امريكا وماادراك ماامريكا !!!!

طيب اخر حاجه اكتبها قبل ماانام ...

امريكا وماادراك وماامريكا ....

اللي مركزين مع امريكا قوي وخايفين منها من رد فعلها احب اقول الاتي ....

1- امريكا وخبرائها الاستراتيجيين بقالهم 50 سنه بيشتغلوا علي مشروع خريطه الدم والشرق الاوسط الجديد واعاده تقسيم المنطقه لدويلات طائفيه ودينيه متناحره لان دي الوسيله الوحيده اللي تقدر تهدم بيها قوه العرب لصالح اسرائيل ... 

2 - امريكا جربت الفكره دي فعلا في السودان ، واستخدمت في تطبيقها الاخوان المسلمين وحسن الترابي ، وفعلا السودان دخلت حروب طائفيه وبين الشمال والجنوب لمده 30 سنه ، مات مئات الالوف واتهجر 4 مليون سوداني وانتهت التجربه يوم 11 يناير 2011 باستفتاء علي تقسيم السودان لدوله شمال مسلمه ودوله جنوب علمانيه .. 

3- اول ماامريكا ادركت نجاح التجربه وتقسيم السودان ، خرجت من نطاق التجربه الجزئيه لتطبيق التجربه علي المنطقه كلها ، تحت مظله " الربيع العربي " اللي بدأ في تونس علشان مصر بالبلدي تغير وتقول التوانسه نجحوا فيها اشمعني احنا !!! 

4- مش حاتكلم عن يناير 2011 ولا ازاي حصل ولا عايزه اخش في المنطقه دي لان ناس كتيره بتزعل مني ولا وقته ، مش ده الموضوع ، الموضوع ان امريكا تحالفت مع الاخوان المسلمين في مصر ، اما من قبل يناير 2011 ورسمتها معاهم ، زي مابيشوف البعض ، او تحالفت معاهم بعد يناير 2011 لركوب الثوره والاستئثار بيها ، زي مابيشوف البعض التاني ، امريكا كانت عارفه ان الاخوان هما اللي ممكن تستخدمهم لتنفيذ مشروعها الاستعماري في مصر ، اولا لان معندهمش انتماء وطني ، ثانيا لانها ممكن تلاعبهم بفكره الخلافه وازاله الحدود بين الدوله الاسلاميه الكبري اللي كانوا بيحلموا بيها ، امريكا كانت عارفه ان وجود الاخوان في مصر مع استبدادهم وغبائهم السياسي وقله خبرتهم حيكونوا اداه في ايديها تنفذ بيهم مخططاتها في المنطقه والاهم في مصر ، هما السكين اللي حيقطع مصر ويقسمها ، هما حيستفزوا الاقباط بكل كلمه يقولوها ، مش مهم الدوله المدنيه هنا ولا الديمقراطيه ولا الشفافيه امريكا تضحي بيهم لصالح مشروعها الاستعماري بتقسيم مصر كجزء من تنفيذ مخطط خريطه الدم ، امريكا دعمت الاخوان ، اوباما دعمهم ومولهم واتفق معاهم واستخدم قطر العاهره بتاعه لدعم الاخوان وتمويل وفلوس واونطه باعتبارهم بقي حيحكموا مصر اكبر دوله في العالم العربي ، وهما صدقوا ، والناس للاسف ، بعض منهم باقصد المصرين صدقوا انهم بتوع ربنا وان الخير حيجيي علي ايديهم و....................................... وحصل كل اللي احنا عارفينه وعشناه !!! 

5- محمد مرسي بقي رئيس مصر ، وخيرت الشاطر بقي شهبندر التجار ، والتنظيم الدولي حط رجله في مصر ، وافرجوا عن الارهابيين وجابوهم من كل الدنيا علشان يبقوا ادواتهم لحكم مصر من وجهه نظرهم ، ويبقوا اداه امريكا للاحتقان الطائفي لتنفيذ مشروع التقسيم من وجه نظرها !!! 

6- امريكا تصورت ، ان خلاص مشروع خريطه الدم بقي جاهز للتطبيق ، والبركه في الاخوان ومرسي الاهبل وشهبندر التجار اللي يبيع امه وابوه وسينا علشان احلامه ، خلاص كل حاجه تمام !!! 

7 -و فجأ ، الشعب المصري خرج الشوارع في 30 يونيو وقال ( ارحل ) ومعاه الشرطه التي شاركت الشعب مظاهراته واعلنت انحيازها ليه وانها مش حتضرب الشعب لصالح الرئيس والجماعه ، ومعاه الهيئات القضائيه ومن خلفهم القوات المسلحه تحمي وتعد بالانحياز للشعب ،و........................... باي باي مرسي !!!! 

8 - صحي اوباما من النوم ، لقي مشروعه الاستعماري اللي اشتغلت عليه دولته وخبراءها الاستراتيجيين ضاع واتدمر ، ضاع علي ايد مصر وشعبها وجيشها ، مش بس كده لا ، صحي اوباما من النوم ، لقي المصريين شايلين صوره وبيشتموه وبيهددوه بضياع مصالح بلده عنده ، وطظ في المعونه وفيك ياراعي الارهاب !!!! 

9 - الهزيمه هنا ليس للاخوان بل اولا للتنظيم الدولي اللي المصريين لسعوه علي قفاه ، الهزيمه للجماعه الفاشله اللي ضيعت من ايدهم حكم مصر ومايتبعه ، الهزيمه لامريكا ومشروعها الاستعماري وتقسيم الدم والشرق الاوسط الجديد !!! 

10 - وفجأ بقيت امريكا تدافع عن الاسلام والاخوان ، والسفيرة بتحاول تلم المصيبه اللي حصلت ، واوباما محتاس قدام الكونجرس وقدام شعبه ، دفع 25 مليار لدعم الاخوان ، الحقيقه لا ، لدعم مشروعه الاستعماري علي بلادنا باستخدام الاخوان وبدل من نجاحه ضاع الاخوان ومصالحه كمان بقت مهدده بالضياع من مصر اساسا ...

11 - هل استسلمت امريكا للهزيمه ، لا ، ساندت الاخوان الارهابيين ولغايه دلوقتي بتساندهم ، وفجأ بقت زعلانه من الانقلاب العسكري ونسيت انها الراعي الرسمي للانقلابات العسكريه في امريكا اللاتينيه ، فجأ بقت خايفه علي الشرعيه وهي اساسا ضد الشرعيه في اي حته وحاولت بدل المره مليون تسقط انظمه منتخبه ولنا في شيلي تاريخ لما اسقطت الرئيس المنتخب السلفادرو الليندي لصالح بينوشيه السفاح وانقلابه العسكري ، فجأ امريكا بقت زعلانه من العنف وهي ام العنف في جوانتيناموا وسجن ابو غريب وفيتنام وهيروشيما وناجازاكي ، الاخوان بيكبروا ومتصورين ان امريكا حتقدر تنقذهم وترجع الخروف الجاسوس من السجن ليحكم مصر ، تصوروا لانهم جهله سياسيا ومابيفهموش الالف من كوز الذره وبيتلعب بيهم ، تصوروا ان امريكا حترجع لهم الخروف يحكم مصر ، وامريكا بتحاول انقاذهم علشان تنقذ مشروعها الاستعماري ، حاولت تمارس عنف علي مصر ، تهديد بقطع المعونه ، المصريين قالوا لها طظ ، منع طايرات الاف 16 ، المصريين قالوا ستين طظ ، طيب ايه ؟؟؟؟؟؟؟؟؟؟؟؟؟؟ قررت امريكا تصعد باستخدام حلفاءها التقليدين بريطانيا وفرنسا والاتحاد الاوربي وقبلهم تركيا وقطر للادانه والشجب والقلق والتفاوض والتصالح والمساومه والخروج الامن والمصالحه والفصيل الوطني وغيره وغيره ، متصوره انها حتضحك علي المصريين وتاخد مرسي وتعمله رئيس في المنفي وتخلق وضع جديد يسمح لها بالتدخل في شئون مصر وجايز تفلح وقتها في تقسيمها واستكمال تنفيذ مشروع خريطه الدم والشرق الاوسط الجديد ، كل محاولاتها فشلت مع مصر لان القياده في مصر فاهمه امريكا كويس وعارفه خططها وعارفه هي افسدت ليها ايه وعارفه ان امريكا تسعي لتدمير مصر والقياده لاتتصدي فقط لحكم الاخوان بل تحمي مصر من التدمير ومشروع التقسيم ، امريكا تصورت في البدايه انها حتعرف تضحك علي القياده الجديده في مصر وتلاعبها ، ولما ادركت انها مش حتعرف تضحك علينا قررت تخوفها ، الاول بقطع المعونه ، وبعد كده نقلت المعركه لساحه جديده وهي الامم المتحده عن طريق حلفائها متصوره انها حتاخد قرار ضد مصر يتيح لها التفاوض مع مصر لاستكمال مشروعها الاستعماري ولو كان ده علي حساب مرسي والموافقه علي عزله وصولا لطرطور اخر يحكم مصر يسمح لامريكا باستكمال المشروع الاستعماري ، طبعا القياده في مصر فاهمه كويس امريكا وفاهمه كويس اهداف امريكا وفاهمه كويس ان المصريين لما قاموا بثوره 30 يونيو ماكانوش بس ضد الاخوان ، لكن ايضا ضد المشروع الامريكي لتدمير بلادهم ، امام الضغوط الامريكيه ، حبت القياده المصريه توري امريكا قدر قوتها فماكان من السيسي الا طلب التفويض من المصرين ، طلب التفويض كان رساله لامريكا والعالم كله ان القياده المصريه متوحده مع شعبها وقادره علي حشده وتعبئته لصالح قضاياه التي يراها ولو في 24 ساعه ، وفعلا خلال 48 ساعه ، نزل للشارع 40 مليون مصري لتفويض الجيش والشرطه لمواجهه الارهاب المحتمل ، واهم حاجه انهم نزلوا في مواجهه خطر محتمل ، وهي رساله فهمها الامريكان كويس ، في مواجهه خطر محتمل نزل 40 مليون ، امال بقي كام مصري حينزل الشوارع لو الخطر كان اكيد وحقيقي وحال وبيهدد المصريين !!!!!

12 - اذن الثوره المصريه ، ثوره 30 يونيو ، هزمت امريكا ومشروعها الاستعماري ليس في مصر فقط ، بل في المنطقه كلها ، لان الشعوب التي ادركت ان امريكا دبستها في الاخوان وفاشيتهم ، اعتمدوا النموذج المصري للتحرر من ذلك الاستبداد بل وايضا اعتمدوا علي الجيش المصري الذي صار حلمهم ان ينقذهم هذا الجيش شخصيا من الاخوان وطبعا من امريكا .. وطبعا هزمت الثوره المصريه التنظيم الدولي للاخوان والجماعه وكل دلاديل امريكا اللي احلامهم في ادوار اقليميه اكبر اعتمادا علي تدمير مصر ، كل هؤلاء هزموا علي ايد مصر ..

13 - رغم كل هذا ، المصريين خائفين من امريكا ومجلس الامن ، واسمحوا لي اقول لكم انكم مخطئين ، امريكا ليست الان الا دوله خايبه مهزومه ، ممكن ترفص حبه تحاول حبه ، لكنها مهزومه بشكل ساحق ، طيب امريكا تقدر تعمل في مصر ايه ، تعاقبها ازاي علي افساد مشروعها الاستعماري الاقليمي .. هل ستاخد قرار من مجلس الامن بمحاصره مصر مثلما فعلت في العراق ، تمهيدا لاحتلال مصر مثلما احتلت العراق ؟؟؟ 

احب اقول لكم حاجه مهمه ، مصر 2013 ليست العراق وقت الحصار والغزو 

ليه؟؟؟؟ ..

1 - صدام حسين كان مكروه من شعبه عكس القياده المصريه الحاليه التي يحترمها الشعب ويحبها ويدرك انحيازها له فينحاز له ، والقياده المصريه قادره علي التعبئه وحشد المصريين في 24 ساعه لصالح قضاياهم وبالتالي هم مستعدين يسيروا معها لاخر الطرق وتحمل الصعاب دفاعا عن كرامتهم الوطنيه واستقلالهم ودفاعا عن القياده ذاتها .. 

2 - العراق اللي كان مكروه من الخليج كله ومن العالم العربي ، حكومات وشعوب ، غير مصر الان ، مصر ، تعتبرها شعوب كثيره نموذج يحتذي به وستدعمه وقت الجد علي جميع المستويات ، وايضا تدعمها حكومات عربيه قويه ماليه واقتصاديه كالسعوديه والامارات والكويت والخليج لن تسمح لابحصارها اقتصاديا ولا دبلوماسيا ولا باستصدار اي قرارات ضدها في مجلس الامن ..

3- في اطار الاحترام المتبادل والمصالح المشتركه تسعي روسيا والصين لايجاد موطيء قدم لبلادهم في المنطقه التي استبدت بها امريكا طويلا ولمصر اهميه استراتيجيه كبيره عند هاتين الدولتين ، ومن ثم ، فان هاتين الدولتين لن يسمحا بقرار يصدر من الامم المتحده ضد مصر ، وايضا لن يسمحا لامريكا بالضغط لا العسكري ولا الاقتصادي علي مصر ، ومستعدين لدعم مصر علي كافه المستويات بكل الطرق .. 

اذا كان الوضع كذلك ... مالذي تملكه امريكا تجاه مصر لعقابها ؟؟

ربما تدعم الارهابيين بعض الوقت كاداه عقاب ضد المصريين لافسادهم مشروعها الاستعماري ، لكن ذلك سلاح ذو حدين لانه يدمر مصالح امريكا في مصر ويعرضها للخروج المهين من مصر لتحل محلها روسيا والصين ..

اذن ، مالذي تملكه امريكا تجاه مصر ؟؟؟؟ الحقيقه ولا حاجه !!! 

امريكا زعلانه من مصر لانها افسدت مشروعها الاستعماري ، متضايقه وبتعيط ، حتحاول تضايقنا ، تدخلنا في معارك دبلوماسيه ، تهددنا ، لكن دون مراهنه ولالعب قمار علي فقدان مصر !!! 

متي تنتصر امريكا علينا وتكسر ارادتنا ، لو ضعفنا او خفنا 

متي تقبل امريكا بهزيمتها من مصر وتعمل انها مش واخده باله وتنساها وتفضل تدينا معونه وتسليح وغيره ، كلما كنا اقوي شعبا وحكومه وقياده ، كلما كنا اقوي واكثر اتحادا فنحن نرسل لها رساله اننا قادرين علي الاستغناء عنك وقادرين علي طردك من منطقتنا ، وقتها ، ستقبل امريكا الهزيمه وتكف عن تهديدينا ومضايقتنا و..................... بس !!! طيب والاخوان ؟؟؟ لا امريكا وقتما تدرك انهم هزموا داخل مصر وانهم السبب في كراهيه المصريين لها ، ستتخلي عنهم وبسرعه جدااااااااااااااااااااااااااااااا 

ماتخافوش من امريكا فهي بجد لاتملك علينا شيئا ..

ماتخافوش من امريكا وافهموا انكم هزموتها هزيمه موجعه .. 

وجمدوا قلوبكم وثقوا في انفكسم وقيادتكم وحضارتكم !!! اننا لمنتصرين !!! 

حاولت اقول حاجه مفيده ، هل افلحت ؟؟؟؟؟؟؟؟؟؟؟؟؟؟؟؟؟؟؟؟

""ستيتس كتبه علي حسابي في الفيس بوك الثانيه والنصف من صباح السبت 17 اغسطس 2013 ""

افتكروا التاريخ ده كويس !!!!

افتكروا التاريخ ده كويس 16 اغسطس 2013 ...

ده اليوم الذي اكد نهايه الاخوان وانهيارهم كتنظيم مصري وعجز التنظيم الدولي رغم كل اللي عمله ان ينقذه من مصيره الذي قرره له المصريين ، الفناء والكراهيه والنبذ الشعبي الدائم ...

كانوا يتصوروا ، وملايين المصريين يتصوروا ايضا ، ان اليوم سيكون يوم القيامه ، مصر كلها ستحترق والجثث حتملي الشوارع وكل المؤسسات الشرطيه حتقتحم وضباط الجيش حتموت ، وانهم حيورونا العين الحمرا ويعرفونا قدر قوتهم الباطشه ، هما والسورين والافغان وحماس والقاعده ، هما كانوا يتصوروا كده ، وملايين المصريين كانوا خايفين من كده !!! 

ايه اللي حصل ، حشدوا علي قد مايقدروا يحشدوا ، والجزيره والقنوات المشبوهه وشبكه رصد واللجان الالكترونيه ، حشدوا علي قدر ماقدروا ، واظهروا بجراءه مليشياتهم المسلحه عيني عينيك واعلام القاعده عيني عينيك ، وبعدين ؟؟؟؟؟؟؟؟؟

حاولوا يعتدوا علي اقسام شرطه ومديريات امن ، ضربوا رصاص اه ، خاضوا معارك اه ، لكن ماقدروش يخشوا ولا قسم ولا يقتحموا اي قسم ولا اي مديريه !!!

اعتدوا علي كنائس ومدارس قبطيه في الصعيد وحرقوا بعض المباني الحكوميه ، اه ، عملوا كده ، لكن لو قلنا في مصر كام مبني ، وشوفنا كام مبني اتحرق ، تبقي النسبه ايه ؟؟ لو قلنا في مصر كام كنيسه ومدرسه قبطيه وشوفنا كام كنيسه اتحرقت ، تبقي النسبة ايه ؟؟؟ 

عملوا مظاهرات ، ضخمه من وجه نظرهم ، مظاهره مدينه نصر اللي كانوا بيتباهوا بيها فيها كان واحد 5000 ، 10000 ، مظاهره رمسيس وجامع الفتح فيها كام واحد 5000 ، 10000 وبعدين .. ولا قبلين ، معرفوش يعتصموا في اي حته زي ماكان نفسهم يعتصموا ، معرفوش يخلو المظاهره بتاعتهم تكبر وتزيد والناس تنضم ليها ، يبقي طظ !!! 

طيب شالوا سلاح واعلام القاعده وضربوا نار عشوائي ومن محترفين وبعدين ، اهل بولاق ضربوا مسيرة كوبري الزمالك وماهم اهل امبابه ، عملوا عليهم كماشه واتضربوا ، الناس ماخافتش من السلاح ولا عملت حسابه وضربتهم ، في شبرا لسه بيتضربوا لغايه دلوقتي ، في اسكندريه اتروقوا واتضربوا من الشعب والجيش والشرطه ، في الصعيد الناس حمت الكنايس واتضربوا !!!! 

وبعدين ؟؟؟؟؟؟؟؟؟؟؟؟؟؟؟؟؟؟ ولا قبلين !!! 

طيب ، كانوا مراهنين ان امريكا تقف معاهم والاتحاد الاوربي ، وماله ، وبعد مايقفوا معاهم يعملوا ايه ، ينقذوهم من ضرب المصريين ليهم ازاي ، وينقذوهم من تنفيذ القانون عليهم وعلي اللي يتمسك منهم ازاي ؟؟؟ مش بس كده لا امريكا قالت انها شافت اسلحه في مظاهرات الاخوان يعني مظاهرات مش سلمية !!! 

طالبان دافعت عنهم !! طظ ، دي نكته اصلا ، ان جماعه ارهابيه مجرمه تدين العنف ضدهم لان طالبان هي ام العنف وابوه كمان !!! مين حيصدقها لما تتكلم اساسا !!! 

تركيا ؟؟ ماخلاص عرفنا ان تركيا بتدافع عنهم يعني مافيش حاجه جديده ، قطر ، ماخلاص عرفنا ان قطر بتمولهم يعني مافيش حاجه جديده ...

كان نفسهم الاسلحه تورط الجيش في ضربهم ويصرخوا الحقونا ، محصلش !!! 

كان نفسهم يقتحموا الاقسام ومديريات الشرطه ويكسروا الذراع الامني لمصر ، محصلش !!!! 

كسبوا ايه هما النهارده ؟؟؟؟؟؟؟؟؟؟؟؟؟؟؟؟؟؟؟ 

ولا ايه حاجه ، اتضربوا من الشعب والجيش والشرطه ، بقوا ارهابيين رسمي بحمل السلاح ، بقوا ارهابيين رسمي برفع اعلام القاعده ، اتقبض علي كلاب كتيره منهم ، اتقتل في الاشتباكات مع الشرطه كتير منهم ، كسبوا ايه ؟؟؟؟؟؟؟؟؟؟؟؟؟؟؟ 

خلوا المصريين يشوفوا حجمهم الطبيعي ، يشوفوا قدراتهم وفشلهم !!! 

بالعكس ، لما شالوا سلاح ، امريكا قالت مظاهرتهم فيها سلاح 

السعوديه والامارات والكويت والاردن ، اعلنوا عن موقفهم المتضامن مع مصر واعتبروا مايحدث شأن داخلي محدش ليه دعوه بيه !!!! 

باختصار ، هما خسروا وكل يوم حيخسروا اكتر 

ومصر ثوره 30 يونيو وقيادتها العظيمه والجيش والشرطه وحورس والشعب بيكسبوا كل يوم اكتر واكتر ....................... طبعا فيه خسائر ، ناس غاليه وشهداء ماتوا ، مباني اتحرقت ، كنائس اتحرقت ، الشعب كله حاله واقف ، لكن دي ااقل خسائر ممكنه في حرب ضروس زي اللي بنخوضها ضد الارهاب ...

النهارده كشفهم علي حقيقتهم ، وفضحهم ، هزمهم للابد !!!! 

اه حيفضل فيه شويه اعمال عنف ، طبعا ، لكن مقدور عليها وحتتلم بسرعه قوي !!! 

مش قلت لكم من الصبح ، افرحوا يامصريين احنا بننتصر وحننتصر !!! 

وقريب قوي بقي علي فكره !!! 

بس انتم اهدوا ، وفكروا بالراحه ، وطولوا بالكم وثقوا في قيادتكم وفي نفسكم اكتر 

والله العظيم احنا انتصرنا عليهم بالضربه القاضيه وقضي الامر....

"" ستيتس كتبه علي حسابي في الفيس بوك في الواحدة صباحا يوم السبت 17 اغسطس 2013 """

احرف مبعثرة وصور في حدقتي !!!

ابحث عن دموعي لااجدها 

في حدقتي احرف مبعثرة

ترسم وجوه وابتسامات وشهداء 

ترسم ابطالا اختبئوا من احضاننا 

لحضن الوطن وارضه الطيبه 

ترسم قلوب خضراء شجاعه 

لم تلوثها الايام بالحزن والجبن 

فقويت تتقدم الصفوف تحمينا 

وماتت سعيده 

وتركت بطاقات تعارف 

باسم الوطن ترجونا نعزيه 

ان رغبنا في تقديم واجب العزاء 

ترجونا نحبه مثلما احبته وماتت 

ابحث عن دموعي لااجدها 

في حدقتي تراكمت قصص وحواديت 

قصه عن عريس مات قبلما يجف اسمه 

علي ورقه الزواج 

فزينت العروسه الشابه مقبرته 

بتاج الماس الذي غرسه بحب 

في جدائلها الطويلة 

حدوته عن ابن وعده امه يشتري لها الخبر ساخن 

وتركها تنتظر حتي اغلقت المخابز 

وهي تدعو له يعود سالما ولو بغير خبز فلم يعود 

قصه عن اب اشتري لابنته الصغيرة عروسة ومات 

وابنته تتنظره لتنام في حضنه 

فاخذ العروسه في حضنه تؤنسه في الجنة 

وترك ابنته تبكي لاتفهم سر غيابه 

حدوته عن لواء رفض يسلم القسم للخونه 

ويبيع شرف رجولته ويذبح وطنه بعار لايقوي عليه 

فذبح راضيا مبتسما 

لان دمه طهر وطنه من خيانه  

كانت تذبح شرفه الف مره كل يوم 

حدوته عن اخ وعد اخته بتذكره سينما 

في فيلم العيد 

وحينما غسلوه وجودوها في جيبه 

ومعها رجاء لاخته 

لاتفوت الفيلم ولاترمي التذكرة 

ابحث عن دموعي لااجدها 

في حدقتي علم مصر بالوانه الثلاث 

وفتيات جميلات يتجملن بالاحمر انوثه وفتنه 

ودم الشهداء يحني كفوفهن 

وعرائس باثواب الزفاف الابيض الناصع 

يحلمن بغد جميل لم يأتي بعد 

ورجال اسود يعيشوا باكفانهم 

ورتبهم العسكرية

ويموتوا فرحين 

يهتفوا باسم الوطن 

يطالبونا الا ننسي اسمائهم 

يوم الفخر العظيم 

يوم النصر العظيم 

ابحث عن دموعي لااجدها 

ربما لان ايام الحزن ولت 

ربما لاننا في معركه سننتصر فيها 

والمنتصرين 

لايعبرون عن فرحهم بالدموع 

نصفي وبقيتي وشريكتي في الروح والوطن !!!

اشاركها اسمي ، وتشاركني اسمها ..

بمعني ادق ، ابي وامي ، اختارا لي نفس الاسم الذي اختاره لها ابيها وامها ..

تشبهني .. واشبهها ..

كل منا مصري قوي ، ملامحنا مصرية ، ربما خليط من جداتنا العظيمات ، حتشبسوت ، نفرتيتي ، كليوباترا ، ربما ملامح اجدادنا العظماء ، مينا ، احمس ، رمسيس ، توت عنخ امون ، اخناتون .... ملامحنا مصرية ، عيون داكنه ربما بني او سوداء تسطع وقت الانفعال ، بشرتنا تشارك حقول القمح سطوعها ودمنا عسل كعصير القصب والاسم اميرة والهوية مصرية ....

تشبهني واشبهها ..

هي اصغر واصبا واكثر شقاوة ، انا اكبر واكثر خبرة ونضج ، لكنا عبرنا السنوات وفارق العمر بالقرب والدفء والانسانية ..

عرفتها من الفيس بوك ..

شابه صغيرة تفيض الحيوية من بروفيلها ، تسافر كثيرا ، لااعرف لماذا ، لكني عرفت بعدما اقتربت منها اكثر وتجاوزنا مرحله الابتسامات المتوجسه تنتظر تعارف اعمق .. مضيفه طيران ، تحملها الطائرات بين السحب والبلاد ، عكسي ، اكره السفر ولا اقوي علي الرحيل كالسنديانه العجوز بجذورها الراسخه في الارض ..

قابلتها لاول مره وسط صخب من الاصدقاء في عيد احدنا ، صرخ احدهم ، مرمر ، التفت انا وهي صوب الصوت العالي وحدقنا في بعضنا وانفجرنا ضاحكين ..

وصرنا اصدقاء ، اصدقاء بحق ، اتابع ماتكتبه ، صورها في بلاد غريبه وقتما ترسو طائرتها ، صورتها مع ابيها ، تذكرني بصورتي مع ابي ، اراها في حضنه ، فاراني في حضن ابي ، احسها تضع الصوره وقتما تشتاق للامان والحنان ، هذه مشاعري وقتما اضع صورتي في حضن ابي ، وقتها اكون خائفه ابحث عن امانا في الحياه لااجده الا في حضن ابي ...

مرمر ، ميرا ، امورة ، اسماء تدليل تشارك ابي وابيها في منحها لنا ، وتشارك فيها الاصدقاء معنا ...

زارتي في منزلي وسط مجموعه من النساء ، كان لقاء صاخب ، بيننا رابط لااعرفه ، ولم افكر فيه ، احبها ببساطه ، وهل عندما يطمئن القلب نبحث عن اسباب منطقيه ، احسها اختي المصرية التي تشبهني ، اخوات في المصرية وابناء وطن واحد منحنا هويته بمنتهي الرحابه والكرم .. 

اه ، نسيت اقول لكم ، انها قبطيه !!! 

لم انسي ، الحقيقه لم اكترث ، لم اري هذا فرق بيننا يستحق الحديث عنه .. 

هي قبطيه وانا مسلمة ، انا مسلمة وهي قبطيه ، لكن كل منا تعبد ربها وتقدسه ، لم اكترث كيف تمارس طقوس حبها للرب وعبادتها له ، ولم تكترث هي كيف اعبد ربي وكيف اقدسه ، فنحن نشعر ان الرب واحد ويحبنا نحن الاثنين رغم ان كل منها تعبده بطريقتها ، لا يهمني الامر ولااكترث به ...

متي اتذكر انها قبطيه واني مسلمه ، اتذكر ذلك ، وقتما تهل علينا الاعياد ، رمضان العيد الصغير العيد الكبير ، اسبوع الالام الجمعه الحزينه سبت النور عيد القيامه ، وقتها نتبادل التهاني والحب ، واتمناها لو كانت جارتي فارسل لها طبق كعك وترسل لي طبق بسكويت وغريبه ... لكنها تسكن بعيدا في الجغرافيا وقريبا من القلب ... 

يوم مات والد احد اصدقائنا ، ارتدينا ملابسنا السوداء وهرعنا نعزيه ، كنت اقرأ الفاتحه وهي تقرأ مالا اعرفه لكن الحزن شرخ قلبينا ، ارتدينا الملابس السوداء ومارسنا طقوس الحداد المصري الذي ورثناه عن اجدادنا الفراعنه عبدة اتون الاله الواحد ، شربنا القهوة وتمتمنا بكلمات المواساة وكتمنا ضحكاتنا وقتما قالت احد المعزيات تعليق ضاحك ، كتمنا الضحك لانه لايليق بنا نضحك في مأتم ابو صديقنا ...

متي قرأت انه لايجوز تهنئه الاقباط بعيدهم ؟؟

قرأت ذلك الكلام التافه مره واثنين ، تعجبت من تلك الكلمات ، تعجبت لاني لابد اهنيء اميره بالعيد ، ولان اميره تهنئني بالعيد ولان احد ليس من حق يشق الحب بيننا باسم الدين او الفتاوي او الرب او الارهاب ، ليس من حقكم تفرقوا بيني وبينها ومايربط بيننا اقوي الف الف الف مليون مره مما يربط بيني وبينكم وبينها وبينكم ، انا وهي في جانب ومعنا كل المصريين وانتم في جانب وهنئت اميره بالعيد فهي اختي في الوطن والمصرية ودماءها كمثل دمائي يجري فيها جينات مينا واحمس ورمسيس ونفرتيي وحتشبسوت وايزيس وحورس واوزريس ، دماءها دمائي ممزوجه بماء النيل وطمي الارض وحضاره الفراعنه وانتصارات المصريين ، دماءها ممزوجه بدمائي سالت علي ارض سينا مره واثنين وثلاث ، مابيننا ليس انشاء ولا كلام اجوف، مابيننا رباط حقيقي ، مصريتنا هي الرابط ، وهل اقوي من هذا رابط !!! 

ماعلينا .......... انا واميرة فروع في شجره عظيمه عمرها سبعه الاف سنه حضارة ، شجره ارتوت من نهر النيل فوهبها الحياة فوهبتنا الحياه بمباركه الله الذي احبنا معا فاحببنا بعضنا ولم نتسائل ولم نتعجب ولم نقف امام انها تعبد ربها بطريقه تختلف عن طريقتي وانها تحتفل بعيد الميلاد وانا احتفل بالمولد النبوي ، واحتفل انا بالعيد الكبير وتحتفل هي بعيد القيامه ، فانا وهي نحتفل بشم النسيم وانا وهي نحتفل بانتصار اكتوبر وانا وهي نحتفل بعيد وفاء النيل ونحتفل بمصر ....

وتباعد الايام بيننا وتقترب .. ونلتقي علي صفحات الفيس بوك ونتبادل التعقيبات والتعليقات والصور والتهاني والضحك والكلمات .. 

ويحكم مصر جماعه ارهابيه ، زوت الانتخابات وزوت وعي جزء كبير من المصريين فتصوروها اقرب لله وان بركه ربي ستحل علي حياتهم وقتما يحكمهم هؤلاء الارهابيين بعدما قدموا نفسهم للمصريين باعتبار " بتوع ربنا " حكم مصر جماعه ارهابيه قالت طظ في مصر التي نحبها ، وقررت تقسم شعبها قسمه جائره وتصورتني من اسراها وتصورت اميره من اعداءها ، وحاصرتنا معا ، كنت اكره تصورهم العبثي اني اقرب لهم من اميره ، فانا واميره بعيدين عنهم كمثل بعد السماء عن جوف الارض ، وانا واميره نقف في جانب واحد ومعنا معظم المصريين ، والجماعه الارهابيه تقف في جانب اخر ومعها بعض المخدوعين ممن تصوروا ان كراهيتهم لاميرة وتحريم تهنئتها بالعيد تقربهم من ربهم ... 

وتزداد الحياه وطئه وثقل ، ويتسلل اليأس لنفوس بعض المصريين يتصوروا ان اختطاف وطنهم صار نهائيا واسرهم صار حتميا والجماعه الارهابيه تحكمت في وطنهم تدمره وهم عاجزين عن انقاذه ، كنت واثقه ان مصر لن تخضع لهم ولا انا ولا اميرة ، كنت واثقه اني واميره سنقاوم هؤلاء الارهابيين حتي يعود لنا الوطن الذي نحبه وكلينا شريك فيه ، كنت واثقه ، لكن في قلبي شوكه تؤرقني ، تخيفني ، هل ساعيش يوم يضيع فيه الوطن للابد ، فابقي انا وتهاجر اميرة ، ونصبح غرباء ، يضيع بيننا الدم والقرابه والنسب والمصاهره والصداقه والتضحيات والوطنية ، هل سيأتي يوم يفلح هؤلاء في تدمير وطننا لحد يفقد احدنا وطنيته علي اساس الدين وطريقته في عباده ربه وحبه !!! 

وتزداد الحياه وطئه ، ويتصور الارهابيين انهم سيفلحوا او اوشكوا ينتصروا ، يزداد فجرهم وفجورهم ويفصحوا اكثر واكثر عن شكل الحياه التي يسعوا لفرضها علي المصريين ، حياه لا تتسع الا لبطاقات الديانه وليس دماء الوطنيه ، ويتجسد كل مشروعهم الاقصائي في مخيلتي في استبعاد اميره من اخوتي ووطني وانتماءنا المشترك واسري وحصاري وسط ذقونهم الشعثه وغلاظتهم وقسوتهم وغياهب الكهوف والماضي السحيق ... 

وكتمت مشاعري بداخلي ومخاوفي وقررت انتفض عليها واتمرد علي مشاعرها السلبية وانسي واتمسك بالامل والتفاؤل والمقاوحه والمقاومه واليقين في الانتصار علي مشروع ارهابي سيهزم بالضرورة ... 

وذات جمعة ، قررت صديقاتي يحتفلن بعيد ميلادي ، قررن من خلف ظهري ترتيب نزهه نيليه لنا معا للاحتفال بعيد ميلادي ، كانت مفاجئة سعيده ابكتني وسط وقت ثقيل يعيشه الوطن بلا امل في السعاده ، وتجمعن كثيرات ، مصريات يربطنا الدم المصري والتاريخ والنيل الذي يسير قاربنا فوق سطحه ، صديقات كثيرات من بينهن اميرة ، هل تصدقوني لو قلت لكم اني يومها لم اري الا اميرة ، كنا نغني ونرقص ، ونتمايل ونضحك ونهتف بمنتهي الحماس يسقط يسقط حكم المرشد ، تحت الكباري وبجوار المراكب العابرة وللماره علي ضفاف النيل ، نهتف يسقط يسقط حكم المرشد ، كلنا نهتف ، اصواتنا متداخله بقوه وحماس ، كنت اميز صوت اميرة وسط الاصوات وكأنه الاعلي ، احدق في وجهها واتسائل باي حق ايها الارهابيين تهددوها في مصريتها وتتصوروا انكم تملكوا الحق تحرموها من وطنها تحت دعاوي وفتاوي تعسفيه ارهابيه خاطئه ، كنت المح ملامحها تشبهنا ونشبهها ، كنت اسمع صوتها مجدولا وسط اصواتنا ، نفس النبرة ونفس النغمه ونفس الحماس ، احدق في وجه اميرة واحس نصفي يهدده الارهابيين ، نصفي او بقيتي ، تلمع الدموع في عيني لاني في مكانها ، لاني اشعر جماعه مارقه ارهابيه تهددني في وطنيتي ، تهددني تسرق مني وطني وتمنحني شتاتا وهجره ن تلمع الدموع في عيني لاني في مكانها وهي جزء مني وبقيتي .... مش حيحصل ، اصرخ وانا المح ابتسامتها ، اصرخ مش حيحصل ، واحس روحي تسللت داخل جسدها وروحها تسللت داخل جسدي ، واشعر بالمرارة التي تشعر بها والقلق الذي يتملكها والغضب الذي يشتعل في قلبها ، لان هؤلاء العائدون من غياهب الكهوف البعيده من الصحراء القاحله يتصوروا انهم يملكوا حقا ليحرموها من وطنيتها ويجردوها من وطنها ويتدخلوا في علاقتها بربها وطريقتها في عبادته وحبه ، اشعر بكل ماتشعر به واصرخ واتمناها تسمعني ، مش حيحصل !!! 

وتزداد الايام وطئه والحياه ثقلا والارهاب جنونا ، ونتمرد ، كلنا نتمرد ، دفاعا عن وطننا الذي نحبه وارضنا التي استشهد اباءنا لتحريرها عن نسيجنا الذي غزلناه بالحب والجهد والتاريخ و............... نرفع اعلام مصر الوطن الجميل في الميادين ونصرخ ارحل ، ارحل ايها الارهاب ، ارحل ، ويسطع وجه اميره في عيني وانا اصرخ ، ويزداد غضبي ، اصرخ لان اميره مصريه حتي لو قررتم بمنتهي الارهاب ان مشروعكم لايتسع لها ، اصرخ ، وطننا لايتسع لمشروعكم ولن يقبله ، اصرخ وانا اتذكر صوت اميره وهي تهتف معنا يسقط يسقط حكم المرشد ، اصرخ واصرخ و............. يصل صوتنا انا واميره و30 مليون مصري يحبوا مصر التي تتسع لهم جميعا ، يصل صوتنا لقلب مصر ، القلب الصلب الذي لم يقبل للمصريين اسرا ولا هزيمه ولا انكسار الروح ولا حرقه القلب ولا القهره ، يصل صوتنا لقلب مصر فينبض باسماءنا ويقسم برحمه شهداءنا وارضنا ونيلنا يدعم رغبتنا وينفذ ارادتنا ويحرر وطننا ويفك اسرنا ويحررنا !!! 

و............ وعاد الوطن الذي لايهددنا ولايهدد وجودنا ، الذي يحبنا كلنا ، الذي يفتح حضنه لنا ويسكن في احضاننا ، عاد الوطن الذي لايميز بيني وبين اميره حسب طريقه كل منا في عباده ربها الحنون الذي بارك مصر وحماها وانقذها باذنه وارادته واراده كل المصريين من الارهابيين المجرمين الذين تصوروا ان من حقهم ان يخرجوا اميره من وطنها ويتركوني يتيمة بغيرها !! وادركت وانا اصرخ ارحل ارحل ، وانا اصرخ يسقط يسقط حكم المرشد ، يسقط يسقط حكم المرشد ، ادركت ان عندي بخلاف المليون سبب الذي يهتف المصريين جميعهم من اجلهم ، عندي سبب اخر وهام جدا ، اني لست مستعده ابدا ان افقد اميرة ، افقد نصفي وبقيتي واختي في الوطن والروح والدم والاسم والمصير المشترك !!! 

ومصر رجعت ياامورة ، اه مصر رجعت !!!

طيب حمد الله علي سلامتها بقي وربنا يديم الفرحه .... 

وجلسنا معا ، نفطر وقت المغرب واجراس الكنائس تدق وصوت الاذان يعلو للسماء ومصر في حضننا وارواحنا فرحه مطمئنه ان احدا لن يفلح يباعد بيننا ، انا واميرة !!!

لم اخبرها يوما بما احس ..
ولم اشاركها ابدا قلقي ...
لاني لم اكن ابدا مستعده افقدها ولا افقد مصر ... 

كي لاننسي ارهابهم ( 3 ) !...

يوم 26 يوليو ، خرج 40 مليون مصري لتفويض القوات المسلحه والشرطه المصريه لمواجهه اي ارهاب محتمل ، وقتها صرخ الارهابيين سيقتلونا ، وصرخ المترددون حرام عليكم ، وصرخ اللي مش اخوان لكن بيحترموهم ده تفويض بالقتل ، وصرخ بعد السياسين ان المعركه لاتحل بالجيش والشرطه بل باللجان الشعبيه من الشعب ليحمي نفسه ، وهمس البعض ، ده حرام !!!! 

الي الجميع ، والي المصريين ، اهدي هذه الصور وقتما اهدر الارهابيين وحلفائهم حياه المصريين واسال دمائهم علي الارض ، اليكم جميعا اهدي بعض عذابات وحزن المصريين طيله السنه السوداء الماضية ومابعدها وحتي الان علي ايدي الارهابيين القتله ........... اليكم جميعا اهدي هذه الصورة كي لا ننسي !!!!

كي لا ننسي ارهابهم ( 2 )

 

يوم 26 يوليو ، خرج 40 مليون مصري لتفويض القوات المسلحه والشرطه المصريه لمواجهه اي ارهاب محتمل ، وقتها صرخ الارهابيين سيقتلونا ، وصرخ المترددون حرام عليكم ، وصرخ اللي مش اخوان لكن بيحترموهم ده تفويض بالقتل ، وصرخ بعد السياسين ان المعركه لاتحل بالجيش والشرطه بل باللجان الشعبيه من الشعب ليحمي نفسه ، وهمس البعض ، ده حرام !!!! 

الي الجميع ، والي المصريين ، اهدي هذه الصور وقتما اهدر الارهابيين وحلفائهم حياه المصريين واسال دمائهم علي الارض ، اليكم جميعا اهدي بعض عذابات وحزن المصريين طيله السنه السوداء الماضية ومابعدها وحتي الان علي ايدي الارهابيين القتله ........... اليكم جميعا اهدي هذه الصورة كي لا ننسي !!!! 

كي لاننسي ارهابهم !!!!

يوم 26 يوليو ، خرج 40 مليون مصري لتفويض القوات المسلحه والشرطه المصريه لمواجهه اي ارهاب محتمل ، وقتها صرخ الارهابيين سيقتلونا ، وصرخ المترددون حرام عليكم ، وصرخ اللي مش اخوان لكن بيحترموهم ده تفويض بالقتل ، وصرخ بعد السياسين ان المعركه لاتحل بالجيش والشرطه بل باللجان الشعبيه من الشعب ليحمي نفسه ، وهمس البعض ، ده حرام !!!! 

الي الجميع ، والي المصريين ، اهدي هذه الصور وقتما اهدر الارهابيين وحلفائهم  حياه المصريين واسال دمائهم علي الارض ، اليكم جميعا اهدي بعض عذابات وحزن المصريين طيله السنه السوداء الماضية ومابعدها وحتي الان علي ايدي الارهابيين القتله ........... اليكم جميعا اهدي هذه الصورة كي لا ننسي !!!! 

13 نص وصورتين وكثير من الحزن والتوتر والغضب !!!!

صحيت النهارده علي تليفون من صديق ، بيصرخ ، قتلوا 120 شخص ، قلت هما مين ، قالي فضوا اعتصام رابعه ، والجزيره بتقول وبتقول وبتقول .......وتسللت اليقظه لرأسي وبدأت انتبه ، اساله اسئله لايعرف اجابتها ، هو ليس اخوان بل ومعادي لهم ، لكن ماتعرضه قناه الجزيره افزعه ، فالدم المصري في الاول وفي الاخر حرام و..................... وبدأت انقب وانبش عن اي معلومات بعيده عن تلك القناه الملعونه الحقيرة التي احتقرها واكرهها و................ وعرفت كل ماحدث ، وجلست امام الفيس بوك ، اكتب الستيتسات الواحد تلو الاخر ، اناقش ماحدث واقول رايي فيه ، والان ، بعد 10 ساعات من الكتابه المتقطعه ، احسست اني ارغب في تجميع كل ماكتبته لانه بينه سياق واحد ولانه يدور حول موضوع واحد ...................

وهاهو ماكتبته .... 

( 1 ) 

""" يامصريين ، ايه جرالنا ايه ، بلدنا بتضيع مننا ، نستني ايه ..... """

مش دي كلمات امال ماهر في اغنيه يامصريين ...

طيب ............. الاغنيه بتصرف بقي ....

""" يامصريين ، ايه جرالنا ايه ، الاخوان بيشوهوا صورتنا ، بنتخض ليه !!! """

انتم كنتم فاكرين انكم حتنزلوا 40 مليون في الشارع تفوضوا الجيش ضد الارهاب ، والارهاب حيسيبكم في حالكم ؟؟؟؟؟؟؟؟ مش حينكد عليكم ؟؟؟؟؟؟؟؟ مش حيحاول يشوه صورتكم ؟؟؟؟؟؟؟؟ مش حيستعدي الغرب عليكم اكتر واكتر ؟؟؟؟؟؟؟؟؟؟؟ 

طيب ................. ال 40 مليون اللي نزلوا امبارح دول ، مش بس خضوا الاخوان ، لا وخضوا الغرب كله كمان ، وادركوا ان مصالحهم ضاعت للابد في هذا البلد ، ومشروعهم الاستعماري اتكسر للابد ، علشان كده هما غضبانين جدا ، فخيبه الاخوان وهزيمتهم مع غضب الغرب وضياع مصالحه اتلاقوا مع بعض ، حيعملوا فينا ايه ، هههههههههههههه ولا اي حاجه ، حيشتموا حبه ويصرخوا حبه ويعيطوا حب !!!! 

علي راي السيسي ، خلوووووووووا بالكم ، احنا لا ليبيا حيضربونا بالناتو ، ولا العراق حيحتلونا بالمارينز ولا سوريه حيعملوا لينا جيش حر ، خلووووووووووووو بالكم ، الملايين بتنزل الشوارع في لحظه بناء علي طلب السيسي وتاكلكم باسنانها ، ودي الرساله اللي وصلت لكل المرسل اليهم امبارح وفهموها كويس واترعبوا عن حق .........

حيشتمونا اه ، حيشوهوا صورتنا اه ، حيعيطوا ويقولوا بيقتولنا اه ، بس هما في الحقيقه اتهزموا واحنا انتصرنا !!! 

يامصريين ، افهموا معني كلامي كويس ، ربنا يخليكم علشان ماتوهوش وتتلخبطوا الله يخليكم

( 2 ) 

جوجل تقول 40 مليون مصري 

ومش معايزين الاخوان يقولوا بيموتونا !!!!!!!!! 

يعني يتحرق دمهم ويتخرسوا !!! 

لا حيقولوا بيموتونا وبيضربونا والسيسي المجرم والحقينا ياماما امريكا !!! 

وماما امريكا ولا حتلحقهم ولا اي حاجه وحتخليها مغروزه في خيبتها التقيله واوباما والتحقيقيات بتاعت الكونجرس !!! 

40 مليون مصري في الشارع بناء علي طلب من السيسي لمحاربه الارهاب ، انتم مستوعبين ده معناه ايه ؟؟؟؟؟؟؟؟؟؟؟؟؟؟ 

اجمدوا وجمدوا قلبكم كده

( 3 ) 

ادي الحقيقه !!! 

اللي عايز يشوف الجزيره بقي ويتلبخط هو حر 

لكن ادي الحقيقه

( 4 ) 

لما ناس تقرر تبلطج علي الدوله والقانون ، مش نظريه اختلاف سياسي 

يقرروا يبلطجوا ويقطعوا طرق ويخطفوا ضباط ويضربوا مدنيين ويعتبروا ان حقهم يبلطجوا علي الدوله والشعب ومش فارق معاهم لاقانون ولا عقاب ، ليه ؟؟ لانهم محميين ببلاد اجنبيه ليها مصالح في بلادنا ومقويه قلبهم ومفهماهم انهم كل مايبلطجوا علي الدوله يبقي اكتر قوه ويتعمل حسابهم ومؤيدين بقناه اخباريه حقيره تقلب الباطل حق والحق باطل وبتطبل وتزمر لهم...

لما يبلطجوا علي الدوله ، ولما تيجي الدوله ترد بلطجتهم لصالح ملايين الشعب ، يعيطوا ويصوتوا ويقولك اباده ويقولك قتل ويقول الحق .................

بصراحه بصراحه يعني ، رغم ان الدم المصري كله غالي ، لكن ......... اللي يجيي يضربني وارد ضربه واقتله ، ابقي براءه ، ليه ، لان فيه حاجه اسمها الدفاع الشرعي ، من حقي ادافع عن نفسي وعن بيتي وعن عرضي وعن اولادي وعن وطني ، ثانيا ، اللي يجيي يضربني ويبلطج علي مايرجعش يقولوا بيضربوني ، انت اللي بتشحت الضرب وانت اللي ابتديت والبادي اظلم !!!! 

انا زعلانه علي الدم المصري ، لكن ضميري مستريح وقلبي كمان !!!! 

ده شغل سياسه قذر ، بيتلاعب بمشاعر الناس وعواطفهم ، مقصود منه ترويع الناس وتخويفها ، علي راي السيسي ياتحرق البلد ياتحكمني !!! ده شغل سياسه قذر ومصالح امريكيه اخوانيه حقيره ، بيدفع ثمنها البسطاء المضحوك عليهم بحياتهم ودمهم ، زعلانه علي الدم ، لكن ضميري مستريح ، ومش حاسيب بلدي تقع في ايد عصابه اخوان وارهاب امريكي بسبب الحزن والتعاطف والدموع ............وعلي فكره انا مش في حاله دفاع انا بافسر بس اللي بيحصل !!! 

ضميري مستريح وقلبي كمان ، والاخوان ليهم الامن يقبض عليهم والارهاب ليه الجيش يردعه ومصر ليها رب يحميها وشعب 

يدافع عنها من امريكا والناتو والاخوان وكل الخونه والعملاء ...

( 5 ) 

واحد جاي يقتلني بسكينه بعدت ايده علي رقبتي وانا باشوح ، طرف سكينته عور ايده ، ابقي انا المعتدي ؟؟وانا المسئول عن دمه ؟؟؟ ايها الخجل اين حمرتك !!!

( 6 ) 

قالك القحبه تلهيك وتخلي اللي فيها فيك !!!! 

وقالك ضربني وبكي وسبقني واشتكي !!! 

وقالك العاهره ست جيرانها لانها لاشرف ولا سمعه تخاف عليهم وتعمل اي حاجه مهما كانت وسخه !!! 

امثال شعبيه مصريه عظيمه !!! 

اللي مش عايز يقرا تاريخ ولا يقرا سياسه ولا ليه تقل عليهم ، يقرا امثال شعبيه طيب!!!

( 7 ) 

للناس الي بتسال فين فيديوهات مجزره المنصه ، احب اقول ، مافيش فيديوهات ، لان عربيات الجزيره المسروقه من التلفزيون المصري ، واقفه في رابعه بعد ماقطعوا الكاوتش بتاعها مابتتحركش ، فماعرفوش يصوروا ويكدبوا ، علشان كده بيصوروا من رابعه ، مره يقولك جثث ومره يقولك مستشفي ميداني ومره يجيبوا شيوخ تقول جهاد وتدعي علي المصريين ومره يقولك الحقنا ياحزب الناتو ...... لازم يركبوا للعربيات المسروقه عجل علشان تعرف تصور بعيد عن رابعه وهما عارفين انهم لو ركبوا ليها عجل وخرجوها من رابعه البوليس المصري حياخدها لان وزيره الاعلام بلغت عن سرقتها ... علشان كده مافيش فيديوهات الا جوه رابعه !!!!

( 8 ) 

لن انزلق لتفاصيل الاكذوبه الكبري المسماة " مجزرة المنصة " !!!! 

لاني اعرف انهم كاذبين مزوررين ، يضللوا الناس لدرجة الفحش !!!!! 

كل اللي بيقولوه مايلزمنيش ولا فارق معايا ...

علي فكره ................................................. هما اللي رخصوا الدم ، وان كنتم نسيتم راجعوا تاريخهم كله ، هم اول من رخص الدم المصري واستخدمه لاغراضه الحقيرة !!!! 

واحنا ياما صوتنا وعيطنا وقلنا الدم المصري كله حرام ، لكن هما اعتبروا دم اتباعهم ودم المصريين رخيص لصالح اغراضهم السياسيه الحقيرة ولصالح مشروعهم ولصالح التنظيم الدولي ولصالح امريكا ، اذا عايزين الناتو يضرب المصريين لصالحهم ويموتوهم لصالحهم ولصالح مشروعهم ، يبقي عايزنا نتعاطف معاهم ازاي؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

( 9 ) 

طيب رغم كل حاجه بقي ، مساء الخير يامصر 

وبصراحه لاني فوضت الجيش والشرطه يتعاملوا مع الارهاب 

انتظر فض اعتصام النهضه واعتصام رابعه وبسرعه لمخالفتهم للقانون .... ليه ؟؟

1- لان الاعتصامين فيهم اسلحه مخبأه من جميع الانواع بيضاء واسلحه ناريه ومولوتوف وغيرهم وجريمه حيازه اسلحه وذخائر جريمه يعاقب عليها القانون 

2- لان الاعتصامين يتعاملا مع الخارج ويحرضوا دول اجنبيه للاعتداء علي مصر بالقوه المسلحه ولان الاعتصامين بينهما اجانب ( سوريين وفلسطنيين وسودانين ) يمارسوا اعمال ارهابيه ضد المصريين وترويعهم والاعتداء عليه ؟؟ ولان جريمه التخابر لصالح دول اجنبيه وتقديم معلومات لدول اجنبيه يعاقب عليها القانون 

3- لان الاعتصامين فيهم تعذيب لمدنين وضرب وخطف من خارج الاعتصام ، سواء شرطه او مدنين عاديين ولان بها اطباء يعذبوا المختطفين ويضربوهم .. لان جريمه تعذيب الموطنين واحتجازهم دون وجه حق قانوني وضربهم ، كلها جرائم يعاقب عليها القانون 

4 - لان الاعتصامين يحرضا اعضاءهما علي الخروج في مسيرات عدائية مسلحه ضد بقيه الشعب ويحرضوهم للاعتداء عليه ويتم تكسير السيارات والمحلات وضرب من يروه مع الجيش ضد مرسي حسب تصورهم ، ولان هذا يتنافي مع السلميه ويشكل جرائم كثيره اتلاف وتدمير المحلات والسيارات وجرائم الضرب والجرح والسب والشتم بخلاف جرائم التحريض علي العنف والقتل والضرب والكسر والتهديدات ..

5- لان المنصات تحرض علي العنف ويختبيء بها العديد من المتهمين المطلوب القبض عليهم بناء علي طلب النائب العام .. بما يشكل جرائم اخفاء مطلوبين للعداله وهاربين من القانون 

6- لان اعتصام مدينه نصر ، يمارس عنف ضد السكان وتخريب للمنطقه والحدائق واعتداء علي حريات السكان وتفتيشهم وترويعهم ، ولان اعتصام مدينه نصر يخبيء داخله سيارات التلفزيون المسروقه التي يلزم ضبطها وتسليمها لاتحاد الاذاعه والتلفزيون وايضا يستخدم تلك السيارات دون وجه حق قانوني .. 

7- لان اعتصام النهضه ، يغلق جامعه القاهره ويتحرش باعضاء تدريسها ويفتش الداخلين والخارجين بلا حق قانوني وبما يشكل اعتداء علي حقوق المواطنين الدستوري في عدم التفتيش الا باذن نيابه ولان ذلك الاعتصام احتل حديقه الاورمان وافسد مزروعاتها وقطع اشجارها النادره ...

نقول كمان ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

( 10 ) 

التحريض علي العنف وارتكاب الجرائم ، يعد اشتراك في الجرائم بالمساعده ، وجريمه الاشتراك في الجريمه زي جريمه الفاعل الاصلي .... يعني اللي يقول اقتلوا اضربوا كسروا اعتدوا علي معسكرات الجيش حنحرق المؤسسات ، والناس تسخن بسبب كلامه وتسمعه ، ويرتكبوا جرائم بناء علي هذا التحريض ، يعتبر هو شريك ففي الجرائم ويعتبروا هم فاعلين اصليين وكلهم ليهم نفس العقوبه ... 

مفهوم ولا نقول كمان ؟؟

( 11 ) 

علي فكره ، علشان ماتكونش ذاكرتكم زي ذاكره السمك ، تنسوا قبل ماتفتكروا !!!ا 

1 - من يوم الاربعاء وكل الخبراء الامنيين بيسربوا معلومات ان يوم الجمعه 17 رمضان ده يوم اسود ، وان الاخوان حيحرقوا فيه البلد وحيحرقوا المحكمه الدستوريه وماسبيروا ومدينه الانتاج الاعلامي وحيحرقوا المولات التجاريه ، وانهم حاطين خطه عنف رهيبه منها حرق الاقسام والاعتداء عليها ومديريات الامن ومعسكرات الجيش ( راجعوا كلام سامح سيف اليزل في اكتر من برنامج يوم التلات والاربعاء ) ...

2 - الاخوان اعلنوا من بدري ان يوم 17 رمضان هو يوم الحسم ويوم الفرقان واليوم اللي حيرجع بعده مرسي للحكم ، وواضح انهم كانوا ناويين علي نيه سوده ومخليين اوربا وامريكا مستنياهم علشان تصقف لهم علي المصيبه اللي حيعملوها 

3 - نداء السيسي للشعب المصري بالنزول للشوارع يوم الجمعه لتفويضه في مقاومه الارهاب المحتمل ، افسد خطه العنف دي افساد شديد ، لان المصريين نزلوا الشوارع وبقي صعب علي الاخوان الارهابيين يحققوا خطه العنف بالطريقه اللي كانوا عايزينها.. 

4- يوم الاتنين والتلات كانت ايام سوده والارهاب تصاعد والاقسام اتحاصرت ( مدينه نصر ، الساحل ، المنصورة ) ومديريه امن المنصورة اتحط فيها قنبله ، واتخطف ضابط مباحث قسم مصر الجديده و2 امناء شرطه واحتجزوا دون وجه حق في اعتصام رابعه واتعذبوا ، وكان واضح ان العنف ده مقدمه ليوم الجمعه .. 

5- ارجع اقول ، ان نزول المصريين الشارع يوم 26 يوليو ، افسد مخطط العنف الاخواني وافشله ، فطبعا ماكنش ممكن اليوم يعدي علي خير ، ولازم يعملوا اي نصيبه علشان يفسدوا احتفال المصريين بنزولهم الشارع ويحاولوا الصاق تهم بالجيش والشرطه انهم حيبيدوا الاخوان طبقا للتفويض اللي اداه الشعب للجيش والشرطه ... 

6- وكان ماكان في المنصة !!! 

------------------------- لما نيجي نتكلم عن احداث المنصه لازم نحط الحدث في سياق كل ماسبقه من احداث علشان نفهمه ، لكن اجتزاءه من كل شيء وفجأ ( اه ياعيني الشرطه ضربتني ) ويطلع علينا اللي بيكرهوا الشرطه ويقولك اهي الشرطه رجعت لعادتها القديمه والجيش حيرجع للي كان ، كل ده ماينفعش ، لازم نتعامل مع الحدث وسط كل ماسبقه ومالحقه ، مع تذكر تصريحات قيادات الاخوان الارهابيين بالعنف والتهديد به ضد كل المصريين باعتبار كل مايحدث ليس الا حلقات من حرب المصريين ضد الارهاب !!! 

ارجوكم تذكروا كل مايحدث وكل ماقيل قبل الحدث وبعده علشان نفهمه كويس ومانلخبطش نفسنا !!! 

نقول كمان ؟؟؟؟؟؟؟؟؟؟؟؟؟؟؟؟؟؟؟؟؟؟؟؟

( 12 ) 

ااقول كلمتين لاني مخنوقه بجد ...

لما تبطلوا تقولوا امريكا بتقول ايه ، واوربا رايها ايه 

لما تبطلوا تقولوا امريكا بتذيع عنا ايه ، واوربا بتنشر عنا ايه 

لما تركزوا في مصر وتنسوا اي حاجه غير مصر ، تبقوا بجد اتحررتم من جواكم !!! 

المهم نبني مصر ازاي 

ونتحرك للمستقبل ازاي 

ونحالف مين ونخاصم مين علي اساس الاحترام المتبادل والمصالح المشتركه 

ده المهم ، مصر ، مش راي امريكا ولا كلام خارجيتها ولا معونتها 

تحرروا ايها المصريين من داخلكم بجد 

تحرروا واخلعوا الاستعمار وعقده الخواجه من جواكم بجد 

ساعتها هما اللي حيجروا ورانا لان ليهم مصالح عندنا زي مااحنا لينا مصالح عندهم!!! 

غير كده حنفضل عبيد ، ونفضل تابعين ، ويفضلوا يتحكموا فينا وفي مصيرنا !!!!

تحرروا ايها المصريين ، ربنا يخليكم ، انتم ابهرتم العالم كله بكل اللي بتعملوه ، افخروا بنفسكم وانسوهم من فضلكم 

وبالمناسبه محدش يقدر يضربنا ولا يقرب منا لا حلف الناتو ولا امريكا ولا اوربا ... 

ولاحد يستجري !!!! 

تحرروا من جواكم بجد ، بجد ، بجد....

( 13 )

عايزه اقول كلمتين والنبي لانهم كابسين علي قلبي ....

الشرطه حتدفع ثمن غالي الفتره الجايه من ابناءها شهداء وقتلي ومصابين ... ليه 

لانكم بتدافعوا عن الارهابيين وهما بيهددوا بالسلاح وبتشتموهم لما يهددوكم شخصيا ولما تيجي الشرطه تتدخل ، تصرخوا الحق الشرطه بتقتل الحق الشرطه بتموت ، خليتم ايديهم مهزوزه ، لايبادروا بالتعامل مع الارهابيين لان في راسهم صراخهم وخوفكم ، فالارهابيين بيموتوهم ويضربوهم بالرصاص !!!! 

ياساده ، اعقلوا ربنا يكرمكم ، اعقلوا وفكروا بجد ...

مجرم ، ارهابي ماسك سلاح ، وبيهدد بيه ، اعمل له ايه ، اقوله هات يابابا السلاح من ايديك ، طيب تفتكر هو حيديه ليا ، ولا تفتكر انه حيستاني لما اكلمه ولما يرد علي ولا حيضربني علي طول !!! 

فكروا بجد ، من غير نظريات ولا فلسفه ولا تنظير !!!! 

ارهابي معاه سلاح ، ماتقوليش مااستخدموش ، امال هو جايبه ليه ، علشان يتصور بيه ؟؟؟؟؟

الشرطه مفروض ماتضربش رصاص علي مدنيين عزل ، لكن لو المدنيين العزل تحدفني بطوبه تخزق عيني ، ولا تكسر جمجمتي ، اعمل ايه ، احدفه بالطوب ، بتتريقوا علي الشرطه وتقولوا هاهاها لابتحدف بالطوب ، طيب بلاش طوب ، اعمل ايه ؟؟؟؟ طيب ، المدنيين العزل يحدفوني بمولوتوف ، يحرق هدومي ووشي وجسمي ، مطلوب اعمل ايه ، هات يابابا المولوتوف عيب ماتلعبش بالنار !!! 

انتم عايزين ايه بالضبط 

عايزين الشرطه وضباطها وعساكرها الغلابه يقعدوا يموتوا في مواجهات مسلحه علشان ضميركم النقي الطاهر يستريح ، ولا عايزين الشرطه تقفل الدكان وتروح وتسيب الارهابيين يتسلوا عليكم والحراميه يطلعوا بيوتكم يسرقوكم ، عايزين ايه ؟؟؟؟؟؟؟؟؟؟؟؟؟؟؟؟؟؟؟؟

كل ضابط شرطه معاه طبنجه بيموت ، لان تردد يستخدمها ، ولان الوزير قاله ماتضربش بيها ، بصراحه بيحرق قلبي ، باحس اني السبب انه اتقتل من الارهابيين لاني مادفعتش عن حقه انه يستخدم سلاحه اللي شغله صرفه له للتعامل مع الارهابيين والمجرمين والقتله !!!! 

عايزين ايه بجد ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

صورة النقيب شريف السباعى فى مستشفى الشرطة بعد إصابته بطلق نارى فى الرأس أثناء التصدى لأنصار الرئيس المعزول محمد مرسى ومحاولته منعهم من قطع طريق كوبرى اكتوبر