28 يناير 2013

لماانت جاهل ... عملت كده ليه ؟؟؟؟





لما انت جاهل ومش عارف حاجه عملت اللي عملته ده ليه !!! 
لما انت ..
مش عارف ان خط القناه اسمه خط النار ، اسمه خط المواجهه ، اسمه الجبهه 
اللي جيشنا حارب فيه ودافع عن مصر 
مش عارف انهم المدن الباسله ، احتضنوا الفدائيين ضد معسكرات الاحتلال الانجليزي وسندوا الفدائين وخبوهم وتحملوا الانجليز والسراي والقلم السياسي ، انت ماقريتش ( ليلة القبض علي فاطمه ) ، انت ماشفتش فيلم ( لاوقت للحب ) لما شعب السويس غني ( يابابور يامولع ولع نار بينا وبينهم دم وتار ) ... 
انت مش عارف ان بورسعيد هي المدينه الباسله اللي صمدت 53 يوم تقود المقاومه الشعبيه في مصر وقت العدوان الثلاثي علي مصر 1956 ، انت ماشفتش فيلم ( الباب المفتوح وازاي البنات والولاد كان بيحاربوا في بور سعيد مع المقاومه الشعبيه) ، ماشفتش ( عيسي الدباغ لما قابل ابن عمه في تدريبات الفدائيين في بورسعيد في فيلم السمان والخريف ) ...
انت مش عارف ان خط القناة تحمل حرب الاستنزاف وعبئها بدل عن مصر وقت التجهيز لحرب اكتوبر وقت بناء حائط الصواريخ المصري قبل العبور ، انت مش عارف ان السويس حوصرت ايام الثغرة وقادت المقاومه الشعبيه 1973 ، انت ماشفتش فيلم ( حكايات الغريب ) اللي بيحكي عن السويس وصمودها وقت الحرب ... 
انت ماسمعتش محمد حمام وهو بيغني ( يابيوت السويس يابيوت مدينتي ، استشهد تحتك وتعيشي انت ) .. ماسمعتش كل المصريين بيغنوها معاه وقت حرب 1973 !!! 
انت ماتعرفش ان مدن القناه كلها اتهجرت لصالح مصر وسابت بيوتها واشغالها وحياتها علشان الحرب ، اتهجرت مرتين ، شعبها مضحي ومقاتل وعنيد وصلب وقوي وابن نكته يحب الغناء والرقص بالسمسية !!! 
انت ماتعرفش كل ده ، ليه مش مصري ، ماقريتش تاريخ ، ماشفتوش افلام ، ماقريتش روايات !! 
طيب لما انت ماتعرفش كل ده ، بتتصرف بحمق كده ازاي ، متصور ان " صباعك " حيخوف المدن اللي مابتخافش" و " حتخوف شعبها الي قلبه حديد وحارب وقاوم وعاش تحت القصف وقبل الهجرة لصالح مصر " وان " طوارئك " حتخوف المدن الباسله المقاومه " وان " حظرك حيتنفذ !!!! "
انت متصور ان الجيش التالت اللي اتحاصر والسوايسه كانوا بيودوا له الاكل والميه وارواحهم علي كفهم ومستعدين يموتوا علشانه ايام حرب 1973 ، ممكن يضرب السوايسه او الاسماعيلاويه او البورسعيديه !!! المدن دي ضهر الجيش والجيش قلبها ولايمكن الا يحميها ويحبها ويحافظ عليها ، ضهره وسنده وهو قلبها ونني عينها !!! 
لما انت مش عارف حاجه ، عملت اللي عملت ليه ؟؟؟؟
بجد بجد ، ماقدرش اقول عليك غير .......................... ولا بلاش ، مش حاقول عليك حاجه ، حاسيب شعب مدن القناة الثلاثه هما اللي يقولوا وكفايه عليك اللي حيقولوه وزيادة  !!!! 

24 يناير 2013

صرخه امل

انقذوا مصر قبل فوات الاوان 
انقذوا مصر قبل فوات الاوان 





فيه ناس كتيره قوي باحبهم وباحترمهم ومتأكده انهم بيحبوا مصر ويعشقوا ترابها ....
الناس دول ، لاسباب مختلفه ، مش قادرين يتقبلوا ويتفهموا اهميه وجود شفيق ومؤيديه ضمن الجبهه المدنية المعاديه للاخوان ...
وفيه ناس كتيره تانيه قوي باحبهم وباحترمهم ومتاكده انهم بيحبوا مصر ويعشقوا ترابها ...
الناس دول ، لاسباب مختلفه ، مش قادره يتقبلوا ويتفهموا اهميه البرادعي او حمدين صباحي او السيد البدوي او حزب التجمع ضمن الحبهه المدنية المعاديه للاخوان ..
الحقيقه الفريقين غلطانين ...
الان في هذه اللحظه التاريخيه من عمر مصر ، في وجود جماعه تحكم عن طريق رئيس امعه تسعي لتدمير مصر وبيعها لقطر وتنفيذ مخططات امريكا في المنطقه وضياع سينا وفك الجيش المصري وتركيع مصر لصالح المخطط الامريكي الاخواني ، وسحب مصر للماضي السحيق وتدمير حضارتها ومدنيتها ، في هذه اللحظه التاريخيه ، تخلصوا من احاسيسكم بالمنافسه السياسيه وتخلصوا من الاهتمام بنقاط الاختلاف وابحثوا عن نقاط الاتفاق التي توحد صفوفكم ..
الان في هذه اللحظه التاريخيه ، مافيش فلول ولا ثوار ، فيه مصريين عايزين دوله ديمقراطيه مدنيه تسمح بتداول السلطه بشكل حضاري ، فيه مصريين عايزين دوله مستقله لها كرامه ودور اقليمي وتحافظ علي كرامه مواطنيها وحقوقهم وانسانيتهم ، فيه مصريين عايزين حريه سياسيه وعقائديه ، فيه مصريين عايزين دوله قانون تحتكم لدستور توافقي وقانون واتفاقيات دوليه ، فيه مصريين عايزين يدافعوا عن الاهرامات وابو الهول من الهدم ويدافعوا عن ام كلثوم وعبد الحليم من الوأد ، عايزين مصر دوله الحضاره والابداع والثقافه والفنون ، عايزين يحلوا مشاكل التعليم المتردي والصحه المهينه والمرور الحقير والامن المنفلت ... فيه مصريين عايزين دولتهم العظيمه تاخد مكانتها بين الدول صناعه وتجاره وسياحه وزراعه ، فيه مصريين عايزين توزيع عادل للدخل القومي وضرائب تصاعديه علي الاثرياء وحد ادني من الاجور للموظفين والعمال والسيطره علي الاسعار والغلاء والتصدي للاحتكارات ، فيه مصريين عايزين يعيشوا بشكل ادمي ومحترم وانساني !!! 
وده كله لايمكن يتحقق في ظل دوله الاخوان التابعه لقطر وامريكا ، الدوله الذليله التي يحكمها وسيحكمها الدلاليل والامعات للمرشد ولقطر ولامريكا ... 
ارجوكم ، ارجوكم ، بقدر حبكم لمصر وخوفكم عليها 
توحدوا ، توحدوا ، توحدوا ، علينا نقبل كل الجبهه المدنيه بكل فصائلها والوانها السياسيه واختلافاتها الايدلوجيه والحزبيه ، لاسقاط نظام الاخوان الفاشي ، وبعد كده ، نسعي لدوله ديمقراطيه تسمح لصاحب الاغلبيه ان يحكم وللاقليه ان تراقبه وتتداول السلطه بين الجميع ..
ارجوكم ارجوكم ، كفوا عن النظرات الحزبيه الضيقه ، كفوا عن الاحساس بالمنافسه السياسيه ، كفوا عن سلخ وجوهنا بالنظام القديم والثوار والفلول والفوضي ، كفوا عن سلخ وجوهنا باختلافاتكم وتوحدوا من اجل مصر المهدده بالضياع والدمار والخراب في ظل ذلك النظام الفاشي !!!! 
نقبل شفيق وعمرو موسي وابو الغار والبرادعي وحمدين والسيد البدوي ورفعت السعيد وايمن نور وغيرهم من الوطنييين .. 
نقبل التجمع والوفد والمصريين الاحرار والمصري الديمقراطي وحزب الحركه الوطنيه وحزب الدستور وحزب الكرامه والعربي الناصري وحزب المؤتمر والتحالف الشعبي والشعب الاشتراكي وغيرهم من الوطنيين من كل الاحزاب والائتلافات والجماعات السياسيه ..
نقبل الاشتراكيين والشيوعين والناصريين والليبراليين والوفدين والتجمعيين واليمين واليسار والوسط وغيرهم من الوطنيين من كل الوان الطيف السياسي المصري الوطني ... 
نقبلهم جميعا جبهه موحده ضد الاخوان ، تسعي لتخليص مصر من الحكم الفاشي الاخواني الرأسمالي المستغل التابع العميل لامريكا التابع الذليل للتنظيم الدولي للاخوان المسلمين .. نقبلهم جميعا جبهه موحده ضد الاخوان وبعد اسقاطهم علينا ارساء دوله ديمقراطيه تقبل بتداول السلطه بين الاحزاب والتيارات المختلفه والقول وقتها للصندوق الحقيقي بغير تزوير ولا رشاوي انتخابيه ولا اقصاء ولااستبعاد ولا غش ولا مطابع اميريه !!!! 
توحدوا جبهه مدنيه واحده ضد الاخوان 
انقذوا مصر قبل فوات الاوان 
انقذوا مصر قبل فوات الاوان 
انقذوا مصر قبل فوات الاوان 
انقذوا مصر قبل فوات الاوان 
انقذوا مصر قبل فوات الاوان