07 أكتوبر 2010

اللي مايقدرش علي الدش ، يقدر علي الوصلة !!!!





قال ........الحقي وزير التعليم على المحور !!!
فكرت بسرعه مين اللي استضاف الوزير واستضافه ليه !!!
وبسرعه بسرعه جريت ورايا النوت ، اللي عماله اهرب منها !!!
والحقيقه هو نوت اول قصيدته كفر بين !!!
والواحد بيدب ايده في عش الدبابير ، مش عارفه ليه ، غير اني غاويه وجع قلب!!!

والنوت فكرته ابتدت و انا رايحه جايه فوق الدائري ، رايحه جايه في كوبري سته اكتوبر ، اري اطباقا من كل المقاسات والاصناف والالوان تحتل اسطح العمارات وبلكوناتها !!
اطباق بث فضائي ، الوف ، بل ملايين !!!
في افقر الاماكن والاحياء ، في اغناها وارقاها !!!
في المجتمعات الجديده والقديمه !!!
في الريف ومشتول القاضي بلدنا مركز زقازيق وفي القطاميه هايتس وكل الهايتس التانيه !!!

واللي مش قادر علي الطبق ، قادر علي الوصله ، والمصريين عباقرة ، 20 جنيه في الشهر وتشوف كل القنوات المقفوله مفتوحه فتحا عظيما !!! وعمرو خالد يجي يقولك السرقه حرام ، ماتسرقش المحطات المتشفره ، والجمهور الزهقان من القناه الاولي والتانيه يقولك المضطر يركب الصعب وان الله غفور رحيم !!!!

اذن يامصريين ........... نحن نعيش غزو عظيم !!!
ليس غزو من اهل المريخ الناس الخضرة زي فيلم جاك نيكلسون ، ولا غزو الصليبيين والناصر صلاح الدين وعيسي العوام ، لا نحن نعيش عصر الغزو العظيم الذي بارادتنا الحره فتحنا له ابواب بيوتنا وعقولنا !!!!!!!
فجأ فتحنا بيوتنا وعقولنا ... لغايه دلوقتي قدام الغزو الفضائي ، واستقبلناهم بالرايات والاعلام والفرحه والزغاريط ..... الدش وصل ياعسل !!!!
وفجأ بعد القناه الاولي والثانيه ، بقي مليون قناه ، عربي خوجاتي هندي روسي تركي شامي مغربي وعلي كل لون ياباطسته !!!! افلام بس مسلسلات بس كوره بس اعلانات بس اجنبي بس عربي بس و............ نقي بس ما تفعصش !!!

الناس طبعا اتخضت في الاول ، في الاول كانوا خايفين من القمر الاوربي علشان بيجيب افلام ابيحه كلها بوس واحضان و........ كله كله !! فاخترعوا لهم شفرات ومفاتيح ، تقفل القنوات في وش العيال وتفتحها في وش الابهات بعد ماتنام الامهات !!! ماعلينا ده موضوع جانبي !!!!

لكن بعد الخضه ماراحت ، الادشاش انتشرت انتشار النار في الهشيم وانتصرت علي كل من يعاديها ويخاف منها وصار الدش ضروره ماينفعش نعيش من غيره !!!!

وهكذا يا مصريين وخلال حوالي خمستاشر سنه من اول دش ركب للنهارده بدأ عصر جديد في حياتنا ...عصر الغزو الفضائي ...... يامصريين نحن نعيش عصر غزو فضائي عظيم مكناه نحن بارادتنا وحريتنا المطلقه من اللعب في عقولنا ونفوسنا وارواحنا وربنا يستر علي الباقي!!!

مش حاتكلم عن المحطات الطائفيه اسلاميه ومسيحيه وقدر الكره الرهيب اللي بتبثه في نفوس الناس ، كانها خدت توكيل حصري من ربنا بالبث الانفرادي ، مش حاتكلم عن شيوخ الفضائيات والسبوبه ، مش حاتكلم عن السم اللي بيتدس في الايمان ، وهاتك يانفخ في النار ، والمسلمين وحشين ، لا المسيحين اللي وحشين و.......... وولعها ولع شعللها شعلل !!!

مشكله المحطات الطائفيه الدينيه اسلاميه ومسيحيه انها مش بتولع في نار الفتنه !!! لا كمان بتسرق عقول الناس ، والناس عندنا ياحرام ، اول مالشيخ يقول ، يبقي كلامه صح ، اي شيخ حافظ الفاتحه يطلع في التلفزيون ، يسبل في عينيه ، يبقي كلامه عظيم وربنا يفتح عليك يامولانا ، يقولوا ايه بقي والكلام صح ولا غلط ، وهابيه ولا طلبانيه ، فتاوي واحاديث صحيحه ولا اسرائيليات ، فتاوي ولا اراء شخصيه ، الارض كرويه ولا اللي يقول كده فاسق وزنديق ، نرضع الكبير ولا الصغير ، التماثيل حرام ولا النسوان حرام ولا الفن حرام ولا كله حرام في حرام ، كل ده مش مهم ، المهم ان الشيخ بيقول ولما الشيخ يقول نفتكر الشيخ حسن الباردوي في فيلم الزوجه التانيه و" اطيعوا الله واطيعوا الرسول واولي الامر منكم " ....اي حد بقي يتحمق قوي ويجعر ويقول الكلام ده غلط ، يقول براحته وعلي راي الاغنيه ، خلي اللي يقول يقول وبرضه فيه اغنيه تانيه ياعوازل فلفلوا ...
الازهر بقي يقول اللي يقوله ، مش مهم ، محدش بيقرا كلامه ولا يسمعه ، الرك علي الفضائيات !!! الاسلام المعتدل الوسطي بيقول ايه ، مش مهم ، لان الوهابيه صوتها اعلي والطلابنيه اقوي والناس جاهله لا قرت كتاب ولا جرنان واللي بيقوله الشيخ وحيقوله هو الصح الوحيد ........ والله يرحمنا برحمته الواسعه !!!!
طيب ........ الفضائيات الدينيه اسلاميه ومسيحيه ليها جمهورها ماشي !!!

طيب وبقيه الفضائيات ، مين جمهورها ، احنا جمهورها ، بابا وماما وبنت خالتي وابن عمك وجارتي وجارتك والسواق والشغاله وبياع البطاطا وام محمد والحلاق والكوافير والمكوجي والقهوجي والنسوان في البيوت تسلي روحها والرجاله علي المعاش والعيال في اجازه الصيف !!!!!!! كل دول جمهور الفضائيات ، ناس فاضيه لاشغله ولا مشغله ، ماورهاش حاجه تعملها وزهقانه في حياتها لميت سبب ، مافيش قدامهم غير الفضائيات 72 ساعه في 24 ساعه كل يوم فرجه فرجه فرجه لما الناس احولت وعينيها باظت وطبعا مخها !!!!

مش حاتكلم عن فضائيات الاغاني ..... والكليبات والرقص والتقصيع والقلع واللبس واغااني السطوح والحمار !!! مش حاتكم عن البوس والاحضان والمغنيه اللي بتستحمي في البانيو والمغنيه اللي نايمه علي السرير وقالعه قصدي لابسه من غير هدوم !! مش حاتكلم عن الكلام الفاضي والاصوات الوحشه النشاز والمغنيات اللي قالعين لغايه "صرتهم" لانهم لو لبسوا محدش حيسمعهم لان ماعندهمش صوت لكن عندهم حاجات تانيه !!!! مش حاتكلم عن الاسفاف والانحطاط في الذوق العام والقبح والفجاجه ....... لان بقي دمي تقيل قوي سم يعني عامله زي ابله نوجه مشرفه الحوش وقت الحصه ، كل مانصوت تضربنا وكل مانضحك تضربنا وكل مانضرب بعض بالشنط تضربنا ولما ما ننزلش الفسحه تضربنا ولما نتأخر عن طلوع الفصول لما الفسحه تخلص تضربنا ، كان ربنا خلقها علشان تضربنا !!!
مش حابقي زي ابله نوجه ، وبايخه ورزله وسئيله وخلي الشعب ينبسط ويهيص واللي تقلع تقلع واللي تلبس تلبس !!!! وياللي علي المالح حود علي الترعه ، ياللي علي المالح حود علي الترعه !!!!

المصيبه في حاجه تانيه !!!!
تعرفوا ام اكرم ، اكرم ده شاب مصري عايش في الحلميه وامه ست مابتعرفش تعمل حاجه خالص في حياتها غير الطبيخ والجمعيات !!! ام اكرم ، اتربت ان الست للجواز والطبيخ ، عمرها بعد الشر ماقرت جرنان لان الفكر مرض بيطير النوم من العينين ، وطول عمرها تلم جارتها علي السطوح ينقوا رز وينموا ويجيبوا سيره النسوان والرجاله واللي بارت واللي اتطلقت ، ولما جوزها جاب تلفزيون ، ام اكرم زغرطت وبقت بتابع مسلسل سبعه وربع وتستني الفيلم العربي وهي بتقور البتنجان اللي حتعمل بيه ، اسم الله علي مقامك ، حله محشي علي الغدا بكره لان جوز بنتها حيتغدي عندها !!!

المهم ، ام اكرم ، جابت وصله ، لان ام محمد جارتها جابت وصله ، وقعدت قدام القنوات ، ايشي اسامه اطيب واشي اعلانات حامد بقي جامد ، واشي كريم بيطول الشعر وايشي طقم اركوبااااال 36 حته وعليهم 6 هديه !!! ولزقت ام اكرم في الكنبه !!! لزقت تماما !! من فيلم لفيلم ومن مسلسل لمسلسل ومن قناه الناس لقناه مولدي ، الوليه احولت ، من كتر ما بتقلب القنوات ، وايديها قفشت علي الريموت ، ياويله وسواد ليله اللي يحاول ياخده منها ، لايمكن ولاممكن ابدا .......... ام اكرم لزقت علي الكنبه ، واسم الله علي مقامك اللي يقوله التلفزيون صح !!! مش قالوا في التلفزيون !!!!

ويوم ورا يوم ......... الوليه ام اكرم بطلت تعمل محشي لجوز بنتها واهي بصله المحب خروف ، وبعدين مابقتش عايزه تقابل حد ، لا النسوان تنم معاهم ولا جوز بنتها تقوم معاه بواجب ، اصل اي حد بيزورها بيعطلها وساعات ابو اكرم يتحامي في الضيوف ويبقي عايز ياخد من ايدها الريموت وده لاممكن يحصل ابدا!!!وبرضه ده مش مهم ، وام اكرم نفسها مش مهم خالص !!!

نرجع لموضوعنا ........ الغزو الفضائي !!!

لا قبل الغزو الفضائي لازم اقول برضه حكايه تانتي انوش ، تانتي انوش واجهتها مشكله رهيبه ، ان جوزها البخيل مشترك في الايه ار تي والجزيره الرياضيه والشو تايم لكن مش مشترك في الاوربيت ، هو طول عمره بخيل ايحه وكانت مستحمله لكن لحد الاوربت ، نو والف نو ، اصل تانتي انوش بتقعد في النادي تتكلم مع التانات التانيه ، ياحرام بيفرسوها ، بيتكلموا عن الاوربيت وعموره وهي قاعده ياحرام زي الاهبل في الزفه ، لاعارفه عموره قال ايه ولا اتكلم في ايه ، وده عمل لها احراج في موقعها الاجتماعي في النادي ، لازم لازم عموره واتخانقت مع جوزها البخيل ووقفت علي الطلاق ويااما عموره والاوربت يااما بيت اخويا اولي بي وهناك عنده اوربيت وعموره !!! الراجل البخيل قرر في النهايه يشتري دماغه ويشترك في الاوربيت و......... اوبا ، تانتي انوش صالحته وبقت تعمل له القهوه الصبح بايدها وساعه ماعموره يبتدي ، تاتني انوش تقفل صوت جرس التليفون وتضلم النور الا اباجوره صغيره وتقعد قصاده تركز حيقول ايه والكومبيوتر في مخها يسجل وتاني يوم في النادي تضحك وتجلجل وعموره قال وعموره عاد وساعات ماتنسناش لتاني يوم ، يادوبك عموره يخلص من هنا وتمسك التليفون وهاتك يارغي وضحك !!!!!! الحقيقه عموره غير حياتها واسعدها ونصرها علي مين يعاديها وجوزها البخيل بقي اخر سعاده لانها بتعمل له القهوه بنفسها وربنا يخلي عموره وكلام عموره !!!!
ماعلينا بقي !!!!!!!!!!

نرجع لموضوعنا ........ الغزو الفضائي !!!
عندنا كام قناه فضائيه ، عندنا يعني احنا ولاد العرب ، كام قناه بتنطق بالعربي !!!
طيب مين بيقول ايه في القنوات دي !!! وبيقولها ليه !!!!
عندنا برامج السهرة ، بقت اجمل من الافلام والذ واسخن .... عمرو اديب علي الاوريبت ، مني الشاذلي العاشره مساء ، معتز الدمرداش علي المحور ، سيد علي وهناء علي المحور غالبا برضه ....... عندنا المرحوم البيت بيتك سابقا ومصر النهارده حاليا .... !!!!
ايه حكايه البرامج دي !!!!

اللي يقولك بقي حكايه البرامج دي ، ابله لولو !!!!
اصل ابله لولو ، مثقفه ، بتفك الخط ، ومتطلقه وماعندهاش عيال وفاضيه تماما !!!
من ماتشات الكوره بتاعت الدوري الانجليزي للبرامج دي !!!
الحقيقه ابله لولو حافظه خريطه الفضائيات بالكامل ، عارفه كل قناه بتذيع ايه امتي من اول قناه الجماهيريه لغايه الراي والمنار والحرة ..... لغايه مولدي دراما ( اصلهم محدش لسانه معووج وبيقول عليها ميلودي ) لا هي مولدي !!!

المهم .......... ام اكرم وابله لولو وطنط ثريا بلنتيات اللي بتحب ماتشات الكوره تخلص بالتعادل علشان البنلتيات وحنان الشغاله والوليه صباح الصعيديه اللي كانت في جره وطلعت لبره وطبعا تانتي انوش ونسوان النادي ، كل دول ، وكل الناس اللي قاعده في العشوائيات تتفرج علي التلفزيون والنسوان عند الكوافير والرجاله عند الحلاق والعواجير والسواقين علي القهوه ، كل دول قاعدين مبرقين فاتحين بقهم قدام التلفزيون ، وكل واحد منهم ماسك الريموت في ايده ولا ممكن ابدا يسلمه لحد !!!! والتار ولا العار !!!!
طيب الجماعه دول كلهم بيتفرجوا علي ايه !!!!
مين بيقول لهم ايه !!!!
وبيقوله ليه !!!!
وعلشان ايه !!!!
محدش بيسال نفسه ولا مشغول بالموضوع !!!!

المصيبه ان ام اكرم وابله لولو وطنط ثريا بلنتيات ، فاهمين ان فلان وفلان وفلان وفلانه ، ابطال العروبه والاسلام ، فاهمين انهم هما اللي بيألفوا البرامج ويذيعهوها وشايلين راسهم علي كفوفهم ومستعدين للشهاده في سبيل البرنامج والوطن!!!!
بالمناسبه ......... انا لااحمل اي مشاعر عدائيه تجاه هؤلاء المذيعين ولا غيرهم !!!
لااحمل لهم اي مشاعر عدائيه ولا غضب ، هما مذيعين بيقدموا البرامج ، وظيفه مقابل اجر ومرتب !!!
وبيتشغلوا بالريموت كنترول ، كل واحد في ودنه ( اير بيس ) والمعد بيزعق في ودنهم طول النهار والمخرج بيزعق في الودن التانيه ، واصحاب المحطات سايبنهم بحريتهم بس بيقطعوا كلامهم بالفواصل وحنواصل !!!
اذن ... نخرج الاشخاص من النوت علشان اعرف اتكلم براحتي !!!

نرجع لام اكرم وابله لولو وطنط ثريا بلنتيات وغيرهم وغيرهم ، مش فاهمين نظريه البرنامج ، هما فاهمين ان المذيع هو بطل الفيلم وشجيع السيما ، اما حكايه المعدين فدي حكايه لاسمعوا عنها ولا عايزين يسمعوا عنها !!!!

المذيع بيعمل شغله وياخد اجر ويقول الكلام اللي موضبه له المعد ويناقش الضيوف اللي بيجيبهم له المعد ويبعت الانتاج لهم عربيات !!!! ولا انا مش فاهمه !!!
يبقي المذيع من وجه نظري ، بصرف النظر عن كفاءته في التقديم وخفه دمه ، مش مهم خالص في مساله الفكر والافكار ، مش مهم لانه منفذ للسكربيت اللي عمله المعد !!!

يبقي حقيقي حقيقي اللي مسئول عن اللي بيطلع علي الشاشه هو المعد !!!!
فيكي كام معد يامصر بيعدوا برامج !!!
فيكي كام معد يامصر هما رؤساء التحرير للبرامج وهما اللي بيحددوا ايه اللي نتكلم فيه وايه الضيوف اللي نجيبهم وايه المواضيع السخنه اللي نتكلم فيها ومين الضيوف اللي لما يقعدوا قدام بعض الدنيا حتولع وحنتفرج علي المصارعه في زمن اسبارتاكوس لما كان العبيد بيصارعوا الاسود والدم يخر !!!!
فيكي كام معد يامصر بيعدوا برامج !!! ومين هما !!!! وهما اساسا بيتشغلوا ايه ولا هو اعداد البرامج بقي مهنه من لامهنه له وكل واحد يعرف يعد ( قصدي يعد برامج مش يعد فلوس ) !!

ايوه انا عارفه ان الحياه بقت صعبه والمرتبات مابقتش بتكفي !!!
وان الشاطره تغزل برجل حمار !!!
وان الناس بقت بتلعب بالبيضه والحجر !!!
وان الفالح هو اللي يعمل ماشطه وبلانه !!!!
ولكن ......... ارجع اقول !!!
مين المعدين للبرامج !!!!
مين اللي بيختار اننا حنتكلم عن موضوع العباره !!!
مين اللي بيختار اننا هنهاجم محامي العباره ونطلع الضحايا بيعطيوا !!!!
مين اللي بيختار الموضوع وطريقه المعالجه !!!
مين اللي بيقرر نتكلم عن قضيه سوزان تميم ، وبنتكلم من انهي زوايه !!!
مين اللي بيقول نستضيف مين !!! والضيف حيتكلم في ايه !!!
مين اللي بيقرر اننا حنوجه عقول الناس للطريق ده ، او الطريق ده !!!!

مجرد خبطات اعلاميه وانفجارات وفذلكه !!!! تبقي مصيبه !!!
فرقعه تجيب اعلانات اكتر في جيب صاحب المحطه !!! تبقي المصيبه اكبر !!!!

مين اللي بيقرر انه يجيب زيد او عبيد او نطاط الحيط علشان يتكلم
مين اللي بيقول ان الموضوع ده سخن او لازم يسخن
مين اللي بيلعب في عقول الناس في مصر
مين اللي بيشكل وعيهم بلغه المثقفين
مين اللي بياخدهم يمين او يوديهم شمال

هل فيه جهه ما ، هي اللي بتعمل ده ومسئوله عنه ، ومشغوله بدماغ الناس واللي بيحصل في دماغ الناس ؟؟؟!!!
ولا شعار الفضائيات حريه ياحبيبي حريه !!!!
طيب انتي ضد الحريه !!!
اه ساعات ابقي ضد الحريه !!!!
لما بنتي تقرر تنط من البلكونه ابقي ضد حريتها واجيبها من شعرها وارميها علي الارض وابرك فوقيها !!! واللي يقولي حريتها انط في كرشه !!!!
اه ساعات ابقي ضد الحريه !!!!
بس مش هو ده موضوعنا .... اني مع الحريه ولا ضد الحريه !!!
موضوعنا مين اللي بيلعب في دماغ المصريين وبيشكل وعيهم !!!!

هل هما صحفيين ... قرروا يزودوا دخلهم ويبقوا معدين وعرفوا ان كل مالدنيا سخنت الاعلانات زادت واجورهم ارتفعت فبقت القضيه هي ( سخني ياحبيبي ) وبس خلاص !!! وان شالله تولع !!!

هل هما سياسين ، ليهم وجهات نظر محدده وينتموا لاحزاب سياسيه ، وبالتالي اختياراتهم للمواضيع والضيوف مرتبطه بقناعاتهم وافكارهم ، طيب مش يقولوا ، علشان نبقي عارفين ان اختياراتهم موجهه ولصالح افكارهم وقناعاتهم السياسيه اللي جايز نكون لو اتكلموا معانا جايز نكون مش موافقين عليها !!!

ولا هما مين !!!
ياريت محدش يقولي دول ناس بيقولوا الحقيقه ، لان للاسف الناس العواجيز ام شعر ابيض زيي ، عارفين ان مافيش حقيقه ، فيه مليون حقيقه ، انت بقي بتختار انهي حقيقه من المليون حقيقه وتعرضها وتهيص عليها ، ده اختيار ، طيب دافعك للاختيار ايه ، الفلوس والسبوبه والاجر العالي ، سخني ياحبيبي ، السياسه وسنينها السودا ، ايه ؟؟؟؟

يامصريين ....... نحن نتعرض لغزو فضائي !!!!
اصحاب المحطات بيلعبوا في راسنا ..
شيوخ علي رجال اعمال علي اقباط المهجر علي التنظيم العالمي للاخوان المسلمين علي فساد علي استهبال علي تشليح واعلانات ونسوان عريانه وفتاوي غريبه !!!! اصحاب المحطات بيلعبوا في راسنا وبيزرعوا بايديهم الطاهره الافكار اللي هما عايزينها في راس ام اكرم وابله لولو وطنط ثريا بلنتيات وتانتي انوش ونسوان النادي !!!
دول كلهم ومعاهم انظمه سياسيه وتحالفات اقليميه علي احزاب علي شيع دينيه علي مصالح اقتصاديه سياسيه علي رجال اعمال ، تحالف الثروه والاعلام ، تحالف الثورة والاعلام ، تحالف الفساد والاعلام ....... هيصه ودوشه وكل ده يترجم بلا حسد في جيوب اصحاب المحطات والمذيعين والمعدين فلوس كتيره واصفار كتيره !!!!

انا مش بحقد علي حد !!! وربنا يرزق من يشاء !!!!
لكن بس باقول ، ان لعبه الفلوس دي بتلعب في راسنا وافكارنا وتودينا يمين وتودينا شمال وتودينا في داهيه !!!!
طيب مين بقي يعرف يقنع ام اكرم ولا ابله لولو ولا طنط ثريا بلنتيات ولا تانتي انوش ونسوان النادي ان اللي بيتذاع في التلفزيون ده وجه من الحقيقه ، والشيخ لما يقول مش لازم يكون كلامه صح ، وفلان لما يقول مش لازم يكون كلامه صح و الجزيره لما تقول مش لازم كلامها يكون صح !!! مين بقي حيعرف يقنع ام اكرم انها تفكر في الكلام اللي بتشوفه وتسمعه ، طيب ماهي محدش علمها تفكر ، ومعتبره الفكر مرض ، ومسلمه راسها للريموت كنترول ومن حط النقط فوق الحروف لفاصل ونواصل لحمرا لفبريكانوا لموجه كوميدي للجزيره للمنار لاسامه اطيب كل دول بيحشروا في راسهم افكارهم وقناعاتهم !!!

هي حره طبعا ، وهما حرين !!!
هي حره تقفش علي الريموت كنترول ماتسيبوش وتصدق كل اللي بتشوفه !!!
وهما ، اصحاب القنوات واصحاب راس المال والمعدين والمذيعين ، هما حرين يقولوا مابدالهم ، هما اصحاب الكوره والشارع شارع الحكومه وكل واحد يلعب براحته !!!!
واحنا كمان حرين ....... احنا مين ؟؟؟
احنا الموكوسين اللي شايفين المصايب اللي بتحصل ومش عارفين نتصرف 1!!
احنا المقهورين اللي شايفين الكوارث ومش عارفين نتصدي لها ولا نقاومها !!!
احنا حرين نقول ....... اننا نتعرض لغزو فضائي !!!
وان اللي بيحصل مش عاجبنا ورافضينه وكارهينه !!!!
وبعدين .........
ولا قبلين !!!! ايه يعني الواحد مايفضفضش معاكم شويه !!!!
امال اصحاب ازاي !!!!!

كله منك ياصديقي العزيز لما قلت الحقي وزير التعليم علي المحور !!!
اديني لحقت .... مبسوط !!!!!!


هناك 3 تعليقات:

بنت القمر يقول...

لازم تكتبي رواية يا اميرة .. لازم فكك من التدوين والنوتس
عندك قدرة هائلة علي التداعي والحكي ولضم الاحداث بسلاسة

Mona Abo - Elso3od يقول...

اول مرة اعلق علي كلامك
كلامك صح 100 في 100 الناس بقي عندها مرض الريموت كنترول و تحسي انهم لازم يروحوا لجراح يستأصله من ايديهم. و الله انا ساعات ابقي متابعة برنامج و تيجي الاعلانات ازهق طبعا فأمسك الريموت و تجيلي الحالة " حالة التقليب المستمر بدون وعي " اشوف حته من الفيلم ده علي تنويه معدي علي مناقشة حامية في برنامج لحد ما أنسي اساسا كنت متابعة ايه من الاول
احس ان انا عندي بلاهه اققوم طافية التليفزيون و قايمة
معلش طولت عليكي
بس ياريت الناس تفهم كلامك ده لأن فعلا المغيبيين كتير 

Sa Neb يقول...

مقال رائع فعلاً ، بأسلوب سلس جميل ومسلي عرضت الكاتبة مشكلة كبيرة جداً وتركتنا نترحم علي حالنا بإبتسامة علي وجوهنا.‫
سانب
http://muslims-however.blogspot.com/