الهربانه في الفيلم والمستخبيه في صوت ام كلثوم الدافي !!! 

مصر دي بس اللي تعرف تدفيني ، لكن مصر بتاعت زمن العولمه مابتدفيش !!! 

ماعلينا ............. الساعه بتاعت الكتابه مرت ومعاها ساعه كمان وكفايه كده اصل الكلام ده لاليه اول ولا ليه اخر ولو قعدت اكتب واكتب مش حاخلص والتخريف حيزيد علي الاخر !!!! 

باكره زمن العولمه والشات والتكنولوجيا والشات وعايزه اعيش في زمن بهية !!!!! 

( اديني من وقتك ساعه - 21 )