كان نفسي أسأله قبل مايموت
الا هو صحيح الموت بيوجع
؟؟
كان نفسي أسأله ..
يحبني ابلغ مامته ايه
وكمان باباه
يحبني اقول لبنته ايه
وكمان اخوه
واقول لمصر اللي مات
علشانها ايه
كان نفسي اساله بيحبها قد
ايه ؟؟
ومات زعلان عليها ولا ايه ؟؟
قريت اسمه كذا مرة
وحاولت احفظه
قلت عيب مايصحش يموت
وكمان مانبقاش عارفين اسمه ايه
يعني حتي مانعرفش نزعل عليه !!
للأسف يادي الأسف
مالحقتش اقوله حاجة
ويمكن مالحقتش كمان اعرفه
اصلي شفته وانا بأبكي
شفته سطر في رسالة
بتقول خلاص ده مات
شفته دمعه اتحجرت وقت
السكات
شفته قهرة قلب ام
شفته صرخه من ست واقفه في
البلكونة بعيد
عماله تصرخ وتسأل القاتل
انت ليه بتموته ؟؟
شفت موته مجرد خبر صغير
يزيد فوق الهم هم
شفت مصر بتعيط عليه
وبتدعي له بالجنه وطولة
العمر هناك
شفت ابتسامه
رسمها الموت علي وشه
الشجاع
وهو ماشي من دنيا ظالمة
للبراح
بيقدم دمه وروحه وعمره
هديه رخيصه لاجل مصر
ماهي مصر الغاليه
مايغلاش عليها شي
حتي عمره وشبابه وضحكته
الحلوة
وامله في الحياه
برضه مايغلوش عليها
للأسف يادي الأسف
مالحقتش اسأله هو الموت
بيوجع ؟؟
ولو كنت سألته كان جاوبني
وانا صعبانه عليه
اه ياخالتي الموت بيوجع
بيوجعكم انتم
ياللي لسه عايشين متعذبين
اما انا فالموت عتقني من
حياة
دمها تقيل حبتين
ريح قلبي اللي كان الحب
واجعه
والامل في بكره عماله
بيوديه ويجيبني
مرة احلم بخير ومرة يطلع
حلمي كابوس
مرة اتمني ومرة يطلع املي
علي فاشوش
للأسف يادي الأسف
مالحقتش اسأله
مات بسرعه مات بشجاعه
مات مستعجل قوي
مات وهو بطل
وعارف انه قدم عمره
لمصر الجميله
وانه هادها هديه
وانه مكسوف
لتكون الهديه مش قد
المقام
اصل مقامها في قلبه
الاخضر
كان كبير
مقامها يحتاج منه ميت عمر
فوق عمره
يقدمهم ليها هدية رخيصة
ويموت سعيد
!!!
كان نفسي اسأله قبل مايموت
الا هو صحيح الموت بيوجع ؟؟
لكنه مات بسرعه
قبل ماالحق اساله
وسابني وملايين معايا حزنانين
والقهرة حارقه قلوبنا
والايام كلها زرقا
والدموع مش راضيه تنزل
وبتقطع في قلوبنا سكاكين
والاهه مخنوقه في حنجرة
دبحها كتر الهتاف
باسم البلد اللي علشانه
مات
الحنجرة اتقطعت حبالها
واتخرس جواها صوتنا
واحنا مش عارفين نعيط
ولانهتف
بس عايزينه يرجع
علشان نشيله علي راسنا
ونمشي
تاني في المظاهرة
يهتف معانا واحنا بنهتف
تحيا مصر وان شالله نموت
كلنا
بس للاسف يادي الاسف
مالحقتش اقوله حاجه
مالحقتش اقوله مصر بتحبك
قوي
وبتفخر بيك قوي
وكلنا كلنا بنحبك قوي
وعلي فكره احنا عليك مش
زعلانين
احنا فرحانين بفخرك باسمك
بانتصارك
علي الجماعة الارهابيه
اللي قتلتك ومستنيه
تقتلنا
واحنا كمان مستنين
اصل مصر العزيزه مهرها
غالي قوي
الف مليون ضحكه حلوه
غنوه حلوه
بنت حلوه
شاب كان يحلم ببكره
ست ربت عيالها وماتت
فرحانه
بانها دفعت مع اولادها
مهر بكره
وانتم علي فكره كسبانين
اتقتلتم غدر اه لكن
كسبانين
كسبانين حبنا واحترامنا
وحب مصر اللي بتحب ولادها
الطيبين
اللي يقدموا عمرهم ليها
هديه
وهما كمان مكسوفين
لتكون هديه ماتناسبش حبها
في قلبهم الاخضر
اللي شاخ قبل الاوان
انتم موتم وانتم كسبانين
واحنا الموت وجعنا
وعليكم صعبانين
...
للأسف يادي الأسف
مالحقتش اساله هو الموت
بيوجع
كنا ماشين في المظاهره
وبنهتف فرحانين
صوتنا طالع من قلوبنا
ودموع الفرح سايلين
علي وش مبسوط وسعيد
لما يهتف باسم مصر
ويموت شهيد
صوتنا اتدبح لما جت له
رصاصه
مش عارفين منين
لما حنجرته سكتت واحنا مش
فاهمين
حنجرته سكتت
ودبحها راجل فاهم انه
بيقتله
علشان ماربنا يرضي عنه
بس ربنا مابيرضاش بالظلم
ولابيرضي عن المجرمين
هو قتله فاهم انه رايح
كده خلاص الجنه
ومش عارف انه اخوه
وابن اخوه ويمكن ابنه
قتله راضي وهو مضحوك عليه
مضحكوك عليه
لغايه مانسي اسمه واسم
ابنه
وقتله مره وميت مره
وهو مش دريان بالحكايه
واصلها وفصلها
وهو ليه جاي يقتل هنا ؟؟
للاسف يادي الاسف
بكره لما يبلغوه
ان الجثه المرميه علي
الرصيف
تبقي لابنه
وانه قتله من غير مايعرف
انه ابنه
وقتها حيفتكر صوت روحه
وهي راحه للبراح
وهو بيكسر في رقبته
وهو بيخنقه ويضحك سعيد
وهو بيضرب علي راسه رصاصه
وبيكبر مع كل الفرحانين
قتله وهو مايعرفش اسمه
مايعرفش انه ابنه
انه دمه ، انه همه
وانه ابن عمره اللي ضيعه برصاصه رخيصه
سلمها له الشيخ
وقاله علي الجنه حدف ياولدي
فاطلق الرصاصه في قلب ابنه
وعاش في جهنم الحمرا حياه وموت
حيفتكر انه قتله بسرعه
وماسمعش اخر كلمه قالها
لما قاله بتقتلني ليه ؟؟
طيب اقتلني بس خلي بالك
علي مصر
دي حبيبتي ، خلي بالك
عليها
قتله برصاصه من بعيد
اصله كان متوضي خايف
علي الوضو
ليفسده الدم النجس ..
دم ابنه اللي قتله وهومش
دريان
انه بيموت في نفسه
كان متوضي وعايز يلحق
يخلص قتل
بسرعه ويجري
علشان يلحق المغرب
في الجامع جماعه
!!!
النهارده اتقتل واحد بيحب
مصر
وبكره كمان حيتقتل واحد
بيحب مصر
وواحده حلوة هي كمان بتحب
مصر
وست جدة هي كمان بتحب مصر
وراجل حارب في سينا
ومامتش
بس النهارده مات لانه
بيحب مصر
بس للاسف يادي الاسف
حاولت احفظ اساميهم لما
ماتوا
قلت عيب مايصحش يموتوا
واحنا عايشين مش فاكرين
اساميهم
حاولت احفظ اساميهم
لكن اساميهم كتيره
والذاكره ضعفت من كتر
العياط
والهم اللي كابس علي قلبي
قلت مش مهم يطلع اسمه ايه
اي اسم المهم انه مصري
مات وهو بيحب مصر
ياحبيبي ياللي مت وانت
بتحب مصر
مصر كمان ياحبيبي بتحبك
قوي
وحتفضل فاكراك قوي
وفرحانه بيك قوي
ومتعطره بدمك الفواح
وشايله اسمك في قلبها
وتاج علي راسها
ويوم النصره القويه
والفرحه اللي مابعدهاش
فرحه
مصر كلها هتهتف باسمك
وحتفتكرك
وتصرخ تقول ده ابني ودي
بنتي
اللي ماتوا علشان ماارفع
راسي واكون
واديني كونت
دفعوا اعمارهم لاجلي وانا
حاعيش
علشان امد في عمرهم
واهتف كل لحظه باسمهم
ياحبيبي ياللي مت وانت
بتحب في مصر
مصر بتحبك قوي
وكلنا بنحبك قوي
موت بقي وانت فخور بموتك
وفرحان
والباقي بقي علينا
نحفظ اسمك ليوم الفرحه
ونمشي وراك علي نفس
الطريق
دمك ينور ضلمته
وروحك تونس وحشته
ادعي لينا بقي وانت في
الجنه وسعيد
وانت في الجنه شهيد
ادعي لينا عقبال مصر
ماتفرح بينا
زي مافرحت بيك
يوم مانقدم عمرنا وروحنا
ليها مهر
لاجل تعيش وتبقي
لاجل تهتف باسمنا يوم
ماتفرح
ادعلي لينا وانت في الجنه
سعيد
وانت في الجنه شهيد
اننا نموت زيك واحنا
مبسوطين
فرحانين اننا بنقدم
ارواحنا هديه
لمصر اغلي الغاليين ..
