عايزه اكتب في الموضوع ده من زمان قوي .... لكن كل مااقرر اكتب ، يحدث حدث اكثر اهميه ، فاترك ماارغب في الكتابه عنه للكتابه عن الحدث المعاصر اهم من التاريخ القريب ...
عايزه اكتب عن ايه ، عايزه اكتب عن اللجان الشعبية ، لان ده كان الجزء التالث من المؤامرة علي مصر وهدم الدوله المصرية ...
** الجزء الاول كان مظاهرات التحرير والاسم ملايين والجزيرة تعملهم ملايين الملايين ... وبقت ثوره وشباب الثورة وكلنا عارفين ايه اللي حصل ...
** الجزء الثاني كان اقتحام السجون ، مش بس علشان تهريب الارهابيين ، لا علشان اشاعه الفوضي في المجتمع ، اشاعه الخوف ، فجأ كل الناس بتصرخ المساجين هربوا من السجن ... وده يقودنا للجزء الثالث ..
*** الجزء الثالث كان الحقوا بيوتنا حتقتحم من الحراميه والعصابات والمساجين اللي هربوا ...
الثلاث اجزء دول مع بعض ، هما اللي عملوا يناير المجيدة ومكنوها من الوطن ولو لبرهة من الزمن ....
ازاي ؟؟؟
الجزء الاول ، ناس كتير او قليل نزلت الشارع نزلت التحرير ، وقالت عيش حريه عداله اجتماعيه وقالوا ارحل يعني ارحل ..الناس دول من وجه نظر مصريين كتير كان عددهم قليل قوي مهما تقول قناه الجزيره وافلامها المزيفة ..
فيه مصريين كتير نزلوا يردوا عليهم ويقولوا مش عاجبنا اللي انتم بتقولوه ولا موافقين عليه ، نزلوا يوم 2 فبراير في ميدان مصطفي محمود وكان عدد كبيرهم ويتمد من اول بولاق لغايه ميدان سفنكس ، لكن طبعا مافيش كاميرات صورتهم ولا فضائيات استضافتهم لان وجودهم كان يدمر المخطط الكبير الذي يشارك فيه الاعلام بدور كبير ، في نفس اليوم حصلت موقعه الجمل ومات ناس وبقي الحقوا التحرير بيقتحم من الحزب الوطني ومبارك ، وكان لازم موقعه الجمل تحصل لسببين السبب الاول خطاب الرئيس اليوم السابق ، الخطاب المؤثر اللي خلي حتي " مني الشاذلي " تعيط علي الهواء وخلي ناس كتير من اللي كانوا في التحرير ومش ثوار ولانشطاء ولا ممولين ولاخونه ولااخوان ، ناس وطنيين قالك طيب نمشي وهو حيسلم السلطه بعد سته شهور ، كان لازم تحصل موقعه الجمل علشان الناس دي ماتمشيش وناس تانيه تنزل لان النظام المجرم بيموت الشعب في التحرير ، السبب التاني اللي كان لازم تحصل علشانه موقعه الجمل ، الناس اللي نزلت عند مصطفي محمود وملت شارع جامعه الدول العربيه من اول بولاق الدكرور لغايه ميدان سفنكس ، كان لازم حدث جلل يغطي علي وجودهم وصوتهم وهتافاتهم باعتبارهم هما كمان الشعب اللي بيريد ، كان لازم حدث جلل ودم يسيل علي الارض والحق النظام القاتل مش بس كده لا ويشاوروا عليهم ، يعني مرتضي منصور اتقدم للمحاكمه في موقعه الجمل لانه راح مصطفي محمود ، مش عارفه قال ساعتها ايه بالضبط ، لكنه كان كلام زي كل الكلام اللي بيتقال في الوقت ده ، لكن كلامه اعتبروه تحريض علي موقعه الجمل وهوب يالا اتحاكم ...
طيب ده الجزء الاول من الحدث ، مظاهرات التحرير ...
كان ممكن جدا بعد يوم مصطفي محمود ، ينزل ملايين مره تانيه وتالته وعاشره ، بلاش ملايين ، ينزل مئات الالوف ثم عددهم يزيد زي ماكده الثوار نزلوا الوف ثم عددهم زاد وازاد ( زي مابيقولوا ) ، طيب ايه اللي منع المصريين ينزلوا يقولوا الشعب يريد بدام هما مصممين ان التحرير لايعبر عنهم واللي بيقولوا عليه الشعب هو جزء من الشعب وانهم هما الجزء الثاني ... اللي منعهم ينزلوا ان الاعلام تجاهلهم تماما وكأنهم هوا مش موجود ، يعني الاعلام مركز علي البرادعي والنشطاء والشهداء ومتجاهلهم تماما ، الحاجه الاهم ان المصريين دول ، ملايين الملايين قضوا ال 18 يوم سهرانين طول الليل قدام بيوتهم فيما سمي اللجان الشعبيه وهو ده مربط الفرس اللي عايزه اتكلم عنه النهارده ....
قلنا ثلاث اجزاء ..
جزء اول ، مظاهرات التحرير
جزء ثاني ، فتح السجون ، وقلنا حدث لسببين لايقلا اهميه عن بعض ، السبب الاول تهريب السجناء الارهابيين القتله من الاخوان والجهاديين وغيرهم ، السبب التاني ، اطلاق الوف المساجين علي المجتمع المصري بعد اجبارهم علي الهروب من السجن لاشاعه الفوضي من ناحيه واستخدام الامر في اطلاق شائعات ضد الداخليه اللي بتهرب المساجين علشان تعمل فوضي في المجتمع وتقتل الثوره ( وقالك في تونس كمان عملوا كده ، الداخليه التونسيه يعني ، وفي الحقيقه ان اللي عملوا كده في مصر وتونس هما حاجه واحده وهما الاخوان الارهابيين ) ايضا استخدام مسأله المساجين ومعهم العصابات المسلحه والحراميه اللي سرقوا المولات والمحلات لاشاعه الفزع في المجتمع المصري وتهديد البيوت بأنها سوف تقتحم ، وهنا بدأت اللجان الشعبيه ...
ونجيب الحكايه من الاول .... حكايه اللجان الشعبية ...
الجوامع في معظم الاحياء الشعبيه ، بدأت تقول في الميكروفونات وتدعوا الناس بعد الصلاه لحمايه بيوتهم لان عندهم معلومات ان البيوت حتقتحم من الحراميه والبطلجيه والصيع والمساجين الهاربين ، الناس طبعا صدقت امام الجامع وصدقت اللي بيتقال في الميكروفات ده غير استغاثات الناس المؤجره في الاعلام واللي كانوا بيجيبوهم يصوتوا ويقولوا الحقوا بيوتنا بتقتحم ، للتغطيه علي الجرائم التي كانت تتم في نفس الوقت باقتحام اقسام الشرطه وقتل رجالها وايضا لاشاعه الفزع والرعب في المجتعم ، الحقوا البيوت والاحياء حتقتحم ، وهنا قرر رجال كل حي او عماره انهم يعملوا لجنه شعبيه في الشارع قدام البيت تفتش الناس والعربيات واتفقوا علي كلمه سر في الظلام لتأمين المنطقه وصفافير ونزلوا كلهم قدام البيوت بالاسلحه والسكاكين والكلاب المتوحشه واللي عنده سلاح مش مترخص طلعه وياروح مابعدك روح ، وفضلت الرجاله طول الوقت صاحيه قدام بيوتها تحرس البيوت ، طبعا الفيلم كان حيتفهم بسرعه جدا لان مافيش اي هجوم من اي حته علي اي حته ، وكان المخطط حيبوظ وكانت الناس حترجع تركز وتقول هو ايه اللي بيحصل في التحرير ومين دول ، فكان لازم من تسخين دائم وفزع دائم ، وده كان دور الجوامع والاخوان اللي ماسكين الجوامع وخلايا نايمه فيها مخدش دريان بيهم ، فكانت الجوامع مابين كل حين ومين تقول الحقوا هجوووووووووم ، فالناس اللي كانت ابتدت تزهق وتنام علي روحها تفوق وتتربص باللي حيهجموا عليهم ، وانتشرت اشاعات في كل المناطق ، مابقاش بقي قصه حراميه وصيع ومساجين لا ، فجأ بقت احياء وقري بتهجم علي احياء وقري ، والناس تنفعل وتتوتر وتنزل تدافع ومحدش عاقل يسأل يقول ايه اللي بيحصل ده ، شبرا بتهجم علي الوايلي ، الوايلي بتهجم علي الزاويه ، بولاق بتهجم علي داير الناحيه ، داير الناحيه بتهجم علي العزبه ، قريه كذا حتجهم علي قريه كذا ، شارع كذا حيهجم علي شارع كذا ..... خلاص فجأ كل الناس بقت بتهجم علي كل الناس والناس فقدت احساسها باالامان وشالت سكاكين واسلحه وشوم ويفتشوا العربيات والعيال الصغيرين المراهقين اعتبروها لعبه ، اقف انت مين ، رايح فين ، افتح الشنطه ، انزل من العربيه وفجأ اللي مالوش سعر بقي بلطجي بيوقف العربيات ويفتشها ...
فجأ المصريين اللي مش في التحرير ، بقوا مشغولين بتأمين بيوتهم اللي حتتعرض للنهب والسلب ، صاحيين طول الليل ويرسموا خطط حربيه ويجهزوا اسلحه والبيوت تبعت لهم سندوتشات وشاي وبرتقال ، والاشاعات لاتكف ، عربيه اسعاف فيها بطلجيه ، عربيه شرطه فيها بطلجيه ، عربيه نص نقل فيها بلطجيه ، وفجأ انشغلوا واتلهوا علي عينهم عن الوطن واللي بيحصل فيه والتحرير وشعاراته والمظاهرات والشعب يريد ، اتلهوا وركزوا في بيوتهم وحمايتها ، وهو ده اللي كان مقصود تماما من قصه اللجان الشعبيه ، فاذا كان في التحرير 100 الف او مليون ، ففي البيوت بقيه التسعين مليون ، وهما بيقولوا التحرير مابيعبرش عنها ، طيب ايه ، مانزلوش في اي حته تانيه ليه يقولوا كده ، لانهم انشغلوا بالعمد في لعبه حقيره ادخلها فيها الاخوان وائمه الجوامع والشائعات لالهائهم عن كل مايحدث والتركيز في البيوت وحمايتها ، طول الليل سهران قدام البيت وطول النهار نايم ومش دريان بالدنيا وتصحي تجري تاني تقف في الشارع لان القري حتهجم علي بعض والشوارع حتهجم علي بعض والاحياء حتهجم علي بعض ...
واكم من تليفونات حصلت ، ناس بتتطمن علي ناس لان التلفزيون قال الحي اقتحم ، لان جارتي قال ، لان امام الجامع قال ، انا شخصيا ، الحي اللي ساكنه فيه اتقال في التلفزيون ميت مره انه اقتحم ، وبنتي لقت جارنا واقف في الجنينه ماسك سلاح الي ، الكلام ده يوم 29 يناير الصبح ، كلمتني تصرخ ، هو فيه ايه ، جارنا ماسك بندقيه ليه ، كنت في الشغل باقفله ، نزلت جري روحت ، لقيت رجاله الحي كله علي البوابات وبيسالوا انت مين رايح فين وكلهم معاهم اسلحه وادوات دفاع عن النفس بعضها كوميدي جدا ، الان اقول كوميدي لكن وقتها كان قلبي بيرجف من الرعب ، البيوت حتقتحم والعصابات حتهجم علينا ، كان واحد ماسك عصايه مقشه والتاني ماسك قالب طوب والتالي رابط عصايتين في بعض بفتله ، اللي هو بجد لو حد قرب ولا هجم كله حيجري ، لكن وقتها هما كانوا مصدقين ان دي ادوات حمايه وانا كمان .....
تليفونات تقول الحي اقتحم ، قول ماحصلش ، بعد شويه تليفون تاني ، ااقول ماحصلش ، اسمع انا في التلفزيون ان فيه حي كذا اقتحم او كومبوند كذا اقتحم ، اتصل باصدقائي يقولك محصلش ، لكن احنا مأمنين المداخل والبوابات وطالقين الكلاب المتوحشه في الشوارع وجاهزين ، محدش يسال نفسه مين يهاجم مين ، لا ، كلنا كنا في دوامه الالهاء العمديه علشان ننشغل عن الوطن ونسيب لبتوع التحرير الفرصه كامله يقولوا هما الشعب يريد ايه ؟؟؟؟؟؟؟؟؟؟؟؟؟؟؟ !!!!!...
في يوم وانا مروحه والعيال الصغيره بتوقف عربيتي وتفتشني ، قلت يانهار اسود ، العيال دي اللي خدت سلطه البوليس وبتفتش العربيات بمنتهي العجرفه والسفاله واللي شايله سكاكين واللي ماسكه مولوتوف ، العيال دي بعد 10 سنين حيبقي شكلها ازاي ونفسيتها ازاي ؟؟؟؟
المخطط لهدم الدوله المصريه كان منظم جدا وكله اجزاءه بتدعم بعضها ...
1- مظاهرات هزيله في التحرير مع هيصه اعلاميه وتزوير من الجزيره ودعم سياسي من بره وامريكا وايران وبلا ازرق
2 - فتح السجون وتهريب السياسين الجهادين المجرمين واطلاق المساجين الجنائيين علي المجتمع لترويعه وتخويفه بيهم حتي لو المساجين دول ماكانوش ناويين علي اي حاجه خالص ولا تهديد ولاسرقه وكبيرهم يوصلوا لمنطقه عمار بعد الجري في الصحراء يطلبوا بق ميه وشندوتش ....
3 - اللجان الشعبيه ، لالهاء الملايين الموجوده في البيوت عن الاعتراض علي التحرير ومايحدث فيه بضروره حمايه بيوتهم ونساءهم والسهر طول الليل والنوم طول النهار لغايه مالتحرير وحلفاءه يخلصوا مأموريتهم ويسرقوا البلد ويمكنوا الاخوان والارهابيين منها ، او هكذا ظنوا .......
وكل واحد منكم كده يفتكر تجربته وازاي عرف ان البيوت مهدده ودور الجوامع وائمتها ايه وميكروفون الجامع كان بيقول ايه لجمهور الحي والامام بيقول ايه للمصلين ، الاخوان وقتها احتلوا الجوامع واستخدموها ضد المصريين كجزء من مخططهم لهدم مصر ...
لعنه الله عليهم
لعنه الله عليهم
لعنه الله عليهم بحق جرائمهم في حق مصر وحق المصريين ...
ليست هناك تعليقات:
إرسال تعليق