20 أبريل 2011

اوعي تمشي وتسيبينا !!!!



( 1 )
اوعي.... اوعي تمشي وتسيبنا ، نصحي من النوم الطويل نلاقيكي رحلت غضبت منا ، من قلبك محيت اسامينا ودعيتي علينا ولعنتينا وخاصمتينا وانت بتحبينا ، قلت تمشي تأديبنا وعملت مش سامعه صوتنا ورحت ماشيه واحنا بنقولك بلاش اوعي تسيبنا ، انت قررت تسيبينا خدتي معاك احلي حاجه في تاريخنا وعمرنا ، خليتي بينا وسط صحرا واتخليتي عننا ، كنا اطفال محتارين لسه بنفك الحروف ونقوي القلب علي الخوف وشنا في الحيطه واحنا مخروسين متكدرين متذنبين ، وانت ماشيه بنناديكي ، نرجوكي نصرخ عليكي ، وانت ولا بتعبرينا ولا بتردي ندانا ، وترحلي غضبانه منا ، لاننا اهملنا حبك ومعرفناش فعلا نحبك ، ولاقدرنا التاريخ ولا يوم وقفنا جنبك وفرحنا قلبك ، ولا صنا معزتك و كبرنا عزك ، واتهزمنا الف مرة ، وحاربنا واتحاربنا ، وكل نكسه نقول بكره حننتصر و كل مره تصدقيناولما تيجي مره تانيه ونتهزم تعيطي جامد علينا ونعيط احنا معاكي ، اصل نفسنا مره نسعدك وننول رضاكي ، فاصبري شويه علينا و اوعي تمشي وتسيبينا ..
( 2 )
اوعي تمشي وتسيبينا ، انت زهقت من هزايمنا الكتيرة وزهقت من كتر العياط ، من ضحكنا و لعبنا ومن اللي سافر واللي هاجر ، واللي راجع واللي في الهيصه زاط ، وزهقت من كتر المحايلة ، وزهقت من كتر الكلام ، وزهقت من كتر السلام اللي يقل المعرفه ، وزهقت من كتر الزهق والانتظار ، وزهقت من كتر التمني واشتهيت الانتصار ، وحلمت ياما ببكره جاي احلي لينا ، وانتظرت وصبرت ولما فاض بيكي زهقت من الامنيات اللي فضلت امنيات ، ولاواحده فيها اتحققت وكأننا قاسين عليك ، وكأننا قاصدين نضايقك واحنا زي ماانت عارفانا حبايبك بس مش عارفين نفرحك ، ولانحافظ عليك وعمالين نجرحك ،وانت زهقت منا ، قوليها صريحه ، اذا كنا احنا زهقنا خلاص من نفسنا ، ومن حزننا ومن همنا ، ومن غُلبنا ومن صمتنا، ومن كتر كلامنا وقلة فعلنا ، ومن الهزايم اللي عماله تحرق قلبنا ، نفسنا مره واحده ننتصر ، مش كل مره نتقهر ونتكسر ، نفسنا نعلق الرايات ونفرح ، ونرقص في الشارع معاكي ، يوم سعدك وهناكي ، بس لحظه النصر ماجاتش وانت تعبتي من الهزايم ومن اعذارنا ومن عياطنا ومن رزانه عقلنا وكتر تهريجنا وعبطنا وصممت تمشي وتسيبنا ، قلت جايز يمكن يعني بهجرك عنا تعلمينا ، ان اللي يحب بلده يحطها في نني عينه و جوة قلبه ويخاف عليها ، ولما تناديه قبل ماتكمل نداها يكون خلاص رد عليها وقدم حياته فدا احلامها وفداها ، اللي يحب بلده يعرف ازاي ينتصر علشان يفرحهاويتعلم من هزايمه القاسيه عمره تاني مايجرحها ، يتعلم من هزايمه ازاي تاني مايتهزمش واحنا حبايبك لكن ليه مابنتعلمش بنتكلم كتير ، وعمرنا مانسمع ولا نفكر بجد ولانرسم احلامنا لبكرة وكيف حيكون شكل الغد ، وانتي خلاص زهقت من كلنا زهقتي من قله حيلتنا وغلبنا وقلت ماشيه ... واحنا بنقولك اوعي تمشي وتسيبينا ، اصبري شويه علينا ...
( 3 )
قلت ماشية وانت قاصده تعلمينا ازاي نحبك ، بالعطاء مش بالكلام ، ولا برسم الكدب في الاحلام ، ولا ببيع الاوهام ، تعلمينا ازاي نحبك ، لما الوجع يوجعنا اكتر ، والضلمه تبقي ليل نهار ، والقمر يخاصمنا زيك والبرد يحتل الديار ، والوجع يخرس غنانا والحلم يرحل عن خيالنا ، ويبدل الفرحه سكوت والحياه اللي كنت اجمل حاجه فيها تتبدل خوف وموت ، والموت يبقي زي العيشة مر والحياه طبعا امر ، واحنا نفضل موجعين ، من حضنك الغالي ياغالية ومن جنة ترابك مطرودين ، ونناديك نقول يارب تسمعنا وانت سمعانا وعنيدة ولابتردي علينا وكأنك ياحبيبتي بعيدة سايبنا نتعلم من وجعنا ومن هزيمتنا سايبنا نكبر وقاعده تدعي ربنا نكسب ونفلح ، ولما طال الانتظار والزمن اصبح مرار زهقت منا وقلت تمشي وتسيبينا ، اوعي .. اوعي تمشي وتسيبينا محتاسين ، مش فاهمين الدرس لسه ولا فاهمين اخر حصة ، ولا عارفين اخرتنا فين ولاعارفين جايين منين ، طولي بالك علينا واشرحلنا مره تانيه ، قولي اخر كلمتين قبل ماتمشي ياغاليه اما نعرف ننتصر ، فترجعي ياغاليه لينا واما نفضل ميتين ، فتعيطي جامد علينا ، لكن انت خلاص زهقت من الكلام وكفرت بكل امانينا والاحلام ، قلت تمشي ويأما نعرف نفرحك فنرجعك واما تمشي للابد وتسيبنا ياحبيبتي حزنانين .... طيب وحياه خالتي ام حمادة ومرات جدي جورج بسادة وابن عمة طنط بطة وحياة فاطمة ومريم وميلاد وحياه كل البنات القمرات والولاد وحياه كل من مرعلي بابك وحبك ادينا فرصه واصبري شويه علينا واوعي تمشي وتسيبنا ....
( 4)
اوعي .... اوعي تمشي وتسيبنا وتاخدي معاك احلي الذكريات ، لما تاخدي معاك كل حاجه جميله حصلت في حياتنا وتسيبنا من غير ماضي ولا حاضر جميل ، نستحمل العيشه ازاي ياغاليه ؟؟ ونعيشها ليه ؟؟ده احنا حنبقي يتامي واهالينا عايشة ، محرومين من الدفا ومن الحنان ، والابوة والامومه والامان ، مقطوعين من شجره ماتت ، نشبه فرع ميت جدره مات قصاد عينه ، ليه ياغاليه حتسيبينا وماشيه ليه واحنا بنحبك ياغاليه ومهزومين ، ماسكين ديل جلابيتك مقهورين ، ماهو لما تمشي وتسيبنا تدبحينا ، حتسيبنا ازاي وتمشي ، توجعينا ازاي وتقسي ، ده انت لسه مامشتيش وخلاص الخوف قتلنا ، لو مشيتي ورحلتي تفتكري ازاي يبقي حالنا ؟؟ اصبري شويه علينا واوعي تمشي وتسيبنا ...
( 5 )
قولي حتاخدي ايه معاكي وانت ماشيه ، حتاخدي ماضينا اللي فات ولا كتب التاريخ والذكريات والسواقي والقناطر وكل الاهرامات ، ولا النيل الفسيح جايب الخير وات ، وبرديات الفراعنه خايفه عليها منا والتماثيل العظيمه ، والمسلات حتخلعيها ياغاليه وكل حاجه ليها قيمه ، راح تخبيها منا خايفه من ايام جايه رضية ، خايفه منا علي التاريخ وعلي الحضاره ، خايفه علي اسمك وروحك من التتار ، ناوية تاخدي معاك في رحلتك كام دير وكام كنيسه تحافظي عليهم جوه قلبك من سنواتنا الكبيسة ، ناويه تاخدي معبد ابو سمبل وطريق الكباش تحكي عن كل تاريخنا لحبايبك اللي جه زرانا وقت عزك واللي ماجاش وكحل عنين الفراعنه حتشيله للعرايس لما يوم الفرح يجي ، وابو الهول حتودعيه ويفضل اسير معانا ولا حتاخديه ياغاليه وتسيبنا خايفين حزانا ، والازهر تشيله من مكانه بعواميده الاثرية ومدارس العلم والفتوي والوسطيه وطه حسين وشهاده العالميه ، دول برضه حتاخديهم ياغاليه وتسيبنا طيب ومقام الست زينب والحسين سيدنا حتسيبهم ينفعونا في ليله صعبه يدعوا لينا ولا في الغربه حتاخديهم معاكي وتستخسريهم فينا ، ونفيسه العلم حتسيبها لمين وراكي ولا هي كمان حتاخديها معاكي ؟
والفيشاوي تقفليه وانت زعلانه علينا ، زمن الغنا والقعده والصحبه الجميله راحت عليه ، والشعر والازجال والدواوين تخرسيها ، والنايات تكسريها ، والغناوي تحرميها من المعاني وتحرمينا ، والموسيقي الحلوه تاخديها معاك وتسيبنا ، ناوية تاخدي معاك دواوين جاهين وحجاب ونجم والنديم ، واغاني شاديه وعبد الحليم ، والحجار و منير ورشدي ، وعبد الوهاب وانت عمري ، وبليغ وكل الفنانين ، ناويه تحرمينا من فرقه رضا ، لارقص خلاص حنرقص وحنقضيها بكا ، والست ام كلثوم تاخديها معاكي وتسيبنا في شرق ضلمه كوكبه سافر وراكي ، والجامعه برضه تقفليها والتلاميذ تروحيهم والكتب تحرقيهم والمدرجات تقفليهم ، محفوظ وادريس العباقرة من ابداعهم تحرمينا ، ومسرحيات عبد الصبور ونجيب سرور ، وكلام الشرقاوي وحكايات القهاوي ، والمهندس وعادل امام والريحاني ضحكهم حتحرميه وترجعيلنا الغم تاني ، وتلمي الكور الشراب من العيال وتقطعيها ، والشوارع اللي كنا نحبها ونحب فيها تغييرها ، والنكت وخفه دمنا حتسكتيها ، باختصار كل ذكري في كل قلب حتمسحيها ، وتسيبنا صفحه بيضا يكتب الزمن الاسود بحروفه عليها اسمه هو ويمحي اسمك واسامينا .. طيب اصبري شويه علينا وطولي بالك معانا واوعي تمشي وتسيبينا !!!
( 6 )
حتاخدي ايه ياغاليه معاكي ، القمح الاصفر في الغيطان ، الشمس وصوت الادان ، الامومة والحنان ، صوت هديل الكروان ، الحنة من كعب الصبايا ، وحتاخدي كمان الرحاية ، والكحل من رمش البنات والضفاير الطويلة علي الضهر تضحك ، شمع زفه العروسة ولا طرحتها الحرير ولا مفرش سفرتها ولحاف السرير ، منخل السبوع والهون والمغات ، ذكرياتنا واللي جاي واللي فات ، عوايدنا وعادتنا وتقاليدنا الجميله ، ناي ومزمار وطبله وصاجات ، والاغاني والموسيقي والنايات والمواويل الجميلة والسعاده في ليالي القمر الطويلة ، حتاخدي منا فوانيسنا القزاز والشمعه وتحرمينا من ليله الخميس وبخور صلاة الجمعه ، حتسرقي منا سهرتنا في ليالي رمضان وتحرمينا من فرحه الصيام ، ولما نخرج من الكنيسه حتحرمي علينا الكلام ، حتاخدي تكعيبه العنب البناتي ، وريحه الشوي عند الحاتي ، وعودين ياسمين وفل ، وبسمه ناوية تخطفيها من فوق وشوش الكل ، وتسيبنا موجوعين ، البنات بترقص قدام المرايه وتغني ، والحمام الطاير وقت الغروب متحني ، والحواري والكباري والتكيات القديمه والمباني الاثريه في شوارعنا العظيمه ، ناويه تاخدي الترماي القديم ومقله اللب وعربيه الحرنكش ، واغاني بياعه الدرة لما تلهلب فحمها ، ناويه تاخدي معاك كورنيش النيل ، ووقت المغربيه وقمر الليل والفرحه والحلم والمواويل ، وتسيبنا مقهورين ، قولي حتاخدي تاني ياغاليه معاكي ، بيوت الفلاحين في الصعيد ولا عرق الشقيانين ، ولا قعده مصطبتنا في يوم دفا ، ولا لمه عيلتنا وضحكها وقت الصفا ، ولاريح البحر ناويه تخطفيها وتسيبينا مخنوقين ، ولا زفه العروسه لما كنا فرحانين ، ولا نخل طريق بلدنا ناويه كمان تقطعيه ، وشجر البرتقان قبل ماتمشي تقلعيه ، والارض اللي كانت سمرا طيبه تبوريها ، والترع اللي تجري الميه فيها تنشفيها ، وتسيبينا شراقي وعطشانين ، ولانصعبش عليك مااحنا ياغاليه متعاقبين اصل زمن الحب راح ، والمحبه والاماني والوجع فتح الجراح ، وفكرنا بهزيمتنا تاني وانت خلاص زهقتي منا ومن الاماني ، طيب اصبري شويه علينا واوعي تمشي وتسيبنا !!!!
( 7 )
حتاخدي معاكي ياغاليه وانت ماشيه ، حتاخد زلعة المش وتمشي وتسيبنا حياتنا ماسخة ، حتاخدي خبيز جدتي وعيشها المرحرح ، والقراقيش اللي نقشتها بايديها ، وصاجات الكعك رصتها بفرحه ، حتاخدي معاك البتاو والعيش الشمسي وبطرمانات المخلل وصينيه القلل المعطره بالمورد ، وبطرمان اللارنج اللي خالتي زرعته شجرة اصالة وماتت وسابت لنا طعم الفرح ، ومربي الورد اللي ستي عطرتها بطيبتها ، حتاخدي معاكي الوان شم النسيم وتسيبنا في عيشه سوده مخنوقين لا نسيم قادرين نشمه ومن الوان الفرحه محرومين ، حتاخدي معاكي قدره الفول المدمس وتسيبنا نعيش من غير مزاج اصل الا الفول ياغاليه ده مزاجناوحبيبنا وتفانين نفس اجمل طباخينا ، حتمنعينا من الحمام وصواني الكنافه والباميه ورز البرام ، وتسيبلنا اكل سم نموت وناكله اكل طعمه مانعرفوش !!! الفرن القديم بتاعتنا حتردميه وكل اكل كنت جايباه لينا مخصوص حتمنعينا منه وترميه ، وتسيبنا نحكي عن ايام زمان ايام جدودنا لما كنا ولما كان ، وكانت الايام جميله بس ماحافظناش عليها ، قولي بس ناويه تاخدي ايه كمان معاك وانت ماشيه ، الطعميه والعجميه وغزل البنات وصواني البسبوسه وسكر النبات ، والفول النابت والعيش والسكر السنترافيش ، والعروسه الحلاوه والحصان دول كمان حتخديهم معاكي وتسيبي مولدنا من غير حلاوه وتسيبي لينا المر وصفه للقلوب الموجوعين طيب بس طمنيني لما حتمشي هنهون عليكي وحتسيبنا لمين ؟؟
( 8 )
ناويه تاخدي ايه معاكي تاني وانت ماشيه ، القناطر والرحلات المدرسيه ، والشجر اللي شاهد علي الغرام بين شباب زينه مجدع واجمل الصبايا ، لما كانوا بيحلموا ببكرة بتاعهم فقبل مابكره يجي امبارح خدعهم وباعهم ، ناويه تاخدي كل المراكب في الغروب وتسرقي النيل والبحر وتسرقينا ، وتردمي كل السواقي وتكسري كل الصاجات وتلغي اغانيك وكل النغمات ، الجربي حتشيله كمان من راس البر ومعاه هوا البحر وقعده البلاجات وحتسيبي لينا المشانق منصوبه علي الرمله تفكرنا بكل اللي فات ، وحتمسحي اسم الاحبة من فوق صخره ميامي ولما نيجي نشتكيليك تسيبنا وتخشي تنامي ، حتي مطروح حتقفلي سكتها وتمنعينا وتقولي هناك حمام كليوباترا وشاطيء الغرام وانتم مالكوش في المشاعر والهيام ، فسيبوا التاريخ في حاله لما تبقي تخفوا من فقدان الذاكره ابقوا تعالوا ، وتقسي علينا وتحرمينا وتمشي في الاخر وتسيبينا طيب قولي اي كلمه وطمنينا .. حتسيبنا ياغاليه وتمشي وتخلي كل ايامنا حداد ، وتقسي قلبك علينا وتعيطي علينا من ورانا ، وتستقوي قدامنا ولاكأنك من جماد ، وانت اصلا مرهفه وام الحنان حتي لما بنوحشك بتطلعي من مخبأك الهرم وتوعديه ، انك لمكانه الاصلي حترجعيه ، وحترجعي تضحكي تاني في وشوشنابعد مانكون انتصرنا بعد سبعميت مليون هزيمه ، وانت صابره وعماله تقوي فينا ، واحنا لسه بنتعلم ازاي ياغاليهنعرف نحارب ولسه ماطمرش فينا العلام ، لسه بيخدعنا الكلام !!!
( 9 )
بالحق قولي لي ياغاليه حتاخدي معاكي ايه تاني في رحلتك الللي مش ناويه منها ترجعي ، تاخدي اجمل مشاعرنا وتسيبنا في البلاده غرقانين ، وتقولي ايش فهمكم انتم في المشاعر ، وكنتوا فين لما دبحوها وباعوها وسكتم ، كنتوا فين لما ضربوا الاحبه في الشوارع وطلبوا من الحب بطاقته وهو صعلوك وصايع ، كنتوا فين لما مسحوا الاغنيات من الشرايط وركبوا الهم عليكم ، كنتوا فين لما كانوا حيهدوا الهرم والكنيسه حيشيلوا منها رنين الجرس والادان سكتوه وقالوا ده زمن الخرس والحريم شالوا منها الرحم وعقموها وكل الارض بوروها والرجاله الزين المجدع خوفوها وبلقمه العيش هددوها وبرزق العيال والسجن وجهنم الحمرا وقوايم الذنوب والفضايح صغروها ، كنتوا فين لما كل ده حصل واكتر ، كنتوا ساكتين وشاربين الهزيمه نقطه نقطه ومتخلين عن شرفكم والعزيمه ، ومستنين لما السفاحين يقتلوني الف مره ومجهزين هدومكم السودا ودموع الحزاني المكلومين خلاص بقي ارحموني ، ده اللي قلتيه لينا وانت خلاص مسافره قلت ماشيه قلت راحله قلت ياتفوقوا وتصحوا ياتروحوا في الف داهيه ، قلت ياتتعلموا الدرس الاخير ياتتهزموا تاني ، وساعتها امسحوا اسمي من علي كل اوراقكم وغيروا البطاقات ، وشوفوا خريطه تقبل بالهزيمه وتوأد البنات ، وانسوني وسيبوني ابني مجدي وارفع راياتي بعيد ، في مكان تاني اهله لسه مابقوش عبيد ، في بلاد بتفهم في الحب والفرحه والعيد ، وتحترم التاريخ والجغرافيا وتدافع عن وجودها بقلب جامد ودماغ عنيد !!! كل ده قلتيه واكتر واحنا قاعدين بنسمع، والدموع بحر جاري والحيره سم ، ونفسنا نفرحك والعيشه هم واكيد بكره حننتصر بس انت اصبري شويه علينا واوعي تمشي وتسيبنا !!!
( 10 )
قلتي ايه ياغاليه خلاص ، رضيتي علينا ولا لسه ، قاعده ليه ياغاليه تحت شباكنا ومابترديش علينا ، ولو اتكلمتني مرة من كتر ما صعبنا عليكي ، بتفكرينا بخبيتنا وتستخبي بذكرياتك وتحمي لينا ذكرياتنا ، وتقولي شدوا حيلكم واجمدوا واستحملوا وانا بكره حارجع لما ترجعوا الغنا في القهاوي وترجعوا ست الحسن في كل الحكاويوماتخافوش من ضحك البنات وتتعلموا من اللي فات ، ان اللي يسكت ويفرط في بلده تمشي وتسيبه ، وتمسح اسمها من فوق جبينه وتسيب له شلالات دموع هديه بيها تفكره وتكدره ، قلت ماشيه قلت راحله قلتي خلاص بطلوا تنادوا علي وانت قاعده بكل حبك تحت شباكنا مستنيه نناديك ، ونعرف نصالحك ونراضيك ، ونعرف نبطل نتهزم ونعرف كمان ننتصر ، ونعرف نعيش ايامك الحلوة ياحلوة وراسنا مرفوعه لفوق ، طيب وحياه عمتي سعادات وابله تريزا جارتنا الجدعه وحياه الواد الشطور نوار وحياه البت صفية العسله وحياه كل اللي بتحبيهم واللي ناويه خلاص تسيبهم وحياه غلاوتنا عندك وحبك لينا ، اصبري شوية علينا واوعي تمشي وتسيبنا الوجع جامد ياغاليه واحنا مش حمل الاسيه ، وناوين بجد ناوين نبطل نتهزم اصل الهزيمه ماتليقليناش ولاشكلنا والهزيمه مش قدرنا والنصر جاي مهما انكسرنا ، اوعي تمشي وتسيبنا اصل البلد اللي عايزين يجيبوها لينا رسمه في خريطة بلد لقيطة ، مالهاش تاريخ ولا ليها حضن يلمنا ، لاعمرنا حنحبها ، ولا عمرنا حنغني يوم باسمها ، ولاهي تشبهنا ولا احنا نشبه لها ، لا عسلها نيل ولا صبحها زيك جميل ولاابتسامتها تطيب القلب العليل ، ولا فيها كروان بيحب الغنا ولاحتقسامنا الهنا ، ولا بناتها منورين ولا رجالتها حنينين ولا حنسكر من نسيم بحرها ولا ريحه الاصاله في دربها ولا طيبه وحنينه زيك كده ومهما قالت عمرها ماتحبنا ومهما عادت عمرنا ما تحبها ، فاوعي تمشي وتسيبنا لو لسه بتحبينا ، حنذاكر الدرس بسرعه وحنفوق ونتلم ونصحي ، ونعزك قد ماتستحقي ونتعلم ازاي نبطل نتهزم وازاي نبطل نتغلب وازاي نبطل نتخدع وازاي نفكر وازاي نقرا ونكتب وازاي نقدر وازاي نحترمك زي ماانت تستحقي وازاي نقدم عمرنا فداك وانت غاليه بس اصبري علينا واستني شويه واوعي تمشي وتسيبينا !!!!

هناك 9 تعليقات:

نشوي البحراوي يقول...

اكثر من رائعه فكرتيني بحب مصر قد ايه فكرتيني شايفه فيها حلو قد ايه بس يلتري هتفضل هي دي مصر ولا برضه هتسيبنا وتمشي وتاخد معاها كل ده ويتفضل لنا حكايات نحكيها لاحفادنا في كل عصر كان فيه مره مصر

غير معرف يقول...

مجدي السباعي
قد ايه كنتي جراحه ماهره شرحتي مصر كلها باولادها واماكنها وعلاماتها وتاريخها
قد ايه كانت الدموع بتنزل وان اقرا تشريحك لها
حقيقي وارد انها تمشي وتسيبنا ...ده اعتراف مني وفي نفس الوقت سؤال
قد ايه ممكن نقدر نخليها ماتسبناش ده قرار واستعطاف
قد ايه كان فيها حاجات كتير ماشفنهاش
قد ايه هنخسر لو سبتنا ومارجعتلناش
يارب انت العالم بيتيم الاب والام فلتجعلنا نفقدها

غير معرف يقول...

سيبتى ايه حوالينا يا اميره ما سالتيهوش؟؟؟؟ جمعتى فى سؤالك كل اللى واجعك وواجعنا......بتسأليه علشان فعلا ماشى؟؟؟و لا لسه مصر ح تراجع نفسها و تحسب حسبتها و تلاقى ناسها بوشوش محنيه أولى بيها مهما زعلوا منها و زعلت منهم؟؟؟؟يا ترى هو ده العشق؟؟؟؟
عبير مطر

غير معرف يقول...

نهي فتحي
قوليلها يا اميرة وقولي ،، وقوليلنا احنا كمان نعمل ايه علشان نفضل فيها

Farida يقول...

معرفش ليه يا مرمر عيطت و انا بقراها
حلوة اوي أوي
تسلم ايدك

حلو انك تكتبي عن مصر بالشكل ده
جميل فعلا و يلمس القلب

عابر سبيل يقول...

انا عديت على مدونتك بالصدفة لقيت الكلام بتاعك ده ملحقتش اخلصه الدمعة فرت من عينى بجد بشكرك و بشكر الصدفة اللى خليتنى اقرا كلامك .....الى لقاء.

my dream يقول...

ابكيتيني يا أستاذه
سلمت اناملك
مست كلماتك شغاف القلب
تحياتي ودمت بحب

منال أبوزيد يقول...

أميره
ها تصبر علينا قد ايه؟
ماهو لما نطلب لازم نعرف بنطلب ايه
ها تصبر على ايه واللا ايه؟
مااحنا خليناها خل ولسه بنقول هيه
لا احترمنا جدود ولا عرفنا حدود
نحطها للي على البلد بيدوس
ونغني لها وغيرنا يغني عليها كل يوم
ونقول مصر دي امي... غنيوة كل يوم
اهي زهقت وتعبت
ولا شالت ولا حطت
وسابتنا نشيل ونحط في ايامنا
وبعد كده نرمي اللوم على ايامنا
حتى النيل زهق من الناي الحزين
بيفكره بوجع مصر والانين
وترجعي تقولي لها بس اصبري
يارب تسمع وتلاقي في شوال الصبر مكاييل

يا وجع قلبي معاكي يا اميره
منال أبوزيد

برنسيس الهامو(بنت المغرب) يقول...

لما الام تسيب ولادها للقتالين والنصابين والحرامية ماتبقاش ام ..لما الام تجوع ولادها ولا تديهمش ريق حلو ولا حضن حنين ولا ابتسامة تخليهم يقولو الحمد لله ربنا لسا بيحبنا تبقى دي موش ام... لما الام تقول ماعنديش ولا د وتتبرى من فلدات اكبادها تبقى دي موش ام ...
وكل الكلام الي قلتو دلوقتي مابينطبقش على امكم وامنا
مصر مابتسيبش الغريب حتسيب ولادها
مصر بتقول للغريب ادخل عندي امن مطمئن وحتسيب ولادها اكيد لالالالالالالالالا انتو غلطانين ولما تفكرو بكده يبقى خلاص عليه العوض ومنو العوض فيكم وفي الحب الي هي بتديه ليكم مع كل طلعة فجر ومع كل غروب شمس
مصــــــــــــر حتبقى هي امكم وامنا ليوم الدين
فحبوها زي ما بتحبكم
احضنوها وما تقولوش اتخنقنااحضنوووووها قدما تقدرو ومع كل حضن خلو نيتكم صافية وكررو كلمة الحمد لله
لانو الحضن ده بفضل ربي حيبقى وحينور ليكم طريقكم