05 يوليو 2014

من الفيس بوك .... انه وقت المسئولية الاجتماعيه تجاه الوطن ......

كلمين بمناسبه رفع اسعار البنزين ... والولوله والنواح اللي انا متوقعاه ....
كلمتين مش علميتين ، كلمتين بالصلاة علي النبي بالبلدي وببساطه ....



الطبقه المتوسطه المصرية ، وحاتكلم عن اللي في سني ، عن جيلي يعني ، الطبقه المتوسطه المصرية ، ورثت قرشين من اهلها ، كتير قليل لكن ورثت ، اتعلمت كويس فاشتغلت في وظائف معقوله او كويسه او ممتازة ، تدرجت وظيفيا ومرتبها ارتفع عبر سنين متراكمه من وقت التخرج لغايه لحظتنا دي ... الطبقه المتوسطه المصرية تجاوزت مرحله ( ناكل ونشرب ونتعالج ونعلم العيال ) لمرحله ( ناكل ايه ونتعالج فين ونعلم العيال ايه ) طبعا كلنا عندنا منطق ، من حقي بعد سنين الشغل دي استريح ، من حقي اعلم العيال كويس علشان اضمن لهم فرصه عمل كويسه ، اعلم العيال كويس يعني مدارس خاصه انترناشيونال وااقل حاجه ناشيونال وجامعات خاصه سواء جوه مصر او بره مصر ... الطبقه المتوسطه المصريه في جيلي النهارده شايله نفسها وشايله عيالها كمان اللي اتخرجوا من الجامعه بوظايف كويسه ويمكن عربيات ويمكن مساعده شهريه علشان مرتباتهم من وجه نظرنا قليلة .... الطبقه المتوسطه المصرية ، تجاوزت مرحله الاحتياج للاكل والشرب والستر ، للدلع والادخار والمصايف والرحلات وكمان شويه تحويش كتير قليل مش مهم لكن خايفه من الزمن والعمر والسن والايام السودة ...
الطبقه المتوسطه المصرية ، هي اللي بتحرك السوق ، بتشتري هدوم وتخش السوبرماركتتات الكبيرة وبتقسط ثمن العربيات الزيرو وتشتري الشاليهات والشقق في المصايف والمشاتي والاحياء الجديده ، هي اللي بتعمل عمره وحج مره واتنين وتصيف بره مصر وجوه مصر ، وهي اللي بتدفع الدروس الخصوصيه بالمليارات وهي اللي بتشرب ميه معدنيه او بتحط فلتر ، هي اللي بتجيب الشغالات والسواقين ، هي اللي بتسعي تدلع نفسها بكل طرق الدلع ومنطقها واضح ، من حقي ، لاسرقت ولانهبت ، اشتغلت وتعبت ، من حقي ، ادلع نفسي وادلع عيالي .... 
ادلع نفسي اسافر اتفسح بره ، ادلع نفسي اروح العمرة للمره الخامسه ، ادلع نفسي انزل في فندق اسبوع العيد ، ادلع نفسي اغير عربيتي واشتري عربيه زيرو ، ادلع نفسي اعمل عمليات تجميل وزرع شعر ، ادلع نفسي اغير الموبيل واللاب ، اغير التلفزيون ، ادفع اشتراكات الدش والقنوات المتشفرة ، اطلع العيال رحله مع المدرسه جوه وبره مصر ، اشتري هدوم مستورده ... 
في نفس الوقت الطبقه المتوسطه عليها اعباء اجتماعيه لان الطبقات والشرائح الادني تنتظر منها صدقات وعطاء وبقشيش واكرامية وحسنة وكل سنه وانت طيب ، في نفس الوقت الطبقه المتوسطه عندها هواجس ، خايفه دايما تتزحلق لتحت زي الطبقات الافقر ونفسها دايما تتحرك لفوق زي الطبقات الاغني ، كمان الطبقه المتوسطه حاسه انها الطبقه اللي الحكومه طايلاها ، مش طايله الاغنياء قوي لانهم بيعرفوا يهربوا من الحكومه وكمان بيعرفوا يضغطوا عليها ، ومش طايله الفقرا لان ايش تاخد الريح من البلاط ، فدايما حاسه انها الطبقه الي سهل ظلمها وان الحكومه تيجي عليها ، ولما الحكومه تيجي عليها ، تقلب عليها المواجع والمخاوف وتحس ان الحكومه بتشدها لتحت زي الطبقات الافقر بدل ماترفع الطبقات الافقر لها .....
كده عظيم ... عظيم جدا ...
طبعا الطبقه المتوسطه المصريه شرائح مش كتله صماء ، فيها الاكثر فقرا ومعاناة نسبية ، والاكثر ثراء ورفاهيه نسبية ...
في نفس الوقت الطبقه المتوسطه المصريه اقل فقرا بشكل ملحوظ من الطبقه الثريه والمترفه ، لكنها الطبقه الاكثر انتشارا واتساعا والاكثر عددا ...
طيب باقول كل ده ليه ....
باقول كل ده ، لان القرارات الاقتصاديه في الفتره القادمه ، ستمس الطبقه المتوسطه المصرية لصالح الطبقات الاكثر فقرا ، نعم ستمس الطبقات الغنيه ، لكن الطبقات الغنيه غنيه وثريه والقرارات دي ماتأُثرش فيها بجد ، الا اذا كانت قرارات متعلقه بالضرائب والعمل ، ودي قصه تانيه ، القرارات الاقتصاديه بتمس الطبقه الثرية اه طبقا ، لكن هذه الطبقه عددها اقل من ناحيه ، والقرارات الاقتصاديه ستمسها بشكل اخف اكيد من الطبقه المتوسطه المصرية ...
القرارات الاقتصاديه ستمس الطبقه المتوسطه المصرية ، وانا تعبيري دقيق ، ستمسها فقط ، يعني لن تؤثر في ( الاكل والشرب والعلاج والتعليم ) بما تؤثر في قدر الرفاهيه التي تعيش فيها او تحلم تعيش فيها ، لكن الطبقه المتوسطه لن تقول هذا ، بل ستنوح باعتبارها الطبقه المظلومه وان القرارات الاقتصاديه حتبهدلها !!!! 
وده كلام مش حقيقي ولازم كلنا نبقي صرحاء مع انفسنا ومع بعض ....
انا من الطبقه المتوسطه ، دخلي زي دخل ناس كتير ، اكتر من مصاريفي ، باحوش حبه وادلع نفسي حبه ، ده حالي وحالكم ، القرارات الاقتصاديه ربما حتخليني احوش اقل او مااحوش اساسا ، ربما تخليني مش حادلع نفسي او حادلعها ااقل ، لكن لما ابص للبلد كاكل ، واعرف ان فيه ناس مش لاقيه تاكل ولا عندها ميه حلوه ولاصرف صحي ولاعارفه تتعالج وبتموت ولا عارف تعلم عيالها واقصي احلامها دخلها يزيد 100 جنيه ولا 200 جنيه شهريا ، وانا باشتري خرطوشه السجاير ب 200 جنيه ، وقتها لازم ااقبل من باب المسئوليه الاجتماعيه ان القرارات الاقتصاديه تيجي عليا لصالح الطبقات الاكثر فقرا دون تذمر ودون غضب ودون شتيمه في الحكومه ، بالعكس ، ارحب بها تيجي عليا ، لاني واثقه ان الضمان الحقيقي لاستقرار ذلك الوطن وسلامه الاجتماعي ، ان الطبقات الاكثر فقرا تعيش حياه ادميه كريمة ، مش احنا بس الطبقه المتوسطه اللي نعيش كويس والباقي ان شالله عنه ماعاش ، لان ساعاتها وان طال الزمن ، محدش حيعيش ، والدنيا حتتطربق علي دماغ الكل !!!! 
ارجوا من الطبقه المتوسطه المصريه تكون صريحه مع نفسها وتتحمل مسئوليتها الاجتماعيه قبل الوطن وتقبل ان تدفع جزء من ثمن الخدمات التي تسعي الحكومه لتقديمها للطبقات الاكثر فقرا علشان المجتمع والوطن والحياه كلها تبقي احسن ...
ارجوكم محدش يقولي واشمعني احنا ... لان ساعتها حاقوله اقرا الكلام من الاول 
ومحدش يقولي طب ماياخدوا من الاغنياء ، حاقوله ، هما حياخدوا من الاغنياء طبعا والاكثر ثراء ، بس المشكله اللي انت مش واخد بالك منها ، انك وانت معتبر نفسك متوسط الحال ، ملايين المصريين بيعتبروك فعلا من الاغنياء حتي لو انت مش معتبر نفسك كده .... 
انه وقت المسئولية الاجتماعيه تجاه الوطن وكفايانا دلع ....

هناك تعليق واحد:

Magdy Elsebaiy يقول...

سلمت كلاماتك ورؤيتك يا ام المصريين

المشكله اللي انت مش واخد بالك منها ، انك وانت معتبر نفسك متوسط الحال ، ملايين المصريين بيعتبروك فعلا من الاغنياء حتي لو انت مش معتبر نفسك كده ....
انه وقت المسئولية الاجتماعيه تجاه الوطن وكفايانا دلع ....