اساتذه الجامعه زعلانين من تعديل قانون الجامعات اللي يتيح لرئيس الجامعه عزل وفصل اي عضو من اعضاء هيئه التدريس ، زعلانين وبيقولوا ده مقصود منه تكميم الافواه في الجامعه مش مواجهه الارهاب والعنف ...
طيب احب اقول لحضراتكم ، ان المقصود من القانون مواجهه الارهاب والعنف ، لان زملاء حضراتكم ، اقصد الزملاء الارهابيين ، كانوا بيدخلوا الجامعه في عربياتهم مولوتوف واسلحه للطلبة الارهابيين وبعدين يخشوا محاضراتهم يحرضوا الطلبه بتوعهم علي الدوله والدوله مش قادره تقرب لهم لانهم محصنين بقانون الجامعات وده خرب البلد وخرب الجامعات وخرب عقول الطلبه ودعم الارهابيين جوه الجامعه وبراها...
حضراتكم ، ماقدرتوش تمنعوا زمايلكم دول بالعقل والمنطق والمناقشه انهم مايدخلوش مولوتوف الجامعه وماقدرتوش تخلوهم يبطلوا يحرضوا الطلبه علي العنف ضد الدوله ، حضراتكم ماقدرتوش تمنعوهم وماقدرتوش كمان تعادلوا تأثيرهم علي الطلبه ، يعني هما يحرضوا الطلبه علي العنف ضد الدوله وانتم تغييروا وعي الطلبه وتقنعوهم انهم يتعلموا بجد بدل ماهم بلطجيه لا فيهم فايده في التعليم ولا في الادب ...
حضراتكم ، باقصد اساتذه الجامعه ، حضراتكم شفتم زمايلكم العمداء والاستاذه بيتضربوا ويهانوا ويتشتموا وتتكسر مكاتبهم وتترمي اوراقهم من الشبابيك وعملتم انكم من بنها مش شايفين حاجه ، ساعتها مادافعتوش عن زمايلكم اللي بيتضربوا ومنعتوا الطلبه يضربوهم ، لا سكتكم باعتبار الامر لايعنيكم ..
حضراتكم ، باقصد اساتذه الجامعه ، حضراتكم شفتم الطلبه الصيع الارهابيين اللي مفروض حضراتكم بتعلموهم بيكتبوا شتايم جوه الحرم الجامعي وبراها وعملتم انكم من بنها ... شفتم الطلبه الصيع بيخرحوا من الحرم الجامعي اللي حضراتكم ادتوه قدسيه عظيمه اكتر من اي حاجه ، بيخرجوا من الحرم الجامعي يكسروا ويدمروا ويهددوا الناس حوالين الجامعه بالمولوتوف اللي كانوا بيجهزوه جوه الجامعه وسكتم وعملتم انكم من بنها ، حضراتكم شفوتهم بيهددوا زمايلهم الطلبه ماتمتحنش وبيعطلوا الدراسه ويبلطجوا علي الاساتذه وسكتم وعملتم انكم من بنها ...
حضراتكم شفتم الارهابيين بيتنشروا جوه الجامعات اساتذه وطلبه وسكتوا وشوفتوهم بياخدوا اتحادات الطلبه ونوادي هيئات التدريس وسكتم ...
والنهارده بدل ماتصفوا مع الدوله لانقاذ الجامعه والتعليم ولانهاء مفرخه الارهابيين اللي بتطلع لان الاساتذه زمايلكم بيخربوا في عقول الطلاب مش بيعلموهم ، بدل ماتعملوا ده ، طالعين تتكلموا عن تكميم الافواه والحريه !!!!
للاسف .............. جرائم كثيره ترتكب باسم الحريه
للاسف ................... جرائم كثيره ترتكب باسم الحرية
الرساله الوحيده اللي وصلت من كلامكم ، انكم لا هاممكم التعليم ولا هاممكم الجامعه ولا هاممكم الطلبه ولا هاممكم الوطن ، كل اللي يهمكم الحريه وبس ، الحريه تؤدي لفوضي وماله ، الحريه تؤدي لتخريب وماله ، الحريه تؤدي لضرب زمايلكم الاساتذه واهانتهم وماله ، الحريه تؤدي لوقف العمليه التعليميه وماله ، الحريه وبس؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
وزعلانين ان التعليم بايظ ؟؟؟؟؟
التعليم بايظ بسببكم لا بسبب الدوله ولا الحكومه ولا القوانين ولا كبت الحريه
التعليم بايظ بسببكم انتم ..
بس علي فكره ، اي استاذ ارهابي او بينشر الارهاب في عقول الطلبه او بيدعو للفوضي او بيدخل مولوتوف في عربيته او بيخبيه في مكتبه ..... حتيرفد من الجامعه ، لان دي مسئوليه الدوله تحافظ علي التعليم وعلي الاجيال الجايه من كل الاخطار اللي بتهددها من اول الفوضي " الخلاقه " لغايه " الارهاب " السلمي !!!!
قرف بجد ...
ليست هناك تعليقات:
إرسال تعليق