28 أكتوبر 2011

عادي !!!ا



سؤال بريء ...
هو لسه فيه حاجه اسمها قومية عربية ؟؟؟
حد فاكرها ، القومية العربية ، الي كانت بتقول العرب امه واحده خالده من المحيط الثائر للخليج الهادر يجمع بينهم لغه الضاد والتاريخ المشترك والجغرافيا ؟؟؟
القومية العربية بتاعت ، امجاد ياعرب امجاد !!!
هو الكلام ده لسه موجود ولا خلص !!!!
ليه باسال ، اصل بتوع القوميه العربية ، كانوا بيقولوا ان اسرائيل هي شوكه زرعتها امريكا في قلب الامه العربية !!!
شوكه ، زرعتها امريكا الامبريالية الاستعماريه في قلب الامه العربيه !!
وكان بتوع القوميه العربية بيطالبوا بوحدة كل الشعوب العربية ، باعتبارها مصير استراتيجي لابد منه ، بدل التفتت والتشرذم الذي صنع بيد الاستعمار بوضع حدود مصطنعه بين ابناء الشعب الواحد ، اللي هو الشعب العربي !!!!
طيب ... الناصريين والقوميين العرب ، اللي طبعا مؤمنين بفكره القوميه العربية !!!
اللي ماشيين علي طريق الزعيم الخالد جمال عبد الناصر رايهم ايه في كل اللي بيحصل في المنطقه العربية النهارده ؟؟؟
يعني رايهم ايه في حزب الناتو اللي بيضرب الشعبي العربي الليبي واللي بيقتل عملاءه الرئيس العربي الليبي معمر القذافي واللي بيطلب المجلس الانتقالي الليبي منه البقاء في ليبيا حتي اخر العام ، رايهم ايه ؟؟ عادي ، عادي ان حزب الناتو واوربا وامريكا يقرروا يحتلوا ليبيا عن طريق عملائهم للاستيلاء علي البترول " العربي " الليبي !!! عادي ؟؟
طيب رايهم ايه في الدعوات التي تطالب بضرب بشار الاسد ونظامه حمايه للشعب السوري ، وطبعا لان مش بابا وماما اللي حيضربوا سوريا لكن طبعا اللي حيضربهم حزب الناتو وعملاءه والطائرات الامريكيه اللي طالعه من القاعده العسكريه بقطر !! رايهم ايه ، هل ده يعتبر اعتداء علي شعب عربي يلزم في اقل الحدود الادانه والاستنكار والشجب ولا برضه عادي !!! عادي حزب الناتو يضرب بشار الاسد ويحرر سوريا الغلبانه من النظام الديكتاتوري ؟؟ عادي ولا ايه ؟؟؟
طيب ايه رايكم في القاعده الامريكيه في قطر ، القاعده العسكريه الامريكيه في قطر ، لو نظريه يعني ان قطر نفسها في قاعده عسكريه علشان تعمل لنفسها قيمه ومنظر وسط الدول وهي مجرد 2 متر مربع من الارض طلع ليهم قناه اخباريه ، افهم ، لكن لما القاعده العسكريه الامريكيه في قطر يطلع منها طيارات تضرب ليبيا والشعب " العربي " الليبي ، وبتستعد دلوقتي علشان تضرب سوريا والشعب " العربي " السوري ، يبقي ايه رايكم ؟؟؟؟
طيب ... ايه رايكم في الدعم الامريكي لمنظمات المجتمع المدني المصري من حركه حقوق الانسان لائتلافات الثورة لغيرها وغيرها ، ايه رايكم ان امريكا بتمول المنظمات والائتلافات دي علشان يعلموا الشعب المصري الديمقراطيه وحقوق الانسان !!! ايه رايكم ، ولا برضه عادي ؟؟؟؟؟؟؟؟؟ طيب انتم مصدقين ان امريكا اللي كانت امبريالية واستعمارية بتحب المصريين بحيث بتصرف فلوسها علي منظماتهم لتعليم الديمقراطيه وحقوق الانسان ، ولا مش مصدقين ، واذا كنتم مش مصدقين وشايفين ان في الامور امور ليه ساكتين وليه مابتتكلموش وليه مابتفضحوش اللي بيحصل !!!!
اذا كانت القوميه العربيه كفكر وعقيده لسه موجوده وكل اللي بيحصل بيحصل وانتم ساكتين تبقي مصيبه !!!
واذا كنتم اتخليتم عن فكركم واحلامكم ومشروعكم القومي وبقيت مجرد شويه معارضين بتقولوا كلام فاضي وبس تبقي المصيبه اعظم!!
ايه الحكايه بقي ، حد حيشرح ؟؟؟ ولا برضه عادي !!!!!ا

هناك 3 تعليقات:

غير معرف يقول...

أجدادنا صخر الأجداد
أولادنا يا زين الأولاد
أمجاد يا عرب أمجاد
فى بلادنا كرام أسياد

غير معرف يقول...

من مجدي السباعي
عادي عادي لو لعيتي عقلك وبحثتي عن الشهرة كنت شفتيه عادي
لو بصيتي للعراق ونشر الديمقراطية واللي حصل فيها هتقولي برضه عادي ان أمريكا تعمل كده

وجع البنفسج يقول...

الموضة اليومين هذول مش القومية العربية .. هي كانت فترة وانتهت مثلها مثل الاشتراكية والشيوعية .. وكل يوم يظهر فكر جديد وتيارات جديدة ..

ربنا يصلح الحال يارب ..