هما فاكرينا اغبيا
وبيحاولوا يلعبوا بينا زي الكوره الشراب
اهم حاجه في اللحظه التاريخيه اللي احنا فيها دي ، ان محدش يصدق حد !!!! ولا حد يدي ثقته لحد !!!
اهم حاجه في اللحظه التاريخيه اللي احنا فيها دي ، ان كل حاجه تتخلبط علي بعض ، كل الاوراق والكروت والشعارات !!!
لان لو فضلت كل حاجه منظمه ، الناس حتشوف كويس !!! حتشوف وتعرف تميز وايه الصح واللي في مصلحتها وايه الغلط واللي مش في مصلحتها !!!
وطبعا ده مش مطلوب خالص خالص !!! لازم كل حاجه تتضرب زي العجه في الكبه ، وابو قرش علي ابو قرشين ودعاه العلمانيه علي بتوع الخلافه الاسلاميه وشباب التحرير علي البرادعي ولجنه الحكماء علي قناه الجزيره وكله يتدعك في بعضه وتضيع المعالم والملامح والتفاصيل علشان محدش يشوف حاجه !!!!
اهم حاجه في اللحظه التاريخيه دي ، ان الناس تخاف من بعض ، وتخون بعض ، وتفقد ثقتها في بعض ، وماتقدرش تستحمل الاختلاف في وجهات النظر !!! وحضرتك سعادتك يعني عميل النظام ، وحضرتك سعادتك يعني عميل لانظمه اجنبيه !!! وام الديمقراطيه اللي مش عارفين نتكلم مع بعض بيها ، حنعمل ثوره وحكم ونظام واحزاب وبرلمان ودستور بالديمقراطيه ازاي !!!
يخرب بيتك ياابلتي ، يعني هو انت ضد الديمقراطيه !!! طبعا لا لكن بس باقول اننا مش عارفين نتكلم !!!
ومش عارفين نختلف ، ونسمع كلام من ماركه ، ده فلان حقير ، ده جبان ، ياجبنا اسكتوا ، ياخايفين اتخرسوا ، ياعملاء النظام ياللي ليكم مصالح ماتتكلموش ، واللي خايف يتفرج علي التلفزيون وينام ، ايه الارهاب ده اللي من غير كباب !!!! طب ده حتي الكباب بيخلي الارهاب مقبول ومتحمل ، لكن ارهاب من غير كباب تبقي فعلا العيشه هباب هباب هباب!!!
انا مختلفه معاك ياصديق !!! ينفع اختلف !!! ولا الاختلاف معناه علي طول اني من دلاديل النظام !!! ده النظام لسه قاعد والجيش لسه بيحمينا وبنتشتم بالطريقه دي ، امال لو الثوره انتصرت والراجل مشي ومعاه النظام ، حيتعمل فينا ايه !!!!
هل معني كده اني من اعداء الثوره ، لا حاشا وكلا ، انا ايدت ثوره الشباب ومطالب الشباب ، لكن ثوره الشباب حاجه والتحرير النهارده حاجه تانيه ، وده موضوع تاني طويل لسه ماجاش وقت الكلام فيه ، انا بس باتكلم عنا احنا اللي قاعدين نتكلم !!! احنا وانتم وهما وكلنا مش عارفين تتناقشوا !!!! واي حد كلام اي حد مايجيش علي هواه ، اديها مجموعه منتقاه من الشتائم السياسيه والتريقه ( الحمد لله لسه ماجبناش سيره الاهالي والجدود ) ..
طيب اسمحوا لي ااقولكم حاجه ، علي فكره يعني علي فكره يعني الشتيمه سهله والكلام الخايب مافيش اسهل منه!!! وعلي راي الليمبي .... تقولي نيللي نيللي اقولك شيرهان شيرهان !!! مش لازم انا اللي ااقول وانتم اللي تقولوا ، قصدي يعني الفريقين اللي مش عاجبهم كلام بعض يقولوا لبعض نيللي نيللي شيريهان شيرهان !!!!
تقولوا يادلاديل النظام ومتلازمه استكوهولم ، يقولوا يابتوع الاجندات الخارجيه ومتلازمه بولاق الدكرور !!!!
تقولوا ما تتفرجوش علي الاعلام المصري علشان بيعمل غسيل مخ ، يقولوا ماتتفرجوش علي الجزيره علشان بتنفذ مخطط اجنبي !!!
تقولي سيد علي وهناء بتوع النظام ، يقولوا ريم ماجد ومني الحسيني بتوع المعارضه والفوضي الخلاقه !!!
تقولي انصار الاستقرار كل واحد خد خمسين جنيه علشان يطلع في المظاهره ، يقولوا بتوع التغيير كل واحد خد خمسين دولار بدل مظاهرات وبياكلوا كنتاكي ويشربوا ميه معدنيه !!!!
تقولوا ياجبناء ، يقولوا يامتهورين !!!
تقولوا ياللي مش وطنينين ، يقولوا ياعملاء !!!!
تقولوا يا بتوع حسني مبارك ، يقولوا يابتوع قطر وحماس والخلافه الاسلاميه ، او يابتوع امريكا وعمر عفيفي وخريطه الدم والفوضي الخلاقه !!!!
ايه رايكم في الانحطاط ده !!!!
ايه رايكم في القرف ده !!!!
انا شخصيا .... وسط كل القرف والانحطاط ده ، اؤمن ان معظم - ويكاد تقريبا جميع - المصريين بيحبوا مصر وبيبفكروا في مصلحتها ، بيحبوا مصر الوطن ، لابيحبوا حسني مبارك ولا بيحبوا امريكا ، لابيحبوا قطر ولا بيحبوا الخلافه الاسلامية ، اؤمن ان معظم المصريين بيفكروا وبيتصرفوا من منطق حبهم للبلد وتصورهم لمصلحتها ، انا اؤمن بده ، انتم بقي بتؤمنوا بايه ، بان المختلف معاكم برضه بيحب مصر وبيفكر في مصلحتها ، ولا له اجنده داخليه لصالح حسني مبارك والنظام !!!
الكلام ده عيب والله ، عيب !!!!
احنا مش عارفين نختلف ونحترم بعض !!!
يبقي ام ديمقراطيه ايه وقرف ايه اللي بنتكلم عنها !!!!!
طيب ، الاول كله ، كل واحد يصلي علي النبي ، وكل واحد يمجد سيده ، ونتفق اننا بنحب مصر !!! وان اختلافنا واتفاقنا علشان كلنا بنحب مصر ، وبلاش الشيتمه والاتهامات والكلام المقرف والتريقه والمسخره !!! لان احنا شعب سافل ودمه خفيف ولسانه مبرد وخرمنا التعريفه ودهنا الهوي دوكوا وكل واحد يعرف يلعب مع التاني لعبه السفاله دي !!! طيب ليه !!!! ليه نعيش فجأ دور الالتراس الزملكاوي والاهلاوي ونرفع لبعض الشماريخ !!! ليه نتقسم فريقين مش مختلفين بس لا وكمان بنكره بعض ومتربصين ببعض وقرفانين من بعض !!! لمصلحه مين ده ، الديمقراطيه !!!! تعالوا نتعلم مع بعض قليل من الديمقراطيه ، قليل وبس علشان نعرف نتكلم من غير مانعور بعض ، تعالوا نسيب الشماريخ علي جنب علشان نعرف نتكلم !!! ده احنا لسه علي الشط والبحر غويط ، لما واقفين علي الشط نطير رمل في عينين بعض ونضرب بعض بالزلط والطوب ، اما لما ننزل البحر حنعمل ايه ، حنموت بعض ونغرق بعض !!!! احنا مش بنلعب ولا بنهزر ، ده مش ماتش كوره لازم يخلص بالبلنتيات ، احنا مش في حلبه صراع الديوك والناس متراهنه علينا مين اللي حيموت التاني وينقر راسه ، عيب والله العظيم القرف ده كله عيب ، عيب علي الجميع ، علي جميع الاطراف ، اللي مش عارفه تختلف وهي بتتكلم !!!!!
طبعا حد ممكن يقولي ان كلمات زي الانتهازيه والعماله والجبن و.... دي اوصاف سياسيه من حقنا نوصف بيها المواقف المختلفه عنا ، طيب ماهي فيه اوصاف سياسيه تانيه زي المراهقه السياسيه والاندفاع والعماله برضه ممكن يتوصف بيها الفريق الاخر !!! يبقي ايه الحل ، كل واحد يخش الخندق ونقف ورا المتاريس ونحدف بعض بقنابل المولوتوف !!! هو ده ام الحل في الديمقراطيه علي الطريقه المصرية !!!!
طيب ماتيجوا نحاول نعمل الصعب !!!!تعالوا نتفق اننا وطنيين وبنحب مصر وكلنا بنسعي لمصلحتها من وجه نظرنا ونمارس اختلافنا من غير تريقه وخناق ومسخره واتهامات !!! تفتكروا حنعرف !!!! لازم نحاول نعرف ، لان مش معقول نمارس السياسه بطريقه اللمبي ، وتاني ااقول ، تقولي نيللي نيللي ااقولك شيرهان شيرهان!!!
بالمناسبه اللي نفسه بتغم عليه من الاعلام المصري ومحطاته الارضيه والفضائيه ، ياريت يبقي يفتكرني لان معدتي بتتقلب من الجزيره والعربيه والبي بي سي !!!! ياريت واحنا بنمارس الديمقراطيه الكلاميه دي ، ياريت كل واحد ياخد ادويه معدته وادويه غممان النفس علشان نعرف نتكلم مع بعض ونعرف نختلف!!!!
وعلي راي السيد المسيح ( انك تري القشه في عيني ولا تري الشجره في عينك ) !!!
وعلي راي المثل البلدي ( لاتعايرني ولا اعايرك ، الهم طايلني وطايلك ) !!!!
وصباح الخير يامصرييين !!!!
هناك تعليقان (2):
احنا بتوع مصر وبس ومصر بتاعتنا احنا وبس ولا امريكا ولا ايران ولا اخوان
أنصح كل من يشك أو يتردد
أن لا يضيع وقتة
أتمني من الجميع الذهاب إلي ميدان التحرير
أغسلوا أرواحكم هناك
إرسال تعليق