( 1 )
كنت عايزه اقولك .... ان الاعلام رسالة وطنية ، والعبث والكلام الفاضي بتاع حريه الاعلام وسط حرب ضد الارهاب واجمل اولاد مصر بيموتوا ، عبث ضار بعقول وارواح المصريين ، الاعلام رساله وطنية لابد يكون للقائمين عليها انتماء وطني حقيقي وتاريخ يثبت الكلام ده بلا تناقض ، مش مهم النهارده مين بيغني لك ، المهم تاريخهم كانو بيقول ايه ، هل كانوا جزء من المؤامرة علي مصر ولا لأ ، سواء بعمد او جهل او حسن نية ... كنت عايزه اقولك ، ان مصر مليانه كفاءات وعليك تبحث عن الكفاءات دي وتخلق لنفسك ولفتره حكمك دوائر جديده وطنيه بجد ، بصيرة بجد ، فاهمه انت عملت ايه لمصر ومفروض كلنا نعمل ايه لمصر ...
لكن .... انا مش حاعرف اقولك حاجه ....
لان اصحاب الفرح ، عمرهم ماعزموني اي مره اروح اقولك اي حاجه ....
مش مهم ، انا حافضل اقول ، وواثقه انك في يوم من الايام حتسمعني ، لاني باتكلم بجد من قلبي وعلشان مصر ، انا مش عايزه منك اي حاجه ، لا منصب ولا وظيفه ولا ميزه ولا شيء شخصي ... انا عايزه مصر احسن وواثقه انك انت كمان عايز مصر احسن واجمل وقد الدنيا ....
( 2 )
كنت عايزه اقولك ..... ان مصر فيها ازمة عداله ، القوانين كويسه والهيئات القضائيه عظيمة ، لكن عدد الهيئات القضائيه مجتمعه لايمكن يكفي للنظر السريع في منازعات المصريين المدنية والجنائية والادارية ، وان لابد يكون في خطه واضحه لزياده عدد القضاه وعدد المحاكم ، خطه سريعه وخطه استراتيجيه ، لايمكن القضايا تقعد في المحاكم 10 سنين في درجات التقاضي المختلفه ، لايمكن القاضي ينظر في جلسه الجنح 500 جنحه وفي جلسه الجنح المستأنفة 200 جنحه مستأنفة ، لايمكن قاضي الجنايات ينظر 20 جنايه في الجلسه وتكون التأجيله بين كل جلسه والتانيه 3 شهور ، لايمكن في الاستنئاف المدني يكون التأجيله بين كل جلسه والتانيه 6 شهور ، انا لاالوم القضاه ، لكني الوم النظام الذي جعل عددهم لايتناسب ابدا مع عدد مشاكل ومنازعات ال 90 مليون ...
لكن مش حاعرف اقولك حاجه ...
لان اصحاب الفرح ماعزمونيش ولا مره ، ولا ناويين يعزموني ...
بيعزموا اللي بيطبل ، وانا عمري ماطبلت ولا حاطبل ...
انا حاطه امل كبير عليك علشان مصر ، لانك بتحب مصر وعايزها بجد تبقي قد الدنيا...
علي العموم مش مهم ... مش مهم يعزموني ولا مهم اقابلك ...
لاني واثقه انك حتدور علي المصريين اللي بيحبوا مصر ويفهموا في شغلهم وعايزين مصر تبقي احسن
ساعتها حتلاقي كلامي ده من وسط كلام كتير الناس كتاباه لانها بتحب مصر ...
سعادة المواطن ابن مصر ، احنا كمان بنحب مصر ونفسنا تبقي قد الدنيا ....
( 3 )
كنت عايزه اقولك ..... ان كتير من المصريين بيعتبروا مصر اللي يعرفوها هي الشارع اللي ساكنين فيه ، مايعرفوش عن مصر حاجه تانيه ، دي مشكله تعليم واعلام وثقافه، مشكله قديمه انت مش مسئول عنها ، لكنها ورثتها من ضمن ماورثت من مشاكل مصر اللي عايز تحلها ، مشكله خلت المصريين بيتعاملوا مع مصر اللي بيعشقوها نظره ضيقه قوي ، فلو الشارع اللي ساكنين فيه ، فيه زباله ، تبقي مصر مليانه زباله ، ولو الشارع اللي ساكنين فيه ضلمه لان لمبه الشارع محروقه ، تبقي مصر ضلمه ، الناس دي ، عايزه تحس ان مصر بقت احسن ، يمكن يتعمل مشاريع كبيرة في مصر تحسن اقتصادها ودخلها القومي ومعدلات التنميه ، لكن بالنسبه للمصريين دول تفضل مصر بتاعهم فيها زباله وضلمه ... مهم قوي توسع خططك لتشمل كل شارع في مصر ، مش بالموظفين وبتوع الاحياء ، لا بالناس نفسها ، وظف المصريين في مشاريع تنمويه في مناطق سكنهم ، خلي شوارعهم انضف ويتزرع فيها شجر ، خلي حياتهم اكثر بهجه ببعض المشاريع الصغيرة اللي يتوظف فيها الشباب من اهالي كل حي ومنطقه ، استغل طاقات المصريين الخامله وصحي روحهم الوطنيه وحسسهم ان كنس شارعهم وتنضيفه من الزباله مهمه وطنيه عظيمة لانهم حتخلي مصر بتاعتنا كلنا اجمل وتخلي حياتهم كمان اجمل ، ساعتها حياه الناس اليوميه حتبقي احسن ، حتبقي اكثر بهجه ، ساعتها حيفرحوا بالمشاريع القوميه الكبري حتي لو ماانعكستش عليهم مباشرة لانهم حيحسوا ان مصر بتاعتهم اللي هي شارعهم وحيهم ومنطقتهم بقي اجمل ...
كنت عايزه اقولك الكلام ده ..
لكن اصحاب الفرح مابيعزمونيش ولا حيعزموني علشان اقولك حاجه ...
بس مش مهم .... مسير صوتي يوصلك
وانت بتدور علي صوت المصريين اللي بيحبوا مصر من كل قلبهم ....
سعاده المواطن ابن مصر .... فيه مصريين كتير نفسهم مصر تبقي اجمل ونفسهم صوتهم يوصلك ، ونفسهم يحطوا ايديهم في ايديك علشان مصر تبقي قد الدنيا زي ماوعدتنا وزي ماكلنا بنتمني .....
( 4 )
كنت عايزة اقولك ، ان المصريين لما يفهموا المشاكل اللي بتواجه وطنهم ، يضحوا ويجيوا علي روحهم علشان خاطرها ويقدموا حياتهم رخيصه لصالحها ، كلمهم ياسعاده المواطن ابن مصر ، كلهم مباشره ، اشرح لهم المؤامرة اللي حصلت ، اشرح لهم الحرب العسكريه اللي اتشنت علي مصر ، اشرح لهم قدر التضحيات اللي الجيش والشرطه قدمتها لانقاذ مصر وانقاذهم ، كلمهم ياسعاده المواطن ابن مصر ، كلمهم مباشرة من غير وسطاء ، كلامك حيوصل قلوبهم ويصدقوك ويصفوا وراك ويضحوا علشان خاطر مصر تبقي اجمل ، اشرح لهم ياسعاده المواطن بنفسك المشاكل اللي بتواجههم والمؤامرات اللي علي وطنهم ، فهمهم كميات السلاح اللي دخلت مصر متهربه علشان تقتلهم ، فهمهم حجم الارهابيين اللي افرج عنهم من السجون واللي جم من كل حته في الدنيا علي سينا علشان يسرقوا سينا وحجم تضحيات القوات المسلحه في سينا ، فهمهم ان فيه جنود مجهولين قدموا حياتهم لصالح مصر .... اشرح لهم ياسعاده المواطن ابن مصر ان وطنهم كان في خطر ، ومش نظريه جماعه ارهابيه وبس ، لا دي مؤامره علي مصر ، مؤامره عسكريه من الخارج والداخل ، لما حتكلمهم حيصدقوك ويفهموا ويقدموا حياتهم لمصر ....
ماتسيبش الاعلام يكلمهم ولا الناس تحكي في جلسات النميمة ، اشرح للمصريين المؤامره اللي اتعرض لها وطنهم ومعناها والجيش عمل ايه والشرطه عملت ايه والابطال المجهولين عملوا ايه لانقاذ مصر وايه اللي كان متخطط لها واللي انقذت منه ...
ياسعاده المواطن ابن مصر ، مصر مليانه مصريين وطنيين نفسهم يخدموا مصر علشان تبقي قد الدنيا زي ماانت وعدتنا وزي مااحنا بنحلم ونسعي ....
افتح الطريق بينك وبين المصريين ياسعاده المواطن ابن مصر
كلمهم من قلبك ، كلامك حيوصل قلوبهم وفورا ....
( 5 )
احنا الظهير الشعبي لحمايه مصر وارض مصر وتاريخ مصر وحضارة مصر
لاتعتمد علي النخب المستهلكه ولا اصحاب التاريخ التافه القديم
لاتعتمد علي الاسماء المعروفه وضيوف الفضائيات
لاتعتمد علي الناس اللي بتزعق النهارده وبتطبل وكانت مواقفها مختلفه لكن قررت تمشي مع الرايجه
احنا الظهير الشعبي لحمايه مصر وارض مصر وتاريخ مصر وحضاره مصر ومستقبل مصر
احنا التلاتين مليون اللي نزلوا يوم 30 يونيو ولغايه 3 يوليو
احنا الاربعين مليون اللي نزلوا يوم 26 يوليو يوم التفويض
احنا الملايين اللي نزلت يوم 6 اكتوبر تحتفل بانتصار اكتوبر ومرور 40 سنه علي فرحته
احنا الملايين اللي نزلت يوم 25 يناير في كل مصر تحتفل بانكسار المؤامرة الامريكيه الاخوانية
احنا الملايين اللي نزلت يوم استفتاء الدستور رافعه علم مصر وصورتك باعتبارك البطل الشعبي المصري اللي حيكمل مشواره ومشوارها علشان تبقي قد الدنيا ...
احنا الظهير الشعبي ، كفاءات في كل المجالات بتعشق مصر ومستعده تقدم حياتها علشانها
كفاءات وناس وطنيه جميله لم تخدع بالمؤامرة ولم تشارك فيها ولم تتواطيء ضد مصر ولم تغير مواقفها ..
احنا الظهير الشعبي ياسعاده المواطن ابن مصر
مد ايديك لينا حتلاقي احضانا كلها مفتوحه لك ..
مد ايديك لينا ، علشان مصر تبقي قد الدنيا زي ماوعدتنا وزي مابنحلم وزي ماهي تستحق ...
( 6 )
كنت عايزه اقولك ........ ان لمصر شخصيه وروح وهويه تسكن كل مصري حتي لو مش واخد باله ، خليط من الثقافه الشعبيه والفنون والايمان ، مصر تسمع الشيخ رفعت والست ام كلثوم والمداحين في الموالد ومنشدين القداس ليلة الميلاد ، مصر تتفرج علي فرقه رضا وفرقه الانشاد الديني والاراجوز وصندوق الدنيا ، مصر تصوم رمضان وتحتفل بعيد القيامه وتلون البيض في شم النسيم ، مصر تتكحل يوم سبت النور وتزين ابوابها بصلبان الغلة الخضرا وتحتفل بعاشورا وذكري استشهاد الحسين ، مصر سنية شيعيه الهوي ، مصر مسلمه قبطيه الروح ، مصر فرعونية افريقية عربيه وطنية ...
وعليك ، تدعم روح مصر وشخصيه مصر وهوية مصر
عليك تغير مناهج التعليم والبرامج الثقافيه والاعلام بما يدعم روح مصر وهويتها الوطنية
عليك تغير مناهج التاريخ فنعرف ان مصر فرعونية قبطيه مسلمه مصرية شرق اوسطيه
عليك تدافع عن روح مصر وشخصيتها وهويتها ، فلولا الهويه المصريه مارفض المصريين الارهابيين الخونه ، مارفضوا جرائمهم ضد روح مصر ووطنيتها ....
سيادة المواطن ابن مصر ، عليك تدعم روح مصر وهويتها المصرية بكل روافدها طيله تاريخها العظيم
عليك تنصف حضارتها ، اعظم حضاره في التاريخ ، ام الحضارات كلها
فبهذا فقط ، ستحمي مصر من كل غازي وعميل وحقير اي ماكانت الشعارات الزائفه التي سيرفعها لسرقه مصر وخديعه المصريين ....
سياده المواطن ابن مصر ، حافظ علي روح مصر الوطنيه وشخصيتها فلولاهم لضاعت مصر ...
ليست هناك تعليقات:
إرسال تعليق