والله العظيم الايام السودا حتخلص ... وحنوصل احنا والبلد دي لبر الامان !!!
امبارح بليل ... سالتني ام هالة ، عيدتي علي رفعت ؟؟؟ استغربت ومااستغربتش !!! قالت لي طلبته وماردش بس حاطلبه الصبح تاني!!! قعدت جنبي وحكت لي ان في شارعهم بيت مسيحين ، وانهم ناس محترمه جدا وان امها الله يرحمها كانت بتحبهم وتزورهم وتاكل معاهم !!! كنا بنتفرج علي نقل القداس من الكتدرائية ، قالت ده شغل يهود ، اسرائيل هي اللي اكيد عملت كده ، هي عايزه تقول ان دي حاجه غريبه علينا وعلي بلدنا ، ولان اسرائيل هي العدو الرئيسي في دماغها ، فهي اول حاجه جت في راسها انها السبب في المصيبه اللي احنا فيها ، قالت احنا كنا عادي وعمرنا ماعرفنا مسيحي ومسلم ، مش عارفه ايه اللي جري ، ورجعت سالتني ، عيدتي علي رفعت ؟؟
رفعت بالنسبه ليها بقي رمز الوحدة الوطنيه في بيتنا ، هو المسيحي اللي يعرفوه وبيجي البيت مره كل شهر يظبط الكهرباء ويغير اللمض !!!! قلت لها اه عيدت علي رفعت ، ابتسمت ، ضميرها الوطني انبسط وحست بالطمأنينة !!!! فجأ ومن غير سبب قالت السنيه هما السبب ، انتبهت لحديثها ، قالت بس هما كدابين ، بيقولوا حاجه ويعملوا حاجه تانيه ، حكت لي علي جوز اختها اللي فرض عليها النقاب وربي دقنه للارض وطلع بصباص وابن كلب وطلق اختها وسابها هي وعيالها من غير مصروف ..
انا وهي قاعدين نتفرج علي نقل القداس ، هي الشغاله اللي بتيجي تبات معايا انا وبنتي ، تيجي بليل وتمشي الصبح ، اتطلقت وهي عندها عشرين سنه ومعايا بنت عندها سنه ، بقالها عشرين سنه تشتغل علشان تصرف علي البت اللي ابوها نسيها وراح اتجوز وخلف عيال كتيره بيصرف عليهم هما ونسي بنتها ، بتحلم تجوز بنتها وتخلص من الهم ، نفسها تفرح بيها ، بتشتغل وتعمل جمعيات وتشتري جهاز للابنه الوحيده ...
قعدنا انا وهي نشرب شاي ونرغي والقداس شغال ، قالت السنيه كدابين ، مابصدقهمش خالص ، ولا حد في الشارع بيصدقهم ، ضحكت وبصيت لها بصه معنا انتي كدابه ، فزت من مكانها منطوره ، والمصحف والمصحف ماحد بيصدقهم ، اصلهم بيقولوا حاجه ويعملوا حاجه ، ورجعت لموضوع رفعت بسرعه ، انا طلبته لقيت تليفونه مقفول ، عندك له نمره تانيه !!! مبتسمه راضيه عن نفسها وهي بتطارد رفعت علشان تعيد عليه ، حاسه انها كده بتبعد الخطر عن البلد اللي بتحبها ومالهاش غيرها ، قلت لها لا مافيش نمره تانيه!!!! قالت خلاص الصبح اكلمه!!!!
صحيت الصبح علي صوت ام ايمن ، عندها برد لكن جايه الشغل ، ام ايمن بتشتغل في البيت الصبح ، ام لخمس عيال وجوزها طلقها واتجوز ومشي ، زي كل الستات بتكافح علي اكل عيش عيالها ، بتحبهم اكتر من عينيها ، طول النهارد تحلم بجواز بنتها وانها تسترها ، وانها تكبر الصبيان يشيلوا همها لما تكبر ، ست فلاحه طيبه جدا وشاطره وام بجد ، ام من اللي الامومه بتدلدق من تصرفاتها ...
دخلت ام ايمن الاوضه علي ومعاها الشاي والجرايد وسالتني ، عيدتي علي رفعت !!! ضحكت ، قالت بتضحكي ليه ، انسي بقي ، قلت لها نسيت ، قالت انا عيدت علي رفعت وقلت له احنا كلنا واحد !!! قالت المباحث كانت خاربه الشارع امبارح علشان عندنا كنيستين في المنطقه ، ضحكت وقالت ، بس مازعلناش منهم لما نزلوا الشارع ، ماهم لازم يحموا الكنايس ، علشان ولاد الحرام يتكبسوا !!!
قالت لي وانا لسه باشرب اول بق شاي ، انا قلت لرفعت انت اخونا ، قالت وقلت له انسي اللي فات والنبي ماتزعل منا !!! قالت رفعت قالها ربنا مايجيب زعل ، ضحكت وقالت بياكل لحمه اصله كان صايم ، قالت انا قلت للنسوان في الشارع لازم نعيد عليهم ماهم عادي يعني هما زينا واحنا زيهم ، قالت ده شغل يهود ، شرحت لي ، انا قلت لرفعت ، دول ولاد حرام يهود من بره مصر ماهو محدش يعمل كده غير واحد ابن حرام مش مصري ، ضحكت وهي لسه واقفه علي الباب ما بتبطلش كلام وزن ، قالت ان رفعت وافقها وقال فعلا ده شغل ابن حرام مش مصري ، ابتسمت كانها تقول احنا ابرياء من الجريمه دي ، قلت لها طيب ياام ايمن ، ضحكت وقفلت الباب وهي بتقول ، كل سنه وانت طيبه !!!!
رفعت اللي كانوا عايزين يخلوه منبوذ " مايشربوش ومايكلوش مطرحه " وكانوا خايفين منه وشايفينه حاجه وهما حاجه ، فجا تحول لرمز الوحده الوطنيه في بيتنا الصغير وبقوا النسوان وهو واحد واللي فرق بينهم ابن حرام مش مصري !!!! هما صادقين جدا وهما بيقولوا لي الكلام ده ، زي ماكانوا صادقين جدا وهما خايفين منه وشايفينه حاجه وهما حاجه تانيه !!! رفعت استوعب مخاوفهم وقدر يدوبها خلال السنتين دول ، انا ماسكتش وقلت في بيتي مافيش فتنه طائفيه ، وشويه شويه ابتدوا ياكلوا معاه ويشربوا الشاي سوا ويرغوا عن همهم ومشاكلهم ، ولما حصلت النصيبه " زي مابيقولوا عليها " اكتشفوا ان هما بيحبوا البلد وبيخافوا عليها وان رفعت زيه زيهم ،وشايفين ان ابن حرام مش مصري كان عايز يحرق البلد بيهم ، طيب ليه ، ده رفعت طيب وابن حلال !!!!
ام هاله روحت الصبح وام ايمن دخلت المطبخ تشوف وراها ايه وانا بشرب القهوه وقعدت احكي ليكم الحدوته وانا مبتسمه وسعيده ومطمئنه !!!! بجد بجد ، الايام السودا حتخلص حتخلص ، وحنوصل لبر الامان باذن الله وباصرارنا علي ان مايخشش بينا ابن حرام!!!!!
صباح الخير يابلادي الجميله !!!!
---------------------------
حكايه رفعت والنسوان حتلاقوها في اللينك ده
هناك تعليق واحد:
انا بصدق الناس البسيطه دى اكتر بكتير من الكلام الكبير اللى بيتقال
انا كدا صدقت واقتنعت ان مصر فى امان وهاتفضل بخير هما هما اللى قالوا مش هانشرب مكانه بس وقت الخطر اول مافكروا انهم يحموا مصر
ببساطه وبسهوله وبفطرة سليمه انهم يعيدوا على رفعت عشان ميزعلش مع ان مهمهمش زعله قبل كدا
مصر بناسها وفى ناسها
إرسال تعليق