تفكير بصوت عالي وبس خلاص !!!!!

كنت اتمني افرح زي كل الناس !!!!

لكن ليس كل مايتمناه المرء يدركه !!!

( 1 )

البلد دي مش عايزه حد يفكر !!!! الحكومه طبعا مش عايزه حد يفكر لان مش ناقصين وجع دماغ ، والمعارضه مش عايزه جد يفكر لان اللي بيفكر مابيعجوبوش اللي بتعمله المعارضه ، واحنا مش عايزين تفكير ، الحكومه عايزه اللي يصقف لها وبس والمعارضه عايزه اللي يمشي وراها وبس ، والتفكير خليه بعدين لما نفوق والدنيا تفضي ونروق كده ونقعد اما في الثورة اما في السجن ، نفكر علي راحتنا ..... البلد دي بجد مش عايزه حد يفكر ، اصلك لما تفكر ترتكب اكبر الموبقات والموبقات انواع اخطرها التفكير ، ليه ، لان التفكير رزيله واحيانا خطيئه واحيانا قله ادب زي الضحك من غير سبب !!!! وتفكر ليه ، انت يعني ابن اللي بارم ديله ، خلاص فتك ، ماتتنيل علي عينك وتسكت وتقلع راسك وتمشي حافي وبس بلاش دوشه ، اصلك لو فكرت حنختلف معاك ، ليه ، من غير ليه ، حنختلف وخلاص ، اي تفكير لايؤدي الي الوقفات الاحتجاجيه والثورات الاشتعاليه يبقي تفكير حكومي حقير ، وانتم مبسوطين من قله الثورة واحنا زعلانين من قله الثورة وياثورة فينيك فينك الفيس بوك بيني وبينك !!!!

والناس ، الناس اللي هي مش المعارضه ، اصل المعارضه حاجه والناس حاجه ، المعارضه محتاسه ومش عارفه تقنع الناس تتلم حواليها ، والناس غضبانه ومش لاقيه حد يقولها تعمل ايه ، ومابين هذا وذاك فجوه كبيره زي صحراء الربع الخالي ، اللي يمشي فيها يتوه توهه الغريب في مولد سيدي الامبابي ، المعارضه عماله تتكلم والشعب مش بيعبرها ، اه بصراحه كده ، بصراحه الشعب مش بيعبرها ، لا بيخش احزابها ولا بيشتري جرنانها ولا بينتخب مرشحينها ولايعرف قيادتها ، المعارضه بتشتم الحكومه لانها السبب ان الشعب مش عارفها ومش بيمشي وراها ، اما بقي الشعب فهو برضه بيشتم المعارضه لانها لاتعبر عنه ولا عن افكاره ولاعارفه تعمل له حاجه مفيده وسايبه الحكومه مستفرده بيه ، المعارضه بتقول علي الشعب خامل والشعب بيقول علي المعارضه مستأنسه والحكومه بتشتم الاتنين ، بتشتم المعارضه لانها فاشله ومش عارفه تلم الشعب عنها وسايباه يوجع راسها وبتشتم الشعب لانه مابيعجبوش العجب ولا الصيام في رجب ولامقدر حجم المجهود اللي مبذول في الخطط الخمسيه والسبعيه والمهلبيه .... بالذمه وسط الهوجه دي ينفع حد يفكر !!!

( 2 )

ال ايه انا كنت عماله افكر بقالي عشره ايام اكتب مقاله جد جدا !!! وعماله الم ليها معلومات من الانترنت والجرايد والتصريحات علشان اثبت صحه وجه نظري !!!! وده كله ليه ، علشان الناس تصدقني ، ولما الناس تصدقني تعمل ايه يعني ؟؟ ولا حاجه ، يمكن تكتئب شويه ، وابقي انا ام الانهزاميه كلها والسبب ان ام التغيير مابيحصلش في البلد اللي مفروض تكون اتغيرت من زمان !!!! طيب هو يصح برضه تكئبي الناس من غير ماتحسي بهمومهم !!!! مش كفايه اللي فيهم علي راي خالد الذكر يوسف وهبي لما راح المنصورة يمثل تراجيدي وفجأ نط واحد من الصاله وصرخ فيه وقاله ، جري ايه ياسي يوسف ، اللي فينا مكفينا !!!! ودي كانت نهايه فرقه يوسف بك وهبي وبدايه عصر التهييس المسرحي بزعامه كشك بيك وشركاه وصولا لسمير غانم واحمد ادم والقرف ده كله !!!

( 3 )

نرجع مرجوعنا ... ال انا كنت بافكر وعايزه اكتب مقاله جد !!! وبعدين حصلت ثورة تونس الياسمينيه !!!! والناس هاصت وانبسطت وتونس تونس ولا ماتشات كاس العالم ، خلاص تونس اخترعت الملح وشعبها شعب ماشي خطوته تطلع شرار واتكتب له الانتصار ، كل الناس فرحت الا انا ، ليه ، مريضه بالاكتئاب ، عندي في جسمي ( انتي بديز ) ضد الثورة والثوار ، ليه مافرحتش ، مع اني باحب الشعب وكل شعب وباحبهم لما ينبسطوا ولما ينتصروا ، وباكره الحكومه وكل حكومه وكاشفه راسي وداعيه عليهم ليل نهار ، وطول الوقت اقول ارحمونا وبطلوا تستفزونا ، اصل فيه خبرا لاستثاره الغضب الشعبي ، بيدوروا علي ايه اللي بينرفزنا ويعملوه ، طيب ليه ، هو حد ضايقكم ولا داس ليكم علي طرف ، ماعلينا ، ليه انا مافرحتش ، ليه ماانبسطتش لما الشعب التونسي خرج الشارع ، صحيح زي ماحد من اصدقائي قالي اصلك مع الحكومه والاستقرار !!! الله هو الاستقرار والامان بقي شيتمه دلوقتي وسبه لازم نتبرأ منها ، لا ياسيدي انا مش مع الاستقرار انا مع الفوضي ، كده ابقي حلوه ودحه وكويسه ومرضي عني !!! طبعا نسيت اقول ان صديقي اللي نفسه البلد تولع عايش بره مصر ، وجاي اجازه اسبوعين والطياره واقفه مستنياه ، لما قلت له انت بتقولي انا من بتوع الاستقرار انت بقي من بتوع ايه ، ضحك معترفا ، انا من بتوع الخارج ، بالضبط ، قلت له هو انت لما الدنيا تولع حتكون معانا هنا ، قالي لا طبعا ، حاسافر فورا ارجع مكان ماكنت ، واتقلب الحوار عبثي كوميدي منيل بستين نيله ، انت ياصديقي الجميل عايز البلد تولع لان لازم التغيير ، لكن انت قاعد بره ومش مستعد ترجع تقعد معانا وهي بتولع ، لكن لو انا او غيري من الغلابه اللي مافيش طيارات مستنياهم قالوا لا والنبي بلاش تولع نبقي حكوميين ومنيليين علي عينا !!! طب خدنا جنبك ياعم واحجز لنا كرسي في الطياره واول ماتولع ابعت لي دعوه وفيزه علشان اجي ااقعد جنبك ونسيبها كلنا تولع !!! حلو كده ، ماحلوش خالص خالص !!!! طيب انا فعلا بجد ضد الحكومه ، اللي كانت واللي جايه ، لكن شايفه ، يمكن لاني دقه قديمه ، شايفه ان التغيير له مقتضيات واليات ، وطريق وهدف ، غير كده يبقي فش غل ، حتي لو ترتب عليه تغيير ، ماهو مش كل التغيير للاحسن ، فيه تغيير للاسوء ومنيل بستين نيله ، ماتقوليش ماهي الناس اللي خرجت مش حتقبل التغيير للاسوء ، مين قال ، اولا الناس اللي خرجت خرجت لهدف واحد – واتحقق - بن علي يمشي !!! وبن علي مشي !!!! بعد كده ماقالوش حاجه كله كلام عام واسع مطاط ، بلا برنامج مطلبي ولا توجه سياسي ولا طبقي ولامستهدفات محدده !!!! ولا ده كله كلام بقي دقه قديمه تجاوزته الثورات البرتقاليه والبنفسجيه والفوضي الخلاقه وحقوق الانسان ، وبقت الحريه اهم هدف في حد ذاتها واهم من اي حاجه وكل حاجه والتغيير لاي اتجاه لقدام لورا مش مهم ماهي الحركه بركه ، كل ده هو المهم يارجعيه ياجاهله !!!! طيب !!! ربنا يقويكم !!!!

( 4 )

نرجع تاني لفش الغل .... طيب ياللي فرحتم بتونس ، انتم اساسا فرحتم ليه ، كلكم بتكرهوا بن علي ونظامه وحكمه ورجالته !!!! ولا اعتبرتوا ان تونس ستشعل شراره الثوره العربيه ، جماهير تونس الي تجاوزت النخب السياسيه وعملت اللي هي عايزاه حتكون ملهمه لجماهيرنا العربيه في كل مكان صحرا ان كان او بستان ، وكل الجماهير حتخرج عن بكره ابيها وامها – طبعا بالتجاوز عن النخب السياسيه والتعبيريه والموازيه واللي في الضل واللي في الشمس واللي فوق الارض واللي تحت الارض – كل الجماهير حتثور علي الانظمه العربيه اللي كابسه علي قلبنا زي الحجر وهوووووووووب ، الجماهير العربيه حتتحرر !!! ده باعتبار ايه ، ان الجماهير العربيه تايهه ومش عارفه طريقها والجماهير التونسيه نورت لها طريقها !!! ولا باعتبار ان الجماهير العربيه حتغير من الجماهير التونسيه وتعمل زيها !!! ولا باعتبارها فرة وحتفر في كل الرؤساء العرب والله حي التاني جاي ، زي ماتشات الكوره كده لما بيبقي وقتها قرب يخلص وفجأ نجيب جون ونفسنا تتفتح علي الاجوان قبل الاكسترا تايم ونصرخ كلنا بمنتهي الحماس الله حي التاني جاي الله حي التاني جاي !!!!! هو احنا وتونس ولاد خاله وتونس جابت مجموع اكبر في الثانويه العامه فحنغير منها ونذاكر علشان نجيب مجموع اكبر منها !!!! الله طب مااحنا عارفين اننا داخلين علي الامتحانات ، مابنذاكرش دروسنا من الاول ليه !!!!

ثورة تونس علي عيني وراسي لاصحابها !!! المجد لهم ، هما اللي قاموا بالثورة وهما اللي حيجنوا اثارها حلوه يارب ليهم وحشه ربنا ينجيهم منها !!! مالكم انتم بقي ، انبسطتم ليه ونعنشتم وردت فيكم الروح ، ايه كنتم مستنين مثال محلول يوريكم ان المساله سهله قوي كده !!!! طيب بس وانتم بتبصوا علي المساله المحلوله اعرفوا ظروفها واحوالها ، وخدوا بالكم ان الجيش حسم الصراع لصالح المتظاهرين ضد الرئيس وخلعه من مكانه وركبه الطياره وقاله روح ماتجيش تاني ، الجيش ماضربش المتظاهرين ولا دافع عن رئيسه الاعلي ، الجيش شال بن علي وجاب الغنوشي رئيس مؤقت ، ولما حد وطي علي ودن الجيش وقاله كده غلط لازم رئيس مجلس الشعب هو اللي يبقي رئيس مؤقت ، الجيش صحح غلطته وجاب رئيس مجلس النواب رئيسا مؤقت والرئيس ده علي طول جاب الغنوشي تاني ، الوزير الاول ، جابه تاني يشكل الوزاره علي طول وفي يوم وليله بقي وكان وصار واصبح الغنوشي هو اللي بيحكم تونس ، هو الغنوشي هو رجل الجيش اللي جاي يحكم ؟؟؟ ده سؤال بريء جدا !!! اصل طبعا كلكم واخدين بالكم ان بن علي بس اللي مشي هو وعيله مراته لكن النظام لسه موجود ومامشيش !!! الناس انبسطت ان بن علي مشي ماشي من حقهم ، لكن النظام زي لسه موجود ، هي ثوره من جوه النظام !!! هي ثوره لصالح فصيل من النظام علي حساب فصيل اخر من النظام !!! الجيش قبض علي وزير الداخليه ، رغم ان الاتنين كانوا اعضاء في وزراه واحده وزملاء علي تخته واحده ومسئولين مع بعض مسئوليه تضامنيه عن كل اللي حصل في ايام حكمهم قدام الشعب ، لكن الشعب خرج مظاهرات وشال بن علي وخلي الجيش يقبض علي البوليس ويجيب الغنوشي !!!! والنظام هو هو والجيش هو هو !!!! هل اللي حصل في حقيقته انقلاب عسكري من الجيش علي الرئيس مستخدما مظاهرات الجماهير تكئه ومبرر للانقضاض علي الرئيس !!!! علي فكره انا مابقولش كلام ابيح ولا فينا من الشيتمه بالاهل والاب والام ، لكن انا بحاول ااقرا اللي حصل ، ااقرا وانا مفتحه عيني ومؤجله احكامي الخاصه علي اللي حصل سوا بالانبساط او الحزن او حتي بموقف اللامبالاة !!!! طيب القصه مش كده ، القصه انها ثوره شعبيه بجد ، مالهاش دعوه بالجيش وضد النظام السابق ، لكن النظام السابق لم يمشي ومازال يحكم والجيش اللي بيقبض علي البوليس تبع النظام السابق ورغم كده الثوره خلصت والجماهير رجعت بيوتها والناس طالعه في الجزيره بتشتكي من قله الاكل والاطفال بتنط الحبل رمزا للطمأنينه بعد مامشي بن علي المستبد !!! ولا هي ثوره ضد بن علي وعيلته شخصيا واول ما سافر وموتوا اخو مراته ، تحقق المراد من رب العباد !!!

( 5 )

اللي حصل في تونس مليان اسئلة !!! اللي مش عايز يسمعها براحته !!! واللي مش عايز يفكر فيها براحته !!! واللي معتبرني غراب البين وبايخه وسخيفه وبابوظ فرحتهم انا متأسفه ليهم والله ، بس كفايه عليهم قرايه كده ويقفلوا الصفحه ويفضلوا مبسوطين زي ماهم مبسوطين !!!!

ايه اللي حصل في تونس !!!! الناس خرجت مظاهرات في الشوارع والمظاهرات استمرت واستمرت لمده حوالي 25 يوم ، في اليوم الاخير ، الجيش فرض حاله الطواريء واعلن حظر التجول واغلق المطار والمجال الجوي وبعدين بن علي سافر ومشي والغنوشي جه !!!! الناس في تونس طبعا انبسطت ان بن علي مشي واعتبروه نجاح للثورة ... والناس في الدول العربيه التانيه انبسطوا ان الشعب التونسي خرج مظاهرات واسقط بن علي ، وبقت الاجابه تونس والرجاله في تونس والثورة في تونس و............ ماذا بعد ؟؟؟؟ ماذا بعد ده سؤال بايخ مالوش اجابه !!!!

اول مابن علي مشي والجيش فرض حظر التجول ، المظاهرات خلصت والناس – في تونس وبره تونس - بدأت تحتفل بنجاح الثورة .... محدش قال ماذا بعد ولا فارق معاه !!! مبسوطين بالجيش الوطني اللي ماضربش الجماهير .... ومش فارق معاهم ان النظام لسه موجود بمعظم رجالته ...ومش فارق معاه ان الجيش بقي هو اللي بيحكم .... خلاص احنا كده انبسطنا !!! ماشي ربنا يبسطكم كمان وكمان ... امبارح قالوا كان فيه تراشق وضرب نار بين الجيش والامن الرئاسي ... جهازين امن ( الجيش والامن الرئاسي ) بيضربوا بعض وفي بعض ... وطبعا الجيش كسب !!!! امبارح قالوا الجيش قبض علي وزير الداخليه التونسي ، يعني جهازين امين ( الجيش والداخليه ) بيضربوا بعض وفي بعض .... وطبعا الجيش كسب!!! طيب اللي بيحصل ده مالوش اي دلاله ولا معني !!!!

( 6 )

الغنوشي حالا حالا وانا باكتب ..اعلن عن تشكيل حكومه وحده وطنيه وعرضها علي الرئيس المؤقت .... وفي الوزاره دي اسماء كثيره كانت من ضمن وزراء بن علي ومنهم وزير الخارجيه ووزير الداخليه ( نعم الوزير السابق اتشال لكن الوزير الجديد احمد فريع من ضمن وزراء بني علي اللي كانوا موجودين معاه ) ومنها اهم منظري الحزب الحاكم وقت بن علي!!!

اذن ..... الثورة حتي الان تمخضت عن ازاحه بني علي واسرته عن الحكم !!!! وتكونت حكومه وحده وطنيه لتهدئه الاجواء حتي تدخل تونس عهد الديمقراطيه الواسع كما قال الغنوشي !!! حزب بني علي ممثلا في الحكومه التي يرأسها الغنوشي رجل بن علي وشريكه في الحكم سنوات طويله !!!! وزراء بني علي مازالوا موجودين في وزاره الوحده الوطنيه التي يرأسها الغنوشي !!!!!

من اول يوم سالت وقلت مين البطل اللي لسه الاحداث ماكشفتش عنه !!!! والناس زعلت وقالت الشعب هو البطل !!! قلت مين اللي حيركب الاحداث ويسيرها لصالحه !!!! الناس زعلت ومحدش رد علي !!!! قلت مين اللي مشي ، النظام ولا الرئيس ، برضه الناس زعلت ومحدش رد علي !!! الناس كانت مبسوطه وفرحانه وبس خلاص !!!! لما ساركوزي رفض استقبال بن علي الفيران كلها لعبت في عبي ، ليه ، لان بني علي راجل ساركوزي ، طبعا ساركوزي مالوش رجاله ، ساركوزي له مصالح وهو شاف ان مصالحه مش مع بني علي ، لكن في نفس الوقت ماكانش قلقان خالص ، كان متطمن ومبسوط من اللي بيحصل !!!! طيب ياساركوزي انت شايف ايه واحنا مش شايفينه !!! بقي تونس اللي ليك فيها مصالح عظيمه جماهيرها خرجت الشارع واسقطت الرئيس وانت كده في بطنك بطيخه صيفي واخر طمأنينه !!! اوعي تقولي اصلي باحترم اختيارات الشعوب ، لانك كداب وانت واوربا الموحدة وكل اللي يتشدد ليكم ولا بتحترموا اختيارات الشعوب ولا اي حاجه ، والقصه قصه مصالح وبس !!! انت ياساركوزي مطمئن ليه ، اقولك انا ، مطمئن لان رجالتك واللي حيحققوا مصالحك لسه موجودين في تونس وحاكمين وقاعدين ومتطمنين من اول وزير الدفاع لغايه الوزير الاول !!! مافيش حاجه حصلت تقلقك خالص علشان كده نمت وفي بطنك فدان بطيخ صيفي ومتطمن علي مصالحك وعلاقاتك الخاصه مع ثورة الياسمين !!!!

اما المستر اوباما بقي ، فده موضوع تاني خالص ، لان اوباما اللي عمره مابيحترم ام اي شعب ولا ام اي اختياراته ، فجأ اعلن احترامه لاختيارات الشعب التونسي !!! ياسلام ، باماره ايه يامستر ... انت كمان متطمن ومبسوط ومستريح من اختيارات الشعب التونسي !!!! والختمه الشريفه انت يامستر انت والمسيو ساركوزي والوزير غنوشي عارفين كل حاجه ودافيننها سوا علشان كده متطمين علي الاخر !!!! وانا بقي اي حاجه تطمنكوا وتبسطكوا تقلقني !!!! خلقتي كده دمي مابيجيش مع دمكم!!!!

( 7 )

مش عارفه ليه كلام الغنوشي الان حالا فورا وهو بيتكلم في التلفزيون قدامي ، وانه حيفرج عن كل المعتقلين وحيعمل عفو سياسي عام عن كل اللي اتقبض عليهم بسبب افكارهم ، فكرني بانور السادات لما فتح المعتقلات وحبس مراكز القوة ، وناس قالت عنها ثوره التصحيح وناس قالت عنها ديقراطيه لها انياب وناس قالت ده انقلاب من السادات علي رجاله عبد الناصر والناصرية !!!! طبعا بن علي مش عبد الناصر ، علي الاقل من وجه نظري ، لكن الحاجات شبه بعض قوي بصرف النظر عن الاسماء والشخصيات !!!!

ربما اكون انا دقه قديمه وبافكر بطريقه عفا عليها الزمن والثورات التي افهمها لم تعد ثورات هذه الايام البرتقاليه البنفسجيه !!! ربما اكون انا دقه قديمه لاني باعتبر ان الثورة الحقيقه تفترض وجود تنظيم سياسي طليعي يقود الجماهير وله برنامج سياسي وبرنامج مطلبي والناس تلتفت حوله وتؤيده وحين تنتصر الثورة يحكم ذلك التنظيم لصالح الجماهيره التي ثارت من اجل افكاره ، ويكون هذا التنظيم له انتماء طبقي وفكري وعقائدي محدد !!! ممكن تكون قياده الثورة عباره عن اتفاق حد ادني بني مجموعه من التنظيمات السياسيه التي تري انها يمكن تتوحد علي ذلك الحد الادني وتتشارك في تحقيقه ، وجماهير كل تلك التنظيمات السياسيه تدفع في اتجاه الثورة وحين تفلح الثورة تكون قيادتها التي تحكم الوطن هي قياده تلك التنظيمات السياسيه التي دعت للثورة وتتشارك في حكم الوطن وفقا لبرنامج الحد الادني المتفق عليه !!! وهناك فارق كبير بين هذا وبين انتفاضات الغضب الشعبي ، تلك الانتفاضات العفويه التي لاتتبني برنامج ولا رؤيه سياسيه ولا تصور عن المستقبل ، والتي تخرج فيها الجماهير تعبر عن غضبها الشديد ، وهو الغضب الذي قد يستثمره هذا التيار السياسي او ذاك ليركب عليه ويجني فوائده ومميزاته ، او يبقي عفويا غاضبا ليحدث فوضي لايعرف احد نهايتها مثلما لم يعرف بدايتها !!!! الغضب الشعبي غير الثورة السياسيه !!!! الثورة ليست مجرد مظاهرات غاضبه مهما كانت حاده وقويه ، الثورة تصور كامل عن مستقبل ترغب الجماهير الثائره في تحقيقه والوصول اليه !!!!

( 8 )

اخر حاجه حاقولها ....

انها اسرع ثوره في العالم تقوم وتهدأ ...فبعد ثلاث ايام من عزل الرئيس شكلت حكومه جديده تولت الحكم بهدوء وقبول جميع الاطراف بما فيها الجيش !!!! والامر هدأت وتهدء شيئا فشئيا !!!! وقد رصد البعض ، ان الاذان في مواعيد الصلاة قد عاد لتلفزيون تونس العلمانيه " سابقا " واعرب الغنوشي زعيم جماعه النهضه الاسلاميه المنفي خارج تونس انه سيعود لتونس وتناقش الوزير الاول مع بعض الاسلاميين حول بعض الامور الاسلامية في تونس بمناسبه عوده الغنوشي لتونس بعد الثورة .... وفتحت صفحات كثيره لتونس الاسلاميه علي المواقع والمنتديات !!!

مالذي حدث في تونس ؟؟؟ ومالذي يحدث وسيحدث ؟؟؟؟ لااحد يقول ولااحد يعرف !!! او هكذا اظن !!! لكني اري بوضوح ان معظم الناس فرحين بانتفاضه الجماهير التونسية وثورتها باعتبارها دليلا علي ان الشعوب العربيه مازالت حيه والرجاله مازالت رجاله !!!! والقليلين متوجسين ومنتظرين !!! وساركوزي واوباما والجزيره مبسوطين !!! والجيش يحكم حتي لو لم يقول ولم ينزل الدبابات الشوارع وحتي لو لم يلبس الغنوشي الكاب العسكري والرتب !!!! والجماهير التونسية عادت لبيوتها والاسواق بدأت تفتح وتعاني من شح في المواد الغذائيه والاطفال بتنط الحبل في شوارع تونس الياسمينيه !!!!

اخر سؤال حاساله بمنتهي البراءه ، ياتري لو الجماهير التونسيه رفضت اللي الغنوشي عمله ورفضت وزارته ورجالته وكلامه !!! حيفضل الجيش وطني وحيسمع كلامهم وينفذ رغباتهم ولا ايه ؟؟؟؟؟

( 9 )

ربما ماحدث في تونس ، من مظاهرات شعبيه وصولا لعزل الرئيس وتعيين الوزير الاول السابق وزيرا اول حالي ورئيس لحكومه الوحده الوطنيه ، ربما يكون مرضي لاناس كثيرين ، غضبانين ومش عارفين عايزين ايه ومش عارفين يتعمل ازاي ومعتبرين ان اللي حصل كويس قوووووووووي ... هما حرين !!!! بس ده مش تغيير بجد ولا ثورة بجد !!! وبس خلاص !!!! مع احترامي طبعا لكل الغاضبين ومظاهراتهم وتضحياتهم لكن للاسف ليس بالغضب وحده تحدث الثورات ويحدث التغيير !!!!

( 10 )

وحابطل افكر واريح راسي ... وحابطل اشك في اوربا الموحده وامريكا والثورة البرتقاليه والفوضي الخلاقه وحاصدق ان الناس خرجت لوحدها ورجعت لوحدها وبن علي مشي لوحده والجيش قرر مايضربش لوحده لانه وطني وبيحب الشعب !!! حاصدق ، او حاحاول اصدق !!!! علشان محدش يزعل مني تاني بعد كده !!!!

( 11 )

معلش والنبي اخر حاجه حاقولها ، فيه ناس شايفه ان الدنيا لازم تولع علشان تتغير وانها لما تتغير مش مهم تتغير لانهي اتجاه اوحش احسن مش مهم مؤقتا ولا في هذه المرحله ، المهم التغيير في حد ذاته ، وشايفين ان اي حاجه وكل حاجه تؤدي لهدفهم السامي العظيم ده كويسه ومطلوبه وتستحق التحيه !!! انا طبعا مش شايفه زيهم خالص ، لكن في اطار اللي هما شايفينه لازم يبقوا مبسوطين جدا الايام دي !!!! لان فعلا الناس علي وشك الانفجار والانفجار محدش عارف حيعمل ايه ولا حيودينا لفين ، انا ااقلق من ده لاني بحب البلد !!! وهما يبقي مبسوطين علي الاخر لانهم برضه بيحبوا البلد !!!! وعلي راي الست ام كلثوم ، كلنا بنحب القمر والقمر بيحب مين ؟؟؟؟؟؟ وربنا يستر من الايام الجايه واللي حنشوفه الايام الجايه !!! يستر علينا وعلي تونس وعلي البلاد العربيه كلها !!! والله يخرب بيتك يااوباما انت وساركوزي والاتحاد الاوربي كلكم علي بعض !!!!!