31 يناير 2015

مرثية فرح .....

الي الجنود الذين استشهدوا في سيناء 
في مذبحه رفح الاولي والثانية 
كفر القواديس 
العريش 
الجنود الذين لانعرف اسمائهم 
لكنهم اجمل ابناء مصر 



كان حليوة وابن موت ، جدع والجدعان قلة ، كان شجاع قلبه جامد ، كان بيحب مصر زيي ويمكن اكتر  ، ياما قالي عمري فداها لو ندتني  ، وانتي طبعا تعذريني وتفهمي وتفرحي بيا كمان ، وتقولي ابن بطنك صار بطل ورفع راسك و راسها للسما ..
لما راح سينا قاللي ودعيني ، جايز ارجع وجايز افضل هناك ، ودعيني ياامه وباركيني ،وببركه دعاكي حاوطيني ، لما كنت باودعه ، كنت عارفه انه خرج من حضني ومش راجع اكيد ، اصله ابني و انا عارفاه عنيد ، اصله قلبه من حديد ، عارفه لما التار يركب دماغه ، عارفه وجعه لما زمايله ماتوا ، لما دموعه سالت لانه مامتش قبلهم  ، لما قال دين في رقبتي دمهم ، وانا قد الدين وقد الحرب ياامه ، عارفه ان صمم ينتقم ، يحارب ويقتل او يتقتل  وسط معركه نخرج منها منصورين ، البلد فرحانه وكل الناس فرحانين  ... 
عارفه ان قلبه الاخضر بدلته الايام لطلقة ، طلقه تطلع من زناده توفي الدين القديم ، طلقه حيه بتدور علي مجرم اسمه مكتوب عليها ، تقطع ايده وحياته اللي في يوم مدها ، علي مصر اللي كان وحيفضل بيحبها .. 
قلبه الاخضر بدلته الايام لطلقة ، مش حتهدي لغايه لما يبتسم ، يبتسم ساعه رحيله وهو فرحان سعيد ، انه حارب انه مات ، انه ماقبلش السكات،  انه خد تار زمايله ، وروي الارض العطشانه دمه ، لاجل تكتب فخرها ، دمه كان مهرها ، لاجل تفضل طاهره حرة  ، ضحي بحياته عشانها ، كتب اسمه بدموعي علي صفحه فرحها ، وقالي ياامه اوعي تنسي تزغرطي ، اصل حاموت موته تشرف ، لاجل وطني لاجل بلدي لاجل ارضي ، اللي مات جدودونا برضه لاجلها ، اصل الارض دي عروسه ، ياما طمع فيها ناس ، واحنا ياامه بحياتنا ، ليها اوفي الحراس ، وايه يعني لما اموت وهي تفضل ، وايه يعني لما دمي يجري يرسم ابتسامه فخر علي وشها ، ابقي موت حي ياامه ، ابقي كسبت اني نمت في حضنها ، انها فتحت دراعاتها علشاني ، وقالت لي انت ابني الغالي ، وقالت نام في حضني ياضنايا ، يامشرفني ، ومت ياامه وانا مشرفها وفرحان ، وانت كمان ياامه اوعديني ، لما اموت تزغرطي لان ابنك شرف الارض الطاهره وكتب بدمه اسمه علي فرحها ....
كنت عارفه اكيد ، ان ابني عنيد ، وانه رايح ينتصر ، ولما استشهد زغرطت ، وقلت فرحانه لك ياضنايا ، قالوا مات قلت حي ، حي ولسه قاعد في حضني نفسه نفسي ، قلبه قلبي ، روحه روحي ، لسه حي وفرحانه انه بطل ، واللي واجعني انه رحل ، ياضنايا فرحانه لك بس فراقك وجعني وحابقي ابوس الارض اللي حضنتك لما توحشني...
انت حي والله حي وبكره اللي دفعت مهره جاي جاي ، جاي حلو ، جاي اخضر زي قلبك ، جاي طاهر زي روحك ، جاي منور زي نورك في السما ، جاي فرحه ، جاي شايل سلامك وكلامك وبيوصل فرحتك لما دمك ودم اخواتك رسم علي وش الارض الغاليه نصرتك ....