12 أبريل 2011

نقول كمان ؟؟؟؟؟؟؟؟؟؟؟



ليه فريق كرة القدم حداشرلاعب !!! ليه مش 15 او 24 لاعب ... ليه كل اللاعبين دول بيلعبوا بكوره واحدة بس !!! يجري ايه يعني لو ادينا كل لاعب كوره !! وبدل مالفريقين بيجروا ورا كوره واحده ويقطعوا نفسهم ، يبقي معاهم في الملعب 22 كوره او حتي 44 ، هتقولي دي مش حتبقي كوره قدم ، حاقولك وماله ، احنا حنسميها كورة قدم ، حد ليه عندنا حاجه ، احنا براحتنا !!!! حتقولي فيه قواعد منظمه للعبه ، اقولك وايه يعني ماطظ في القواعد ، مانخترع قواعد تانيه ، احنا برضه حرين !!! وبالمره نغير وقت الماتش ، كتير قوي 90 دقيقه ، الناس بتقعد علي نار طول ال 90 دقيقه وده ظلم للجمهور اللي من حقه ينبسط ويعرف نتيجه الماتش بسرعه ، ايه رايك نخلي الماتش 5 دقايق ، 5ر2 للتايم الاول و5ر2 للتايم التاني وعلي ما الحكم يصفر لبدايه الماتش يصفر تاني لنهايته ، حتقولي الوقت مش حيكفي الماش ، حاقولك مش مهم ، المهم نبسط الجمهور اللي عايز الماتش يبتدي ويخلص بسرعه !!! حتقولي حيطردونا من الفيفا ، وماله ، طظ في الفيفا !!! المهم الجمهور ينبسط !!! باختصار احنا حنسمي اي حاجه كوره قدم ، قواعد من اختراعنا وتوقيت بمزاجنا واحنا حرين واللي مش عاجبه براحته بقي يشرب من الحته اللي عايز يشرب منها !!!!
ليه التحقيق مع الفاسدين بياخد وقت ، ليه مابيحاكموهمش بسرعه ، ليه المحامي بيأجل ، ليه المتهم بيقدم مستندات ، ليه مابيحكموش عليهم وبسرعه ، لسه حنستني النقض ، امتي حنعدمهم ونشرب من دمهم !!! حتقولي القانون والدستور ومواثيق حقوق الانسان ، ماطظ في ده كله واحنا نحاكمهم بالطريقه اللي تريحنا وتبسطنا ، ماهم فاسدين فاسدين ، احنا حكمنا عليهم بكده وانتهينا خلاص ، حرمناهم من قرينه البراءه وان المتهم بريء حتي تثبت ادانته ، وعايزين نحرمهم من قاضيهم الطبيعي ونحاكمهم بمحكمه الثورة او محكمه التفتيش ، المهم يتحكم عليهم بسرعه واحنا ننبسط بسرعه !!! انت مش موافقني ، يبقي انت من الثورة المضاده والفلول ، وتبقي قليل الوطنيه والثوريه و................... يجري ايه يعني لما نغير قواعد الكورة ، ماتقليش مش حتبقي كوره ، والله حتفضل كوره برضه ، بس علي الطريقه المصرية !!! ويجري ايه لما نقدم الفاسدين لمحكمه الثورة او حتي نعدمهم من غير محاكمه ، ولا حيجري حاجه خالص ، حيبقي اسمه المحاكمه الثورية علي الطريقه المصرية !!!! ونقول من الاول ولا كفايه كده ؟؟؟؟؟؟؟؟؟؟؟؟ نقول كمان ، ليه مابيخلوش فريق الكوره 22 لاعب في الملعب بدل 11 ، حتقولي ماتبقاش كوره ، مش مهم احنا حنسميها كوره ، المهم اننا ننبسط !!! ليه مابتعملوش محكمه ثوره تعيينوا فيها ناس ثوريين يحاكموا علي الفاسدين ويحكموا عليهم وبسرعه ، حتقولي ماتبقاش محكمه ، حاقولك مش مهم ، احنا حنسميها محكمه ، المهم اننا ننبسط !!! نقول كمان ؟؟؟؟؟؟؟؟؟؟؟ الحقيقه ياريت يلغوا القانون ويريحوني انا شخصيا ونعيش في غابه واللي ممعاهوش سكينه يلحق يشتري !!!!!!!!! نقول كمان ؟؟؟؟

ملحوظة يوم 12 ابريل 2011 ...
كتبت النص ده من يومين ، وبعدين قررت ماانشروش من منطق مافيش فايده ، وكل واحد بيفكر براحته وبطريقته ، لكن لما شفت حلقه يسري فوده وضباط المجلس الاعلي امبارح ، وسمعت يسري وهو عمال يدفعهم دفعا لاجراءات استثنائيه وهما عمالين يتمسكوا بالقانون وضماناته وحقوقه وانه بريء حتي تثبت ادانته ، حسيت ان الحوار بين يسري وبينهم هو بالضباط نفس الحوار بتاع فريق الكورة وعدد اللعيبه وعليه ......... قررت انشر النص بدل دفنه !!!
وبس ...........

هناك 5 تعليقات:

candy يقول...

معاكى حق
أنا بقيت بشك فى نفسى أنى لسة عندى أمل
ولسة واثقة فى الجيش
وأنى مش عايزة حاجة تستعجل علشان فى التأنى السلامة
وبالذات أن حالة الانفعال والتخبط اللى البلد كلها فيها دى مش الوقت المناسب للقرارات المصيرية ... ومن غير مرجعية قانونية ولا عقلانية حتى !!
أحترم الجيش وأثق فى وطنيته وصدق نواياه.
واتخنقت قوووووووووى من الناس اللى بتدعو لعصيان مدنى ، واللى بتروج لأنهم طابخينها مع النظام السابق ....

صباح الخير :)

غير معرف يقول...

مجدي السباعي يقول...
سؤال منطقي في وقت لا للمنطق
تعرفي لنك فكرتيني بالالتراس بيروحوا الماتش ويديروا ظهرهم للملعب ولايشاهدون المباراه بل يهتفون ويصرخون بدون وعي ومايمنعش في النص يكسروا حاجه ويولعوا حاجه ...المهم كلامهم يمشي...قصدي المهم يغلبوا وخلاص غلط صح بالعافيه...وحتي لوفريقهم لعب وحش مش مهم ....
والالتراس في موضوع المحاكمات احس ان مافعله لم ياتي باي مكاسب بل خراب ودمار وبيحاول يقول لنفسه اكسب ياواد محاكمه الفساد ولو بالزور والبهتان..اهو حاجه يقولها للناس لم يسالوه كان ليه الخراب والدمار ده كله استفادنا ايه
كعادتك دائما كتاباتك في الجون

Mafrousa يقول...

على الله يفهموا يا اميرة على الله
فيه بعض الناس مش قادرة تفهم الطبيعة العسكرية
و فيه بعض منهم برضه مش قادر يفهم طبيعة القانون
بما اننا بناطلب بطبيق القانون و نكون دولة قانون يبقى لازم نحترمه و نحترم خطواته حتى لو كانت طويلة
ربنا يعمل الخير و يسترها

happydoudi يقول...

كلام جميل و كلام معقول بس؟؟ظ

------------------ يقول...

سيدتى...اسجل اعجابى الشديد بتحليلك المنطقى ولا اخفيكى سرا لقد انتابنى نفس شعورك حينما كنت اتابع حلقة يسرى فوده مع عضوى المجلس الاعلى ولقد استفزيت من طريقة يسرى فوده الذى يريدتاكيد انه هناك ثورة ولكن بطريقة(هى فوضى اوهى ثورة)وطالب منهم المسارعه فى التحقيق مع مبارك فكان الرد عليه ان الامور تحتاج للحكمه (واعتقد ان مانفتقده الآن الصبر والهدوء اللذان يؤديان للحكمه)
واخيرا تمنياتى لكى بالتوفيق فيما تطالعينا به..