ماكنتش باركب مصر للطيران ...
ليه ؟؟
لاني بادور علي راحتي ومنتهي الرفاهيه في الطيارة ..
رحله وعايزه انبسط فيها وخلاص ...
من اول ماشفيق ماطور المطار والطيارات وبقيت حاسه بمسئوليه وطنيه تجاه مصر للطيران ، لازم ادعم شركتنا الوطنيه بصرف النظر عن الرفاهيه ، ادعمها علشان احوالها تتحسن بدعمنا فتقدم لينا ولغيرنا الرفاهيه المنشودة ...
لما عشنا الايام السوده ومصر اتفعصت واقتصادها حوصر واحنا معاه ، بقت ركوب طيارات مصر للطيران واجب وطني ، لن ادعم اقتصاد ولا شركات اي دوله اخري ، مصر وشركتها الوطنيه اولي ....
لما ناديت المضيف النهارده وقلت له افرد الكرسي ازاي ، قالي معلش استحملينا امكانياتنا محدوده ، ابتسمت ودمعت في نفس الوقت ، قلت له دي مش امكانياتكم ، دي امكانياتنا كلنا محدوده لكن حتبقي زي الفل ، قلت له ، من فضلك ماتقولش احنا وانتم ، لان احنا وانتم حاجه واحده ، وسابني وانا عماله اعيط ، لازم ندعم مصر للطيران ، لازم ندعم كل مؤسساتنا الوطنية ، لازم امكانياتنا ماتبقاش محدوده ، لازم هو المضيف وكل زمايله وكل المصرييين يحسوا ان الشركه الوطنيه مصر للطيران شركتنا كلنا وواجبنا كلنا ندعمها ....
كنت باعيط ليه ، كنت باعيط لاننا كنا عايشين بنستهبل ومش مركزين مع مصر واحنا لازم نركز معاها قوي ، لازم ندعمها بكل الطرق اللي نقدر عليها من اول مصر للطيران لغايه اصغر باكو شوكولاته ..... ومحدش يقولي ماهو المستورد احلي ، اه المستورد احلي بس مش بتاعنا ولايخصنا ، لازم ندعم اللي يخصنا ....
قبل ماننزل ، جم وزعوا علينا شوكولاته ، علبه دهبي ورق عليها رسم حورس ....
ابتسمت وحسيت ان حورس يراعاني في كل حته ...
حسيت بيفكرنا بمصر واللي لازم نعمله معاها ...
ابتسمت ودمعت وكلت الشوكولاته وانا " بايظة " مقصره في حق مصر وكلنا مقصرين ...
لازم ندعم مصر وكل مؤسساتها الوطنيه ...
لازم ندعم اقتصادها علشان ندعم مستقبلنا .... وكفايانا استهبال ....
ليست هناك تعليقات:
إرسال تعليق