من غير فزلكة !!!ا

جايين في وشنا وماشين عكس الاتجاه بمنتهي الفتونه !!!!

ببساطه من غير مقدمات ولا فزلكه !!!

المصريين بيعتبروا ان الحرية هي الفوضي وعدم احترام القانون !!

ويعتبروا ان مخالفتهم للقانون ميزة وحق ، ومخالفه معارضيهم للقانون جريمه تستحق التشهير والتجريس وربما الاعدام !!!

الحريه هي الفوضي ... السير عكس الاتجاه والركن في وسط الشارع صف وصفين ، البناء علي الاراضي الزراعية وتعلية العقارات بالمخالفه للقانون ، القاء القمامه في الشارع ورمي " الردش " المكسر علي الكباري والطريق الدائري ، افتراش الشوارع والارصفه لبيع البضاعه فاسده او مهربة او مجهوله المصدر دون التقيد بتاريخ الصلاحيه ولا دفع الضرائب ولا الالتزام بسياسه التسعير ولا حقوق المستهلك ، عدم الالتزام باشارات المرور ولا السرعات القانونيه ولا السير في الحارات المرورية وغيرها من السلوكيات اليوميه المنفلته!!!

الحرية هي الفوضي .... هي مخالفه القانون ، اي نص قانوني يمكن مخالفته ، ممنوع سير الاتوبيسات علي الكوبري ، بعد الثورة الاتوبيسات تمشي علي الكوبري ، ممنوع سير التوك توك في الشوارع الرئيسيه ، بعد الثورة التوتوك تمشي في الشوارع الرئيسيه ، ممكن الركن عمودي علي الرصيف ، بعد الثورة العربيات تركن عموديا علي الرصيف !!!!

الحرية هي الفوضي ... والحجه السهله المعروفه ، ماهو مافيش حكومه !!!! وكان المواطن المصري سيعيش فوضوي حسب كيفه ومزاجه وبراحته - سواء ضايق الاخرين او لم يضايقهم - حتي تردعه الحكومه بعصاها وبوليسها وقوانينها الرادعه ، اما الالتزامات الاخلاقيه والروادع الشخصيه واحترام الغير وحقوقه ، فهذا لايعرفه المصريين ولايلتزموا به ، المصريين يعتبروا الحريه التي يحبوها هي الحرية المطلقه بلا اي قيود ولو جار سلوكهم علي الاخرين واعتدوا علي حقوقهم ...

الحرية هي الفوضي هي مخالفه القانون ...

مظاهرات اهالي المساجين تطالب بالافراج عن ابنائهم بنصف المدة ، حتي المحكوم عليهم في قضايا المخدرات والقضايا الماسه بالشرف ، لكن القانون لايسمح بهذا الافراج !!! مش مهم ، مش مهم القانون بيقول ايه المهم احنا عايزين ايه واهي ثورة بقي والثوره عايزه مظاهرات والمظاهرات بتجيب نتيجة وتضغط علي الحكومه اللي بتعمل حساب المظاهرات وتحقق مطالبهم !!!

ناس تضرب رؤسائهم ومديريهم بالجزم ، باعتبارهم حراميه او مستغلين او من اذناب النظام وبقاياه ، مافيش قانون ولا محاكمات ، ضرب بالجزم وهتاف وشتيمه والاخرين يتعاملوا مع الموضوع عادي باعتبارهم يستاهلوا ويشيروا الخبر علي الفيس بوك وتوتير وهات ياضحك وتريقه ويستاهلوا ، طيب ده اللي حصل ده جريمه اعتداء علي الاخرين ، لو مجرمين يعاقبهم القانون ، لسه حنستني القانون ، بالجزمه وعلي ام راسه وعقبال الباقيين !!!

ناس علي الفيس بوك وتويتر وعلي التليفونات الخاصه ، تعرض وتشير وتتناقل فيديوهات ( صوت وصورة او صوت بس ) عباره عن تجسس وتصنت علي الاخرين ( اي اخرين مابيحبوهمش ) علي لقاءاتهم مع الاخرين او علي مكالماتهم التليفونية او حواراتهم الشخصيه ، ناس بتتكلم في حوارات خاصه تقول كلام ابيح شتيمه شخصيه او سياسيه ، ننسي التجسس والتصنت وانه يشكل جريمه قانونيه ، ونحاكمهم علي خصوصياتهم باعتبارها تخصنا جميعا ونعاقبهم عليهم ونشهر بيهم ونفضحهم بسببها ، محدش ساعتها يفكر ان كل اللي بيحصل جرائم يعاقب عليها القانون ، ههههههه ، سلم لي علي القانون وقوله خالتي بتسلم عليك وبتقولك طظ فيك ، وبمنتهي راحه الضمير ، ننسي الجرائم التي ارتكبت في حقهم ونمارس حريتنا في فضحهم والتشهير بهم ، ماهو شعارنا الحريه كل الحريه للشعب ( اللي هو احنا ) ولاحريه لاعداء الشعب ( اللي هما مش احنا ) ونشتم وننبسط ونهيص وكأن التجسس علي ( اللي مش احنا ) حلال وعظيم وميت فل وعشره !!!

ناس طول عمرها تتكلم عن حقوق الانسان وتشتم النظام البائد لانه معادي لحقوق الانسان وبيخترقها ولا يحترمها مع معارضيه ، فجأ بمناسبة الثورة ، تتكلم عن العزل والحرمان السياسي ومحاكم الثورة رغم ان كلها اجراءات معاديه لحقوق الانسان واجراءات استثنائيه غير دستوريه وغير قانونيه ، لكن بدام مع الخصوم والاعداء والمعارضين للثورة وفلول النظام وبقاياه ، يبقي حلال حلال ومرحب به !!! وطبعا لو حاولت تقول الكلام ده غلط ، يطلع ميت حد يقولك فاكر امن الدوله كانت بتعمل ايه ، فاكر التزوير ، شايف الفساد ، وكأن هما كانوا مجرمين وايامهم خلصت ومن حقنا احنا بقي نبقي مجرمين ونشربهم من نفس الكاس اللي شربوا الناس منا ...........!!!!ا

البلطجيه يخوفوا الناس ويروعوهم ، فالمحاكم العسكريه تحكم عليهم بالسجن سنين طويله ، وناس تقول ليه قدام القضاء العسكري ده مش قاضيهم الطبيعي وناس تقول ازاي محاكمات تتم بليل او يوم جمعه او من غير محامين ، لكن الناس كلها تقول وايه يعني ماهم بطلجيه ويستاهلوا اللي بيجرا لهم .... وكان ضمانات حقوق الانسان لنا وليست لخصومنا ( السياسين او البلطجيه او الاتنين ) !!!!

السلفيين يهدوا الاضرحه لانها حرام ( حسب تصورهم ) يهدوها بدراعهم ، واهل اطفيح يهدوا الكنيسه لان بيتعمل فيها اعمال ( حسب تصورهم ) وفي قنا يقطعوا ودن الراجل لان فيه في عمارته ست " بطاله " وهو علي علاقه معاها ، طيب هي فعلا ست " بطاله " ؟، طيب هو فعلا علي علاقه معاها ، طيب ده حلال ده حرام ، ده قانوني ده مش قانوني ، مين من حقه يقيم سلوك الاخر ومين من حقه يعاقبه لو عمل حاجه حرام !!! مش مهم دي كلها قضايا فلسفيه قدام التلاعب بمشاعر البسطاء الغيورين علي دينهم ، وهوب ، يالا نعاقبه ويلا نقطع ودنه !!! الناس تزعل لان السلفيين زعموا انهم اقاموا الحد علي الراجل " القبطي " رغم ان الحدود مافيهاش قطع " ودان " لكن محدش ياخد باله ان كل الموضوع فيه اعتداء علي حريته الشخصيه وعلي سمعه الست ، شويه ناس قرروا ان الست بطاله والراجل علي علاقه بيها ، ظلم او حقيقه مش مهم ، ثم قرروا يعاقبوهم علي هذا التصرف ، بصرف النظر عن راي القانون فيه ، وقرروا ينفذوا العقاب بايديهم .... احنا بقينا احرار ، نقيم ونحكم ونعاقب وبراحتنا !!! حريتنا صح وحريه الاخرين مالهاش وجود !!!! وادي نفسي الحق بالتصلصص علي بيوت الناس وانتهاك حرماتهم الشخصيه ، فاقرر انا ان جاري ( اللي مابحبوش ) بيعمل حاجه غلط في بيته واستعدي الناس عليها والناس تصدقني ونضربه ونعاقبه ونهيص ونطبل وحريه ياحبيبي حريه !!!! ايه الجنون والفوضي دي !!!!

الحرية هي الفوضي !!!

الفوضي بكل طريقه !!!

مافيش حكومه ، كما يقول الناس ، مافيش قانون ، فيه حريه يعني فوضي !!!!

ولو حاولت في اي لحظه تقول للناس ان اللي بيحصل غلط لانه اعتداء علي القانون او الحريات الشخصيه او حقوق الانسان او حقوق الاخرين وحرياتهم ، تتهاجم وتتقطع لانك ضد الشرع او ضد الدين او ضد الاخلاق او ضد الحريه الشخصيه او مع الحكومه واذنابها وفلولها وديولها ، تتهاجم لان كل الناس مبسوطه بمساحات الحريه الجديده اللي بيعيشوها ، هما احرار والباقي لا ، هما احرار والباقي لا.... !!!!

ولما القانون يتضرب الجزمه ..

نبقي في غابه ..

ولما نبقي في غابه ..

كل واحد ياخد حقه بدراعه ..

سواء من مديره او رئيسه او من النظام او من الجيران ..

كل واحد ياخد حقه بدراعه وتبقي فوضي عارمه مخيفه موحشه !!

ويبقي الانسان رخيص رخص المطواه اللي بيشيلها سواق التوك توك علي الدائري ومستعد يغزك بيها لو ضايقته !!! او رخص السنجه اللي شايلها البلطجي وهو قاعد يبيع بضاعه فاسده وبيضحك علي الناس بيها وقافل الشارع ومعطل المرور ومستعد يقطع رقبتك بيها لو ضايقته !! او رخص السطرين اللي بيتكتبوا علي الفيس بوك او علي تويتر واللي بيكتبهم ثوري متعجرف شايف انه صح وثوري جدا وانك متخاذل ومش ثوري خالص وانك لابتدافع عن القانون ولازفت المشكله انك من فلول النظام وهو قرر يكشفك ويجرسك ويفضحك بمنتهي الثورية!!!!

طيب وعلي ايه يامصر ، خلاص ياجدعان ولا حد يزعل نفسه وعيشوا حريتكم الجديده بمنتهي السعاده !!!

اضربوا القانون بالجزمه !!!! واستمتعوا بالفوضي وبالغابه الجديده اللي بنعيش فيها !!!!

بس خدوا بالكم ، لما نبقي في غابه و نطلق التمانين مليون علي بعض تبقي وقعتنا سودة !!!!

وهي غالبا فعلا ان وقعتنا بقت سودة خلاص !!!

بالمناسبه ، عارفه ان الشعب كان عايش في كبت وقهر وفساد ورشوه ومحسوبيه وتعليم بايظ واعلام سيء وازمه اقتصاديه واجتماعيه وطبقيه من 30 سنه .. علشان محدش يقولي الحكايه دي ويفتكرني مش عارفاها !!!! عارفاها لكن ده مش معناه ان الناس تعمل مابدا لها ، وحتي لو الناس " العامة " عملت مابدا لها فمفروض ان النخب الثقافيه والسياسيه ماتقبلش منهم اي حاجه باسم الحرية لان دي مااسمهاش حريه ، دي اسمها فوضي !!!

ده رايي بالمناسبه مع احترامي لكل اراءكم !!!

تحديث .... 3 ابريل ..

*** بعد مانشرت النوت ، حصل احداث جمهور الزمالك يوم السبت 2 ابريل مساءا ... وهي حاله بلوريه واضحه لكل مااتحدث عنه !!! الحريه يعني الفوضي ، مافيش بوليس يضربنا يبقي ننزل نكسر ونقطع ونضرب ونقلع هدومنا ونعيش الحريه باروع صورها !!!!

**** بعد مانشرت النوت صحيت الصبح رايحه شغلي يوم السبت ، لقيت المرور غريب جدا ، عربيات جايه في وشنا ، المشكله ان العربيات طالعه الطريق الدائري لقت حادثه ، قررت العربيات تلف عكس الاتجاه وتنزل ، لما نزلت كان ممكن تخش يمين وتمشي عادي لكن تلف حته كبيره ، طيب وتمشي يمين ليه مالشمال حلو ، وفي وش العربيات عاكس ومعكوش ، ماهو لافيه امناء شرطه يسحبوا رخصنا ولا فيه حكومه تقبض علينا وعيش الحريه ياحبيبي ، حريه ياحبيبي حريه ... حانزل كمان الصورة اللي صورتها لمشهد العربيات !!! هنا بقي لا فيه ثوره مضاده ولا فيه فلول الحزب الوطني ، هنا فيه قله ادب وقله اخلاق !!! ببساطه وبوضوح !!!!ا