انه الانتصار الذي كنت واثقه منه !!!!!ا

انا المصرية بنت المصريين ..

حفيده ايزيس وكل الملكات العظيمات في تاريخ مصر العظيم ..

ابنه حورس وكل الملوك العظماء في تاريخ مصر العظيم ..

انا................انتصرت علي الاخوان الارهابيين الخونة والامريكان  الاستعماريين الحقرا وعلي اسرائيل المجرمة ..

انا....................انتصرت باراده شعبي وقوه جيشي ويقيني بمصر علي المشروع الامريكي الاستعماري الحقير المدمر لبلادنا علشان يقسموها ويضعفوها ويحطموها ويدمروها في حروب اهليه وضعف اقتصادي وانهيار اجتماعي !!!

انتصرت ، لما شفت المؤامره بتاعتهم من اول لحظة ...

انتصرت ، لما قررت مااقبلش كلامهم ولا دعايتهم ولا خديعتهم ..

انتصرت ، لما ما صدقتش اكاذيبهم ولا وقعت راسي اسيره دعايتهم ولا قنواتهم ولا شعاراتهم ، ولا فرحت لما فرحوا بدبح بلدي ولا رددت وراهم كلماتهم ولا سلمتهم روحي ولا قلبي ولا عقلي !!!

انتصرت ، لما قررت اتصدي للمؤامره الامريكيه الاخوانيه بالمعرفه والوعي ونشر الحقيقه بين الناس ..

انتصرت ، لما كنت واثقه في بلدي ووطني وشعبي وانهم ابدا مش حينكسروا ولن يرضخوا ولن يقبلوا ولن يخنعوا ولن يصمتوا ..

انتصرت ، لما كنت باشد المصريين المحبين لوطنهم من جب اليأس والاحباط والانكسار ، واقولهم بكره حلوه وبكره تروق وتحلي وتفائلوا بالخير تجدوه ، لما كنت باقولهم صدقوا في مصر وصدقوها ، لما كنت باقول لهم حافظوا علي روحكم المعنويه ماتسمحوش للمجرمين الارهابيين يكسروكم ولا يحطموكم ولا يحاصروكم ، حبوا مصر وصدقوها حترد عليكم !!!

انتصرت ، لما عمري مافقدت يقيني في جيشي ولا قواتي المسلحه ، ولا عمري صدقت مايقولوه علي الشرطه ولم اروج له ولم اقبله ودافعت عنهم قدر مااستطعت وسط حمي وجنون الدعايه الموجهه ..

انتصرت ، لما كتبت كل اللي اقدر اكتبه علشان الناس تقاوم وتعتز بمصريتها وتعرف قيمه وطنها وحبها ليه ، لما نشرت كل حاجه قريتها تساعدهم علي المقاومه وتساعدهم علي رفض الارهاب والخيانه والانهيار والاستسلام ...

انتصرت ، لما كنت بادور علي اي واحد شايف المؤامره زيي ، ومقهور زيي وغاضب زيي ، كنت ادور عليه ولما الاقيه اتكلم معاه واقوي قلبه واسنده ويسندني ولما نتشتم ونتحاصر كنت اقوله معلش مسير الناس تفهم ، معلش المؤامره كبيره ، معلش الريح عاتيه ، معلش نستحمل ونقوي بعض قلب في قلب روح في روح ضهر في ضهر ونسند بعض ونسند ناسنا وحبايبنا وحيعدوا من المصيبه دي احسن واجمل ..

انتصرت ، لاني كنت مصدقه ان الوطن العظيم ده ودوله الحضاره دي لايمكن تتكسر ولا تتأسر ولا تنهار ولا تضيع ، وان شعبها حيقاوم وحينتصر ، وانها حتطلع من وسط شعبها رجاله وستات يقدموا حياتهم علشان ينصفوها وينصروها ويحموها ويحفظوها !!!

انتصرت ، لاني كنت مصدقه في مصر ومصر ماخذلتنيش واكدت لي اني كنت من اول لحظه شايفه صح وحاسه صح ، لاني كنت مصدقه في مصر وسامعه صوتها ومصدقاها وعارفه انها حتدافع عن وجودها وهويتها وحضارتها ووجودها ، لاني كنت مصدقه في مصر ، ومصر يوم 30 يونيو طبطبت علي قلبي وروحي ، وصالحتني وطمنتني ، وقالت لي اهم 33 مليون مصري في الشارع والباقي في البيوت كل شايل علم مصر وبيهتف ينقذها يحميها ويدافع عن وجودها ...

انتصرت ، يوم مالمصريين ادركوا ان قواتهم المسلحه درع وسيف ، وهتفوا باسمها ورفعوا اعلامها واحترموا قادتها ورموزها وابطالها ، يوم ماادركوا انهم كانوا ضحيه خديعه مجرمه حاولت تبعد بينهم وبين جيشهم علشان تحطم مصر وتحطم جيشها وتحطمهم !!!

انتصرت ، يوم مالمصريين ادركوا ان الشرطه المصريه هي اولادهم ، وانها بتحميهم وان وجودها في الشوارع امان ليهم ولاولادهم ، وان الشرطه اللي تخليهم يناموا مطمئنين في البيوت من غير سلاح متعمر جنب راسهم لان البلطجيه والحراميه حيخشوا عليهم البيوت يسرقوهم ويهينوهم ويموتوهم !!!

انتصرت ، يوم مالمصريين خرجوا الشوارع يصرخوا باسم مصر ، صوتهم من قلبهم ومن ارواحهم ، حاسين بخطر علي العزيزه الغاليه فقرروا يحموها وينقذوها وينتشلوها من الارهاب والاجرام والظلام والجهل والعصابه التي كانت عايزه تدمر بلدهم وتدمرهم !!!!

انتصرت ، لما كنت واثقه ان مصر الحلوة راجعه..

مصر الحضاره والتاريخ راجعه بامجادها وفخرها وعزها راجعه راجعه..

راجعه ، محروسة ، عزيزة ، غاليه ، حلوة الحلوات !!

انا المصرية بنت المصريين

حفيده ايزيس وكل الملكات العظيمات في تاريخ مصر العظيم

ابنه حورس وكل الملوك العظماء في تاريخ مصر العظيم

انا انتصرت ، ومااجمله احساس وشعور !!!!

احساس الفرحه بالانتصار والفخر والعزة !!!!

اسمحوا لي بقي النهارده وكل الايام الجايه ، احتفل مع نفسي ومعاكم ومع وطني بهذا النصر !!!