04 سبتمبر 2011

والنيعمة ماانا ... دي اختشششششي مني !!!!ا



انا واخده قرار من زمان اني ماانطقش !!!
وانطق ليه ، مافيش اي حاجه ليها فايده ، الكلام ماسخ ومالوش قيمه ، والناس بتعمل اللي هي عايزاه وبس ، مفيد مضر حيوديي البلد في داهيه ، هما مبسوطين كده ومين بقي اللي يعرف يمنع واحد ينبسط حتي لو كان بيولع في طرف هدومه نار حتحرقه بسرعه قوي ، هو مبسوط وبس !!!
واخده قرار اني ماانطقش !!! لكن الدنيا باظت قوي وزادت عن حدها !!!
والحاله بقت ( تيكيلام تيكيلام ) قلت افك عن قلبي شويه بشويه كلام لاحيودي ولا حيجيب ، بس افضفض لحسن حاطق ، افضفض وبس ، وبعد كده يظل الشعار العظيم ( اياكش تولع ) شعار قائم ومستمر لحين اشعار اخر !!!!
الثورة قامت وحسني مبارك اتشال وكمان بيتحاكم والداخليه وحشه وحتفضل وحشه وهيه فوضي !!!

الشعب اللي تصورت النخب السياسيه انه مشغول بالديمقراطيه ومهموم بحقوق الانسان وسياده القانون وزعلان من حسني مبارك ونظامه الفاسد لانه لايؤمن بالديمقراطيه وتداول السلطه ويعتدي علي حقوق الانسان ويهينه ويهين كرامته ولايحترم القانون ولا يطبقه علي الوزير قبل الغفير ، الشعب - الشعب ، مش الشعب كله ، لا طبعا ، بعض من الشعب - قرر يضرب القانون بالجزمه ويضرب الديمقراطيه بالسيف ويعتدي هو شخصيا علي حقوق الانسان !!! لان الانسان من وجه نظر الشعب اللي مفروض نحافظ علي حقوقه هو شخصيا اما الاخرين فليسوا انسان وليس لهم حقوق واللي مالوش ضهر ينضرب علي بطنه !!!

زمان كان الضهر شخصيه كبيره حتي لو كانت امين شرطه اسمالله ، اما دلوقتي الضهر هو سلاحك وعلي راي الست ام اللبني ، مطوتك في جيبك !!! ايوه ياخالتي الشعب كله بقت مطوته في جيبه او سنجته في جيبه او طبنجته في جيبه و............ تحيا الحريه الثوريه والمهلبيه ويسقط الطريق الدائري وام اللي بيمشوا عليه الان وغدا وليوم الدين !!!

الشعب اللي تصورت النخب السياسيه انه مشغول بالديمقراطيه ومهموم بحقوق الانسان وسياده القانون ، طلع مهموم مكبوت ومتقيده حريته وانه مش عايش براحته ولا بيضرب نار براحته ولا بيبلطج براحته ، واول ماالداخليه الوحشه وضباطها المجرمين بطلوا يكبتوا حريته ، انطلق الشعب من كل فج عميق يخرب الدنيا بفوضويه عبثيه عظيمه بحجة انه بيعيش حريته الجميله ، واحرار ياثوره احرار !!!
الشعب ، مش الشعب كله ، لا طبعا ، بعض من الشعب ، علشان مااقعش انا كمان في جريمه التعميم !!!! بعض من الشعب قرر ان الحريه هي البلطجه ، والبلطجه مش ان مواطن يطلع بيتي يضربني ، لا طبعا ، البلطجه ان مواطن يقرر انه حيعمل مابدا له واللي حيتصدي له حيتضرب لما يموت لانه عدو الحريه !!!

مواطن ينصب نصبه شاي فوق الطريق الدائري وياخد للتلاجه بتاعه وصله كهرباء من عمود النور ، ويغسل كوبيات في جردل وسخ ويعمل شاي لسواقين النقل ويمكن يبيع لهم حشيش ويقلب الطريق غرزه ويعطل المرور لزوم المزاج والاصطتباحه ، ولما تقول ايه الكلام الفاضي ده ، الاول يتقال لك حرام ده بيسترزق وغلبان ، ولو الكلام ده ماجابش معاك نتيجه ، يتقالك بصوت اكثر حده ، هو اكمن ربنا مديك ماانتاش حاسس بالغلابه وهي تهمه الايام دي تساوي انك مجرم غني مش حاسس بالفقراء اللي ياحرام من حقهم يعملوا نصبه شاي علي الطريق ، وعلشان تنفي التهمه الشنيعه دي عن نفسك تقول وانا مالي اياكش تولع ، ولو كانت راسك جزمه ومصمم يعني ان ده غلط ومش نظريه فقر وغني ولاتخضع للابتزاز وتقول بس كده مخالف للقانون ، تبقي انت بقي اللي جبته لنفسك والسنج تطلع والمطاوي قرن الغزال ولو كترت شويه ، عربيتك تتكسر ويطلع عليك اهل الراجل الغلبان ينزلوا فيه ضرب او حتي يموتوك ، ماطظ في سعادتك واهلك والقانون وحقوق الانسان وتعيش الحريه والفوضي ونصبه الشاي !!!!
تسال نفسك لانك حمار زيي وتقول هي دي الثوره هي دي الحريه ، يرد عليك خبير بالثورات والحريات يقولك اصل حسني مبارك ونظامه الفاسد افسدوا الشعب !!! وطبعا لانك حمار زي تزغرط علي طول ، لان الاخ خبير الثورات بيبرر للبلطجيه اللي بيعملوه وبيرمي الجته بدودها علي حسني مبارك اللي لازم يحاكموه علي الفساد السياسي وعلي النصبه المفروشه علي الطريق الدائري !!!!!!!!!!!!!!!!

طيب .....
عيلتين يتخانقوا لاي سبب ، جايز جاموسه دخلت ارض واحد تاني، جايز بت لونه من بنات العيله دي عاكسها واد رقيع من ولاد العيله ، بدل التانيه بدل مالعيلتين يقعدوا زي الكبار المحترمين يضربوا البت والواد ويلموهم ، العيلتين يشيلوا الي ويطلعوا فوق الطريق الدائري وهاتك ياضرب نار ، بيضربوا في مين ساعتها ، مش مهم ، المهم اننا اقويا ومفترين ومحدش يعرف يدوس علي رجلينا واللي يقرب منا نموت امه ، ياحلاوه علي الحريه ، ياجمال الديمقراطيه ، ياحقوق الانسان ياعسل انت عسل اسود ومهبب !!!! الطريق يتقفل ، لان فيه بطلجيه بيضربوا نار ، طبعا ساعتها العربيات تجري بعيد ويمكن تمشي عكس الاتجاه وتنزل من المطلع وكله يبعد عن الشر ويغني له ، وفجأ تلاقي عيال ستاشر سنه لسه مابلغوش ، شايلين الي وفارضين سطوتهم علي الطريق الدائري وركابه وهوووووووووووووب تحيا الثوره ويخرب بيت حسني مبارك اللي افسد الشعب فخلاه يشيل الي ويطلع فوق الطريق الدائري يقطع الطريق !!!!!!!!!!

طيب ...
راجل فلاح بيعدي من علي طريق مصر اسكندريه الزراعي اللي مفروض انه طريق سريع وممنوع حد يعدي منه ، الحاج بيعدي هو والحاجه وسط العربيات اللي ماشيه بسرعه ، بتعدي ليه ياحاج من هنا ، لان مافيش حته تانيه اعدي منها ، طيب كده خطر ياحاج ، ياعم قول ياباسط والعمر واحد والرب واحد ، ويالا ياحاجه همي شويه علشان نعرف نعدي ، الحاجه تخينه وجلابيتها طويله وماينفعش تلمها علشان رجليها البيضه ماتبناش للسواقيين وجوزها يقتلها ، الحاجه التخينه تتكعبل في الجلابيه ، وتقع علي الارض ، والسواق البائس اللي جاي بسرعه مايشوفهاش وهي بتقع وفجأ يلاقيها قدامه علي الارض، يقرر يفاديها ، وهوب هوب هوب هوب ، يخبط في السواق اللي جنبه والسواق اللي جنبه يخبط في الميكروباص والميكروباص يدوس الحماره والناس كلها تنزل تضرب في بعض ، لا مش ضرب بالايد طبعا ، كل واحد يضرب باللي يعرفه ، اشي سنجه اشي فرد اشي طبنجه اشي شومه ، ضرب ضرب ، ولان الحاجه التخينه وقعت علي الارض والعربيه داستها ، واحد ابن حلال يجري علي البلد يقول الحقوا السواقين قتلوا الحاجه ، يانهار طين ، الدم يغلي في العروق ، اهل الحاجه ياخدوا الالي ويجروا جري علي الطريق ، وهاتك ياضرب نار ، في مين مش مهم ، المهم ان الحاجه اتكعبلت في الجلابيه ووقعت علي الارض ، اضرب ياجدع ، رصاص رصاص ، وفجأ مواطن غلبان لاشاف الحاجه ولا طرف جلابيتها ، تيجي رصاصه في عينه او في قلبه وهووووووووووووب ، مات الجدع ، الله مايموت ، ماهو عمره كده هو احنا اللي كاتبين له انه يموت مرمي كده علي الزراعيه ، والرصاص يلعلع علي الزراعيه والحاجه تتكعبل علي الزراعيه والحريه عظيمه علي الزراعيه ، وكله طبعا كله بسبب حسني مبارك ، اللي معاملش للناس اماكن تعدي منها علي الطريق السريع ومااقنعش الحاج والحاجه انهم ماينفعوش يعدوا وسط العربيات المسرعه وانه مافهمهمش ان العمر واحد والرب واحد صحيح لكن برضه قالوا لاترمي نفسك التهلكه ، كله كله من حسني مبارك ونظامه الفاسد و.............. وتحيا الحريه ويحيا السلاح الالي علي الزراعيه !!!!

طيب ...
البهوات ، اه البهوات ، البهوات خريجي كليه الحقوق ، اللي بيقولوا انهم جايبين تقديرات عاليه وكان لازم يخشوا النيابه ، علشان يبقوا رجال قضاء يطبقوا القانون ، البهوات اللي لم يحالفهم الحظ واتقبل ورقهم للتعيين في النيابه ، بيقولوا ان اولاد المستشارين اخدوا اماكنهم ، هما بيقولوا لكن محدش عارف الحقيقه ، يعني البهوات اللي غضبانين بيتكلموا وبس ، لاحد شاف تقديراتهم ولا عرف ان كانوا قدموا ولا لا ولا نجحوا ليه ولا سقطوا ليه ، محدش عارف حاجه ، المهم ان البهوات اللي اكتشفوا انهم مش حيبقوا بهوات في النيابه وعلي باب كل منهم عسكري ، واكتشفوا انهم حيبقوا من الشعب محامين او يشتغلوا في الضرايب او في اي حته غير النيابه ، البهوات اكتشفوا انهم حيبقوا من عامه الشعب لايقف علي بابهم عسكري ولا حد يضرب لهم سلام ، ياسلاااااااااااااام ، البهوات اللي بيعترضوا من وجه نظرهم علي التمييز ومخالفه القانون ، يطلعوا هيلا بيلا علي دار القضاء العالي ويعملوا مظاهره سلميه جدا ، سلميه كلها شتيمه وسب وبس ، يعني لا ولعوا في المبني ولا قتلوا العساكر ، هي الشتيمه تخلي المظاهره مش سلميه ، ابدا ولا حتي الشتيمه بتلزق ، البهوات خريجي الحقوق اللي مفروض انهم جايبين تقديرات عاليه وعايزين يبقوا من رجال القانون اللي بيطبقوه ، البهوات دول نزلوا هاتك ياشتيمه في النيابه والمجلس الاعلي للقضاء والمستشارين شتيمه من اللي قلبك يحبها ، البهوات خرقوا القانون اللي عايزين يبقوا من رجالته ، البهوات قرروا يقتحموا المكاتب علي رجال النيابه ولما العساكر منعوهم ، بس منعوهم لا ضربوهم ولا قبضوا عليهم بتهمه اقتحام المكاتب والسب والقذف ، البهوات نزلوا ضرب في العساكر وفي نفس الوقت شتيمه في العادلي والداخليه وافتراءات رجاله الداخليه وفي حسني مبارك ونظامه الفاسد !!! يانهار اسود ، انتم عايزين تبقوا رجال قانون وتطبقوا القانون ويبقي في ايدكم سلطه وتحاكموا الناس ، وياتري حتحاكموهم بايه ، بالعدل ولا بالمظاهرات ، طيب يؤسفني اقول لكم ان القصه مش قصه تقديرات وبس ولا تفوق دراسي وبس ، فيه اعتبارات تانيه اهمها انكم بالبلطجه اللي انتم بتعملوها ومحاوله اقتحام المكاتب والشيتمه فقدتم الصلاحيه قبل ما تكتسبوها ، ولو واحد منكم بقي قاضي ، بصراحه اخاف اترافع قصاده واخاف يكون لي حق قصاده ، لانكم لابتحترموا القانون ولا حتحترموه ابدا ، والبلطجه مش هي الحريه والمطالبه بالحق مش الشتيمه وقله الادب ولا بالمظاهرات ، واذا كانت هي دي الحريه اللي بتتكلموا عنها وكنتم عايزين تشيلوا حسني مبارك علشان تعيشوها ، اهو مشي وادي الحريه اللي بتعيشوها وبتعيشوا ايامها السوده !!!!

طيب ...
برضه الدائري ، اه من ام الدائري اللي معذبني معاه ، علي الدائري بليل ، فجأ لقينا دخان ونار والعربيات كلها ضربت فرامل شديده وياساتر يارب عربيه بتتحرق ، الناس اتوترت والكوبري اتكعبل و............... زغاريط جامده جدا واتاري القصه فرح ، عروسه وعريس عاملين زفه ، واهلهم الفرحانين ، قرروا يحتلفوا بيهم وولعوا علب البيرسول وانابيب البوتجاز ويرقصوا بيها في الهوا ونار ودخان واتدلع ياعريس يابو لاسه نايلون ، ووووووووووووو حضرتك يعني زعلانه من ايه ، مانفرحش ؟؟؟؟؟ عينه كانت بتطق شرار وحمرا لون كاسات الدم والدخان الازرق طالع من نغاشيشه ، لا ياباشا افرح حضرتك براحتك وبيب بيب عروسه بيب بيب عريس ، والناس تعدي وتهز راسها وتتاسي علي البلد اللي مابقيتش بلد والناس بترقص بانابيب البوتجاز المولعه فوق الكوبري ، واللي يعترض يبقي مش عايز الناس تفرح ولا مستعد يقبل حريه الاخرين اللي مطلعه تلاتين عينه وعين اهله ، حريه يابا حريه ياحاج حريه ياعسل وياللي علي الترعه حود علي المالح ياللي علي الترعه حود علي المالح ................ وتحيا الحرية ويلعن ابو حسني مبارك اللي افسد الشعب وسلط الداخليه علي الشعب تكبته وتقيد حريته في انه يولع انابيب البوتجاز ويرقص بيها فوق الكوبري .......

طيب ...
سواقين يتخانقوا يقطعوا الطريق
عمالين ليهم حقوق عند الشركه يقطعوا الطريق
يحصل حادثه علي الطريق يقطعوا الطريق
يعترضوا علي المحافظ يقطعوا الطريق
لاسباب طائفيه وحرق كنيسه يقطعوا الطريق
خناقه علي جاموسه يقطعوا الطريق
باعه جائلين يفرشوا البضاعه وسط الشارع وفوق الرصيف ولما الناس تتكلم او الشرطه تتدخل يقطعوا الطريق


و.............. قلت الكلام مامنوش فايده ولا حيجيب اي نتيجه !!!
وادي الثورة وادي الثوار وادي الشعب اللي بيستمتع بحريته بعد طول كبت وادي القانون اللي بيتضرب بالجزمه وادي الالي والسنجه والفرد والطبنجه وادي اللي قال هات حته من ايدك اكلها وزززززززززززززززززززغغغغغغغغغغغغغغغغزززززززززززززززز !!!
ومبروك عليكم مصر الجديده ومصر القديمه ومصر الحرة !!! الله يبارك فيكي ياحبيبتي عقبال عوضك !!!

ومحدش يرجع يعيط ولا يشتكي !!! واللي يعيط مالوش غير المناديل الورق يمسح بيها عينه ويرميها في الشارع جنب بقيه الزباله اللي محدش راضي يشيلها لان حسني مبارك الفاسد علم الشعب القذاره ورمي الزباله في الشارع .... واللي يشتكي يشرب من المالح ، وياللي علي المالح حود علي الترعه ، ياللي علي الترعه حود علي المالح !!!!!!!!!!!
والنيعمة ماانا ... دي اختشششششي مني !!!!ا
وماعنتش حانطق تاني اطلاقا البته بتاتا !!!!!!!!!!!!!

اخر كلمه مالهاش لزمه برضه - هي الاحزاب والقوي والنخب السياسية مش ناويه علشان خاطر ربنا وخاطر مصر ، تدين انفلات الجماهير وسلوكها الفوضوي العشوائي في قطع الطرق وضرب النار والبناء بدون ترخيص وكل اشكال مخالفه القانون اللي بتشكل جرائم وبتعتدي علي حقوق المواطنين الاخرين وعلي القانون ، هي الاحزاب دي مش ناويه تبصر الجماهير بان سلوكها المنفلت جريمه وليس حريه والحريه حاجه والفوضي حاجه ، هي الاحزاب دي مش ناويه تعمل حاجه مفيده للوطن ولا حتفضل تطلع بيانات وتقول كلام محدش يفهمه ولا يلزمه ولا يسمعه لان صوت ضرب النار اعلي من صوتها اللي محدش بيسمعه ؟؟؟؟؟؟؟؟؟؟؟



هناك 5 تعليقات:

مها العباسي يقول...

اروح اجيب الشيكولاته البلاك وهاجى على طول

غير معرف يقول...

من مجدي السباعي
والبلطجه مش هي الحريه والمطالبه بالحق مش الشتيمه وقله الادب ولا بالمظاهرات ، واذا كانت هي دي الحريه اللي بتتكلموا عنها وكنتم عايزين تشيلوا حسني مبارك علشان تعيشوها ، اهو مشي وادي الحريه اللي بتعيشوها وبتعيشوا ايامها السوده !!!!

حمدا لله علي السلامه ...اضعف الايمان ان نتحدث ولا نختشي ...للاسف الحريه المزعومه""""الفوضي """عمت الكل ...وعندما تعم الفوضي ترحمي علي كل شئ
الاحزاب ياافنانه ليست كما يظن الناس احزاب حقيقيه بل هي احزاب كرتونيه لارصيد لها فكيف تريدنها ان تهاجم الشعب وسلوكه

غير معرف يقول...

ماهو دا اللى احنا توقعناه واللى قلناه من اول يوم ثوره
لااااااااااااااااااااااااااااااااااازم نتغير احنا الاول قبل ما ندور على تغير
لما قلنا كدا ساعتها سمعنا اقبح الشتائم
واقذر التعليقات وقالو علينا من اعداء الثوره .........
اللى قلتيه دا واققع بلد وشعب وحكومه وناس ...ناس معندهاش وعى ولا ادارك ناس عايشين بادراع ...شعب فرعون
وبس كفاااايه علشان انتى قلتى كل حاااااجه

احمد سكر

يا مراكبي يقول...

حالة من الغل والتشفي لم نتوقعها على الإطلاق !!

وشعب يحتاج إلى تربية من أول وجديد .. مليان سواد من جواه .. وعشان كده كما تكونوا يولى عليكم

واتذهب تلك الحرية إلى الجحيم إذا كانت ستتعدى وتلتهم حرية الآخرين

غير معرف يقول...

مازن انا

المشكله ببساطه ان محدش عايز يتعب عشان يعمل تغيير او عشان البلد تبقى احسن دائما بتكلم مع الناس عن الدنيا و الخراب اللى فيها كنت باخد رد حلو اوى يا عمى هما سنتين و الدنيا هتبقى زى الفل و ترجع زى الاول ارد اقول يا ابنى ولا عشر سنين عشان نرجع زى الاول يقولى لا انت مش فاهم حاجه (( لم تفكرى فى كلامه و ايمانه بيه تتوصلى انه فاكر ان الامور سهله و ان الثوره انجزت و خلصت كل حاجه و خلت البلد ميه ميه )) المهم التغيير المنشود اللى لازم يكون فى العيوب الفكريه اللى عند الشعب و العيوب فى الاخلاق و العادات و التقاليد اللى زى الزفت ده على اغلب الظن احنا كجيل احنا الناس اللى عندهم 25 26 لحد حاجه و تلاتين مش هنشوفه تقريبا و احتمال على اخر ايامنا يعنى العيال الصغيرين هما اللى هيشوفوا التغيير المزعوم ممكن يعنى المشكله الناس تقريبا و محدش عايز يعترف اختصره الثوره و العبارات الرنانه اللى كان بيقولوها مصر قويه حره و بتاع فى محاكمه مبارك مش مهم بقى التعليم يبقى كويس ولا اى حاجه المهم اننا نعدم مبارك يعنى مثلا حاجه بسيطه اوى تعرفك ان الناس بتكلم بس محدش عنده استعداد يفكر كلمه كل الناس بتسمعها تطوير التعليم ؟؟؟؟؟ يعنى ايه و النبى اطور التعليم ازاى زى الصعيدى اللى حب يطور الهليكوبتر شال المروحه حط تكييف ايه هو هدفك من تطوير التعليم افهم الاول ؟؟ عايز توصل لايه تطوره ازاى يعنى ؟؟؟ توصل بيه لايه او ان الخريج من العمليه التعليميه ده يعمل ايه يكون عارف و فاهم ايه ؟؟ تلاقى مفيش حد يرد عليكى اى حد جهبذ يقولك من غير تعليم مفيش كله بيتكلم و خلاص سباق فى الكلام مش اكتر و افعال مفيش اغلب الناس اللى انتى بتكلمى عليها معندهاش مفهوم الصح و الغلط هو عاش جزء كبير من حياته مخدشى نصف فرصه عشان يبقى بنى ادم مش بعفيه من الحساب او الغلط بس نحاول نفهم هو بيعمل كده ليه يمكن نقدر نغيره او نفهمه الصح صحيح تطوير التعليم بيبقى ان الانسان يخرج من الثانويه يقدر يشتغل بيها مش يخرج من الجامعه برده ميعرفشى حاجه خالص