09 فبراير 2012

محدش علي راسه ريشة !!!!!




( الساعه 25 )
9 فبراير 2012 



سافرت لاوربا علي مصر الطيران !!!!!!!!
اول مره من سنين اركب الشركه الوطنيه !!!!!! 
قلت لا مش حادي الخواجات فلوسي ، شركتنا الوطنيه اولي !!! 
واللي يحب مصر مايخربش مصر ، واللي يحب مصر يدي فلوسه لمصر ، واللي يحب مصر يدعم اقتصاد مصر وشركتنا اولي وحجا اولي بلحم توره و......... حاركب طيارات شركتنا الوطنيه !!! 
وبدأت الرحلة ....
علي باب الطياره قابلني مصريين مضيفين ومضيفات ، شبهنا بالضبط ، راجل خمري بعيون كحيله وبنات قمرات زي الشربات ، وكبيره المضيفيات ، مصريه سمرا " تخينه " زيي وزي ابله لولو وزي حضراتكم " للستات " وزي زوجات حضراتكم " للرجاله " مصريه سمرا اصيله اصيله يعني وعلي وشها ابتسامه مليانه دفا ...
طبعا المضيفين والمضيفات دول مش زي مضيفين الشركات الخواجاتي ، لااجسامهم غصن بان ولا شعرهم اصفر ولا عينيهم زرقا ، ناس من الركاب بصت للمضيفين بقرف ، ال ايه مش عاجبهم شكلهم ، ياي ياي تخان ومكعبرين ، ياي ياي سمر وبشعر اسود ، بصيت للساده القرفانين باستغراب ، هما  ُسمر زي المضيفين وشعرهم اسود من قرون الخروب ، يعني عادي دود المش منه فيه ، كلنا شبه بعض ، لكن الساده القرفانين مابيبصوش في المرايه علي نفسهم واتشطروا علي المضيفين والمضيفات بتوع مصر للطيران ، ال ايه مش عاجبنهم !!! ماعلينا !!! 
وبدأت الرحلة ............ كابتن الطيارة فتح المايك وحيانا ، و......... كلام كتير معناه اهلا بيكم وتوصلوا بالسلامه ووقت الرحله ومش عارف ايه ... والله يسلمك ياكابتن ، قلت في سري .. وبعدها قلب الكلام انجليزي يامرسي ، والراجل برابنت وهاتك ياكلام وهاتك ياتحيه وهاتك ياشرح للطريق والوقت والساعه ودرجه الحراره ، فجأ ، لمحت علي وش ست قاعده جنبي ، لمحت علي وشها تعبيرات قرف ، فيه حاجه مش عاجبها وحسيت انها شامه " ....." حاجه ريحتها مش حلوة ، قررت اركز افهم هي قرفانه ليه ، ركزت في كلام الكابتن علشان افهم  سر قرف " الوليه القرفانه اللي قاعده جنبي " والحقيقه تركيزي ماطالش ، لانها بسرعه ضحكت ضحكه ساخره اول مالكابتن قال كلمه انجليزي مش فاكرها ، قالها بال ( B ) بدل مايقولها بال ( p ) ... ااااااااااااااه ، فهمت ، المدام اللي عاوجه بوزها وقرفانه ، زعلانه من الكابتن بتاع الطياره لانه مابيعرفش ينطق ( P ) زي الانجليز والامريكان المتحضرين وبينطقها ( B ) زي المصريين البيئة !!!! 
ربطنا الاحزمه وقلنا دعاء السفر و.............الكابتن جري بالطيارة بسرعه بسرعه بسرعه اسرع اسرع و..........بقينا في الهوا ، عمل اقلاع نموذجي عظيم ، شطور الكابتن ده ، لكن ده ماشفعش له عند الوليه القرفانه ، يبقي طيار شاطر مش مهم ، المهم ينطق ال P صح وماينطقهاش B  زي الناس الجاهله البيئة !!! والطيارة طايرة والاكل نزل والمضيفات عماله تجري وتخدم الركاب وتبتسم والمضيفين بيوزعوا كروت مصلحه الجوازات وبعدين بيعرضوا علي الركاب البرفانات والسجاير المعفاه من الجمارك واخر نشاط وحلاوة ومبتسمين وبيبذلوا مجهود ....
قررت انام ، لكن انام مين ، راسي اشتغلت ، كل شويه ابص للوليه القرفانه اللي قاعده جنبي ، عايزه اخش راسها ، نفسي اسالها ، مالك ياولية قرفانه ليه ، المضيفين والمضيفات بيبذلوا جهد رهيب وماخلوش علي راي المثل فوق الجهد جهد ، والكابتن الطيار شايلنا وبيجري وسط السحاب والرحله بديعه ولا هبدنا في مطب هوا ولا وقع الطياره ، مالك قرفانه ليه ؟؟؟؟؟؟؟؟ 
وطار النوم ، وراسي هاتك ياتقليب !!!! 
قبل مااقول لكم اخر ماوصلت له راسي وهي متعلقه بين ايدين الكابتن ورحمه ربنا فوق السحاب ، حاحكي لكم حكايه تانيه ، لا حاحكي حكايتين الاول ...
الحكايه الاولي - زماااااااااااااان 1990 ، اتصلت بي صديقه تعمل في منظمه نسوية ، وقالت لي ، فيه وفد ستات هنود بيعملوا دراسات عن الاحوال الشخصيه وعايزين يقابلوكي يعملوا معاكي مناقشه عن قوانين الاحوال الشخصيه المصرية ، تحمست طبعا وقلت اهلا وسهلا ، وبعد مالميعاد اتحدد ، اكتشفت انهم طبعا حيتكلموا انجليزي يامرسي واني حاحتاس يامرسي حوسه التايه في المولد ، حاحتاس لاني مش حاعرف اشرح قوانين الاحوال الشخصيه بالانجليزي اللي اعرف بالكتير اصبح عليهم بيه ، المهم ، نزلت اشتريت قاموسين عربي انجليزي انجليزي عربي خاصين بالقوانين ، ولما جت الستات الهنود ، اعتذرت بانجليزيه ركيكه مليانه غلطات في النحو والصرف اني مش حاعرف اشرح لهم القوانين بالانجليزي بتاع بلاده ، واني يادوبك حافك الخط ولما حاحتاس في كلمه حافتح القاموس ، الستات الهنود ابتسموا ابتسامه مؤدبه وشكروني علي المجهود اللي ببذله علشان اشرح لهم القوانين ، طبعا اكيد كان كلامي زباله وال" جرامر " زبالتين والجمله متركبه بطريقه تضحك ، لكن من خلال كل ده فهموا القوانين المصريه للاحوال الشخصيه ، فهموها وشكروني علي المجهود ، وبعد مقابلتين تلاته اربعه ، وفي يوم اللقاء الاخير ، واحنا بنودع بعض ، كررت اعتذاري عن الانجليزي الرديء، فردت اصغرهم وكانت بنوته متمرده وشقيه وشكلها مقاوحه ، ردت علي بمنتهي الجديه وقالت ، انت بتتكلمي انجليزي مكسر لكن مسز تاتشر لاتنطق العربيه ، انت اشطر منها !!! وباستني ومشيت !!!! 
الحكايه التانيه - من ثلاث ايام فقط ، واثناء وجودي في سويسرا ، قابلت سيده ايرلنديه مسلمه محجبه ، متزوجه من مصر صديق لاصدقائي في سويسرا ، كانت سيده لطيفه جميله وبتتكلم عربي مكسر " علي الاخر " لكن كنا بنفهم هي بتقول ايه ، كلنا كنا مبسوطين من كلامها العربي المكسر ، محدش قرف منها  وهي بتتكلم عربي من غير ( ح ) ومن غير ( ع ) ومن غير ( هـ ) ، بالعكس ، كنا مبسوطين من كلامها ومن اصراراها الدؤوب علي الكلام بالعربي ، وحتي لما تقول حاجه محناش فاهمينها ، نقول لها بتقولي ايه ، تقول تاني وتالت وفي الاخر نفهم وهاتك ياضحك كلنا من كتر السعاده ، ولما كانت تقول للراجل ( انتي ) وتقول للست ( انت ) كان الراجل يرد عليها ومايحسش انها بتهين ذكورته ولا الست تحس انها طلعت ليها شنب ، لا عادي وعادي جدا كمان !!!! ويوم بعد العشا ، لقيناها فجأ صرخت من الفرح ( اللللللللله بلااااااا شااااااا ) مافهمناش هي فرحانه ليه ، قالت تاني ( بلا شا ) ، ( بلا شا ) برضه مافهمناش ، شاورت بايديها علي مكان في اخر الترابيزه بتاعت العشا ، بصينا وفهمنا وضحكنا ، صديقتنا كان قصدها ( بلح الشام ) لكن لا قالت ال ( ح ) بتاعت البلح ولا قالت ( م ) بتاعت الشام !!!! 
هل ياتري حد من الناس قرف من طريقتها في الكلام ، او قال انها بيئه ، او قال انها غلطانه ، ابدا ، كلنا احترمنا اصرارها وهي بتتكلم وانها بذلت مجهود علشان تعرف تتكلم عربي ، احترمنا مجهودها لانها فهمت العربي ومعانيه وبتحاول تتكلم ، طبعا لسانها معووج ، لكن مش ذنبها ان لسانها معووج ، لا ، هي رغم لسانها المعووج اللي مابيعرفش ينطق ال( ح ) و ( هــ ) و ( ع ) بتحاول بجد تتكلم عربي وتحاول تعبر عن افكارها وعن نفسها وافلحت ونجحت وتستحق كل التحية !!!!! 
نرجع بقي للولية القرفانه اللي كانت قاعده جنبي .... الولية دي ، هي مش وليه طبعا بالمعني الدارج ، هي مدام الا فرنكه غالبا خريجه مدرسه انجليزي يامرسي وغالبا متريشه هي واهلها ، وغالبا مولوده في بقها او بق ابوها معلقه دهب ، المدام دي اتعلمت في مدرسه انجليزي ، واللي درس لها مدرسين خواجات بيعرفوا بسهوله ينطقوا ال ( p ) وعارفين الفرق بينها وبين ال ( b ) ...
وقلم يعني ( pen ) وكتاب يعني ( book ) واللي في المدرسه الانجليزي يقول ( ben ) يضحكوا عليه واللي يقول ( pook ) يضحكوا عليه ويتريقوا عليه ... علشان كده طلعت المدام متعلمه صح وعارفه الفرق بين الاتنين ، اتعلمت صح وبسهوله وبقت بتنطق ولا خواجات اكسفورد ستريت !!!! 
احنا بقي ، احنا ، انا ومعظم حضراتكم والكابتن والمضيفه وبقيه الشعب المصري اللي حظه حلو وفلت من مقصله الاميه والتسرب من التعليم ، احنا كلنا اتعلمنا في مدرسه الاورمان الثانويه والناصريه الاعداديه وام المؤمنين وسيد الشهدا ، مدارس حكومه عربي والانجليزي ماده رخمه مااحناش فاهمينها ، والتيتشر بتاع الانجليزي بيحاول معانا واحنا بنحاول معاه ، وبنحفظ الكلمات ومعانيها ووبنحل التمرينات وبنكتب ( الكومبوزيشن ) و( الكومبريهينشن ) و ( الديكتيشن ) ... التيتشر مموت نفسه معانا واحنا مموتين نفسنا معاه وكلنا بنحاول ، والراجل التيتشر او الست التيتشرايه بيبذلوا مجهود معانا واحنا بنبذل مجهود معاهم علشان نخلص منهج الوزاره ونحفظ معاني ال1000 كلمه و( الاسبلنج ) بتاعهم ، طبعا وسط المحرقه دي ، لا التيتشر ولا التيتشرايه فارق معاهم الفرق بين ( b ) و ( p ) ولا الفرق بينهم ، دي اتفه حاجه في الموضوع ولاتفرق خالص وسط المصايب اللي هما فيها ، المهم تحفظوا وتعرفوا تحلوا في الامتحان وتتنيلوا علي عينكم وتنجحوا و............. قد كان ونجحنا واتخرجنا من المدرسه ووراها الجامعه وبننجح ونجيب نمر وتقديرات عاليه واتخرجنا واشتغلنا وفضلنا نقول علي ال ( p ) ، ( b ) والعكس بالعكس وعادي يعني مافيش مشكله !!!!! 
طبعا ، لما نتسحب من لسانا وننطق قدام ناس من اللي متعلمين بجد وبفلوس كتيره قوي لما ننطق قدامهم ونلخبط بين ( p ) و( b ) يبتسموا باسي وسخريه مكتومه لو كانوا مؤدبين قوي ، او يضحكوا بصفاقه لو كانوا " تنكين ومتعجرفين وقللات ادب " يضحكوا علينا ويسخروا منا ، ليه ان شاءالله ، لاننا غلطنا في البخاري ، لاننا لخبطنا الانجليزي المحترم بتاع الانجليز المحترمين اللي فرقوا بين الناس اللي تستحق الاحترام اللي تميز بين ( P ) و ( b ) وبين الناس اللي تستحق الضحك عليهم لانهم جهله مابيعرفوش يميزوا وهما بيتكلموا بين ( P ) و( b ) .......... 
طيب لما الانجليز شخصيا او الخواجات عموما ، يتكلموا عربي مكسر ويلغوا كل الحروف ( ح ) ، ( ع ) ، ( هـ ) ليه مابنتريقش عليهم ومابنتمسخرش عليهم ومابنعتبرهمش يستحقوا الضحك والسخريه ، لان العربي بتاعنا مش معيار الاحترام ولايفرق مين بينطقه ازاي ، لكن الانجليزي بتاعهم معيار الاحترام ومعيار الناس المحترمه !!!!!!! 
طيب ماتيجوا بقي نخرج من الصندوق !!! 
نخرج من الصندوق اللي حبسونا فيه !!!!
نقلع افكارهم من راسنا !!!!
ماتيجوا بقي نتحرر من احتلالهم لراسنا !!!
ونعتبر الانجليزي مجرد لغه زي العربي بالضبط !!!
ونقول ان العربي اللي بيتكلم انجليزي مكسر زيه زي الانجليزي اللي بيتكلم عربي مكسر بالضبط !!!
الاتنين يستحقوا الاحترام لانهم بذلوا مجهود علشان يتعلموا لغه تانيه جنب لغتهم الاصلية !!!! 
وبس كده !!!! 
والطيار بتاع شركتنا الوطنيه اللي بيتكلم انجليزي مع اللخبطه في ( p ) و ( b ) اكيد اشطر في اللغات من الطيار الالماني او الانجليزي اللي مابيعرفش ينطق ولا كلمه عربي لا مكسر ولا صحيح ، لان طيارنا ، بجانب شطارته في قياده الطياره والوصول بينا لبر الامان ، كمان بذل مجهود كبير علشان ينطق بالانجليزي يامرسي ويحيي الخواجات بلغتهم ، هو اشطر من الطيار الالماني ولا الانجليزي ولا الامريكاني اللي ماحاولش يتعلم لغتنا ولا يحيينا بيها ، اما لانه شايفنا لانستحق التحيه اساسا او شايف انه مش مضطر يتعلم اي لغه بجوار لغته العظيمه اللي علي العالم كله يتعلمها ويتكلم بيها ، وان كان عاجبكم !!!! 
احنا شعوب بتبذل مجهود كبير علشان تعجب محتليها وغازيها وتخضع لقواعدهم وافكارهم !!!! ورغم هذا لانعجبهم !!! 
وطار النوم طول الرحله وانا عماله افكر وابص للوليه القرفانه اللي قاعده جنبي ، ابص لها وهي بتابع المضيف وهو بيعرض البرفانات والسجاير للبيع ، واحده تساله بكام البرفان دي ، يفتح كشف في ايده علشان يعرف سعر البرفان ، سلوكه مش عاجب الوليه القرفانه ، عايزاهي بقي حافظ اسعار كل البرفانات وحافظ اساميهم وماركاتهم ، الراجل بجد بيبذل مجهود ويدور في الكشف ويوصل للمعلومه اللي عايزها ويقولها للراكبه بابتسامه لطيفه ودوده ، لكن الوليه القرفانه مش عاجبها ، يمكن لانه اسمر وشعره اسود ، يمكن لان كارفتته مش " سينيه " يمكن لانه مصري وهي اتعلمت في مدرستها الانجليزي ان الخواجه احسن من المصري والشعر الاصفر اجمل من الاسود والعيون الزرقا اجمل من السوده وان الاحتلال الانجليزي احسن لمصر من الاستقلال والسياده المصرية !!!! 
و................. ليدز اند مين ............يخرج صوت الطيار هادئا ينبه الركاب ان الطائرة علي وشك الهبوط في مطار القاهره الدولي و.......................... من غير مانحس نلاقي الطياره علي الارض ، و""لاندنج"" هايل ياكابتن وبرافوا عليك وعلي شطارتك !!!! 
وياسواق ياشاطر ودينا القناطر ، ياسواق ياشاطر ودينا القناطر .....
" ملحوظة فكرت فيها .... كان مفروض علي شركتنا الوطنيه وهي بتختار الطيارين تكون متأكده انهم مش بس بيفهموا في الطيران لا كمان بيعرفوا يتكلموا انجليزي زي بتاع بلاده ، لان صوته واجهه لينا وللوطن ولازم يكون واجهه مشرفه ويعرف يرطن زي الخواجات بالضبط !!!!! ولا مفروض ولا حاجه !!!! ماهو كل الطيارين في كل الشركات الاجنبيه مابيتكلموش عربي ، ولا فارق مع شركاتهم وقت مااختارتهم انهم يكونوا بيعرفوا يتكلموا عربي ، بيختاروهم شاطرين في الطيران مش في العربي !!! واحنا كمان بنختار طيارينا شاطرين في الطيران مش في الانجليزي !!!! واذا كان مطلوب من طيارينا يتكلموا انجليزي مطلوب من طيارينهم يتكلموا عربي ومحدش احسن من حد ومحدش علي راسه ريشه !!!!! ... خلاص ملحوظتي خلصت !!!!""""
اخرجوا من الصندوق ربنا يرضي عنكم علشان نعرف نشوف نفسنا كويس بعينينا احنا مش بالعينين الزرقا للخواجه ابو وش احمر!! 
وبجد بجد صدقوا ان محدش علي راسه ريشه !!!! 
الريشة كانت علي راس الهنود الحمر اللي ابادوهم وهما بيبنوا حضارتهم العظيمه والنظام العالمي الجديد !!!! 
اوعوا تنسوا ان " الريشة " كانت علي راس الهنود الحمر ، الله يرحمهم ويرحمنا !!!!!


( اديني من وقتك ساعه - 25 ) 


هناك 12 تعليقًا:

ريحانة يقول...

زمار الحى لا يطرب

غير معرف يقول...

مجدي السباعي
طيب ماتيجوا بقي نخرج من الصندوق !!!
نخرج من الصندوق اللي حبسونا فيه !!!!
نقلع افكارهم من راسنا !!!!
ماتيجوا بقي نتحرر من احتلالهم لراسنا !!!
ونعتبر الانجليزي مجرد لغه زي العربي بالضبط !
احنا شعوب بتبذل مجهود كبير علشان تعجب محتليها وغازيها وتخضع لقواعدهم وافكارهم !!!! ورغم هذا لانعجبهم !!! !!

اخرجوا من الصندوق ربنا يرضي عنكم علشان نعرف نشوف نفسنا كويس بعينينا احنا مش بالعينين الزرقا للخواجه ابو وش احمر!!
وبجد بجد صدقوا ان محدش علي راسه ريشه !!!!
الريشة كانت علي راس الهنود الحمر اللي ابادوهم وهما بيبنوا حضارتهم العظيمه والنظام العالمي الجديد !!!!
اوعوا تنسوا ان " الريشة " كانت علي راس الهنود الحمر ، الله يرحمهم ويرحمنا !!!!!

صدقتي يا اميره في كثير من اللقاءات مع اجانب محترمين كانوا يقولون ""نحن نحسدك انت تتكلم لغتنا ونحن لانتكلمها ""
هكذا كانوا يخططون لالغاء اللغه العريه ونجحوا الي حد كبير في المغرب العربي
لكنهم بعون الله لن ينجحوا لدينا مهما ان كان لدينا مثل السيده التي كانت بجوارك
ابداااااا لن نضع الريشه علي رؤوسنا ..حتي لو احبها البعض

يا مراكبي يقول...

احنا شعوب بتبذل مجهود كبير علشان تعجب محتليها وغازيها وتخضع لقواعدهم وافكارهم !!!! ورغم هذا لانعجبهم

هي دي الخُلاصة بجد

شوفي ده كمان كده .. نفس الشعور بالظبط

http://yamarakby.blogspot.com/2011/10/blog-post.html

مها جمال يقول...

هههههه طبعا الولية دى ماكانش لازم ابدا تركب عالخطوط دى يالا ماعلينا
يس انا ك تيتشراية بيفرق معايا نطق p >b وكنت باعلم البنات فى اولى اعدادى بالورقة ازاى ينطقوها لما احطها بين شفايفى ويشوفوا تأثير الهوا الخارج فى نطق الحرفين على حركة الورقة وكمان نطق thلما يتنطقوا ث او ذ بتفرق طبعا
هى مش فكرة صناديق بقدر ماهى فكرة تعلم لغة نقدر ننطقها صح واحنا عندنا القدرة على دة والمضيف مااجرمش لما اخطا فى نطق الحرف بس فى ناس بتلكك وانا باعز اللغة العربية رغم انى اتعلمت فى مدارس راهبات ودخلت قسم انجليزى فى الكلية لكن اللغة العربية لايعلى عليها وكل واحد بقى بيعتز بلغته واحنا اللى عندنا عقدة الخواجة من زمان اى حاجة محلية سيئة مش من ناحية اللغة بس
النوت عسل حمدالله على سلامتك يامرمر

قوس قزح يقول...

يا اميرة القصة اكبر من طيار و لغة منطوقة غلط .. القصة عقدة الخواجة فى كل حاجة .. بداية من معاملة الخواجة اى كانت جنسيته حتى لو عربى بطريقة مختلفة عن المصريين .. لحد اشترى الصينى ابو درجة98 لانه مهما كان اسمه مستورد
احنا ناقصنا ثقة فى نفسنا .. ناقصنا نعمل اى شىء فالدنيا كويس علشان نفسنا مش علشان نتشبه بحد تانى
و على فكرة .. انا متأكدة ان الست القرفانة دى لو حد اجنبى شتم فى الطيران المصرى هتلاقيها ترد وتقول ان الطيار كان اشطر من اى طيار شاطر .. ماهو احنا كده.. نجلد نفسنا بس منسيبش حد يجلد فينا :))

انا بس عندى نقطة احب اوضحها بخصوص تخن المضيفة.. الشرط ده مطلوب مش علشان تبقى هى مانيكان .. بالعكس ده شرط اساسى علشان تكون حركاتها سهلة و هى بتمشى بالترولى بتاع الاكل بين الكراسى بدون ما تخبط حد

رحلة سعيدة بنتايج حقيقية اتمنى انها تتحقق :)

قلم جاف يقول...

عقدة الرجل الأبيض في الأفكار والمزيكا والسينما في كل حاجة ، طالما ما حطيناش في دماغنا نخلص منها يبقى نستاهل..

قلم جاف يقول...

عقدة الرجل الأبيض ورانا ورانا ، في الأفكار ووسائل التعبير وحتى في المزيكا والأغاني.. ومش حنخلص منها ما دام مش حاطين في دماغنا نخلص منها ، وإلا فاحنا بنشتغل نفسنا

(احمد سكر ) يقول...

مممم..عارفا يا اميره الطياره الواحده بياكل منها عيش جيش جرار بيشتغل فيها وعليها وان اللى شفتيهم جزء بسيط جدا جدا من اجزاااء كتير بتقوم على صناعتها
الطياره الواحده بيقبض من وراها اكتر من 500 واحد وواحده ..ايوا الرقم حقيقى ..احنا عندنا 80 طياره تقريبا
واللى بيشتغلو فى الشركات التابعه للشركه القابضه اكتر من 35 الف موظف ..ناس كتير عندها عقدة الخواجه ..وبتفضل تركب طيارات اجنبيه ..علشان حجات موروثه انتهت من زمان منها الوقت والتاخير ..اللى انتهى تماما بانضمامنا لتحالف ستار العالمى ..اللى طبعا من اهم شروطه المواااعيد ...
جاه علينا الوقت اللى لازم فيه نلتف حول ما هو كل مصرى ..حتى لو ردىء بعض الشىء ..لو الكوالتى تعبان بعض الشىء ..صدقينى هيكون حالنا افضل كتيرررر ...
اسمحيلى ابعت تدوينتك دى لرئيس مجلس الاداره ....اظنه هيسعد بيها جدا جدا .
لاننا فى وقت فعلااا محتااجين فيه نشد من ار بعض
ســــــــــــــــكر

candy يقول...

ماكنتيش هاتكتبى رؤية زى دى لو ماكنتيش منتصرة من جواكى على عقدة الخواجة :))

تحياتى ليكى واسمحيلى شريتها :)

candy يقول...

ماكنتيش هاتكتبى رؤية زى دى لو ماكنتيش منتصرة من جواكى على عقدة الخواجة :))

تحياتى ليكى واسمحيلى شريتها :)

manoola يقول...

أميره

طب اعمل فيكي ايه؟؟؟
بعد كل الاحاسيس التي تصارعت في اعماقي بعد "ابتسامة زيوس ودموع سعاد"
قلت نشوف حاجة خفيفة كده ترفع معنوياتي.. والعنوان جرجرني وراه
من غير لا إحم ولا دستور
سطرين وبعدها سطرين اتطمنت
وقلت كملي وما تخافيش
لقيتك دخلتي كالعادة في الغريق
طب اعمل فيكي ايه
بصراحة كلامك صح
وبصراحة انا واحده من عينة جارة كرسي الطائره
يمكن بسبب دراستي للغة الانجليزية وآدابها
ويمكن برضه لاني ما اعرفش غير انطق الحروف زي ما هي في بلادها
لكن برضه كلامك صح
يعني مين فيهم بيعرف يتكلم لغتنا
ومين فيهم يعرف حروف كلماتنا
طب اشمعني ما نزعلش منهم ونتريق على نفسنا؟
بصراحة تفاهة عقل من اللي بيعمل زي حالي
وبالنسبة للكلبظة
كلنا في الهم شرق.... وأوعي تضحكي
بس ادينا بنحاول نلم الامور شويه
انا عني بقالي 6 سنين بنفع بلدي
وافرح بالطيار وهو بيهبط زي الريشه على ارض المدرج
وبقيت عارفة اللي متعلم الطيران بالطريقة الانجليزي من الامريكاني من الاقلاع والهبوط.. لانه بيختف حسب المدرج في قياس زاوية الاقلاع والهبوط...
وبصراحة... وبكل صراحة
مافيش زي الطيار المصري
تقولي بقا انحياز.. تقولي بقا تفرقة عنصريه...اهو ده اللي عندي واللي مش عاجبه براحته
بس خلاص اوعدك
كل ما يحصل ويغلط حد في نطق
حرف p او حرف b
اني ها افتكر برضه اننا احسن من اي واحد ببرنيطة ما يعرفش لغوتنا

جميلة والله يا أميره

منال أبوزيد

Fadia Samaan يقول...

يا حبيبي شوف المشكلة انه نحنا مو عارفينا موقعنا بين هاالمجتمعات اللي عايشين معها ... هي اول مشكلة الثانية انه مش عايشين بالواقع الحالي وانما عايشين بالماضي يعني نحنا اللي اخترعنا الحرف ونحنا للي اخترعنا الطب والهندسة والكيميا والادب وخلافه والمشكلة الثالثة نستغرب انه ما حدا فاهم علينا ..... لك يااحبائي فيقوا بقا انتو مانكن من اهل الكهف صار لازم تفيقوا وتعرفوا موقعكم بالهالعالم اذا بدنا نكون متفائلين خلينا نقول اننا على الدرجة الاولى من السلم مع الاخذ بعين الاعتبار انه لسه في تحتنا شي درجة او درجتين .. بس عرفنا وين نحنا رح نقدر نطلع السلم درجة درجة وعلى فكرة رح اعطيك مثال بسيط تصور انه نحنا اللي وضعنا الارقام العربية عن نستخدم الارقام الهندية بس بيكفيك انه تفكر شوي بالهالموضوع اما بالنسية الى الاخ راكب الطيارة فياعيني معلش ما تزعل خلي العرب بتوعك يخترعوا طيارة وما يكتبوا فيها الا بالعربي ويعملوا شبكات طيران ورموز وكل ما يلزم لتطيير هالطيرات وساعتها لما يجي واحد اجنبي ويغلط باللفظ سيكون مناسبة لكي نشمئز ونتمسخر عليه وما حدا يزعل من حدا وانا اسف جدا جدا هيدا هو الواقع الاليم ......