التخريفه الاولي !!!!!ا مجرد صراع رجال اعمال !!!!ا

بصوا بقي انا عندي انفلونزا ...

وانا اساسا لما بيجي لي انفلونزا باحس بالحقد والكراهيه علي امريكا !!! انا اساسا باتلكك علشان اكره امها ... ليه ، لاني بحسها سبب كل الشرور في الدنيا بمنطق الاطفال بتوع ماما سميحه وجنه الاطفال !!!! وده موضوع تاني يطول شرحه !!! المهم ، لما يبيجي لي انفلونزا باحس بالكراهيه والحقد علي امريكا ، لان دايما عندي احساس انها بتخلق ميكروبات وفيروسات في معامل الجيش بتاعها علشان الشعوب اللي مش مؤدبه وتاعباها ، ومن لم يمت بالسيف مات بغيره !!!! واوعي تقولي لا هي حلوه ماتعملش كده ، لانها مش حلوه خالص ، وعملت اسخم من كده ، والله يرحمها قنبله هيروشيما ونيكازاكي اللي هزرت بيهم مع اليابان !!! برضه مش موضوعنا !!!!

نرجع للانفلونزا ... لما يبيجي لي انفلونزا ، باحس اني ضحيه امريكا وعلمائها الافذاذ اللي خربوا الدنيا باختراعاتهم العظيمه ومن ضمنها تخليق الميكروبات والفيروسات ، لكن الفيروسات والميكروبات ، اما ضحكت علي امريكا وهربت من المعامل او امريكا ضحكت علينا وهربت الفيروسات والميكروبات من المعالم وطلقتها علينا ....

ايوه كده البدايه بانت ، سوده ولبها اسود ، والتخريف علي الكيف ، ومعايا رخصه ان راسي مش مضبوطه اطلاقا من تاثير اللمون الكتير والعسل الكتير والبنادول الكتير ، عامله دماغ برد عظيمه جدا !!!!

ماعلينا ..... انا عندي انفلونزا وطريحه الفراش !!!

فرصه اكتب بقي ...

واللي حاكتبه النهارده ، شويه تخاريف ليس الا !!!!! اصلي ساعات بيبقي نفسي اخرف ومش واخده فرصتي لاني مفروض استاذه وعاقله فاخرف ازاي ، لكن اهو الفرصه جات لي من اوسع الابواب ، اخرف براحتي بقي ، وكل هذيان من تاثير الانفلونزا !!!

امبارح فجأ وانا عماله اصر عرق سخن وضهري زي لوح التلج ، ربنا نور بصيرتي وحسيت اننا بيتلعب بينا الكورة!!! احنا مين ، احنا المصريين ، احنا الشعب ، بيتلعب بينا الكوره من اطراف كتيره ، نسيب امريكا علي جنب بس طبعا حارجع لها ، خلينا في الماتشات المحليه قبل مانخش علي الماتشات الدولية ، بيتلعب بينا الكورة ليه ، ليه لان فيه اطراف مختلفه ليها مصالح مختلفه بتلعب بينا !!! وطبعا كلكم عارفين زي ماانا عارفه ان السياسه دي ماتش ام المصالح ، لافيها اخلاق ولا مشاعر ولا عواطف ولا اي كلام فاشل من ده ، السياسه عالم المصالح وبس !!! نوصل لمصالحنا ازاي ونحققها ازاي ، دي البراعه والالمعيه والذكاء ، المصالح تجر صاحبها وراها ، وتخلي مخه يلمع ونفسيته تتحسن وتخليه اخر براعه ، لان الجون مش مجرد جون عادي ، لا ده جون غالي وعزيز !!!

احنا بيتلعب بينا الكورة ، هي مش جريده الشروق ملك ابراهيم المعلم وهو رجل اعمال ، هي مش محطات الحياه بتاعت الراجل بتاع حزب الوفد اللي مش فاكره اسمه اه اسمه السيد البدوي وهو رجل اعمال ، هي مش محطه دريم ملك احمد بهجت وهو رجل اعمال ، هي مش محطه المحور بتاع الراجل اللي اسمه حسن راتب وده رجل اعمال ، هي مش جريده المصري اليوم بتاعت ساويريس وصلاح دياب والاتنين رجال اعمال ، هي مش جريده الفجر يملكها عصام فهمي وهو رجل اعمال .... اذن اذن ... كل مايسمي الصحافه الخاصه اللي بتعارض الحكومه والمحطات اللي فيها برامج التوك شو السخنه المولعه الملهلبه اللي بتشتم الحكومه وتجيب ضيوف يشتموها والمذيعين ال يرسموا الحياد علي وشهم وكانهم مش قاصدين الحكومه تتشم لكن الضيف بيشتم بقي وامرنا لله .... كل المنابر دي يملكها رجال اعمال ، ليهم بيزنس ومؤسسات وفلوس وبنوك وقروض ومصالح !!!!

هل رجال الاعمال دول مصالحهم متناقضه مع رجال الاعمال التانيين اللي في الحكومه واللي تبعها ، هل هما حاسين ان رجال الاعمال الحكوميين واكلينها والعه وسايبنهم يقرشوا في الحصرم ، هل نفسهم يبقوا مكانهم ، هل عايزين كلهم يلعبوا مع بعض !!! مش عارفه ، كل اللي انا شايفاه وعارفاه ، ان فجأ رجال الاعمال اللي كان مالهمش في السياسه خالص ومهتمين بشغلهم وبس ، فجأ كل منهم عمل ياجرنان يامحطه ، وجاب صحفيين وكتاب وهاتك ياشتيمه في الحكومه وهاتك ياانتقادات ، وولعها ولع شعللها شعلل ، فجأ اهتموا بالسياسه وبقوا بيعارضوا الحكومه وبيشتموها ، وطبعا معارضتهم وشتيمتهم جايه علي هوي الناس اللي طلعان عينها من الحياه والاسعار والغلاء والقهر والعنف الاجتماعي والتوريث وعدم تداول السلطه .... معارضتهم جت علي هوي الناس ...

وفجأ كل رجل اعمال من دول مابقاش رجل اعمال بس ، لا بقي كمان منبر اعلامي يقول اللي هو عايزه وفقا لمصالحه ، لان رجال الاعمال دول معظمهم مش حزبيين ، يعني لادخلوا احزاب ولا بيشتغلوا سياسه ، لكن بيعملوا جرايد ومحطات ، اولا تكسب فلوس كتيره من الاعلانات، ثانيا يلعبوا في عقول الناس ودماغتهم ، ثالثا يبقي عنده رداحه وقت الجد يسيبها علي اللي يحب يسيبها عليه ، سواء حكومه سوا منافس سوا اي حد !!!

دي خناقه رجال اعمال .... رجال اعمال جوه الحكومه ورجال اعمال بره الحكومه !!! واحنا الشعب مالناش دعوه ولا ناقه لنا ولاجمل ، هما بيتخانقوا مع بعض ، وبتوع المعارضه صوتهم اعلي وبيشتموا الحكومه عن حق ، والحكومه بترد عليهم من تحت لتحت وتقول لهم احنا دافنينه سوا ، لان بحقيقي بحقيقي مافيش واحد منهم معارض للحكومه بجد ولا بيحلم بمستقبل شكل تاني ، اه هما بيقولوا كلام بيعجب الشعب والشعب يصقف ، يقولوا كلام يخوف الحكومه وممكن الحكومه احيانا تتراجع قدامهم وسطوه نفوذهم الاعلامي ، لكن بجد بجد مافيش معارضه ، فيه منافسه علي المصالح ومين بيكوش علي اكتر من مين ؟؟؟؟

كلامي مش عاجبكم ، هما اصحاب مباديء وبيعارضوا الحكومه من منابرهم الورقيه والفضائيه علشان خاطر المباديء وبيحبوا الشعب وعايزين له مستقبل احسن .... انتم شايفين كده او عايزين تشوفوا كده !!! ماشي براحتكم ، انا باخرف !!!! ماانا قلت من الاول اني باخرف ، اخرف براحتي بقي !!!!!!!!!!! وسايبه ليكم كلام العقل !!!!

لكن بما اني باخرف ، الخص تخريفي بقي بان ....

رجال الاعمال بتوع جريده الشروق والمصري اليوم وقناه دريم والحياه والمحور والحياه ، بيشتغلوا لحسابهم في صراع بينهم وبين رجال الاعمال اللي في الحكومه بمنطق الكراسي الموسيقيه احنا حبه وانتم حبه !!!! بس خلاص يقولوا ايه بقي ،يرفعوا شعارات ايه تعجب الناس ، يشككوا الناس في اي حاجه تتقال ، هما اصحاب مصلحه يضربوا في خصومهم علشان يركبوا هما ، ودول زي دول وكله قرف في قرف واحنا بيتلعب بينا الكوره !!!!

وبالمناسبه في البيزنس زي السياسه مافيش اخلاق ، فيه مصالح ، فيه اللي تغلب به تلعب به ، يتحالفوا مع بعض ضد بعض ، مع الاخوان ، مع العفاريت ، المهم اللي يقربهم من تحقيق مصالحهم يلعبوا بيه ومعاه !!!! حاجه تقرف تقرف تقرف !!!

وبكره الايام السودا الوسخه اللي جايه تثبت الكلام ده !!!!