والله العظيم النهارده واحنا في مسيرة السيسي ، والمصريين حواليا ، حسيت بالفرحه والرضا وقلت مصر انتصرت ، ااقصد مصر اللي بجد انتصرت ..
ايوه النهارده المصريين كانوا حواليا وجنبي ... ازاي ، حاقول ...
مااحنا فيه مظاهرات كتيره ، صحيح ماشاركناش فيها ، لكن كان اللي مشاركين فيها شكلهم مش مصريين ، مش مهم معاهم بطاقه رقم قومي ، لكن مش شبه ولا شكل المصريين ..
النهارده كان المصريين حواليا ... المصريين اللي انا عارفاهم ، اللي شكلي وشكل اهلي ، شكل جيراني ، شكل اصحابي ، شكل زمايلي في المكتب ، شكل البياع بتاع الكشك اللي باشتري منه سجاير ، شكل الكهربائي والسباك وبياع الجرايد وبياع الفول ، شكل جاره امي وعمتي الكبيرة ، شكل بنتي وبنت اختي ، شكل طوابير البنات في المدرسه وشكل طوابير الشباب وقت دخول الجيش ، شكل القضاه اللي باشوفهم في المحاكم ، والكاميرا مان اللي شفتهم في استديوهات سي بي سي ، شكل الخياطه اللي بتخيط هدوم البيت ، شكل التمرجي اللي باتفائل بشكله لما اروح للدكتور ، شكل عامل الامن البسيط ، شكل ناس نادي الجزيره ونادي الصيد ، شكلي اهلي في مشتول القاضي مركز الزقازيق ...
النهارده كانوا المصريين حواليا ، واحده بطرحه وواحده بقصه ، واحده شعرها الا جرسون ، والتانيه سايباه طويل لنص ضهرها ، واحده لابسه جونله وقميص ، والتانيه لابسه جينز وتي شيرت ، واحده لابسه شبشب بسيط والتانيه لابسه كوتشي ، ستات شبه الستات اللي اعرفها ، شبه مدرسه الانجليزي في المدرسه الثانوي ، شبه البنت اللي بتعمل مانكير ، شبه الدلاله اللي كانت بتعدي علينا في البيت ، شبه موظفه مكتب التنسيق وموظفه الخزنه في المحكمه ، اللي شفتهم يوم 30 يونيو ، اللي شفتهم يوم 3 يوليو ، اللي شفتهم يوم 26 يوليو واللي شفتهم يوم مااحتفلنا ب 40 سنه علي انتصار اكتوبر ...
النهارده كان المصريين حواليا ، المصريين اللي شبه طمي النيل وقمح الغيطان والورد البلدي ، اللي شبه اخناتون وايزيس وتماثيل المعابد ، المصريين اللي مؤمنين بربنا لكن بيحبوا الحياه ورايهم ان ربنا رب قلوب وطمعانين في رحمته وكرمه ..
ليه باقول كده ، باقول كده لاني لاشفت شاب بديل حصان ، ولا بنت بشنب !!!
لاشفت الهدوم التحتانيه للشاب وهو مسقط البنطلون ، ولا شفت حماله البرا بتاعت البنت وهي لابسه ديكولتيه مكشوف مفتوح علي البحري ..
هل معني كلامي ان دول مش مصريين ، لا مصريين طبعا ، مصريين ببطاقه الرقم القومي ، لكن مش شبه المصريين ، مصريين بالجنسيه لكن مش شبه المصريين ، مصريين بقيد اساميهم في الجداول الانتخابيه لكن مش شبه المصريين ...
المصريين اللي شبه المصريين ، هما اللي كانوا حواليا النهارده ، بساطه وطيبه ، الحياه طاحناهم لكن عندهم امل ، عايزين يعيشوا احسن لكن مش علي حساب الوطن ولا الكرامة ...
النهارده كان حواليا مصريين شبه المصريين
وعلشان كده ، قلت لنفسي ، ايوه كده ، برافوا يامصر ...
برافوا يامصر ، النهارده حسيت ان مصر اللي بجد انتصرت ...
مصر اللي بجد انتصرت وحتكمل باذن ربي واراده شعبها انتصارها ..
ليست هناك تعليقات:
إرسال تعليق