صدقوا في مصر !!!!

لمصر قصه وحكايه ، مين يفهمها !!! 

شعبها حالته حالة ، مين يعرفها !!! 

روح ماشيه من اول التاريخ ، لاعرف حد يطفيها ولا يأُثر فيها ، نار نورت وعلمت وحرقت والمت ، وفضلت متوهجه في ارواحنا ، كل واحد فينا مصر ماشيه علي رجلين ، تراث وحضارة وتاريخ ، وحكم وكهنوت واسرار ، تجلي وقدره وهيبه ، عبقريه طيبه متواريه ، روح ماشيه من اول التاريخ في طريقها ، تفتح سكك مقفوله وتهون الصعب ، وتستحمل ، وتثابر وتكابر ، روح جوه كل واحد فينا ، في قلبه في حكمة بصيرته في صبره في قوة عزيمته !!!! 

روح ماشيه من اول التاريخ ، ناطقه بلغتها بحكمتها برهبتها بكلمتها ....

نيل وسارح في الاراضي ، ارض طارحه في كل الوادي ، عرق اسمر مسكر وابتسامه تنور ضلمة القبر وقبر زي روضه من رياض الجنه يضم الحبايب مستني بعث في الجنه ونعيمها !!! 

دي مصر ، ياللي مش فاهمين ومش عارفين ومش راضين تصدقوا ومش قادرين ...

هي دي مصر ، اللي عمرها مابتنكسر ولا تتهزم ولا تتلبس ولا تتنكس ولا تتغير وتغير الدنيا ولا تتغير .... صدقوا في مصر اللي جواكم وبتنبض جوة قلوبكم ، صدقوا فيها تصادقكم وتصدقكم وتصد عنكم .. صدقوا في مصر ... واعرفوا ان كل اللي بيحصل ، سطر ازرق في كتاب الحكمة اللي غير الدنيا ، سطر ممسوح في كتاب تاريخ نقش عظمته علي وش الدنيا ، صدقوا في مصر وصدقوا في نفسكم ، وافتكروا منن غزانا وقعد ، ومين غزانا وفلح ، ومين غزانا وصمد ، ومين غزانا وماخرجش مهزوم ....

مساءكم عظيم يااجمل شعوب الدنيا وياابناء الحضاره العظيمه ، يامصريين ....