علي فكرة انا كمان اعرف اشتم الحكومه !!!!!!!!ا

علي فكرة .... انا كمان اعرف اشتم الحكومه !!!

اعرف اشتم الحكومه واقول كلام تخين قوووووووي وممكن لما اتحمق قوي اشتم النظام!!!!

اعرف اشتم الحكومه وعندي كلام كتير قوي قوي !!!

كلام بجد ، مش ماركه فش الغل ونام مرتاح !!!!

لكن رغم كده مابشتمهاش !!!

طيب النوت بقي لازم يبقي جد جدااااااااا !!!

اصل اي تهييس فيه حيبوظه !!!

اذن انا باتكلم جد جداااااااا!!!

( 1 )

ناس كتير بتشتم الحكومه !!! لا الناس كلها بتشتم الحكومه !!! وناس بتشتم النظام !!! وناس بتخلي الشيتمه اجماليه وناس بتخلي الشتيمه للحكومه فرد فرد ووزير وزير!!

عادي يعني ، ماجاتش علي !!!!

والحكومه متأكده ان الشتيمه مابتلزقش !!!! وان الشتيمه بتلف تلف وترجع لصاحبها !!! فمش فارق معاها ان اي حد يشتمها ، بس بلاش سيره الاهالي علشان عضم التربة ، وعلشان الولد الزباله هو اللي بيجيب لاهله النعيل ، فمحدش في الحكومه عايز يجيب لاهله النعييل 1!!

اذن اذن اذن ..... الناس كلها بتشتم الحكومه والحكومه مش زعلانه من الشتيمه !!!

وكل الناس مبسوطه ومستريحه ، ماهو فش الغل بيريح !!!

مالي انا عبيطه ليه ، ومابلعبش معاهم ، وماباشتمش انا كمان !!!

بالعكس انا يمكن لو شتمت الحكومه استريح ، كمان الناس تنبسط مني وبالذات اصحابي ، اللي شايفني ست ذكيه لدرجه ماينفعش مااشتمش الحكومه ، ولا يعني فايده الذكاء ده ايه ، ماهو اللي مايشتمش الحكومه الايام دي يبقي غبي وانت يامرمر اخر ذكاوة ، مالك ؟؟؟؟؟

صحيح مالي ؟؟؟؟ ايه عندي عقده من الحكومه ، كانت بتحبسني زمان في اوضه الفيران فبقيت اخاف اشتمها لتحبسني تاني !!! ابدا !!! الحكومه عمرها ماحبستني في اوضه الفيران !!! كمان اللي بتحبسه الحكومه سوا في اوضه الفيران او اللومان بيطلع يبقي بطل ويبقي عنده تاريخ ويتكلم والناس تسمعه ويمكن كمان ترد وراه ، ماهو ياجدعان ده بطل والحكومه حبسته !!! والناس نفسها تبقي ابطال ، قوم ايه يارب الحكومه تحبسنا !!! طيب مالي انا بقي ، مش باشتم الحكومه ليه !!!

مبسوطه قوووي من الحكومه !!! الحقيقه لا !!! طيب لما انت مش مبسوطه ماتشتمي معانا ، ونفش غلنا كلنا ونستريح ، اصل شيتمه الحكومه لما الواحد بيمنعها بتقف في زوره زي الحموضه ، ويبقي الواحد مش مستريح اطلاقا البته !!! شيتمه الحكومه راحه ياروحي !!! مالك تاعبه روحك ليه ومعذبه نفسك وعامله فيها مؤدبه !!! ثم حضرتك ولا مؤاخذه يعني مش مؤدبه ، ولسانك طويل واحيانا ابيحه تقولي كلام سافل مايصحش الستات خالص تقوله ، جيت لغايه الحكومه وانقطع لسانك واتخرست !!!

ياجماعه ، مشكله فعلا .... اشمعني يعني انا اللي مش بشتم الحكومه !!!! فكرت قلت جايز الحكومه عامله لي عمل علي سمكه والسمكه في المحيط وطول ماهي بتعوم العمل مربوط واللسان مخروس والغل مش مفشوش ، قلت يارب اي صياد طيب في الكوره الارضيه يصطاد السمكه ويحل عقدتي ويفك لساني ويبوظ العمل !!!!

حد من اصدقائي ، قالي ، مش فاهم ازاي واحده زيك شايفانا مفروض نفضل اسري فكرة (اللي نعرفه احسن من اللي مانعرفوش !!!! ) وحد تاني من اصدقائي ، زعق في في الفيس بوك ولو كنت قدامه كان اداني بالبوكس في وشي ، زعق في وقالي ( انت عايزانا نفضل عبيد ) قالها وكانه بيقولي ياحرام يامرمر بقيت عبيد لدرجه انك مش عايزه حد مايبقاش عبيد وطبعا لما نزعق ونزعق مش حنبقي عبيد وحنام مستريحين ومبسوطين ويعلن ابو الحكومه ، ميت مره !!!!

تصدقوا مش عارفه اتكلم جد !!!!

بس بصراحه بواخه مني !!! مفروض اتكلم جد ، اكشر واتكلم جد ، دي حكومه ياجدعان اللي بتتشتم !!! حنشتمها واحنا بنهزر ، امال امتي حنتكلم جد ؟؟؟ لا عيب بقي ، لازم اتكلم جد !!!!

طيب حاتكلم جد اهو .... ياقوي يارب

( 2 )

يااصدقائي الصغيرين والكبار .... انا عندي 52 سنه !!!!

لما كان عندي 20 قررت اشارك في تغيير المستقبل !!!

قريت واتثقفت وفكرت وسالت ناس اكبر مني ، نعمل ايه !!!

قريت واتثقفت وقررت اشارك في صناعه المستقبل !!!!

وكنت عارفه شكل المستقبل اللي انا عايزه اصنعه !!!

اصل المستقبل علشان يجي عايز ناس تجيبه !!! تصنعه !!! تمهد التربه لاشجاره !!! تروي ارضه بدموعها ودمها وعرق اصرارها !!!

المستقبل مش بيجي لوحده !!!!

وعلشان تشارك في صناعه المستقبل لازم تبقي عارف شكله !!! عارفه شكله بكل تفاصيلها ، عندك برنامج سياسي ورؤيه ، عندك استراتيجيه وعندك تكتيكات طبعا علشان تنفذ الاستراتيجيه !!! لازم يبقي معاك ناس تشاركك الحلم والتصور والرؤيه الكليه والتفاصيل ، وانت وكل الناس تتحركوا في اتجاه واحد تجاه هدف واحد !!! ولازم تبقوا مؤمنين ان المستقبل مش لازم يجي في حياتكم ، مش مهم ، لان حياتكم قصيره والدنيا عمرها طويل ، لكن تبقوا فريق ، بتبنوا كلكم سوا ، امتي بقي البناء يخلص والناس تحتفل بنتيجه الجهد الجماعي ، ده مش مهم ، كل واحد منكم ترس في ماكينه ، طوبه في حيطه.....

وعلشان كده الدنيا اخترعت اختراع الاحزاب السياسيه ، اللي هي ناس بتقرر تشترك سوا في تبني شكل مستقبل محدد ، تناقش تفاصيله وتتخانق عليها لغايه ما تتفق ، الاحزاب السياسيه كيانات طوعيه ، محدش بيضرب حد علي ايده علشان يخشها ، ولما الواحد يخش الحزب ، يخشه وهو مستعد يدي ، يدي وقت وجهد وفلوس ، ويمكن حريه ودم ، يدي كل اللي عنده ، واللي عندي علي اللي عندك علي اللي عند الباقيين ، كلنا حنزق الدنيا في نفس الاتجاه !!!! وعلشان نصنع المستقبل اللي بنحبه وعارفينه ومستنينه ، لازم نقنع الناس باحلامنا بافكارنا ، لازم نقول للناس شاركونا الحلم لان المستقبل بتاعكم ، ماهو مستقبلي الخاص اعمله في بيتنا ، لكن المستقبل العام للوطن اللي بحبه وباحلم بيه ، مفروض انه علشان الناس ، مفروض اني عايزه اصنع مستقبلي ومستقبل الناس مع بعض ، اذن لازم الناس تقتنع بكلامي وتصدقني وتحبني وتديني تبرعات وتخبي الابطال بتوعي في بيوتها وفي نني عينها لما الحكومه المستبده تطاردهم ، لازم الناس تقتنع بكلامي وتحب ابطالي ، تنتخبهم في النقابات والروابط والانديه وفي المجالس المحليه والبرلمان ، ماهي الناس لو ماحبتش ابطالي ، ابطال الحلم بتاعي اللي بقدمهم للناس علشان يشاركوهم ويقودهم تجاه المستقبل اللي باحلم بيه ، لو الناس ماحبتش ابطالي ، ابقي باتكلم في الهوا في الفراغ ، بكلم نفسي ، ولما ااقعد كتير اكلم نفسي يحصل لي تهيئؤات مش حقيقيه !!!!

اذن الدنيا اخترعت اختراع الاحزاب السياسيه علشان صناعه المستقبل واحداث التغيير !!!!من غير احزاب الناس حتغير بايه وازاي ؟؟؟

صحيح غاندي قدر يعمل تغيير في العالم ، لكن غاندي كان حاله خاصه ، كاريزما رهيبه ورغم كده ، لم ناس كتير حواليه ، بقوا الفريق بتاعه ، شاركوه الحلم وشكل المستقبل اللي بيحلم بيه ، يعني في النهايه لازم يبقي فيه فريق عارف شكل المستقبل اللي بيحلم بيه ، وقادر يقنع الناس بتصوراته وشكل المستقبل اللي بيحلم بيه ، وقادر يخلي الناس تحبه وتحب ابطاله ، وقادر يخلي الناس تدعمه وتؤيده وتتبني مطالبه باعتبارها مطالبها وبعد كده ، كله يزق في نفس الاتجاه !!!! وهووووووووب تقوم العاصفه !!!!

( 3)

لما قلت عندي 52 سنه ، ماكنتش بس باقول سني كده وخلاص ، لا !!! ولا طبعا باقوله علشان ااقول انا بافهم اكتر ، لا بعد الشر علي ، ماهو اللي يقول انا بفهم اكتر من الناس يبقي حمار لانه مش حيعرف يتعلم !!! ماهو يعيش المعلم ويتعلم !!!!

انا باقول عندي 52 سنه ، علشان ااقول اني عشت سنين كتيره وشفت تجارب كتيره !!!

شفت الاتحاد الاشتراكي العربي لما كان التنظيم السياسي الاوحد في البلد !!!!

وبعدين شفت تجربه المنابر داخل الاتحاد الاشتراكي سنه 1976 منبر يسار ويمين ووسط!!!

وبعدين شفت لما تجربه المنابر تحولت لاحزاب ثلاث فقط لاغير !!!

وبعدين شفت ميت حزب اتكونوا ووصلنا للي احنا فيه !!!

وشفت لما كان عندنا تلت جرايد بس ، الاهرام والاخبار والجمهوريه !!! طبعا غير المسا!!!

وبعدين شفت الصحافه الحزبيه ، الاهالي والوفد والشعب ....

وبعدين شفت الصحافه الحرة المستقله و..... لغايه ما بقينا في الوضع اللي احنا فيه!!!!

وشفت لما كان عندنا القناه الاولي والتانيه في التلفزيون المصري وبس !!!

وحضرت لما القناه التالته طلعت !!!

وبعدين عشت مرحله الديش 240 سم اللي بيجيب القمر الاوربي !!!

وبعدين دخلنا مرحله القنوات الخاصه والريسيفير والاشتراكات !!!

وبعدين دخلنا مرحله القنوات الفضائيه المفتوحه و..... ووصلنا لكل اللي احنا فيه !!!!

ايه ده ..... دي تغيرات رهيبه في حياه البشر في مصر !!!!

بعد ماكان حزب واحد بقي ميت حزب !!!

وبعد ماكان جرنان واحد بقي ميت جرنان !!!

وبعد القناه الاولي والتانيه بقي فيه ميت فضائيه !!!!

وانا باقول الكلام ده ليه ..... باقوله لاني حارجع استخدمه بعدين !!!!

( 4)

زمان لما كانت الدنيا منظمه والافكار ليها راس ورجلين والاحزاب ليها برامج وخطط !!!

طبعا باتكلم عن الحقبه مابعد ثورة يوليو بعد التجربه الحزبيه الجديده 1976، مش ايام الملك لاني مااوعاش عليها !!!

كان فيه ناس مؤمنه بالفكر الاشتراكي ويمكن الشيوعي ، ليها حلم واضح وشكل مجتمع واضح !!! يقولوا عليهم كفره يقولوا عليهم عفريت ، مش مهم ، لكن هما عندهم حلم وبرنامج وامل ورؤيه وشكل مستقبل !!!الناس تحبهم تتلم حواليهم ماتحبهمش ماتتلمش حواليهم ، ده لابياثر علي حلمهم ولا رؤيتهم ولا شكل المستقبل اللي نفسهم فيه !!!

كان فيه ناس مؤمنه بالفكر الليبرالي الحر ، وعايزه راسماليه واقتصاد حر !!! الدنيا عندهم بهوات ورجال اعمال والناس مقامات ، احنا بهوات لكن طيبين مع الغلابه ، وماله برضه !!! لكن الطينه غير العجينه !!! كان عندهم شكل تصور للمستقبل ، عندهم شكل تصور للمجتمع اللي بيحلموا بيه !!! لا فيه اشتراكيه ولا دعم ولا خمسين في الميه عمال وفلاحين !!!!

كان فيه الاخوان المسلمين وكل الناس اللي خارجه من عبايتهم ، سواء اكثر تشددا او اقل

ناس بتقول القرأن دستورنا والامه الاسلامية والاقباط اهل ذمه ، نعاملهم كويس اه ، لكن هما اهل ذمه ، دينا بيقول كده !!! كلامهم عاجبنا مش عاجبنا ، لكن دي قناعتهم وافكارهم ، ويحلموا بمستقبل يعود بنا لعهد السلف الصالح والتمسك بالدين الصحيح بكل معاني ده واشكاله !!!

وكان فيه الناصريين ، اللي مؤمنين بالتجربه الناصريه شكلا وموضوعا ، اه ليه بعض الملاحظات علي سلبياتها ، لكن مقتنعين تماما بمشروعها القومي واختياراتها الاقتصاديه .... وكانوا شايفين ان الناس اللي عاشت في عصر عبد الناصر وصقفت له وهتفت باسمه ، حتمشي وراهم ووراء شكل المستقبل بتاعهم ...

وفيه طبعا الحكومه .... لما تحب تقول يمين يبقي يمين ، شمال يبقي شمال ، فكرها اشتراكي عربي ، رأسمالي امبريالي ، تطبيع ، قوميه عربيه ، مش مهم ، المهم ان الحكومه ليها ناس بتمشي وراها ، علشان اللي يمشي ورا الحكومه يكسب واللي يمشي قدامهم يقع ويتكعبل ويروح ورا الشمس !!!!

ماعلينا .......... فيه تصورات سياسيه وفيه اشكال مختلفه للمستقبل !!!

مين عايز ايه بقي ؟؟؟؟؟

مفروض لما تبقي الحكومه مش عاجباني ، تبقي مش عاجباني لانها متناقضه مع تصوراتي عن المستقبل والحياه اللي انا عايزاها !!! وانا عندي مقياس ، لما الحكومه تقرب من شكل المستقبل والحياه اللي بحبها ، اؤيدها بالفم المليان ، ولما تبعد اعارضها ويمكن اهاجمها واشتمها كمان ..... يعني مفروض كل بني ادم جواه بوصله بتحركه وتحرك افكاره ، البوصله دي محدده اتجاهاته واحلامه ، والحكومه تقرب مني احبها تبعد عني اكرهها ....

لان الحكومه مش مرات ابويا اللي حتسرق الورث !!! ولا مرات ابن عمي قليله الادب اللي ماسلمتش علي ماما في ميت ابن خالتها !!! الحكومه مش مدرس العربي اللي حنتريق عليه ونركب له ديل في الحصه !!! الحكومه مش بنت الجيران الغلسه اللي رمت علينا تراب واحنا بنلعب في الشارع ، فننزل فيها شتيمه وخلاص ، نفش غلنا ونروح !!!

الحكومه نعارضها ونهاجمها وممكن نشتمها ونطالب بوضوح بتغيرها وتغير النظام السياسي لما تبعد عن افكاري ولما تقرب احبها وانزل فيها بوس كمان !!!!

طيب ..... ياايها الناس ياللي نازلين شتيمه في الحكومه !!! هي مزعلاكم في ايه !!!!

ده سؤال مهم جداااااااااااا !!!!

انتم عايزين مجتمع مختلف عن اللي هي عايزاه !!!

انتم عايزينه مجتمع اشتراكي وهي راسماليه بنت كلب !!!

انت عايزينه مجتمع اسلامي وهي كافره وبنت كلب !!!

انت عايزينه مجتمع راسمالي وهي شيوعيه وبنت كلب !!!

انت عايزينه مجتمع ناصري قومي وهي ضد العرب وبنت كلب !!!

عايزين ايه بجد ؟؟؟؟

عايزين ايه وبتحلموا بايه ....

انا شخصيا شايفه ان الدنيا ملخبطه قوي !!!! الافكار ملخبطه والشامي علي المغربي وابو قرش علي ابو قرشين والشخصي علي العام والاحباط الخاص علي الهم العام ، كله فوق بعضه !!!!

لا قبلها شايفه حاجه واضحه جدا .... ان الناس رافضه بجد كل المشاريع المختلفه للمستقبل !!!! رافضه بجد ، سيبك من الشتيمه والبوقين بتوع فش الغل ، رافضه بجد كل مشاريع المستقبل المطروحه علي الساحه السياسه الان !!!

لان الناس بجد بجد ، رافضه التجربه الحزبيه ورافضه تشارك فيها !!!!

رافضه تخش الاحزاب ، لا رافضه كمان تتعاطف مع الاحزاب ، رافضه كمان تنتخبها وتنتخب اعضاءها !!!

الناس رافضه كل مشاريع المستقبل الموجوده علي الساحه السياسيه في مصر !!!!

طيب ، هل ياتري الناس بتحلم بحلم مختلف عن كل المشاريع والاحلام الموجوده علي الساحه !!!!

طيب بيحلموا بايه !!!!!

عايزنا نبقي زي مين !!! بالبلدي وبالفلاحيني !!!

عايزين ايه .... سيبكم من الحكومه دلوقتي خلينا في روحنا !!!!! مش نعرف الاول احنا عايزين ايه ، وبعد مانعرف احنا عايزين ايه ، نشوف الحكومه قريبه ولا بعيده من اللي احنا عايزينه !!!! فنشتمها ولا نحبها !!!!

احنا عايزين ايه ....

عايزين ايه ...............

عايزين نبقي زي اوربا ، زي فرنسا ، عايزين نبقي زي لبنان ، عايزين نبقي زي السعوديه ودول الخليج ، عايزين ايه ؟؟؟؟ عايزين نبقي زي مين !!!

( 5 )

انا شايفه ان البضاعه المطروحه علي الساحه بضاعه ملخبطه ، يعني الناس عايزه مميزات كل النظم السياسيه المختلفه المتناقضه !!! فطبعا لانهم بينقوا من هنا حته ومن هنا حته ، فمافيش حد بيعبر عنهم ، ليه ، لان الاحزاب كل واحد واخد برنامجه علي بعضه ، اقتصاد علي اجتماع علي سياسه دوليه علي شئون داخليه ...

لكن الجرايد والتلفزيون والناس اللي طول النهار تشتم ، واخده من كل بستان زهره ، فالدنيا بايظه ومحدش فاهم حاجه !!!! ولان محدش فاهم حاجه ، محدش فاهم حاجه مش بمعني عدم الفهم والادراك ، لا ، بمعني محدش عارف الارض اللي عايز يقف عليها شكلها ايه ، طبعا باتكلم عن عموم الناس ، مش عن القوي السياسيه المنظمه ، لان محدش فاهم حاجه ، الحكومه مش زعلانه لما بيشتموها ، لانها شتيمه بلا خطر بلا معني بلا مصداقيه بلا اي نتايج ، اشتم ياحبيبي اشتم براحتك !!!!! لاشتيمه مابتبصش في اي اتجاه ، عشوائيه زي اصحابها متناقضه زي الافكار اللي بتعبر عنها !!!

طيب ياللي بتشتموا وزعلانين من الحكومه ، زعلانين منها ليه ؟؟؟؟ !!!

مثلا علشان بتصدر الغاز لاسرائيل ... انتم ضد اسرائيل ، عظيم !!! انتم ضد اتفاقيه كامب دافيد ، عظيم !!! انتم ضد التطبيع والعلاقات مع اسرائيل ، عظيم !!!! انتم قوميين مؤمنين بالعروبة !!! شايفين ان اسرائيل شوكه في قلب الامه العربيه وان الصراع صراع وجود لا حدود ، ومستعدين تحاربوا اسرائيل لغايه اخر جندي مصري وعربي ، بتمن ده علي حياتكم !!!! لو كده افهم انكم زعلانين من الحكومه !!! لكن اللي زعلانين من الحكومه علشان بتصدر الغاز لاسرائيل منهم ناس شايفه ان العلاقات مع اسرائيل علاقات منطقيه وانهم ناس محترمه قوي وان الحرب خلص وانتهينا واننا مش حنحارب علشان العرب ولا علشان فلسطين وكفايه اللي نابنا ، ومش حنحارب تاني وكفايه اللي ماتو واللي اتعوروا ، طيب اذن انت قابلين فكره الصلح مع اسرائيل ، وقابلين فكره التطبيع ، وقابلين اتفاقيه كامبد دايفيد وكل تبعاتها ، زعلانين ليه بقي ان الحكومه بتصدر غاز لاسرائيل ؟؟؟ علشان بتبيعه بسعر ااقل من سعره ، ماجايز ليها حسابات او اعتبارات !!!!

ابص الاقي الناس عماله تشتم في الحكومه علشان بتصدر غاز لاسرائيل وهي مش ضد اسرائيل ولا ضد التطبيع !!! طيب عايزين ايه !!!! بتشتموها ليه !!!!!

ياللي زعلانين ان مافيش حريه وديمقراطيه وتعدد احزاب !!!

الاخوان المسلمين زعلانين من انهم مش حزب قانوني مشروع ، زعلانين ان القانون بيمنع تكوين احزاب علي اساس ديني !!! وبيشتموا الحكومه وناس كتير معاهم لانها مش ديمقراطيه !!! عظيم ، انتم عايزين احزاب علي اساس ديني ، حزب اخوان مسلمين وحزب شيعي يشتم في السنه ويهاجمهم ، وحزب قبطي وحزب ماروني مسيحي وحزب بهائي ... موافقين علي وجود احزاب علي اساس ديني ، ليكم ولغيركم ولا ليكم بس ؟؟؟؟ يتعمل حزب مسيحي وحزب ماروني وحزب شيعي وحزب اخوان مسلمين سني ، وكل واحد يشتغل سياسه بطريقته ، سياسه ودين ، انا عايز اكسب الجمهور ، ااقول اللي عايزه عن نفسي واهاجم فكر الاخرين ، طيب انتم تستحملوا كده ؟؟؟ طيب ماهي الحرية دي حريه علي مقاسكم ولا حريه علي مقاس الحريه ، زي حريه اوربا كده ، محدش يقولي بقي ساعتها الازهر موقفه ايه ولا الكنيسه موقفها ايه ، احنا بنلعب سياسه وفي السياسه اللي تكسب به العب به .... الحريه اللي بجد ، لما توسع زي اوربا تستحمل حاجات كتيره قوي ، تستحمل حقوق المثليين ، تستحمل جواز الشواذ ، تستحمل حريه الفن والابداع لاقصي درجات الحرية !!!! حترجعوا تقولوا ده غلط لان الدين بيقول !!!! الحريه تقول الراجل زي الست والمسلم زي القبطي ، تبنوا جوامع نبي كنايس ، الراجل يبقي رئيس جمهوريه الست تبقي رئيسه جمهوريه ، المسلم يبقي رئيس جمهوريه المسيحي يبقي رئيس جمهوريه !!! مافيش اغلبيه واقليه الا بالاحتكام للصناديق واصوات الناس .... هي دي الحريه اللي بتشتموا الحكومه عليها ولا انتم عايزين حريه علي مقاسكم ، الحكومه تعمل اللي كيفكم فيه وانتم وهي تضربوا بقيه الناس علي دماغها !!!! طيب يالي بتدافعوا عن حريه تكوين الاحزاب علي اساس ديني بما فيها الاخوان المسلمين ، انتم مستعدين بقيه اللعبه وقواعدها كامله ، ولا عايزين اللي ليكم والباقي لا !!!!!

وهكذا .........................

انا شايفه ان الاعلام والصحافه لخطبوا الناس ، وخلوا كل القضايا سمك لبن تمر هندي!!!! لان فيه صفحات كتيره لازم تتملي وساعات بث كتيره لازم نتكلم فيها ، وكل ماكانت الجنازه حاره كل مالتوزيع زاد والاعلانات كترت !!!!

لما ابقي عايزه مستقبل راسمالي ، الغي الدعم بالكامل عيني ونقدي والفقرا ليهم ربنا وليهم برامج مساعده وليهم اعمال خيريه !!! مستعدين لده ؟؟؟؟ طيب الدعم ده بقايا نظام اشتراكي ، انتم عايزين الدعم لكن عايزين راسماليه !!!! ازاي يعني !!!! عايزين حريه وديمقراطيه وحقوق انسان لكن شايفين ان الست غير الراجل والقبطي غير المسلم ، حتي ولو مابتقولوش الكلام ده !!!! لما نبقي بنحلم بمستقبل اشتراكي يبقي نحدد الملكيه الخاصه ونؤمن بملكيه الشعب والقطاع العام ، لكن احنا زعلانين ان الحكومه بتبيع القطاع العام وفي نفس الوقت عايزين راسماليه ، عايزين دعم لكن عايزين راسماليه ........ مليون قضيه ملخبطه في بعضها !!!!

علشان كده باقول .... لما الناس تبقي عايزه ميت مليون قضيه ملخبطه مع بعضها ، ماتلاقيش حد يعبر عنها !!!! لان الاحزاب ، مفروض ، متسقه في برامجها مع افكارها!!! علشان كده الناس في مصر مابتخشش الاحزاب ولا بتشتغل فيها ولا بتصوت لها !!! لاهم مقتنعين بالاحزاب ولا الاحزاب بتمثلهم !!!!

اذن القصه حتفضل انتقادات وانتقادات وبس ....بلا فاعليه !!!!

لان التغيير اللي بجد محتاج لقوه فاعله منظمه تقوده وتقود الشعب تجاهه !!!

الغضب لايصنع تغيير ولا الشتيمه بتصنع تغيير !!!!

حتي المظاهرات والتكسير والحرق والجرايد والفضائيات !!!

كل ده لايصنع تغيير !!!

التغير محتاج مؤمنين به وعارفين هما رافضين ايه ويطمحوا لايه !!!

لو ده مش موجود يبقي ايه ؟؟؟ حيحصل ايه ، حنشتم ونشتم ونشتم والشتيمه تلف وترجع لصاحبها وبس خلاص !!!!

في اي قضيه ، في اي تفصيله في حياتنا ، في ميت حل !!!!

الحكومه بتعمل واحد وفيه براها 99 حل

انا مش عاجبني الحل اللي مختاره الحكومه ... بمعني اصح كلنا مش عاجبنا الحل اللي مختاره الحكومه !!!

طيب عايزين ايه ، وهل كلنا عايزين حل واحد متفقين عليه ولا احنا متفقين ان الحكومه مش عاجبنا وبس !!!

يعني مثلا ....

في قضيه الصحه !!!

احنا مع العلاج المجاني ؟؟؟ ولا مع العلاج الخاص !!!

طيب ليه يكون في مستشفيات مجانيه ، علشان الفقرا ، طيب العلاج المجاني ده بقايا نظام اشتراكي ، الراسماليه فيها تأمين صحي وفيها شركات تأمين بتعالج الناس وفيها علاج خاص ... طيب احنا بنقول المستشفيات الحكوميه سيئه ، وبعدين ، عايزين نلغيها ، عايزين نحسها ، عايزين علاج خاص وبس ، عايز تأمين صحي ، عايزين شركات تأمين ، عايزين علاج مجاني كامل !!!! عايزين ايه وعلي اساس ايه ، علي انهي اساس فكري احنا عايزين ايه !!!!

ومد بقي كل الامور علي استقامتها ...................

نفتح الباب لراسالمال الاجنبي ، نقفله في وشه ، نفتح الباب للبنوك الاجنبيه ، نقفل الباب ، نستورد كل حاجه ، نصنع كل حاجه ، نزرع بس ، نهتم بالسياحه كمصدر رئيسي للدخل ، نبيع الاراضي للاجانب ، نمنع ده ........... تعليم خاص ، لا حكومي ، لا اجنبي ، ده ليه اه وده ليه لا ؟؟؟؟

( 6 )

الناس حتقولي لا ، احنا عارفين عايزين ايه !!!

طيب عايزين ايه ...

جماعات التغيير عايزين ايه ؟؟؟

اولا ، الجماعات دي شتات و اضداد !!! مايجمعهومش غير شتيمه الحكومه والرغبه في التغيير !!!

مش انا اللي بقول ، هما اللي بيقولوا ، الاحزاب والجماعات والمنابع الفكريه والايدلوجيه اللي جايين منها بتقول كده !!!!

هما شتات جمع بينهم الرغبه في التغير وشتيمه الحكومه !!!

شيتمه الحكومه سهله ، لكن الرغبه في التغيير ، علي فين يااسطي حتودينا !!!

انتم وانتم مجتمعين ماتعرفوش تودونا في حته لان لكل منكم سكه مختلفه عن سكه التاني!!!

يعني حزب التجمع التقدمي الوحدوي ، ايش يجمعه مع جماعه الاخوان المسلمين ؟؟؟

وحزب الوفد الراسمالي ايش يجمعه مع حزب الاشتراكي العربي الناصري ؟؟؟؟

دول كلهم مناقضين لبعض في الاهداف والرؤيا والبرامج وشكل المستقبل !!!

كل واحد منهم بيهاجم الحكومه من منطق مختلف عن التاني

كل واحد منهم بيشتم الحكومه لسبب مختلف عن التاني

ده اولا ....

ثانيا ..... عايزين ايه .... مش بس عايزين ايه ، لا كمان قادرين علي ايه ؟؟؟؟

ماانا عايزه المس السما ، لكن ايدي قصيره !!!

انتم قادرين علي ايه ؟؟؟

انا مش باعاير حد ، كلنا في الهم مش قادرين !!!

عارفين ليه ، لان الناس اللي غضبانه وبتشتم الحكومه مش عايزه تمشي ورا اي حد فيكم!!!!

تمشي وراه بجد !!!

لما الناس تطلع مظاهره مش معناه انها معاكم !!!

لما الناس تشتم علي القهوه وفي التلفزيون وفي الفيس بوك مش معناه انها معاكم !!!

لما الناس تصدق كلامكم وتقتنع بيه وتشتم الحكومه مش معناها انها معاكم !!!

الناس لغايه دلوقتي مقرره تبقي بره اللعبه تتفرج !!!

الناس لا راضيه تخش الاحزاب ولا تساندها ولا تبقي جزء من الفرق بتاعتها اللي حتجيب المستقبل البعيد !!!!

ده واضح جدا .... جماعات التغير والاحزاب السياسيه في مصر عايزه تحمل الحكومه مسئوليه ده ، احنا فاشلين او بلاش فاشلين احنا محاصرين وعددنا قليل لان الحكومه بتخوف الناس منا ، يؤسفني ااقول وبمنتهي الشفافيه مش صحيح ، الحكومه جايز بتخوف اللي يمشي في مظاهره لكن لما حد يحب يخش حزب قانوني التجمع الوفد الناصري ، الحكومه مابتمنعش حد يخش !!! جايز تحاصره تضايقه الامن يستدعيه ، ماهو ده طبيعي ، دي اليات الصراع السياسي ، معارضه الحكومه ليها تمن ، الناس كمان مش عايزه تدفع اي تمن !!! طيب ليه الناس مابتخشش الاحزاب !!!! مابتخشش الاحزاب ليه !!!!

السؤال ده يرد عليه الاحزاب مش الحكومه !!!!

ليه الناس مش بتخش الاحزاب بجد !!!

الناس الغضبانه المضايقه اللي بتشتم الحكومه ليل نهار ، ليه مش بتخش الاحزاب وتطلع طاقتها جوه الحزب وتشتغل بجد وتجمع الناس حواليها وطبعا تدفع التمن !!!!

طيب ...... جماعات التغيير بتشتم الحكومه وتنتقدها بشده في كل حاجه وعلي اي حاجه

وتتريق علي رموزها وعلي شعارتها ، والناس بتسمعهم وتشوفهم وتصدقهم وتنفعل بكلامهم لكن مابتخشش الاحزاب بتاعتهم !!!

الناس بتغضب وتغضب وبس !!!!

اذن شتيمه الحكومه مابتعملش حاجه مفيده بجد - من وجه نظري - غير مراكمه الغضب !!! وبعدين الغضب ده مالوش اي قنوات تعمل بيه اي حاجه مفيده !!! غضب ثم غضب ثم غضب !!!

طيب بعد مانغضب ونغضب ونغضب حيحصل لينا ايه !!!! وحنعمل بغضبنا ده ايه !!!!

عارفين ليه الناس مابتطلعش بطاقات انتخابيه !!! لانها مش عايزه تنتخب حد معين !!!!

الناس مش عارفه المرشحين ، حكومه او معارضه ، ولا مصدقينهم ، لادول ولا دول !!!

طيب نطلع بطاقات انتخابيه ونروح الانتخابات نتضرب ونرجع ليه ... علشان ايه ؟؟؟؟؟

وماتقولوش اصل الحكومه زورت الانتخابات ، ماشي الحكومه بنت كلب وزورت الانتخابات لكن فيه كام واحد كان رايح يصوت ولقي الحكومه زورت الانتخابات ، 40 مليون ، 30 مليون ، 30 مليون ، 10 مليون ، 5 مليون ، 2 مليون !!!! كام ، الناس ماراحتش الانتخابات مش بس لان الحكومه بتزور الانتخابات ، لا لان الناس مش لاقيه مرشح يعبر عنها ، ليه ، لان الناس افكارها مشوشه ومتلخبطه ومش عارفه للاسف هي عايزه ايه بالضبط ، مش عارفه شكل المستقبل اللي بتحلم بيه ومش عارفه تنتخب الناس اللي تجيب لهم المستقبل ده اللي هما مش عارفينه !!!

طيب .......... حننتقد الحكومه ونشتمها ونملا صدور الناس غضب بكافه الاشكال والمبررات !!!

وبعدين ......................... ولاقبلين !!!!

الغضب حيخلي الناس تكتئب وتقرف وتسافر وتهاجر وتنتحر وتحس اللاجدوي واليأس!!!

ممكن يخليها تنفجر انفجارات عشوائيه تحرق اللي تلاقيه في طريقها !!!!

تولع في الدنيا .... لكن مش حتعمل تغيير ومش حتجيب مستقبل !!!!

اه .... فيه ناس غضبانه من الحكومه ومن النظام السياسي لدرجه انها معندهاش مانع الدنيا تولع احسن من اللي احنا فيه !!!!

انا رايي ان ده اكتئاب جماعي ، عايزين حريقه ، عايزين جنازه وننزل فيها لطم !!!! عايزين نتخلص من احساسنا بالعجز اللي مموتنا وقاهرنا ، اللي عايزين البلد تتحرق علشان يحصل التغيير اللي مش قادرين يقنعوا الناس بيه مش قادرين يقنعوا الناس انها تعملوا ، ناس عاجزين بمنطق السياسه عن احداث اي تغيير ، وعجزهم مموتهم وغايظهم ، لدرجه انهم معندهمش مانع ان البلد تتحرق احسن من اللي هي فيه ؟؟؟؟؟ طيب ياجماعه الخير ، هو احنا بنشتم الحكومه ليه ، مش علشان زعلانين من اللي احنا عايشين فيه ونفسنا نعيش احسن ، طيب ياجماعه الخير لماالبلد تتحرق حنعيش احسن ولا اسوء !!! ولا مش مهم !!!! المهم نتخلص من عجزنا واحساسنا باليأس وبس خلاص !!!!

( 7 )

طيب .... انا حاتكلم عن نفسي وبس !!!!

انا كنت زمان متصورة اني ساشارك في صناعه المستقبل !!! ودخلت حزب سياسي معارض وخرجت منه بعد تجربه عشر سنين عضويه وسياسه واجتماعات وغيره !!!!

يمكن خرجت لاسباب شخصيه ، اني حسيت اني مش قادره ادي الحزب الوقت والجهد اللي عايزه مني !!!

يمكن خرجت لاني حسيت اني مش لاقيه احلامي فيه !!!

يمكن خرجت لان الناس اللي مفروض اني بحلم علشاني وعلشانهم واللي مفروض باتكلم عن المستقبل لي وليهم ، يمكن الناس دول ماصدقوش الحزب وماصدقونيش ، مافهموش كلامي وكلام الحزب ، فبقينا بنكلم روحنا وبس ، او بقينا من وجه نظري ، حزب معلق في الهواء بلا جمهور مقتنع باراءنا ، طيب !!!

يمكن خرجت بعد هزائم متتاليه اثبتت لي ان حلمي بعيد والمستقبل اللي بحلم بيه الناس مش شايفاه ، يمكن حسيت ان الناس اللي كانت بتصقف لينا وقت الجد خدعتنا وتخلت عنا !!!! فيه كذا يمكن !!! ويمكن تكون كل ال ( يمكن ) مع بعضها علي بعضها السبب في خروجي من الحزب !!!!

دخلت الحزب وخرجت ، لسه باحلم بالمستقبل ، اه ، لكن باحلم بيه لوحدي ، محدش بيشاركني حلمي !!! ومحدش من الناس اللي كنت باتكلم عنهم بمنتهي التعالي زي كل السياسين لانهم مش عارفين مصلحتهم ، محدش من الناس دول ، صدقني ولا لازمه المستقبل اللي باتكلم عنه .... طيب يبقي حاعمل ايه بقي !!!!

حاجه من اتنين .... لو فضلت انتقد الحكومه انتقد الحكومه انا وغيري ، ممكن ده يعمل حاله غضب وبس ودي تفجر البلد وتحرق الدنيا وانا كده مش مستفيده اي حاجه لان حتي الحياه اللي مش عاجباني ومعترضه عليها حتتنيل وتبقي الحياه اوحش !!!! وممكن افضل انتقد وانتقد فانتقاداتي وغضبي يصب عند حزب او تيار سياسي اخر ، يقويه ويدعمه ، وانا مختلفه مع ذلك الحزب او التيار لان المستقبل بتاعه مش عاجبني ومتناقض مع افكاري ومش عايزاه يجي ، دي حريتي ، يبقي انا من حيث لاادري ، اذيت نفسي وباعدت المسافه اكتر واكتر بيني وبين حلمي ، اما بالحريق والانفجار العشوائي العبثي واما بدعم تيار سياسي اخر يسرق مني الحلم والمستقبل !!!!!

الانتقاد خطوه اولي في طريق التغيير وطريق التغيير من وجه نظري يلزمه فريق مؤمن بحلم مشترك ومستقبل عايزين يحققوه !!! علشان الفريق ده يجدف مع بعضه في المركب فتعوم في المحيط !!!! مش لازم ينجحوا من اول مره يعدوا للشط التاني ، لكن مع بعض يجدفوا وكل يوم يطلعوا خطوه واحده لقدام !!!! مافيش فريق !!!! مافيش فريق لا انا معاه ولا هو معايا ولا بنجدف خالص ، لا مافيش فريق لا الناس اللي هاريه الحكومه شتيمه معاها ولا هو معاها .... كله قاعد يجدف علي الرمل ومانزلش البحر !!!! طيب عايزين ايه بجد !!!!!

( 8 )

طيب .... جايز انتم صح وانا غلط !!!

جايز انتم شايفين لما الدنيا تولع حتتغير وحتبقي احسن !!! واي حاجه احسن من اللي احنا فيه !!! جايز انتم صح وانا غلط !!! لكني لااشارككم هذه الرؤيه ولا هذا التصور !!!

مابقولش اللي نعرفه احسن من اللي مانعرفوش !!! مابقولش كده ، لكن بقول التغيير العشوائي العبثي قد يؤدي لنتائج كارثيه !!! لان مش اي حد احسن من الموجود !!! مش صحيح !!!!

دي حاجه !!!

الحاجه التانيه !!!!

انا شايفه ان تفجير الغضب مدمر وقد يؤدي لنتائج سلبيه رهيبه ، يحرق البلد ، اي حد يركب الموجه ، البلد تضيع !!! واوعوا تقولوا لي ماهي ضايعه ضايعه ، لا ، ضياع عن ضياع يفرق ، احنا غير السودان اللي بيقطعوا فيها الايدين والجنوب بينفصل عنها ، احنا غير السعوديه اللي مابتسمحش للستات تسوق ، احنا غير طالبان اللي قعدت الستات في البيوت وضربت تماثيل بوذا بالمدافع !!!! احنا غير الصومال اللي فيها مجاعه ، احنا غير العراق اللي اتفككت ميت حته وكل فريق سياسي او عقائدي او ديني بيضرب في الفرق الاخري !!! مثلا يعني !!!!

انا كمان شايفه اني ماغزلش في ثوب حد تاني اول حاجه يعملها يخنقني !!!! يعني مش حاقعد استفز الناس وافجر غضبهم علشان حد تاني يقش !!! لا مش حاعمل كده ، ومش باقول كده بمنطق ذاتي ، لكن بمنتهي المسئولية عن البلد والشعب اللي باحبه ومحبوش يقع في ايد اي حد يوديه في داهيه ويسرق منه بقيه المستقبل !!!!!

كمان حاجه تالته ....

انا لا شايفه روحي عاجزه ولا مكتئبه علشان افش غلي في الحياه واحباطاتها في الحكومه وانزل فيها شتيمه !!!! انا بحاول اعمل حاجه تانيه ، جايز غلط ، جايز صح ، باحاول اعمل حاجه مفيده للناس اللي باتحرك فيهم ومعاهم ووسطهم ... وده موضوع تاني يطول شرحه !!!!!

( 9 )

حاولت اشرح واقول .... جايز حاتشتم اكتر !!!! وجايز حاتفهم اكتر !!! لكني حاولت اشرح نفسي وبس خلاص !!!

( 10 )

علي فكره ..... ساعات بابقي عايزه اشتم الشعب اكتر من الحكومه !!!

وده موضوع تاني لازم قريب جدا حاتكلم فيه ..... !!!!

( 11 )

نفسي اعيش يوم ، اضم علي فريق من الناس المخلصه اللي بتحب البلد بجد ، اللي تتفق معايا في افكاري وقناعاتي وتشاركني الحلم وشكل المستقبل ، وساعتها ، لن اضيع وقتي في شيتمه الحكومه ، لكن سابذل اقصي جهدي لاقناع الناس الشعب بمشاركتي الحلم والانضمام لي لصناعه المستقبل ،وساعتها متهيالي يمكن اكون باعمل حاجه مفيده وبامشي خطوه لقدام في طريق المستقبل !!!!!

( 12 )

هل معني كده اني باطبل للحكومه وبايدها ....

طبعا لا ، بانتقدها وبانتقد سياساتها لكني انتبه للشعره الرفيعه بين الانتقاد اللي ممكن يبني وعي ويتحرك بالناس لقدام وبين الانتقاد اللي بيبني غضب وفوضويه وقد يقود للكارثه .... انتبه او احاول ... ويمكن الرجوع لكل مقالاتي المنشوره في مدونه قوس قزح ملون لمده خمس سنوات واكثر !!!!

( 13 )

الكلام الجد دمه تقيل جدا

كان لازم اكتب النوت دي وانا بهزر !!!!

لكن للاسف ، انا دايما مقتنعه ، ان الجد جد والهزار هزار ومابحبش اخلط بينهم خالص خالص !!!!

( 14 )

اخر حاجه والنبي ... انا داخله الفيس بوك العب واهزر !!!

لان اللي عايز يشتغل سياسه الدنيا عنده واسعه قوووووووووي !!!!

ولان الشعب اللي نفسنا يشاركنا حلم المستقبل وصناعه التغيير لا يدخل علي الانترنت!!!!

فمش اللي بيتكلم حنجوري علي الفيس بوك مناضل ثوري ولا بيهزر متخاذل !!!!

ده كله عالم افتراضي ، ماتتحمقوش فيه اوي كده !!!!!!!!!!!!!!