14 مارس 2014

من الفيس بوك ...... بطل التويتات الاول



عن بطل التويتات الاول في مصر ... قلت ...
قلت عليه شاسيه 
وقلت خيال مآته 
وقلت " بابا نجيب " 
وقلت حيستخدموه والاخوان حيصدروه في المشهد ووقت الجد يرموه في الزباله 
وقلت ليه المنقبات طلعوا استنوه في المطار يوم مارجع مصر وقت ماقرر يبقي زعيم المعارضه والصور موجودة ...
وقلت نوبل لاتكفي لحكم مصر ، والحقيقه انا رايي انها جايزه مشبوهه امريكا بتستخدمها لبروزه " الامعات " علشان تديهم حيثيه باعتبارهم " معاهم نوبل " 
وقلت هي المعارضه المصريه اللي بتشتغل بقالها سنين في مصر ، مش لاقيه حد يتكلم باسمها فاستوردت خواجه كواجهه لزوم المنظرة والعياقه ..
وقلت انت بتحب مصر زي مابتحب الفول والطعميه لكن ماعشتش معانا ايامها السوده ولا اتحشرت في المرور زينا ولا النور قطع عليك زينا ولا وقفت في ام طوابير الرغيف ابو شلن زينا 
وقلت محدش يقرر يكلم الشعب في سيتي ستارز بشباب الجامعه الامريكيه وبنات المدارس الفرنساوي ويتصور انه بيعرف يكلمهم 
وقلت محدش يعرف مصر من تقارير الامم المتحده اللي مكتوبه بسبع لغات اجنبية 
وقلت مصر مابتتقريش من الشمال لليمين حتي لو تصورت انك بتعرف تقرا 
وقلت مصر لايمكن تفهمها وانت بتفكر بالانجليزي وبعدين قسم الترجمه الفوريه يشرح لك ..
وقلت مش معني انك تمشي في الحسين والناس تصقف ان المصريين معتبرينك بطل قومي وانهم بيصقفوا للاراجوز وابو دراع واللهو الخفي 
قلت الكلام ده من اول لحظه سمعت اسمك فيها في 2010 وكتبت رايي في مقالات اتشمت عليها من المعارضه والثوار والسياسين لاني مش شايفه عبقريته ومش شايفه انه زعيم حيجمع الامه 
وقلت ليهم وقتها الامه مش حتتجمع حوالين خواجه بيتكلم عربي مكسر وبيفكر بالانجليزي ، ومش حتتجمع ورا عيال مسقطه البنطلونات وعامله شعرها ديل حصان ، ومش حتتجمع ورا بنات قمرات زي الشربات حتي لو علوا صوتهم وشتموا الحكومه لان الامه لسه متخلفه غصبن عنا وعايزه دكر يحكمها ويكون كبير بمنطق القبيله والعشيره واهل الحته وولاد القريه وجدعان البلد ...
وقلت اللي جاي من امريكا مضروب لان امريكا حدايه وبومه وحربايه وعرسه مابتحدفش كتاكيت ...
ولما جابوه يوم تلاتين يونيو قعدوه في المشهد مازعلتش وقلت ماهو لازم برضه يكون فيه ممثل لابناءنا في المهجر ، وقد كان ، وسرعان ما " هجرنا " ورجع لتويتر !!!!
والحمد لله ..... من اول يوم شفته صح 
وفهمته صح ، وفهمت دوره صح 
وكنت عارفه ان اوله واخره تويتر وكاندي كرانش ..
وانه حينط من المركب لما يلاقيها بتعوم وحيفضل علي تلها يخربها لما تغرق ....
ولانها عامت ، نط بسرعه ورجع يدرس نظريات في الجامعه 
ويكتب تويتات لنخب الحمير والزباله زي ما وصفهم وقال رايه فيهم !!!! 
الاول خذل زملاءه وبعدين خذل المعجبين بيه وبعدين خذل مصر كلها وبعد ثوره شعبيه عظيمه نط من المركب ورجع لبلاد الخواجات وليالي الانس في فينا ....
والحزب بتاعه اتأجر من الباطن وادوه الرئاسه الفخريه مقابل الايجار الشهري 
اشكرك يارب علي نعمه البصيرة ...
اشكرك يارب علي نعمه البصيرة .....
اشكرك يارب علي نعمة البصيرة ...................
( مقالاتي عنه منشوره في جريده روز اليوسف 2010 ومدونه قوس قزح ملون ، وعلي مدونتي ياما دقت علي الراس طبول 2010 ) ..

09 مارس 2014

من الفيس بوك ...... خلوا بالكم .. خلوا بالكم




( 1 ) 

نصيحه لكل واحد منا ...
انتبهوا لكل خبر واي خبر يتقال الايام دي 
انتبهوا قبل ماتكرروه وتشيروه ..
اسالوا روحكم سؤال بسيط وسهل ، مين المستفيد من الخبر ده 
لان من هنا وطالع ولايام كتيره ، حنسمع اخبار كتيره كلها سم في العسل 
مقصود منها نشر الاحباط وتحطيم الروح المعنويه وكسر الاراده والقدره علي المقاومه 
مقصود منها افقاد ثقتنا في نفسنا وافقاد ثقتنا في كل من نحترمهم من زعماء وقاده مصريين 
انها الايام السابقه علي الانتخابات الرئاسيه حيث سيفتح سوق عكاظ للشتيمه والتريقه واللخبطه وتسميم البدن ، لان الفوضي مقصوده وهدف ، وهدف انها تفضل وتكبر وتكبر ...
انتبهوا لاي خبر يقال ، قبل ماتزعلوا او تنبسطوا قولوا لو صح لمصلحه مين ولو غلط لمصلحه مين ومطلوب نحس ازاي واحنا بنقرا الخبر ده ، مطلوب ننبسط مطلوب نزعل ، مطلوب نثق في روحنا مطلوب نحبط ونفقد ثقتنا في نفسنا ووطننا ؟؟؟
انتبهوا ، نحن في عز المعركه اللي بنكسبها ومش عايزينا نكسبها .....
وتحيا مصر بقي دايما والي الابد

( 2 ) 

اللهم اعن مصر وقويها علي ابناءها حاملي بطاقات الرقم القومي ، اما اعداءها فهي كفيلة بهم وباللي خلفوهم !!!

( 3 ) 

حيحاولوا يشقوا الصف الوطني 
حيحاولوا يفرقوا بينا 
حيحاولوا يوقعوا بين المصريين باستثاره النعرات الطائفيه القبليه العقائديه الطبقيه الدينيه النوعيه
حيحاولوا يشقوا الصف الوطني 
يوقعوا بين المصريين بالداخل والخارج 
بين الشباب والناضجين والشيوخ الكهول 
بين النساء والرجال 
بين المسلمين والاقباط 
بين وجه بحري ووجه قبلي 
بين المتعلمين والاميين 
بين الاغنياء ومتوسطي الحال ومحدودي الدخل والفقراء 
بين الافنديه بتوع المدن والفلاحين بتوع القري 
حيحاولوا بكل طريقه شق الصف الوطني 
لان وحده وقوه الصف الوطني هي العقبه الوحيده ضد انهيار وطننا وتدميره وتمكين الخونه منه 
خدوا بالكم ، اي خبر تسمعوه او تريقه تقروها او نكته تسمعوها تفرق بينا وبين بعض ، تأكدوا انها رصاصه مسمومه لقلب مصر ...
خلوا بالكم علي راي المشير السيسي ، خلوا بالكم 
مصر محتاجه وحدتكم وقلوبكم علي بعض وايديكم في ايدين بعض 
خلوا بالكم ...

07 مارس 2014

من الفيس بوك .... كلام جد





طيب .... البلد فيها ازمه اقتصاديه طاحنه .. وكلنا عارفين 
الحلول الاقتصاديه ايه بقي ياشاطرين ....
عايزه كلام واضح ومفهوم ...
هل اشتراكيه الدوله واقتصاد الحقبة الناصرية هو الحل؟؟
هل الرأسماليه وكرابيج الرأسمالية والضرائب التصاعديه هو الحل ؟
هل الاشتراكية من المنظور الشيوعي هو الحل ؟؟
ولا ايه ؟؟
ولا فيه طريق تنميه ثالث ؟؟
او اختراع او نظريه انا مش عارفاها هي الحل ؟؟
اصل اسمعوا ، الكلام في الاقتصاد من غير الكلام في السياسه ماينفعش ..
يعني الاقتصاد هو اللي بيحدد شكل السياسة ...
شكل الاقتصاد يحدد لنا شكل شكل السياسه بمعني شكل الحكم وتداول السلطه ومين النخب اللي تحكم ومين النخب اللي ماتحكمش وربما تعزل او تقصي او يتقصص ريشها ....
كفايه كلام مايع اعتمادا علي ان الشعب مش فاهم واي حاجه حتخش عليه ويتضحك عليه بيها ...
عايزين رأسماليه مع تطويراتها وتحسيناتها وبالتالي مجتمع راسمالي 
ولا عايزين اشتراكيه باشكالها المختلفه وتطويراتها ونظرياتها وبالتالي مجتمع يتجه صوب الاشتراكيه ..
ولا عايزينها سمك لبن تمر هندي زي ماهي ماشيه ، حبه اشتراكيه علي حبه رأسماليه علي حبه عداله اجتماعيه علي حبه ضرائب تصاعديه ....
اللي يكلمنا عن مشكله مصر ، يكلمنا عن حل المشكله اقتصاديا وبالتالي شكل السياسه ايه ...
كلمني عن انحيازاتك الطبقيه واختياراتك ، اقول لك من انت ...
محدش يقولي الشعب كله ويعمم في الكلام ، لان الشعب ده طبقات اجتماعيه ولها مصالح احيانا مختلفه ومتناقضه ، انت حتنحاز لمين وعلي اساس ايه ...
كلمونا كلام علمي مفهوم الله يخليكم ، بلاش نظريه الضحك علي المصريين دي ، كفايه زهقنا ....
وكمان اكشفوا وجوهكم بوضوح ، كفايه ملاوعه وغش وخديعه ...
كلمني عن انحيازاتك الطبقيه ، اعرفك واعرف احدد موقفي ، اختارك ولا لا ..
وانتم كمان ، انتم ايها الناخبون اللي بتقولوا بحب فلان وماحبش فلان ، قبل الحب والاعجاب والكره ، عايزين مصر شكلها ايه ومشاكلها الاقتصاديه تتحل ازاي ، عايزين مصر مجتمع شكله ايه واقتصادها شكله ايه ؟؟؟؟
خلونا نتكلم جد شويه بقي علشان 3 سنين ضاعوا واحنا بيتضحك علينا وبيتلعب بينا بكلام عام مقصود تعميمه علشان وقت الجد يتضحك علينا ويتقال احنا ماقلناش كده انتم اللي فهموتونا غلط ..
كلمني عن انحيازاتك الطبقيه ، اعرفك واعرف من انت واحدد اختارك ولا لا ...
صباحوا جديه بقي ....