04 يناير 2011

حواديت فلكولورية .... بتصرف !!!!

كلام تخين قوووووووي في السياسه
كله رموز واسقاطات ومعاني خفيه سريه
حواديت فلكوريه بتصرف !!!



( 1 )
الطفل الصغير والسكينه الجديدة !!!

يحكي ان .....
اتنين ستات اتخانقوا علي طفل صغير رضيع
كل واحده قالت ده ابني
حكيم الزمان قال خلاص نقسمها بالنص
يابالطول يابالعرض
كل واحده منكم تاخد نص ويبقي الكل مرضيين
وانتم احرار وانا ديمقراطي ، نقسمها بالطول ماشي ، نقسمها بالعرض ماشي ..
انتم تقرروا وانا حاقسم
وضحك ضحكه بريئه معجب بديمقراطيته الجميله
وجاب سكينه حلوه جديده محدش استعملها قبل كده
وقرر يقسم الطفل البري نصين
سكينه جديدة نوووووووووفي بتلمع ووراها للاتنين ستات
وقال لهم ايه رايكم
شايف انا بحبكم ازاي ، حاقسم الطفل الجميل بينكم بالسكينه الجديده الحلوه النوووووووفي
الام الحقيقه صرخت وقالت لا مش عايزه نص ولاعايزه كل
خلوه عايش وادوه للست التانيه
الست التانيه النصابه ، وافقت علي الحل ، ماهي لاحملت ولا طلقت ولا فارق معاها
ونص طفل احسن من مافيش !!!!
و......... هيه هيه
توته توته .... خلصت الحدوته
والحكيم قال ندي الطفله للام الحقيقيه والام المزورة نقول لها ماتعمليش كده تاني !!!!!
الام الحقيقيه قالت ياضنايا اتكتب لك عمر جديد
الام النصابه قالت خيرها في غيرها ياما عيال كتير ممكن نقسمهم نصين واهو دراع ورجل احسن من قلته !!!!



( 2 )
الزمار والمصيبة !!!!


يحكي ان .....
كان فيه زمار عسل ، ماسك ناي وبيعزف عليه عزف جميل
ليل ونهار يعزف ، نهار وليل يعزف ، نغماته حلوه وبتسحر الحجر
الناس اتعودت علي عزفه وادمنته
اصل الناس دماغاتها بتوش وششش وششش
لابتسمع مزيكا ولا بتفهم فيها
دماغاتها فاضيه وبتوشش وششش وششش
واعزف ياحاج ، اعزف يامقدس ، اعزف يابابا ، اعزف ياعسل
وبناء علي الحاح الجماهير اللي نفسها حد تاني يعزف لان نفسها مقطوع مش قادره تعزف
مش قادره تعزف ولا عارفه تعزف ولا عايزه تعزف
بناء علي الحاح الجماهير اللي دماغها فاضيه وبتوششش وششش وششش
رجع الزمار العسل يعزف ويعزف ....
وساعتها الناس قررت ماتسيبوش بقي
وراه خطوه بخطوه
هو يمشوا وهما يمشي وراهم
شمال وهما وراه ، يمين وهما وراه
لورا هما وراه ، لقدام هما وراه
والنغمات جميلة ، والناس مسحورة
عاليه والناس مسحورة
واطيه والناس مسحورة
الناس اتسحرت ، المزيكا كلت مخها وعقلها
ماهي اكيد مزيكه العازف احسن من الوشششش وشششش وشششش
شرقي الناس مسحورة
غربي الناس مسحورة
تواشيح الناس مسحورة
روك وموك الناس مسحورة
ولما اتأكد الزمار العسل ان الناس اتسحرت وبقت خاتم صغير في صباع رجله
مشي بيهم علي البحر ، او النيل ، او البحيره ، او من فوق الجبل ، او وسط الحريقه
مشي بيهم لمصيبه !!! وهما مبسوطين وماشيين وراه
المصيبه شكلها ايه ، مش مهم ، فين ، مش مهم ، تتعمل ازاي ..
مش مهم ، المهم انه خادهم ومشي بيهم للمصيبه
وهما مسحورين واللي بيرقص واللي بيذكر واللي بيغني واللي بيطبل واللي بيصوت مبسوط واللي بيصوت زعلان
وهووووووووووووووب
رماهم في النصيبه !!! وماتوااااااااااااااا
وهيه هيه هيه .............. راح حته تاني يزمر !!!
وتوته توته ...... خلصت الحدوته ياحلوين !!!!



( 3 )
الحمار والحمير !!!!

يحكي ان
كان الراجل جحا المجنون ، وابنه المجنون
ماهو طبعا جحا لانه مجنون لازم يكون ابنه مجنون
ماهو المجنون لازم يخلف مجنون
مين قال ، انا قلت ، انا حره ، دي المدونه بتاعتي واكتب فيها اللي انا عايزاه ...
المهم .... جحا وابنه اشتروا حمار !!!!
ماهو محدش يستحمل جحا المجنون وابنه المجنون غير حمار !!!!
اشتروا حمار من السوق وقرروا يروحوا بيتهم ....
الناس في السوق كتيره ولتاته وفاضيه مش لاقيه حاجه تعملها
اللي باع باع واللي اشتري اشتري
والمفلس ابن كلب مابيشتريش حاجه
واللي معاه فلوس مستخسر يدفعها للمفلسين
يعني باختصار الناس فاضيه وماورهاش حاجه تعملها
والفاضي يعمل قاضي والقاضي يحكم زي مابيقول الورق
لان العداله عميا وبنت كلب ومابتشوفش لا في الضلمه ولا في النور
المهم .....
الناس الفاضيه اللي في السوق قاعدين مركزين مع جحا وابنه ...
الاول جحا قال لابنه اركب انت ، الواد قال لا ، اركب انت
جحا صمم ، قلب الاب بقي والحنان
الواد ركب الحمار وجحا مشي جنبه !!!
وليه فلتانه ولسانها فرقلة بصت لهم وخبطت علي صدرها وقالت ياعيب الشوم
عيل ماعندوش دم ، راكب الحمار وسايب ابوه الشيخ الكبير ماشي
وليه تانيه فلتانه ولسانها فرقله اكتر سمعتها خبطت علي صدرها
و........... هوب كل الناس في السوق خبطوا علي صدرهم
وهاتك يالت وعجن ، طلع شويه عيال يصفروا وعملوا زفه لجحا وابنه
الواد اتأثر وجحا اتكسف
الواد قال ولا يمكن اركب وانت تمشي ، تعال اركب انت
جحا ركب والواد مشي جنبه
وخطوه اتنين تلاته وهووووووووووب
واد عيل طايش من الصيع اللي قاعدين مقاطيع علي راس السوق
بص لجحا بصه وحشه قوي وقالك ياراجل ياشايب ، مافيش في قلبك رحمه
ابنك سايبه ماشي وانت راكب ، صحيح ابهات اخر زمن
وصفر صفاره طويله ، العيال الصيع المقاطيع اصحابه خدوا بالهم
وهوب ، الطريق كله بقي تصفير
ياراجل ياشايب ياعايب ياللي مافيش قلبك ابوه ولا رحمه !!!
جحا اتأثر قوي لانه اب جدع ومايصحش العيال الصيع تقول عليه كده
وهووووووووووب ... نزل جحا من الحمار
وقال لابنه بص ، لاانا اركب ولا انت تركب
نمشي احنا الاتنين ...
وعنها ، جحا يمين والواد شمال والحمار في النص
وخطوه اتنين تلاته
راجل عجوز مابيشفوش كويس ، قعد يبرق يبرق يبرق
وفجأ انفجر في الضحك
شاور علي جحا وابنه وقال شايفين الحمير !!!
الناس دورت علي حمير مالقيتش غير جحا وابنه
قالوا له سلامه الشوف ياابو العيون ده هو حمار واحد
قال لا الحمير الراجل العجوز المخرف وابنه الاهبل
الاتنين ماشين علي رجليهم وسايبين الحمار خفيف ماشي براحته
ناس حمير بجد ، هو لو ماركبناش الحمار وريحينا رجلينا يبقي فايدته ايه
يبقي احنا اللي حمير
ضحك الراجل اللي مابيشوفش كويس
ومعاه كل العواجيز ضحك ضحك ضحك
ويشاروا علي جحا وابنه ، الحمير اهم الحمير اهم
المهم ........ جحا وابنه صعب عليهم روحهم
الناس بتتريق عليهم وبتشتمهم وبتقول عليهم حمير
بصوا لبعض وراحوا هما الاتنين ناطين فوق الحمار
وشي ، حا ، شي ، حا
الحمار ماشي شايل الاتنين
طفله صغيره بضفاير طويله قاعده جنب امها علي الرصيف
قالت ياحرام الحمار شايلهم وحيقع من كتر ماهم تقال
الام بصت كويس وقالت تصدقي يابت عندك حق
الا البني ادمين في قلوبهم قسوه كده ازاي
الحمار غلبان وبيتكعبل وهما ولا فارق معاهم
وراحت راقعه بالصوت ، يالهوي ياغلبان
وبس ، كل النسوان اللي قاعده علي الرصيف عملت زفه للحمار
يالهوي ياغلبان ، يالهوي ياغلبان و.............
ونزل جحا وابنه من علي الحمار
وسابوه ومشيو!!!!
ناس بتقول انه مشي وراهم لانه حمار !!!
وناس بتقول رجعوه وخدوا فلوسهم !!!!
وناس بتقول انهم حمير لان كل ماحد يقول حاجه يسمعوها ويتلخبطوا !!!!
وناس بتقول انهم حمير لان معندهمش وجه نظر اساسا !!!
الخلاصه ، هما حمير والناس حمير ومحدش عنده وجه نظر اساسا ....
وتوته توته خلصت الحدوته !!!!!


والبقية تأتي .... انتظرونا

ليست هناك تعليقات: