29 أغسطس 2014

لاتنسوا ابطالنا ..... محمد المبروك ...



هذا البطل الشهيد المصري ، محمد المبروك 
وجع قلبي باستشهاده لدرجه مروعة ...
ربما رأيت في نظراته انه يخاطبنا ينبهنا يحذرنا يوصينا نحافظ علي مصر التي مات من اجلها راضيا شجاعا ...
ربما احسست انه قدم حياته راضيا لمصر وقتما عمل بجديه علي جمع الادله علي مرسي وعصابته المتخابرين الخونه ضد مصر 
ربما احسسته انه يشبه ابن عمي وابن خالي واخويا اللي حلمت يكون موجود ...
الراجل ده كسر قلبي وروحي يوم موته بالخيانه بعدما ابلغ احد الخونه عن خط سيره ليتمكن الارهابيين المجرمين من قتله ...
ربما دموع ابنته وهي تتوعد القتله بأنهم لم يفلحوا في قتل ابيها لان القضيه التي كان يعمل عليها موجوده ولانه سينتصر عليهم وقتما يعاقبوا علي جرائمهم ، ينتصر عليهم وهو الشهيد الحي وهم الخونه الاموات ، ربما تلك الكلمه وهي تتوعد القتله  وهي تعتصر من الحزن والالم غُرست في نفسي وجعا ...
انه الشهيد محمد المبروك ضابط امن الدوله المصري 
الذي ومرسي يحكم مصر والجماعه الارهابيه تحكم وتتحكم ، كان يجمع الادله التي تثبت تخابرهم ضد مصر واهدار امنها القومي ....
هذا الشهيد البطل المصري ، محمد المبروك لايفارق ابدا خيالي 
لدرجه اني وللمره الاولي ، ادخلت اسمه في حكايه من حكاياتي ...
اردت الا ينساه المصريين والا يهال التراب فوق بطولته المتواريه ....
في الجنه ونعيمها ياابن مصر .....


28 أغسطس 2014

المصري صانع حضارة .... من الفيس بوك



ولا فيه اجمل من المصريين في الدنيا ... ولاد نكته ودمنا عسل وذكاء فطري وجينات الحضاره جوانا تسامح وجدعنه وحب الغير وحب الخير ، وجدعان واخر شهامه واللي نحبه نديه عينينا وقلبنا علي قلب بعض ، شعب طيب وحمال اسية ، ذكي وابن حنت ولماح ويجي علي نفسه لما يلزم واللي في ايده مش له ، شعب صاحب صاحبه وبار باهله وجدع مع جيرانه وقلبه يساع من الحبايب ميه ، شعب يضحي من غير دوشه ويعطي من غير معايره ويستحمل من غير شكوي ويهد الدنيا لما يعوز ولاحد يقدر يكسر نفسه ولاارادته ولا روحه واللي يستهون بيه يلاقي اللي يستحقه واللي يقدره يشيله علي راسه نم فوق ، دي صفاتنا اللي بجد ، اوعوا تصدقوا الفضائيات اللي بتطلع اوحش نماذج شاذه مش شكلنا ولا شبهنا ، اوعوا تصدقوا اللي طول النهار يقولك المصريين اتغيروا ، مااتغيرناش لكن كتر الهم بيقسي وكتر الموده بيحنن القلب ، شوفوا انتم بقي بتعاملواالمصريين س ازاي فبترد عليكم ازاي ، والمعامله من جنس العمل .... كل يوم يزداد يقيني في مصر وبمصر والمصريين ... عمار يامصر....
المصري صانع حضارة 
علشان كده لما بيتغرب بيفضل جدره شاده للارض اللي بني عليها حضارته واللي لسه حيبني عليه بقيه حضارته ...
لاهو بياع بيشيل بضاعته في شنطه ويلف بيها 
ولا محارب بياخد سيفه ويجري ورا اعداءه 
ولا راعي غنم مكان ماغنماته تروح يروح 
المصري صانع حضارة 
العلاقه بينه وبين الارض علاقه واجب ومسئولية 
هنا كنا وهنا حنفضل وهنا بنينا وهنا حنفضل نبني وحنا حنعيش ونموت 
المصري شجره كبيرة عملاقه جدرها ضارب في ارض مصر 
مهما بعد ولا اتغرب ولا سافر ولاجه ، مصر في قلبه ومعاه وروحه بتحن ليها 
اللي يفهم ده عن المصريين ، يهد بيهم الدنيا كلها ....
علي فكره اعداءنا فاهمين ده 
علشان كده كانوا عايزين يضربوا بمنتهي الوساخه والخسه فكره الوطنيه 
ويسرقوا من المصريين فخرهم بالوطن وانتماءهم ليه 
انتماء المصري لمصر ، زي الروح في الجسد ، ماتطلعش الا بالموت ...
عمار يامصر .....

17 أغسطس 2014

عمار يامصر .... من الفيس بوك ...




اللي يجيي علي مصر والمصريين مايكسبش ...
وااقروا التاريخ وكتبه وافتحوا صفحات مصر واعرفوا مالذي جري لاعداءها علي مر التاريخ ....
احنا متحصنين ببركه سيدنا النبي محمد وزوجته ماريا القبطيه ام ابنه سيدنا ابراهيم وبركه المسيح كلمه الله وام النور مريم العذراء وبركه سيدنا يوسف وبركه سيدنا موسي ، وبركه ام العرب ستنا هاجر زوجه ابو الانبياء سيدنا ابراهيم ...
متحصنين بمقامات ال البيت سيدنا الحسين وستنا زينب ام العواجز وستنا نفيسه العلم ، ومتحصنين باولياء الله الصالحين ، كل من مر علي مصر وساب الدنيا وقعد فيها يدعي ويتعبد في ربنا سبحانه تعالي ... متحصنين بالكهنه الاباء والراهبات في ملكوت الله في الاديره الطاهره ..
احنا متحصنين بالازهر الشريف والكنيسه الاردوثوذكسية والائمه والشيوخ والاباء والكهنة وكل دعوات الصالحين والايمان في قلب كل مصري بيرفع راسه لربه ويدعي لمصر ...
احنا متحصنين بحضارتنا العظيمه نور العالم وعلمها الغزير وطلاسم كنوزها وعين حورس وعزيمه ستنا ايزيس وبالملوك الفراعنه العظماء الذين دافعوا عن مصر وحموها اول دوله مركزيه في التاريخ منذ وحد مينا القطرين الشمالي والجنوبي ....
احنا اللي دعينا من قلوبنا المؤمنه فجبل المقطم اتحرك من مكانه ايه علي الظالم ...
احنا اللي دعينا من قلوبنا فمنح الله القادر مصر خير اجناد الارض ليدافعوا عنها ويحموها عبر التاريخ ومنذ بدايه الحياه والحضارة .... 
احنا اللي انتصرنا علي كل الاعداء والغزاه علي مر التاريخ ، انتصرنا علي الهكسوس والحيثين ، انتصرنا علي المغول والتتار والصليبين ، انتصرنا علي الانجليز والفرنسيس واسرائيل ....
احنا حائط صد الحضارة اللي اتكسر علي بواباته اعداء الحياة والحضارة والانسانية بعدما يغزو العالم ويعيثوا فيه فسادا وقتلا وجبروت وافتراء ، علي بوابات وطننا يهزموا شر هزيمة ...
احنا متحصنين ببركه ربنا وعظمه حضارتنا ودعوات قلوبنا للمولي عز وجل يحفظ مصر وينصرها ، احنا متحصنين ببركه ارادتنا وقتما نريد ، وقوتنا وقتما ننوي ، وعلمنا وقتما نرغب ، ووحدتنا وقتما نتكاتف لصد الخطر عن وطننا وارضنا وشعبنا وحضارتنا وتاريخنا ....
اللي يحيي علي مصر والمصريين مايكسبش ....
اه والله .....
عمار يامصر ياام الدنيا ياحلوة الحلوات ...
عمار يامصر .....

10 أغسطس 2014

لقد حميتم المؤامرة ................ من الفيس بوك








ولما انتم فالحين قوي وعارفين قوي وفاهمين قوي ...
ماقبضتوش علي المتأمرين ليه قبل مايعملوا المؤامرة .... ؟؟؟
سؤال يبدو بريء وجميل يتردد للسخريه من الشرطه والدوله المصرية ردا علي حديث مساعدي وزير الداخليه امام المحكمة ...
لما انتم عارفين ، ماقلتوش ليه ، ماقبضتوش عليهم ليه ، مامنعوتش المؤامرة ليه ؟؟؟
اه صحيح .... ليه ؟؟؟؟؟
اولا - تاني ااقول ، السخريه من الشرطه والدوله المصريه ، هو مضمون تلك الاسئله البريئة الجميله، تاني انتم عايزين تسخروا من الشرطه والدوله ، تاني انتم عايزين تشيعوا روح البعد والبغض بين الشعب وبين الشرطه والدوله المصرية ، بس بتعملوا ده بشياكه واناقه ورقه وحب للوطن وحرص عليه واسئله برئيه ، بريئه جدا 
ثانيا - انتم ، انتم مين ، انتم اللي مش اخوان ولا بتحترموهم لكن دماغكم محشوه بكلام الاخوان ، وانتم ضحايا الماكينه الاعلاميه الاخوانيه الثورية ، وانتم اللي رافضين تصدقوا ان فيه مؤامرة علي مصر ، مؤامره دوليه كبيرة ، انتم اللي لقيتم نفسكم فجأ عندكم راي في السياسه وانتم مابتفهموش فيها وفجأ قررتم انكم سياسين وبتفهموا ومحدش احسن من حد ، انتم اللي كرهتوا الشرطه لانهم سفاحين بناء علي افلام الجزيره وكلام الاخوان وتقارير حقوق الانسان وعياط اهل الارهابيين وتقارير امريكا والاتحاد الاوربي ومنظماتهم المتموله علشان تقول لهم اللي نفسهم يسمعوه واللي نفسهم يخلوا المصريين يصدقوه ، انتم ، بتكرهوا الشرطه ، بتكرهوها لان الضباط وحشين مابيحترموش القانون ولا حقوق الانسان ، بتكرهوا الشرطه لانهم بيعاملوا الناس وحش في الكمين وبينزلوا الشعب البريء من الميكروباص الساعه 3 الصبح ويقولوا له البطاقه ، انتم بتكرهوا الشرطه لانها بتعذب المساجين الابرياء اللي بالصدفه هما اخوان مسلمين واعضاء في جماعات تكفيريه والجهاد شايفين ان حقهم يكفروا الشرطه ويضربوا الي رايحين يقبضوا عليهم بالرصاص ومش شايفين ان حقهم ان الشرطه تقبض عليهم ولو قبضت عليهم تبقي الشرطه مجرمه والراي لايواجه الا بالراي والفكر لايواجه الا بالفكر ، والشرطه تواجههم بالفكر وهما يواجهوا الشرطه بالرصاص والسلاح الالي ... انتم بتكرهوا الشرطه وبتدوروا علي اي حاجه تشتموها او تنتقدوها بسببها ، بتدورا علي اي حاجه تعملوا بيها زفه ضدها ، ولانكم حسيتم فجأ ان العادلي ومساعديه بيقولوا حاجات مش انتم مش عايزين الناس تسمعها لانها ضد افكاركم اللي بتروجوا ليها وانتم لااخوان ولا بتحترموهم ، علشان كده لابد من مهاجمه الشرطه ، طيب هنهاجمهم ازاي وهما بيطلعوا فيديوهات بتوري الشعب ازاي اتضربوا وازاي اهينوا وازاي اتقتلوا وازاي عربياتهم اتحرقت ، يانهار اسود حيطلعوا ضحايا ، وده مش معقول طبعا ، يبقي ايه ، يبقي لازم نهاجمهم ، طيب نهاجمهم ازاي ، ايوه ، هي دي ، يافالحين ياعارفين يافاهمين ، لما انتم عارفين ان فيه مؤامره ماقبضتوش علي المتأمرين ليه قبل مايعملوا المؤامرة ؟؟؟؟؟؟؟؟؟ تبقي خيبتكم تقيله ، عارفين بالمؤامره وماعرفتوش تقبضوا عليها ولاتمنعوها تبقي خيبتكم تقيله ، يالا ، يالا بقي ندور الكلام والكلام يلف ، يلا ننسي الناس انهم ضحايا المؤامره ويالا نتكلم بس عن خيبتهم التقيله ......................... 
ثالثا - ليه ماعرفوش يمنعوا المؤامرة ، لانكم كنتم جزء من المؤامرة وانتم مش واخدين بالكم ، لانكم عملت غطا للمؤامره وانتم مش واخدين بالكم ، او واخدين بالكم ، لانكم كنت ضحايا الاله الاعلاميه الاخوانيه او جزء منها ، فاي حاجه بتتقال بتسخروا منها وتتريقوا عليها وعلي اللي بيقولها ، انتم كنتم جزء من المؤامره مع ايماني بحسن نيه الكثيرين ووطنيتهم ، لكن كانوا غطاء للمؤامرة ، بتسخروا من الدوله ورموزها ورجالها ، وجاهزين بقائمه اتهامات ، بيدافعوا عن النظام ، عن مبارك عن الفساد ، جاهزين بقائمه اتهامات ، متلازمه استكوهولم ، فلول ، مستفيدين من النظام ، فاسدين ، جاهزين بقائمه اتهامات ، لان كل رجال الدوله بيكدبوا ، واي حد ينطق يبقي بيدافع عن مبارك اللي سرق 70 مليار ، انتم غطيتم علي المؤامرة ومنعتم التصدي ليها يابحسن نيه يابسوء نية ، لما الاخبار نشر مانشيت يوم 2 فبراير ( اكبر مؤامره علي الامن القومي المصري ) سخرتم من الجرنان ، وبقي جرنان معادي للثوره ومعادي للشباب الطاهر ، ليه ، لانكم قررتم ان الحدث الوحيد علي ارض مصر هو الثوره ، واي كلام عن مؤامره مسلحه يبقي كلام علي الثوره وضد الثوره وضد الثوار ، الحدث الوحيد هو الثوره واي كلام عن اي حاجه تانيه كذب مقصود منه مهاجمه الثورة ، انتم اللي روجتم للاكاذيب وصدقتوها وهاجمتم اي حد يرفضها او يناقشها ، لما انا كتبت مقاله اتنشرت يوم 5 قبراير 2011 في مجله روز اليوسف ، قلت مصر تعرضت لمؤامره عسكريه وان فتح السجون ليس عمل عبثي ولا من الاهالي ولا من الداخليه ، اتشمت واتلعن ابويا من اقرب الناس لي اصدقاء وزملاء عمل ، ليه لاني بدافع عن النظام وباهاجم الثوره ، انتم غطيتم علي المؤامره ومنعتم الدوله تقاومها ، شتمتم الشرطه وهاجمتوها واعتبرتوها قتلت الثوار وفتحت السجون وقبضت علي الطاهر وائل غنيم واي حد يقول حاجه تانيه يبقي ضد الثوره ، ويتطلق عليه كلابها والاله الاعلاميه للثوار والقوائم السوداء والمتلازمات النفسيه والشتائم وحفلات تويتر ... كل اللي بيتقال النهارده اتقال من اول يوم ، لكن وقتها كان جزء كبير من الشعب مضلل باكاذيب الاله الاعلاميه للاخوان والثوار ومهدد منهم ، فمحدش كان عنده استعداد يصدق ، ولما اتعرضت الفيديوهات المختلفه اللي بتقول الشرطه اتضربت واتحرقت واتقتلت ، عملتم مش شايفين وشتمتم الشرطه برضه وصقفتم لاقتحام مقرات امن الدوله وصقفتم لسحل الضباط وحرق الجنود واهانتهم وخلع ملاسهم بل والاعتداء البدني والتحرش الجنسي والاهانه بهم .... انتم كنتم جزء من المؤامرة لانكم كنتم معطلين راسكم ومش عايزين تفكروا ومش عايزين تصدقوا ، اي صايع يبقي بطل بدام يشتم في الشرطه واي حد من الدوله يتكلم يبقي كداب لانه من رجال مبارك ورموز مبارك ، وصل بيكم حمايه المؤامره والدفاع عنها ومنع الدوله من التصدي لها ان لما المخابرات العامه قالت قبضنا علي جاسوس اسرائيلي كان في التحرير ، سخرتم من المخابرات العامه ومن عمرسليمان وقلتم مافيش جواسيس وهما كدابين لغايه مااتنشرت صوره وهو بيسلم علي رئيس وزراء اسرائيل وصوره وهو في التحرير ، ساعتها ماقتلوش احنا غلطانين ، سكتم وبس ، لما اتنشرت صور عراب الربيع العربي برنارد ليفي الصهيوني الاسرائيلي في التحرير وسط احداث يناير وبعدين اتنشرت صوره في ليبيا وسوريا وتونس ، واتقال الصهاينه في التحرير وسط الاحداث سخرتم من هذه المعلومه وبعدين تجاهلتوها وكأنها مااتقالتش .... ليه ، انتم كنتم مستعدين تصدقوا اي حد الا الدوله المصريه الا الشرطه المصريه الا القوات المسلحه المصريه ، كنتم مستعدين تصدقوا اي اعلامي حقير بيشتم في الشرطه والدوله المصريه ومبارك ومش مستعدين تسمعوا حتي تسمعوا كلام اي حد بيدافع عن الشرطه او الدوله ، علشان كده لما قالوا فيه مؤامره سخرتم منهم ولو كانوا قرروا يقبضوا علي المتأمرين والخونه ، كنتم سخرتم منهم وحمتوهم باجسادكم واصواتكم وهتافتكم .... انتم حميتم المؤامره ومنعتم الدوله المصريه تتصدي لها في ذلك الوقت ... انتم قبلتم ان ( الثوار ) يقولوا عذبنا ضابط امن الدوله في التحرير ، وقبلتم انهم يقولوا يوم موقعه الجمعه ( عملنا سجن ) في محطه مترو الانفاق ، وقبلتم تشوفوا فيديوهات ( الخضيري بيضرب فيها ناس باعتبارهم ضباط امن دوله ، وااسامه ياسين بيعترف ان الفرقه 99 لشباب الاخوان ضربت الناس يوم موقعه الجمل ) قبلتم ده باعتباره الثوره والدفاع عن الثوره ، انتم من كتر كراهيتكم للشرطه والافكار اللي دخلت راسكم من الاله الاعلاميه الاخوانيه ، قبلتم تقولوا من غير تفكير ، الشرطه فتحت السجون !!!! طيب ماهو في تونس السجون اتفتحت برضه الشرطه المصريه اللي فتحتها ؟؟؟؟؟؟؟؟؟؟؟؟؟؟؟؟؟؟ القناصه قتلوا المتظاهرين ، طيب ماهو في تونس قبضوا علي قناصه اجانب برضه تبع الشرطه المصرية ؟؟؟؟؟؟؟؟؟؟؟؟؟؟؟ قبلتم تسخروا من اي حد يقول فيه مؤامره علي مصر ، قبلتم تسخروا وتهاجموا اي حد يقول مؤامره امريكيه اخوانية .................... 
كان لازم المصريين ، اغلبيه المصريين ، يتحرروا من تأثير الاخوان وافكارهم علي عقولهم ، كان لازم اغلبيه المصريين يشوفوا الاخوان وخيانتهم السوده وانهم مش فصيل وطني بل جماعه ارهابيه خاينه ، كان لازم اغلبيه المصريين يشوفوا الامريكان وهم بيدعموا الاخوان والسفيره الامريكيه بتقابل خيرت الشاطر وبديع وقطر بتمولهم ويشوفوا مخطط تقسيم مصر واعطاء حلايب وشلاتين للسودان وسينا لدويله حماسيه واقليم قناه السويس لقطر ، كان لازم المصريين يشوفوا كل ده علشان يتحرر معظمهم من تأثير الاخوان واعلامهم الحقير ومن تأثير الامريكان وطابورهم الخامس ومن تأثير عملاء امريكا وفوضويتهم واكاذيبهم ، كان لازم يتحرروا من كل ده ، علشان يقدروا يسمعوا ويقبلوا ويفهموا معني المؤامره الامريكيه الاخوانيه علي وطنهم ...
ماتقولوش بقي ، اشمعني النهارده بتتكلموا عن المؤامره ، لا هما اتكلموا عنها من زمان ، لكن المصريين ماكانوش عايزين يسمعوا ولا يفهموا ، ماتقولوش ممنعتوش المؤامره ليه ، لانهم حاولوا يمنعهوها ويتصدوا ليها واشتغلوا علي كسرها وانتم كنتم بتمنعوها .... 
للاسف ، في النهايه الشرطه المصريه دفعت ثمن هذه المؤامره ، لانهم نزلوا الشارع بالماء والغاز في مواجهه مظاهرات قيل لهم انها سلميه وفوجئتوا بأنها مؤامره مسلحه قتلهم وحرقتهم احياء وسرقت سلاحهم وحرقت مؤسساتهم ... الشرطه دفعت تمن غالي لعدم الاعلان عن المؤامره وعدم التصدي لها ...
وخليني اقول ليكم اخر كلمه ، لما يبقي الشارع فيه مئات الالوف ، ووسطهم ارهابيين وقناصه وقتله ، ومئات الالوف مشحونين ضد الشرطه وبيجروا وراهم وضد الدوله وبيهاجموها ، لو حاولت الشرطه او الدوله تقبض علي الارهابيين والقناصه والقتله من وسط مئات الوف المتظاهرين ، لو حاولت حتتقتل وتتقطع وتتحرق احياء بحمايه من مئات الوف المتظاهرين السذج اللي مش فاهمين حاجه ومتصورين انهم بيحموا زملائهم المتظاهرين اللي الشرطه ( المجرمه السفاحه ) بتقبض عليهم لاجهاض الثوره المجيدة ولو حاولت الشرطه تتصدي لذلك لكانت حدثت مذبحه وقتل الوف المصريين وساعتها يبقي النظام بيقتل الشعب والحق ياجدع ، وربما نوصل للناتو وطياراته لحمايه الثوار ، ثوار مجيدة ..............
كفاكم تحريض علي الشرطه وتحريض علي مصر باسئله تبدو بريئه وساذجه لانها ليست ساذجه ولا بريئه ... 
كفاكم استفزاز للمصريين ...
وعلي فكره انا بدافع عن مصر 
وبدافع عن الشرطه المصريه شركاءنا في ثوره 30 يونيو لتحرير مصر من الاحتلال الاخواني اللي احتل مصر باسم الثوره وكاد يدمر مصر باسم الثوره وحمايه الثوره من نظام مبارك وفلوله ....
انا بدافع عن مصر 
ومابقيتش قادره اتحمل تضليلكم علي حساب الوطن الذي دفع ثمن غالي قوي بسبب اما غفلتكم واما جهلكم واما تأمركم عليه بالاسئله البريئه اللطيفه .....
بس ....