27 فبراير 2014

من الفيس بوك ..... احنا الجيل العرة ..





الثورجيه ...ولاد الثوار ، قالوا علي جيلنا " عرة " فالدكتور محمد المصري قالك نقول لهم يعني ايه جيلنا العرة وانا سخنت وراه ، يالا كلكم العبوا علي صفحاتكم ، وروهم شكل جيلنا العره وحياته الجميله .... وخلي ليهم هما الثورة بتاعتهم وجيلهم اللي مش عرة :)....

  • انا من الجيل العرة ، اللي كان عنده في المدرسه حصه رسم وكانت مدارسنا بتشترك في مسابقة " شنكار " الهنديه لرسم الاطفال وكنا بنتعلم تدبير منزلي وتفصيل وطبيخ وزراعه وعندنا حصتين العاب في الاسبوع  ...
  • انا من الجيل العرة ، اللي كان عنده في المدرسه حصص موسيقي ، واخر السنه نعمل حفله مشتركه لكل المدارس في نفس المنطقه التعليمية ويبقي فيها موسيقي وغنا ورقصات ...
  • انا من الجيل العرة ، عشت ايامت جدتي في بيتنا اللي في البلد ، كانت بتخبز في فرن البيت من الفجر قراقيش وفطير مشلتت وعيش مرحرح وملدن ، وبتعمل شعريه علي دولاب الشعرية وتحمرها بسمنه بلدي ونفطر بيها الصبح ، وتلم ورد الجنينه الاحمر وتعمله مربي ، وتسيح زبده وتخزنها للسنه كلها ، وتجهز شربات افراح الاحفاد علي ايدها قبل الفرح بشهر من الفاكهه الطبيعيه ..
  • احنا من الجيل العرة ، ماعرفتش ان طنط نيلي نصيف اخت امي وزميلتها من الحضانه قبطيه الا لما ابوها مات ورحنا الكنيسة نعزيها .. ومافرقش معانا ابدا لادينها ولادينا فكلنا مصريين .. 
  • انا من الجيل العرة ، اللي كان فيه الجيران اخوات واكتر ، وابواب الشقق كلها مفتوحه في الخير ولما واحده تعمل حاجه حلوه ، تودي لكل جيرانها، اللي يرجعوا لها الاطباق مليانه بالخير ..
  • انا من الجيل العرة ، اللي كنا نروح مدراسنا الابتدائي والاعدادي والثانوي بعد ماخرجنا منها نسلم علي المدرسين والمدرسات ونحكي ليهم اخبارنا ونفرح بنجاحنا ونبقي رايحين ليهم وهما واحشنا قوي ونمشي معيطين ... وكنا بنعتبر نجاحنا فخر ليهم ودايما عايزين نفرحهم .. 
  • انا من الجيل العرة ، اللي شاف في التلفزيون اعلان " ست سنيه سايبه الميه ترخ ترخ من الحنفية " واتعلمنا نقفل الحنفيات ونحافظ علي ثروة المية في بلدنا اللي تخصنا كلنا ، وشاف في التلفزيون اعلان " انا جامد ومتين انا الملامين " فكلنا في الاطباق البلاستيك بمنتهي الفخر لانها صناعه وطنيه ..
  • انا من الجيل العرة ، اللي كنت باخاف من اعمامي اخوات ابويا واعمل حسابهم زي ابويا واكتر واخاف من خيلاني اخوات امي واعمل حسابهم زي ابويا واكتر ، الجيل اللي كان مؤمن بأن الخال والد والعم يشيل الهم والعيله الكبيرة عزوة وهيبه وفخر وشرف ..
  • انا من الجيل العرة ، اللي قرا احسان عبد القدوس ويوسف السباعي وانيس منصور وهو في اعدادي ، وقرا نجيب محفوظ ويوسف ادريس وهو في ثانوي ، وكان بيعتبر رحله معرض الكتاب مكافأه النجاح ويشتري الكتب الجديده وياخدها في حضنه فرحان بيه لانه حيعرف ويفهم ...
  • انا من الجيل العرة اللي كنت اخرج يوم العيد الف علي بيوت العيله عماتي واعمامي ونعيد عليهم وناخد عيديه وناكل كحك وقراقيش بيتي ونضحك واحنا مبسوطين ، وفضلت اعمل كده مع بناتي وحفيدي كمان لغايه النهارده ..
  • انا من الجيل العرة اللي كان لازم يحتفل بالعيد بشكل اسري ونتغدي مع بعض وعمر ماحد منا سافر يوم العيد يحتفل بيه لوحده ، واعتبرنا العيد ورمضان وشم النسيم وليله نص شعبان مناسبات عائلية تحتفل بيها الاسرة والعيله مع بعض..
  • انا من الجيل العرة ، اللي كنت باروح الساعه 8 ونصف بليل وانا في الجامعه ، ولما اتأخرت للساعه 9 خاصمتني امي لاني بقيت " زي الارتيستات " بارجع البيت في " انصاص الليالي "..
  • انا من الجيل العرة ، اللي كان بيعتبر الجيران اهل وخلان ، وكان بيت طنط شوشو مرات المستشار سعد ايوب بيتنا ناكل ونشرب ونقعد ونلعب ونتشتم علي الشقاوه وكان بيت طنط صديقه جارة عمتي بيتنا ، وبيت ابله لولو جاره امي بيتنا...
  • انا من الجيل العرة ، اللي سمعت برنامج الي ربات البيوت مع امي وهي خلتني اسمع اغنيه غنوه وحدوته لابله فضيله وياولاد ياولاد توت توت تعالوا تعالوا علشان نسمع ابله فضيله راح تحكي لينا حكايه جميله كل يوم جمعه من الراديو الخشب الكبير اللي لما كان يسكت كنا نضربه بالبوكس فيشتغل :)
  • انا من الجيل العرة اللي كان مصروفي في ابتدائي تلاته تعريفه وقزازه اللمونجو بقرشين فاصرف يوم قرش واشيل التعريفه لليوم التاني واشرب لمونجو ودايما منظمه ميزانيتي وعمري مااشتكيت ..
  • انا من الجيل العرة ، اللي كل الكحك ابو سكر في العيد الصغير وعيد الميلاد وكل اللحمه في العيد الكبير وعيد القيامة وعلق الصلبان الغله علي ابواب الشقق في عيد الغطاس واتكحل في سبت النور وكل عاشورة يوم كربلاء وووزع صدقه رمضان اقباط ومسلمين ..
  • انا من الجيل العرة ، اللي اتعلم ان " العلم سلاح " و " العمل عبادة " و " التقوي تقوي القلب " و" النضافه من الايمان " وكانت كراريسنا مكتوب عليها من الغلاف الخلفي ، اغسل يديك قبل الاكل وبعده ..
  • انا من الجيل العرة ، اللي شرب من "القلة الفخار" المتعطره بالمورد مية ساقعه زي الشهدفي عز الحرب ، وشرب اللبن الرايب الطازة من "المترد" واتدفي علي " المنقد " الفخار في ليالي الشتا وعجن الكحك والقراقيش علي " الطبلية " واستحمي علي " وابور الجاز " ونور المطبخ بلمبة جاز نمرة 10 و بقيه البيت بتاع البلد بالكلوبات..
  • انا من الجيل العرة ، اللي ولع دستين شمع في مقام العدرا لاجل الغايب يرجع وكنس مقام السيده نفيسه علي العدا وولاد الحرام ...
  • انا من الجيل العرة ، اللي حضر ايام خياطه العيله وهي بتفصل لنا فساتين وقمصان نوم كستور وبيجامات ، امي تقص الباترون ومحبوبه تفصل ، واللي شاف امه وعماته وخلاته بيشتغلوا كروشيه وكنافاه وتريكوا مفارش وفساتين وبلوفرات وتابلوهات ، واحترم العمل اليدوي واعتبر الست اللي مابتعرفش تعمل حاجه من ده خايبه وخيبتها تقيلة ...
    • انا من الجيل العرة ، اللي كان في المدرسه بيحي العلم كل يوم ويهتف من قلبه " تحيا الجمهوريه العربيه المتحدة  " وبعدها " تحيا جمهوريه مصر العربية " وعيط وهو بيغني " الله واكبر فوق كيد المعتدي " ايام حرب اكتوبر وعاش ايام النكسه وطفي النور ولزق ورق ازرق علي قزاز البيت وبني سواتر طوب قدام مداخل العمارات كنا بنعتبرها " الامة " في لعبه الاستغمايه ...
  • انا من الجيل العرة ، اللي ايام حرب اكتوبر كان بيشتري الثلاث جرايد علشان يقرا فيها نفس البيان العسكري ويقعد قدام النشره يصقف لما نسمع عن انتصارتنا ونزغرد لما اسروا عساف ياجوري ونعيط من الفرحه يوم مالسادات خطب في مجلس الامه واشاد بقواتنا المسلحه ...
  • احنا من الجيل العرة ، اللي حب ربنا لان ربنا بيحبه وحب كل خلقه ربنا لانها خلقه ربنا واطعنا ربنا لانه بيحبنا وكرمنا بنعمه وتمنينا رضاه لاجل تدوم النعم وامنا بيه من شده الحب والامتنان علي كل شيء جميل عمله لينا ...
  • انا من الجيل العرة ، اللي كان يقفل التلفزيون 40 يوم لان الجيران عندهم ميت ويفتح باب بيته ويطبخ للمعزيين ويستضيفهم عنده في البيت ، وكان يلغي افراح بناته لو العماره فيها ميت لغايه مالاربعين يعدي ويقول برضا وقناعه ، العشره ماتهونش الا علي ولاد الحرام ... 
  • انا من الجيل العرة ، اللي عاش ايام تلات جرايد ، اهرام اخبار جمهوريه ومجله اخر ساعه وصباح الخير وروز اليوسف والمصور ، وشافت مجله الطليعه والمسرح واتفرج علي التلفزيون قناه اولي وثانيه وحضر الارسال التلفزيوني يبتدي الساعه 5 ، وكان فيه فيلم عربي واحد في الاسبوع يوم الخميس ونور علي نور يوم الجمعه وعالم الحيوان الساعه 1 كل يوم جمعه ................. وشفنا برنامج نافذه علي العالم . وكنا بنتعلم من التلفزيون نتعلم ونتثقف ... 
  • انا من الجيل العره اللي كانت بنات العيله الصغيرين ياخدوا فساتين بنات العيله الكبار بعد مالخياطه تأيفها ونبقي اخر سعاده وعمرنا ما تأففنا او عايرنا بعض او اتكسفنا ..
  • انا من الجيل العرة اللي كانت العيله كلها بتصيف مع بعض ، وكانت جدتي وامي وخالتي ينزلوا البحر الساعه 6 الصبح بالمايوه ويرجعوا يحضروا الفطار والسندوتشات لينا احنا علشان نروح البحر نقضي اليوم هناك .. 
  • انا من الجيل العرة اللي كان بيرفع سماعه التليفون فالحراره تيجي بعد ساعتين ، ويطلب الترنك علشان يتصل بالاقاليم ويتكلم مده ومدتين ...
  • انا من الجيل العرة اللي حضر نكسه يونيو ووجعها وانتصارات اكتوبر وفرحها ، اللي عيط يوم جنازه عبد الناصر ويوم قتل السادات ، اللي حضر طه حسين ونجيب محفوظ والفريد فرج ويوسف السباعي ولويس عوض ويوسف ادريس ، اللي سمع بابا شارو واحمد سعيد وامجاد ياعرب امجاد ، اللي عرف ان طريق الالف ميل يبدأ بخطوه ، اللي غني من المحيط الثائر للخليج الهادر ، اللي قال والله حنبي وادي احنا بنينا السد العالي وحلم بتمثال رخام علي الترعه واوبرا في كل قريه عربيه ..
  • احنا من الجيل العرة ، اللي خلل الخيار والفلفل والزتون واللمون والبصل الاورمة ، وخبز الكعك والقراقيش والكيك وعمل البتي فور والمنين وعمل مربي الفراوله والمشمش والبلح والتين واللارنج والجزر الاحمر وشربات المانجو والفراولة والبرتقال وحمص البن في البيت وشرب القهوه علي السربتايه وحمص لب البطيخ علي الصاجه في العصر في الصيف وشوي ابو فروة علي المنقد في عز الشتا ، كله في البيت ..
  • احنا الجيل العره اللي كان بيذاكر من نفسه وحاسس ان ديه مسئوليته وانه عيب يسقط علشان شكله قصاد اصحابه وقرايبه والستات تتباهي ان عيالها جابوا مجموع اكبر في الشهادات واتعلمنا في المدارس الحكوميه وكنا بنعتبر المدارس الخاصه للفشله والساقطين الي مش جايبين مجموع ومدارس اللغات للاثرياء والاقطاعيين ، الجيل اللي كان اهله يقوموه من علي المذاكره علشان كفايه عليه تعب ، وواثقين انه حينجح بس منتظر المجموع ، اللي اتعلم مايغشش في الامتحان لان كده بنسرق مجهود غيرها ومانغشش في الامتحان علشان كده بنعلم الناس تبقي خايبه ونساعدها علي خيبتها ....
  • احنا من الجيل العرة ، اللي حضر في عهد جمال عبد الناصر عيد العلم وتكريم كل المتفوقين علي مستوي مصر من الابتدائي لحمله الشهادات العليا ، كلهم في طوابير وكلهم فرحانين وكلهم بيتكرموا ، خلونا نحسدهم نغير منهم نتمني نكون زيهم ونتكرم زيهم لان العلم سلاح
  • احنا من الجيل العرة اللي حضر غلي الغسيل بالباستله وكنا بنقلب الغسيل بعصايه كبيرة مع الزهره والاومو ، واللي حضر تلميع الباركيه بالورنيش والترابنتينه والصوفه علشان يبرق ، واللي حضر تلميع القزاز بالجرايد وتلميع النحاس باللمونه المقلوبه وتلميع الفضه بطفيه السجاير ... اللي كنا بنساوي شراشيب السجاده قبل بابا مايوصل البيت ليبهدلنا كلنا لان البيت مش نضيف ...
  • احنا الجيل العرة ، اللي صيف في عشش راس البر وعام في الجربي وكل سمان مشوي اخر الصيف وحضر سردين الفيضان قبل مايخلصوا بنا السد العالي ....
  • احنا الجيل العرة ، اللي صيف في كباين بورسعيد ام عمدان ملونه ورقص علي نغمات بيانوا كازينو بالاس وكل ايس كريم في الجيانولا ، قبل نكسه 67 ..
  • احنا من الجيل العرة ، اللي كانت العيله فيه كلها تتكاتف لو حد حصل له مشكله او مصيبه والكل يلم فلوس ويدفع باعتباره واجب مش منتظر عليه شكر ويتكفل بالعيال الصغيرين ويكبرهم وسط عياله ويصرف عليهم ويجوزهم لانه كان مديون لابوهم ومش مستني شكر ...
  • احنا الجيل العرة ، اللي كنا نتباهي باصولنا الريفيه وعائلاتنا ومايهمناش الفلوس وندور علي ولاد الناس ولاد الاصول ونكره اللي يتباهوا بفلوسهم ونعتبرهم محدثين نعمه ومش شبعانين من بيوت اهاليهم ...
  • انا من الجيل العرة ، اللي اول مرتب لي وانا محاميه تحت التمرين كان 12 جنيه وكنت سعيده بيهم لاني باتعلم وعايزه اتعلم وفضلت اخد المرتب ده ثلاث سنين كامله وعمري مافكرت اطالب بزيادته رغم صعوبه الحياه ( كنت متجوزه ) لكن كنت سعيده ان الاستاذ الكبير فاتح لي مكتبه وبيعلمني ... الاستاذ احمد نبيل الهلالي..
  • احنا من الجيل العرة اللي كان مؤمن ان ربنا فوق وبابا وماما تحت ... واللي مالكوش خير في اهله مالوش خير في حد ، ومن زرع حصد ومن جد وجد .... الجيل اللي اتعلم ان الادب فضلوه عن العلم ، وان اللي يعمل خير يداريه واللي يتكلم عن نفسه حاسس بالنقص والغرور مرض وقله ربايه ..
  • احنا من الجيل العرة ، اللي كانت ايام حياته دفا وحب ووطنية وعلم واحترام باختصار كده...
  • احنا الجيل العرة اللي كان مؤمن بأن ، حب لاخيك ماتحب لنفسك ، وان النبي وصي علي سابع جار ، وان محمد نبي عيسي نبي موسي نبي وكل من له نبي يصلي عليه.....
  • احنا الجيل العرة اللي امن بان اللي مالوش كبير يشتري له كبير وان الانسان اللي مالوش اهل يترجع لهم صايع وضايع وان الواحد لازم يخاف علي نفسه ومايغلطش احتراما لاهله علشان مايجيبش لهم الكلام ..
  • احنا الجيل العره اللي بيحترم اللي اكبر منه لانه بيفهم عنه ، واكبر منك بيوم يفهم عنك بسنة !!! ولاننا احترمنا الكبير ، اتعلمنا وفهمنا واتربينا وعرفنا نربي اولادنا وتلامذتنا ..
  • احنا الجيل العرة اللي  كان اغلي حلفان احلفه ، وغلاوة امي عندي ، لما كانت عايشه ولما ماتت ااقول ورحمه امي ، دي اغلي حلفانات لايمكن احلف بيها الا عن حق وصدق ، طول عمري ، اصل احنا الجيل العرة اللي بيحب امه ويحترمها عايشه وغايبه ..
  • انا من الجيل العرة .. اللي اتعلم ما يقولش علي الشغالة خدامة . ومايقولهاش يابت لأن ليها اسم . ولأن مش علي راسنا ريشة . ويقول لها شكرا لما تقضي له أي حاجة . ويقول للدادة الكبيرة الي في البيت ياامه ..
  • احنا الجيل العرة .. اللي اتعلمنا نشكر اللي نتصدق عليه بحب لأنه ادانا فرصه نعمل حاجة كويسة في حياتنا ..
  • احنا الجيل العرة اللي كان أكبر عقاب لينا أن امي تخاصمنا أو بابا يقولي انت مش محل ثقة ... واكبر مديح لنا انهم يقولوا علينا انتم مسئولين وكبار ..
  • احنا الجيل العرة اللي كنا نشتري الفاكهة في نص الموسم علشان نكون رخصت ... ونبقي شاكرين لأهلنا لأنهم ماببحرموناش من حاجة ..
  • احنا الجيل العرة اللي اتعلم مايبصش لحد لأنه احسن منه ويشكر ربنا علي كل نعمه وأنه يسعى يكون احسن لأن ربنا بيسعي معاه وأنه يجتهد لأن لكل مجتهد نصيب ...
  • احنا الجيل العرة ... اللي كان يتهزء لما يقول اشمعني ...
  • احنا الجيل العرة اللي كانت امي تعاقبني بالقرص من " لباليبي " وتقولي مش حاقرصك لا في وشك ولا في دراعك علشان كرامتك ومحدش يعرف انك غلطتي و بتتعاقبي ..
  • انا من الجيل العرة اللي اتعلم يحوش من مصروفه ومن العيدية ومكافأة النجاح علشان يشتري اللي نفسه فيه ومايحملش علي أهله كتر خيرهم ...
  • احنا الجيل العرة اللي كان ومازال بيحب مصر ، وماكناش مستنين منها حاجه بالعكس كنا بنفخر اننا نعرف نعمل لها اي حاجه ، ولما الجيش اتهزم في سبعه وستين انكسرنا والستات قلعت الدهب من ايديها علشان المجهود الحربي والناس اتبرعت بتحويشه العمر وجهاز البنات وثمن الكفن علشان الجيش وقالوا نربط الحزام وناكل طقه واتنين لا وقالوا الهزيمه عار والنصر رد كرامه وكل حاجه تهون علشانه..
  • احنا الجيل العرة اللي حلمنا نبني مصر وكانت احلامنا الشخصيه جزء من احلامنا الوطنيه واتعلمنا ان بقرش الادخار حنحارب الاستعمار وغنينا ياهلا بالمعارك يابخت مين يشارك بنارها نستبارك ونرجع منصورين ..
  • احنا الجيل العرة ، اللي عمر ماشاب فيه عاكس اخت صاحبه واللي بنت العيله كانت تخص العيله كلها ولو واحده فينا زوغت من المدرسه تعمل حساب كل نفر في العيله من الكبير للصغير ولو قفشها تترن علقه موت واتعلمنا ان الكدب خيبه والصدق منجي واللي يعترف بغلطه يتعلم واللي يكذب وينكر غلطه يتعاقب مرتين لان غلط ولانه كداب ...
  • احنا الجيل العرة ، اللي كانت بيوت كل اسره في العيله مفتوحه لكل العيله ، ولما كان بعض ابناء العيله في اسكندريه او القاهره ، فاي حد مسافر هناك ينزل علي بيوت العيله ، يتعلم يتعالج يجهز البنات ، كله في بيوت العيله وسريره موجود وملايته الجديده كمان .....
  • احنا الجيل العره اللي كنا نصيف في بيت خالتنا او عمتنا عادي جدا الثلاث شهور وامي تبعتنا من غير فلوس لان عيب تشتم اختها او اخت جوزها وهي متكفله بيكم وكأنها انا بالضبط والحياه سلف ودين ونردها ليها في الافراح ...
  • احنا الجيل العرة اللي كان يركب اتوبيس درجه تانيه بقرش علشان يوفر قرش مالوش لزمه نصرفه غير المنظره الفارغه ، اللي اتعلمنا ان الانسان بقيمته لابفلوسه ولا بشكله ولا بعنده ايه ...
  • احنا الجيل العرة ، اللي كان يقف في الاتوبيس علشان نقعد ست كبيره او راجل عجوز ونعمل نبطشيات من الشباب لرعايه الكبير العيان ، كل واحد منا يشيله يوم بليلة ، والكبير يذاكر للصغير والكبيرة تسرح شعر الصغيره وتضفره ونعمل مقابله عائليه كل شهر مره علي الاقل علشان نتطمن علي بعض ...
  • احنا الجيل العرة ، اللي كنا نقول لزوج الاخت ياخال ، ولاخت الجوز ياعمة ونعتبر المصاهره زي الدم نسب مايتحلش  ... 
  • احنا الجيل العرة اللي كنا نروح السينما يوم الخميس من 3 ل6 مره في الشهر وبعدها ناكل سندوتشات في جروبي وايس كريم ونروح مبسوطين واللي يسقط او يجيب نمر وحشه يتحرم من الخروجه ويتقال اصله عيان علشان مانحرجوش وسط العيله ..
  • احنا الجيل العرة اللي اتعلمنا ان الشغالين ياكلوا زينا اللي ناكل منه ياكلوا منه  ، لاياكلوا بقايا الاكل ولا الاكل اللي حيترمي لانهم بني ادمين وكمان بيساعدونا ويريحونا ولان ربنا حيحاسبنا علي معاملتهم والدعوة منهم علينا تدخلنا جهنم ..
  • احنا الجيل العرة اللي كنا بنستني في المواسم والاعياد خيرات القريه وخيرها ، بلح زغلول في الخريف ومانجو في الصيف وبرتقال وسفندي في الشتا ، ده غير القراقيش والكحك والعيش المرحرح والمرته والسمنه والزبده والبط والفراخ المدبوحه ، وكانت قريتنا هي الخير واهلها هم الطيبه وهي مصر وهي الاصل ...
  • انا من الجيل العرة اللي شفت ابويا بيعيط بالدموع ايام 67 وسمعت زغروده امي اللي مابتعرفش تزغرط ايام انتصار اكتوبر وسمعتها بتتحسر ان اختها ماتت قبل الانتصار فمافرحتش معانا بالنصر  ...
  • احنا من الجيل العرة ، اللي ربط حياته بمصر واعتبر انتصارنا انتصاره وفخره وهزيمتها نكسته ووكسته وحلم بيها اجل البلاد ورضعنا الوطنيه من العيله والمدرسه والاعلام والزعماء السياسين ودرسنا تربيه قوميه وعرفنا ابطالنا الوطنين من مينا موحد القطرين لاحمس هازم الهكسوس لرمسيس الثاني هازم الحيثين لمحمد علي باشا باني نهضه مصر الحديثه لعمر مكرم اللي قاوم الفرنسيين واتنفي لدمياط لعبدالله النديم اللي هرب من الانجليز لاحمد عرابي اللي وقف في وش الخديوي اسماعيل لسعد زغلول اللي خرج المصريين يطالبوا بالاستقلال لمصطفي كامل اللي قال كلمته العظيمه لو لم اكن مصريا لوودت ان اكون مصريا لجمال عبد الناصر اللي قال ارفع راسك يااخي انتهي عهد الاستعمار ، اللي كان بيحس انه ينتمي لشعب عظيم وحضاره عظيمه ووطن عظيم يستحق كل شيء جميل في الدنيا واتعلم ان المؤامرات الاستعماريه حاصرته وحاولت تحتل ارضه وتكسرارادته وتهزم روحه المعنويه واللي امن ان مصر مقبره الغزاه وان مصر هبه المصريين وان اللي يجي علي مصر مايكسبش وان مصر ام الدنيا وان طال الزمن ...
الحاجه الوحيده اللي اقدر اقولها بضمير مستريح ... ان احنا الجيل اللي عاش مصر الجميله الحميمه الدافيه الوطنيه المشرقه المبهجه ، الجيل اللي حب مصر زي امه وابوه وعيلته واتشرف بيها وسعي يشرفها وعيط بدموع عينه يوم هزايمها ورقص علي واحده ونص يوم فرحها وماقبلش عليها كلمه وخانق واتخانق علشانها واتكحل بترابها وشالها علي راسه .. اذا كنا ، زي العرة ولاد العره مابيقولوا علينا جيل العرة ، فنحن نفخر بأن جيلنا غير جيلهم وان جيلهم متسمم بروح غريبه وجدوره مقطوعه من الارض الطيبه وراسه مركوبه بالخرافات والهرطقه ولايعرف لادين ولا دنيا ولا وطن ولا اهل ولا عيب ولا اصول ،جيلنا غير جيلهم ونفتخر ، وعلي فكره حنفضل وراهم لما نعدل راسهم ونضبط بوصلتهم ونرجع وطنيتهم ونعدل طريقهم المعووج حبا في مصر وكرامه ليها لاننا مش حنسيب لها من ورانا اجيال معووجه تضيعها ... احنا وراكم والزمن طويل ...

25 فبراير 2014

من الفيس بوك ...... اثق في مصر واصدقها ..








( 1 ) 

هو كان عارف اننا اكتشفنا جهاز لاكتشاف وعلاج فيرس سي والايذز
كان عارف
علشان كده قال مصر حتبقي قد الدنيا
المفروسين والارهابيين يمتنعون


( 2 ) 


المصريين اللي بيتريقوا علي الجيش واختراعه الجديد ، عندهم انسحاق رهيب ، مش قادرين يصدقوا في مصر ولا في المصريين ، عندهم انسحاق رهيب وحاسين انهم حشرات تحت رجلين الاخرين متداس عليهم ومالهمش قيمه ومش حيكون ليهم قيمه ، المشكله في احساسهم بنفسهم واحساسهم بالوطن وبقيمته ..
افهم جدا ان حد يتساءل هو الكلام ده صحيح ، يخاف يصدق ليفرح ، لكن التريقه قبل الفهم والمسخره قبل الادراك وترويج استحاله ان المصريين يعملوا كده قبل مايفهموا كده يعني ايه ، ده مالوش غير معني واحد عندي ، انهم منسحقين واحساسهم بذاتهم وبوطنهم منعدم ...
علي راي الدكتور محمد المصري صديقي، المصريين هدوا خط بارليف العظيم بخراطيم ميه ، تصوروا لو كان الجيش قال وقتها الكلام ده ، كان زمان المنسحقين هروه تريقه وسخريه وتلطيش !!!! 
لكي الله يامصر ...
ياجماعه عالجوا احساسكم الوطني بمصر ، عالجوه ، انتم ياحرام متعذبين من كتر الانسحاق والضألة ... عالجوا احساسكم الوطني بمصر ، حرام عليكم نفسكم والله



( 3 ) 
تفتكروا ، شركات الادوية العملاقة اللي بتنتج ادويه فيروس سي ، تبقي سعيده بااكتشاف العلاج بواسطه القوات المسلحه المصرية ..؟؟؟؟
تفتكروا ، معامل الجيش الامريكي اللي اخترعت فيروس الايدز واعتبرت علاجه سر حربي ، تبقي سعيده باكتشاف العلاج بواسطه القوات المسلحه المصرية ..؟؟؟؟
تفتكروا ، المافيا الطبيه في العالم كله من اطباء نقل الكبد لشركات الادويه للمختبرات اللي بتخترع فيروسات وتخترع علاجها وتسيطر علي العالم ، تبقي سعيده باختراع واكتشاف القوات المسلحه المصرية ؟؟؟؟
يالهوي يالهوي ، انا بجد اؤمن بنظريه المؤامرة لدرجه مروعه ، اؤمن انهم حيحاربونا بالتريقه مره وبالتسفيه مره وباشاعه عدم التصديق مره ويمكن بالاغتيالات زي ماعملوا في الدكتور المشد ايام المفاعل النووي العراقي وسميرة موسي عالمه الذره المصرية ، ويمكن بالانكار والنفي عن طريق مجلاتهم العلميه وعملائهم وتلاميذهم .لدرجه الكذب والتلفيق وانكار صحه الاختراع والاكتشاف وعمل مؤتمرات تكذبنا وتنفي صحه الاختراع والاكتشاف .... 
انا اؤمن بنظريه المؤامره فعلا ، لكني اؤمن اكثر بمصر ، واؤمن بالقوات المسلحه المصرية واصدقها ومااصدقش الدنيا كلها ....
احنا ووطنا وقواتنا المسلحه المصرية نعيش نعيش نعيش 
وليذهب العالم كله للجحيم !!!! 
ال فضيحه علمية ال ... واشمعني اصدقك انت واكذب القوات المسلحه المصرية 
انت مين ياروح خالتك علشان اصدقك ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

15 فبراير 2014

من الفيس بوك ..... تنويعات علي نغمة " دهب " ....



( 1 ) 

هل اشفق علي المجرم الذي خالف القانون من قوه وبطش القانون ؟؟؟
ياحرام محبوس ، ياحرام لابس كلبشات ، ياحرام حريته مقيده 
ماهو دي نتائج مخالفته للقانون 
هو مافكرش لحظه ماخالف القانون انه حيقع تحت سطوه القانون باجراءاته القاسيه 
مافكرش ؟؟ لو كان فكر وارتدع ماكانش حد قرب منه 
لكنه لم يرتدع وخالف القانون ، هنا يخضع لحكمه القاسي ، وتقيد حريته ..
ثم ، هل علي اشفق علي المجرم من قوة وبطش القانون ، ولماذا لم يشفق هو علي ضحاياه وقتما خالف القانون ..
لو كان المجرم اشفق علي ضحاياه ولم يخالف القانون ، لما طبق عليه القانون اساسا 
كل مجرم انسان وفي حياته وشخصيته ابعاد انسانيه مؤثره 
لكن هذه الانسانيات لاتمنع تطبق القانون عليه بمنتهي الصرامه 
لان هذه الانسانيات لم تمنعه من مخالفه القانون ولم تدفعه لعدم ارتكاب جرائم ولم تمنحه قلبا رقيقا يشفق علي ضحاياه ..
الاشفاق علي المجرم خطأ ، لانكم باشفاقكم عليه تساعدوه علي مخالفه القانون !!! 
بلاش الحنية في الوقت الغلط مع الشخص الغلط !!! 
علي فكره ، لو كنتم قابلتم ريا وسكينه قبل الاعدام ، كانوا صعبوا عليكم جداااااااااااااااااااااا ، بس كان لازم يتعدموا لان كل الستات اللي قتلوها صعبوا علينا اكتر !!! 
بلاش الحنيه في الوقت الغلط مع الشخص الغلط ....

( 2 ) 

الاصل في القانون ، الردع الطوعي وعدم ارتكاب الجرائم ...
زي كده لما ماما كانت تقولي ماتكليش من الشارع علشان حتعيي 
لما كنت باخالفها واكل اكل " وسخ " من الشارع اعيي واتبهدل وحقن ومحاليل ..
كانت تيجي تقولي ، انتي اللي عملتي في نفسك كده 
وفعلا كنت انا اللي عملت في نفسي كده 
بس بعد مااجرب تجربه قاسيه ، ارتدع وابطل اكل اكل من الشارع ..
القانون كده ، الاصل فيه الردع الطوعي 
كلنا عارفين نتيجه مخالفه القانون ، تقييد حريه وحبس وبهدله مهما كانت المعامله كويسه 
ولاننا عارفين مابنخالفش القانون 
اللي يخالفه بقي ، يتحمل اللي يجرا له ...
ببساطه هي دي القاعده ..
الاصل الردع الطوعي واللي مايرتدعش ، يتحمل ومايصعبش علينا ...

( 3 ) 

بمناسبة دهب .... 
ريا وسكينة كانوا بشر عندهم مشاعر انسانية ولما تكشر في وشهم يزعلوا ولما تشتمهم يتضايقوا ومنهم اللي خلفته ومنهم اللي حبت واتحبت ...
كانوا بشر ، يصعبوا عليك ، مرات ابوهم عذبتهم وامهم ماتت مقهورة وابوهم ماخدش باله منهم ، وكانوا مش لاقيين ياكلوا احتمال واحتمال مش لاقيين فلوس يعيشوا عيشه هاي هاي زي البهوات والهوانم بتوع عصرهم ..
واكيد اكيد واحده منهم نفسها غمت عليها وهي بتخنق اي ضحيه من ضحاياهم واكيد واحده منهم بطنها قلبت وهي بتشم ريحه الجثث المدفونه تحت الارض فيالاوضه اللي عايشين فيها ، واكيد اكيد واحده منهم كان نفسها تهرب من البوليس لما عرفت ان اتحكم عليها بالاعدام ، واكيد البوليس " الوحش " حبسهم في زنازين وقفل عليهم ميت باب ، واكيد " كلبشهم " بالكلبوش علشان مايهربوش من السجن ..
واكيد في اللحظه الي وقفوا فيها علي طبليه الاعدام ، جسمهم اترعش ويمكن خافوا واحتمال ندموا وجايز افتكروا صوت النسوان اللي كانوا بيخنقوهم وماصعبوش عليهم واكيد واكيد واكيد ............................... كان بشر مجرمين !!! 
الاكيد اكتر ، انهم قتلوا 18 ضحيه بقلب بارد ، خنقوهم وسرقوهم ودفنوهم تحت الارض لما ريحتهم فاحت ، الاكيد ، انهم عملوا ده من غير اي انسانية ، فازاي بقي عايزيني احس تجاهم بالانسانية ؟؟؟
متيهيالي لو جمال عيد ومحمود سعد ويسري فوده كانوا عايشين ايام ريا وسكينه ، كانوا نسيوا الضحايا اللي اتقتلوا وعملوا صفحه علي الفيس بوك اسمها " كلنا ريا وسكينة ، لا لاعدام القاتلات ، ايه معندكوش انسانية ؟؟؟؟؟؟؟؟؟ " ...

04 فبراير 2014

من الفيس بوك ... ونس الحضارة










امس في وكاله الغوري وقبلما يبدأ عرض التنورة ، اخذت اتأمل المكان ، المعمار ، الشرفات الحجريه المشربيات الخشبية ، اتأمل المكان واحبه اكثر ، انتمي اليه وينتمي لي ، انا ابنه هذا الوطن ، هذه الحضاره العظيمه التي تداخلت في تكوينها حضاارت وثقافات كثيرة ، فرعونية قبطيه اسلامية ، تداخلت في تكوينها غزوات كثيرة هزمت وغزاه كثر اتوا ليحتلونا فاحتللناهم ووشمنا ارواحهم بحب المكان الذي يحكي عنه التاريخ كثيرا وتقص عنه الجغرافيا اكثر ، انا ابنة هذا الوطن ، بكل فخر ، انتمي اليه ، جلست اتأمل المكان ، هنا كان رجل احب الوطن فترك وكالته اثرا للاجيال القادمه بعده لتدرك قدر حبه الوطنه ، هنا في تلك الوكاله عبق التاريخ وونس الاصالة والاحضارة ، وحين صعد العازفون علي الشرفات الحجريه وصعد الراقصون علي خشبة المسرح ، صنعوا دوامة البهجه ، ليست موسيقي جميله وفقط وليس صدق اداءهم وفقط وليس عظمه مايقولوه ويصنعوه بارواحهم وفقط ، دوامة البهجه اتت من مكان عميق في قلوبهم انهم يحبوا مايفعلوه ويحبونا ، اتوا لاسعادنا ، يقدموا ارواحهم تعزف وتتراقص ليسعدونا ، اوصلوا ارواحهم بارواحنا ، موسيقاهم خرجت من انفاسهم والالاتهم وكفوف ايديهم لارواحنا تشحنها بعشق الوطن ، صدقهم واخلاصهم فيما يفعلوه وصلنا نحن الجمهور اسير المقاعد ، كنا نتمني نقفز علي خشبه المسرح معهم ندور معهم ويسرقنا الوجد مثلهم ونتواصل مع دقاف اكفهم والتواءات اعناقهم وانحناءات جسدهم والدوامات التي يصنعوها بملابسهم الملونه وحركاتهم السريعه ، كنا نتمني نقفز علي خشبه المسرح معهم ، يحتونا وسطهم ، نرقص مثلهم ، نذوب مثلهم في تلك الحاله العميقه التي عبروا عنها من العشق لما يفعلوه للموسيقي للكلمات للدوائر التي يخلقوها بملابسهم وارجلهم واذرعهم وحدقات عيونهم التي تدور علي نغمات الموسيقي ... كنا نتمني نندس وسطهم لكننا لم نفعل فاكتفينا بالتصفيق والصراخ والتصفير والاحساس بالهجة .... ياابناء مصر ، انتم ابناء وطن عظيم رسمت الحضارات المختلفه ملامحه ورسم الابناء المخلصين له ابتسامته ورسمت الجغرافيا الخاصه جدا وجوده ...
انتم ابناء وطن عظيم ، افخروا به وبانفسكم واعلموا ان كل المؤامرات علي وطنكم الغرض منها تجريدكم من الفخر وحرمانكم من العزه وكسر نفوسكم وارواحكم ، انتم ابناء وطن عظيم تكالبت عليه المؤامرات منذ سبعه الاف سنه وحتي اليوم ، منذ وحد مينا القطرين وصنع لكم ولاولادكم وطنا عظيما افلح يبقي رغم كل النوائب التي تكالبت علي راسه ورؤوسكم ، انتم ابناء وطن عظيم انتصر علي الهكسوس منذ بعيد التاريخ وانتصر علي امريكا اليوم وسينتصر دائما ....

02 فبراير 2014

من الفيس بوك .... انتم صدقتم ؟؟؟



""  ادي انفعالات الشباب يوم حرق المجمع العلمي "" 


ايه موضوع ام الشباب ده ؟؟؟
انتم صدقتم ان الشباب اللي 25 سنه يعرف يقود مصر ولا يقود اي وزاره فيها ولا حتي يقود كشك سجاير ، ايه النفاق السياسي المقزز ده ؟؟؟ 
الشباب بلا خبرات لا في الحياه ولا في العمل ولا في السياسه ، الشباب مفروض يتعلم كويس ، يراكم خبراته ، ينتبه للي بيحصل حواليه ، فلما يوصل ال 40 مثلا يصبح صالح لمراكز قياديه وسيطه ، وعلي ال 50 يوصل لمراكز قياديه ...
لكن فيلم ، الشباب يقود ، فيلم هابط يفصح عن نفاق سياسي عظيم ...
اقارن بين عمرو سلامه وبين يوسف شاهين في نفس اللحظه 
واقارن بين يوسف شاهين في اول عمره واقارن بينه في اخر عمره 
اقارن بيني وبين بنتي ، وبنتي شطوره وذكيه وبتتعلم كويس وتثبت نجاحها كل يوم 
اقارن بيني الان وبين نفسي لما كان عندي 25 سنة ...
الفرق الخبرات العمليه والحياتيه والانسانية ....
لما اطلب من حد عديم الخبرات - مهما كانت شطارته - انه يتولي قياده كبيرة باحكم عليه بالفشل الذريع ، لاني باحمله فوق طاقته وفوق اللي يقدر عليه ... 
الا اذا انتم - ايها المنافقون السياسيون - مش شايفين اي قيمه للخبرة والتعلم ، يبقي انتم نفسكم ماتصلحوش لاي حاجه ، مش بس لانكم بتنافقوا الشباب بحثا عن تأييدهم لكم ودعمهم لكم واصواتهم ، لا لانكم كمان مابتفهموش في الحياه وعديمي الخبرة لانكم بتتصوروا ان الحماس وحده يكفي للقياده ومش اي اي قياده لا قياده سياسية كبيرة زي الوزارات والمصالح الحكوميه والشركات ...
نفاق سياسي وانعدام خبرة ، مش عند الشباب لا عندكم انتم ...