27 نوفمبر 2011

مفاجأة مصرية





الليله فارقة ...
فقط واحد وثلاثون دقيقه تفصلني زمنيا عن يوم الانتخابات الذي يحتلني وجدانيا وذهنيا وعقليا ..
مصر تنتخب ، لاول مره بعد الثورة !!!
تحاول مصر تصنع برلمان الثورة الذي يعبر عن اطياف المجتمع
تحاول و.................من سينجح ومالذي سيفعله في مصر التي تقف اهبه الاستعداد لاستقبال حكامها الجدد ، من سيصيغوا دستورها ويحكموها اربعه سنوات !!!
غدا وبعد الغد .......... الاثتنين والثلاثاء ، سيصيرا يومين انتخابيين ، ليس فقط غدا ، لا لمده شهر ونصف تقريبا !!!
ثلاث مراحل انتخابيه والجوله الاولي وجوله الاعاده ، و............سيأتي الحكام الجدد علي جيادهم البيضاء وباصوات الشعب واردته وقراره ليصنعوا للشعب المصري الذي لااتمناه " مفعولا به " مستقبله ومستقبلهم !!!ا
غدا وبعد الغد ، ستشهد مصر مفاجأة !!!
هل ستكون مفاجأة ساره ام تعيسة ؟؟
في نهايه تلك العملية الانتخابية وفي ضوء نتائجها ومالذي سيحدث فيها ،  كيف سيري المصريين المفاجأة التي ستحدث ... وكيف ستؤثر في حياتهم الاربعه سنوات القادمه وفي المستقبل ...
لااعرف مالذي يخبئه لنا المستقبل بعد هذه الليله الفارقة ليله ثمانيه وعشرين نوفمبر 2011
وبعدها ، بعد ليله ثمانيه وعشرين نوفمبر 2011 ......... وفي ضوء ماسنعرفه بعدها ، سنتعرف علي مصر الجديده وعلي مستقبلها ومستقبل حياتنا !!!
من سيصوت لمن ؟؟؟ هل سيأتي برلمان الثورة معبرا عن المجتمع المصري فعلا ؟؟؟
لااحد يعرف  ، الجميع يخمن ويتوقع ويسعد ويغضب وينتظر!!!!
البعض متفائل والاخر متشائم والجميع قلق و....................انتظروا غدا مفاجأة مصرية !!!
انتظروا المفاجأة المصرية التي ستكشف عن نفسها يوما بعد يوم ، ابتداء من الغد 28 نوفمبر 2011 

24 نوفمبر 2011

ايه اللي بيحصل ؟؟ وحيحصل ؟؟؟؟؟؟؟؟؟؟؟؟؟؟





باختصار وبسرعه لان مافيش وقت .... مافيش وقت للتفاصيل ولا للشرح ولا للكلام التخين !!!! 
فيه حاجه كبيره قوي بتحصل وحتحصل !!!! 
لكن محدش واخد باله منها ..
الناس مشدود نظرها للتحرير واللي بيحصل في التحرير ، واللي بيحصل في التحرير مهم جدا وخطير جدا ، لكن مش ده الحدث الاساسي لالي بيحصل ، لا اللي بيحصل مالوش علاقه بالتحرير واخطر منه ، لكن مقصود الناس تركز مع التحرير ، ده مقصود ، مقصود نركز مع التحرير اللي بيحصل فيه مصايب ودم وجراح علشان مانشوفش المصيبه الاكبر اللي بتتجهز لنا 
السيناريو ابتدي والقطر خرج من المحطه والشرطه بتتهاجم في كل مكان من ناس مش ثوار 
من اطفال شوارع علي عصبجيه علي بطلجيه علي غيره ، الناس دي اللي معرفش هما مين ، بيتحاموا في الثوار والثوره علشان ينفذوا مخطط مالوش علاقه لابالثوار ولا بالثورة ، وهما عارفين ازاي يخلي الثوره والثوار ينتفضوا ، كل شويه قتيل شهيد كل شويه ضحيه ، والدم يبقي للركب ...
لما يدخل الدم في المعادله يبقي لاتصالح لاتفاوض لا هدنه لاتراجع ، طبعا لا تراجع ، لان اللي هما عايزينه - وهما دي معرفش مين - لسه مااتحققش ، وطول ماهو لسه مااتحققش حيفضل فيها شهدا ومصابين وتراكم غضب رهيب ، لما يحصل اللي هما عايزين ، حيقف سيل الدم الطاهر اللي بيتسفح غدر !!!
وكل مالدم يكتر ، الثوره تغضب اكتر والثوار يغضبوا اكتر ، وكل مايغضبوا اكتر ، اللي ليهم مخطط سري يعرفوا ينفذوه .. 
وعلشان الثوره والثوار يغضبوا ، الدم المصري الغالي يرخص والشباب المصري الغالي يتقتل والاكاذيب تكتر ، ولازم نفقد الثقه في كل حد وكل حاجه ، اشاعات تتقال علي انها حقايق والناس تصدقها وترددها وتكبرها ، ولازم نربط احداث الماضي بالحاضر ونعمل قياس غير حقيقي علي احداث غير متشابهه بس من كتر مالناس بتردد نفس الكلام نصدق انها احداث متشابهه ، ونسخر من اللي مايجوزش السخريه منه بس من كتر مانسخر منه نضحك رغم انه حاجه ماتضحكش ..

علشان المخطط اللي احنا مش شايفينه يتحقق ، لازم تفضل الناس محتقنه ، وغضبانه ، فلازم نفكرهم بكل حاجه سلبيه احنا زرعناها في عقلهم كل الشهور اللي فاتت ، الاول اقنعناهم ان الفلوس المنهوبه حترجع ، وهم صدقونا ، طيب نفكرهم بقي ان الفلوس المنهوبه مارجعتش !!! فيغضبوا لان الفلوس المنهوبه مارجعتش !!! الاول اقنعناهم ان المحاكمات بطيئه وان القانون بطيء وان المحاكم الثوريه عظيمه وان الاعدام مطلوب ، اقنعناهم فصدقونا لانهم لايعرفوا في القانون ولا يعرفوا في المحاكمات ، دلوقتي بقي الوقت المناسب نفكرهم بان كل اللي بيحصل بيحصل لان ماحصلش اعدامات ولان القانون بطيء ، نفكرهم ونعايرهم فيزعلوا ويغضبوا وينادوا بالاعدام الفوري والمحاكم الثوريه ، يعني ايه مش مهم ، ولا حد فاضي يسال ولا يتناقش !!! المهم يفضلوا غضبانين لانهم طول ماهم غضبانين طول مااحنا عارفين نوجههم نحركهم نوديهم ونجيبهم ، ومافيش مانع من الفزاعات ، الحق الفلول الحق الاسلاميين الحق العسكريين الحق الفاشيه الدينيه والتقسيم الحق الفاشيه العسكريه والاستيلاء علي الحكم ، ونجيب حدوته من الماضي وحدوته وهميه ماحصلتش ونقول حصلت ونربط بين اللي مايتربطش بينه ، والناس تاخد كلامنا وتصدقه ولما نغضبها تغضب ويتفوا كلهم في بق بعض وينقلوا نفس الكلام وبعد شويه يصدقوه كذبنا ويبقي حقيقه ويغضبوا ويغضبوا ويفقدوا الرؤيه والبصيره والاحساس ويبقي تروس في اله عملاقه ، اله موت ، الاول بتموتهم وبعدين تموت الوطن ومحدش واخد باله ولا منتبه للي بيحصل ، ليه ، لان كلنا مركيز علي التحرير اللي شادد بصرنا وتركيزنا وتعاطفنا ومخلينا مش عارفين نشوف اي حاجه تانيه حوالينا مع انها تخزق العينين وواضحه وضوح الشمس !!!! 

انه مخطط قذر يلعب ويتلاعب بعقول الناس وجهلهم وعدم فهمهم لهذا العالم القذر عالم السياسه ، يتعامل مع نقاط ضعفهم النفسيه واحلامهم ويوهمهم بأنها اوشكت تتحقق بس فاضل علي الحلو دقه ، مخطط يهون المستحيل ويخلي الناس مستعده ترمي روحها من فوق البرج ويقنعهم انهم عصافير وحيطيروا فلما يقعوا علي جدور رقبتهم تتكسر يصوت ويصرخ ويقول شهدا تاني ودم تاني ، القصاص القصاص !! 
كل ده سيناريو وبيتنفذ ، مشهد تمثيلي يشارك فيه كومبارس لايعرفوا انهم كومبارس متصورين انهم اصحاب القرار والاراده وهم ليسوا الا رد فعل محسوب لافعال مقصوده ، مشهد تمثيلي شعاره بص العصفورة وكلنا رقبتنا بتبص علي الفراغ اللي مافيهوش عصفورة مكسوفين نقول مافيش عصفوره ليقولوا لنا ازاي انتم عمي ، لا احنا مش عمي ، احنا شايفين العصفورة وبنبص عليها ، ولان رقبتنا كلنا متعلقه في الهواء مبحلقين في العصفورة الي مش موجوده ، فيه حد بقي بيكمل السيناريو علي الارض وهو واثق اننا مش شايفينه ولا حنشوفه لان رقبتنا متعلقه لفوق وعينينا بتحلق في الفراغ !!!! 
اللي بيحصل سيناريو حقير ، معتمد علي الجهل والبراءه وعدم الادراك وعدم الرؤيه عند معظم الناس ، معتمد علي الاندفاع والحماس والغضب عند بعض الناس ، معتمد علي قوه الاخراس الرهيبه اللي كل الناس حتمارسها علي اللي يقول مافيش عصفورة ، كل الناس حتزعق فيه لانه معندوش دم ولانه مابيحترمش الدم اللي سال علي الارض ومابيحترمش الشهداء ويارب ابنك وامك وبنتك هما اللي يحصل فيهم كده !!!!!!! 

اللي بيحصل بجد ، مالوش علاقه باللي بيحصل وبنتابعه !!!! 
اللي بيحصل بجد محدش بيتكلم عنه لكن حيبان بسرعه قوي ، لكن مالوش علاقه باللي بيحصل وبنتابعه !!! \
ولما اللي بيحصل يحصل فعلا ويوصل لنتايجه ، حيتلم السيرك والاسود ترجع اقفاصها والنار اللي في بق الساحر حتتطفي !!!! 
وحيطلع علينا اللي يقول مبروك عليكم اللي حصل ، وقتلاهم في النار وشهداءنا في الجنه ، ويتغير الخطاب من تحريضي اندفاعي لشيء اخر ، المهم الهيصه تخلص والميدان يتكنس والشهداء يتكرموا والثوار يطلعوا في التلفزيون وشعرا واغاني وبرامج توك شو تشيد باللي حصل وابطاله وثواره والناس ترجع تنام في بيتها تاني مش عارفه انها اتضحك عليها واستغلت واستخدمت وكانت وقود معركه لاناقه لها فيها ولا جمل ...............

للاسف .............. كالعاده اصرخ في الفضاء وحدي ، قليله الحيله ، لااملك امنع شيئ ولا املك ابصر بما يحدث !!! 
للاسف ............ المخطط يسير علي قدم وساق 
التحرير ينتفض غضبا لان شهداءه وشهداء الوطن يتكاثرون !!! 
والمؤسسات الشرطيه تهاجم من اخرين ليسوا ثوار لكنهم تواروا خلف غضب الثوار وانتفاضتهم !!!! 
والشعب للاسف لايفهم في السياسه ويسير في المسار الذي يدفعوه اليه ويغضب وقتما يحبوا وينتفض وقتما يحتاجوه ينتفض ويهدء ويبتسم وقتما يحتاجوه يهدء ، الشعب يستخدم في المعركه لصالح طرف حقير له خطط واستراتيجيات واهداف لايرغب في الافصاح عنها ولا المطالبه بها بل يرغب في استخدام الشعب للمطالبه بها والالحاح عليها فتتحقق وكأنها انتصار للشعب وهي في الحقيقه ليست الا هزيمه جديده تضاف لهزائمه لانه - ومنذ زمن بعيد - يستخدم دون ان يدري في دروب ومسارات السياسه القذره!!! 
للاسف ............ المخطط يسير علي قدم وساق 
وسيموت مصريين كثر رجال ونساء شباب واطفال ويسيل الدم المصري الطاهر علي الار ض حتي ينتهي هؤلاء الحقراء من تنفيذ مخططاتهم الشريره التي لاعلاقه لها بالوطنيه ولا بالشرف ولا بالكرامه ولا بالثورة !!!! 
كل مايحدث امام اعيننا لاعلاقه له بما يحدث فعلا !!!! 
وكل النتائج التي ستتحقق لاعلاقه لها بما يحدث امام اعيننا فعلا !!!! 
وكلنا نستخدم للوصول لاهداف لانرغب فيها ولا تخصنا ولا تحقق مصلحه وطننا ولا شعبه !!! 
و............. كلنا بنبص العصفورة وعمالين نبحلق في الهوا ندور عليها !!!
وتحت رجلينا الدم للركب واعز اولادنا بيموتوا وحيموتوا واحنا حتي مش واخدين بالنا ومش فاهمين !!!! 
كلنا بنبص للعصفورة وسايبين الوطن يعملوا فيه اللي هما عايزينه !!! 
والله مافيه عصفوره والله مافيه عصفورة ، بصوا علي الارض تحت رجليكم وقدامكم ، شوفوا ايه اللي بيحصل وبيحصل ليه ومين المستفيد منه وعايز ايه وبيستخدمكم ازاي ، لو شفت بجد ، ساعتها الدم حيقف والاصابات حتقف وحنفك شفره كل الالغاز !!!! 
المخطط الشرير الحقير ماشي علي قدم وساق والكمين منصوب واحنا بنقع فيه ، بنقع فيه وبندفع تمنه دم غالي وشهدا غاليين ومصريين  غاليين وحندفع فيه تمن غالي تاني لسه مااحناش عارفينه لانه لسه مابناش !!! 
مش عارفه انهي الكلام !!! 
هل ده مخطط فوضي ، هل ده مخطط تقسيم ، هل ده مقدمه لانقلاب عسكري فاشي ، هل ده مقدمه لثورة اسلاميه ، هل ده مقدمه لاحتلالنا بالناتو وضربنا بقنابله !!! والله مش عارفه !!! 
مش عارفه انهي كلامي !!! 
افتكرت يمكن كلام نعوم تشامسكي اللي بيقول ان امريكا ضد ديمقراطيات حقيقيه في بلادنا !! 
افتكرت يمكن كلامه عن عشر استراتيجيات للتحكم بالشعوب !!! 
افتكرت يمكن كلام كوندليزا رايس عن الفوضي الخلاقه !!! 
افتكرت يمكن المشهد السينمائي المتكرر عن القطه الغلبانه اللي بيولعوا في ديلها النار ويرموها جوه غيطان القصب فتتحرق بلا ذنب وتحرق الدنيا معاها !!! 
افتكرت يمكن المثل العربي اللي بيقول ، اكبر النار من مستصغر الشرر !!! 
افتكرت يمكن مشهد كورة التلج اللي بتبتدي صغيره وتتدحرج وتكبر وتتدحرج وتكبر ومحدش لايقدر يوقفها ولا يمنعها تكبر !!! 
افتكرت حاجات كتيره اخرها دعاء امي كانت بتقوله ، اللهم اني لااسالك رد القضاء ولكني اسالك اللطف فيه !!!! 
و.............. علي فكره كل اللي بيحصل مالوش علاقه باللي بيحصل بجد !!! 
و..................... علي فكره مافيش عصفورة !!!!!!!!

13 نوفمبر 2011

انتظر المطر





حين اسمع قطرات المطر تنقر فوق نافذتي كالعصفور الصغير 
وتفوح رائحه الياسمين 
ابحث عن شالي الصوفي وعن حضنك 
افتقدك واشتاق اليك .. 
اناديك فلا ياتيني الا عواصف رعديه 
تسكب امطار فوق قلبي العطش فتكوي جروحه بالملح الموجع 
وتتركه يتلظي بالهم والشوق وغيابك !!! 

 رائحه المطر الطازج تذكرني بحضورك
بوهج غرامك وقت اعترفت بحبي 
وقت خطفتني فوق سحب محبتك 
يومها ، انهمر المطر الفرح فوق قلبي يرويه 
وسطع قوس قزح في حياتي 
غادرتني العاصفه الموحشة  
واحلتني امطارك 
وبرأت من الجدب والوحشة وسقم الوحدة 
لكن المطر رحل وتركني 
وانت رحلت وتركتني انتظرك في مواسم الاعاصير 

حين اسمع قطرات المطر تنقر فوق نافذتي 
ابتسم .. فالمطر والبرد والشتاء مترادفات لوجودك 
فالدفء انت 
والحب انت 
والشوق انت 


المطر والبرد والشتاء وفنجانين قهوة في ركن دافء من شرفتي 
وياسمين وابتسامات كثيرة وغرام ...كل هذا كان انت ...  كانت ايام !!! 

الوجع الذي لايبارحني لانك غادرتني كمثل الامطار في ازمنه الجدب المستمرة انت 
رحلت عني وتركت الارض قفراء تشتاق للمطر ولك 
وصار الحلم انت 
والامل انت 
والهم انت 
والوهم انت 
وصارت القهوه ماسخه تنتظر المطر وتنتظرك 
وذبل الياسمين ينتظر قطرات المطر ليحيا وينتظرك 
وعشش العنكبوت في الركن الذي صار باردا من شرفتي ينتظر المطر وينتظرك 

ويأتي المطر يغرق شوارع مدينتي 
وترتعش قلوب الاحبة وترتوي  
وينتشر الدفء واقواس قزح الورديه 
وانا مازلت انتظر وحدي في الشرفة 

ويمر عاما واثنين 
ويأتي المطر وينقر فوق نافذتي  
ابحث عن شالي الصوفي وعن حضنك 
اتدثر بالصوف البارد وقطرات المطر الدافئة ودموعي 
وانتظرك 
و.......... سنوات طوال يأتي المطر ولا تأتي 
فهل ستأتي هذا العام مع المطر ؟؟ 
ام ستتركني كمثل كل الاعوام الفائته اتدفء بالصوف البارد والهم 
المطر اوشك يأتي فهل تأتي ؟؟؟
انتظر المطر وانتظرك 

07 نوفمبر 2011

لاتنتخبوهم وانقذوا مصر !!!!ا





الي كل النساء ...
ببساطه لا تنتخبوا حزب النور .... لاتختاروا قوائمه الانتخابيه ..
هو لايحترم النساء
هو يري ان السيده ليست الا زوجه " فلان " وابنة " فلان " وام " فلان "
لايحترم النساء
لايحترم حتي ناشطاته السياسيات
يرشح السيده ويمحو اسمها وصورتها
ويقدمها للمجتمع باعتبارها زوجه " فلان "
ولم يقل لناخبيه كيف ستمارس السياسه كنائبه بالبرلمان وهي مجرد زوجه لفلان
كيف ستتكلم وصوتها عورة وكيف ستحضر مع الرجال الغرباء عنها
هل ستعمل توكيل عام لزوجها يمارس السياسه بدلا منها ويحضر الجلسات بدلا منها ويناقش القضايا المطروحه بدلا منه
الي كل النساء
لاتنتخبوا حزب النور السلفي الذي لايحترم النساء ولا يؤمن بوجودهن ولا دورهن
حين رشح سيده ضمن قائمته الانتخابيه ، رشحها في اخر القائمه وهو يعلم انها ستسقط ولم يري مبرر لكشف وجهها امام الناخبين ووضع اسمها ضمن قائمه علي سبيل مجاراه الافكار " الغربيه " التي تحتل عقول المجتمع الذي يرغب في اصلاحها وفقا لمنهجه السلفي ..........
لاتنتخبي ياسيدتي حزب النور
هو لايحترمك وسيلغيك ويلغي صوتك وصورتك ويعتبرك مجرد تابع ( لفلان ) !!!!
لاتنتخبوا حزب النور ، فليس هو الحزب الذي سيصنع المستقبل لمصر
لاتنتخبوا حزب النور ، فاول خطوات طريقه السياسي تفصح عن نهايه الطريق
اليوم هي حرم فلان وغدا سيمنعونا من الكتابه والقراءه والوجود والعمل ، سيلغونا ويمحونا من الوجود 
انقذوا مصر ونسائها وانفسكم واحموا مستقبلها ولا تنتخبوا حزب النور !!!!ا
اللهم اني بلغت اللهم فاشهد !!!!ا
اللهم اني بلغت اللهم فاشهد !!!!ا
اللهم اني بلغت اللهم فاشهد !!!!ا