اوعي تمشي وتسيبينا !!!!

( 1 )

اوعي.... اوعي تمشي وتسيبنا ، نصحي من النوم الطويل نلاقيكي رحلت غضبت منا ، من قلبك محيت اسامينا ودعيتي علينا ولعنتينا وخاصمتينا وانت بتحبينا ، قلت تمشي تأديبنا وعملت مش سامعه صوتنا ورحت ماشيه واحنا بنقولك بلاش اوعي تسيبنا ، انت قررت تسيبينا خدتي معاك احلي حاجه في تاريخنا وعمرنا ، خليتي بينا وسط صحرا واتخليتي عننا ، كنا اطفال محتارين لسه بنفك الحروف ونقوي القلب علي الخوف وشنا في الحيطه واحنا مخروسين متكدرين متذنبين ، وانت ماشيه بنناديكي ، نرجوكي نصرخ عليكي ، وانت ولا بتعبرينا ولا بتردي ندانا ، وترحلي غضبانه منا ، لاننا اهملنا حبك ومعرفناش فعلا نحبك ، ولاقدرنا التاريخ ولا يوم وقفنا جنبك وفرحنا قلبك ، ولا صنا معزتك و كبرنا عزك ، واتهزمنا الف مرة ، وحاربنا واتحاربنا ، وكل نكسه نقول بكره حننتصر و كل مره تصدقيناولما تيجي مره تانيه ونتهزم تعيطي جامد علينا ونعيط احنا معاكي ، اصل نفسنا مره نسعدك وننول رضاكي ، فاصبري شويه علينا و اوعي تمشي وتسيبينا ..

( 2 )

اوعي تمشي وتسيبينا ، انت زهقت من هزايمنا الكتيرة وزهقت من كتر العياط ، من ضحكنا و لعبنا ومن اللي سافر واللي هاجر ، واللي راجع واللي في الهيصه زاط ، وزهقت من كتر المحايلة ، وزهقت من كتر الكلام ، وزهقت من كتر السلام اللي يقل المعرفه ، وزهقت من كتر الزهق والانتظار ، وزهقت من كتر التمني واشتهيت الانتصار ، وحلمت ياما ببكره جاي احلي لينا ، وانتظرت وصبرت ولما فاض بيكي زهقت من الامنيات اللي فضلت امنيات ، ولاواحده فيها اتحققت وكأننا قاسين عليك ، وكأننا قاصدين نضايقك واحنا زي ماانت عارفانا حبايبك بس مش عارفين نفرحك ، ولانحافظ عليك وعمالين نجرحك ،وانت زهقت منا ، قوليها صريحه ، اذا كنا احنا زهقنا خلاص من نفسنا ، ومن حزننا ومن همنا ، ومن غُلبنا ومن صمتنا، ومن كتر كلامنا وقلة فعلنا ، ومن الهزايم اللي عماله تحرق قلبنا ، نفسنا مره واحده ننتصر ، مش كل مره نتقهر ونتكسر ، نفسنا نعلق الرايات ونفرح ، ونرقص في الشارع معاكي ، يوم سعدك وهناكي ، بس لحظه النصر ماجاتش وانت تعبتي من الهزايم ومن اعذارنا ومن عياطنا ومن رزانه عقلنا وكتر تهريجنا وعبطنا وصممت تمشي وتسيبنا ، قلت جايز يمكن يعني بهجرك عنا تعلمينا ، ان اللي يحب بلده يحطها في نني عينه و جوة قلبه ويخاف عليها ، ولما تناديه قبل ماتكمل نداها يكون خلاص رد عليها وقدم حياته فدا احلامها وفداها ، اللي يحب بلده يعرف ازاي ينتصر علشان يفرحهاويتعلم من هزايمه القاسيه عمره تاني مايجرحها ، يتعلم من هزايمه ازاي تاني مايتهزمش واحنا حبايبك لكن ليه مابنتعلمش بنتكلم كتير ، وعمرنا مانسمع ولا نفكر بجد ولانرسم احلامنا لبكرة وكيف حيكون شكل الغد ، وانتي خلاص زهقت من كلنا زهقتي من قله حيلتنا وغلبنا وقلت ماشيه ... واحنا بنقولك اوعي تمشي وتسيبينا ، اصبري شويه علينا ...

( 3 )

قلت ماشية وانت قاصده تعلمينا ازاي نحبك ، بالعطاء مش بالكلام ، ولا برسم الكدب في الاحلام ، ولا ببيع الاوهام ، تعلمينا ازاي نحبك ، لما الوجع يوجعنا اكتر ، والضلمه تبقي ليل نهار ، والقمر يخاصمنا زيك والبرد يحتل الديار ، والوجع يخرس غنانا والحلم يرحل عن خيالنا ، ويبدل الفرحه سكوت والحياه اللي كنت اجمل حاجه فيها تتبدل خوف وموت ، والموت يبقي زي العيشة مر والحياه طبعا امر ، واحنا نفضل موجعين ، من حضنك الغالي ياغالية ومن جنة ترابك مطرودين ، ونناديك نقول يارب تسمعنا وانت سمعانا وعنيدة ولابتردي علينا وكأنك ياحبيبتي بعيدة سايبنا نتعلم من وجعنا ومن هزيمتنا سايبنا نكبر وقاعده تدعي ربنا نكسب ونفلح ، ولما طال الانتظار والزمن اصبح مرار زهقت منا وقلت تمشي وتسيبينا ، اوعي .. اوعي تمشي وتسيبينا محتاسين ، مش فاهمين الدرس لسه ولا فاهمين اخر حصة ، ولا عارفين اخرتنا فين ولاعارفين جايين منين ، طولي بالك علينا واشرحلنا مره تانيه ، قولي اخر كلمتين قبل ماتمشي ياغاليه اما نعرف ننتصر ، فترجعي ياغاليه لينا واما نفضل ميتين ، فتعيطي جامد علينا ، لكن انت خلاص زهقت من الكلام وكفرت بكل امانينا والاحلام ، قلت تمشي ويأما نعرف نفرحك فنرجعك واما تمشي للابد وتسيبنا ياحبيبتي حزنانين .... طيب وحياه خالتي ام حمادة ومرات جدي جورج بسادة وابن عمة طنط بطة وحياة فاطمة ومريم وميلاد وحياه كل البنات القمرات والولاد وحياه كل من مرعلي بابك وحبك ادينا فرصه واصبري شويه علينا واوعي تمشي وتسيبنا ....

( 4)

اوعي .... اوعي تمشي وتسيبنا وتاخدي معاك احلي الذكريات ، لما تاخدي معاك كل حاجه جميله حصلت في حياتنا وتسيبنا من غير ماضي ولا حاضر جميل ، نستحمل العيشه ازاي ياغاليه ؟؟ ونعيشها ليه ؟؟ده احنا حنبقي يتامي واهالينا عايشة ، محرومين من الدفا ومن الحنان ، والابوة والامومه والامان ، مقطوعين من شجره ماتت ، نشبه فرع ميت جدره مات قصاد عينه ، ليه ياغاليه حتسيبينا وماشيه ليه واحنا بنحبك ياغاليه ومهزومين ، ماسكين ديل جلابيتك مقهورين ، ماهو لما تمشي وتسيبنا تدبحينا ، حتسيبنا ازاي وتمشي ، توجعينا ازاي وتقسي ، ده انت لسه مامشتيش وخلاص الخوف قتلنا ، لو مشيتي ورحلتي تفتكري ازاي يبقي حالنا ؟؟ اصبري شويه علينا واوعي تمشي وتسيبنا ...

( 5 )

قولي حتاخدي ايه معاكي وانت ماشيه ، حتاخدي ماضينا اللي فات ولا كتب التاريخ والذكريات والسواقي والقناطر وكل الاهرامات ، ولا النيل الفسيح جايب الخير وات ، وبرديات الفراعنه خايفه عليها منا والتماثيل العظيمه ، والمسلات حتخلعيها ياغاليه وكل حاجه ليها قيمه ، راح تخبيها منا خايفه من ايام جايه رضية ، خايفه منا علي التاريخ وعلي الحضاره ، خايفه علي اسمك وروحك من التتار ، ناوية تاخدي معاك في رحلتك كام دير وكام كنيسه تحافظي عليهم جوه قلبك من سنواتنا الكبيسة ، ناويه تاخدي معبد ابو سمبل وطريق الكباش تحكي عن كل تاريخنا لحبايبك اللي جه زرانا وقت عزك واللي ماجاش وكحل عنين الفراعنه حتشيله للعرايس لما يوم الفرح يجي ، وابو الهول حتودعيه ويفضل اسير معانا ولا حتاخديه ياغاليه وتسيبنا خايفين حزانا ، والازهر تشيله من مكانه بعواميده الاثرية ومدارس العلم والفتوي والوسطيه وطه حسين وشهاده العالميه ، دول برضه حتاخديهم ياغاليه وتسيبنا طيب ومقام الست زينب والحسين سيدنا حتسيبهم ينفعونا في ليله صعبه يدعوا لينا ولا في الغربه حتاخديهم معاكي وتستخسريهم فينا ، ونفيسه العلم حتسيبها لمين وراكي ولا هي كمان حتاخديها معاكي ؟

والفيشاوي تقفليه وانت زعلانه علينا ، زمن الغنا والقعده والصحبه الجميله راحت عليه ، والشعر والازجال والدواوين تخرسيها ، والنايات تكسريها ، والغناوي تحرميها من المعاني وتحرمينا ، والموسيقي الحلوه تاخديها معاك وتسيبنا ، ناوية تاخدي معاك دواوين جاهين وحجاب ونجم والنديم ، واغاني شاديه وعبد الحليم ، والحجار و منير ورشدي ، وعبد الوهاب وانت عمري ، وبليغ وكل الفنانين ، ناويه تحرمينا من فرقه رضا ، لارقص خلاص حنرقص وحنقضيها بكا ، والست ام كلثوم تاخديها معاكي وتسيبنا في شرق ضلمه كوكبه سافر وراكي ، والجامعه برضه تقفليها والتلاميذ تروحيهم والكتب تحرقيهم والمدرجات تقفليهم ، محفوظ وادريس العباقرة من ابداعهم تحرمينا ، ومسرحيات عبد الصبور ونجيب سرور ، وكلام الشرقاوي وحكايات القهاوي ، والمهندس وعادل امام والريحاني ضحكهم حتحرميه وترجعيلنا الغم تاني ، وتلمي الكور الشراب من العيال وتقطعيها ، والشوارع اللي كنا نحبها ونحب فيها تغييرها ، والنكت وخفه دمنا حتسكتيها ، باختصار كل ذكري في كل قلب حتمسحيها ، وتسيبنا صفحه بيضا يكتب الزمن الاسود بحروفه عليها اسمه هو ويمحي اسمك واسامينا .. طيب اصبري شويه علينا وطولي بالك معانا واوعي تمشي وتسيبينا !!!

( 6 )

حتاخدي ايه ياغاليه معاكي ، القمح الاصفر في الغيطان ، الشمس وصوت الادان ، الامومة والحنان ، صوت هديل الكروان ، الحنة من كعب الصبايا ، وحتاخدي كمان الرحاية ، والكحل من رمش البنات والضفاير الطويلة علي الضهر تضحك ، شمع زفه العروسة ولا طرحتها الحرير ولا مفرش سفرتها ولحاف السرير ، منخل السبوع والهون والمغات ، ذكرياتنا واللي جاي واللي فات ، عوايدنا وعادتنا وتقاليدنا الجميله ، ناي ومزمار وطبله وصاجات ، والاغاني والموسيقي والنايات والمواويل الجميلة والسعاده في ليالي القمر الطويلة ، حتاخدي منا فوانيسنا القزاز والشمعه وتحرمينا من ليله الخميس وبخور صلاة الجمعه ، حتسرقي منا سهرتنا في ليالي رمضان وتحرمينا من فرحه الصيام ، ولما نخرج من الكنيسه حتحرمي علينا الكلام ، حتاخدي تكعيبه العنب البناتي ، وريحه الشوي عند الحاتي ، وعودين ياسمين وفل ، وبسمه ناوية تخطفيها من فوق وشوش الكل ، وتسيبنا موجوعين ، البنات بترقص قدام المرايه وتغني ، والحمام الطاير وقت الغروب متحني ، والحواري والكباري والتكيات القديمه والمباني الاثريه في شوارعنا العظيمه ، ناويه تاخدي الترماي القديم ومقله اللب وعربيه الحرنكش ، واغاني بياعه الدرة لما تلهلب فحمها ، ناويه تاخدي معاك كورنيش النيل ، ووقت المغربيه وقمر الليل والفرحه والحلم والمواويل ، وتسيبنا مقهورين ، قولي حتاخدي تاني ياغاليه معاكي ، بيوت الفلاحين في الصعيد ولا عرق الشقيانين ، ولا قعده مصطبتنا في يوم دفا ، ولا لمه عيلتنا وضحكها وقت الصفا ، ولاريح البحر ناويه تخطفيها وتسيبينا مخنوقين ، ولا زفه العروسه لما كنا فرحانين ، ولا نخل طريق بلدنا ناويه كمان تقطعيه ، وشجر البرتقان قبل ماتمشي تقلعيه ، والارض اللي كانت سمرا طيبه تبوريها ، والترع اللي تجري الميه فيها تنشفيها ، وتسيبينا شراقي وعطشانين ، ولانصعبش عليك مااحنا ياغاليه متعاقبين اصل زمن الحب راح ، والمحبه والاماني والوجع فتح الجراح ، وفكرنا بهزيمتنا تاني وانت خلاص زهقتي منا ومن الاماني ، طيب اصبري شويه علينا واوعي تمشي وتسيبنا !!!!

( 7 )

حتاخدي معاكي ياغاليه وانت ماشيه ، حتاخد زلعة المش وتمشي وتسيبنا حياتنا ماسخة ، حتاخدي خبيز جدتي وعيشها المرحرح ، والقراقيش اللي نقشتها بايديها ، وصاجات الكعك رصتها بفرحه ، حتاخدي معاك البتاو والعيش الشمسي وبطرمانات المخلل وصينيه القلل المعطره بالمورد ، وبطرمان اللارنج اللي خالتي زرعته شجرة اصالة وماتت وسابت لنا طعم الفرح ، ومربي الورد اللي ستي عطرتها بطيبتها ، حتاخدي معاكي الوان شم النسيم وتسيبنا في عيشه سوده مخنوقين لا نسيم قادرين نشمه ومن الوان الفرحه محرومين ، حتاخدي معاكي قدره الفول المدمس وتسيبنا نعيش من غير مزاج اصل الا الفول ياغاليه ده مزاجناوحبيبنا وتفانين نفس اجمل طباخينا ، حتمنعينا من الحمام وصواني الكنافه والباميه ورز البرام ، وتسيبلنا اكل سم نموت وناكله اكل طعمه مانعرفوش !!! الفرن القديم بتاعتنا حتردميه وكل اكل كنت جايباه لينا مخصوص حتمنعينا منه وترميه ، وتسيبنا نحكي عن ايام زمان ايام جدودنا لما كنا ولما كان ، وكانت الايام جميله بس ماحافظناش عليها ، قولي بس ناويه تاخدي ايه كمان معاك وانت ماشيه ، الطعميه والعجميه وغزل البنات وصواني البسبوسه وسكر النبات ، والفول النابت والعيش والسكر السنترافيش ، والعروسه الحلاوه والحصان دول كمان حتخديهم معاكي وتسيبي مولدنا من غير حلاوه وتسيبي لينا المر وصفه للقلوب الموجوعين طيب بس طمنيني لما حتمشي هنهون عليكي وحتسيبنا لمين ؟؟

( 8 )

ناويه تاخدي ايه معاكي تاني وانت ماشيه ، القناطر والرحلات المدرسيه ، والشجر اللي شاهد علي الغرام بين شباب زينه مجدع واجمل الصبايا ، لما كانوا بيحلموا ببكرة بتاعهم فقبل مابكره يجي امبارح خدعهم وباعهم ، ناويه تاخدي كل المراكب في الغروب وتسرقي النيل والبحر وتسرقينا ، وتردمي كل السواقي وتكسري كل الصاجات وتلغي اغانيك وكل النغمات ، الجربي حتشيله كمان من راس البر ومعاه هوا البحر وقعده البلاجات وحتسيبي لينا المشانق منصوبه علي الرمله تفكرنا بكل اللي فات ، وحتمسحي اسم الاحبة من فوق صخره ميامي ولما نيجي نشتكيليك تسيبنا وتخشي تنامي ، حتي مطروح حتقفلي سكتها وتمنعينا وتقولي هناك حمام كليوباترا وشاطيء الغرام وانتم مالكوش في المشاعر والهيام ، فسيبوا التاريخ في حاله لما تبقي تخفوا من فقدان الذاكره ابقوا تعالوا ، وتقسي علينا وتحرمينا وتمشي في الاخر وتسيبينا طيب قولي اي كلمه وطمنينا .. حتسيبنا ياغاليه وتمشي وتخلي كل ايامنا حداد ، وتقسي قلبك علينا وتعيطي علينا من ورانا ، وتستقوي قدامنا ولاكأنك من جماد ، وانت اصلا مرهفه وام الحنان حتي لما بنوحشك بتطلعي من مخبأك الهرم وتوعديه ، انك لمكانه الاصلي حترجعيه ، وحترجعي تضحكي تاني في وشوشنابعد مانكون انتصرنا بعد سبعميت مليون هزيمه ، وانت صابره وعماله تقوي فينا ، واحنا لسه بنتعلم ازاي ياغاليهنعرف نحارب ولسه ماطمرش فينا العلام ، لسه بيخدعنا الكلام !!!

( 9 )

بالحق قولي لي ياغاليه حتاخدي معاكي ايه تاني في رحلتك الللي مش ناويه منها ترجعي ، تاخدي اجمل مشاعرنا وتسيبنا في البلاده غرقانين ، وتقولي ايش فهمكم انتم في المشاعر ، وكنتوا فين لما دبحوها وباعوها وسكتم ، كنتوا فين لما ضربوا الاحبه في الشوارع وطلبوا من الحب بطاقته وهو صعلوك وصايع ، كنتوا فين لما مسحوا الاغنيات من الشرايط وركبوا الهم عليكم ، كنتوا فين لما كانوا حيهدوا الهرم والكنيسه حيشيلوا منها رنين الجرس والادان سكتوه وقالوا ده زمن الخرس والحريم شالوا منها الرحم وعقموها وكل الارض بوروها والرجاله الزين المجدع خوفوها وبلقمه العيش هددوها وبرزق العيال والسجن وجهنم الحمرا وقوايم الذنوب والفضايح صغروها ، كنتوا فين لما كل ده حصل واكتر ، كنتوا ساكتين وشاربين الهزيمه نقطه نقطه ومتخلين عن شرفكم والعزيمه ، ومستنين لما السفاحين يقتلوني الف مره ومجهزين هدومكم السودا ودموع الحزاني المكلومين خلاص بقي ارحموني ، ده اللي قلتيه لينا وانت خلاص مسافره قلت ماشيه قلت راحله قلت ياتفوقوا وتصحوا ياتروحوا في الف داهيه ، قلت ياتتعلموا الدرس الاخير ياتتهزموا تاني ، وساعتها امسحوا اسمي من علي كل اوراقكم وغيروا البطاقات ، وشوفوا خريطه تقبل بالهزيمه وتوأد البنات ، وانسوني وسيبوني ابني مجدي وارفع راياتي بعيد ، في مكان تاني اهله لسه مابقوش عبيد ، في بلاد بتفهم في الحب والفرحه والعيد ، وتحترم التاريخ والجغرافيا وتدافع عن وجودها بقلب جامد ودماغ عنيد !!! كل ده قلتيه واكتر واحنا قاعدين بنسمع، والدموع بحر جاري والحيره سم ، ونفسنا نفرحك والعيشه هم واكيد بكره حننتصر بس انت اصبري شويه علينا واوعي تمشي وتسيبنا !!!

( 10 )

قلتي ايه ياغاليه خلاص ، رضيتي علينا ولا لسه ، قاعده ليه ياغاليه تحت شباكنا ومابترديش علينا ، ولو اتكلمتني مرة من كتر ما صعبنا عليكي ، بتفكرينا بخبيتنا وتستخبي بذكرياتك وتحمي لينا ذكرياتنا ، وتقولي شدوا حيلكم واجمدوا واستحملوا وانا بكره حارجع لما ترجعوا الغنا في القهاوي وترجعوا ست الحسن في كل الحكاويوماتخافوش من ضحك البنات وتتعلموا من اللي فات ، ان اللي يسكت ويفرط في بلده تمشي وتسيبه ، وتمسح اسمها من فوق جبينه وتسيب له شلالات دموع هديه بيها تفكره وتكدره ، قلت ماشيه قلت راحله قلتي خلاص بطلوا تنادوا علي وانت قاعده بكل حبك تحت شباكنا مستنيه نناديك ، ونعرف نصالحك ونراضيك ، ونعرف نبطل نتهزم ونعرف كمان ننتصر ، ونعرف نعيش ايامك الحلوة ياحلوة وراسنا مرفوعه لفوق ، طيب وحياه عمتي سعادات وابله تريزا جارتنا الجدعه وحياه الواد الشطور نوار وحياه البت صفية العسله وحياه كل اللي بتحبيهم واللي ناويه خلاص تسيبهم وحياه غلاوتنا عندك وحبك لينا ، اصبري شوية علينا واوعي تمشي وتسيبنا الوجع جامد ياغاليه واحنا مش حمل الاسيه ، وناوين بجد ناوين نبطل نتهزم اصل الهزيمه ماتليقليناش ولاشكلنا والهزيمه مش قدرنا والنصر جاي مهما انكسرنا ، اوعي تمشي وتسيبنا اصل البلد اللي عايزين يجيبوها لينا رسمه في خريطة بلد لقيطة ، مالهاش تاريخ ولا ليها حضن يلمنا ، لاعمرنا حنحبها ، ولا عمرنا حنغني يوم باسمها ، ولاهي تشبهنا ولا احنا نشبه لها ، لا عسلها نيل ولا صبحها زيك جميل ولاابتسامتها تطيب القلب العليل ، ولا فيها كروان بيحب الغنا ولاحتقسامنا الهنا ، ولا بناتها منورين ولا رجالتها حنينين ولا حنسكر من نسيم بحرها ولا ريحه الاصاله في دربها ولا طيبه وحنينه زيك كده ومهما قالت عمرها ماتحبنا ومهما عادت عمرنا ما تحبها ، فاوعي تمشي وتسيبنا لو لسه بتحبينا ، حنذاكر الدرس بسرعه وحنفوق ونتلم ونصحي ، ونعزك قد ماتستحقي ونتعلم ازاي نبطل نتهزم وازاي نبطل نتغلب وازاي نبطل نتخدع وازاي نفكر وازاي نقرا ونكتب وازاي نقدر وازاي نحترمك زي ماانت تستحقي وازاي نقدم عمرنا فداك وانت غاليه بس اصبري علينا واستني شويه واوعي تمشي وتسيبينا !!!!

هل لهذا الوطن ام ؟؟؟

هل تهب بحق رياح التغيير علي وطننا ؟؟؟
هل سيشهد المجتمع المصري تغيير جوهريا بدأت اولي خطواته هذه االايام ؟؟؟
وان كان التغيير قادم ، لاي اتجاه سيكون ؟؟؟
الحقيقه لااظن !!!
التغيير مساله موضوعيه تتجاوز رغبات الناس وضيقهم !!!
تتجاوز حماسهم !!!
التغيير يحتاج لادوات موضوعية ، بديل منظم ، له برنامج يستقطب قطاعات كبيره من الناس يرون ذلك البرنامج يحقق احلامهم وطموحهم بالنسبه لحياتهم وبالنسبه للوطن!!!
مجرد اخطاء الحكومه والنظام الحاكم لايكفي للتغير
مجرد السخط عليهم او الغضب منهم لايكفي للتغير
الهمس واللمز والصراخ والمقالات والبرامج التلفزيونيه لاتكفي مهما راكمت غضب او توتر لاحداث التغيير!!
لاتغيير بدون ادوات !!!
وادوات التغيير ليست الغضب مهما بلغت حدته !!!
ماهي ادوات التغيير المتاحه او الممكنه او التي يعول عليها الزاعمين باقتراب التغيير؟؟؟؟
انهم يرون الغضب فيتصورون انه سيؤدي حتما للتغيير الذي ينشدوه !!!
رغم انهم - الزاعمين باقتراب التغيير - شتات متناقض لايجمع بينهم الا الغضب وليس اي شيء اخر !!!!
ربما يتكاتفون لهدم الجدار العالي ، وربما ينهدم تحت قوتهم الجماعيه ، لكن بعد هدم الجدار لن يبقي لنا شيئا ، لانهم كل فصيل منهم علي حدة اعجز من ان يفعل اي شيء ، ولو كان احدهم قوي بما يكفي لاحداث التغيير عن طريق التفات الناس حوله ، لكان طريق التغيير واضح المعالم بصرف النظر عن اقتناعنا به من عدمه وقريب مهما بعد !!!
هل سيأتي التغيير بقوات احتلال تقيل الحكومه وتعزل النظام الحاكم عن ادوات قوته وتحقق احلام الشعب !!!!!!
هل سيأتي التغيير عن طريق تنظيمات سريه تستيقظ ذات ليله تستولي علي الحكم وتقود الوطن لمساراتها !!!
هل سيأتي التغيير من خلال عمليه ديمقراطيه يتم فيها تداول سلمي للحكم عن طريق منح احد الاحزاب المعارضه اغلبيه اصوات الناخبين فيكون له الاغلبيه البرلمانيه ثم يشكل الحكومه ثم تختار تلك الاغلبيه الرئيس الجديد للجمهورية بما يترتب علي ذلك من اثار !!!
يامن ترون التغيير قريب ، بالله عليكم افيدوني ماهي الاليه التي تعولون عليها ركيزة لرؤيتكم في اقتراب التغيير !!!
يامن ترون التغيير قريب ، بكل فصائلكم بكل اتجاهاتكم ، بالامانه والحقيقه ، ماهو موقف الشعب الذي تتحدثوا عنه من التغيير الذي تدعوا باقترابه ، هل يؤيدكم ، هل سيؤيدكم ، هل متعاطف معكم ، هل سيدعمكم ، هل لايكترث ولن يكترث بالامر !!!
ام انه لايوجد شيء اسمه الشعب ، باعتباره مفعول به في جميع الاحوال ، وحتي لو وافقتكم علي هذه الرؤيه العبثية ، اذن من الذي سيؤيدكم ويدعمكم ويسير خلفكم في طريق التغيير !!!!
اسجل ............ ان الغضب الشعبي متنامي ويتراكم كل يوم !!!
اسجل .......... ان التغيير لايحدث ابدا بسبب الغضب فقط !!!
اسجل .......... اني لااري حتي الان اية الية يمكن التعويل عليها والاعتماد عليها لاحداث التغيير!!!
اسجل .............. ان فوضي عارمه يدفع لها المجتمع بكل قوة باستغلال الغضب المتنامي!!!
ربما تكون الفوضي هي الركيزه التي يعول عليها البعض لاحداث التغيير ، باعتبار انه عندما تدب الفوضي في الوطن وتتمزق اوصاله وتشتعل النيران في ثوبه وثوبنا ... في هذا الوقت ، ربما يقفز علي حكم مصر اي فصيل سياسي تافه ضعيف لايلقي بحق اي تاييد جماهيري حقيقي لكنه وقت الفوضي سيكون الاكثر تنظيما والاكثر قدره علي الاستيلاء علي الوطن ربما مدعوما من الخارج باي قوي دوليه او اقليميه !!!!
لو دبت الفوضي في البلد واحرقت الاخضر واليابس وتمزقت اوصال الوطن وحدث تغيير قسري بلا اراده من الشعب في الاختيار استثمارا لغضبه مما يعيشه الان واستولي الفصيل السياسي السري او العلني علي الحكم لانه الاكثر تنظيما والاكثر قدره علي التصرف بصرف النظر عن حقيقه التفاف الشعب حوله وقبوله لمبادئه وبرنامجه السياسي ، لو حصل هذا ........ لااحد يعرف مالذي سيراه هذا الوطن ولا مالذي سيعيشه هذا الشعب !!!!
لو حدث هذا ............. سيسجل التاريخ بعد عشرات او مئات السنين ، ان وطنا عظيما عريقا صاحب حضاره وتاريخ مثل مصر ، قد تمزق علي ايدي بعض ابناءه الذي استبد بهم اليأس وعصفت بهم الرغبه في تغيير الحال رغم عجزهم ن بناء اليات موضوعيه للتغيير فماكان منهم الا هدم المعبد علي رؤوس الجميع !!!!!
لو حدث هذا .............. لانملك جميعا الا الدعاء لله الرحيم القدير ، ربنا يستر !!!
سؤال اخير ....... لماذا رغم كل الغضب الشعبي المتنامي والسخط لم يخرج الناس من سلبيتهم وعزوفهم عن المشاركه والمعارضه الايجابيه ولااتحدث هنا عن بضعه مئات من الناشطين او المتحمسين او السياسين ، بل اتحدث عن الشعب !!! ولا هو مافيش حاجه اسمها الشعب ، ويااما الحكومه تتكلم باسمه ، يااما حد تاني يتكلم باسمه وبس خلاص !!!!!!!!!
ملحوظة اخيرة ............ اتمني تغيير حياتنا للافضل ، لكني اخاف علي الوطن من محبيه الذي استبد الحب بقلوبهم لدرجه اليأس واصبحوا مستعدين لاي شيء حتي لو كان ( العمليه نجحت والعيان مات ) !!!!
اخر حاجه حاقولها ............. هل تذكرون قصه سليمان الحكيم والسيدتين اللاتي تنازعن علي طفله ادعت كل من السيدتين انها امها ، هل تذكرون حكم سليمان الحكيم بقسمه الصغيره نصفين من وسطها وتسليم كل من السيدتين نصف الصغيره بعدما عجز عن استبيان من امها الحقيقيه ، هل تذكرون مالذي حدث وقتها ، صرخت واحده منهن وقررت تسليم الطفله للاخري التي تنازعها علي امومتها !!! هل تذكرون مالذي حدث وقتها ، امر سليمان الحكيم بتسليم الصغيره للسيده التي صرخت خوفا علي الصغيره من التمزيق ، فخوف السيده وهلعها علي الصغيرة افصح له عن امومتها الحقيقيه للصغيره بينما صمت الاخري وبلادتها وقت سمعت الحكم بتمزيق صغيرتها افصح عن انها يستحيل تكون امها!!!!!!!!!!!
هل لهذا الوطن ام تخاف عليه من التمزيق وقسمته نصفين او ستين نصف !!!!!!!!!

باحبه ومقدرش علي بعده !!!!

هذا هو الوطن ....

اعود لحضن امي ، لذكرياتي !!!
انام علي فراشي ، اشم رائحتي ورائحه احلامي فوق مخدته ، هنا نمت وحلمت وفرحت وبكيت !!!
في الغربه لاانام ولااحلم ... الحلم الوردي والكابوس المزعج لايزوراني الا فوق فراشي وانا محاطه بالطمأنينه !!!
الوطن هو فراشي الامن ، هي جدراني التي احبها ، مزركشة بانفاسي وانفاس احبائي ، جدراني انا ، مزينه بلوحاتي التي احبها ، الوان صاخبه فوق جدران صاخبه لمنزل تملكه وتعيش فيه سيده تحب الحياه وتتمسك بها ، هنا وسط جدراني ولوحاتي والوان الصخب التي طليت بها الوسط المحيط بي ، هنا ، اعيش الطمأنينه وانام واحلم بالاحباء والفرحه وابكي دموع الفرج فوق المخده واتقلب في الفراش بثقه لن اقع من فوق حافته ، انه سريري الذي احفظ وانا نائمه مقاساته ، انه حضن امي ، انه حضن ابنتي ، هنا تزورني جدتي وتنصحني وعمتي وتداعبني وخالتي وتشاكسني وامي تاخدني في حضنها ، هنا الوطن والطمأنينه !!!


هذا هو الوطن .....
رائحه الوطن ، رائحه الشوارع ، رائحه جدران منزلي ، رائحه السلم والبسطه ، رائحه فراشي ، ريحه حضن امي وقت ارمي نفسي بين ذراعيها ، رائحه الطيبه التي تلون كل الوجوه المبتسمه المكفهره في خريطتنا ، رائحه النعناع والريحان والياسمين وتوابل الخان العتيق ورائحه الطعميه في الصباح فوق مائده افطار لمه الاسره والعيله ، رائحه االلب الاسمر السخن خارج من الفرن ، رائحه غزل البنات ، السمك المشوي فوق الصفيحه علي بلاج ابو قير ، البيض المسلوق المتدحرج في السمنه وجدتي واقفه باعوامها الثمانين في المطبخ تلونه بالذهبي الرائع ، رائحه الخبيز في بلدتنا الريفيه وبيتها الجميل الذي اصر اعمامي علي بيعه وتقسيم تمنه واهدار التاريخ والذكريات ، رائحه الكعك يوم العيد ، رائحه الليمون الطازج فوق الشجر ، رائحه جدتي لامي ، تلك السيده الطيبه ذات الخدود الناعمه والشعر الاسود الحرير ، رائحتها وهي مريضه علي فراش الموت بعيون حزينه لانها ستفارقنا ، رائحه مدرج كليه الحقوق وكلنا متكدسون فوق بعض نضحك ولانحمل للدنيا هم ، رائحه قاعات المحكمه والبشر معذبون بانتظار العداله والانصاف ، رائحه الياسمين البلدي المجوز فوق شباك اوضتي ، رائحه مكتبي ذلك المكان الذي يعيش ويتنفس بسواعد الرجال ابناءه المخلصين يبحثوا عن لقمه عيشهم بمنتهي الدأب والاصرار والجديه والحب ..... رائحه الوطن ، ورد بلدي علي ياسمين ، ريحه بشر طيبين ، اطفال لسه مستحميين ، ريحه توابل علي بن محوج علي حلبه حصي ، ريحه نعناع في الشاي وريحه كيك لسه طالع من الفرن ، ريحه السميط السخن ، ريحه هوا البحر ، ريحه الدفا ، ريحه الحنان ، ريحه الريحان ، ريحه الشوكولاته بين ايدين الاطفال ، ريحه كورنيش النيل الفجر ، ريحه يود البحر لما تطس في مناخيرك وانت قاعد دافن رجليك في الرمله المبلوله ، حتي ريحه الرطوبه باحبها ، ريحه بيت البلد لما كان موجود قبل مايهدوه ، ريحه الزبده الفلاحي بتسيح في الطاسه وتتطش فوق الفول ، ريحه طشه الملوخيه ،ريحه السمك المقلي متبل بالتوم ، ريحه الفته ام خل وتوم ، ريحه البدنجان المقلي ، ريحه حله الرز المفلفل لما تعملها عمتي ، ريحه دخان الكباب وهو بيتشوي ، ريحه مربه الفراوله الصبح لما خالتي تطلعها من البرطمان بمنتهي الاحترام والفخر ، صنعه ايديا وحياه عينيا ، ريحه عقد الفل اللي يشتريه واد حبيب لبنت صغيره لسه بتحلم بالحب ، حتي ريحه ميه غسل الميتين بحبها ، بحسها مصريه خالص ، فيه ريحه عبق التاريخ وتحنيط الفراعه واحترام الميت في لحظات وداعه الاخيره ، ريحه دخان المعسل فوق الشيشه في الحسين ، ريحه الاطفال اللي لسه مولودين ، ريحه المغات ، ريحه الحنان ، ايوه ماهي الناس الحنينه ليها ريحه ، ريحه مريحه ، طالعه من قلوبهم لقلبك ، ريحه الارض المعزوقه بادين سمر شداد ، ريحه سنابل القمح في الغيطان ، ريحه الذره المشويه علي الكورنيش في المغرب ، دي رائحه الوطن اللي احبه ، رائحه الوطن !!! هذا هو الوطن !!!! هذا هو الوطن الذي اطمئن له وفيه !!! وحين اسافر اتركه وقلبي بعيدا واعيش جوفاء بلا روح حتي اعود ....

هذا هو الوطن ...
الشوارع التي اعرفها واحبها ، الشوارع باشجارها الخضراء الهزيله ، اوراقها مكتومه باطنان التراب الاصفر يغطيها ويخنقها ، الشوارع بارصفتها المكدسه بالباعه الجائلين ، يصرخون ينادون علي بضاعتهم بمنتهي الحب ، هذا اكل عيشهم وقوت عيالهم ومصيريهم لايملكوا غيره ليس لديهم بدائل ، هم يحاربون من اجل الوجود والبقاء ، هم طيبين يتمنوا لو الدنيا اعطتهم اكثر مما اعطتهم لكنهم قانعون بنصيبهم ، لااتضايق من الباعه الجائلين لااغضب منهم لااراهم يشوهوا وجه المدينه ولا يحتلوا ارصفتها ، اراهم بشر طيبين يتمنوا مكان تحت الشمس ، لايزاحموا احد ولا يطمحوا في سرقه مكانه ، كل مايطمحوا فيه يتركوهم يعيشوا ، الشوارع التي اعرفها واحبها ، الشوارع المزدحمه بالبشر الطيبين ، يجروا يدوروا علي مصالحهم ، اللي رايح المدرسه واللي رايح الشغل واللي رايحه السوق واللي رايح يزور حد عيان محجوز في مستشفي حقيره واللي مستني الميكروباص واللي نفسه يروح ينام واللي بيحلم ياخد دش ، اللي شايله خضار واللي شايله عيل علي كتفها واللي شايل مسطره التي بتاعت الهندسه واللي شاريه فستان جديد واللي جابت قماش التنجيد من الوكاله ، شوارع مزدحمه بالحياه ، بشر حلوين طيبين ، شايلين الهم معاهم راييحين جايين ، باحبهم ، باحبهم بزحمتهم بقله نظامهم بهدومهم المتربه بتراب الشارع ، باحبهم وهم مكشرين تعبانين ، وهما بيحلموا بحياه اسهل اجمل ، لكن برضه في طريقهم ماشين ، ووسط التكشيره والبوز ، حد يطلب منهم خدمه ، حد يسالهم سؤال ، حد يحصل له حادثه ، حد يقع ، ميت ايد تتمد ، ميت ايد تساعد ، هي دي شوارعنا الزحمه ، اللي بحبها ، الناس علي وشها ابتسامه صغيره ، ابتسامه مستخبيه ورا الهم والغم والصعوبات ، ابتسامه صغيره علي جنب واحد ، بتقول احنا بني ادمين نفسنا نعيش نفسنا ننبسط ، باحب شوارعنا الزحمه بليل والناس قاعده علي الكباري تتهوا وتشرب شاي وتاكل حلابسه ، باحبهم لما يكون في عروسه وزفه عربيات والناس كلها تزمر وتعمل ازعاج ، اصله ازعاج جميل وطيب ، ازعاج فرحه ، بيجاملوا بعض ، بيحيوا عروسه مايعرفوهاش ، باحب شوارعنا الزحمه وبشرها الطيبين ، باحب منظر العيال داخله المدارس الصبح ، لسه ماصحيتش ، هدومها غلبانه ومعظمها متكرمشه ، الشراب مدلل فوق الجزمه اللي مليانه تراب ، بحبهم يجروا جوه الحوش ويصوتوا من الفرحه ، بحب منظر الموظفين خارجين من الشغل ، من المحكمه ، من وزاره الزراعه ، من اي مصلحه حكوميه ، ناس كتير ، ده بيشتري برتقال وده بيفاصل علي تمن البطيخه ، ده بيجري عايزيجيب عياله من المدرسه ، دول شويه ستات واقفين مستنين اتوبيس المصلحه وهاتك يارغي وضحك مكتوم خجل ، باحب شوارعنا الزحمه ، حتي وقت زحمه المرور ، برضه باحبهم ، اصل الشعب ده طيب وبيحارب علشان يعيش ، نفسه يلاقي لنفسه مكان تحت الشمس ، باحبهم وهم بيحاربوا بيقاوحوا في الحياه ، باحب منظر الشباب خارج من الجامعه ، علي وشهم تعبيرات جميله ، نص صمت نص فرحه نص هم نص قلق ، خارجين مروحين او مزوغين او حيمشوا يضحكوا ويصرخوا ويتخانقوا ، باحب شوارعنا الزحمه ، ستات بحجاب بنقاب بنات لابسه من غير كم ، بنات لابسه بدي ضيق ، طرحه ومكياج ، بنات شعرها منكوش ، شباب حاطط جيل علي شعره ، شباب مربي دقنه وباصص في الارض ، شباب روش وبيعاكس طوب الارض ، باحب التركيبه دي ، باحب الخلطه دي ، باحبها ومابتضايقش منها ، مابقولش ايه اللخبطه دي ، لا احنا اللخبطه دي ، احنا اللخبطه اللي بحبها ، بحب زحمتها في ماتشات الكوره في السوق في وكاله البلح في العتبه في موقف عبود ، زحمه لكن كلها حياه ، ناس عاييشه بجد ، بتقاوح بجد ، بتكافح بجد ، زحمه لكن مليانه حميميه ، ياسلام لو قفشت ابتسامه علي وش حد يبتسمها ويلغيها بسرعه ، ياسلام لما تتلاقي العيون وفجا الناس تبتسم ، تبتسم ليه ، تبتسم لانها بتحب بعض بس مش لاقيه وقت تقول ، لانها متعاطفه مع بعض بس مافيش فرصه تعبر ، الشوارع الزحمه دي زحمه بشر وعربيات وخنقه وعوادم ، هي دي الشوارع اللي بحبها ، هو ده الوطن !!!!

هذا هو الوطن ....
خان الخليلي ، ميدان التحرير ، كورنيش اسكندريه ، سوق العتبه ، حلقه السمك ، ميدان الجيزه ، كوبري الساحل ، محلات بيع الهدوم القديمه في وكاله البلح ، مدرسه الاورمان الثانوي بنات في شارع الجيزه ، استاد القاهره ، سينما سنفنكس الصيفي ، سينما مترو ، الفيشاوي ، الازهر ، الحسين ، الكنيسه اللي في شارع الجيزة ، القلعه اللي علي البحر في اسكندريه ، ملاهي المعموره ، الجحش بتاع الفول ، البرنس بتاع الكبده ، بياع غزل البنات ، عربيه الايس كريم جروبي كلوكلو ، ام حنان بياعه السندوتشات علي كورنيش بحر مشتول في الزقازيق ، محل البن العتيق في الميدان الكبير في المنصوره ، القعده علي بحر العين السخنه في الشط الشعبي ، ترابيزات الخشب القديمه المهكعه في وداي الريان ، كورنيش اسوان والصخور السودا بتلمع تحت الشمس والمراكب بتشق السما وتجري ، محل فلفله في وسط البلد ، جنينه اغا خان ، ميدان فيكتوريا في شبرا ، محل السمك في الدوران ، شط ابو قير والقعده قدام البحر الميت ، الغيطان علي الطريق الزراعي ، بياعين البرتقال علي جنب الطريق ، بياعين السمك علي طريق الفيوم ، بياعين العنب علي الطريق الصحراوي مصر اسكندريه ، النخل المحاوط الطريق الدائري من كل جانب ، هو ده الوطن ، بيوت علي كل لون ، بيوت مدهونه الوان فاقعه ، وبيوت طوب احمر ، فيلل وقصور التجمع الخامس وبيوت فيصل اللي مبنيه من غير ترخيص ، بيوت مشتول بلدنا بالاسمنت المسلح وسط الزراعه ، وبيوت طين بتاعت الفلاحين ، كورنيش ماسبيرو والمراكب مستنييه العشاق والشباب والسواح ، اهرامات الجيزه وعبق التاريخ ، محلات الوكاله ، قمصان نوم علي ملابس داخليه ، علي هدوم بالات علي قماش تنجيد علي شباشب بلاستيك ، صيني وهندي ومصري وماليزيي وعلي كل لون ياباطسته ، سوق التلات كوبيات وحلل ومقاور ومباشر واطقم بايركس واطقم تيفال ، شارع عبد العزيز والتلاجات والغسالات والتلفزيونات ، بلطيم وجبال النرجس والبطيخ ، الاسماعيليه والشمام والفراوله البلدي ، شارع الصاغه في الزقازيق ، عربيات كارو عليها جهاز البنات ، دمياط وشوارع النجارين وموبيليا خشب ابيض علي كل رصيف ، المناصره والعمال المصريين المهره ، جنينه الحيوانات بالجيزه ، بيت الفيل وقفص الدببه تستحمي بميه ساقعه وجزيره الشاي والبط اللي بيعوم في الميه ، القهوه البلدي اللي في كل شارع شيشه وطاوله ودومنو ، الافران اخر ايام رمضان وصاجات الكحك وضحك الستات ، مراجيح الاطفال يوم العيد ، مركب وساقيه وحصان ، نصبه الكنافه والقطايف ليله رمضان ، ساحات صلاه العيد وتكبيراته في الشوارع والميادين ، راس البر وكورنيشها والجربي ، بياع المشبك ولقمه القاضي والفطير ابو سكر ، مركب في النيل ساعه المغرب عليها اتنين حبيبه مستخبيين من الدنيا ، ساقيه الصاوي ساعه حفله علي الحجار ، محطه مصر والناس بتجري عايزه تلحق القطر ، بوفيه المحطه ووجوه الناس عليها الانتظار والوداع والفرحه والحزن ، قاعه المحكمه ساعه حكم البراءه والزغاريد والفرحه ، بوابه السجن والناس واقفه تزور ابن او حبيب خلف القضبان ، ناس تعبانه ومكلفه نفسها وشايله ورايحه لكن مبسوطه لانها حتشوف حد باعدت بينها وبينه الايام ، عربيات الترحيلات يهتف اجمل شبابنا من خلف صندوقها الحديدي اصحي يامصر ، استاد القاهره والناس خارجه من ماتش للفريق القومي كسبانه فيه واعلام هيصه وطبل وزمر وتحيا مصر ، هي دي مصر كورنيش النيل الزحمه ، كورنيش اسكندريه وكوبري استانلي وقت الغروب ، بياعين الترمس والذره ، بياعين الحرنكش والدوم قدام باب المدرسه ، اطفال صغيرين في المدرسه كانوا بيحيوا العلم ومعرفش لسه بيحيوه ولا بطلوا ، حفلات الذكر والله حي الله حي ، الله حي الله حي ، الوطن حي الوطن حي !!!! هذا هو الوطن الذي احبه ولااقوي علي مغادرته وحين ابعد تنسحب روحي واعيش مجففه مخنوقه اتمني اعود لحضن الوطن وحضن امي !!!!

الوطن ... الناس الطيبين !!!
الناس اللي خارجه في الشوارع تجري علي اكل عيشها ، الشغاله اللي بتسيب عيالها وتخرج من الفجر تخدم في البيوت لان جوزها عاطل او طفشان او نايم في البيت او سافر ومارجعش وماتعرفش عنه حاجه ، سواق الاتوبيس اللي طلعان عينه وسط الزحمه وكل الناس بتشتمه ، الواد اللي واقف علي سلم الميكروباص يصرخ عتبه عتبه فيصل فيصل ، سواق التوكتوك اللي مزوق التوكتوك بالنور والاعلام ، مدرس المدرسه الابتدائي اللي واخد العيال وطالع رحله ، حاجب المحكمه اللي يصرخ من قلبه محكمه ، الممرضه في المستشفي ، الست اللي واقفه علي الحمام في واحه عمر ، تسلمك ورق التواليت ومبتسمه ونفسها في جنييه يهون عليها الوقفه ، المحامين اللي عاملين يترافعوا في اوض المحامين ، الشباب اللي رايحين الماتش وماسكين طبل ودفوف وراسمين علي وشهم علم مصر ، عسكري المرور اللي الشمس واكله راسه ، عسكري الامن المركزي المحبوس في صندوق حديد لغايه مايقولوا له اضرب يضرب ، الفلاحه اللي قاعده في السوق تبيع شويه زبده او بيض بلدي ، الستات اللي بتفك عن قلبها وتجري من بيوتها تصلي في الجامع تصلي وتدعي ربنا وتفك عن نفسها وترغي حبه تشتم في الجوز والعيال المتعبه وقله البخت وقصر الايد ، المراكبي اللي قاعد في المركب مستني رزقه من عند ربنا ، بياع اللب في المقله يتفرج علي الناس رايحه جايه قصاده لغايه ماحد يقوله بربع جنيه لب ، بياع البطاطا ، بياعه الدره المشوي ، القهوجي ابن البلد ابو دم خفيف شيشه وشاي ودومنو وطاوله ، اللي واقف قدام الزيت السخن بيقلي طعميه ، المضيفات الصغييرين في طيارات مصر للطيران ، ستات شكلنا مش حلوه ولا جميله لكن مليحه وعندها امل في الحياه وعينها بتلمع ، عامل الاسانسير في اي مبني حكومي كفران طقهان لكن بيتشغل ويقاوح ، منادي العربيات ابو دم خفيف ، الناس اللي خارجه تكافح في الحياه ، البياعين في السوق ، المدرسين في المدارس الحكومه ، البنات اللي بتخدم في الكافياهات لابسه قصير وجيبات قصيره لزوم اكل العيش ، بتاع البخور يلف علي المحلات يخش بالعافيه ويملي المحل بخور ويصرخ صلي علي النبي ، الشحات ابو بدله خضرا يجري في الشارع يدور علي حد يحس بيه ويدي له اللي فيه القسمه ، البقال العجوز اللي لسه بيبيع باتنين جنيه جبنه واتنين جنيه حلاوه ، بتاع المراجيح يوم المولد ، بياع التوت في السوق ، الفكهاني الخضري الفرارجي العطار ، ستات البيوت بتحاول تمشي حياتها بجمعيه وقسط وكفاح ويارب العيال تنجح ، الراجل اللي واقف من الفجر علي عربيه الفول يغسل الخضار في الجردل ويستني زباين الصبح ورزقهم ، العيال اللي قاعده تحت الباكيات في سوق العتبه تلف شوكولاته ، الجزمجي اللي بيلف بصندوقه يلمع الجزم ، الخياطه اللي بتفصل ايده في رجله ، قمصان نوم العرايس العريانه وتقصر البنطلونات الجيز ، عامل الامن الغلبان اللي واقف علي بوابه برج كبير كل اللي داخل واللي خارج مابيصبحش ولا بيمسي عليه ، الناس اللي قاعده علي القهوه لا شغله ولا مشغله ، تلميدات الثانوي خارجين من المدرسه زي الفراشات كلهم امل في الحياه مستنين واد جميل يعاكسهم ، عمال التراحيل اللي وافقين فوق الكوبري شايلين قدوم واجنه ومستنين شغلانه ويوميه بالعافيه تكفي اكل العيال وبكره ربنا يفرجها ، البنات اللي بتغني في الزفه نازله السلالم يامشالله عليها ، الناس اللي بتعزف مزمار بلدي وتغني مواويل صعيدي ، الكهربائي السمكري الطبال النجار ، الفلاحين في الغيط وسط الشمس والنقاريه يعدلوا الجلابيه فوق خيال الماته ويعزقوا الارض ويقولوا يارب ، الصياد بالشبكه يخيطها ويرميها ويقول ياكريم ، الوطن هم المصريين الحلوين الطيبيين الجدعان ، اللي بيقاوحو في الدنيا ولا يتكسروا قدامها ، الناس خارجه من الجامع والكنيسه تقول يارب ، الستات العواجيز بوشوش مكرمشه وابتسامه راضيه وسبحه يرددوا عليها الحمد لله الحمد لله ، الجنايني اللي بيروي الارض بحبه تطلع ورد وفل وياسمين ، العربجي فوق الحنطور ، الكسماري في الاتوبيس ، اللي بيقطع تذاكر السيما ، اللي واقف قدام فنادق الخمس نجوم ياخد العربيه من الرواد ويستني البقشيش ، البهوات المحفلطين اللي عاملين نفسهم ولاد بارم ديله ، غلابه الدنيا فهمتهم ان كل مااتألط مقامه علي ، النقاش الحداد اللي بصلح بوابير الجاز اللي بيسن السكاكين اللي بيبع حماده اللي بيلعب ، بياع البالونات يوم العيد ، بياع الدندرمه الفشار غزل البنات ، رقاصه الدرجه التالته التخينه اللي مالقيتش حاجه تعرف تعملها غير ترقص والناس تتريق عليها ، المصريين الحلوين الطيبين ، بعيوبهم بمشاكلهم بهمومهم بهدومهم الغلبانه بدقنهم الطالعه بجزمهم اللي مش متلمعه بالعمه والجلابيه واللاسه والعبايه ، بالفستان والتايير والبدله السينيه ، بالنقاب والحجاب ، بالمايو والبيكيني ، علي بعض كده ، حلوين قوي طيبين قوي باحبهم قوي !!!!!!!!! لما امشي واسيبهم ، اشوف ناس تانيه في بلاد تانيه ، لا احسهم ولا احبهم ولا افهمهم ، احس غربه تاكلني وتوجعني وعايزه اروح لحضن ناسي الطيبين !!!!

هذا هو الوطن
صوت الست ام كلثوم تصرخ بعيد عنك حياتي عذاب ، عبد الحليم بالاحضان يابلادنا ياحلوه بالاحضان ، محرم فؤاد واحشاني مصر ام القناطر والنخيل والنيل واحلي الذكريات ، الوطن هو علي الحجار ، انكسر جوانا شيء ، مش عارف ليه بتونس بيكي ، اه ياوجع البعاد ، انت طلعتي لي منين ، الزين والزينه ، الوطن هو محمد منير شجر الليمون دبلان علي ارضه ، لو بطلنا نحلم نموت ، علي صوتك بالغنا ، هو ابتهالات النقشبندي في رمضان واسماء الله الحسني ، هو محمد طه وخضرا محمد خضر والصبر ده للعاشقيين احسن دوا ، هو عفاف راضي وامشي عنه روح للدبه نانو دي كبيره وتستحمل عنه ، هو محمد فوزي وماما زمانها جايه وذهب الليل طلع الفجر والعصفور صوصو ، هو محمد قنديل ياحلو صبح ياحلو طل ، هو نجاه الصغيره انا بعشق البحر زيك ياحبيبي حنون وساعات زيك مجنون ، الوطن ، هو صوت الاتوبيسات وزحمه الشوارع ، صوت الهون في السبوع ، صرخه الام اللي بتولد ، هو فرحه الزفه وخارجه من بيت ابوها داخله بيت الجيران لابسه الاصفر والاحمر ومدوخه الجدعان ، هو صفاره بياع غزل البنات ، هو صوت البياعين في السوق ، هو صوت الديك في الفجر مع صوت الادان ، هو غنا التلامذه في رحله القناطر ، هو هتافات شباب الجامعه في المحكمه ، هو صراخ الجمهور لما فريقنا القومي يجيب جون ، هو صوت ماكينه خلط الاسمنت عند عماره بتتبني ، هو الزغاريد لما ننجح او نفرح او البنت تخلف وتقوم بالسلامه او لما العروسه تتزف ، هو صراخ الندابات يوم الميت ونهنهنه العياط والحرقه والوجع ، هو ماتزقيني ياماما اوام ياماما ده عريسي حياخدني بالسلامه ياماما ، هو دقوا المزاهر يالا يااهل البيت تعالي ، هو صوت حجر الطاوله وهو بيطرقع وقت المحبوسه ، هو صوت الصاجات مع بياع العرقسوس ، هو امانه عليك ياليل طول وهات العمر من الاول ، هو صوت مدفع رمضان ، هو صوت تنفيض السجاجيد من البلكونه في تنضيفه العيد ، هو صوت البومب وحرب ايطاليا يوم العيد ، هو دق الكفته في الهون ، هو صوت مخرطه الملوخيه وهي بتجري فوق الطبليه تنعم الملوخيه وتضبظ قوامها ، صوت الهوا بيعدي علي النيل ويخدرنا بهمسه ، صوت المجداف يضرب في الميه في قارون ، صوت الطبل والزمر لما الشيخ يرجع من الحاج ، هو تكبيرات العيد ولبيك الله ماالبيك ، صوت جرس الكنايس وهي بتدق في وسط الليل تقول الليله عيد ، هو صوت ام كلثوم وياليله العيد انستينا وجددتي الفرح فين ، صوت فريد وادي الربيع عاد من تاني ، صوت عبد الحليم يصرخ موعود معايا بالعذاب موعود ياقلبي ولما يفرح والناجح يرفع ايديه ويغني في عيدنا وعيده ، صوت موج البحر في النوه في اسكندريه والموج بيضرب في الكورنيش ، صوت العيال بتتشاقي في الشارع بيلعبوا بلي ، صوت مقشه الكناس اللي بتحف في الارض وماتنضفش حاجه ، صوت امي اللي يرحمها تصحيني من النوم قومي يااموره روحي المدرسه ، هو ده الوطن اللي بحبه !!!!

هذا هو الوطن ....
فنجان الشاي المشروخ بتاعي ، الكنبه المريحه ، حمامي اللي بغني فيه يرد علي صدي الصوت ، عربيتي اللي علي الحجار مكسر قزازها من كتر ماانا رافعه الصوت وعماله اغني معاه ، فنجان القهوه البن المحروق الغامق المحوج بتاعي ، سندوتش الجبنه الرومي المحروق في الفرن اللي بيسلع العيش ، شباكي اللي بيطل علي شارع فاضي في حي بعيد لسه الناس ماعمرتوش بدوشتها ، الطريق الطويل اللي بامشيه كل يوم ، الناس تقلب النور لبعض تقول علي الطريق لجنه ، مكتبي وكرسي المريح ، زمايلي واصحابي واهلي وحبايبي !!!

اه ياوطن ...... احبك جدا جدا

اه ياوطن ...... اشتقت اليك في البلاد التي لا اعرف شوارعها ولا افهم تضاريسها ولا احب لغتها ولا اضحك ل" نكتها " ولا تسعدني اناقه شوارعها ولا تآنق بشرها ... اشتقت اليك ياوطني خريطه كبيره طيبه يشقها نهر النيل القوي العفي يفيض حنان وحب خصب فياض يفتح ذراعيه صوب البحر يحتضن القادمين من البلاد البعيده يحتويهم بضلعيه الحانيين يسقيهم من ماء الجنه العذب يجري في عروقهم يختلط بدمائهم يحتلهم ويآسرهم في حضنه الواسع الحاني .... اشتقت اليك ياوطني لشوارعك التي اعرفها واحبها وافتقد بعدها واتآلم لغيابها التي نسير فيها مطمئنين بلا خوف يطاردنا وبلا وجل يربكنا وسط بشر طيبين يهدوك ابتساماتهم وحبهم الجارف لايتنظرون مقابل ولا يطمعون الا في الكلمه الطيبه تسعدهم وتجبر بخواطرهم ..... اشتقت اليك ياوطني لاناسك الطيبين المتعبين بحبك المرهقين من صعوبات حياتهم الاملين خيرا في المستقبل المتفائلين املا في المستقبل هولاء البشر الذين يمدون لبعضهم البعض يد العون يفتحون لك احضانهم لتبكي فيها لايسآلوك سببا ولا ينتظرون تفسيرا يهدهدوك بحنان حقيقي ويمسحون دموعك بطيبه آسره ويهمسون في اذنك يشجعوك لاجتياز محنتك التي لا يعرفون اسبابها ويؤكدون لك بايمان حقيقي وثقه مطلقه ان "بكره احسن من النهارده " وان " فرجه قريب " وان " اشتدي ياازمه تنفرجي " اشتقت لاناسك الطيبين الذين لم تنجح الايام الصعبه في تغييرهم ولم تفلح الظروف الطاحنه في تبدليهم وبقوا عبر العصور المتلاحقه مهما لاحقتهم المحن والمصائب والمصاعب بقوا اناس طيبين اولاد " نكته " جدعان محبين لبعضهم البعض وللحياة وللوطن ..... اشتقت اليك ياوطني لرائحه النعناع الاخضر الفواحة كآنها رائحه الخصوبة لرائحه الورد البلدي الاحمر الاسره كآنها الحب العاصف لرائحه زهور الجاردينيا كرائحه الحنان الفياض لرائحه الفل النقيه كرائحه البراءه لرائحه اللارنج النفاذه كرائحه الاعتداد بالنفس لرائحه الريحان القوية كرائحه الكرامة لرائحه التوابل في الخان العتيق كرائحه التاريخ القديم العظيم لرائحه الارض الطيبه كآنها رائحه الحياة المستمره ذاتها... اشتقت اليك ياوطني لصوت بائعيك الجائلين لصخب دقات الصاجات لبائع العرقسوس الهرم لصوت الكروان في لحظات النهار الاولي "الملك لك للك " لصخب التلاميذ في مدارسك وصرخات فرحهم لصوت ضحك البنات الخجل وهمسات قلوبهم الغضه لصوت عبد الحليم حافظ "بالاحضان يابلادنا ياحلوه بالاحضان " لصوت الشيخ محمد رفعت يؤذن لصلاه المغرب في ايام رمضان لصوت هديل الحمام فوق سطح جارنا العجوز لصوت دقات " الهون " تدوي بين صفحات روايه زقاق المدق لصوت الشيخ النقشبندي يردد علي اسماعنا اسماء الله الحسني " الرحمن الرحيم الملك القدوس السلام المؤمن المهيمن " لصوت علي الحجار يئن " انكسر جوانا شيء وانطفت بعده المشاعر " لصوت بائعه الذره وهي تصوخ " المشوي " لصوت الموجات الصغيره تتلاحق خلف بعضها علي شواطيءالعين السخنه كضحات الاطفال المرحة لصوت المذياع يصرخ بقوه " هنا القاهرة " لصوت المزمار البلدي ينتفض فرحا لصوت محمد الكحلاوي ينشد " لاجل النبي لاجل النبي " لصوت ابله فضيله الدافيء يهمس لاطفالنا الصغار " غنوه وحدوته " لصوت المشجعين في مدرجات الكوره " المصريين اهمة " لصوت دفقات المياه العذبه تدور في السواقي العتيقه الهرمه لصوت جدتي وهي تمتم فوق سجاده الصلاة ساعه الفجر " الستر والصحه يارب " لصوت موسيقي علي اسماعيل ترقص علي نغماته فريده فهمي " اه ياليل ياعين .... اه ياليل ياعين " لصوت بوق بائع غزل البنات مجدول بفرحه البنات وصراخهم الجميل لصوت العصافير فوق شباك ليلي صديقتي لصوت زغرده النساء في افراحنا الشعبية يهللن " قولو لابوها ان كان جعان يتعشي " لصوت خضره محمد خضر تصرخ من اعماقها الما " الصبر ده للعاشقين احسن دوا " لصوت صفاره البحار فوق شط اسكندريه يستغيث لانقاذ غريق لصوت " طشه " التوم فوق طبق الفته يوم العيد لصوت الكورال يدوي " اسلمي يامصر " لصوت امي وهي توقظني هامسه " قومي ياحبيبتي حتتآخري علي المدرسه " ....... اه ياوطن ........

" من مقال احبك جدا جدا المنشور خلال يونيو ٢٠٠٧ بجريده روز اليوسف اليوميه "