30 سبتمبر 2010

سيرك بلدي .... واللي يحب النبي يصلي عليه !!!!!!!!!!!



انا الوحيدة في المجرة الشمسية اللي مااهتمتش بالقضيه الكبيرة اياها !!!
مااهتمتش بالتفاصيل ولا قريت منها ولا كلمه !!! ولا حاولت اجيب ملف القضيه ولا حاولت ااقرا اي خبر منشور عنها في اي جرنان او مجله !!! ولا حاولت ااقعد اتفرج علي اي برنامج ولا حوار له علاقه بالموضوع !!!! بمنتهي البرود والبلاده اعتبرت ان دي قضيه ومكانها المحكمه وماليش دعوه وبس خلاص !!!!!!!!!

ماقلتش ياحرام البت اتقتلت ولا ياحرام الراجل راح في داهيه !!! ماقلتش ماتموت ولا تروح في ستين داهيه ولا قلت مايروح الراجل مطرح مايروح ماهو مفتري !!! الموضوع ماشغلنيش اساسا !!! ولا قلت ياتري ياهلتري حيحصل ايه ، حيتعدم ، اذن هو مغضوب عليه ، حياخد براءه ، اذن الحكم مطبوخ لصالحه !!!

اه سمعت حواديت كتيرة ... عن علاقه القتيله بالمتهم !!!! مين اتجوز مين ومين طلق مين ومين رافق مين ومين ادي مين فلوس ومين اتخانق مع مين !!! حواديت من النسوان عند الكوافير ، حواديت من الناس في النادي وهي قاعده ريلكس ومأنتخه وممدة رجليها علي كرسي قدامها !!! سمعت حواديت من الكوافير المشغول اوي بالتفاصيل من ان الست دي كان مرافقه فلان وسابت فلان ولما سابت فلان فلان زعل من فلان ولما فلان زعل من فلان ، فلان انتقم من فلان ............... تفاصيل كلها تقرف !!!

مرات ابويا قاعده ماورهاش حاجه تعملها غير تجري ورا المحطات تشوف اخبار القضيه ايه ، وفجأ بقت ذكيه ونبيهه ومخها دفتر وحفظت كل التفاصيل ، وتقعد تناقش ابويا سعاده المستشار( المحال علي المعاش وهو نائب رئيس محكمه النقض الدائره الجنائيه ) في تفاصيل القضيه وتقاوحه وتقوله اصل شرطه دبي واصل الكاميرات واصل التي شيرت والبصمه الوراثية وابويا قاعد عايز يتفرج علي ماتش الاهلي وساكت وكافي خيره شره ومش عايز يرد عليها و( ياليله عدي ) !!!


وسيرك منصوب وصاحبه محبوس واللي يحب النبي يصلي عليه !!!
محامين طالعه تتكلم في القضيه وعن القضيه وحول القضيه وعن المجني عليها وازواجها التلاته وكله عمال يردح لكله وكل زوج من الازواج التلاته اللي هي سابتهم ورافقت ولا اتجوزت ولا صاحبت " المتهم " كل زوج من الازواج التلاته متمسك انه الزوج الشرعي والوحيد ، ومحدش منهم مكسوف علي دمه ان الست حرمه انطلقت في الكوره الارضيه تتجوز رجاله وترافق رجاله وعادي جدا يامان ، خليك كول والمهم التعويض والملايين والرجاله ماتوا في الحرب من زمان !!!!

بعد الحكم الاول بالاعدام ، اتنصب السيرك اكتر واكتر ودخل فيه ولاد علي بمبه والرفاعيه وبتوع الزار وهاتك يامرافعات في التلفزيون ، الحكم غلط لان .... والقاضي غلط لان ...... وناس من الشركات تتكلم عن ان المتهم قلبه كبير، وناس تتكلم عن حقوق المستثمرين لو اتعدم المتهم وان البورصه حتنهار والاسهم حترخص وحتبقي ليله سودا بالكحلي ، وناس تقولك المجني عليها مامعناه كلبه وراحت والشعب قرر ان الست اللي متجوزة تلت رجاله غير الفكه تستاهل القتل او علي الاقل مالهاش ديه ومش معقول يروح بسببها اتنين جدعان وهي اساسا كلبه ولا تسوي ، طبعا لازم ساعتها نفتكر الوجه الطفولي للاتنين الجدعان اللي ياحرام حيروحوا في كلبه ولا تسوي !!!!

ولسه السيرك منصوب ........ محامين تطلع تقول ، لما الحكم يتلغي في النقض حنقول ونقول والنقض لسه ما قالش حاجه ، ولما حنقول وحنقول ، المتهمين حياخدوا براءه ، ومرات ابويا تكتب حيثيات البراءه وتحاصر بابا بيها وقت ماتشات الاهلي وبابا ضغطه عالي وبياخد مهدء علشان يتفرج علي الماتش لانه عنده 77 سنه ، تصوروا بقي حيثيات البراءه التلفزيونيه اللي مراته بتحاصره بيها وتمنعه يركز مع ابو تريكه وحسام البدري ممكن تعمل في ضغطه ايه ، وابوس ايديك ياطنط سيبيه في حاله ، تقولي وانا قلت حاجه ، ده عمرو اديب اللي قال وهناء وسيد علي اللي قالوا والمحامي الفلاني قال والمحامي العلاني قال ، وبابا وشه يحمر ويحتقن واحس ان دماغه حتفرقع وابوس ايديك ياطنط خليه يركز في الماتش ، تضحك وتقول مايركز بس المتهم بريء لان فلان قال وقال ...........

فجأ ....... ولاول مره في التاريخ المصري ، نعيش عصر المحاكمات التلفزيونية الحية !! بث مباشر من مجالس النميمة واستديوهات التلفزيون !!!! ورق القضيه يتقطع ويتوزع علي الناس بالعدل والقسطاط ، كل الناس قرت الورق واقوال الشهود وتقرير الطب الشرعي وكل الناس عرفت ان الجثه كانت لابسه وقت ماماتت هدوم تحتانيه ماركه ايه ، وحد ابن حلال قعد حسب تمن الهدوم اللي كانت الجثه لابساها ايشي فريساتشي وايشي مش عارفه ايه وقالك ، ميته بقيمتها برضه !!!!!!!

واه يابلد اتجننت رسمي رسمي !!!!

والقاضي الاول اداهم اعدام ، فكل مصر اتكلمت في العقوبه للشريك وللفاعل الاصلي وبقي في مصر 50 مليون قانوني باعتبار باقي الشعب يااما اطفال ياما عواجيز عندهم الزاهيمر !!! وهو صح كده وغلط كده !!!! والسيرك منصوب ، وسيرك ايه ، بلدي ، من بتاع علي صدرها تنور وعلي ضهرها تنور !!! مافيش حد عاقل ناوي يقول كلمه عاقله ، يقول ان السيرك والنسانيس اللي بتتنطط دي غلط ومخالف لابسط القواعد القانونيه ، غلط المذيعين يناقشوا القانون وغلط المحامين يعقبوا علي الحكم في التلفزيون وغلط الشهود يدلوا بشهادتهم في صفحات الجرايد وبرامج التوك شو ، وغلط ان المحامين يطلعوا يترافعوا في المشاهدين في التلفزيون ، اش محامين الزوج الاول واشي محامين اسره المجني عليها واشي محامين المتهم واللي انضم لهيئه الدفاع واللي خرج منها و.......... محدش يقول ايه اللي بيحصل ده ، طبعا لا محدش يقول اي حاجه ، ويقول اليه ، اذا كان كل الناس عماله تقطع تذاكر وتخش السيرك ، اعلانات علي برامج التوك شو ، واعلانات في الجرايد اللي بتكتب عن الموضوع وزياده في نسبه التوزيع ...............

محاكمه تلفزيونية ..... صحيح المتهمين في السجن والقضاه في المحكمه ، لكن المحاكمه في التلفزيون ، ولا مسلسلات الافلام العربي !!! الشعب كله بيفصل في القضيه بناء علي معلومات موجهه من الاعلام والناس متصورة ان اللي بيقوله الاعلام صحيح وان الاعلام لاينطق عن الهوي ، اي حاجه تتقال في التلفزيون او في الجرايد صح ، ولما الناس تتصور ان الكلام اللي بيتقال صح لان التلفزيون قال ولا الجرنان قال ، تصدقه ولما تصدقه تردده ولما تردده تصدر حكمها الخاص بناء علي المعلومات التي اترمت لها !!!! طيب المعلومات اللي بتتقال في التلفزيون والجرايد ، جت منين ؟؟؟؟ معدين البرامج ومحررين الصفحات جابو ملف القضيه المليون ورقه والادله واطلعوا عليها وقروها ، ولا حد قال لهم شويه حاجات ؟؟؟ والحد ده مين ؟؟؟ مين اللي قرا ملف القضيه وحافظه وعارف فيه ايه مع المتهم وايه ضده !!! امي اللي يرحمها !!! لا امي اللي يرحمها ماتت قبل القضيه كلها والسيرك كله ما يتنصب !!!!! مين اللي اطلع علي ملف القضيه وسرب معلومات ( منتقاه ) للصحافه واجهزه الاعلام !!! النيابه العامه ؟؟؟؟؟؟؟؟؟ طبعا لا ، النيابه العامه ماسربتش معلومات للتلفزيون ولا الجرايد!!! امال مين ؟؟؟؟؟؟؟؟؟؟؟؟ ده بقي سر شويبس !!!! فيه حد اطلع علي ملف القضيه وحفظه صم واختار منه حاجات سربها للاعلام والتلفزيون والجرايد ، علشان يحصل دوشه في المجتمع ، الدوشه دي تطلع الاسهم شويه وتنزل الاسهم شويه !!!! علشان يحصل بلبله في المجتمع ويبقي كل واحد ماشي في الشارع قاضي في القضيه ، قاضي بلا علم بلا اطلاع دقيق ، بلا معلومات ، قاضي بلا تجرد ولا حياد !!! كل واحد ماشي في المجتمع بقي قاضي ، يصدر حكم وهمي فاشل لاعلاقه له بالقانون وبعدين يصدقه ويروج له ، وبعد مايصدقه ويروج له يحاكم المحكمه الاصليه لو حكمها طلع مختلف عن حكمه!!!!

دي سيرك رهيب ........ مقصود منه البلبلة والفوضي العمديه فتضيع الحقيقه وتنهار كل الثوابت ونفقد احترام كل شيء واي شيء !!!! مقصود منه خلق تعاطف مع المتهمين اللي في النهايه موتوا كلبه ولا تسوا !!! مقصود منه محاصره القضاه والمحكمه براي عام ضاغط !!! راي عام جزء منه شايف ان المتهم غلبان لان الادله ( اللي قالها له الاعلام ) مابتقولش ان ليه اي دعوه بالواقعه .... والجزء ده من الراي العام شايف ان المتهم لازم ياخد براءه فلما ياخد اعدام ، الجزء ده من الراي العام ينصب المشانق للمحكمه ويدينها ويحاكم حكمها ويصدر رايه فيه بلا علم بلا معلومات دقيقه !!! لكن ده فرح ومن حق الكل ينقط !!!! الجزء التاني من الراي العام مكون وجه نظر سياسيه بالاساس ، المتهم من رجال الحكومه ، ولانه متهم اذن فهو مدان ، وادانته تعني ضروره الحكم عليه بالاعدام ، فاذا لم يحكم عليه بالاعدام فده معناه علي طول ان القضاه اما اتضغط عليهم علشان يحكوموا لصالحه او ان القضاه انحازوا له لاسباب كل الناس بمنتهي الجراءه والتجبر بترددها ضد القضاه دون اي ادله ودون اي حقائق ، بس الموضوع عند الجزء ده من الراي العام بسيط جدا ، المتهم مجرم ومدان ولازم يعدم ، لو مااعدمش يبقي الحكومه بتنقذ رجالتها او المتهم بينقذ نفسه ، ازاي !!!! ده بقي سر شويبس التاني !!!!!!

سيرك مقصود منه البلبلة ....... والبلبله لصالح المتهم اللي ناس شايفاه بريء وناس شايفاه مجرم لكن في حق واحده ماتستاهلش وناس شايفاه باشا مايصحش يدان في سيده ساقطه وناس شايفاه ضحيه لصراع اكبر بين عشاق ورفاق القتيله !!!! بلبله مقصود منها التشكيك في القضاء وعدم احترامه .... لو اصدر حكم بالاعدام يبقي ظالم ولما النقض يلغي يبقي النقض بيجامل ، ولما يحكم بالسجن المؤبد يبقي بيجامل او اتضغط عليه ، المهم ان القضاء بيصدر الحكم في القضيه دي باي طريقه مالهاش علاقه بالقانون ... ونتكلم ونتكلم في الاعلام وفي مجالسنا الخاصه نتناول القضاء والقضاه بالنقد والتعقيب والاساءه ، مش واخدين بالنا ان ده له اثر واحد في حياتنا ، اننا مانحترمش القضاء ، مش في القضيه دي ، لا عموما ، فلو اتخانقت مع جاري ، ااقعد بكل بجاحه في النادي واقول القضاء مش مضبوط بدليل قضيه فلان وفلانه !!!! ولما الناس تبطل تحترم القضاه وتبطل تحترم احكامه يبقي علي الدنيا السلام ويبقي الفوضي ولعت البلد !!!! وهو هدف يسعي له البعض واصرار ودأب رهيب !!!!

ومازال العرض مستمر !!!!!!!! الحكم صح ؟؟؟؟ الحكم غلط ؟؟؟؟ الحكم منحاز ؟؟؟؟ الحكم حيتنقض ؟؟؟؟ الحكم حيتأيد ؟؟؟؟ ومازالت كل الناس بتفتي !!!! لان معدين البرامج بيقولوا حاجات هي الصح !!! ولان المذيعين بيقولوا حاجات هي الصح !!!! ولان الجرايد بتنشر كلام هو الصح !!!!! محدش قرا ملف القضيه ، مش مهم !!! محدش اطلع علي الادله بجميع انواعها ، مش مهم !!!! محدش عنده علم وخبره قانونيه تسمح له بالتمييز الدقيق بين تفاصيل كثيره متشابهه وادله وقرائن ، مش مهم !!!! كلنا اصبحنا قضاه وكلنا حكمنا !!!!

اخر حاجه حاقولها ......... ان القضيه دي مراية العصر اللي احنا عايشين فيه !!!!
مليئه بالانحطاط !!!
يكفيها ان القتيله ، زوجه لثلاث رجال - او هكذا يصفوا انفسهم - يتنازعوا عليها وهي قتلت منسوب قلتها لرابع قال انها كانت زوجته عرفيا او في اسوء الاحوال عشيقته !!! يكفيها ان ضابط شرطه سابق اتهم بقتل ساقطه بتحريض من رجل اعمال !!! هل هذا الكلام صحيح او غير صحيح ، الله اعلم ، لكن مجرد توجيه الاتهام لهذا الضابط السابق ، ورجل الاعمال بانها اهتما بتلك السيده لدرجه القتل وقبلها المطارده من دوله لاخري !!! امر مقزز في ذاته !!!! واذا كان الضابط السابق اعترف ثم انكر اعترافاته !!! ورجل الاعمال رفع قضايا لاستردا امواله من القتيله في اكثر من دوله ، فهذا ايضا جميعه مقزز جدااااااااااااااا !!!
انها ليست قضيه الموسم !!!! وليست قضيه العصر !!!!
بل هي قضيه الانحطاط المقزز !!!!

لم اهتم بالقضيه !!! ولم تشغلني !!!
رغم اني سؤلت مائه بل الف مره رايي ايه وكنت سخيفه وعبيطه لما باقول معرفش لاني ما قريتش الورق !!!!!!
الناس كانت بتضحك في كمها ، ايه المحاميه السكه دي اللي مش عارفه تقول رايها في القضيه اللي كل الناس بتقول رايها فيه حتي الكناس والزبال والبت " بتاعت السويت " والحلاق والكوافير والشغاله وسواق الميكروباظ !!!!
كنت باسمع سؤالهم وازعل قوي !!!!!!!!!!!! ازعل قوي علي حاله الفوضي والتردي والانحطاط والايام السودا اللي احنا عايشينها!!!!
ماعلينا !!!!
ياخساره حسن عابدين مات قبل مايقول لنا عن " سر شويبس " !!!!!!!

28 سبتمبر 2010

ممنوع الاقتراب !!!!



في السهول والوديان وفوق الهضاب والتلال

وفي خبايا الروح وتلافيف النفس وفي الذاكرة

دقتت اللافتات التحذيرية كبيرة واضحه الخط والمعني

ممنوع الاقتراب ، انتبه ... حقول الغام !!!

اعلنتها بوضوح وصخب وحسم

لاارغب احد يقترب مني ولااقوي علي الاقتراب ...

ولاابغي احد يخترق مساحاتي الخاصه ..

لاابغي اختراق او تسلل او تلصص

لن اسمح بنظرة عابرة

ولا فضول ينتهك خصوصياتي

ولا عين تلمح خيالي الذي اخبئه عن الغرباء

نعم فالجميع الان غرباء

الجميع الان غرباء ... وسعيده انا بغربتهم واغترابهم عني

و عن عالمي الذي لايحتويني فقط ولن يحتوي سواي !!!

لن اسمح لاحد يخطو خطوة واحد صوب مساحاتي الخاصه

لقد خضت حروبا ضروس لاحررها

نزفت دما ومشاعر وامنيات مجهضة

وتحملت انفاس لااحب رائحتها ونظرات زجاجيه لاتراني

ولمسات تسري كالسم في البدن

وقررت اموت وانا مازلت حيه حتي لااشعر بالمسلوب مني والضائع ...

لكن الحياة صممت لاتتركني اتخاذل امامها واتوه

وانتشلتني باكف حانيه ورفعتني من دوامات الوجع التي ابتلعتني الف مرة ولم تقتلني !!!

وحررتني وحررت مساحاتي الخاصه من كل الغزاه والغرباء

ورفعت راياتي المزركشة فوق اسوار قلاعي والبوابات

ومنحت السجانة اجازة مفتوحة من خدمتي التي طالت

واوقفت علي ابوابي شخصيات ديزني وميمي الجميله بفيونكتها الحمراء

ومعها زيزي وبلوتو حراس اماني وسعادتي ومساحاتي المبهجه الخاصه !!!


دقتت لافتتات التحذير .... ملكيه خاصه ممنوع الاقتراب والتصوير واللمس والهمس !!!

مساحاتي الخاصه ملكي وملكي فقط !!!

انا من اقرر

مالذي ساصنعه في وقتي وفي حياتي

متي اضحك ومتي ارقص

متي اشتغل ومتي اصمت

متي اسافر ومتي اعود

متي استدعي الاحلام لتؤنسني

ومتي اعطيها ظهري وانام

لااحتاج اذن ولا تصريح ولااجازه من الكفيل ولا موافقه من السيد

لن امر علي الجمارك والحجر الصحي والطب الشرعي

وشيخ الخفر وكلاب البحث عن المتفجرات

لاضحك كالاطفال وابكي كالعجائز وقت تكتشف ان العمر غافلها وهرب

لااحتاج ورقه مختومه بالختم الرسمي كي اتنفس واعيش

لااحتاج مبرر لطفولتي ولا حجج لضحكاتي ولا ذرائع لابقي علي قيد الحياة

مساحاتي الخاصه ملكي انا ويالها من ملكيه خاصه !!

تحملت كثيرا لاحررها فلا يقطن فيها الا من اسمح له ..

وحتي الان لم اسمح لاحد ويبدو اني لن اسمح !!!

انها مساحاتي الخاصه التي تحلمت من اجل فك اسرها واسري الكثير والكثير

تحملت قهرا و هما ، تحملت وهما ووجعا

وقت كانت تلك المساحات صاخبه مزدحمه

بهؤلاء الذين لاارغب فيهم ولا اقوي علي ابعادهم

تحملت كثيرا ... ابابيل الطير و صقيع البرودة ولهب الصلب المنصهر والوجوه الخشبيه

تحملت الزيف والكذب والنفاق المسمي بالمجاملات وحسن الادب والتعقل

تحملت الاحباط واحببت مذاقه وادمنت ملوحه الدموع والايام

وقاطعت العالم واخرست لساني الطليق ونسيت الكلمات

وتحدثت ونفسي اواسيها بعدما كرهت كل الدروس والحصص وكلمات التوبيخ

فصمت لاانطق ولااسمع واكلم نفسي حتي ملتني وغضبت وطالبتني بالحرية

وخاصمتني حين حاولت اصبرها وكرهتني حين قررت اذبحها بالتحمل والصبر

انها مساحاتي الخاصه التي نقشت دموعي علي جدرانها وانا اسيرة الوهم وسجينته

كل الادعيه والشعارات وابيات الشعر وكل النداءات ومشاعر متناقضه ويأس ورجاء

التمني والغضب ، الحلم والامل ، الكره و الفرحه

وانا قابعه خلف القضبان احدق في العصافير واحسدها اتمني اتحرر فاطير !!!!

مثل طفل صغير ادخل راسه داخل ستاره صندوق الدنيا فعاش الدنيا داخل الصندوق ولم يعيشها

وتصورت الموت غرقا في الازرق قدرا خلقت من اجله

واقنعت نفسي بان الحياه منحتني وجهها القبيح ولن تمنحني غيره

لكن الله كريم بعباده الضعفاء

فارسل اعصار عاتي اقتلع القضبان وحررني

فحلقت في السماء وحررت مساحاتي الخاصه من انفاس الاعداء

وانتصرت علي نفسي وفرحت بهزيمتي وثملت بالماء البارد احتفالا بالحرية !!!

فهل امحو انتصاراتي واسلم راياتي لمن قد يكسرني في وقت لاطاقه لي علي الحروب والاقتتال

لاعود بقدماي واختياري اسيرة اتابع الحياه من خلف القضبان ولا اعيشها ابدا !!!

لن افعل ...

لاارغب في الاقتراب ... ولن اسمح لقدم ولا ابتسامه ولاخيال

يغزو مساحاتي الخاصه ويغزوني

وحين المح خيالات تقترب اقيم المتاريس واغلق ابواب القلعه واكهرب الاسوار ..

وارفع الرايات السوداء تشير لهياج البحر وارتفاع الموج وانتشار الدوامات واختبيء ..

لاارغب في الاقتراب ...

لاني الان .... انانية جدااااااا

اليس من حقي اكون انانية .. لاافكر الا في نفسي ولاافكر في الاخرين

من حقي انعزل وروحي ..

حين توجعني اهدهدها وحين تبكي امسح دموعها وحين تصمت لااحاصرها بالصخب

واتركها تحلق في خيالاتها وتستمتع بوحدتها وتلون احلامها بالالوان التي تحبها

من حقي استمتع بحريتي وحيدة انانية !!!

فكل اوجاع الوحدة وهمها اهون واجمل من صحبه تخنق وانفاس تميت !!!

كل اوجاع الوحدة وهمها احن من ليل موحش يمزق صمته صوت بكاء لايجد من يسمعه !!!

لاارغب في الاقتراب !!!

ففي حضني شوك لم انزعه ..

وعلي شفتاي مرا لم ابصقه ...

وفي ذاكرتي اوجاع لم ابرء منها ..

وفي عز ليلي مازالت الكوابيس توقظني دامعه العينين موجوعه القلب

تطاردني بالاسر فاقفز جزعه من فراش الوجع اتمسك بحريتي اكثر واكثر

لاارغب في الاقتراب

ولاارغب اوجع احد ولن اقبل احد يوجعني ..

واعرف ان المشاركه اقتسام للفرحه وللهم

لكني لااكترث لاني نسيت الفرحه

ولااقوي احمل همي فكيف احمل هم الغرباء ..

ولااملك وقتا لادخل في مغامرات

وقلبي مازال يوجعني من جروح الماضي البارد ومازلت اداويه ..

ودفئي تسلل تحت جلدي يداويني !!

ومازلت ازرع مساحاتي الخاصه بالرياحين والياسمين وابخرها بالمسك والعود

واصلي لله استعيذ به من كل الشياطين

وادعوه يبقيني لااحتاج لاحد هانئه وحيده في مساحاتي الخاصه !!!

ومازالت لافتاتي معلقه تحذر الغرباء حقول الغام وملكيه خاصه !!!

فاذا تسلل احدهم من خلف ظهري وارادتي لمساحاتي الخاصه

ستنفجر للاسف في وجهه كل الالغام

ولن اشفق عليه ولن اواسيه

فقد حذرت وحذرت لكنه للاسف لم يسمع ولم يعي جدية تحذيراتي ومعناها

ومازالت لافتتاتي تصرخ بقوه وحسم ... ممنوع الاقتراااااااب !!!


26 سبتمبر 2010

لم احب الفيلم ولم اصدقه !!!!


هذا نص كتبته بطريقتين !!!
المرة الاولي ... كتبته مثلما احسست فجاء كالعشب البري !!!
المرة الثانية .... كتبته لنشره في الجريدة فجاءت لغته مختلفة لكن عبر عن رايي بنفس الاحساس ثم عدلت عن نشره في الجريده وقررت انشر هنا النص بالطريقتين معا !!!!!!!!!!!!

------------------------------------

( 1 )

البنات دول .......... فيلم ماعجبنيش ولا حبيته ولا صدقته !!!!
هو علشان ابقي مثقفه وبافهم ... لازم ااقول ان الفيلم اللي اسمه ( البنات دول ) فيلم حلو وفظيع وواااااااااو ؟؟؟
طيب انا لا مثقفه ولا بفهم ولا عايزه افهم .... والفيلم وحش وماعجبنيش جملة وتفصيلا !!!
كده حيطلع حد يقولي انت بتخزقي عينك ومش عايزه تشوفي عيوب المجتمع !!!
او حيطلع حد يقولي حريه الابداع والمبدع ومش عارف ايه !!!
او حيطلع حد يقولي اني غالبا رجعيه متنيله علي عيني !!!

اذن علشان اريح الجميع ، انا رجعيه ومتنيله علي عيني ومش عاجبني الفيلم !!!
المصيبه اني حسيت الفيلم كذاب مصطنع رغم ان الفيلم قائم علي فكره اساسيه هي انه فيلم صادق جداااااااا !! صادق لدرجه انه امتعنا بكميه كلمات قذره وسباب علي لسان ( البنات دول ) ال ايه علشان نصدق ان الفيلم تسجيلي جدا ، تسجيلي لدرجه انه سجل الكلمات القذره والشتائم البشعه اللي تفضلت ( البنات دول ) علينا بدلق جرادل منها علي راسنا وفي ودانا !!!!
الفيلم كذاب .... ولا تسجيلي ولا حاجه ، او يمكن انا مش مثقفه لدرجه اني مش فاهمه معني الفيلم التسجيلي ، وان رؤيه المخرج وتقطيع المونتاج واختيار اللقطات اللي تظهر واللي ماتظهرش كل ده مايتناقضش وان الفيلم تسجيلي جدا !!!! هو مش ترتيب اللقاطات والمونتاج وشكل الحركه والحوار علي لسان الابطال ( اللي يظهر في الفيلم واللي مايظهرش ) مش كل ده يغير في شكل والاحساس بنفس المشهد من عين تسجيليه لعين تسجيليه تانيه ولا انا فاهمه غلط !!!!

الفيلم حب يكون صادق وكانه بيستعرض موضوع ومشكله وحياه ( البنات دول ) بمنتهي التلقائيه والفطرية ، اللي ظهر علي الشاشه هم ( البنات دول ) وبالتالي احنا نصدق والفيلم ياخد جوايز لانه تسجيلي وجريء وصادم و............. واوووووووو!!! لكن الفيلم من لقطته الاولي وهو بيقول انا فيلم كذاب ، اه باحكي عن ( البنات دول ) لكن باحكي بطريقتي علشان اخد المشاهد من ايديه واوديه في حته انا عايزاها والعب في دماغهم براحتي !!! وده حق المخرج والمنتج ، انهم يعملوا العمل بتاعهم بطريقتهم وحقي اني اقول مش عاجبني ماانا برضه حره !!!!

علي فكره ........... كل البشر تستحق التعاطف !!! وكل البشر يعرفوا يكذبوا علي نفسهم وعلي الناس بمنتهي البراعه !!! وكل البشر تقدر تخليك تعيط علي حالهم حتي لو كانوا مجرمين وقتالين قتلا !!!! لكن دايما عندهم مبررات وذرائع واسباب وعقد نفسيه وعقد اجتماعيه والي اخره !!!! وحارجع للنقطه دي تفصيلا بعد شويه !!!!!

المشكله اني حسيت الفيلم كذاب ، وكمان مافهمتش عايز مني ايه انا المتفرج لاني مافهمتش ايه الهدف الحقيقي منه !!!
يعني الفيلم بيحكي عن ايه .... عن بنات الشوارع ، طيب وبعدين ، بيحكي عنهم ليه ، علشان نفهم السبب انهم بقوا بنات شوارع ونحاول نعالج الاسباب اللي خلتهم كده علشان مايبقاش فيه بنات تانيه بنات شوراع !!!
ولا بيحكي عنهم باعتبارهم بشر محتاجين تعاطف !!! واذا كان تعاطف من مين وليه !!!
ولا بيحكي عنهم باعتبارهم شويه بشر ليهم حدوته وخلاص ، فنعرف الحدوته وبس خلاص توته توته !!!!!!!!!
ولا بيحكي عنهم باعتبارهم مضطهدين مثلا ولازم نرفع الاضطهاد عنهم ولا ايه !!!

ماهو انا اعرف الفيلم بيحكي عن ايه ، اعرف مفروض احس ازاي !!!!!!!
الفيلم بيبتدي بمشهد جميل .... طاطا ، راكبه حصان وبتجري بيه في شارع جامعه الدول العربية وسط العربيات بمنتهي الانطلاق والقوة!!!
تصدقوا اني حسدتها وحسيت في اللحظه دي اني لازم ابقي طاطا ، واخرج من العربية وانطلق زيها في السماء !!!
ولما طاطا ركبت الحمار بالمقلوب وقعدت تضحك والحمار يجري ، قلت ايه الانطلاق ده والسعاده دي !!!
ولما البنت التانيه اللي معرفش اسمها قعدت فوق الشجرة تقول بيحبني مش بيحبني حانام في قسم العجوز مش حانام في قسم العجوزة ، اولا انبسطت من فكره اننا نقعد فوق الشجر ونكسر كل المألوف ونتمرد عليه واللي مش عاجبه يشرب من البحر لكن رجعت صعبت علي ، لما تصورتها حتنام في قسم العجوزة وهي مابتعملش حاجه غير انها بتشم ( كولة ) وتاخد برشام وتشيل موس في بقها !!!!

هو الفيلم بيقول ان البنات دول حلوين ياريت نبقي كلنا زيهم !!!! واذا ماقدرناش احنا شخصيا لان الفرصه فاتتنا يبقي الا اقل من بناتنا وبنات حبايبنا !!!!
نحمل بابن الشعب اللي مش عارفين ابوه لان ( كل العيال السريحه ناموا مع الام ) !!!
ونشحت نشحت نشحت بمنتهي السعاده والنشوة والكذب وادعاء الغلب علشان ( نشتري حاجه العيال في المدرسه ) !!!!
ولما يجي اب واحده من البنات عايز ياخدها ، نخطف السكينه من عم مش عارف مين الفكهاني ونجري وراه !!!
ونبقي جدعان زي طاطا لما هربت الواد لما البوليس قبض عليه وفتحت البوكس وساعدته يجري !!!

الفيلم عايز يقول ان البنات دول بني ادمين ليهم مشاعر !!! طبعا اكيد بس وبعدين !!!!
القاتل المأجور بني ادم له مشاعر ولو حكي قصته حيصعب علينا ولنا في علي الشريف في فيلم ( الحب في الزنزانه ) ذكري ومثل !!!
السفاح اللي بيقتل الناس او يغتصب البنات وبعدين يقتلهم ، بني ادم وعنده مشاعر وغالبا عنده عقده من الستات وامه اذت مشاعره وهو صغير و.......... الحلقات الاجنبي عامله دشليون حلقه في شرح ذلك الامر !!!
كل ده ماشي بس وبعدين !!!!!!

الفيلم عايزنا نعالج البنات دول وننتشلهم من الشارع اللي بيعرضهم للاغتصاب والحمل السفاح ، طيب هي البنات دي مستعده تقبل تتعالج وتسلم نفسها لمصحات لمعالجه الادمان ولمؤسسات لاعاده التأهيل وتعليم مهنه او حرفه او غيره !!! هي البنات قالت علي لسانها في الفيلم ان نفسها ده يحصل ، قالت انها بتفتقد حياه الاسر والبيوت ونفسها ترجع تعيش مع بابا وماما وانور وجدي !!! البنات دي قالت ان الشارع وحش وانهم بيكرهوه ، الفيلم طلعهم بيكرهوا الشارع وشم ( الكولة ) ، ابدا ، هما سعداء حتي لو قرر الفيلم يوهمنا بانهم مش كده !!!
فجأ يرقصوا ويزغرطوا والسواقين يصقفوا .... والبت تخش القهوه تجيب كوبايه ميه بترقص داخله خارجه زي بجعات بحيره تشايكوفسكي ، يضحكوا ويتريقوا علي الحمل باعتبار ان احداهن حامل بابن الشعب وهاتك ياضحك ، اخر سعاده وحريه وهما بيشموا (الكولة ) في الاكياس البلاستيك وبيتمشوا براحتهم لا الحكومه بتجري وراهم ولا امناء الشرطه بيطاردوهم !!!!

للاسف .......... مافهمتش الفيلم عايز يقول ايه !!! الا اذا كان قصده وفقط استعراض حياة ( البنات دول ) وده حق المخرجه وحق المنتج انهم يعملوا فيلم عن ايه حاجه هما عايزينها ، وحقي بقي اني اقول ماعجبنيش خالص اللي عملوه !!!

انا الحقيقه باكره الفجاجه في اي شيء !!!!
باكرها جدا ، اه من حق اي حد يبقي فج ويتكلم بفجاجه ويعمل افلام بفجاجه ، لكن من حقي ااقول مابحبش الفجاجه ، طبعا ممكن ناس تانيه تحبها ، وماله برضه ، كل واحد حر !!! انا لااقيم الفيلم عموما لكني اقول رايي انا شخصيا فيه ... اراه فجا قبيحا !!!
من حق المخرجه تظهر الصورة والابطال والكلمات والحوار مليء بالقبح !!! هذا حقها وحقي اقول لم يعجبني ابدا ذلك القبح !!!!
وفي النهايه ..... مازلت اشعر الفيلم كاذب رغم انه يوحي بانه منتهي الصدق وانه بلا رتوش وبلا تجميل !!!
كاذب لانه ليس تلقائي فطري ، لكن المشاهد وترتيبها واستنطاق البنات والاولاد بالعبارات والجمل التي قالوها قصد منها الوصول لنتيجه للاسف لم اوصل لها ولم تصلني !!!!
------------------------------------------
( 2 )

بالصدفه ، سمعت عن فيلم ( البنات دول ) من احدي صديقاتي وكانت معجبه جدا بالفيلم التسجيلي الذي يستعرض حياه مجموعه من فتيات الشوارع اللاتي يعشن علي هامش الحياة في احد احياء القاهرة ، كانت صديقتي معجبه بالفيلم باعتباره فيلم يحكي علي لسان بطلاته بنات الشوارع قصه حياتهن ويستعرض شكل تلك الحياة وانه حسبما قالت صديقتي فيلم صريح وصادم وجميل ... سمعت عنه لكني لم اراه واعجاب صديقتي به لم يحفزني للبحث عنه او مشاهدته و.... نسيت الفيلم وحوار صديقتي حتي عثرت بصدفه ثانيه علي شبكه الانترنت علي وصلات نشرها احد الاصدقاء موضحا ان الضغط علي تلك الوصلات يقود لفيلم ( البنات دول ) وكان صديقي يعقب علي الفيلم باعتباره يثير مشكله لم ننتبه اليها ... وادركت اني وذلك الفيلم علي موعد وانه يتعين علي رؤيته مادام الفيلم قد وصل لي عبر اجنحه الانترنت ,,, و ضغطت علي الوصلات وشاهدت الفيلم ...

ودعوني في البدايه اوضح اني احترم بشده حريه الابداع الفني وحرية المبدع واري انه من حق اي مبدع ان يعرض في عمله - سواء قصه او شعر او فيلم او مسلسل او اغنيه او لوحه - مايراه من قضايا جديره بالاهتمام من وجهه نظره وانه حر تماما في معالجه تلك القضايا بالكيفيه التي تترايء له وانه من حقه ان يحاول دفع المشاهد للتعاطف او الايمان بما يؤمن به وبوجه نظره ، كل هذا من حق المبدع ... لكني ايضا اؤمن بحق المشاهد ان يعجبه مايراه او لا يعجبه ، من حق المشاهد ان يحب مايراه او يكرهه وان تعبير المشاهد عن وجه نظره فيما يراه ولو كان بمنتهي الغضب او الرفض او الكراهيه لايعني تقييدا لحريه الابداع ولا حريه المبدع ولايعني استعداءا لاي جهه كانت ضد ذلك المبدع وعمله وحريته فيما يقوله ويصنعه ، وبمعني مختصر اوضح ان المبدع حر فيما يصنعه لان هذا ابداعه والمشاهد حر في رايه فيما يراه .. هكذا المعادله ببساطه !!!

لماذا اقول هذا .... لاني ببساطه شديده حين شاهدت ذلك الفيلم ، لم احبه حتي لم ابقي حياديه تجاهه باعتباره مجرد فيلم شاهدته وانتهي الامر ، ايضا لم اري فيه اي جمال واحسسته قبيحا لم اراه صادما مثيرا للتفكير بل رايته فجا منفرا ، هل معني هذا اني ادفن راسي في الرمال انكارا لواقع مجتمعنا ، او اني اؤمن بالسينما المخمليه التي تدور احداثها في القصور والحدائق الغناء ويغني ابطالها علي سطح القمر تحيطهم هالات النور ، بالطبع لا ، لست ممن يؤمن بدفن الراس في الرمال ولا اؤمن بانكار الواقع واري واجبنا ان نري جيدا مايحدث في مجتمعنا الذي نحبه ان كنا معنيين به وبمعالجته سلبياته ونطمح فيه افضل واكثر تطورا ، ايضا انا لااحب السينما المخملية واحب واقعيه سينما عاطف الطيب ومحمد خان وصلاح ابو سيف وغيرهم من المبدعين ، لكني في نفس الوقت اكره القبح والفجاجة في اي شيء حتي لو كان فيلم تسجيلي مفترض انه يصف الواقع الذي يحيط بنا !!!

يستعرض الفيلم حياة او مشكله او واقع ( البنات دول ) ، و ( البنات دول ) هن الفتيات التي قال الفيلم انهن يعشن في الشوارع ويحملن شفرات حادة ( موس ) في افواههن ويحملن ( بابن الشعب) الذي لاتعرف الام ابيه لانها ( نامت مع كل العيال السريحه ) ويشممن (الكوله ) التي تساعدهن علي تحمل حياتهن و المشاجره مع اثنين ثلاثه من ( العيال الصيع ) والانتصار عليهن ، هن من يؤمن بان (البنت اللي عاجزه تحمي وشها تروح بيتها ) واللاتي يرفضن العوده مع ابائهن للمنازل لانهم اعتدن علي الشارع وحريته وهن اللاتي يساعدن (العيال الصيع ) في الهروب من الشرطه وامناءها ..... هل فقط كان الفيلم يسجل الواقع ويسرده علينا بطريقه صادمه لجذب الانتباه لمشكله هؤلاء الفتيات وحلها ومنع تكرارها ، ام فقط كان الفيلم يسجل الواقع من اجل عرضه وفقط بمعني ان الرساله التي يحملها الفيلم للمشاهد ، انتبه هناك في الحياة ( البنات دول ) !!!!

لقد تابعت الفيلم ولم اعرف المشكله التي يعرضها الفيلم ، هو استعرض حياه تلك الفتيات نعم ، بكل التفاصيل بكل الالفاظ والشتائم والتعبيرات والحورات الخاصه بهن ، لكني لم اعرف مشكلتهن ، هل المشكله لماذا اصبحوا مثلما اصبحوا ، ام المشكله كيف يتعامل معهم المجتمع بعدما صاروا كما اوضح الفيلم !!! اذا كان المطلوب من المشاهد الانتباه لوجود مشاكل تفرز في نهايتها ( البنات دول ) فللاسف بعد مشاهده الفيلم لم اعرف بالضبط ماهو ( المصنع الاجتماعي ) الي يقود البنات الي تلك المشكله !!! واذا كان المطلوب من المشاهد الانتباه لوجود تلك البنات اللاتي يعشن تلك الحياة باعتباره ان حياتهن في الشارع في ذاتها هي المشكله فالفيلم لم يوضح لي ان تلك الفتيات يعتبرن الشارع وحياتهن فيه مشكله !!!

من هن ( البنات دول ) ، هل بنات فررن من اسرهن للشارع واذا كان لماذا ؟؟ هل بنات ولدن في الشارع اساسا من امهات يعشن في الشارع ؟؟؟ هل بنات ارتكبن جرائم ولم يعد لحياتهن الطبيعيه بعدها واستوطن الشارع ؟؟؟ وهل ( البنات دول ) يتمنين العودة للمنازل والاسر ام سعيدات بحياتهن وحريتهن في الشارع رغم الصعوبات والمشاكل اللاتي يواجههن طيله الوقت ؟؟؟ الفيلم لم يقل لنا ...............اساس المشكله ومبررها ان كان يعتبر ( البنات دول ) مشكله ، فقط استعرض لنا مااستعرضه بمنتهي الفجاجه !!!!

لم احب الفيلم حتي لو عرض في مائه مهرجان واخذ مائه جائزة !!!!

17 سبتمبر 2010

صرخة استغاثه للعقلاء ... مصر محتاجاكم !!!




( 1 )

في الفيس بوك .... كتب سامح سمير صديقي الجميل ........... علموا اولادكم التسامح و قبول الاخر و نسيان الاحفاد التاريخية، نعم للتطبيع مع الاقباط!!! وصديقي سامح مصري حتي النخاع قبطي ( حسبما اظن ) يتعرض لاكثر القضايا اهميه بطريقته الساخره المريرة ... واكم من مرات ضحكت علي مايقوله الا الستيتس الاخير ... رددت عليه وقلت ( مش عاجبني الستيتس ده ولا المعني اللي وراه ولا مضمونه ولا حتي يضحك ، مااتعودتش تكتب حاجات تخلينا نعيط !!!!ا ولان الكلام مش عاجبني مش حارد عليك حتي ولا ااقولك مشاعري تجاه الموضوع ..بس خلاص ) واحسست الحصار يضيق علي انفاسي ... فكانت هذه النوت !!!!

( 2 )

حتي انت ياسامح كتبت اللي انت كتبته ده !!!!

وحسيت اني عايزه اعيط بشكل رهيب !!!!
حتي انت حتحط ملح خشن علي الجرح المفتوح وتتريق علي وجعنا !!!
والقصه بدأت بموضوع ... مش عارفه اسميه ايه .. يمكن وحده وطنيه ... وحد تاني يسميه طائفيه ... وحد تالث يسميه نصيبه سودا ... المهم .... ان فيه سكينه بتمر في قلب المصريين بتقطع فيها والسكينه دي بارده وتلمه زي اصحابها وبتوجع اووووووي لانها بتقطع في قلبنا!!!

سكينه ماشيه في اللحم والعضم والاعصاب .. بتقول حنشفي مصر ، الاقباط في ناحيه والمسلمين في ناحيه ، زي كده مالجزار الداهيه يشفي الدبيحه بعد ما دمها يتصفي ، اللحمه في ناحيه والعضم في ناحيه !!! ي

انهار اسود .... احنا خلاص بقينا دبيحه بجد ، لما وقعنا السكاكين كترت علي رقابينا ، واول مادمنا حيتصفي ، حيبتدي حد يشفي فينا وفي قلبنا ....
ايه الكلام التخريف ده ... بس انا حاسه كده .... ان فيه جزار مجرم متوحش ومعاه شويه صبيان مجرمين ، مساكين سكاكين وسواطير وكذالك ، وعمالين يسنوا سنانهم مستنين الدبيحه تفرفر خالص ، مستنين دمها يتصفي ، مستنين علشان ينزلوا كلهم فيها تقطيع والاسم حيشفوها ، المسلمين في ناحيه والاقباط في ناحيه ، ولغايه مالدبيحه تفرفر والدم يتصفي ، عمالين يسخنوا في الدنيا ويشعللوا فيها .. .............

مش عارفه ااقول عايزه اقول ايه ....

عايزه اقول ... لامصر دبيحه ولا ينفع تتشفي ، الاقباط في ناحيه ولا المسلمين في ناحيه والموضوع كله كبير علي سنان وسكاكين الكل ، اه يمكن يعورونا ، ينزل منا شويه دم ، الناس تخاصم بعض ، لكن اكتر من كده ، مهما حاولوا ومهما عملوا ، مش حيقدروا يعملوا حاجه !!!!

ده يقيني وده اماني ودي طمأنينتي .... انا غلطانه غبيه حماره مش شايفه !!!

هما مش حيفلحوا الا بايدينا !!!
وساعتها نبقي نستاهل اللي يجري لينا من اول ضرب الجزمه لغايه ما الدنيا كلها تزفنا ( من ده بكره بقرشين ) مش حينجحوا الا بايدينا وبفعلتنا السودا وبسلبيتنا وبغباءنا وبتطرفنا كلنا كل واحد في ناحيه غلط !!!!


هل ينفع ااقول ......... ابوس ايديكم ياشعب مصر ، حافظوا علي مصر وماتسمحوش لاعداءها الجزارين وسكاكينهم يقطعوا قلوبنا!!! هل ينفع ااقول كده ... اه حاقول كده واكتر من كده مليون مره !!!!!!

وانا عاده ما باتكلمش في الموضوع خالص ... وغالبا في ناس كتير زيي !!! مش عايزه افتح علي نفسي ابواب جهنم والمتطرفين والمتعصبين والجهلاء والنيله !!! ويمكن باقول كل اللي بيحصل شويه ( هوهوة ) ولا اكتر من كلاب جربانه في الصحرا ،لكن مصر بخير وحتفضل !!!

لكن بقالي كذا يوم ، باتابع اللي بيتنشر علي الفيس بوك ومعدتي بتتقلص اكتر واكتر !!
كل يوم ااقرا المكتوب واحس بارهاق روحي ، والله العظيم الناس كلها شكلها بتتجنن وشكلها محدش واخد باله ايه اللي بيحصل والدنيا حتولع بايدينا احنا مش بايدين حد تاني !!!

يبقي مش وقت سكوت بقي .......... حاسه اني عامله زي العبيطه ، عامله اجري بين البروفيلات والستيتسات ، معايا جردل ميه ، كل ماالاقي حريقه صغيره ، ادلق شويه ميه اطفيها واجري ، لكن معدتي عماله تتقلص اكتر واكتر ، لان الحريقه تتطفي هنا ، تولع هناك ، زي مايكون فيه حد سرب الغاز ( اللي الحكومه بتصدره لاسرائيل ) سرب الغاز تحت جلود الناس وجوه ارواحهم ، اللي يعطس النار تقيد ، اللي يكح النار تقيد ، اللي يهرش النار تقيد ... كل الانفاس بقت ملهلبة وكل الكلام بيحرق والكوره الارضيه علي وشك الانفجار !!!


طيب اتكلم بقي في مليون قضيه داخلين جوه بعض .....

اولا ............. ااقول احساسي انا ... عشت اتنين وخمسين تقريبا عمري ماحسيت ان فيه حاجه اسمها مسيحين ومسلمين ، عمري ماحسيت بالكلام ده ، باقصد في عيلتي واهلي واصدقاء امي وابويا وجيرانا ... عمتي مصاحبه طنط ( .... ) الصعيديه دمها خفيف وبتتكلم صعيدي هي وكل عيلتها وبعدين فين ، بعد سنين ، نسمع علي استحياء ان طنط ( .... ) مسيحيه !!! عمري ماخدت بالي وانا اللي قاعده مع عمتي وبقيه عماتي ان طنط ( .... ) مسيحيه ، لاعمرهم قالوا كلمه من وراها ولا من قدامها ، بناكل في بيتها وتاكل في بيتنا ، ولما تخلل زيتون تبعت لعيلتنا كلها ولما عمتي تخلل لفت تبعت لها ولكل اهلها ، والكحك رايح جاي و......... بتتكلموا علي ايه !!! وهي حتي طنط ( .... ) لما تتطلع مسيحيه يفرق ايه ، حيحصل ايه يعني ، لان ماكانش بيحصل حاجه فمكانش بيفرق ولاحد بيسال هي مسلمه ولا مسيحيه!!!

بابا ليه صديقه الصدوق انكل ............... وانكل ده بالذات من عيله قبطيه كبيرة قوي ، لكن هو عمي وابويا عم ولاده ، واخواته البنات عماتي وطول النهار عندنا في البيت وبابا يغلبه في الطاوله واحنا نضحك وهو يغلب بابا في الطاوله فيرسم علي صدره علامه الصليب يشكر الرب لانه اخيرا غلب ( محمود ) اللي بيقرص في الزهر !!!! وفين وفين ، اعرف انه مسيحي !!! ولان الموضوع مايفرقش خاااااالص عمري ماخدت بالي من الاسامي ، دي اسامي قبطي ودي اسامي اسلامي ، عمرنا ماكنا بناخد بالنا ، وفجأ بقت العيال اسمها اسلام واسمها مينا ومايكل !!! وبقت البنات ( فاطمه وزينب ) ولا بد من قراءتها باللغه العربيه وبالتشكيل وعلي الناحيه التانيه بقي في ماري وماريان !!! رغم ده فضلت عبيطه ، اتعرف علي حد واصاحبه واحبه وسنين تعدي وبعدين حد يقولي ده مسيحي ، اقول ماعرفش يقولي ازاي ، ده اسمه كذا لا فيه محمد ولا محمود !!!!!! وهو يعني لما يطلع مسيحي واسمه لافيه محمد ولا محمود يحصل ايه مايبقاش صاحبي مايبقاش حبيبي !!! اما نصيبه والله !!!!

وصدقيني ........... الواد رفعت الكهربائي يبتدي اي كلام من كلامه بصدقني ..... وطبعا انا باصدقه من غير حاجه لانه مخلص جدا وامين جدا وعمره ماياخد تعريفه من حقه ، وعمره مايستخسر صحته في الشغل ودايما قلبه علي ويحاول يساعدني حتي لو فيه حاجات مش تخصصه ، لما الوليه القرشانه الشغاله شافت الصليب مدقوق علي دراعه وجت قالت لي ، ضحكت اني ماانتبهتش لحكايه ( صدقيني) وان معناها ، ان الراجل الكهربائي الانسان الجميل ، قبطي ، لان القبط مابيحلفوش زي المسلمين ( بالله والنبي وربنا ) .. ضحكت لان ملاحظتي مابقتش دقيقه وبس خلاص !!!! لكن ده لا غير مشاعري ناحية رفعت ولا حسيت ان ازاي اشغل كهربائي مسيحي شاطر مع ان فيه ميت مليون كهربائي مسلم ، لاني الحقيقه معرفش خالص موضوع الاسلام والمسيحيه ده غير وقت الصلاه ووقت العباده ، غير كده كلنا مصريين وبس !!!!


طيب انا تليفوني المحمول ( موبينيل ) .... يفرق ايه ، اغير ليه ، علشان ساويرس قبطي !! ايه الكلام الغريب ده ، ساويريس مصري ، ورجل اعمال ، والاعمال طول عمرنا نعرف ان مالهاش دين ولا مله ، الاعمال عايزه الربح وبس !!! ايش حشر ديانته في موضوع التليفون !!!!

طيب ، شركه كبيرة عملت قريه سياحيه ومش حاقول فين ، علشان مااعملش اعلان ليها ، الاسعار حلوه والمساحات واسعه ويالا بينا ، ميت واحد وواحده رحنا دفعنا المقدمات واشترينا ، جت واحده قريبتي منقبه وجوزها دقنه للارض ، هما حرين في قناعاتهم ، قالت لي انت مجنونه ، تشتري حاجات المسيحين ، الحقيقه استغربت خالص ، ليه ، لان اللي لفت نظرها دين الشركه ، هههههههههههه ، وهي الشركه ليها دين !!!! من امتي الشركات ليها دين ؟؟؟؟؟؟؟؟؟ حتقولي لي الشركات بقي ليها دين من يوم مابقت شركه الاسلام والجهاد والصحابه والتقوي ..... وهي الشركات بقي اسمها كده ليه !!

قالك علشان الاغلبيه تقول انها موجوده ، اما حاجه غريبه والله ، ماهي الاغلبيه موجوده ، ليه محتاجه تقول انها موجوده وبعدين طول عمرها كانت موجوده ، ايه اللي فكرهم فجأ انهم موجودين وعايزين يعملوا اعلان عن وجودهم !!!! وبعدين ايه موضوع الاغلبيه والاقليه ده ، ليه فجأ الباب الزفت ده اتفتح ، ولما يبقي فيه اغلبيه واقليه ، يبقي ايه الموضوع يعني ، عمالين نقول كده ليه ، كأن اللي طول النهارد يدق علي راسنا بالموضوع ده عايز يقول ان علي الاقليه تسكت وتخضع للاغلبيه !!!

ماهي جمله شريره وتقسمه سخيفه واحنا مش في الحرب ولا عايشين اجواء انتخابيه طول الوقت ، وماينفعش نفضل نطبل ونقول اغلبيه اغلبيه ، الكلام ده يقطع البلد حتتين ، مش مهم حته كبيره وحته صغيره ، لكن يقطعها ، ويودينا كلنا في داهيه ، الاساس اننا مصريين مش فريقين كوره مين جمهوره اكتر ، لاننا ما بنتخانقش علي حته جبنه ، دي بلد وطن تاريخ جغرافيا مستقبل !!!
ليه الاغلبيه قررت تعلن عن نفسها بشكل صدامي صراعي ، فبقي مفروض علي الاقليه تدافع عن وجودها ونفسها !!!
وتبقي الاسماء اسلام وجهاد وبيجاد ، صمويل ومينا وجرجس !!!
وتبقي الشركات اسلامي وقبطي !!!

وتبقي المدارس اسلامي وقبطي !!!
ويبقي تنظيم الاخوان المسلمون العالمي ومنظمات اقباط المهجر !!!
ويبقي قنوات فضائيه اسلاميه وقنوات فضائيه مسيحيه !!!
ايه القرف ده ، ايه المصيبه دي !!!!
البلد بتتقطع واحنا عاملين زي اللي بيتفرجوا علي صراع الديوك ونصقف من النشوه والجنون !!!!

وفي الحقيقه دمنا احنا اللي بيتصفي ولحمنا احنا الي بيتقطع ووطنا احنا اللي بيتحرق !!!


ماتيجوا نتكلم بصراحه اكتر !!! وفجاجه اكتر !!!
المسلمين رأيهم ان المسيحين ( من الزاويه الدينيه ) طبعا غلط !!! حد عنده شك !!!
والمسيحين رايهم ان المسلمين ( من الزاويه الدينيه ) طبعا غلط !!! حد عنده شك !!!
مين حيناقش مين في ايه ، علشان يقنعه بايه !!!!!
لو قعدنا نصوت ، الاسلام اصح ، لا المسيحيه اصح ، حيفرق ايه ، ولا حد حيغير رايه ولا حد حيقتنع !!!
لان اساسا معظم الناس ورثت الاديان ولافكرت ولا اختارت ولا يلزمها منطق صح وغلط !!!
ده ديني ودين اهلي وبس خلاص !!!
لكن كلنا مصريين .......... بيننا مليون مليون مليون مساله مشتركه ونخلي اللي مختلفين فيه مساله بين كل شخص وربنا !!!
وربنا العادل الحق هو بقي اللي حيحكم بينا في الاخره !!!
ليه حنسيب المليون مليون مليون مشتركه وندور علي نقط الخلاف علشان نتخانق !!!
من حق كل واحد فينا يعبد ربنا ويتعبد له ، بطريقته طبعا !!!
لاانت صح ولا انا صح ، ولا انت غلط ولا انا غلط !!
وحتي لو انا مقتنع اني صح وانت غلط ، وانت مقتنع انك صح وانا غلط ، كلامنا مع بعض في النقطه دي ولاعمره حيفرق ولا حيغير حاجه ، طيب مابلاش دوشه ..... وكل واحد يخليه في دينه ونتشارك كلنا في الدنيا بتاعتنا كلنا !!!!

ليه فجأ ، حتي العقلاء والمتنورين ، ليه فجأ حيخشوا الخنادق ضد بعض !!!! وكل واحد حيقول للتاني انا صح وانت غلط !!! اذن العقل يضيع في الخناقه المنحطه اللي مش مقصود منها لا نصره الاسلام ولا نصره المسيحيه ، المقصود منها حرق البلد !!!! لان لااسلام يلزمه ولا يفرق معايا مين يقول عليه صح ، ولا المسيحيه يلزمها ولا يفرق معاها مين يقول عليها صح !!! واللي في القلب في القلب !!!

ليه قعلنا هدومنا ملط زي الشراشيح وبلطجيه الشوارع وقررنا نشيل سنج ومطواي افتراضيه ونقطع وش بعض !!!
ليه قررنا نكون ابواق للكلام المستفز ، يعني واحد بيقول كلام زباله ، اي كلام طائفي زباله ، يقولوه في حاره في عطفه ، ومحدش دريان بيه او حتي لو حد انتبه له ، فينتبه له اتنين تلاته ، نقوم احنا بقي لاننا قلقانين علي مصر ، ناخد كلامه ونبروزه ونردده ونقول شايفين الكلام الزباله ، فالناس تنتبه للكلام وترد عليه والرد يجيب رد والاستفزاز يجيب استفزاز وتبقي هيصه ونتربص ببعض اكتر واكتر !!!!

انا مش عارفه مين ورا المصايب اللي بتحصل !!!
لكن متأكده ان اللي ورا المصايب اللي بتحصل لا بيحب المسلمين ولا بيحب المسيحين ولا بيحب المصريين اساسا ولا بيحب مصر ، لكن هو شايف ان دي الطريقه الوحيده اللي يقدر يقطع ويكسر بيها لحم وعضم مصر فتقع في حجره زي التفاحه المعطنه المدوده!!!!

مصر بلد التاريخ والحضاره ، ودي جمله للاسف ابتذلت فبقت بتضحك والناس اول ما تسمعها تضحك وتتريق ، لكن لا ، هي صحيح مصر بلد التاريخ والحضارة ، وصاحبه الدور الاقليمي والدور التنويري والفن والابداع ، بلد صعبه علي ضروس ناس كتيره ، طول ماهي واقفه في وشهم ( ايد واحده ) لكن لما تتقطع وتتمزق تبقي الدنيا سهله وعظيمه !!!!


وتقطيع مصر بالساطور مش حيجي الا بالشعار الاستعماري العظيم ( فرق تسد )
واحنا ماشين في الطريق الاسود بتاع ذلك الشعار الحقير خطوات منظمه !!! ياجدعان حرام عليكم ، حد ياخد باله من اللي بيحصل فينا !!! البلد بتتسرق وحتتقطع وحتتحرق واحنا بنساعد اصحاب المصلحه علي مأموريتهم القذرة بايدينا !!!

الشعب في مصر معظمه مسلم ، لكن كلهم مصريين ، الشعب في مصر بعضه قبطي ، لكن كلهم مصريين ، لا حنكون طالبان ولا افغانستان ولا السعوديه ولا ايران !!!! حنفضل مصر طول مااحنا واخدين بالنا اننا مصريين ، لكن اول ما نسينا الوطنيه والوطن وافتكرنا الدين والعقائد واعتبرناه معيار القرب والبعد والبيزنس والاخوة والجيره والتشجيع ، نبقي رحنا في داهيه وعليه العوض ومنه العوض !!!!

المتطرفين ، مسلمين ومسيحين ، كتير وحيكتروا اكتر واكتر في الايام السودا الجايه
لكن مهما كتروا ، كلنا لو ترفعنا عن مقولاتهم وعن خناقتهم اللي بيدفعونا ليها ، النار حتتطفي في مهدها لان احنا اكتر جدااااااااااااا لكن لو ركزنا معاهم ورددنا مقولاتهم .... حنروح كلنا والبلد قبلنا في ستين داهيه !!!

اسمحوا لي ................
فلان اللي اتنصر ، مافرقش معانا خالص ، ولا فرق مع الاسلام ولا حيفرق !!! ويفرق ليه ، ده واحد من ملايين المسلمين في مصر وبره مصر !!! مابلاش دوشه !!! مش فلان ولا الف زيه اللي لما يغيروا دينهم يفرقوا معانا ، برضه بلاش دوشه !!! جايز عايز يهاجر امريكا ومش عارف غير لو اتنصر ، براحته !!!! جايز اتنصر من وجه نظره لان المسيحيه عجبته اكتر ، برضه براحته ، هو حر !!! لكن مايعملش دوشه لان راسنا كلنا واجعانا ، دينه مساله بينه وبين ربه ، لكن يعمل دوشه في المجتمع ويستعدي ناس علي ناس ، يبقي مش قصه دين بقي ، تبقي قصه حاجه تانيه مش عارفاها ، اللي عايز يغير دينه براحته مع السلامه في اي اتجاه ، بس من غير دوشه دي قصه تخصه وتخص علاقته بربنا !!!! مش حابقي قليله الادب واقول زي الناس قللات الادب ، في داهيه ، لا انا ست مؤدبه ، بس حاقول براحته !!! بقي المسلمين لما واحد يخرج عن دينهم لاي سبب ، يتخانقوا علشانه ؟؟؟؟؟؟؟؟؟؟؟؟ طيب هو من وجه نظر المسلمين غلطان ، لكن لو دخل في المسيحيه ، طبعا بعض المسيحين حيعتبروا انها حاجه جميله ومعظمهم ولا حيفرق معاه !!!! نتخانق علشان ليه ، مابراحته ، لا حينقص الاسلام ولا حيزيد المسيحيه الا من وجه نظر المتطرفين هنا وهناك ، والمتطرفين عايزين جنازه ويشبعوا فيها لطم !!!
يلطموا براحتهم احنا مالنا !!!

لما فلانه تسلم ، لو كانت اسلمت فعلا ، حتفرق ايه مع الاسلام ، المسلمين حيزيدوا واحده !!! ولا حيفرق !!! حتفرق ايه مع المسيحيه ، المسيحين حينقصوا واحده ، برضه ولا حيفرق !!!
اه المتطرفين هنا هيهيصوا باعتبارهم زادوا والمتطرفين هناك هيهصوا باعتبارهم نقصوا واحده !!! لكن الاسلام والمسيحيه كاديان سماويه ولا حيفرق معاهم !!! اه تصعب علي الست ، سواء اسلمت ومقهوره او لسه مسيحيه ومقهوره !!! تصعب علي لانها مقهوره لكن دينها مساله ماتخصينش!!! لكن لان فيه ناس نفسها البلد تولع ، تتاخد فلانة ذريعه للخناقه المروعه !!!! المسيحين عايزين فلانة والمسلمين عايزين فلانه والاعلام مهيص في الهيصه ، مظاهرات تبتشم بتقول كذا مع فلانه ضد فلانة مع المسلمين مع المسيحين .......... والجنازه شغاله والندابات شغالين واللطم شغال !!! دول استقوا ، دول استضعفوا !!! دول شوكتهم قويت ، دول هيبتهم اتكسرت !!! ايه الخناقه المنحطه دي ........ فلانه اسلمت واسيره ..... حتي لو فرضنا انها اسيرة ، هي دي مشكلتنا الوحيده كمصريين النهارده ، ولا مشكلتنا كمسلمين !!!! كمصريين عندنا ميت مليون مشكله وكمسلمين عندنا ميت مليون مشكله !!! خلاص كل حاجه خلصت وبس فاضل فلانه!!! طيب فلانة لسه مسيحيه واسيرة برضه .... لو فرضنا انها اسيرة مع جوزها واهلها ، مافيه ميت لا الف لا مليون ست اسيره رافضه جوزها ومش عارفه تخلص منه لانها ضعيفه او اهلها غاصبينها !!!

ايه يامصر الجنان ده ................. حنحرق بعض علشان نثبت ايه !!!! حنموت بعض علشان نقول ايه !!! العمليه نجحت والعيان مات !!!! ايه الجنان ده ، وايه القرف ده !!!

طيب ........... مش عارف مين يتكلم ويشتم في الاقباط .... فيبقي المسلمين قالوا !!! ياسلام ، هو مين الراجل ده علشان يتكلم باسم المسلمين ، حد فوضه يتكلم باسمنا ، اصله مفكر اسلامي ، مين اللي ادي له اللقب ده ، وحتي لو مفكر اسلامي ، مابراحته يفكر براحته ، لكن حتي لو هو مفكر اسلامي ، ده معناه ان بيتكلم باسم المسلمين المصريين !!!! مين قال كده ............ اراءه متطرفه لنفسه !!! اراءه حلوه لنفسه !!! حيأُثر في الناس ........... اسفه ... اللي حيتاثر بيه اللي عايز يتاثر وقالعه راسه اساسا !!! يعني اللي بيحب ام كلثوم ، كل ماحتغني حيصقف !!!! لكن اللي مابيحبهاش مهما حتقول مش حيحبها !!! المتطرفين حيجي الكلام علي هواهم !!! ماهم متطرفين اساسا حيفرق ايه اي حاجه معاه !! طب هما لو اتقال لهم كلام غير اللي بيحبوا يسمعوه ، حيسعموه ؟؟ بقي متطرفين ليه ، لا ده موضوع تاني كبير ومش وقته دلوقتي !!! اذن متطرف حيتكلم كلام يعجب المتطرفين ، براحتهم كلهم !!! لكن لا اردد كلامه ولا اعتبره لسان حال المسلمين ولا اعاقبهم علي اساس كلامه !!!

طيب .......... مش عارف مين يتكلم ويقول اراء متطرفه او غريبه او غلط في حق المسلمين ، فيبقوا المسيحين قالوا !!! او نقول لو عايزين تفضلوا اصحابنا قولوا الراجل ده غلطان ، هما مالهم ، هما لا قالوا ولا عادوا ، ولا الراجل ده ، حتي لو كان قياده كنسيه كبيره او صغيره بيتكلم باسمهم ، ولا هما يتحاسبوا علي كلامه ، اصل حتي مش معني انه قياده كبيره انه مش متطرف في اراءه !!! وفي الاول وفي الاخر ............ اراءه متطرفه لنفسه !!! اراءه حلوه لنفسه !!! حيأُثر في الناس ........... اسفه ... اللي حيتاثر بيه اللي عايز يتاثر وقالعه راسه اساسا !!! يعني اللي بيحب فيروز ، كل ماحتغني حيصقف !!!! لكن اللي مابيحبهاش مهما حتقول مش حيحبها !!! المتطرفين حيجي الكلام علي هواهم !!! ماهم متطرفين اساسا حيفرق ايه اي حاجه معاه !! طب هما لو اتقال لهم كلام غير اللي بيحبوا يسمعوه ، حيسعموه ؟؟

بقي فيه في مصر متطرفين دينين ليه ؟؟؟ لا ده موضوع تاني كبير ومش وقته دلوقتي !!!
اذن متطرف حيتكلم كلام يعجب المتطرفين ، براحتهم كلهم !!! لكن لا اردد كلامه ولا اعتبره لسان حال المسلمين كلهم ولا الاقباط كلهم ولا اعاقبهم علي اساس كلامه !!! الناس المتطرفه اللي بتتكلم ، مسلمين او اقباط ، للاسف عايزين البلد تولع !!! عايزين يوقعوا بين المسلمين والاقباط لاجندات تخصهم ولاعلاقه لها لا بمصلحه البلد ولا بنصره الدين !!! لو مشينا وراهم البلد حتروح في داهيه !!!! لو صدقناهم واستفزينا بسبب كلامهم ، البلد حتروح في داهيه!!! .................

اسمحوا لي ................ مصر اللي اعرفها وباحبها ... مسلمين واقباط ، اقباط ومسلمين !!! لو بقت مسلمين بس ماتبقاش مصر !!! لو بقت مسيحين بس ماتبقاش مصر !!! فاللي عايزينا نتخانق بيكرهوا مصر بالاساس !!! ولازم كلنا بمنتهي الوعي والادراك والانتباه .... نفوت عليهم غرضهم !!!

فيه مشاكل عند الاقباط وفيه مشاكل عند المسلمين !!!
والمتطرفين هنا وهنا بيغذوا المشاكل ويكبروها !!! لو بقينا كلنا مصريين بالاساس حنعرف نحلها !!! لكن لو بقينا فرقتين كوره او فرقتين مصارعه او جيشين ، كلنا مهزومين ومافيش حاجه حتتحل !!!!

مش عارفه اقول ايه تاني !!!! لكن جوايا مليون حاجه نفسي اقولها !!!!
حافظوا علي مصر من اعدائها الي عايزين يقطعوها ويقطعونا مليون حته !!!!

هوامش .....
وخلفيات هذه النوت
هامش ( 1 )

من يومين علقت عند عماد صبري علي لينك طائفي ( بيحرض ضد الاقباط ) حاطه وقلت ( ياجدعان بجد بجد اعملوا ديليت لللينك ده من كل الصفحات كل واحد يعمل ديليت من عنده علشان نردم علي القرف ده بدري بدري ) ...وردت اماني وقالت ( انا مع اميرة ) ولا حياه لمن تنادي !!!! ورجعت قلت ( ياجماعه ، احنا كلنا مصريين وحنفضل مصريين كلام الوحده الوطنيه والكلام ده اختراعات ، قبل الاختراعات ، احنا كنا مصريين وحنفضل مصريين ، ...مهما يحاول بعض المتطرفين او المتعصبين يبوظوا البلد بنشر الشقاق بين شعبها ، حيفضل شعب واحد القصه كده باختصار من وجه نظري المتواضعه ، واعملوا ديليت لللينكات دي مش احنا اللي نروج لها ، دي راي المتواضع برضه ) ولا حياه لمن ينادي !!!!


هامش ( 2 )

وامبارح كان اصدقائي ( ايهاب سمرة واكسترا وعماد صبري ) تشابكوا تعقيبا علي ستيتس كتبه اكسترا ، واتغميت اكتر واكتر والدنيا خنقتني اكتر !!! كتبت عند اكسترا تعقيبا علي الستيتس او اللينك بتاعه مش فاكره !!!


يؤسفني ايها العقلاء

حديثكم لايعجبني اطلاقا
النبرة التي تقفز من بين كلماتكم لاتعجبني
مصر ليست بلد سليم العوا وليست بلد الانبا بيشوي
ولاسليم العوا يتحدث باسم المسلمين ولا الابنا بيشوي بيتكلم باسم المسيحين
...ولا انا شخصيا كمصريه يلزمني ااقول للانبا بيشوي ماكانيش ينفع تقول اللي قولته
ولا ااقول لسليم العوا ماينفعش تقول اللي قلته
للاسف - الناس بتتلكك علشان تتخانق علي ارضيه ان سليم العوا قال والانبا بيشوي قال
-------------------
هما كل واحد بيقول رايه
وبصراحه ولا يفرق معايا رايهم هما الاتنين
لان هما الاتنين بيقولوا اللي بيقولوا علشان يبقي فيه موضوع نتخانق عليه وحواليه
وكمصريين محبين للوطن وعقلاء مفروض نقول بالكتير ايه الكلام الفاضي ده ونسكت
مش نقول نحقق ونيابه وحياد وضيوف وجيش احتلال
ومفردات تقود اننا نقطع وش بعض وهدومنا
----------------------------
وبعدين فعلا ماينفعش نقف علي الحياد
انا شخصيا مش محايده خالص
لكن انا منحازه لمصر
لا للمسلمين ولا للمسيحين
ولا باعتبر الاغلبيه العدديه ميزه ولا الاقليه العدديه نقيصه
ولا ده وقت نصرخ في وش بعض احنا الاغلبيه لا انتم الاقليه
ده كلام مدمر وضار للبلد اللي مفروض نبقي منحازين ليها بالاساس ومنتهبهين انها بتتحرق بالعمد من المتطرفين والمتعصبين مسلمين ومسيحين ، وان ايدين الخارج ( سعوديه ايران شيعه طالبان قاعده اقباط المهجر امريكا بابا روما ) كل الايدين بتتمد علشان تحرق بلدنا ومش مفروض نديهم اي فرصه
----------------------------------------
النسوان اللي بتسلم علشان الرجاله والنسوان اللي بتتنصر علشان الرجاله
والرجاله اللي بتسلم علشان عقد عمل في السعوديه والرجاله اللي بتتنصر علشان تهاجر امريكا
لا حيعزوا الاسلام ولا حيعزوا المسيحيه
ولا حينقصوا الاسلام ولا حينقصوا المسيحيه
وجتهم القرف كلهم اذا كانت تصرفاتهم حتتسبب في حرق البلد !!!
اللي قاصد ربنا يعمل اللي بيعمله بهدوء وصمت وبلا ضجه اعلاميه
واللي قاصد دوشه وحريقه وقرف هو اللي بيعمل هيصه وضجه اعلاميه وفضائيات
-------------------------------
ربنا يرحم هذه البلد ويلطف بشعبها من المتعصبين والمتطرفين ومن بعض العقلاء ايضا ...
----------------------------------
يستكمل ..

** بقيه التعقيب ......

احنا مش في الدوري ولا في ماتش كوره
كل واحد بيدور علي نقطه ولا نفسه في جون
ولا المسلمين والمسيحين اهلي وزمالك
...ولا وظيفه اي حد يقول مين صح ومين غلط
وربنا موجود ادري بعباده
وربنا عارف ان فيه مسلمين ومسيحين ويهود وبوذيين وملاحده وعبده البقره وعبده النار
وعارف ان الدنيا حيكون فيها ميت ملة وميت دين وميت عقيده
وربنا في الاخر هو اللي حيحاسبنا علي عقائدنا وتصرفاتنا
مش البشر !!!ا
والحمد لله انهم مش البشر اللي حيحاسبو البشر
لان البشر متعصبين متطرفين قساه القلوب متشددين
والله جل جلاله رحيم رؤوف كريم تواب غفور
----------------------------
يارب تلطف بينا من عبادك
وتحافظ علي مصر من اولادها ضيقي الافق مقطوعي الانفاس
اللي مش واخدين بالهم المصيبه اللي بتتوضب لها قد ايه
وبيشاركوا في المصيبه وهم مش واخدين بالهم
---------------------
يارب تستر علي البلد دي وعلي شعبها
--------------
*** بقيه التعقيب ....

انا كابس علي العياط من اجواء الحمي بتاعت امبارح
واللي لسه مستمره
دول ناس قاصدين يولعوا البلد والله
خدوا بالكم !!!!ا
اسفه اني دخلت منفعله كده
بس حديثكم زاد شجوني وخوفي علي البلد التي لااحب في الدنيا اكتر منها
انا زي تراب الشارع عمري مااعرف اروح حته تانيه
لاالسعوديه تلزمني ولا امريكا تلزمني
مصر وبس
...ولاني ماليش حب تاني ولا مأوي تاني ولا قلب تاني
لازم افضل طول الوقت ادافع عن امانها
وامان مصر في تماسك شعبها وانصهاره ببعضه
مش في الخناقه وتسجيل الاجوان وحرق الوش بميه نار !!!!ا
ربنا يكفينا شر انفسنا ...................... ولا حياة لمن ينادي !!!!!!!!!!!

هامش ( 3 )

والنهارده اماني خليل عماله تصرخ (
طب بالنسبة للفيلم الطائفي عالهوم بيج ده مش نتلم بقي ونفضها سيرة ؟!؟ ) ولا حياه لمن ينادي !!!!

هامش ( 4 )
وبعدين سامح سمير واللي قاله .. و ردي عليه !!! وبرضه لاحياه لمن ينادي !!!!



فكانت النوت دي ..............................

يامصريين ، مسلمين واقباط ... ارجوكم ارجوكم ...
تجاهلوهم فهم لايحبوا مصر ولايحبونا !!!
تجاهلوهم ولا ترددوا كلماتهم لانهم يبغون خرابا لمصر !!!

تجاهلوهم ............. وانتبهوا للفتنه العمديه التي تشتعل نيرانها في قلوبنا ، قبل ياتي وقت لا ينفع فيه الانتباه ولا الندم !!!!