احنا الظهير الشعبي ياريس
احنا الظهير الشعبي ياسيسي
احنا اللي نزلنا 30 يونيو
ونزلنا يوم التفويض 3 يوليو
ونزلنا قلنا اه علي الدستور رغم انه " مقرف " بسبب لجنه الخمسين لكن قلنا اه علشان خارطه الطريق تتحرك
احنا اللي قلنا لك انزل ياسيسي وقلنا لك كمل جميلك ونزلنا انتخبناك
احنا اللي اتبرعنا لصندوق تحيا مصر
احنا اللي مولنا مشروع قناه السويس ب 64 مليار في 8 ايام
احنا اللي مستعدين ندي مصر رقبتنا وحياتنا وقوتنا وقوت عيالنا علشان نبني مستقبلها ونحافظ علي حضارتها وتاريخها وهويتها وامنها القومي
احنا الظهير الشعبي ياريس
احنا الشعب الظهير لك ولمصر ياسيسي
لا النخب السياسيه الفاشله ظهير شعبي
ولا السياسين المعزولين عن المصريين ظهير شعبي
ولا اللي بيسموا روحهم نشطاء ولا بلا ازرق ظهير شعبي
ولا بتوع حقوق الانسان ظهير شعبي
ولا بتوع الاعلام اللي ريقك نشف تقول لهم ادعموا مصر ومابيدعموهاش ظهير شعبي
ولا رجال الاعمال اللي بيدور علي مصلحتهم وحيكسبوا كام ظهير شعبي
احنا الظهير الشعبي ياسيسي
ابله لولو وملايين المصريين زيها ومعاها هما الظهير الشعبي لمصر وليك
هما اللي عيطوا بدموع عينيهم من اول يناير 2011
هما اللي دافعوا عن مصر وامنها القومي وارضها وتاريخها وحضارتها بحياتهم وبفطرتهم الوطنيه من غير تنظير ولا تقعير ولاكلام كبير ...
هما اللي نزلوا الشوارع وقالوا مش طالعين الا لما العصابه الارهابيه ترحل ونحرر ارض مصر من الاحتلال الاخواني وهيمنه الجماعه والتنظيم الدولي
هما اللي نزلوا الشوارع ومخافوش لما قنابل الارهاب انفجرت وهتفوا الشعب يريد اعدام الاخوان
هما اللي رقصوا وزغرطوا وهتفوا بأسم مصر ورسموا علمهم علي وجوههم وقلوبهم في الاستفتاء علي الدستور والانتخابات الرئاسية
هما اللي النخب والمثقفين شايفيهم " جمهور " ومتعاليين عليهم لانهم لامثقفين ولا متحفلطين ولا متزفلطين ..
هما اللي بيعيطوا لما بيسمعوا السلام الجمهوري وياحبيبتي يامصر
هما اللي مستعدين يطلعوا اللقمه من بقهم ويدوها لمصر
هما الجيش والشرطه والاعلام الوطني والقضاء الشامخ والكنيسه العظيمة والازهر الوسطي وكل مصري شايل مصر علي راسه وبيحبها ومستعد يموت فرحان علشانها...
احنا الظهير الشعبي ياريس ، احنا الظهير الشعبي ياسيسي ...
لاايدينا ملوثه بدم المصريين ولا ذمتنا الماليه ملوثه بالتمويل الاجنبي ولا لينا مصالح شخصيه ولاعايزين كراسي في البرلمان ولا بندور علي مصالحنا وعايزين نتعفي من الضرايب ولا بنتبع التنظيم الدولي ولا امريكا ولا ولاءنا للغرب الاستعماري ولا لتركيا العثمانيه ولاقطر المنحطه ...
احنا المصريين ياسيسي ، المصريين اللي بجد ، اللي حياتهم باظت لما مصر اتهددت واكل عيشهم انقطع لما اتسلطوا علي مصر ، احنا اللي قلنا مش ماشيين من مصر الا لما ترجع زي ماكانت وقلنا يابخته اللي يموت علشان مصر ودفنا شهداءنا واجمل اولادنا وقلنا يابختهم عايزين نموت زيهم ....
ماتشغلش بالك ياسيسي باللي بيهلفطوا ويتكلموا وينظروا ويقعروا واللي يقولك الغرب ورأي الغرب ، ولا امريكا حتقول ايه ولا اصل مواثيق حقوق الانسان بتقول ، ماتشغلش بالك بيهم ولاتديهم حجم اكبر من حجمهم ولا تعبرهم اساسا ....
احنا الظهير الشعبي لك ولمصر ياسيسي
اللي حنعدل الدستور لما تقول لازم يتعدل
واللي حنتبرع بفلوسنا تاني لامشروع وطني يحفظ مصر ويحافظ عليها
احنا الظهير الشعبي لك ولمصر ياسيسي ، احنا اللي عينيا علي مصر وبوصلتنا مضبوطه علي مصر وروح مصر وقلب مصر ، لانعرف لنا بلد تانيه ولا شط نرسي عليه ولا مكان نتطمئن فيه ولا خريطه تسكنا ونسكنها ....
ورقبتنا وحياتنا وعيالنا ومالنا وكله فدا مصر ...
خليك معانا ياريس وسيبك منهم
خليك معانا ياريس وسيبك منهم
وتحيا مصر
تحيا مصر
تحيا مصر
ليست هناك تعليقات:
إرسال تعليق