ام الديمقراطيه اذا كانت بالشكل ده !!!!!ا

هما فاكرينا اغبيا

وبيحاولوا يلعبوا بينا زي الكوره الشراب

اهم حاجه في اللحظه التاريخيه اللي احنا فيها دي ، ان محدش يصدق حد !!!! ولا حد يدي ثقته لحد !!!

اهم حاجه في اللحظه التاريخيه اللي احنا فيها دي ، ان كل حاجه تتخلبط علي بعض ، كل الاوراق والكروت والشعارات !!!

لان لو فضلت كل حاجه منظمه ، الناس حتشوف كويس !!! حتشوف وتعرف تميز وايه الصح واللي في مصلحتها وايه الغلط واللي مش في مصلحتها !!!

وطبعا ده مش مطلوب خالص خالص !!! لازم كل حاجه تتضرب زي العجه في الكبه ، وابو قرش علي ابو قرشين ودعاه العلمانيه علي بتوع الخلافه الاسلاميه وشباب التحرير علي البرادعي ولجنه الحكماء علي قناه الجزيره وكله يتدعك في بعضه وتضيع المعالم والملامح والتفاصيل علشان محدش يشوف حاجه !!!!

اهم حاجه في اللحظه التاريخيه دي ، ان الناس تخاف من بعض ، وتخون بعض ، وتفقد ثقتها في بعض ، وماتقدرش تستحمل الاختلاف في وجهات النظر !!! وحضرتك سعادتك يعني عميل النظام ، وحضرتك سعادتك يعني عميل لانظمه اجنبيه !!! وام الديمقراطيه اللي مش عارفين نتكلم مع بعض بيها ، حنعمل ثوره وحكم ونظام واحزاب وبرلمان ودستور بالديمقراطيه ازاي !!!

يخرب بيتك ياابلتي ، يعني هو انت ضد الديمقراطيه !!! طبعا لا لكن بس باقول اننا مش عارفين نتكلم !!!

ومش عارفين نختلف ، ونسمع كلام من ماركه ، ده فلان حقير ، ده جبان ، ياجبنا اسكتوا ، ياخايفين اتخرسوا ، ياعملاء النظام ياللي ليكم مصالح ماتتكلموش ، واللي خايف يتفرج علي التلفزيون وينام ، ايه الارهاب ده اللي من غير كباب !!!! طب ده حتي الكباب بيخلي الارهاب مقبول ومتحمل ، لكن ارهاب من غير كباب تبقي فعلا العيشه هباب هباب هباب!!!

انا مختلفه معاك ياصديق !!! ينفع اختلف !!! ولا الاختلاف معناه علي طول اني من دلاديل النظام !!! ده النظام لسه قاعد والجيش لسه بيحمينا وبنتشتم بالطريقه دي ، امال لو الثوره انتصرت والراجل مشي ومعاه النظام ، حيتعمل فينا ايه !!!!

هل معني كده اني من اعداء الثوره ، لا حاشا وكلا ، انا ايدت ثوره الشباب ومطالب الشباب ، لكن ثوره الشباب حاجه والتحرير النهارده حاجه تانيه ، وده موضوع تاني طويل لسه ماجاش وقت الكلام فيه ، انا بس باتكلم عنا احنا اللي قاعدين نتكلم !!! احنا وانتم وهما وكلنا مش عارفين تتناقشوا !!!! واي حد كلام اي حد مايجيش علي هواه ، اديها مجموعه منتقاه من الشتائم السياسيه والتريقه ( الحمد لله لسه ماجبناش سيره الاهالي والجدود ) ..

طيب اسمحوا لي ااقولكم حاجه ، علي فكره يعني علي فكره يعني الشتيمه سهله والكلام الخايب مافيش اسهل منه!!! وعلي راي الليمبي .... تقولي نيللي نيللي اقولك شيرهان شيرهان !!! مش لازم انا اللي ااقول وانتم اللي تقولوا ، قصدي يعني الفريقين اللي مش عاجبهم كلام بعض يقولوا لبعض نيللي نيللي شيريهان شيرهان !!!!

تقولوا يادلاديل النظام ومتلازمه استكوهولم ، يقولوا يابتوع الاجندات الخارجيه ومتلازمه بولاق الدكرور !!!!

تقولوا ما تتفرجوش علي الاعلام المصري علشان بيعمل غسيل مخ ، يقولوا ماتتفرجوش علي الجزيره علشان بتنفذ مخطط اجنبي !!!

تقولي سيد علي وهناء بتوع النظام ، يقولوا ريم ماجد ومني الحسيني بتوع المعارضه والفوضي الخلاقه !!!

تقولي انصار الاستقرار كل واحد خد خمسين جنيه علشان يطلع في المظاهره ، يقولوا بتوع التغيير كل واحد خد خمسين دولار بدل مظاهرات وبياكلوا كنتاكي ويشربوا ميه معدنيه !!!!

تقولوا ياجبناء ، يقولوا يامتهورين !!!

تقولوا ياللي مش وطنينين ، يقولوا ياعملاء !!!!

تقولوا يا بتوع حسني مبارك ، يقولوا يابتوع قطر وحماس والخلافه الاسلاميه ، او يابتوع امريكا وعمر عفيفي وخريطه الدم والفوضي الخلاقه !!!!

ايه رايكم في الانحطاط ده !!!!

ايه رايكم في القرف ده !!!!

انا شخصيا .... وسط كل القرف والانحطاط ده ، اؤمن ان معظم - ويكاد تقريبا جميع - المصريين بيحبوا مصر وبيبفكروا في مصلحتها ، بيحبوا مصر الوطن ، لابيحبوا حسني مبارك ولا بيحبوا امريكا ، لابيحبوا قطر ولا بيحبوا الخلافه الاسلامية ، اؤمن ان معظم المصريين بيفكروا وبيتصرفوا من منطق حبهم للبلد وتصورهم لمصلحتها ، انا اؤمن بده ، انتم بقي بتؤمنوا بايه ، بان المختلف معاكم برضه بيحب مصر وبيفكر في مصلحتها ، ولا له اجنده داخليه لصالح حسني مبارك والنظام !!!

الكلام ده عيب والله ، عيب !!!!

احنا مش عارفين نختلف ونحترم بعض !!!

يبقي ام ديمقراطيه ايه وقرف ايه اللي بنتكلم عنها !!!!!

طيب ، الاول كله ، كل واحد يصلي علي النبي ، وكل واحد يمجد سيده ، ونتفق اننا بنحب مصر !!! وان اختلافنا واتفاقنا علشان كلنا بنحب مصر ، وبلاش الشيتمه والاتهامات والكلام المقرف والتريقه والمسخره !!! لان احنا شعب سافل ودمه خفيف ولسانه مبرد وخرمنا التعريفه ودهنا الهوي دوكوا وكل واحد يعرف يلعب مع التاني لعبه السفاله دي !!! طيب ليه !!!! ليه نعيش فجأ دور الالتراس الزملكاوي والاهلاوي ونرفع لبعض الشماريخ !!! ليه نتقسم فريقين مش مختلفين بس لا وكمان بنكره بعض ومتربصين ببعض وقرفانين من بعض !!! لمصلحه مين ده ، الديمقراطيه !!!! تعالوا نتعلم مع بعض قليل من الديمقراطيه ، قليل وبس علشان نعرف نتكلم من غير مانعور بعض ، تعالوا نسيب الشماريخ علي جنب علشان نعرف نتكلم !!! ده احنا لسه علي الشط والبحر غويط ، لما واقفين علي الشط نطير رمل في عينين بعض ونضرب بعض بالزلط والطوب ، اما لما ننزل البحر حنعمل ايه ، حنموت بعض ونغرق بعض !!!! احنا مش بنلعب ولا بنهزر ، ده مش ماتش كوره لازم يخلص بالبلنتيات ، احنا مش في حلبه صراع الديوك والناس متراهنه علينا مين اللي حيموت التاني وينقر راسه ، عيب والله العظيم القرف ده كله عيب ، عيب علي الجميع ، علي جميع الاطراف ، اللي مش عارفه تختلف وهي بتتكلم !!!!!

طبعا حد ممكن يقولي ان كلمات زي الانتهازيه والعماله والجبن و.... دي اوصاف سياسيه من حقنا نوصف بيها المواقف المختلفه عنا ، طيب ماهي فيه اوصاف سياسيه تانيه زي المراهقه السياسيه والاندفاع والعماله برضه ممكن يتوصف بيها الفريق الاخر !!! يبقي ايه الحل ، كل واحد يخش الخندق ونقف ورا المتاريس ونحدف بعض بقنابل المولوتوف !!! هو ده ام الحل في الديمقراطيه علي الطريقه المصرية !!!!

طيب ماتيجوا نحاول نعمل الصعب !!!!تعالوا نتفق اننا وطنيين وبنحب مصر وكلنا بنسعي لمصلحتها من وجه نظرنا ونمارس اختلافنا من غير تريقه وخناق ومسخره واتهامات !!! تفتكروا حنعرف !!!! لازم نحاول نعرف ، لان مش معقول نمارس السياسه بطريقه اللمبي ، وتاني ااقول ، تقولي نيللي نيللي ااقولك شيرهان شيرهان!!!

بالمناسبه اللي نفسه بتغم عليه من الاعلام المصري ومحطاته الارضيه والفضائيه ، ياريت يبقي يفتكرني لان معدتي بتتقلب من الجزيره والعربيه والبي بي سي !!!! ياريت واحنا بنمارس الديمقراطيه الكلاميه دي ، ياريت كل واحد ياخد ادويه معدته وادويه غممان النفس علشان نعرف نتكلم مع بعض ونعرف نختلف!!!!

وعلي راي السيد المسيح ( انك تري القشه في عيني ولا تري الشجره في عينك ) !!!

وعلي راي المثل البلدي ( لاتعايرني ولا اعايرك ، الهم طايلني وطايلك ) !!!!

وصباح الخير يامصرييين !!!!

اتمني انتصاركم وهزيمتي !!!!

هذه بردياتي

اتمناها تسجل هزيمتي وانتصاركم

هذه بردياتي .... اكتب فيها ماساتركه لاحفادي واحفادهم ...

اكتبه لاترك اثرا علي وجه التاريخ يقول ان في هذا البلد وسط تلك الفوضي وفي لحظه فارقه من حياه الوطن وحياه شعبه ، كانت هناك انسانه تحاول تفكر ، حبا في الوطن الذي تسعي انصال كثيره هذه الايام لتمزيقه !!!

ليت ثوره الشباب تنجح !!!

ليت كل من اختلف معه ينتصر علي وتصبح الحياه اجمل كما يراها في عينه ولا تصبح اقبح كما اراها في عيني !!!

الان بالذات اتمني هزيمتني وافكاري وانتصاركم وافكاركم !!!

اتمني هزيمتني ، فانتصار افكاري ورؤيتي منتهي الهزيمه التي لااتمناها ابدا !!!

وانتصاركم وافكاركم ، هي الهبه الاجمل التي قد يهبها الله سبحانه وتعالي للوطن الذي نحبه جميعا !!!

ليت حياتنا تصبح اجمل !!!

ليت الفوضي لاتدب فيها فنتبعثر ملايين الشظايا !!!!

ليت لانفقد دولتنا المدنيه وسط طبول الحرب وقنابل المولوتوف وتفجير خط الغاز ورصاص المدافع الرشاشه وفتوي ضرب ضباط القوات المسلحه بطوب لنأخذ حسنه !!!

ليت لانفقد دولتنا المدنيه مصر التي نحبها وسط رياح التغيير !!!!

لااقف امام الطوفان بكفي لانقذ وطننا من الغرق ، من انا لانقذه !!!

لكني فقط اكتب واقول واترك اثرا للتاريخ ، حتي ماذا ما غرقنا او احترقنا ، وجاء المؤرخون ينقبون في اطلالنا للبحث عن هذا الشعب الذي دق الطبول فرحا باحتراق وطنه ، وقتها يجدوا كلماتي وكلمات الملايين غيري ممن قالوا وقالوا واتفقوا واختلفوا حبا في الوطن الذي احبوه فاوجعهم ، وقتها يجدوا كلماتنا ، فيدركوا ان علي تلك البقعه من الخريطه كان هناك شعبا عظيما تكالبت عليه الظروف والمؤامرات فكسرته وقهرته بعدما صنع الحضاره في فجر البشريه واهداها للبشريه كلها ...

اكتب لاقول اني مازلت احي ، وان كل مايحدث لن ولم يكسرني ولن يفقدني روحي ولن يخرسني !!!

لاابحث عن اتفاقا او اختلافا ، فقط اقول مازلت احيا !!!!

وبحق بحق اتمني هزيمتي وافكاري ورؤيتي واحاسيسي وانتصاركم وافكاركم ورؤيتكم واحاسيسكم !!!

وقتها كل المجد لكم وسارفعه وارفعكم فوق رأسي !!!!

مستندات تعبييرية !!!!

انهم يتصورونا اغبياء !!!!

 ممكن نفكر شويه !!!!

كل شويه ، حد يطلع علينا بصورة ورقه ، معرفش جايبها منين ، مره من موقع جرنان علي الانترنت ومره من شبكه مش عارف ايه ، ورقه ، صورة ورقه ، ومفروض انها رسمية ، مره من وزاره الداخليه ومره من من الدقهليه ، مفروض انه مختوم كمان بختم النسر ، علشان المجرم اللي حيبقي عنده شك زيي كده ان الورقه " مضروبه " تتخزق عينه بختم النسر فيتخرس ويسكت !!!!

طيب نعم بقي ، مالها الاوراق الرسمية دي ، الاوراق الرسميه الحلوه دي ، مكاتبات تثبت ان الداخليه قررت تفتك بالمتظاهرين ، ومكاتبتات تثبت ان الحزب الوطني قرر يبعت بطلجيه يضربوا المتظاهرين ، المهم يعني ،ان الاوراق دي اللي يجمع بينها انها اوراق رسميه طالعه من جهات رسميه قررت تفتك بالمتظاهرين ، ولانها جهات رسميه مجرمه قررت تبقي بجحه وغبيه وتكتب رغباتها دي علي ورق ، علشان حد طيب وابن حلال يلاقي الورق ده ويبقي دليل ضد الجهات دي ويفضحهم بيه في كل حته علي الانترنت والجرايد وماشافوهومش وهما بيتأمروا شافوا المستندات بتاعتهم !!!

طيب نبتدي بورقه وزاره الداخليه ، الاسطي اللي ضربها ، راسه محدوده الحقيقه وتلميذ في عالم التزوير ، ليه ، اولا الاسطي كرمش الورقه ، ال يعني اللي كانت عنده قرر يرميها زي مابنرمي الورقه الملفوف فيها الشندوتش في الزباله ، فبنكرمشها !!! قرر يكرمش الورقه علشان يخش علينا انها كانت مرميه في الزباله ، وحد عبقري ايده طايله ، فتش في زباله وزاره الداخليه فلقي الورقه الجميله دي فقرر ينشرها ويافضيحتك ياوزاره الداخليه يالي زبالتك بتتفتش ويتلاقي فيها مستندات خطيره تتنشر علي الانترنت وتبقي مستند رسمي ضدك !!!!

طيب يااسطي ياعبقري يابتاع ضرب المستندات هو انت ماتعرفش ان وزاره الداخليه مابترميش مستندات في الزباله !!! وانها حتي لو بترمي مستندات في الزباله ، الزباله بتاعتها لسه جوه الوزاره لان الزبال اللي بيشيل الزباله من جوه وزاره الداخليه مابيروحش يلم الزباله علشان حظر التجول ، طيب يااسطي يابتاع ضرب المستندات ، انت ماتعرفش ان وزراه الداخليه زي اصغر شركه فاشله ، عندها مفارم للورق ، بتفرم فيها الورقه اللي مش عايزاها ، طيب انت ماتعرفش يااسطي يابتاع ضرب المستندات ، ان من ايام رأفت الهجان علي راي حد معرفوش في الفيس بوك ، ويوسف شعبان بيعلم رافت الهجان يبقي يحرق الورق اللي مكتوب عليه حاجات سرية !!! وان علي الاقل وزراه الداخليه الايام دي ، في الايام السوده دي ، اذا ماكانش عندها مفارم للورق ، علي الاقل بتحرق الورق اللي مكتوب فيه حاجه خطيره تنفيذا لتعليمات السيد اللواء يوسف شعبان في مسلسل رافت الهجان !!!!

طيب اذن اذن .... الورقه متكرمشه اونطه علشان احنا- اللي مابنفكرش ومش عايزين نفكر - احنا نتصور ان حد كرمشها ورماها والموقع ولا الجريده ولا الشبكه ولا ابصر مين اللي لقاها ، لقاها مرميه ومتكرمشه !!!! والختمه الشريفه كلام فاشل ومستواه عبيط زي افلام الكارتون !!!!ا لو الورقه اتنشرت مكويه وسليمه كده ، يمكن كنت اصدق ان حد سرقها من حد !!!!! واقول جايز فيه لواء اهبل في وزاره الداخليه اتسرقت شنطته في المظاهرات ولما فتشوا فيها لقوا الخطه الجهنميه دي مكتوبه في الورقه فنشروها !!! لكن كرمشه الورقه اكدت لي انها مضروبه ومن حد مالوش في التزوير والضرب !!!!!

وبعدين هي اي ورقه تتنشر تبقي صح ، ليه مافيش كومبيوترات وبرنترات وبرامج فوتو شوب وصور تعبيريه وكله كله !!!! واصغرعيل في اولي اعدادي بيتصور مع اوباما ويضرب مستندات وصور واختام و.......اهي هيصه !!!! اشمعني الورقه المكرمشه دي اللي حنصدقها ، الاخ اللي ضرب الورق وكرمشها ، مستواه الفكري ضحل وخبراته الاجراميه قليله وضرب الورقه بطريقه عبيطه مستفزة !!!!

طيب ، هي الورقه دي اتنشرت ليه ، اتنشرت علشان نكره الداخليه ، الله مااحنا بنكره الداخليه واللي عملته في الامن السياسي واللي عملته في المتظاهرين ، بنكرهها وبنطالب بمحاكمه حبيب العادلي وكل اخوانه ممن تسببوا في الانفلات الامني والاعتداء علي المتظاهرين والجرائم اللي ارتكبت ضدهم ، بنكرهها وعايزين نفتح الملف كله ، واللي اتقتل ناخد حقه ، واللي اتضرب ناخد حقه ، واللي اتسحل ناخد حقه ، ماهو ده احساس الناس كلها وموقفها ، طيب امال ايه ، لا الورقه الزباله المضروبه دي اتنشرت علشان الناس تكره حياتها وتفقد الثقه في كل شيء وتفقد الثقه في الدوله كلها - مش في حبيب العادلي ورجالته - تفقد الثقه في الدوله كلها وساعتها ، الفوضي هي الحل و........... شعللها شعلل ولعها ولع !!!!

نيجي بقي للورقه التانيه بتاعت الدقهليه !!!!

حنبعت بلطجيه يضربوا المظاهرات والمتظاهرين ، وحنصرف لهم وجبه !!!! والورقه مختومه بختم النسر !!!!

طب والنبي مختومه بختم النسر ليه !!!! علشان البلطجي اللي حيجهز البلطجيه يبقي معاه مستند رسمي ضد البلطجي الاكبر اللي حرضه علي ضرب المتظاهرين !!!! اصلي سعادتك ياافندم لازم يكون معايا مستند رسمي لاخلاء مسئوليتي !!!! والله العظيم كلام يضحك ويبكي ويحزن ويخلي الواحد يلطم علي وشه !!!!

وبعدين هي في الايام السودا اللي اتحرقت فيها الاحياء ومباني المحافظات وكل الناس قاعده في بيوتها بما فيها الدوله ورجالتها وكله ، في الايام دي ، حد بيكتب جوابات وبيختمها بختم النسر !!!! دي الدنيا ولعت واتحرقت والاقسام اتحرقت والمساجين هربت ، وحظر تجول وقوات مسلحه ، ووسط كل هذه الاحداث المنيله بستين نيله ، وسط كل ده ، فيه ختم نسر قرر البلطجي الاكبر يختم بيه جواب للبلطجي الاصغر علشان يبعت ناس تضرب المتظاهرين ويصرف له وجبه وبدل !!!!! ولا هو كل حاجه اتحرقت الا ختم النسر علشان عليه حارس زي العين ماعليها حارس كده ، والحارس خد الختم شاله علشان محدش يخصم منه يومين لانه بدد العهده وبعدين ختم بيه الجواب علشان البلطجي اللي حيجهز البلطجيه يبقي متطمن ان معاه جواب رسمي يخلي مسئوليته وقت الجد لانه بينفذ تعليمات البلطجي الاكبر وعلي راي المثل ، والنعمه ماانا دي اختي هنا !!!!!

طيب حد حيسالني امال جابوا ختم النسر منين ، اول كل حاجه في مصر قابله للضرب باعتبارنا احنا اللي خرمنا التعريفه ، ثانيا القص واللزق والنسخ والتركيب بتاع الكومبيوترات ماخلاش لولاد الحلال حاجه ، ثالثا زمان ايام البدائيه كان المزور العبقري يسلق بيضه ويقشرها ويحطها علي صوره اي ختم ، تقوم البيضه تشف شكل الختم ولما يختم بيها وهي لسه سخنه علي ورقه ، تحط صوره الختم !!! وبعد كده يعمل بالبيضه ايه ، ياكلها طبعا في ربع رغيف !!!!!

ايه ياجدعان ، اللي بيضربوا الاوراق الفاشله دي مابيحترموش عقولنا ليه ، حد قال لهم علينا اغبياء ومابنفهمش!!!! عيب والله ، ياللي بتضربوا الورق ، احترموا عقولنا وتعاملوا معانا بطريقه ارقي من كده شويه ، باعتبارنا بنفهم حبه صغيرين والشغل الرخيص بتاع تلامذه الاعدادي مايخيليش علينا !!!! بلاش نظريه المستندات التعبيريه دي ، ده لما الاهرام بجلاله قدره ، عمل صوره تعبيريه الدنيا قامت وماقعدتش وكل الناس قفشتها حتي اظهر عيل في كي جي تو ، بلاش نظريه المستندات التعبيريه دي عيب احترموا عقولنا !!!!

طيب بتوع المستندات التعبيريه والبيضه والورق المكرمش بيعملوا كده ليه ، اللي بيضربوا الورق واللي بينشروه ، بيعملوا كده علشان المصريين يكرهوا حياتهم اكتر واكتر ، كل ده مقصود من فقدان الثقه وكل واحد يستخبي جوه نفسه ويكره الدوله ويخاف منها ويحس انه مفعول به ضعيف قليل الحيله المؤامرات بتحيط به من كل جانب ومايصدقش حد ومايسمعش لحد ويستخبي جوه نفسه اكتر واكتر ، وساعتها مش حيكون عنده متلازمه استكولهوم زي مالدكتور علاء الاسواني تفضل مشكورا وشخص حالتنا النفسيه كلنا ، لا حيكون عنده متلازمه بولاق الدكرور اللي تخليه يجهز سنجه ويجري ورا اي حد يقوله صباح الخير ويدبحه بهدوء شديد لان تحت ايده مستندات رسميه مختومه بختم النسر تثبت ان مافيش فايده في البلد ولا في الحياه نفسها ، يبقي كمان وبتقولي صباح الخير؟؟؟؟؟!!!!

اتقوا ربنا في شعب مصر وفي مصر !!! الدنيا مش ناقصه شعلله ولو ولعت حتحرقنا كلنا محدش بعيد !!!!

وربنا يحفظ مصر من كل شر اللهم امين !!!!

ملحوظه " الصور علي الانترنت وعلي الفيس بوك ، وفكرت انشرها وبعدين قررت مااوسخش المدونه بتاعتي باوراق مضروبة وعبيطه كده " !!!!

عفوا ... لن اشتري تلك البضاعه الفاسده !!!!

انهم يظننونا اغبياء لانفكر !!!!!

علينا ان نقبل - مايروجوه وما يدعوه - ان حسني مبارك وعمر سليمان واحمد شفيق والوزاره الجديده اغبياء للحد اللي يقرروا يبعتوا ناس (امن ) معاهم بطاقات بتقول انهم بيشتغلوا في الامن ومعاهم بلطجيه ماشين مظاهره اسمها ( تاييد حسني مبارك ) وشايلين صور الريس ويفط باسمه ، يبعتوهم علشان يضربوا المتظاهرين المحتجين في ميدان التحرير !!!!

علينا ان نقبل انهم اغبياء لهذا الحد ، رئيس المخابرات المصري السابق ورئيس الوزراء والرئيس حسني مبارك ، اغبياء لحد انهم قرروا يضربوا المتظاهرين المحتجين تحت ( يافطه ) حسني مبارك ، علشان العالم كله يجرسهم ويفضحهم ويدوا العالم كله في ايديه دليل قطعي دامغ علي اجرامهم وغبائهم وعلشان اللي كان متعاطف شويه مع حسني مبارك - بعد خطابه الاخير اللي قال فيه انه مش حيرشح نفسه - يفقد تعاطفه ويلعن ابو ايامه السودا زياده وزياده !!!!!

علينا ان نقبل انهم قرروا بمنتهي الغباء ان يرسلوا من يعتدي علي المتظاهرين ، بالذات في اليوم التالي لخطاب الرئيس - وليس اي يوم قبل او بعد - بما تركه ذلك الخطاب من بعض الاثر الطيب في النفوس ، قرروا ان يمحوا هذا الاثر ويتركوا بدل منه جروح في القلوب والنفوس وكراهيه وشر ومرارة وغضب !!!!

عفوا ..... مازلت افكر في تلك الواقعه الحقيره وتداعياتها واثارها السلبيه المدمرة !!!! ولااقبل ولا يقبل عقلي مايروج له !!!! لااقبل ماتروج له قناه الجزيره والفضائيات الاخري ومايروج له الاخوان المسلمين وتابعيهم !!!! لااقبل مايروج له من من مصلحتهم بقاء الفجوه واسعه بين المتظاهرين والدوله لحد يستعصي معه التفاهم والاقتراب لتفجير الفوضي في البلد !!!!

يعني حسني مبارك وعمر سليمان واحمد شفيق ، اغبياء وقرروا يضربوا المتظاهرين ، بعد يوم واحد بس من لما قال احمد شفيق لمني الشاذلي لما سالته عن الناس في التحرير ، فقال لها برقبته ، ثم قرر بمنتهي الغباء - حسب الادعاءات الكاذبه التي يروج لها - قرر يقطع رقبته بنفسه قدام الناس ويطلع روحه عيل وكداب ومتأمر علشان الناس تفقد ثقتها فيه - اللي هي لسه ما بقتش موجوده اساسا - لا وكمان متأمر خايب لانه باعت ناس تضرب ومعاها يفط باسم الرئيس وبطاقات امن وشرطه !!!!

مش بس كده ، لا كمان حسني مبارك وعمر سليمان واحمد شفيق ، عملوا مؤامره في الظلام علشان يضربوا المتظاهرين ، وقرروا ينفذوها في عز الضهر وقدام العالم كله والكاميرات والدنيا والدين علشان تبقي المذبحه علي عينك ياتاجر وكمان من ناس امن حسب المكتوب في البطاقات وشايلين يفط حسني مبارك وصوره ، علشان اللي مابيفهمش يفهم واللي عنده شكوك تتاكد واللي بيكره الحكومه والنظام قيراط يكرهم اربعه وعشرين الف مليون مره!!!!

عذرا لا ولن اشتري تلك البضاعه الفاسده !!!!

عذرا لايقبل عقلي هذا المنطق !!!!

انها مؤامره - او بقيه المؤامره - التي تحاك علي الدوله المصريه وتسعي بكل الطرق لتوسيع الفجوه بين المتظاهرين وبين الدوله لتمزيق اي امكانيه بينهم للاقتراب او التلاقي او تجاوز ازمه الثقه المفقوده تماما !!!! انها مؤامره - او بقيه المؤامرة - لاشاعه الفوضي في مصر !!!

اعرف ان كلماتي سيسخر منها الكثيرين !!!! مؤامرة ، هاهاها ، ويضحكوا علي سذاجتي وغبائي !!!

اعذركم في سخريتكم !!!! واقبلها منكم !!!! لكن عقلي لن يقبل ابدا بهذه الفرية !!!!

انا لاادافع عن الرجال ولكني ادافع عن مصر المستهدفه بحق !!!!

سؤال اخير ، وقتما هجم الرجال بالجمال والحمير وضربوا المتظاهرين ، هل كانوا يحملوا قنابل مولوتوف ومدافع رشاشه !!!! من الذي حول ذلك الاعتداء - علي غباءته وبداءه اسلوبه - لحرب تلقي فيها قنابل المولوتوف من شبابيك العمارات المواجهه لميدان التحرير ويرد فيها علي الطوب برصاص المدافع الرشاشه من اسطح العمارات!!!! ومن ادخل المولوتوف والمدافع الرشاشه للتحرير ؟؟؟؟؟ اللي كانوا راكبين جمال وحمير ؟؟؟؟

ايضا ... البعض لام علي الجيش وانتقده لعدم التدخل والدفاع عن المتظاهرين سواء وقت الاعتداء او وقت ضرب الرصاص وقنابل المولوتوف !!!

واحمد الله علي ضبط النفس الذي تمتع به الجيش رغم الكارثه التي دارت امام عينه !!!

تصوروا لو تدخل الجيش وضرب في الفريقين ، لان رصاصه ودانات مدافعه لن تميز بين هذا الفريق وذاك !!!

تصوروا مالذي كان سيحدث !!!

الجيش المصري يضرب المتظاهرين ، الجيش المصري يعتدي علي الشعب المصري !!!

والفريق ( حامل المولوتوف والمدافع الرشاشه ) يرد للجيش الضرب ويتحول الامر لمأساه ومذبحه وكارثه !!!!

والجزيره تهيص ، هي وبقيه القنوات الفضائيه ، الجيش بيضرب المتظاهرين و........ واوباما يصلي لمصر اكتر واكتر ، والكونجرس يجتمع ويصدر قرار ولا توصيه ولا زفت برحيل مبارك لان جيشه ضرب الشعب و.......... تنفجر الفوضي !!!

الحمد لله ، ان الجيش تمتع باقصي درجه لضبط النفس ولم ينزلق للكمين الذي اعد له من متآمرين لااعرفهم حتي الان بدقه ، لكني اعرف نواياهم بمنتهي الوضوح ، هم لايرغبوا الا في خراب مصر وهدمها فوق رؤوسنا جميعا من في التحرير ومن في مصطفي محمود ومن في منازلهم !!!!!

ربنا يخرب بيت اي واحد او جهه او دوله او شعب او تنظيم يريد الشر بمصر وشعبها !!!

امين يارب العالمين !!!!

وسط الانواء العاصفة .. !!!!!

اقر واعترف .... اني الان اعيش حاله انكار كامل لكل مايحدث ... قررت امس بعدما تسارعت ضربات قلبي حتي كان يتبعثر شظايا قلقا علي الوطن الذي احبه ، قررت ببساطه وبجرة قلم ان " كل مايحدث لايحدث " لن اتناقش مع احد ولن اختلف ، لن اتفق ولن نتشاجر، ففي هذه اللحظه كل منا يري ما يراه ، لااحد سيفلح ابدا في تغيير رؤيه الاخر وقناعاته ، الكل الان فاعل يتصرف وفق مايراه ومفعول به ينتظر ما يفعله الاخرين ، صخب مدوي مصحوب بطلقات ناريه تمزق الليالي السوداء التي ننام فيها كالذئاب بعيون مفتوحه تحت مخداتنا سكاكين وطلقات ناريه وبداخل ارواحنا المرتعشه توحش مفزع ننتظر عدوا مجهولا يهجم علينا لنمزقه اربا ...

وسط كل هذا قررت ببساطه بعدما بكيت حتي جفت دموعي وحزنت وتجاوزت الحزن لما بعده بكثير ، احساسيس موحشه يقف الحزن بجوارها احساسا لطيفا مبهجا ، بعد كل هذا ، قررت انكار كل مايحدث ، لااشارك ولن اشارك حتي بالاهتمام العقلي ، لن احزن فوقت الحزن مضي ، لن ابكي فدموعي جافه كمشاعري ، لن اتشاجر مع اصدقاء احبهم وربط بيني وبينهم مشتركات كثيرة لايعقل ان نمزقها الان في غمره الانفعال والتوتر ، ربما غدا بعدما تستقر الدنيا ان كانت ستستقر ، علي اي شكل واي وجه ، ربما نكتشف اننا لم نعد اصدقاء ، او اننا لانرغب في الاستمرار في الصداقه وقتما نكتشف بحق ان مواقفنا تختلف تماما عن بعضنا البعض وعلاقتنا بالحياه والوطن والنفس ، ربما سنكتشف اننا اصدقاء اكثر مما كنا نظن وان مابيننا يساوي الكثير للحفاظ عليه ، ربما ربما ربما .... لكن الان في لحظه تلك " الربما " اللعينه لايجب اتخاذ اي مواقف او قرارات انفعاليه ، اذن هو الصمت ، الصمت المشوب بالقلق والارق والحزن في تلك الليالي السوداء - من وجه نظري - فالاخرين يرونها ايام سعيده ، لااجادلهم ولا اختلف معهم لكنه الصمت السبيل الوحيد للتواصل !!!!

يالها من عباره غريبه ، الصمت الان هو الوسيله الوحيده للتواصل بين من كانوا اصدقاء واقارب واحباء وفرقت بينهم السبل او كادت ، الصمت هو الوسيله الوحيده للتواصل حتي لايمزق الحديث بقايا الجميل الذي كان بينهم !!!!! لاانظم افكاري ولاعباراتي ولاارغب ، كل الاشياء حولي تبدو غير منظمه ، كان كل شيء تبعثر في الهواء ومازال يطير ولم نعرف اين سيرسي !!!! كل شيء غير منظم وانا ايضا وافكاري وحياتي والمستقبل المجهول لي وللوطن ... ربما ياتي مستقبلا سعيدا !!! ربما ولم لا ، من قال ان الحزن امتطي جواد الايام القادم وسيهبط في محطتنا ، لم يقل احد شيئا !!! ربما يأتي مستقبلا سعيدا ولو بعد حين ، البعض يقول لم نكن سعدا واوافقهم ، حياتنا لم تكن سعيده اوافقهم ، اوافقهم لاني كنت اتمني حياه اسعد ، هنا لااتكلم عن نفسي ، بل عن الوطن الذي اوجعني حبه ومزقت انصاله استقرار روحي ، حياتنا لم تكن سعيده نعم ، ربما كانت بائسه او الاشد بؤسا ، البعض يقول ، البعض يحلم بايام اجمل ومستقبل اجمل ، كل المشاجره بين الجميع هي مشاجره من من اجل الايام الاجمل ، كل الاختلاف من اجل الاجمل ، كل الصراع ودماء الشهداء التي سالت والثمن الباهظ الذي يدفع من اقوياء قرروا تغيير المسار بايديهم ، كل هؤلاء يبحثون عن الاجمل ، هل سيصلون اليه ، هم واثقون وانا لست واثقه ، سالت نفسي مائه مره هل متخاذله انا ، وشككت في نفسي ، هل اخاف علي اموري الشخصيه ، لايوجد مااخاف عليه ، مثلي مثل الاخرين ، ربما انا من ضمن الفريق الاكثر حزنا فيهم لان العمر اصبح خلفي ولم يمنحني الحلم الذي كنت اتمناه ، لانعيش ايام سعيده ، الوطن لايعيشها ، لكنها كانت محتمله !!

البعض يقول لم تكن محتمله لدرجه لاتستحق الحفاظ عليها ، فليضرب الاعصار بكل الايام ، فلايوجد مااسوء مما كنا نعيشه ، لااوافقهم ، لكني لااملك شيئا ، اري ايام اكثر سودا من التي كنا نعيشها واخاف منها ، علي حياه الوطن ومستقبل الابناء ، العمر اصبح خلفنا ولايوجد مانبكي عليه ، اري ان الايام التي نعيشها لم تكن الاسود لحد نقبل معه اي شيء ، هذا رايي ، لا يعجبكم ، هذا شأنكم ، لم اتمناه يعجبكم ، ولم احاول اقناعكم به ولم اسعي حتي لنشره ، كل ماالتزمت به الصمت ، وهذا ابسط حقوقي ، الصمت والانكار .....

اتواصل معكم بالصمت ، احترم كل مابيننا واصمت تماما ، لن اسمح لكم تتشاجروا معي ولن اسعي ابدا للمشاجره معكم ، والايام بيننا ، ربما انتم ترون افضل مني وستنتصروا ، وقتها المجد لكم وللوطن ، ستكونوا اجمل ابناءه وسيفخر الوطن بكم ويكتب في اضابير تاريخه انه انجب شجعان غيروا المسار ومنحوه ومنحوا ابناءه ايام سعيده اجمل من تلك القبيحه التي يعيشوها ، اتمناكم تنتصروا وتثبت الايام وجه نظركم ، فالسعاده التي ستخيم علي الوطن ستطالني ، وقتها ساشيد بكم ، لكني لن اقفز علي موجكم ولن اشاركم زهوه وساشير اليكم بكل الفرح هؤلاء الابناء الاشجع الاقوي الاجمل ممن لوي عنق الايام القبيحه واستجلبوا من رحمها مستقبلا اجمل للوطن ، اما لو اثبتت الايام صحه وجه نظري فسنبكي جميعا ، وقتها لن اشمت في هزيمه الوطن ولن اعاير احد واقول له كنت مخطيء ، وقتها لن يكون مهما من مخطيء ومن مصيب ، وقتها سنعيش جميعنا والوطن الايام السوداء بحق ، التي لايعرف اشد المتشائمين قدر قتامتها ، وقتها سنبكي جميعا ، ياله له من يوم اسود اتمناه لايأتي ، اتمني لكم النصر لكني للاسف عاجزه عن مشاركتكم في صنعه - لاني لااوافقكم الرأي ولا الرؤية واستشعر خطرا اتمناه طيله الوقت احساسا خاطئا ...... اذن هو الصمت والترقب والانتظار !!!!

اقر واعترف ، اني وسط كل هذا ، قرر اعيش انكارا غريبا ، كل مايحدث لا يحدث ، وحتي ينتهي ، ان كان سينتهي ، حتي ذلك الوقت لن اتابع مايحدث ، فكل مايحدث يوجع من وجه نظري ، ولن اتابعه !!!! فقط ياايتها الحياه بكل القلق والفزع والوجع والحزن والامنيات الحالمه والاحاسيس الموحشه ، فقط ، مازلت احيا!!!!

مايحدث لايحدث !!!! ببساطه واستهبال قررت مثل المرضي النفسيين انكار كل مايحدث !!!!

افكر احيانا انه كابوس طويل سنستيقظ منه فنجد حياتنا افضل وكل ماعشناه في تلك الايام ليس الا كابوس طويل تشاركنا فيه جميعا ، عجبا لهذا الكابوس الذي احتل ليلنا كلنا !!!! افكر احيانا ان كل الفيلم لايعجبني ، من تلك اللحظه التي بدأت كل الاحداث ، الفيلم لايعجبني وساغير السيناريو ، او ساعيد الشريط للخلف واقص منه هذا الوقت الموحش و.... بالطبع اتكلم عن نفسي وعن مشاعري وليس عن الاخرين ممن يرون ان تلك الايام هي الاجمل في حياتهم ، احسدهم واحقد عليهم لانهم يشعرون فرحه في تلك الايام التي اشعر فيها حزنا رهيبا !!! ليتني كنت املك احس الفرحه مثلهم في هذا الوقت بالذات ، ليتني اري مثل مايروا وافكر مثلما يفكروا ، كان حالي سيكون غير حالي ، لكن للاسف لااري الا مااراه ، يالبؤسي وسوء حظي !!!!

الانكار ..... هو الخندق النووي الذي احتمي فيه من كل ماحولي ، ربما ستحط اسراب اليمام علي كتف الوطن فاحرم نفسي من هديلهم ، ربما ستنهال القنابل النوويه فوق راس الوطن فاحمي نفسي من شظاياهم .... لن اقول مااراه فقط هو الصائب فهذه عجرفه لااحبها لنفسي ، لكني ساختبيء حتي ينتهي مايحدث ، ان كان سينتهي !!!!! عفوا حتي لايفهمني البعض علي نحو خاطيء ويتصوروني جبانه !!!! لااختبيء جبنا !!! فالااملك مااخاف عليه اكثر مما تملكون !!!! اختبيء ترفعا علي خلاف عميق لو بدأت في ممارسته سنتبعثر اكثر ونتمزق اكثر ونختلف اكتر سيما ان الكثيرين هذه الايام - ورغم ان الجميع يتحدث عن الديمقراطيه ويسعي اليها - لايعرفون كيفيه ممارسه اختلافهم مع الاخرين ، فمن ليس معي هو عدو لي ، وعدوي هو وهو وهو ........... شتائم من كل صنف ولون سياسي وانساني واتهامات وتطاول ، هذه حريتهم يمارسوا الاختلاف بالطريقه التي يروها ، وحقي الا امارسه معهم بنفس الطريقه واصمت تماما ........

و.......... لان الصمت هو السبيل الوحيد للتواصل مع الاخرين خارجي ، فانا صامته تماما لحين اشعار اخر اعيش الانكار الجميل بكل القدره الانسانيه علي الاستهبال !!!!

فقط ادعو طيله الوقت لمصر الوطن الذي نحبه يحفظه ربي لابناءه جميعا !!! ويصل به لبر السلامه اي ماكان الشاطيء الذي سترسو عليه سفينته وسط الانواء العاصفه هذه الايام !!!! السلامه لمصر يارب !!!!

رعب من الليالي البعيدة !!!!ا

مشهد لم يرحل ابدا عن مخيلتي !!!

كنت تلميذه في ( اولي حضانه - جاردن دي انفو ) في مدرسه فرنسية في منطقه المساحة بالدقي سنه 1965 ...

فجأ اخرجنا من الفصول بسرعه بسرعه والمدرسات تصرخ والدادات المشرفات علينا تصرخ ، اخرجنا من الفصول ودفعنا للخارج وسط صراخ الاطفال وفزعهم ، وفجأ وجدت نفسي علي الرصيف في الشارع ومعي مئات الاطفال ، نصرخ جميعا ، المدرسه اخرجتنا للشارع والمدرسات تركض وتصرخ وتصوت ، كنت ابكي علي الرصيف ، انا واطفال كثر ، نبكي لانعرف اين نذهب ، لانعرف لماذا اخرجونا من المدرسه للشارع ، صراخ الاطفال وصراخ المدرسات ، لوحه سيرياليه عبثيه غريبه ، رعب علي كل الوجوه ، الاطفال يصرخوا ، دموع سياله علي الوجوه ، افواه مفتوحه من شده الصراخ ، السنه مدلاة فوق الشفاه المقلوبة ، نقفز في اماكننا رعبا ، اطفال صغار بمرايل المدرسة يحملوا حقائب صغيره او صناديق لسندوتشاتنا ، نقفز في اماكنا رعبا ، نصرخ لانعرف مصيرنا المظلم و..... نحيب وصراخ وبكاء وعياط و........... يقترب من الاطفال امهات كثر ، امهات تبكي فزعه مخضوضه ، دموعها تسيل علي خدودهم مثل الاطفال واكثر ، قسمات الرعب ترسم علي وجوههم فزع لايقل عن فزع الاطفال ، الام تقترب من طفلها او طفلتها ، ترفعه من علي الارض وتحضنه وتبكي ، تجري به بعيدا ، وجميعنا نتابعها ونتمني لو كانت امنا نحن ، والحضن الذي تغلقه علي صغيرها حضن امنا نحن ، والاذرعه القوية التي تحمله من علي الارض لتحميه هي اذرعه امنا نحن ، لكنا صغار ضعفاء قليلي الحيلة نبكي ونصرخ ولانفهم ....

ومرت وقت ، هل ثواني هل دقائق هل ساعات ، لااعرف ، لااتذكر ، لكنه مر علي طفولتي دهرا طويلا من الرعب و..... ظهرت امي تبكي ، ومااصعب دموع الامهات علي الاطفال ، كنت ابكي لكن دموعها ابكتني اكثر ، كنت مرعوبه لكن الرعب علي وجهها ارعبني اكثر واكثر ، خطفتني امي من علي الرصيف وسط الاطفال ، حملتني بذراعيها وهرولت بعيدا عن المدرسه و...............

قالوا وقتها مؤامرة من الاخوان المسلمين يفجروا قنابل في الشوارع لاثاره الفزع بين الناس و................

لماذا تذكرت ذلك الرعب !!!!

لماذا شاهدته في عيون ابنتي ليله 29 يناير !!!!

لماذا احسست دموعي تخيفها مثلما اخافتني دموع امي !!!!

لماذا اشتقت لحضن امي يحميني وذراعيها يحملاني بعيدا مثلما حملتني وانا في الرابعه من عمري !!!

مشهد رعب لم يغادرني ، واظني ظللت سنوات طويلة وبعدما كبرت استيقظ وسط الليل اصرخ انادي امي ، احلم بالمشهد المفزع ، اظنني ظللت ايام وليالي بعدما تزوجت امسك بذراع زوجي ليلا كاني احتمي به من كوابيس الرعب التي تجتاحني منذ طفولتي ولااتذكر تفاصيلها الا صوره ضبابيه من الرعب .... اظنني حينما رايت لوحه بيكاسو التي كان رسمها عن الحرب الاهليه الاسبانيه ، اظنني رايت ملامح الرعب التي كانت علي وجه امي وكل الامهات ووجهي ووجه كل الاطفال .....

لماذا تذكرت كل هذا الان !!!!

ربما لاني احتاج وبشده لحضن امي يحتويني ولذراعيها يحملوني بعيدا عن كل الشرور التي تحيط بي ، لكن امي اليوم لو اتت لتحملني ساطلب منها تحمل الوطن معها في حضنها لتحميني وتحميه ، بل ربما ساترك حضنها للوطن واوصيها به خيرا وارجوا تحلق به بعيدا عن كل الشرور التي تحيطه ، فاذا كان الوطن وشعبه سالمين ، فانا وقلبي بخير !!!!!

مشهد من الليالي السوداء !!!!

ليله السبت 29 يناير 2011 ...

بحثت في منزلي عن سلاح احمي به نفسي وابنتي وسط هستيريا الفزع الجماعي والرعب من اللصوص والمخربين والبلطجيه والخوف الذي انتشر بهجومهم علي الاحياء والبيوت ، بحثت في منزلي عن سلاح احمي به ابنتي لو تعرضنا لهجوم في منزلنا ، بحثت عن سكينه كبيره كنت استخدمها قديما في المطبخ ايام العيد ، وجدتها مكسورة ومخباه بدرج المطبخ !!! لم افكر فيمن كسرها ، لاوقت للتحقيق ولا العتاب!!!

بحثت وبحثت وفي النهايه ، اخرجت طاستين تيفال كبيرتين كل منهما بذراع قوي واخرجتهما من المطبخ ووضعتهما في الصاله خلف باب الشقة وقررت اذا ماتعرضت للهجوم ، اضرب بالطاسه التيفال الثقيله راس الرجل وليكن مايكون .......وانتبهت ان منزلي بلا رجال وكذا منزل اختي وصديقتي ليلي وطنط عايده وخالتي ام علياء وبيت انجيلا و................ بيوت كثيرة تعيش فيها نساء واطفالهن بلا رجال يحموهم اذا ماتعرضنا لهجوم ، لاي سبب من الاسباب ، وقررت بعد ما ينتهي هذا الظرف الذي نعيشه ، قررت اشتري بندقيه واتعلم الرمايه ، لابد اكون قادره علي حمايه نفسي وابنتي في اي ظروف مشابهه وقضيت ليله رعب انام خلف الباب احتمي بطاسه تيفال كبيرة !!!!