بورتريه .......

مين دول ؟؟؟

هي حريم جدع ، صاحبه اصحابها وتقلع عينها وتديها لهم برضا وسعاده ، لو واحده اتزنقت تلاقيها تحت رجليها قبل ماتقول اي ، ولو واحده احتاجت تلاقيها مدت ايدها بكل اللي تملكه واكثر قبل ماتقول هاتي ، صاحبه اصحابها ، شريكتهم في الفرح والهم ، تزغرط قبلهم وترقع بالصوت الحياني وقت حزنهم ، لما تقولك ده اخويا او دي اختي تبقي كتبت بينها وبينهم حرمة الدم والغلاوه ولايمكن لاتبيع ولاتخون ولا تغدر ولا تستغني ولا تتكبر !!!

بيتها مفتوح وقلبها كمان ويساع من الحبايب الف وميه ، واللي يتكل عليها يتستر واللي يناديها يلاقيها قبل مايخلص نداه حاضره وجاهزه واللي يطلبه يعينها ربنا وتجيبه له ان شالله لبن العصفور ، عينها بارده تتمني الخير للجميع ولاعمرها حسدت ولاغارت لان ربنا موزع الارزاق وهي احسن من كتير مظاليم لاالدنيا هنتهم ولا هونت عليهم !!!

كانت تعمل احلي كيك بالشوكولاته وتوزعه علي الحبايب ، وتاخد اولادنا  وتشتري لهم بالونات وتصاحبهم للحفلات واعياد الميلاد وتعود بهم لمنزلها تحممهم وتاخدهم في حضنها وتغني لهم بصوتها الرخيم فيناموا وتنام ..

ياما رشت الملح في السبوع ودقت الهون ونخلت المولود في المنخل اللي زوقته بالورد والشرايط الستان ، وياما بيتت السبع حبوب في صينيه السبوع مع القله او الابريق ورمت البرايز الفضه في الصينيه علشان يطلع المولود مرزق وخيره كتيره ، وياما زوقت العرائس امام مرايتها ورقصت في الحنه وزغرطت وغنت وقرصت العروسه في ركبتها علشان تحصلها في جمعتها وهي بتضحك وفرحانه للبت اللي صبرت ونالت وقولوا لابوها ان كان جعان يتعشي !!!

كانت تجهز الشمع لافراح حبايبها وتنزل درب البرابره مخصوص علشان تسعدهم وتزوق الشمع بالفيونكات الستان ولايمكن ابدا تاخد تمنه ، وتغزل بوكيهات الورد للعرايس و ترص صواني الشوكولاته في حفلات الخطوبه وكتب الكتاب ، وتبل الشربات وتزهر الميه للضيوف والمعازيم ، وتحمر البطه لنهار الصباحيه ومعاها الرز بالخلطه وتشيلهم علي راسهم توصلهم لبيت العروسه وهي سعيده لان البت اتسترت !!!

تستعد لرمضان بعمل قزايز العصير البيتي وبطرمانات اللمون المعصفر لكل اخواتها وحبايبها ، وتجهز للعيد بهدوم جديده تشتريها لاولاد اخواتها واحفادهم من الاسواق الشعبيه وتوفر بعض نقودها وتبذل جهدا كبيرا في الفصال وهم المشاوير لاسعاد من حولها ..

ياما صرخت بحرقه من اعماق قلبها في الجنازات ورجعت من المقابر علي المطبخ تطبخ وتحمر وتشمر وتفرد السفره للمعزين وهي بتمسح دموعها في كمها وتتمني ماتروحش لحد فيهم في حاجه وحشه ابدا !!!

كانت بتسافر تشتغل بره مصر ، لما ماتلاقيش شغل جوه مصر ، تشتغل ايه ، اي حاجه وكل حاجه ، اي شغلانه شريفه المهم تسترها ، وترجع بشنط هدايا بكل فلوس السفريه للحبايب وحبايب الحبايب .. تنظم جمعيات وتقبض المزنوق وتحوش القرش الابيض لليوم الاسود وتديه للمحتاج واثقه ان ربنا الرزاق الكريم واللي يفك ضيقه الناس ربنا يفك ضيقته 

وكانت كمثل الرجل الجدع ترتكن علي ذراعها بقوه وتسندك هي بقوة ، وانثي جميله وارت انوثتها بعدما افشلت الدنيا حياتها الزوجيه اكثر من مره فقنعت بان حظها لن يتغير ومنحت حبها للدنيا وللاخرين واشتهت من قلبها طفل لم يمنحها لها الزمان فرضيت بان كل اولادنا اولادها وان القلب مش محتاج يطلق علشان يحب فحبتهم كلهم فاحبوها وعشقوا صحبتها وخفه دمها واغانيها وحته الكيك بتاعت الصبح وكوبايه الشاي باللبن وهي " بتغط " لهم فيها القراقيش والبسكوت !!!

تحط ميه للعصافير في طبق نضيف كل يوم علي سور البلكونه وهي بتلم الغسيل وتحط لهم رز علشان يتقوتوا !! وترمي للكلاب والقطط الضاله مياه بارده في اكياس مربوطه علشان يشربوا في الحر ، وتبكي عندما يقتل سماوي كلب منهم لانه غلبان وقليل الحظ زي كل الغلبان اللي بس بيقدروا عليه ومايقدروش علي غيره !!! 

يمكن معاها الاعداديه ويمكن لا ، لكنها بتفك الخط بصعوبة وتقرأ مانشيتات الجرايد بصعوبه اكثر ، تهتم بالبخت وبرامج التلفزيون وطريقه عمل الكنافه بالمانجه واخبار الفنانين واحدث الاشاعات ومين اتجوز ومين اتطلق ومين ولامؤاخذه ومين مش ولامؤاخذه ويشرف بلد !!!

تتابع ماتشات الكورة واستديوهات التحليل وتشجع الزمالك وتغضب كثيرا لهزيمته لان معندوش حظ زيها ، تسب الحكام الذين لم يحتسبوا ضربه الجزاء لصالحه وتصرخ من فوق كنبتها الحساب يوم الحساب ياحكم وتسخر من لاعبي الفرق المنافسه وقتما يسقطوا علي الارض وتغني ، قوم ياتوتو قوم ، قوم لاتوسخ الهدوم ، توتو قام قام وسمع الكلام ونادره لو الزمالك خد الدوري توزع عيش ونابت في مقام السيد البدوي !!

تشعل البخور يوم الجمعه وتعلي صوت قرأن الجمعه وتمسح الارض بميه وملح لفك العكوسات والاعمال السفليه وتجهز الحلويات التي ستصنعها بشطارتها وحبها لجارتها وضيوف زياره الجمعه الاسبوعيه !!

تتحجب في رمضان وتصلي الفرض بفرضه وتختم المصحف مره واتنين واحيانا تنزل تصلي التراويح ، وليله العيد تصبغ شعرها وتقصه وتسشوره احتفالا بالعيد وتكشفه في نهار العيد وهي تستقبل زائريها وتوزع علي اطفالهم الشوكولاته الكور وملبس اللوز والعيديه فلوس جديده تقتطعها من رزقها طيله السنه لاسعاد الاطفال والحبايب وربنا الرزاق ...

تمد يدها للغلابه والفقراء بمنتهي الحب ، تمنحهم اكثر مماتقوي عليه لان الصدقه ستره يوم القيامه  وتزورهم في المستشفيات الحكوميه وقت مرضهم وهي تبكي وتحمل العصير والحب وتناولهم البرشام بتركيز وتقرأ الفاتحه علي اجسادهم الراحله وتخيط بيديها ادراج الكفن وتسكب علي اجساد الاحباء اغلي عطورها وتدعو ربهم يرحمهم ويحرمها ..

احلي بصاره تأكلها من يدها واحلي كعك بالسكر وتعمل الصياديه ولا الاسكندرانيه وشطارتهم وتعمل الكسكسي يوم السبوع وتخلل احسن زتون وتراعيه بعينيها وحبها وكأنه رساله حبها لمن سيأكلوه ..

علي باب بيتها الغله الخضرا صليب وتتكحل في سبت النور وتصوم نصف شعبان وتكنس مقام السيده نفيسه علي العدا ربنا ينتقم منهم وتشعل دستين شمع في الكنيسه للست العدرا علشان النحس يتفك وتحلف براس جدتها اللي ربتها بعد ماتيتمت بدري ولو اتزنقت قوي تحلف بمصر ، حلفان صادق عمره ماينزل الارض اصل دي العزيزه الغاليه ،تحب مصر بكل طاقتها في الحب ، مصر الضنا الذي لم يخرجه رحمها والام التي ماتت وتركتها يتيمه صغيرة والارض المرساه التي تغربت عنها لان اكل العيش مر وطينه الارض اللي بتحب ريحتها ، مصر هي العلم اللي بترفعه علي راسها في مباريات الكورة وهي الوجع في القلب اللي بيفكرها بالنكسه والايام الرضيه ...

بتحب مصر قوي وتعشق ترابها من غير ماتعرف ليه كل الحب ده ، بتحبها وخلاص ، المصيبه اني ماكنتش اعرف اني باحبها كده ، دايما تقول ، لكن طلعت باحبها اكتر قوي من كل اللي كنت ظناه ، اصل دي بلدنا واصلنا وشجره نسبنا وجدرنا وترابها كحل عينينا وحنه جسمنا ، بتحب مصر قوي ، هكذا اكتشفت مؤخرا ، حب ابكاها كثيرا من يناير ، وهي تشعر بعفويه وبراءه ان البلد حتضيع وحتروح في داهيه ، ليه قلبها انقبض لما حصل اللي حصل ، عمرها ماعرفت ،لكن هي اتعلمت من الدنيا انها تصدق قلبها لما يستعصي عليها التفكير وتعجز عن الفهم ، شعرت ببراءه ان البلد بتضيع ، فجلست امام التلفزيون تتابع كل البرامج الحواريه تتمني تفهم مالذي يحدث او لماذا هي مقبوضه ، فلا تفهم شيئا مما يقولوه فتبكي وتبكي لان البلد ضاعت زي ماقلبها قال لها ، وتبكي لان اللي بيتكلموا بيصعبوا عليها الفهم اكتر واكتر ولان الخير سابنا ومشي وبركه ربنا كمان !!!

تتصل بي عشرات المرات ، ايه اللي بيحصل وليه ، ومين دول وعايزين ايه ، اشرح لها فلاتسمعني ولايعجبها كلامي ، مين دول ، دول سياسين ، تشوح بيدها لايعجبوها ،  تسبهم كثيرا لانها لاتطمئن لهم ، ولاتصدقهم ، كلامهم بارد زي عينيهم القزاز وغشاشين ، ليه ياابله ، غشاشين كلامهم مادخلش قلبي واللي كلامه مايدخلش قلبي يبقي غشاش اصل قلبي بيحس كويس !!!

تابعت ماحدث في ليبيا حتي فارقها النوم ، وعرفت من محطات التلفزيون الليبيه ان طيارات قطر تضرب ليبيا ، سبت قطر ودافعت عن ليبيا وشعبها اللي بيتقتل ، ماهي لما طيارات قطر تضرب ليبيا ، تبقي قطر بنت حرام لان مفروض كلنا اخوات!!!

تتصل بي تصرخ ، حرقوا الاطفال في ليبيا  ، جسمي قشعر من ساعتها باعيط ، ماتتفرجيش ياابله علي اللي بيحصل ، لا عايزه افهم ايه اللي بيحصل !!! وتبكي وتبكي !! وتسب امريكا التي كانت تتمني تزورها وتتفسح فيها زي ابطال افلام الكابوي ، تسبها لانها بتدي طيارات لقطر وتخلي الاخ يضرب اخوه ودي لامروه ولاجدعنه وخسه ونداله !!!

وتطلبني وتصرخ ، بيشتموا جيشنا ، هما مين ، بتوع المظاهرات ، مايشتموا انت مالك ياابله دي وجهات نظر سياسيه مالكيش دعوه ، لا ازاي ، يشتموا جيشنا ازاي ، عيب قوي ، دي الجدعان اللي حاربت علشانا وماتت علشانا ، يبقي اخرت المتمه نشتمهم ؟؟ قطع لسانهم قللات ادب وربايه !!! ماتتفرجيش علي المظاهرات ، لايعجبها كلامي ، ليه بهيمه احش في البرسيم ولاكأني عايشه ، حاتفرج واسالك ، بس والنبي ماتزهقي مني ، لاماتخافيش عمره مايحصل ، عشمي برضه !!!

وتبكي وتبكي ، حائره تائهه غاضبه قلقه ، قلبي متوغوش قوي علي البلد !!! واكاد ابكي تضامنا معا وهي مفلوقه من العياط علي البلد اللي بتضيع واحنا من وجه نظرها قللات الحيله مش عارفين نعمل حاجه وقاعدين زي خيبتنا علي الكنبه !!!! احاول اشرح لها سياسه ، اصل الاعلان الدستوري اصل المجلس العسكري اصل النخب ، احاول ، لكن مااقوله لايدخل قلبها ، لايعجبها ، تشوح بيدها ساخره مني ، بتتكلمي زيهم بالضبط ، السياسين بتوعك ، كلام ماسخ مايخشش القلب !!! واصمت حائره !!!

وتتوقف فجأ تليفوناتها وتغيب عني وتتصل بي ذات يوم ، لو فاضيه تعالي ، النهارده حاعدي عليك ضروري ، اهرع لها ، تحتاجني ولن تقول ، اصلك مشغوله ومعرفش ظروفك ومحبش ابقي تقيله عليكي ، اهرع لمنزلها ، تعد كنكه القهوه وتشعل سيجاره وتسالني بخبث تعرفي توفيق عكاشه ، اضحك ، يعني ساعات باشوفه ، تغضب مني ، وبتضحكي ليه وعلي ايه ، اصمت احتراما لغضبها ، اسالها وانا ارسم علي وجهي جديه شديده ، بيعجبك ، تبتسم قوي ، بيكلمني كلام افهمه ، ابن بلد جدع ، باحسه محمد اخويا ، اكبت ضحكي ، ليه ياابله ، بيشرح من قلبه كده كل اللي بيحصل ، مش قلت لك قطر بنت كلب ، اهي طلعت بنت كلب ، مش قلت لك امريكا بنت كلب ، اهي طلعت بنت كلب ، الدكتور توفيق قال !!!

وعثرت ابله علي ضالتها ، فتحت قناه توفيق عكاشه ولم تغلقها ، شهور تتابعه ، تشعر فزعا كثيرا مما يقوله ، تطلبني ، الحقيني بلدنا حتحتل ؟؟ مين اللي قال ، الدكتور توفيق !!! الحقيني حيشيلوا طنطاوي  مين اللي قال ؟؟ الدكتور توفيق !! الحقيني حياخدوا سينا منا وبلدنا تضيع ، مين اللي قال ؟؟ الدكتور توفيق ، ابله تصدقه وتطمئن له اصل قلبي مصدقه ومن اول مره شفته دخل قلبي علي طول مش زي الناس اللي بتتفرجي عليهم بكلامهم العوج وعينيهم القزاز !!! لااقوي اعارضها واصمت وتبتسم هي لانتصارها علي  ، ولانها فهمت اخيرا كل اللي بيحصل بعدما عجزت مرات كثيره اشرح لها وجه نظري فيما يحدث !!!!

وتركت ابله كنبتها وجهزت شنطه السندوتشات والميه الساقعه وخدت علم مصر المركون ورا الدولاب لانهم وقفوا الدوري ونزلت خلف الدكتور توفيق ، اينما دعاها ذهبت ، تجلس علي الرصيف والعلم علي كتفها توزع السندوتشات والحب علي الناس اللي شبهها وتقتسم معهم مخاوفها وامنياتها ، تقضي اليوم في الشارع تاره في العباسيه وتاره عند وزاره الدفاع وتاره في ميدان الرمايه ، تهتف باسم مصر والجيش وتعود لبيتها راضيه لانها قدمت لمصر ماتقوي عليه ولان الدكتور توفيق قال انزلوا فنزلت وقال ايدوا جيشكم فأيدت وقال قولوا طلباتكم فقالت وارسلت رسائل وشرحت له مخاوفها وبثت وطنها الذي تخاف عليه حبها في رسائل الدكتور توفيق وحين قرأ اسمها ذات مره في برنامجه بكت وضحكت واتصلت بي وهي تصرخ ، قرا رسالتي وقال اسمي مش قلت لك يشبهنا وزي محمد اخويا !!!!

ويوم الجمعه الماضيه 21 يونيو ، قررت ابله تنزل عند وزاره الدفاع وماترجعش الا لما مصر ترجع ، جهزت ترمس القهوه والميه البارده والكوفرته اللي حنفرشها علي الارض وربطت راسها بعلم مصر ورسمته علي ذراعها وخرجت من بيتها في عز النقاريه بشبشب مريح علشان اعرف اقف براحتي وشاركت في اعتصام وزاره الدفاع يومها وكل يوم !!!

اتصلت بي اليوم تسالني ، الف علي العمارات الم فلوس علشان المعتصمين ، قولي الي اشتري علم كبير منين احطه علي العماره ، حكت لي ، عملت يافطه باسم المستشار خالد محجوب ووقفت في المظاهره اقول ، اهم دول ولاد مصر الجدعان اللي بيحبوها زينا ، وقفت اهتف والناس ترد علي ، في الاول كنت مكسوفه وبعدين قلت مافيش حاجه تكسف غير السلف وقله الحيله ، اتشجعت وهتفت ردوا علي هتفت اكتر ، تضحك سعيده ، قلت انزل ياسيسي مرسي مش رئيسي ، الناس كلها ردت علي ، تضحك سعيده واحسها من نبرات صوتها راضيه عن نفسها ، حاريح النهارده وانزل بكره !! وتسألني ، التلفزيونات بتذيع المظاهره بتاعتنا ، اه بتذيع ، كويس علشان الناس تنزل اكتر لما يعرفوا اننا موجودين ، اصفق لها برافوا ياابله برافوا ، فرحه بما تقدمه لمصر ، لاتملك ماتقدمه لها اكثر من الحب والمشاركه في مليونيات الدكتور توفيق !!!!

تدعو لمصر قبلما تنهي المكالمه ، ربنا يهون الصعب ويقرب البعيد ويفرحنا !!! امين ياابله امين !!!

هي مصرية قوي وبتحب مصر اكتر مما كانت تظن !!!

لماذا احكي لكم قصتها ؟؟ ربما لاجيب علي سؤالكم الحائر ، مين دول اللي في مظاهرات عوكش !!!! اللي في مظاهرات عوكش هما ابله وكل من مثلها ، من صدقوه واحسوه اخوهم محمد ، من فهموا منه مايحدث بعدما عجزوا يفهموا من كل البرامج الحواريه والفضائيات التي داروا عليها شهور طويله فازدادت مخاوفهم وحيرتهم وقلقهم علي الوطن الذي يحبوه لدرجه لم يكونوا يتصوروها!!!!

احكي قصتها لاقول لكم ، انها تشارك في كل مليونيات توفيق عكاشه ليست لانها فلول ولا من انصار النظام القديم ولا عبيد الجيش ولا لاحسي البياده ولا بقايا الحزب الوطني ولا رجعيه ولا ضد الثوره ، بل لانها تحب مصر بطريقتها ولم يطمئن قلبها الا لمن يشبه اخوها محمد !!!!

احكي لكم قصتها وقصه الوف وملايين زيها يبحثوا عن اخيهم محمد ليسيروا خلفه يسلموه قلوبهم وحبهم ورقابهم ان لزم الامر وكله فدا مصر الغاليه !!!

وبس .....