احلامي اللي بحبها !!!!

احلم احلام بسيطه صغيرة !!! لكن مااحلم به لايتحقق ... وتمنحني الدنيا الكثير !!لكني لااحب مااخذه ...واتمني احلامي تتحقق !! طماعه انا ؟؟؟؟ ليه طماعه ... ده انا احلامي بسيطه لكن احلامي اللي بحبها ونفسي تتحقق!!!

انا اللي حلمت ااقعد علي البحر في الشتا معاك ، اليوم رمادي والبحر عالي والموج عمال يشب علشان يلمس السما ولما تبعد عنه يزعل ويشب اعلي ويطرطش علي الدنيا بصخبه واصراره وميه المالحه الحلوه ، ااقعد علي البحر في الشتا معاك ، كرسين خشب قدام البحر والرمله تحت رجلينا ساقعه ودافيه في نفس الوقت ، والموج عمال يخانق في السما ويشب اعلي ويقولي مافيش في الدنيا حاجه مستحيله والقمر مهما بعد حنطوله حتي لو في الحلم ، ابص ليك واحس ان القمر قاعد معايا ومالوش لزمه الحلم ، الجو برد قوي والهوا ساقع ، وانت قاعد علي شمالي جنب قلبي ، ارتعش فجأ لما الهوي يقرب مني قلبي ، فتضحك وتقولي هوايا ااقوي من الهوا وداف وحنون وتديني ايدك تدفيني وتلف الكوفيه بالجامد حوالين رقبتي وتطلب لي كوبايه شاي ، ولما الموج يعلي قوي تشخط في علشان اقوم اروح واكمل كلامي معاك في التليفون ، لانك خايف علي من البرد وكل ماباترعش انا ، انت بتترعش اكتر ، ولما ازعل منك لانك عايزني ااقوم ، تمسك ايدي اجمد وتقولي طيب تعالي في حضني ادفيك ، ولما اتكسف واقولك الناس ، تبتسم وتقولي طيب تصوري نفسك في حضني ، فاتصور نفسي في حضنك واحس الشمس دافيه واسمع صوت العصافير واحس سكرة في بقي بتدوب واحبك اكتر واكتر انت والبحر !!!!!!!!

انا اللي حلمت تعزمني علي فنجان قهوه في كافيه في وسط البلد ، كافيه حيطانها خشب وكراسيها مريحه ، تقدم القهوه في فناجين ملونه ومع القهوه حته شوكولاته ، وشوفتك في الحلم بتديني الشوكولاته بتاعتك وتضحك ، شوفتك في الحلم بتقلب لي الفنجان وتقرا لي بختي ، وتقولي بختك معايا ، قدامك نصرة وفرحه وحتتين شوكولاته ، اضحك فتضحك اكتر ، شوفتك بالحلم بتبص لي بطريقه تلخبط ولما اتلخبطت قولت لي باحبك لما تتكسفي ووشك يحمر ، مع ان وشي في الحلم مكانش احمر ولا حاجه ، قاوحتك وقلت وشي مش احمر ، قلت لي وشك زي التفاحه اللي خرجت ادم من الجنه وانا مش حاخرج من الجنه انا حادخلها معاكي ، وساعتها بقي حسيت ان وشي احمر وبيطلع نار ، قلت لي عارفه اجمل حاجه فيكي ايه ، انك لسه بتعرفي تتحبي !! اتريقت عليك وقلت لك كل الناس بتعرف تتحب ، قلت لي غلط ، الحب عايز ارض خصبه يرويها وورده مفتحه يدلعها ويهنيها وعصفورة تحلم بعش تبات فيه يحميها وسنبله قمح عايزه ارض تتزرع فيها ، الحب عايز حد نفسه مفتوحه للدنيا علشان يستقبل كل اللي رايح جاي وانت اجمل حاجه فيكي انك بتعرفي تتحبي وفي لحظه تكوني عصفورة بتدور علي عش وفي لحظه تكون عش بيحاجي علي فرخ صغير وفي لحظه تكون مركب عايز مينا وفي لحظه تكون عاصفه عايزه اعصار يكسرها وفي لحظه تكوني دمعه سخنه بتدور علي ايد طيبه تمسحها وفي لحظه ترجعي طفله وفي لحظه تكوني اغواء وفتنه ، واتكسفت من كلامك وكنت عايزه اقوم ، فكشرت في وشي بطيبه وقلت لي مش حتعرفي تهربي ، قلت لروحي ومين قالك اني عايزه اهرب ، قلت لي لسه ماخلصتش قرايه الفنجان ، وافتكرت الفنجان ، بصت فيه وضحكت قوي وقلت مش قلت لك مش حتعرفي تهربي ، في الفنجان تشوف سكتي مفتوحه وماشي معايا جدع ابن حلال ، ولما ااقولك مين الجدع ده ، تقولي هو فيه حد ابن حلال وجدع اكتر مني ... فاضحك جامد فتضحك .. وتقولي شايفه حروف اسمي مكتوبه ازاي علي فنجانك وعلي جبينك وفي قلبك ، فاتكسف واسكت فتقولي ، ماكنتش اعرف انك عبيطه وبتتكسفي مني ، فاقولك لا انا عبيطه ، فتقولي بحبك ياعبيطه ، فاحبك انت والقهوه والفناجين الملونه والدنيا كلها ....

انا اللي حلمت تكلمني تقولي ، انزلي فورا وهاتي معاك شال تقيل ، كنا في الشتا والجو سقعه ، انزل وانا مش عارفه رايحه فين ، الاقيك مستيني علي شط النيل وتقولي حافسحك ، ااقولك دلوقتي وبليل كده والدنيا برد ، تضحك وتمد ايدك تشدني ناحيتك ، ارتبك واخاف واتمني ااقع كان مش قصدي في حضنك ، تسندني وتعدي بي علي السقالة للمركب ابو شراع ابيض كبير ، احس دفا من كف ايديك ونفسك وتنهيده روحك وفي المركب تشغل اغنيه امانه عليك ياليل طول وهات العمر من الاول ، اضحك واقولك مااحنا لسه في اول العمر ، تقولي انا بحبها لاني حاغنيها ليكي في اخر العمر ، والاقي القمر بدر في السماء والميه فضي ، تقولي البدر فكرني بوشك ووحشتيني ، والريح جامد والمركب طايره فوق الميه زي قلبي ماهو طاير من الفرحه بكلامك ، و.... امانه عليك ياليل طول .... وليه لما بابقي معاك الدنيا بتحلو ، والجو يدفي وساعات الشمس بتطلع بليل ، والعفاريت تمشي والاشباح بتنام ، وفجأ ارجع طفله صغيره بضفيرتين وفيونكات ستان ، ليه باشوف نفسي معاك بفستان جميل وبكرانيش ، واشوف فيك امي لما كان تحكي لي حكايه قبل النوم ، واسمع صوتها في صوتك وضحكتك في طيبتك ، ليه لما باكون معاك ، بارجع طفله صغيره وافتكر حفله المدرسه لما كنت باغني وكانت ماما في الصف الاول بتصقف لي وانا مبسوطه ، ليه لما باكون معاك باتطمن وابطل اخاف من الضلمه واوضه الفيران والزمن الصعب !!! وامانه عليك ياليل طول .... اه ياريت ياليل تطول ... وانا قاعده جنبك في المركب والريح جامده والهواء الساقع يقرب منك يدفا ويحلو والميه بترسم بالموج علي وشها ابتسامات وعناقيد عنب احمر وفصوص رمان وشرار صواريخ العيد لما كنا بنولعها ونضحك وشويه رمل من اللي كنت بنرمي بيهم بعض علي البحر في راس البر ونضحك ..... وامانه عليك ياليل طول ، ايوه ياليل طول ، والنيل مبسوط والمركب بيجري فوق وش الميه زيي مبسوط والمراكبي النوبي العجوز بيبص لينا من تحت لتحت وهو كمان مبسوط .... ياااااااااااه الدنيا دفا قوي ، ليه قولت لي اجيب الشال ، انت مش عارف ان الدنيا معاك دايما دفا .... والليل يطول واحبك واحب النيل والمراكبي العجوز والقمر واتمني افضل احلم مااصحاش من النوم !!!!!!!!!!

انا اللي حلمت ان الدنيا بتمطر ، بتمطر جامد وانا قاعده في اوضتي تحت البطانيه استخبي من الرعد والبرق ، وفجأ تكلمني ، تقولي انزلي حالا ، اقولك مطر وبرد ، تقولي وماله ، هو الحب يحلا الا تحت المطر ، انزلي فورا ، انزل وانا باجري قبل المطر مايخلص ، وابطل اخاف من الرعد ومن البرق ، والاقيك مستيني في الشارع ، المطر نازل فوق راسك وهدومك وشعرك مبلول ومعاك ميت لا الف عقد فل ، وتحط الفل علي شعري المبلول وفي ايدي وتقولي تعالي نتمشي في المطر ، الفل يشرب من المطره ويطرح ميته شجره وشجره في قلبي ولما البرق ينور ابص في عينيك الاقي لونها جميل زي لون الدنيا واحس اني عايزه اطير ، واتمني لو اني كروان يسبح بحمد ربنا وبحبك ويرفرف بجناحه تحت المطر يرسم علي وش السما الرمادي ابتسامات واغاني وحتت شوكولاته وفرحه ، والمطره بتزيد وانت ماسك ايدي جامد وتقولي بطلي تخاف من الرعد ومن التوهه ومن الضلمه ومن البرد ، معايا مافيش توهه والدنيا نور علي طول واصدقك لما تقول وابتسم واقولك ميت حاجه وانا ساكته فتضحك وتقولي بطلي رغي كل كلامك واصلني ومعاه حته شوكولاته من اللي رسمتيها علي وش السما ، والمطر نازل فوق راسي وفوق الفل ، عناقيد لولي ، اخد عنقود لولي واديه لك ، توعدني حتعمله ميداليه مفاتيح وحتعلق واحده في السلسله تحت قميصك والباقي حتحطه في جيبك جنب قلبك وبسرعه تقولي لا الباقي حاحطه جنب صورتك في قلبي ... ولسه الدنيا برد والمطر شغال وانا وانت ماشين في الشارع وحدنا ، بنطربش في الميه ومش فارق معانا ، وفجأ نلاقي في اخر الشارع الفاضي شويه اطفال ، عمالين يضحكوا ويرشوا بعض بالميه من غير خوف ، محدش من الكبار خوفهم وقالهم رش الميه عدواه ، وانسي انا وانت كل كلام الكبار ونجري جري مع الاطفال ، ونرشهم بالميه ويرشونا ، ونضحك وهما يضحكوا اكتر واكتر والدنيا تلون وسط المطره والبرق ينور كل الضلمه والخوف اللي في قلبي وفي قلب الاطفال يمشي ويسيبنا مبسوطين ،وتسالني بردانه فاضحك واقولك كنت بردانه ومابقيتش و.... تدفي الدنيا والمطر يتعلق في السماء ويرسم اشكال ، طيارات ورق تسحب خوفنا وتطلع للسماء وتغيب وبالونات ملونه تكتب علي السما اسامينا ووشوش الاطفال وهي بتضحك ووشونا معاهم واحنا بنضحك ... ولما المطر يخلص وانا وانت في الشارع واقفين مبلولين ، نضحك قوي لاننا مجانين ، لكن انا وانت بنحب جنانا وبنحب بعض و........ ياريت كل الايام مطر ، اصلي بقيت بحب المطر قوي وباحب الجنان وبحبك !!!!

باحلم .... والعياط في الحلم فرج .. باحلم اني باعيط في حضنك ، طيب العياط في الحلم فرج وحضنك في الحلم ايه ؟؟؟؟

باحلم .... والسمك في الحلم رزق ... باحلم انك صياد طيب بشبكه كبيرة والسمك مبسوط فيها لانك اصطدته ، طيب السمك في الحلم رزق وطيبتك في الحلم ايه ؟؟؟...

باحلم .... والموت في الحلم عمر طويل ، باحلم اني بموت فيك وانت بتموت في ، طيب الموت عمر طويل ، طيب حبي وحبك في الحلم ايه؟؟؟

باحلم ..... ان احلامي تتحقق ، طيب الاحلام في الحلم دايما بتتحقق ، طيب احلامي ليه ما بتتحققش !!!

باحلم ... انك بتقولي حتتحقق !!!

واصحي الاقيني لسه باسمع صوتك وانت بتقولي حتتحقق !! ابتسم واقولك الله مااجعله خير !!!!!