فيه طريق راس الرجاء الصالح !!!!!
وفيه طريق ودنك منين ياجحا !!!!
اصلي حاكتب كلام لازم ابتديه من راس الرجاء الصالح !!! والف حواليها وحوالين ودن جحا!!!
مش خبث ولؤم وحاجات كده ، لا بعد الشر ، بس علشان اعرف اوضح الفكره !!!!!
زمااااااان ، اول مااشتغلت بالمحاماة ، ايوه من زمان والله من حوالي 30 سنه ، كان اللي يشتري شقه لازم يسجلها !!! ايوه ماهو برضه دلوقتي لازم يسجلها لان زي الدكتور السنهوري بصوت فخيم ما بيقول ( الملكيه لا تنتقل الا بالتسجيل ) ... مش موضوعنا !!! موضوعنا ان المصريين كانوا بيشتروا الشقق ومابيسجلوهاش ، ليه ، لان رسوم الشهر العقاري غاليه من ناحيه ، ولان التسجيل له شروط مش دايم متوفره من ناحيه تانيه ، ولان المحامين اللي بيسجلوا الشقق بيطلعوا عينهم وياخدوا منهم اتعاب كبيره ودي قضيه تالته !!!!
المهم ........... اول خطوه في طريق ودنك منين ياجحا .... ان المصريين كانوا بيشتروا العقارات شقق واراضي ومايسجلوهاش ، وتفضل الملكيات كلها بعقود عرفيه وده بيعمل مشاكل جمه !!! والله مش موضوعنا !!!
قوم ايه ... علي راي العمدة صلاح السعدني في ليالي الحلمية ، اخترع المحامين اختراع جميل ، طبعا موجود في القانون ، اسمه قضايا صحة التوقيع ... ايه ياعم الموضه دي ، صحه التوقيع ، يعني اخد العقد العرفي ارفع بيه قضيه قدام المحكمه واقول عايزه البياع يقول ان ده توقيعه قدامك يامحكمه ، والمحكمه تجيب الراجل او الست او محاميهم ، ده توقيعك يابا ، اه ياباشا ، الحكم لجلسه ......... حكم ايه ، حكم في قضيه صحه توقيع بان التوقيع علي العقد صحيح !!! طيب ده تسجيل ، طبعا لا ، طيب الملكيه كده اتنقلت باسمي ، طبعا برضه لا ، امال ايه ، بس بقي معاكم حكم من المحكمه ان توقيع البائع علي العقد صحيح !!! علشان لما الايام السوده تيجي ، البائع مايفلفصش من توقيعه هو او الورثه !!!!!!!!!!
اذن اذن ............ تانيه خطوه في طريق ودنك منين ياجحا ..... ان فيه قضيه اسمها ( قضيه صحه توقيع ) !!!
وبعدين ياستي ، وبعدين .... فجأ اتحول اسم القضيه علي السنه العامه والجمهور ل ( قضية صحه وتوقيع ) !!! جت منين ( الواو) دي مش عارفه ، لكن القضيه بقي اسمها ، قضية صحة وتوقيع !!!! ويوم ورا يوم ، حتي المحامين الصغيرين وبتوع الاقاليم ، بقو يقولوا قضيه صحة وتوقيع !!!!
حلو كده ........... حلو خالص ، ويارب هون البعيد !!!!
قضيه ( الصحه والتوقيع ) دي شبه القضايا لكن ماهيش قضيه !!!! ليه ؟؟؟؟؟؟
القضيه يعني صراع ، يعني مجهود ، يعني طرف كسبان وطرف خسران ، يعني براعه محامين ومجهود قضاه !!!
قضيه ( الصحه والتوقيع ) مافيهاش ولا حاجه من دي ... طرفين القضيه متفقين يرفعوها ، لافيها مجهود لا من المحامين ولا القضاه ولا فيها حد كسبان ولاحد خسران !!!
اه هي شبه القضايا ، لان لازم اروح المحكمه وقضاه ومحامين ، هي شبه القضايا ، لكن مش قضايا !!!!
وصلنا لبيت القصيده !!!
وخلصنا طريق راس الرجاء الصالح ويمكن كمان نستغني عنه ونعدي من قناه السويس علي طول !!!!!
مصر النهارده بقت في اغلبها ( صحه وتوقيع ) ...
كل حاجه شبه الحاجه الاصلية لكن شبهها وبس !!!! مافيهاش من الموضوع الا الشبه بلا مضمون !!!
يعني افلام شبه الافلام !!!
مخرج وممثلين ومنتج ومونتير وقاعات عرض وعروض خاصه واخبار فنانين ... والحقيقه الموضوع كله ، صحه وتوقيع !!!!
لاصراع ولا مجهود وفكر !!! صحه وتوقيع !!!!
كتب شبه الكتب !!!
مؤلف وناشر وموزع وحفلات توقيع وافكار ... وناس تقولك انا كاتب وناس تقولك انا ناشر والموضوع كله صحه توقيع !!!
لاافكار بجد ولا صراع فكري بجد ولا ابداع بجد !!!! صحه وتوقيع !!!!
وقيس علي ده مليون مليون حاجه !!!!
نحن في زمن الصحه والتوقيع !!!!
زمن الشبه !!! كل حاجه شبه الحاجه اللي مفروض تكون لكن مش حقيقيه ومش مزيفه لكن بلا مضمون !!!
ده تعليم بالذمه ........ ده تعليم صحه وتوقيع !!!!
دي سينما بالذمه ............. دي سينما صحه وتوقيع !!!!
ده حب بالذمه ........... ده حب صحه وتوقيع !!!
ده ادب بالذمه ............. ده ادب صحه وتوقيع !!!!
ده فن بالذمه ............. ده فن صحه وتوقيع !!!!
ولا عزاء للجاديين !!!!
يعني يطلع عيني في دراسه القضيه واذاكر واقرا ومراجع ولعب شطرنج وتبديل مواقع !!!
والبس روب محاماه مكوي وراجع من التنضيف !!!
واشيل شنطه ورق علي قلبي واخش المحكمه ، الاقي جنبي محامي في ايده ورقه ، ماهو مش محتاج حاجه تاني ، عنده قضيه صحه وتوقيع وادي العقد وادي التوقيع والحكم ياريس !!!! اسمه محامي ، طبعا !!! وقاعد جنبي في اوضه المحامين ، طبعا ويمكن واخد اتعاب اكتر مني لان العقد اللي بيعمل عليه صحه وتوقيع قيمته كبيرة والزبون فييس !!! لكن ........... ده محامي صحه وتوقيع !!! سوري يعني !!!!
فيه اديب صحه وتوقيع
ومغني صحه وتوقيع
ووزير صحه وتوقيع
ومعارض صحه وتوقيع
ورسام صحه وتوقيع
واب صحه وتوقيع
وام صحه وتوقيع
وشعب صحه وتوقيع !!!!!!!!!!!!!
اللي مصبرني ومبرد ناري ، انه في يوم جميل ، حنصحي نلاقي كل حاجه رجعت بجد ، حقيقيه والصحه والتوقيع اتلغي من الحياه !!!
وقتها كل فرق الصحه والتوقيع حيكون مكانهم الوحيد مزبله التاريخ والجغرافيا والمحاكم !!!!!
ليه لانهم مش بتوع مجهود ولا جديه ولا تحدي ولا مضمون !!!
فلما يجي الوقت اللي بجد .......... حيحتاسوا ويغرقوا ويروحوا في ستين سلامه !!!!
وحتي يأتي هذا اليوم الجميل ......
كل مايحدث حولنا صحه وتوقيع !!!!!! فمحدش يتحمق ولا ياخد حاجه علي قلبه ولا يصدق !!!!
لان كله كله صحه وتوقيع !!!!!!!!!!!!!
هناك تعليقان (2):
ايام شبه الايام لكن مش هى
اللون بهتان والخوف الوان حتى الانسان مبقاش انسان
حوالينا فى كل مكان قضبان ونقول على السجن دا حريه
بنفرح فرح عادى ونحزن حزن عادى
ليه الحياه رمادى وبج مش فرحانين
عزيزتى اميره
اولا عندك حق وموضوعك رائع.
مش عارف ليه فكرتينى ب البضاعه الصينى
الى عندى حساسيه منها.
نحن فى عصر الاشباه والتقليد والصينى
ثانيا
كان فيه احتمال وامل اخير بيعافر
ضد التيار انى اشتغل فى المحاماه.
بس حضرتك مشكوره اطلقتى رصاصة الرحمه على اخر احلامى .
تحياتى ويومك سعيد
إرسال تعليق