25 يناير 2011

ثلاث تخاريف في دور برد واحد !!!!!ا


التخريفه الاولي - مجرد صراع رجال اعمال

التخريفه الثانية - خريطه الدم والفوضي الخلاقة

التخريفه التالثه - الشبكه العنكبوتيه والجرة


التخريفه التالتة !!!! الشبكه العنكوبتيه والجرة !!!!ا



واضح ان البرد شابط في زي الوطاويط مابتشبط في الوش ، بس الوطاويط بتطلع بالطبل البلدي ، البرد بقي مش نافع معاه لا الطبل البلدي ولا الادويه الخواجاتي !!! شابط شابط يعني !!! والواحد يصحي من النوم مخنوق مش عارف يتنفس وراسه بايظه ومش عارفه تفكر ، وحيث ان الامر كذلك ، والبرد بيخليني اكتب سلسله تخريف معتبره ، فحان وقت التخريفه التالته !!!!

طبعا انا باكتب لكم وانا اون لاين ، انت بتقروا لي وانتم اون لاين ...
ماهو لولا النت والاون لاين لا كنت عرفتكم ولا عرفتوني ولا كنت كتبت ولا كنتم قريتم !!!!
لكن النت مش كلها حنان !!! لا النت مليانه كمان تعابين ومرضي نفسين وولاد حرام !!!
نخش في الموضوع بقي ......
تصوروا لو مافيش نت !!! الفوضي الخلاقه كانت تحصل ازاي !!!
الناس كانت كل واحد بعيد عن التاني ، وعلي مانجيب الخط في تليفون العمدة ، تكون مالطه خربت !!!
النت خلت الدنيا سهله زي البسبوسه !!!! والسكينه تجري فيها بسرعه الضوء والميجابايت !!!

ولان النت بقت شبكه عالميه رابطه الكوره الارضيه كلها ، كل حاجه ظبطت نفسها علي النت !!!!
تليفون محمول يوصلك علي النت ، ويكون بكاميرا علشان الصور تنزل طازه بنار الفرن علي النت ، ولما تصور الفيديو ، الفيديو يتذاع بسرعه علي اليوتيوب واخوانه من مواقعه الافلام والبث المباشر ، ولان اليوتيوب موجود ، كل واحد يعمل فيديو يقول اللي نفسه فيه ، واحده تقول حابقي رئيس جمهوريه والتانيه تقولك ضربوني في المظاهره والتالت يوجه بيان للامه والرابع يشرح للمتظاهرين يتظاهروا ازاي ، وافلام واغاني وجنس وسياسه وادعيه وقرأن ومظاهرات وحب وضحك وعلي كل لون ياباطسته !!!

الاول فرحنا بالنت ، اللي كان نفسه يلعب ، لعب علي النت !!! واللي وحيد ومش لاقي حد يكلمه هيص في الغرف العامه والشات بكافه اشكاله والوانه !!!! والي عايز يعمل بيزنس ويصدر ويستورد ويفتح اعتمادات النت ساعدته وفتحت الاعتمادات وقفلتها !!!!
وبقينا كلنا مربوطين بتلك الشبكه العنكوبوتيه !!! كابلات تحت البحر وفوق الارض ، ومودمز ويو اس بي ، كل واحد شايل سنترال في جيبه ، يوصله علي اللاب ، يتربط بالعالم ويشوف في ماليزيا كلوا ايه وفي البرازيل شربوا ايه ، اللي عياله مهاجرين معدش فيه حاجه بعيده ، شبكات عالميه كبيره ، عماله تربط الناس ببعض ، ده يكلم ده وده يشات مع ده ، شبكه تتواصل بالكلام وشبكه تتواصل بالصوت وشبكه بالصوت والصورة ، والموبيلات عماله تتطور ، موبيل يتكلم ، موبيل يصور ، وموبيل يوصلك بالنت ، وموبيل يوصلك بال بي بي ام ، فجأ العالم كله بقي مربوط بشبكه واحده ، وسهل نكلم اللي في السعوديه واللي في امريكا واللي في بلاد تركب الافيال !!!! لا ايه ، الاول كان بفلوس كتير ، دلوقتي بقي بحاجه ببلاش كده !!!!

بس كده !!!
لا طبعا مش بس كده !!! التقل جاي ورا !!!
الناس كانت في جره وطلعت لبره !!!!
مابقيتش قصه لعب وهيصه !!!
لا كمان بقت قصه تعليمات واوامر وخطط ومخططات !!!
وتحويلات فلوس وغسيل اموال !!!
ومؤتمرات ومقابلات ومحاضرات وكونفرنسات !!!!
وسياسه واقتصاد واجرام وارهاب وافكار واسلمه وتنصير ونسوان ورجاله !!!
وصوره تتلقط وتتبعت تهيص الدنيا او تحرقها !!!
وبقي كل اللي نفسه في حاجه يعملها وكل اللي نفسه في حاجه يقولها !!!
ماهوبدام حنعمل فيديوهات للاغاني والنكت ، ممكن نعمل فيديوهات لاي حاجه تانيه !!!

ولان النت شغاله اربعه وعشرين ساعه في الاربعه وعشرين ساعه ، فمعدتش قصه كلمتين وبس لا بقت الناس كلها قاعده علي النت وبتستغني بيها عن الدنيا شويه شويه ، الجرايد ، ماهي علي النت لا وكمان شغاله رابعه وعشرين ساعه ، جرايد الكترونيه وكل ربع ساعه تحديث وخبر عاجل واول باول ، افلام ، ماهي حتيجي علي النت ، اغاني ، دوان لود من النت ، والنت عارضه كل حاجه ببلاش او بتكاليف بسيطه لاتقارن باي حاجه خارج النت ، وشويه شويه استغنينا وبنستغني عن الحياه خارج النت وبنتحشر كلنا جوه النت !!! كل انشطه الحياه قررت تخش النت وتحش نفسها فيها ، تلفزيونات علي النت ، مكتبات علي النت ، كتب علي النت ، صور علي النت ، ذكريات علي النت ، اصحاب علي النت ، دول وحكومات ومنظمات اقليميه علي النت ، بيانات ومنشورات علي النت ، تبادل الزوجات علي النت وشبكات الدعاره علي النت والتنظيمات المتشدده علي النت والسلفيين علي النت والملحدين علي النت وهيصه مابعدها هيصه !!!!
وغيرنا اسماينا وبقينا باسامي مدوناتنا او بروفيلاتنا او ايميلاتنا !!! وكل واحد حط الصوره اللي يحبها والعجوزه رجعت شابه والوحشه بقت قمر والواد البحلف بقي جان وقمر وبلدياتنا اتمدين لغايه ماجاب لاهله الكافية !!!!
نتكلم من النت ونحب من النت ونتصاحب من النت ونتخانق من النت ونتظاهر من النت ونهد ابراج التجاره العالميه من النت ونحرق الدنيا من النت ولسه ولسه !!!!
وبدام نقدر نقص ونلزق اي صوره جنب اي صوره ونحط اي كلام جنب اي كلام ، تبقي هاصت ياولدي وفلت عيارها!!!!
والامن يراقب الناس من النت ويقبض علي الناس من النت والحكومات تتقلب من النت وصفقات السلاح من النت وبيع الاطفال من النت ودعاره النسوان من النت وتجاره المخدرات من النت ، الاحكام القضائيه علي النت والغراميات السخنه علي النت وكله الكاميرات والبث المباشر واديها !!!!

هي دي بقي الحرية ؟؟؟ وهو ده النظام العالمي الجديد ؟؟؟؟؟؟
الحريه ان اي حد يقول اي حاجه لاي حد !!!
الحريه ان اي حد يعمل جرنانه وموقعه وصفحته ويتكلم وينشر والناس تستقبل وتتاثر وهيصه ومولد صاحبه غايب!!!! الحريه ان ناس تشتم ناس براحتها وناس تهاجم ناس براحتها ، واللي يتشتموا يعملوا هما كمان مواقع تشتم وترد علي الشتيمه وتهاجم وترد علي الهجوم !!!! الحريه اني انشر اي خبر علي النت والي يحاول يمنعه يبقي بيعتدي علي حريتي وحقوقي الاتصالات الدوليه والوجود والدستور !!!!

الحرية اني ااقول اي كلام ، اغاني سافله وتريقه وقباحه ونسوان عريانه وكلام فج ومنشورات وافلام وفيديوهات تصور واحده بتشيل شعر رجليها والتانيه وهي بتستحمي والتالته تصور ناس بتزور الانتخابات والرابعه ناس بتتضرب في المظاهرات ، ومالنت الا مسرح كبير علي راي يوسف بك وهبي !!!!
وبقي الموبيل سنترال صغير فيه كاميرا تصور وفيديو يلقط وشبكه توصل علي الانترنت وكل واحد يعمل مابدا له ويقول مابدا له !!!!
وانت زعلانه ليه !!!
ولا زعلانه خالص ، اياكش تولع !!!!
ماانا قلت الناس كانت في جره وطلعت لبره !!!
استنوا بس اثر ده ونتيجته علي حياتنا وحياه اولادنا واحفادنا ، وان غدا لناظره قريب !!!

مين بقي مصدر المعلومات لاي حاجه !!! مين اللي ممكن يسيطر علي اي حاجه !!! مين اللي ممكن يعلم ويربي ويقنع ويكبر !!!
خلاص شويه شويه ، لاحيبقي فيه بابا ولا ماما ، ولا حيبقي فيه ابله المدرسه والاستاذ ، لاحيبقي فيه خصوصيه محليه ولا اقليميه !!!
حتبقي الدنيا هيصه ، وعلي النت كل حاجه موجود وهوم ديلفري وبالصلاه علي النبي ميه ميه في المهلبيه !!!!
مواقع جنس اسخن من كل النسوان الصاحيه ، واغاني احسن من كل المحطات والاذاعات ، افلام علي كل لون ياباطسته عربي وخواجاتي وهندي ، وكل الناس ايديها طايله بعض ، حوار حضارات ، اعرف عدوك ، تعليمات ارهاب ، تحويل فلوس وغسيل اموال ، حكومه الكترونيه وحكومه مخلوعه ، فوضويه وعبثيه وبيانات وتحريض وشرح وتفسير وسلفيين ووهابيين وحركات تنصير ومنظمات ارهابيه وقتل وتصوير بشر وانتهاك خصوصياتهم و..... يعيش النظام العالمي الجديد !!!!

والناس ، معظمها قاعده علي النت ، جاهله زي ماهي بس بتعرف تخش النت وتطلع ، والاميه زي ماهي لكن النت شغاله ، والكتب مرميه علي الرصيف ماتلاقش حد يقراها لكن المهم الغرف العامه في الشات وانا ساميه انت مين؟؟ ، ولابس ايه احكي لي وانت قالعه ايه احكي ليه!! ولان الناس قاعده علي النت براسها الفاضيه ، فالنت هي اللي بتملاها ، واي حاجه تتنشر في النت تبقي صح وصحيح وتمام يبقي اصدقه مااصدقوش ازاي ، ياجدعان ماهو منشور علي النت اهو !!!!

المصيبه ان ناس كتير شايفه اللي انا شايفاه لكن محدش يقدر يعمل حاجه ، محدش يقدر يقف في وش عجله الزمن وهي بتدور حتي لو كان عارف انها فاعصاه هو واهله كلهم ، ناس كتير شايفه الموجه العملاقه اللي بتضرب امنهم واستقرارهم وخصوصيتهم وحياتهم شايفنها وهي جايه وعمالين يصوتوا حنغرق حنغرق ح.....غرق ح.......رق ...... الموجه عاليه عاليه عاليه وجايه جايه جايه و....... غرقوا و...... بق بق بق بق .....والفاتحه بقي علي كل الاحياء والاموات !!!! وياحبيبتي الشمس مش بعيده ايدينا احنا قصيرين !!!!

طيب .......... ماشي ياحريه !!!
ماشي يانظام ياعالمي ياجديد !!!!
مين اللي ماسك الارشيف بقي !!! وشايله عنده لاي عوزه واي زنقه !!!!
مين اللي قاعد يتفرج علي كل البشريه وهي عماله تتنطط جوه النت زي القرود في الجبلايه في جنيه الحيوانات !!!
ماهو طبعا كل حاجه بتتكتب مابتتمسحش !!!!
وكل تحركاتنا وانفاسنا وكلامنا الوسخ وخصوصياتنا وهزارنا ، كل ده متسجل ومحفوظ عند جهه ما ماسكه الكوره الارضيه من مصارينها !! ووقت الجد افتح الدفاتر واطلع اللي نفسي فيه !!!!
دي هواجس مرضيه !!! ماشي ياحلوين ، هي هواجس مرضيه فعلا !!! خليكم عايشين في الهابولي كده !!!

طيب انا عايزه ايه ، مش عايزه حاجه ، انا باتكلم وااقول وبس خلاص ، ماهي دي مدونتي اللي علي النت ، اللي برضه من حقي اكتب فيها اي كلام وااقول اي كلام وبراحتي بقي ولو حد اتعرض لي ، انتم حرين ، انتم فاكرينها سايبه ، ايه مافيش منظمات حقوق انسان ومجتمع مدني ومحاكم دوليه ، ايه مافيش امم متحده وقوات تحالف دولي ، ايه مافيش كلينكيس يفضحكم ويشهر بيكم ، ايه مافيش عصايه وقت الجد تلسع راسكم الفاضيه دي ، ايه ، هو انتم صدقتم انك احرار بجد ولا ايه !!!! لا كل واحد يصحي ويفوق كده !!! انتم احرار طول مااصحاب النت عايزينكم تلعبوا بيها وفيها ، طول ماكلامكم مابيضايقهومش ، طول ماهم مش زعلانين منكم !!! لا لما تزعلوا المعلم الكبير صاحب الكوره ، يضربها في الارض تخبط في دماغكم ويضربها في دماغكم تضرب في الارض وفي الاول وفي الاخر يضرب دماغكم نفسها بعصايه النظام العالمي الجديد !!!!

خلاص بجد ، بقي عندي هواجس !!!!
طيب .... اخر كلمتين بقي بجد !!!!
اهم ادوات الفوضي الخلاقه ، هي النت !!!
جايز اللي اخترعوها ماكانوش فاهمين كده ، لكن هي بقت كده !!!!
ايون ، ماهي النت للعب ، ماشي العبوا براحتكم ياحلوين ، لكن ليها فوايد تانيه طبعا ، ماهو مش حنقضي حياتنا كلها لعب !!!! اللي اخترع النت كان خالي البال وبيلعب !!! لكن اللي بيستخدموها مركزين وفاهمين بيعملوا بيها ايه وحيعملوا بيها ايه !!!!

اهم ادوات الفوضي الخلاقه بتاعت ابلتي امريكا هي النت !!!!
النت وادواتها ... موبيل وكاميرا ويو اس بي ولاب وسايبر كافيه وشات وهاكرز ودون لود وبلاي بيري !!!!
ازاي ..... انا برضه اللي حاقول لكم ازاي ، ماتبصوا حواليكم وتعرفوا ازاي !!!!
طيب انت زعلانه ليه ، ولا زعلانه ولا اي حاجه ، ماانا قلت من الاول اياكش تولع !!!!

النظام العالمي الجديد داير علي رقبه الكل واستقطب الكل لحسابه ولحسابه السيرك بتاعه المنصوب 24 ساعه في 24 ساعه !!! مابقيتش الدول اللي بتفقد استقلاليتها ، لا بقي مواطنيها اللي بيفقدوا استقلاليتهم وخصوصيتهم وبيبقوا تابعين للمعلم الكبير والنظام العالمي الجديد ، ولو حبيت تنكد علي البشريه كلها ، اقطع النت عنها كلها يومين تلاته !!! هاهاهاها ، الناس تتجنن والانتحار اللي عن حق يزيد والبيزنس يبوظ والوحده تزيد والاكتئاب يكتر والعنف يوسع ، كل واحد مايبقاش طايق روحه !!! ومصالح الناس تتعطل والشغل يقف وكمان المظاهرات والبنوك تتخرب وتفلس ، يومين تلاته المعلم الكبير يقفل حنفيه النت ويسيب الناس عطشانه ، الكوره الارضيه تشبط في بعضها !!! وده معناه حاجه واحده بس !!! معناه ان الناس كلها بقت عبيد النت باي طريقه وكل طريقه ولاي سبب وكل سبب !!! وكل واحد بقي عارف نفسه !!!! الناس بقت عبيد العالم الافتراضي الوهمي اللي المعلم الكبير دخلهم فيه وحشرهم جواه !!!! ولو النت قطعت ولا اي شبكه من الشبكات جابت ضرفها ، حتلاقوا الناس بتهرش وتعيط زي المدمنين واكتر !!!!
عادي مااحنا عارفين كل ده ومبسوطين ، وماله ياحبايبي ربنا يبسطكم اكتر واكتر !!!

الناس كانت في جره وطلعت لبره .... ولسه !!!!
والفوضي الخلاقه بتستخدم البشر والنت لضرب اعاصيرها في الكوره الارضيه حسب مزاج المعلم الكبير .... ولسه!!!!
والناس ادمنت النت ومابقيتش تستغني عنها ، ومستعده وكل يوم حتبقي مستعده اكتر تعمل اي حاجه علشان تفضل اون لاين ... ولسه !!!!
والمعلم الكبير عارف كل حاجه عن كل حد شخصي وعام خصوصي ومهني وكله مترتب في ملفات وديسكات وفلاشات ومستني كلينكس او غيرها تفتش الاسرار وقت مالمعلم الكبير يحب كلينيكس واخواتها ينفذوا الاوامر ويكشفوا المستور ويهتكوا الاسرار و..... ولسه!!!!
وبعدين ......... ولا قبلين !!!!
بالعب انا كمان معاكم علي النت ، ولا هي جت علي يعني وتبقي حرام !!!!! ا
وبقول كلمتين من نفسي !!! بجمله كل الكلام الكتير اللي منشور علي النت !!!!
وصباح الحريه والنظام العالمي الجديد !!!!

23 يناير 2011

التخريفه الثانيه !!!! خريطه الدم والفوضي الخلاقه !!!!


قال .... هوغو تشافيز

أكبر خطر على كوكب الأرض هو حكومة الولايات المتحدة الأمريكية

البرد لسه عامل عمايله !!! ودماغي مدروخه والادويه بتكمل علي الباقي !!!
الان حالا فورا انا ربع مركزة !!! ولاني ربع مركزه لازم اقدح زناد فكري علشان اركز جداااااااااا!!!!
انا كنت باكتب نوت مهمه وانا عاقله ومركزه وبعدين مش لاحقه اكملها ولا انشرها ، لان الاحداث متلاحقة !!!
فرصه بقي وانا راسي بايظه اني اكملها ، وكده مافيش علي المريض حرج ولا علي المدون كمان !!!!
بخخخخخخخ
حاقول كلام جد جدااااااااا ...
لكن رغم انه جد جدااااااا ينفع يندرج بمنتهي السهوله تحت بند التخريف !!!
وهاهي التخريفه التانيه الجميله و......... !!!!
قال .... هوغو تشافيز
أكبر خطر على كوكب الأرض هو حكومة الولايات المتحدة الأمريكية
اولا - شويه شقاوه نظريه وافكار عامه !!!!
1- عالم السياسه القبيح الموحش !!!!
للاسف للاسف .... في عالم السياسة لا تتحكم القواعد الاخلاقية ولا المباديء السامية ولا الانسانية !!!! في عالم السياسة تتحكم المصالح والمصالح فقط ، لحد تصبح الرومانسية سبة يتراشق بها السياسيون واعدائهم ، فحين تصبح رومانسي حالم ، تتمني عالم اجمل واكثر انسانية ، فانت لا تفكر بطريقه سياسيه عملية ناجحة ، لاتفكر في المصالح والتي هي المرجعية الوحيدة التي تحكم عالم السياسة وتتحكم في رجاله وقراراته ، المصالح الثروة القوة المال النفوذ السيطرة ، جميعا مترادفات مختلفه لعالم خالص جدا ، يتصور الكثيرون انهم يفهموه ويعرفوا اسراره واغواره ، فيحكموا علي ما يحدث حولهم في هذا العالم القبيح الذي نعيش فيه بمعايير اخلاقية وانسانية حبا وكرها وهي معايير ابعد ماتكون عن ذلك العالم وقواعده واليات صراعه !!!!
وحسبما تحتاج المصالح السياسية العليا تتغير التكتيكات والخطط والتحالفات ، تتغير الشعارات فيرفع الساسه شعارات مختلفه واحيانا متناقضه للجماهير الخاضعه لحكمهم او لنفوذهم والتابعه لهم وصولا لاقناعهم بتلك الشعارات ومن ثم دفعهم وافكارهم وسلوكهم في طرق ومسارات تمهد الطريق او تفتحه او تغلقه – حسبما تقتضي الحاجه وقتها – لتحقيق تلك المصالح والدفاع عنها وتبني افكارها ، ربما اليوم المصالح تقتضي السلام وربما تحتاج غدا الحرب ودقات طبوله ، ربما تحتاج المصالح معايير حقوق الانسان وربما تحتاج معسكر جوانتينامو ، ربما تحتاج المصالح نزع السلاح النووي وربما تحتاج تكديس الاسلحه النووية وتسليح الجيوش بها ونشر صواريخها في العالم كله ، وتتغير الشعارات والتحالفات حسب ما تقتضي المصالح ، تتغير الشعارات التي يطلقها الساسه للجماهير حسب ماتحتاجه المصلحه ، ربما تتناقض الشعارات ، هذا ليس مهم ، فذاكره الجماهير ضعيفه ، وببعض الضجه والهيصه والتسويق الناجح يتبنوا الشعارات الجديده بديلا عن الشعارات القديمه التي كانت تحتاجها المصالح القديمه ولم تعد تحتاجها المصالح الجديدة !!!
2 - نظريه المؤامرة !!!!!
نظرية المؤامرة .... احدهم ، لااراه ، لااعرفه ، ربما ساعرفه فيما بعد ، ربما لن اعرفه ابدا ، احدهم ، فرد او جماعه ، يتابعني ، يتدخل في شئوني ، يفسد ترتيب الاوراق ويعرقل الخطط والمسارات التي اعدها لنفسي ، ربما يدفعني رغما عن انفي للسير في طريق لايحقق مصالحي لكنه يحقق مصالحه هو ، احدهم ، يتدخل في شئوني وكأنه لايتدخل ، لكن يتدخل فيها فعلا مهما انكر ، ربما هو بالاساس يقبض علي الخيوط التي لاارها تحرك عرائس الماريونت ، ربما لايقبض علي الخيوط لكنه يسيطر علي من يقبض عليها ، ربما " يزن " في اذني وكأنه حبيبي ليدفعني في طريق لم اخض فيه من قبل ، مزينا شكل الطريق واخره الذي ساصل له ، مزيفا حقيقته معتمدا علي جهلي بالطريق وتفاصيله ، في الاخير ، هو يراقبني ويستخدمني لتحقيق مصالحه بالاساس بصرف النظر عن مصالحي، ويتركني براحتي طالما لا اتناقض مع مصالحه ولا افسدها ، وحين يستشعر لاسبابه ان سلوكي او افكاري تتناقض مع مصالحه لايتوان علي افساد خططي وعرقله مساراتي وتعمد افشالي وتعمد فضحي بسبب الفشل الذي دفعني اليه ، كل هذا وصولا لاستخدامي في الدفاع عن مصالحه او الصمت امامها وعدم عرقلتها او تاييدها ودعمها!!!!
هل نظريه المؤامرة تعني اني " مفعول به "؟؟ ليس بالضرورة !!! ربما اكون فاعلا وصاحب اراده وقرار لكنه يحيطيني بالاخرين ال" مفعول بهم " يستخدمهم ببراعه لحرق الارض تحت قدمي وتصعيب الحياه في وجهي وافساد مااسعي اليه ، وربما يحطيني بالاخرين ممن يزينوا لي الامور وييسروها علي صعوباتها ويخدعوني في قدراتي ويصورون لي امكانيات هائله لااملكها بالفعل ، لكن الاخرين ال " المفعول بهم " يخدعوني حتي في قدراتي ونفسي فاندفع في طريق لم احسب خطواتي فيه جيدا ولااعرف نهايته !!!! ربما اكون فاعلا وصاحب قرار واراده وقدره علي الفعل واتصرف وفق مايمليه علي عقلي ، لكنه وبمنتهي الحذر والبراعه يلعب في عقلي ، يعيد ترتيب افكاره ويزين له سلوك ما ويصعب عليه سلوك ما ، انه يلعب في عقلي وكأنه يوسوس لي كمثل ابليس لاتبع – اتبع باراداتي الحرة – طريق معين او اتخاذ قرار معين ، وحين يفلح في بيع فكرته لعقلي ، هنا ، اتصرف انا كفاعل صاحب اراده وقرار من عندياتي واتبع صوت راسي الحرة لكني في الحقيقة لست صاحب اراده ولا قرار ولست فاعلا ولست مخير!!!!
نظرية المؤامرة ... صاحبها بارع في لعبتين ، الشطرنج والبلياردوا ..... بارع في لعبه الشطرنج يعرف الخصم الذي امامه وحركاته ونقلاته ويقرا ويستقرأ طريقه تفكيره وخططه ، يتوقع مالذي سيفعله فيبادره اما بافساد تحركاته او احباط اثرها ، رقعه اللعبه مفتوحه وواضحه واحجار اللعب مرصوصه وواضحه والهدف واضح ، كل خصم يعرف هدفه واستراتيجيته وخططه للوصول للهدف والفوز والخصم الاخر يعرف هدفه واستراتيجيته وخططه ، كل من الخصمين يبغي انتصارا علي الاخر فاللعبه لا تسمح بفوز الخصمين معا في نفس الوقت بالضرورة احدهما منتصر والاخر مهزوم بعد ما يستفذ طاقته وجهد وكل احجاره فرارا من الهزيمه لكنه لايفلح !!! لعبه الشطرنج لعبه حرة تاخذ من وقت لاعبيها ما تحتاجه لينتصر طرف علي الاخر ، هي ليست مباراه كره محدده بتسعين دقيقه ووقت اضافي ، هي لعبه ذات وقت حر كبير مفتوح ، ربما تنتهي في يوم وربما تاخذ عقودا ، عقول تتباري علي رقعه اللعب تستخدم كل الامكانيات المتاحه ، وجزء كبير من وقت اللعبه بين المحترفين يستغرقه التفكير في راس الاخر وكيف يفكر وماهي خططه التي ستدفعه لهذه النقله او ذاك وكيف سيكون دفاعي اذا مانقل هذا العسكري او ذلك الحصان ، ومالذي يقصده من تلك الحركه وكيف ستاثر علي مساراته وصولا لهدفه الاخير !!! انها لعبه الصبر والذكاء الحاد والسعي الدأوب للوصول للهدف الوحيد الذي تسمح به قواعد اللعبه ، احدهما ينتصر والاخر يهزم !!! هكذا ببساطه !!!!
صاحب نظريه المؤامرة .... بارع في لعبه الشطرنج !!!! وبارع ايضا في لعبه البلياردوا ، تلك اللعبه التي تقوم نظريتها علي كورا متلاحقه تضرب هذه في تلك فتتحرك الثالثه تضرب الرابعه والرابعه تدفع الخامسه للهدف المرجو والمستهدف !!!! في لعبه البلياردوا الطرق كلها غير مباشرة ، لايسلك اللاعب طرقا مستقيمه ، لايملك هذا فقواعد اللعبه تمنعه عنه فالكور كثير ومساحه الملعب كثيرة ومرمي الاهداف له اماكن محدده يستحيل علي اللاعب وفقا لقواعد اللعبه وعدد الكور ومساحه الملعب ، يستحيل عليه سلك الطرق المستقيمه وصولا لاهدافه ، عليه يستخدم الكور المبعثره علي مساحه الملعب ويستخدم براعته وصولا لتحقيق الاهداف بطرق غير مباشره متواريه مليئه بالذكاء ، حين يضرب تلك الكورة لترتطم بالثانيه ، قد لايفهم ممن لايفهمون في اللعبه حقيقه مقصده ولماذا يفعل مايفعل ، تبدو تصرفاته للجهله عشوائية وغير مفهومه ، لكن من يفهم في اللعبه وقواعد ينتظر ويتربص الاثار التي ستتحقق ولو بعد من تلك الضربه او هذه ... وتستمر اللعبه بسلك الطرق غير المباشره وطرق الكورات في بعضها البعض ليفاجيء المتفرج فجأ بضربه اخيره تحقق الانتصار باستخدام كل الطرق غير المباشرة !!!! وغالبا تكون الضربه الاخيره التي تحقق الانتصار الساحق ضربه مباشره مستقيمه واضحه تقود لها كل ظروف اللعب وبراعه اللاعب وقدراته علي نزال الخصم وهزيمته ، يقود كل هذا لضربه ساحقه ماحقه تنهي اللعبه وتحقق الانتصار الاخير!!!!
3- البازل والاحجيات !!!!
فجأ ..... اكتملت الصورة وحل اللغز كما سابين لكم فيما بعد !!!! هذا ماصرخت به يوم استفتاء انفصال جنوب السودان ... الصورة كانت مبعثرة كمثل لعبه الاطفال التي اخترعها الكبار لهم لتقويه ملاحظتهم وقدراتهم العقلية ، لعبه " البازل " او الاحجيات ، تلك الصورة الممزقه لقطع صغيره ، تبدأ باربع قطع وتنتهي في لعب اعقد للكبار متبعثرة في بضعه الاف من القطع الصغيرة التي منها تتكون الصورة الكلية وعلي اللاعب ان ينظم تلك القطع الصغيره بجوار بعضها لتمنحه في النهايه وبعد جهد الصورة الكلية التي بدأت اللعبه بتزيقها !!!! وكثيرا ما تتعقد اللعبه ، فتضيع بعض القطع الصغيره فتبقي الصورة غامضة لان قطعه صغيره هنا او هناك توارت فاستغلقت اللعبه علي الحل وبقيت الصورة غير مكتمله محيرة ....
لعبة " البازل " هي لعبه اخترعها الكبار للاطفال الصغار لتقويه قدراتهم العقليه ، لتقويه امكانياتهم علي التصور ، علي فهم الصورة الكليه ، علي متابعه التفاصيل ، لعبه قانونها ، تمزيق صورة لقطع اصغر مختلفه الاشكال ممزقه بشكل وكأنه عشوائي ، ربما يكون عددها اربعه وربما اربعه الاف قطعه، حسب سن وقدرات اللاعب الذي صممنا من اجله اللعبه ونسعي لتطوير قدراته بها .... وتبدأ اللعبة حين تتبعثر القطع الصغيره فتفقد الصورة التي كانت متكامله كل ملامحها ولايبقي مع اللاعب الا متناثرات صغيره يعلم هو انه عليه اعاده جمعها وترتيبها في سياق وحيد لاثاني له حتي يعيد تكوين الصورة الكليه التي ترسم ملامحها وشكلها تلك القطع الصغيرة ، نعم كثيرا ما يتعثر اللاعب ويكون الصورة بطريقه خاطئه يتصور انها صحيحه ، لكنه بعد جهد كبير يكتشف انه نظم القطع الصغيره بطريقه خاطئه فلم تقوده للصورة الصحيحه بل ضللته اكثر مماهو مضلل ، هذه اللعبه ليس لها الا طريقه واحده صحيحه وغير هذا بعثره للجهد واستنزافه لاتصل لشيء ... وكلما كثرت عدد القطع كلما صعبت اللعبه كلما ظلت الصورة مبعثره ، وكثيرا مايخفق اللاعبين ويتركوها من قصار النفس ضيقي الخلق قليلي الجهد ، يتركوها مبعثره ولايكترثوا ... لكن اللاعب الدأوب الذي يبذل جهدا كبيرا ويصمم علي النجاح فيها ، يصبر ويثابر ويركب القطع الصغيره وفقا لنظريه التباديل والتوافيق وفجأ يصرخ مثل ارشيميدس ، وجدتها وجدتها ... يعثر علي قطعه او اثنين او عشره ، تكمل القطع المبعثره وتعطي لها معني ودلاله وسياق وتكمل الصورة الكليه وتوضحها كمثل الشمس !!!!! والحقيقه اني عثرت علي الجزء المفقود من الصورة التي كانت تحيرني بشده !!!!
ثانيا - التخريف علي اصوله والجزء المفقود !!!!!
انا مش بحب امريكا ، اه الممثلين هناك حلوين ، اه السوسيس بتاعهم بيقولوا طعمه جميل ، بحب اوباما بالذات لانه اسمر وحليوه ، لكن مش باحب امريكا خالص نهائي ، ليه ، لان امريكا مابتحبناش !!! وانا اللي ما يحبناش اكره امه واللي خلفوه !!!! امريكا ما بتحبناش !!!! مابتحبش مصر ولا المصريين !!!!
يمكن تلاقي واد مصري فالح تخطفه !!! يمكن تلاقي عالم مصري شطور تغريه وتاخده عندها !!! واحنا طبعا نصقف لان عندنا عقده الخواجه فاول مانلاقي واحد مصري بقي امريكاني ، كل واحد ينفخ صدره وينبسط قوي ، علي ايه بلا وكسه !!! اصغر عامل هنا ابرك ميت مره من اي عالم في امريكا ، علي الاقل العامل هنا بيعمل حاجه يمكن تفيدنا يصلح حنفيه يركب لمبه يغير عجل العربيه يقف علي ماكينه قماش تطلع غيارات تحتنانيه تسترنا ، لكن العالم هناك ، العالم الامريكاني اللي كان مصري وبقي امريكاني ولا ليه لزمه عندنا ولا بيفكر فينا ولا نلزمه ، بيفكر بالامريكاني من الشمال لليمين وكمان بالاكسنت الامريكي !!! طيب خلاص يهني سعيد بسعيده مالنا احنا بقي !!!!
المهم .....
امريكا ما بتحبناش علشان كده انا مابحبهاش ولا اللي يجي منها ولا اللي يقرب ناحيتها !!!!
الحقيقه امريكا ما بتحبش حد !!! عامله زي العيله اللي كانت امها بتعذبها في الاوضه الضلمه فكرهت الدنيا كلها وكرهت نفسها ، وبعد ماكرهت كل حاجه ، رجعت حبت نفسها بس !!!! امريكا بتحب نفسها وبس !!! تحبك لو انت حتنفعها وتديك بالجزمه لو مالكش لزمه ، ولا عزيز ولا غالي عندها ، وعينها حمرا وقت الجد !!! واوعي تتخدع بالرقه الامريكاني من الخواجات امات عيون زرقا ، دي رقه مضروبه وراها وحش عو عايز يمص دمك بس لما يجي وقتك ياجميل !!!!
ماعلينا امريكا ما بتحبناش !!! لكن ما بتقولش !!! مصدعانا وعامله دوشه ، باعتبارها بتحبنا !!! واحنا مفروض هبل وبرياله ونصدق الكلام اللي بتقوله انها بتحبنا !!!! سوري مسززز امريكا ، مااحناش مصدقينك ، طيب براحتكم ، اللي يصدق بالذوق يصدق واللي يصدق بالجزمه براحته ، باحبكم يعني باحبكم !!!!
خلونا نفكر بعض بس بان امريكا هي الراعي الرسمي لاسرائيل !!! كده باختصار !!! ليه نتفكر ؟؟؟ علشان نعرف هي بتحب مين وبتكره مين !!!! ونفتكر انها في حرب اكتوبر نزلت الدبابات من البنتاجون راسا لسينا !!!! والسادات فهم اللعبه وقتها وقالك ميه في الميه من اوراق اللعب بايد امريكا !!! بمعني اخر امريكا لن تسمح بهزيمه اسرائيل علي يد مصر والعرب حتي لو اضطروا مش بس لنقل الدبابات بجسر جوي مباشر علي سينا لا لو اضطروا يعملوا اي حاجه وياما في الجراب ياحاوي !!!!
خلونا نفكر بعض كمان ان امريكا لما حست ان الحرب العالميه التانيه حتبوظ وهلتر حينتصر بقلب ميت وبارد ولم تطرف لها عين ضربت اليابان بقنبلتين نوويتين في هيروشيما ونكازاكي !!! ساعاتها مافكرتش في حقوق الانسان والبتندجان اللي بتتكلم عنه دلوقتي !!! الناس اتحرقت وماتت واليابان استسلمت وامريكا والحلفاء انتصروا وهلتر انتحر وبس خلاص !!!
محدش يقولي امريكا بتاعت زمان غير امريكا بتاعت دلوقتي !!! علشان الكلام ده بيجيب لي مغص !!!! لانه كلام مش حقيقي ومش صادق وبيعتمد علي اننا عندنا ذاكره السمك اللي بينسي قبل مايفتكر !!!! امريكا هي امريكا !!!!
امريكا فضلت تحارب في البلاد الاشتراكيه ، بصرف النظر عن راينا في الاشتراكيه ، وتكلمهم عن حقوق الانسان وحق التنقل وتزغلل عيون الناس هناك باللبان الشيكلتس والبنطلونات الجينز ، لغايه مالاشتراكيه وقعت والناس تصورت انها حتخش جنه الراسمالية ، والمافيا حكمت والناس ماتت من الجوع وباعوا الزئبق الاحمر والصواريخ النوويه والناس طلع عين اهلها ، لغايه مالدنيا استقرت نسبيا ، طيب دلوقتي اخبار حقوق الانسان ايه في روسيا والجمهوريات المرحومه ، طبعا امريكا ما بتجيبش سيرتهم خالص نهائي !!! والشعب الروسي ندغ لبان ولبس جينز وتنازل عن موقعه في العالم لصالح النظام العالمي الجديد اللي بتترأسه امريكا علي واحده ونص !!!!
امريكا وشعبها المتحضر اللي عمرهم 200 او 300 سنه في الكوره الارضيه ، ابادوا الهنود الحمر !!! عادي جدا مافيش مشكله ومحدش بيفتكر الموضوع ويتكلم فيه ، ونفتكره ليه ، ماهي امريكا عسل وهوليود عسلين والهنود الحمر اللي هما اسمهم اساسا السكان الاصليين للارض اللي استوطنها الامريكان ، السكان الاصليين راحوا في الوبا زي هنادي وهما الامريكان متعودنين علي كده ، ان يبقي فيه ارض فيها سكان اصليين ، يروحوا في الوبا ويعيش فيها الغرباء باعتبارهم بيعمروها ويستوطنوها (هي الحكايه دي تشبه قصتنا بتاع اسرائيل وفلسطين ولا حاجه)!!!!!!
امريكا وشعبها المتحضر اللي عمرهم 200 او 300 سنه في الكوره الارضيه ، خطفوا واسروا وشالوا الافارقه في المراكب وربطوهم بالسلاسل واعتبروهم ادوات انتاج زي الحمير والجواميس مش بني ادمين وشغلوهم في الجنوب يزرعوا القطن ويجروا المحاريت واللي يهرب يتضرب بالرصاص وعادي جدا مافيش موضوع ، ولما الشمال لاسباب مش عارفاها قوي قرر يحرر العبيد ، الجنوب دخل ضده حرب اهليه ، لان العبيد السود حيفضلووا عبيد سود ، دي سنه الحياه اللي حارب الجنوب الامريكي الشمال الامريكي علشانها ، وحتي لما الحرب خلصت وبقت امريكا هي امريكا اللي احنا نعرفها ، فضلوا يضطهدوا الزنوج النيجرو الافروامريكان ، لايخشوا مطاعم البيض ولا يركبوا اتوبيساتهم ولا يمشوا جنبهم ولا دول زي دول والطينه غير العجينه وطلعت جماعات كوكولكس وغيرهم ، جماعات عنصريه بيضاء تضرب الزنوج وتضطهدهم !!! حتقولي لي ده خلص ، حتي لو خلص ولو اني انا شخصيا مش مصدقه انه خلص ورايي ان جوا نفسياتهم مهما كذبوا وقالوا كلام تاني ، لكن حتي لو خلص ، هما استباحوا الافارقه واسروهم وخطفوهم واستعبدوهم ولما مابقوش عبيد بقوا مواطنين درجه عاشره يعانوا اشد درجات التمييز !!! طيب واوباما الاسمراني الحليوه اليس دليل علي انتهاء التمييز ، لا اسفه ، مش دليل علي انتهاء التمييز ، انما دليل علي ان التمييز لسه موجود ، ليه ، لان لما اوباما اترشح ونجح ، قالوا اول رئيس اسود ينجح ، لوكان مافيش تمييز ماكانوش خدوا بالهم انه اسود ولا ابيض ولا بنفسجي ولا كاروهات !!!!
امريكا دي شخصيا اللي قبضت علي الامريكان من اصول يابانيه ايام الحرب العالميه التانيه ، وحطتهم في معسكرات اعتقال لغايه مالحرب خلصت ، ماقالتش وقتها الكلام الفاشل بتاع كل الناس زي بعضيهم واحنا كلنا بنحب بعضنا ، لا ماقالتش كده ، قالت كلام وسخ تاني ، قالت انهم مواطنين مشكوك في ولائهم لامريكا وحبستهم في معسكرات اعتقال لغايه ما ضربوا اليابان القنبله النوويه والدنيا اتظبت من وجه نظرهم!!!!
امريكا دي شخصيا اللي فتحت معسكر جوانتينامو بعد 11 سبتمبر !!!! وفي جوانتيناموا حدث ولا حرج !!! نسيت وقتها حقوق الانسان وضمانات التحقيق وحقوق المتهم ، نسيت كل الكلام ده وضربته بالجزمه وعطلت القوانين والدستور لصالح اجراءات استثنائيه لحمايه امن المواطن الامريكي - من وجه نظرهم!!!!
امريكا دي شخصيا ، اللي بتسلح اسرائيل وبتهديهم القدس عاصمه موحده وبتتجاهل الحقوق التاريخيه للعرب الفلسطينين ، هي اللي بتسلحهم علشان يفضلوا العسكري ابو بندقيه بتاع امريكا اللي بيخوف الست ديه اللي هي العالم العربي طبقا للاغنيه الفلكلورية الشعبيه المصرية !!!
هي امريكا اتعمت في عينها لما اسرائيل احتلت ارض فلسطين ، لما هجرت الفلسطينين ، لما ضربت الناس في غزه بالاسلحه المحرمه دوليا والبودره الفسفورية البيضا والقنابل المسماريه العنقوديه الملهبيه !!! اتعمت في عينها لما اسرائيل كسرت لبنان فوق راس حزب الله وموتت الاطفال والستات والرجاله والكلاب والقطط !!!! قالت ايه طنط امريكا وقتها ، قالت عيب ياحماس !!! علي فكره انا مش مع حماس خالص ولا موافقه علي فكره الصدام العسكري بينها وبين اسرائيل وقت ضرب غزه حينما اعلن بتوع حماس انهاء الهدنه مع اسرائيل وهما عارفين ان نتيجه ده ضرب غزه وشعبها بعد الحصار الطويل ، لكن موقفي من حماس حاجه وفهمي لسلوك امريكا حاجه تانيه !!! وقتها امريكا اتعمت في عينيها هي وبتوع حقوق الانسان وحقوق الحيوان ومحدش نطق ولا قال عيب يااسرائيل ولا قال حنراقب الحرب ولا حنراقب الانتخابات ولا قالوا اي حاجه خالص !!!!!
امريكا والسفيره الملدوعه بتاعها هما اللي وزوا لصدام حسين يخش يحتل الكويت ويحولها للمحافظه 19 ولما وقع في الشرك بتاعهم وصدق كلامهم وضماناتهم انهم مش حيقربوا له ، اول مادخل الكويت ، صرخت امريكا واكويتااااااااااه وبسرعه بسرعه بقي صدام حسين هو الخطر علي الخليج وعلي السعوديه وعلي اصدقاء امريكا هناك وهوووووووووب لازم نحرر الكويت ونعمل تحالف دولي ونضربهم بالجزمه رساله لكل من تسول له نفسه احتلال الكويت !!! طيب ياجيش التحالف الدولي مافيش اخبار عن تحرير فلسطين ومعاقبه من تسول له نفسه احتلالها ، طبعا لا ، وهو ده وقته !!!! وضاعت العراق ، اتضربت واتقسمت واتحاصرت ولما جه وقت الجد ، طلع اختراع الاسلحه الممنوعه دوليا اللي البرادعي فتش عليهم ، وهوووووووب لازم نضرب العراق تاني علشان الاسلحه الممنوعه دوليا وهوب اضرب ياجدع والعراق احتلت بالجيش الامريكاني وصدام اتقبض عليه وضحوا بيه يوم العيد الكبير رساله للعرب والمسلمين مصيركم كده زي الخرفان تدبحوا يوم العيد!!! و اتحررت العراق من صدام حسين واحتلت بالجماعات الدينيه المتطرفه شيعه وسنه وبقي فيه دوله اكراد ولسه المخطط بيشتغلوا عليه علشان لما الضرب والتفجيرات تكتر ، تنقسم دوله العراق سابقا لتلات دوله ، شيعه ستان وسنه ستان واكراد ستان !!! وكله بالايدين الخضره بتاعت امريكا !!!! طيب وقت مااحتلت العراق ، المعارضه العراقيه كانت حتموت من الانبساط ، اولا كان فيه معارضه عراقيه في امريكا بيسمنوهم لليوم الجميل ده ، ولما جه اليوم ، حموهم ولبسوهم بدل وتاييرات وطلعوهم في التلفزيون ، ادي المعارضه العراقيه العظيمه !!! والمعارضه العراقيه التانيه بقي اللي كانت جوه العراق كانت مقهوره من صدام حسين وديكتاتوريته ، فقررت امريكا ترحمهم من تلك الديكتاتوريه ، ودخلت دكت بغداد بالدبابات والمدافع والصواريخ ، ويوم ماتحررت العراق العظيمه ، الشيوعين العراقيين رفعوا اعلامهم الحمرا فوق الدبابات الامريكاني اللي حررتهم من صدام حسين !!! وادي العراق النهارده منيله بستين نيله ، ممزق طائفيا وبلا حكومه والكل بيعمل فيها اللي هو عايزه ، وادي اخره الاستقواء بالخارج وحقوق الانسان والقرف والزفت والبضاعه المضروبه اللي بتبيعها امريكا لينا ، طيب العراقيين مبسوطين دلوقتي ، طيب ربنا يبسطكم كمان وكمان!!!
طبعا بعد 11 سبتمبر ... امريكا اعلنت الحرب علي الارهاب ، وضربت افغانستان علشان تضرب القاعده ، مع ان القاعده دي بتاعتها وصنيعه ايديها وهما اللي سلحوها ودربوها في افغانستان وباكستان ايام الاحتلال الروسي للافغانستان !!! الحقيقه اني شايفه ان امريكا عمرها ماكانت في صراع حقيقي مع القاعده، لان الاقمار الصناعيه اللي كانت بتشوف صدام حسين لابس ملابس داخليه نمره كام ، اكيد تعرف علي الاقل تشوف جلابيه بن لادن وتعرف هو قاعد فين ، لكن هما مش عايزين يلاقوه ، ويلاقوه ليه ، اذا كان بن لادن بيشتغل لصالحهم وبينفذ مخططاتهم بمنتهي البراعه !!!!
امريكا بعد انتهاء الحرب البارده والصراع السوفيتي الامريكي ، بقت محتاجه عدو !!!! عدو يخلي احتكارات السلاح ومصانعه تشتغل وتنتج ، والحرب العالميه لعبه ماعداتش تنفع ، لان دول كتير امتلكت النووي واللعب بالنووي يعني ان الفيلم حيخلص علي الكل ومافيش منتصر ومهزوم ، طب ايه يعني ، نبطل حرب و نقضيها افلام وفسخ واكل ومرعه وقله صنعه ، لا طبعا ، اولا فيه حروب اقليميه حتقوم هنا وهناك واحنا حنسلح ونمول والمصانع حتبيع !!! وفيه حرب عالميه ضد الارهاب ، والارهاب اللي ضرب ابراج التجاره العالميه في 11 ستبمبر وهدد الامن القومي الامريكي ، ممكن يهدد اي دوله واي رئيس فلازم كله يحرص علي لغاليغه ويتسلح لغايه زوره وفوق زوره شويه كمان وزغرطي ياللي ماانتيش غرمانه ، المصانع والاحتكارات بتاعت التسليح دارت والدول اشترت ، ودخلت تحالفات عسكريه علشان مقاومه الارهاب وطبعا اي تحالف بقياده امريكا والامم المتحده اختها وحبيبتها !!!!
طيب ، بس كده ، الارهاب مطلوب لامريكا بس علشان حروب وسلاح !!! لا طبعا !!! اه نسيت ااقول حاجه ، طبعا الارهاب يدي امريكا الذريعه - رغم ان وشها مكشوف ومش عايزه ذرائع - انها تضرب اي حته في العالم وتأدبها ، اصل في بلاد تركب الافيال لقوا ايميل بيقول ارهاب ، اصل في منشور بيقول ارهاب ، اصل فيه راجل مستخبي من القاعده او الواقفه ، اضرب ياجدع !!!! الارهاب بيدي امريكا ذريعه عظيمه للضرب !!! يبقي مطلوب ليها جدا !!! وطول ماهو مطلوب ، عمر بن لادن ما حيبان ولا عمر الاقمار الصناعيه حتشوف ملابسه الداخليه ، ليه لانه متأمن جوه البنتاجون شخصيا او في اي مكان تابع له ، له دور ووظيفه عظيمه امريكيه عظيمه !!!! طيب لو امريكا بطلت تحتاجه ولقت لعبه تانيه تلهي العالم فيها غير موضوع الارهاب ، ساعاتها الاقمار الصناعيه حتزمر وبن لادن حيظهر وحيحاكموه او حينتحر او حد حيقتله قبل ما يحاكموه ويموت هو واسراره واسرار امريكا !!!!
اذن الارهاب الاسلامي والتنظيمات المتشدده مطلوبه لامريكا علشان مصانع السلاح تدور واحتكارات السلاح تكسب وعلشان تديها ذريعه في اي وقت تضرب اي حد هي عايزه تضربه !!!!
بس كده ....
لا طبعا ، لسه ليه دور تاني عظيم وبالذات في العالم العربي سابقا !!!!
العالم العربي سابقا ، من ايام تكوين الجامعه العربيه وبعدين ايام عبد الناصر ، وارفع راسك يااخي انتهي عهد الاستعمار والقوميه العربيه واللغه والمصير المشترك ، من الوقت ده ، اصبح مؤهل في ظروف ما ، لان يكون له قوه اقليميه مهمه جدا ، والعالم العربي راكب افريقيا من ناحيه وقاعد تحت تركيا وجنب ايران من ناحيه تانيه ، وماسك الخليج والمحيط !!! ودول ناس علي اختلاف الاعراق والملل والاديان ، لهم حضاره وثقافه وتاريخ ، لو اتوحدوا يغيروا التوازن في العالم ، وده يضايق طبعا امريكا ، امريكا ماكانش عندها مانع يتوحدوا ولا يتنيلوا علي عينهم لو كانوا رجالتها وتبعها !!! لكن هي مش ضمناهم ، مش ضامنه يطلع فيهم صلاح الدين الايوبي تاني ولا عبد الناصر تاني ولا حد احسن من الاتنين ، يوحدهم ويقول لهم انتم قوه وليكم ثروات وتاريخ وحضاره وكثافه سكانيه ، واذا كانت اوربا بتتوحد والولايات الامريكيه اتوحدت اساسا اشمعني انتم !!!! يانهار فحلوقي ، العرب يتوحدوا ويبقي قوه اقليميه تنافس اوربا وتحط راسها براس امريكا وهي مش تبعهم !!! ايه ويرجعوا يحتلونا تاني ويبقي فيه اندلس تاني ودوله محمد علي تاني اللي احتلت جزيره كريت والشام وشبه الجزيره لغايه مااتكسرت في معركه نفارين 1840 ؟؟؟ لا والف لا !!!!!
طيب اولا ، نحط وسط العرب شوكه في قلبهم اسمها اسرائيل ودايما نخليها اقوي منهم واكثر تسليحا وعامله ليهم زي البوبع ووقت الجد كلنا ايد واحده يابهجت ضد العرب !!!!
ثانيا ... بعد عبد الناصر ، اللي هي تجربه القوميه العربيه قصيره العمر ( بالنسبه لعمر الشعوب ) والتي استطاعت خلال 15 سنه فقط تغير وجه التاريخ والجغرافيا في افريقيا واسيا وتعمل باندونج وعدم الانحياز وتدعم ثوره الجزاير والخليج الثائر وتمد ايد العون لافريقيا لتتحرر وتستقل في دول اصبح لها علاقات وثيقه بمصر ، بعد ده ماينفعش نسيب الناس دي قاعده كده مع نفسها مبسوطه !!! حتي لو كانت الدول العربيه بينهم خلافات النهارده ، مانضمنش بكره يحصل ايه ، بالذات ان الشعوب العربيه لسه شايفه انها قوه واحده ولما غره بتتضرب بتطلع مظاهرات في تونس واليمن ومصر ، ولسه الشعوب العربيه بتسال اسئله عاطفيه من ماركه فين جيش الدفاع العربي وفين الحكام العرب !!! اذن ماينفعش نسيبهم كده !!! وماينفعش نسيبهم ممكن يتوحدوا او يحلموا بالوحده ولو بشكل عاطفي !!! امال حنعمل ايه ؟؟؟؟
تظهر هنا اولا مقوله امريكيه اوربيه اسمها الشرق الاوسط !!! الشرق الاوسط تعبير جغرافي يضم الوطن العربي او العالم العربي سابقا واسرائيل !!! والا قولوا لي ماهو الشرق الاوسط ، مين الدول اللي يطلق عليها انها دول شرق اوسطيه !!! هي العالم العربي واسرائيل !!! فاولا عبر سنوات طويله ، تمرر امريكا تعبير الشرق الاوسط بديلا للعالم العربي لغايه مالعرب تنسي انها عرب وتصدق حكايه الشرق الاوسط !!! ثانيا ، تشتغل امريكا بنظريه فرق تسد ، النظريه الاستعماريه العظيمه التي تشعل الحروب والفتن ، فنلاقي الجزاير والمغرب يتخانقوا ويحاربوا بعض علشان البوليساريو ، ونلاقي العراق تحتل الكويت فالعالم العربي كله يبقي ضدها وضد الاردن ومنظمه التحرير اللي وقتها كان بيأيدوا الوحده العربيه ولو كانت قسريه وقهريه علي شعب الكويت !!!! وفجأ العراق تضرب السعوديه صاروخ فالسعوديين يقولوا الحقينا ياامريكا وبعدين مصر تضرب ليبيا في لحظه ما لاسباب انا شخصيا مش فاكراها قوي ايام السادات و..... وننقسم احلاف ومحاور ، ويبتدي العالم العربي اللي كان عالم ووطن وبقي دول بتكره بعض ، فجأ ننسي اننا عالم عربي او وطن عربي ونبقي شرق اوسط !!! كويس ........... لا مش كويس !!!!
لان حتي الشرق الاوسط اللي رسم حدوده مستر سايكس ومسيو بيكو 1905 مش جاي علي مقاس مسزززز كوندليزا رايس وامريكا ، فالامريكان يقرروا يدبوا مقصهم في القماش يفصلوا بدله سمونكج علي مقاسهم من ام الشرق الاوسط ، فيقولوا واسرائيل عماله تعزق في لبنان وتهدها علي راس اللبنانيه وحزب الله ، تقول ده مخاض ميلاد الشرق الاوسط الجديد !!!! وهو ام الشرق الاوسط الجديد ده مين امه ومين ابوه ياولاد الحرام !!!! مين اللي قرر يبقي فيه مخاض وولاده !!!! اللي قرر ده امريكا اللي بتحبنا قد العمي !!!
وهوب يطلع الساحر من جرابه خريطه الدم ..... وخريطه الدم دي موضوع وسخ كده ، عباره عن خريطه جديده لمنطقه الشرق الاوسط بيقسمها من جديد علي اسس دينيه وعقائديه http://amar18359.blogspot.com/2008/09/blog-post_7885.html ... بس لما بيقسمها من جديد بيقسمها علي اساس تبقي دول دينيه طائفيه عقائديه وده الحقيقه يحقق لامريكا حاجات كتيره حلوه قووووي ...
اولا - يحقق لها ان الدوله اليهوديه تبقي عاديه جدا وسط جيرانها الدول السنيه والشيعيه والقبطيه والمارونيه وكلنا في الخرايط دول دينيه !!
ثانيا - يحقق لها ميزه عظيمه الان وغدا والي الابد ، ان الانقسامات دي مش حتم طبعا الا بحروب وبلاوي ، فالعرب يموت منهم اللي يموت وقواهم كلهم تضعف ضعف رهيبه وماتقوش ليهم قومه تاني علي راي جدتي !!!
ثالثا - يحقق لها ميزه عظيمه كمان ، ان كل الدوله المنيله دي العقائديه الطائفيه الدينيه حتكون بتكره بعض جدا ومتصارعه جدا ومتربصه ببعض دايما ومستعده تخش في حروب طول الوقت ، ليه ، لان كل واحد بيدافع عن ربنا بتاعه ودولته في الارض !!!!!!
ومع ده وده وده ، قالوا برضه نظريه الفوضي الخلاقه والثورات البرتقاليه البنفسجيه ، ايه ياعم النظريه دي ،هي نظريه اشاعه الفوضي في المجتمعات واحداث التغيير السياسي فيها من خلال اليات الفوضي ، ليه ، لان امريكا مش عايزه تغييرات بجد ، مش عايزه تغييرات تهدد مصالحها ، يعني مش عايزه الشيوعين يحكموا ولا الاشتراكيين يحكموا لان ده يهدد مصالحهم ، لكن عايزه تبقي قادره دايما علي شقلبه الدنيا في اي دوله من بلادنا راسا علي عقب ليه .... نقول بسرعه ليه ، لان بجد بجد لو الاوضاع الاقتصاديه والاجتماعيه والسياسيه ساءت جدا والناس بقت غاضبه جدا علي النظم الحاكمه واسلوبها ، واللي هي بتحكم من المحيط للخليج بالرأسماليه واليتها ، ممكن نظريا هذا الغضب يستثمر في اتجاهات امريكا ماتحبهاش ، وده يضرب مصالحها اساسا ، اذن مافيش تغيير بجد ، فيه راسماليه بعمه او بدقن او مودرن او رجعيه ، المهم انها راسماليه يعني رأسماليه ، والمهم ان اي نظام سابق وحالي وجاي ورايح يحقق مصالح امريكا ، طيب لو النظام الحالي في اي حته الناس كرهته ، نضحك عليهم ونعمل فوضي خلاقه ونجيب نظام تاني رأسمالي برضه يحقق مصالح امريكا برضه ، بس علي مالناس تاخد بالها يكون عدي سنين وسنين.....
اذن ........... امريكا الاول قالت شرق اوسط ، ثم شرق اوسط جديد ، ثم خريطه الدم ثم الفوضي الخلاقه!!!!
ايه علاقه ده كله باللي كنا بنتكلم فيه من قبل بشويه ... علاقته بالارهاب وبن لادن والتنظيمات الدينيه المتطرفه !!!
للاسف دي السكاكين اللي بتقطع بيها امريكا الخرايط بتاعتنا وترسم خرايط جديده !!!!
حتي لو افترضنا ان التنظيمات الاسلامية الدينيه المتشدده جدلا انهم مصدقين اللي بيقولوه وبيعملوه ومش عارفين انهم سكاكين امريكا اللي بتقطع بيهم في لحمنا !!!! لا هما كده .. ليه ؟؟؟ نشوف الواقع بيقول ايه ..
لما بن لادن ضرب ابراج التجاره العالميه ، اتضربت افغانستان ، وبعدين العراق !!!
العراق احتلت واشيعت فيها الفوضي ، والمعارضه اللي كانت في امريكا ، قطعت العراق زياده وفجأ بقت العراق مجموعات مسلحه ارهابيه دينيه مره يموتوا الشيعه ومره يموتوا المسيحين ومره مش عارف ايه ، خلاص البلد مش حتقوم لها قومه وفي يوم من الايام حتتقسم لدول علي ايد العصابات الدينيه المسلحه اللي بتمارس الارهاب الديني ضد غيرها من المواطنين المختلفين معاها دينيا !!! لم يعد هناك وطن ، بل اصبح فقط هناك مشروع تقسيم جاهز مستني الخطوه الاخيره !!!!
السودان .... السودان 1980 حكمها البشير ، اللي فجأ قرر يطبق الشريعه الاسلاميه في السودان وتحالف مع الترابي وتطبيق الشريعه قالوا علي كل السودانين مسلمين ومسيحين ولا دينين ، ياجدعان يرضيهم يهديكم ابدا ، الجنوب غضب لان فعلا فيه تصرفات تعسفيه طائفيه وبتوع الامم المتحده وحقوق الانسان وقفوا مع الجنوب طبعا ضد التعسف الطائفي وحرب اهليه و2 مليون قتيل و4 مليون جريح وشريد وهوب بعد 30 سنه ، يبقي فيه استفتاء علي انفصال الجنوب دوله علمانيه مسيحيه عن السودان( ويقول جيمس كوبنال مراسل بي بي سي في الخرطوم إن فرض الشريعة الاسلامية على الجنوب غير المسلم كان احد مسببات الحرب الاهلية التي لم تنته الا بالتوقيع على اتفاق نيفاشا للسلام عام 2005.- مقتبس بالنص من الانترنت)
بن لادن زعيم القاعده الاسلاميه الارهابيه كما يحلو للامريكان وصفه هو شخصيا وتنظيمه القاعده صنيعه الامريكان( لم يأت أسامة بن لادن الذي اعتبره شخصية الحقبة الأولي من هذا القرن الـ‏12‏ من تلقاء ذاته‏,‏ أو من صنع نفسه‏,‏ وانما ولد هو وغيره من مئات المجاهدين في رحم صراع القوتين العظميين في حرب المواجهة بسبب أفغانستان‏.‏....... درس أسامة بن لادن في جامعة الملك عبدالعزيز في جدة وحمل بكالوريوس الاقتصاد استعدادا لدوره في إدارة أعمال شركة الأسرة‏,‏ لكنه بدلا من ذلك لبي نداء دعوة الجهاد ضد أعداء الإسلام الذين حاولوا قهر المسلمين في أفغانستان‏.‏...... هذه الدعوة أطلقتها الولايات المتحدة‏,‏ التي برغم مرور ثلاثين سنة عليها‏,‏إلا أنها لم تفرج وأظنها لن تفرج عن وثائق هذه الفترة التي تلت غزو الاتحاد السوفيتي لأفغانستان‏,‏ والدور الخفي الذي قامت به‏,‏ وكان من آثاره تنظيم القاعدة الذي أنشأه أسامة بن لادن‏.‏.... مقتبس بالنص من الانترنت) هذا البن لادن صنيعه الامريكان الترابي يوصف الحرب الاهليه بين الشمال والجنوب بانها الحرب الجهاديه باعتبارها حرب دينيه ، وطبعا لما يتقال عنها حرب جهاديه بين المسلمين والمسيحين والادينين ، يبقي ده ادعي ان الجنوبين يقرروا ينفصلوا !!!! وهكذا بفضل بن لادن والترابي والبشير والتشدد الاسلامي وبعد ثلاثين سنه من وصول البشير للحكم ، اصبح الجنوب السوداني جاهز للانفصال ، كدوله علمانيه مسيحيه واصبح الشمال جاهز ليكون دوله اسلاميه ( أعلن الرئيس السوداني عمر حسن البشير أن الشريعة الاسلامية ستصبح "المصدر الرئيسي" للدستور السوداني في حال انفصال الجنوب بعد الاستفتاء المقرر في التاسع من يناير/كانون الثاني المقبل على حق تقرير مصير جنوب السودان. وقال البشير في كلمة ألقاها في مدينة القضارف شرق السودان .. اذا اختار الجنوب الانفصال سيعدل دستور السودان وعندها لن يكون هناك مجال للحديث عن تنوع عرقي وثقافي وسيكون الاسلام والشريعة هما المصدر الرئيسي للتشريع - مقتبس بالنص من الانترنت) ...
اذن ... الترابي وبن لادن وتطبيق الشريعه الاسلاميه علي الجنوب المسيحي واللا ديني ، ادي عبر عمليات معقده من الحروب والصراعات لقسمه السودان لدوله مسيحيه ودوله مسلمه ( اول تنفيذ عملي وتطبيق عملي لخريطه الدم التي تتبناها امريكا للشرق الاوسط الجديد ) ، الم اقل انهم السكين الذي يمزقوا ابداننا به ويرسموا حدود خريطه الدم!!!..
اذن تحتاج امريكا ومخططاتها الاستراتيجيه ومصالحها ، تحتاج لما يسمي الارهاب الاسلامي والتطرف الاسلامي لاستخدامه كاهم ادواتها لاعاده ترسيم الحدود وتقسيم المنطقه لكانتونات طائفيه وتنفيذ خريطه الدم علي ارض الواقع العربي سابقا الشرق اوسطي حاليا ( في موقع مجلة القوة العسكرية تموز 2006 , نشرت خارطة جديدة للشرق الأوسط بمقال معنون (حدود الدم) , حددت ملامح جديدة لخارطة شرق أوسطية جديدة والتقرير يفترض إن الحدود بين الدول غير مكتملة وغير نهائية , خصوصا في قارة إفريقيا التي تكبدت ملايين القتلى وبقيت حدودها الدولية بدون تغيير والشرق الأوسط الملتهب والمتوتر منذ عقود, هذه الحدود التي شكلت أوربيا (الفرنسيون والبريطانيون ) في أوائل القرن العشرين، من الدولتين اللتين كانتا تعانيان من هزائمها في القرن التاسع عشر فكان التقسيم عبئا عليها وجاء من عدم الإدراك لخطورة هذا التشكيل الذي قسم قوميات على جانبي الحدود وأصبحت كتلا قومية كبيرة ومبعثرة على جوانب الحدود لعدة دول ,وقد يضم الكيان السياسي المستقل اثنيات وطوائف متناحرة ...أن حدود الشرق الأوسط تسبب خللا وظيفيا داخل الدولة نفسها وبين الدول من خلال إعمال لا أخلاقية تمارس ضد الأقليات القومية والدينية والأثنية .أو بسبب التطرف الديني أو القومي والمذهبي.أن لم الشمل على أساس الدين والقومية في دولة واحدة لن يجعل الأقليات سعيدة ومتوافقة, إن القومية الخالصة أو الطائفة وحدها يمكن تجد مبررا لتغير الحدود ولتشكيل كيان سياسي لها كما يفترض التقرير - مقتبس بالنص من الانترنت) ..
طيب ..... التنظيمات الاسلاميه المتشدده في مصر وخارج مصر ، من اول السلفيين لغايه القاعده في العراق والقاعده في فلسطين ، بيثيروا الصراع الطائفي في مصر بين الاقباط والمسلمين ، وبيشتموهم ، وبيقولوا ماتسلموش عليهم .... الاقباط يصرخوا غضبا من الاضطهاد ومن التمييز اللي السبب فيه هؤلاء المتشددين اللي لعبوا في رؤوس الناس وعقولهم ، الاقباط يصرخوا غضبا والعالم يتضامن معهم بما فيهم نحن المصريين الغاضبين من التمييز ضد الاقباط ، فكلنا مصريين لنا نفس الحقوق ونفس الواجبات ، وفجأ بابا الفاتيكان يتحدث عن اضطهاد الاقباط وساركوزي يتكلم عن اضطهاد الاقباط واوباما يلمح من بعيد ، وفجأ اقباط المهجر اللي معظمهم عايش في امريكا - زي معارضين العراق كده - فجأ يعلنوا انهم ناويين يعلنوا دوله قبطيه في مصر ( أعلن بعض النشطاء من أقباط المهجر استعدادهم للإعلان الرسمي عن الدولة القبطية بالتزامن مع اعلان دولة جنوب السودان ... مؤكدين أن الدولة الجديدة شكلت من خلال هيئة تأسيسية من مائة قبطي في الداخل والخارج - مقتبس بالنص من الانترنت -http://freecopts.net/arabic/2009-10-15-12-56-17/2009-07-01-03-25-21/8432-2011-01-09-10-06-51 ) ..... اذن اقباط المهجر عايزين يعلنوا دوله قبطيه في مصر ... ودولتهم المزعومه ليست الا جزء من خريطه الدم التي تتبناها امريكا ، والذي يدفع الاقباط للانفجار غضبا من التمييز والعنف الطائفي هم التنظيمات الدينيه المتشدده التي تراعاها امريكا لانها تحقق لها مصالحها وهم يخدموا امريكا ومصالحها حتي لو كانوا لايعرفوا .....
انفصال جنوب السودان عن شماله لم يتسبب فيه الا الترابي وبن لادن والبشير وتطبيق الشريعه الاسلاميه بطريقه متعسفه خاطئه علي المسلمين والمسيحين والجنوبين اللادينين ، لكن ذلك الانفصال ارضي امريكا واسعدها وحقق مصالحها ونفذ خريطه الدم علي ارض الواقع العربي لاول مره تنفيذ واقعي ، فالعراق مازال الطريق امامها طويل ، نعم وضعت علي الطريق لكنه مازال طويل ويحتاج وقت واحتقان طائفي وعنف وقتل وحروب اهليه حتي ينفذ ، وتنفيذ خريطه الدم علي ارض الواقع السوداني تم بسكين الترابي والبشير وبن لادن الذين حققوا مصالح امريكا !!!! فولا ذلك التشدد الديني المتعسف ما طرح ابدا انفصال الجنوب عن الشمال السوداني ...( على صعيد آخر، بعث الرئيس الامريكي باراك اوباما برسائل الى رؤساء الدول المجاورة للسودان عبر فيها عن التزام الولايات المتحدة باجراء استفتاء سلس في جنوب السودان.ويبدو ان الرئيس الامريكي يحاول تشجيع هؤلاء الرؤساء للضغط على الخرطوم لضمان اجراء الاستفتاء في موعده واحترام نتيجة التصويت.وبهذا الصدد، قال مايك هامر، الناطق باسم مجلس الامن القومي الامريكي، "لقد اوضح الرئيس اوباما بجراء ان السودان يشكل احد اولويات الادارة الامريكية، ويحدونا الامل بأن يتمتع شعب السودان بالامل والسلام والرخاء -مقتبس بالنص من الانترنت ) .... ولولا التطرف الديني والافكار السلفيه والقنوات الفضائيه التي تروج للتمييز الطائفي والعنف الطائفي ولولا التفجيرات الطائفيه ماوجد اقباط المهجر الذين يعيشون في امريكا واوربا الموحده ، ماوجدوا ذريعه للقول بفكرتهم الطائشه عن اعلان دوله قبطيه في مصر ، وماوجد بابا الفاتيكان وساركوزي واوباما مبررات للتدخل في الشأن المصري والمطالبه بحمايه الاقباط ، اليوم حمايه وغدا دوله منفصله عن مصر !!! نعم اقباط المهجر طرحوا اليوم فكره دوله الاقباط كمجرد فكره حمقاء ولم يأخد احد كلامهم باي جديه ، ربما بعد مائه سنه من الاحتقان الطائفي والعنف والتفجيرات التي تمزق المصريين وارواحهم واجسادهم اقباط ومسلمين ، ربما بعد مائه سنه ، او اقل ، يصبح انفصال الدوله القبطيه عن مصر امرا وارد وممكن ومقبول لجميع الاطراف التي سيكون التشدد والعنف الطائفي قد انهكها وانهك ارواحها بحيث تعتبر ذلك الانفصال هو الحل الممكن الوحيد ، وقتها ستكون امريكا قد حققت نصرا واقعيا علي ارض الواقع المصري ونفذت خريطه الدم وقسمت مصر الدوله العريقه صاحبه الحضاره والتاريخ لكانتونات طائفيه متصارعه ، سيما ان فكره دوله اهل النوبه ايضا فكره تطرح نفسها ، علي استحياء الان نعم - لكن اذا طرح فكره الانفصال الطائفي العرقي وقتها ، والحمد لله حاكون مت وشبعت موت - وقتها سيطرح المصريين من ابناء النوبه ايضا انفصالهم عن مصر !!!! اذن العنف الطائفي مطلوب لامريكا لتنفيذ مخططاتها لاعاده ترسيم المنطقه ورسم حدودها وتنفيذ خريطه الدم علي ارض الواقع ، والعنف الطائفي لايمكن يتم الا بوجود تيارات دينيه متشدده سواء مصريه او عالميه وهذه وتلك ليست بعيده عن الصناعه والرعايه الامريكيه !!!!! لماذا تروج قناه الجزيره التي تبث من قطر التي تستضيف القاعده الامريكيه العسكريه وذات العلاقات الاسرائيليه الوثيقه ، لماذا تروح للتيارات الدينيه المتشدده وتدافع عنها !!! لان كلما قويت تلك التنظيمات واشتد ساعدها اشتد العنف الطائفي والصراع الطائفي واقترب حلم خريطه الدم الذي يحقق مصالح امريكا وستها وتاج راس قطر كمان من ارض الواقع!!!!
هل افلحت وقلت اي شي مفيد او مهم او له معني ...........
يوم الاستفتاء علي انفصال السودان ، انجلت بصيرتي وشاهدت كل مايحدث !!!!
خريطه الدم ....
الصراعات الطائفيه المطلوبة لتنفيذ تلك الخريطه علي ارض الواقع
التشدد الديني في السودان افرز دوله الجنوب المنفصله بعد ثلاثين سنه !!!!
التشدد الديني في مصر مطلوب لوضع فكره دوله الاقباط في مصر علي ارض الواقع !!!!!
طيب ............. الفوضي الخلاقه التي تروج لها امريكا ، يترتب عليها في مصر انفلات الامور وفك قبضه الدوله عن الوطن ، وحين تفك قبضه الدوله عن الوطن ، يتصرف المواطنين وفقا لانتمائتهم الدينيه باعتبارها الملاذ والحمايه ، فاذا ضربت الفوضي الخلاقه في مصر اعاصيرها ، وفكت قبضه الدوله عن الوطن لا قدر الله ، وقتها ، سيزداد التطرف الديني عنف وحده ، ويزداد الاضطهاد والاحتدام الطائفي وتصبح فكره دوله الاقباط فكره مقبوله بل ومرحب بها وتمزق امريكا قلبنا ووطنا بسكاكين التطرف التي تحميه وتسانده وتدافع عنه !!!!! لذا وقتما اخاف علي الوطن من الفوضي الخلاقه ، لاادافع عن حكومه ولا نظام ، بل ادافع عن الدوله المصريه التي تسعي امريكا وهي مبتسمه وبدم بارد لتمزيقها ولو بعد سنين طوال !!!!
انهم يتلاعبون بنا وبوطننا ويسعون لتمزيقه وهم مبتسمين ويدعون انهم اصدقائنا ويحبونا!!!
يضربون كرات البلياردوا ببعضها فتصل للنتيجه التي يرغبوها دون ان يلوثوا ايديهم بدمائنا !!!
انهم يعتبروا حياتنا واوطاننا رقعه شطرنج ويحركونا وفقا لخططهم العسكريه والاستراتيجيه ويمزقونا وخرائطنا واوطاننا وهم يلعبون !!!!
انهم يحيطونا بالمؤامرات والفتن وتمتد اصابعهم القذره في كل شق ، يغلقوا هذا الطريق امامنا فتجري المياه في طريق اخر سهل يعرفوا هم اخرته السودا ، يحرضوا بعض الناس علي الكلام اللغو والبعض الاخر علي الصمت المهين ويدفعوا بعض الناس للتهور والحماقه ويدفعوا بعض الناس لردود افعال عنيفه ، ويتصور الجميع انهم فاعلين وهم في الحقيقه مفعول بهم وينفذوا وفقا لنظريه المؤامره الادوار المرسومه لهم بكل دقه !!!!
هل قلت شيء !!!!
طيب اخر حاجه بجد نفسي اقولها ، اني باحب الوطن ده قوي وباخاف عليه قوي ونفسي كل الناس تخاف عليه وتحافظ عليه !!!! خلوا بالكم منهم عايزين ايه وبيعملوا ايه علشان يوصلوا له ، كلما حافظنا علي وحدتنا الوطنيه والمواطنه ، كلما افسدنا مخططاتهم الشريره الحقيرة !!!!
ولعنه اللي علي امريكا والشرق الاوسط الجديد والفوضي الخلاقه !!!!
واختم كلامي بقول شافيز مره ثانيه !!!!
أكبر خطر على كوكب الأرض هو حكومة الولايات المتحدة الأمريكية !!!