هل كنت تعرف ؟؟؟؟

اخبرتني العصفورة الصغيره التي ترابض علي غصن الشجرةالاخضر فوق شباكك انك ابتسمت !!! 
اخبرتني وطارت فابتسمت انا وتحممت وتزينت وارتديت اجمل ثيابي واحاسيسي وانتظرتك !!! 
اعرف ياحبيبي انك حين تبتسم تفكر في وتفتقدني وتبحث عني وتقودك مشاعرك عندي !!
جلست في الشرفه وموسيقي هادئه تلفني اتأرجح علي مقعدي الهزاز انتظرك !!
لم يطل انتظاري ، اصابع دافئه اغلقت عينيا وسالتي بصوت احبه ، انا مين ؟؟
ابتسمت وقبلت اصابعك وصمت ، فعرفت اجابتي وغضبت من العصفورة التي افسدت مفاجئتك !!! 
جلست بجواري مبتسما فطار سرب العصافير بعيدا يعرف اني لااحتاج وشوشاته ولا تغريده 
فوجودك منحني كل الدنيا في قلبي واغناني عن اجمل مافيها !!! 
ابتسمت ابتسامه حنونه فسطع القمر يشق غمام السحب وارتجف قلبي !!! 
وعادت العصفورة فوق الغصن الاخضر فوق شباكك تنتظرك حين تعود لتحكي لها قدر سعادتنا !!! 
انتظرتك وانتظرتك وطال انتظارها لاتعرف ان لن تعود اليها فقد سكنت لحبي واستكنت !!! 
انت حبيبي .... همست لك بقلبي ، فاشتعل الوجد وطال الليل وصار العالم اجمل !!! 
هل كنت تعرف ان ابتسامتك تجعل العالم اجمل ؟؟؟؟؟؟؟؟؟

الدعاء لمصر امانة ....

يارايحين للنبي الغالي

هنيالكم وعقبالي

اللي يعرف حاج ربنا وعده بزياره بيته الكريم ، ساعه النظر للكعبه الشريفه ساعه دعاء مستجابه ، وصوهم يدعوا لمصر ، وصوهم يدعوا لمصر بالخير وربنا يحفظها ويكرمها وينجيها من كل شر ، وصوهم يدعو لمصر ربنا يحفظها ويكرمها وينجيها من شر الناتو وامريكا وقطر والجزيره واسرائيل وكل اللي تبعهم !!! وصوهم يدعو لمصر ربنا يحافظ عليها بلد المسلمين والاقباط والشعب الجميل ويكفيها شر التقسيم والحروب الاهلية والفوضي المدمرة ... وصوهم يدعوا لمصر ، دي ساعه دعاء مستجابه ينسوا نفسهم ويفتكروا مصر ، هي محتاجه النهارده الحب والمسانده من كل محبيها وابناءها .... الدعاء لمصر امانه ياحجاج بيت الله ......

لااشعر بالطمأنينة !!!!ا

لااشعر بالطمأنينه خارج بيتي !!! 

واحيانا اخاف حتي وانا في بيتي !!!! 

لااشعر بالطمأنينه وانا خارج بيتي !!! 

لاني خارج بيتي مواطن " بلا دية " وبلا احد مسئول عني ولا عن اماني ولا حمايتي!! 

اشعر وانا خارج بيتي ان استباحتي سهله وممكنه ، وهي استباحه لن اقوي علي ردها !!! 

ربما سيسرقني احدهم ، يخطف حقيبه يدي ،ربما سيهددني بسنجه او مطوة او حتي طوبه كبيره او زجاجه ميه نار !!! 

وقتها ساترك له الحقيبه واجري !!! 

لذا لااحمل في حقيبتي الا ماهو ضروري ، اوراقي صورتها حتي اذا سرقت استطيع استخرج من الجهات الرسميه غيرها ..

لااحمل نقودا كثيره ، رغم ان هذه الايام كلمه النقود الكثيره كلمه مضحكه لان لااحد يملك نقودا كثيره ، رغم هذا اترك معظم نقودي التي احتاجها للاكل والشرب والدروس وسداد الاقساط ، اتركها بعيدا عن حقيبه يدي حتي اذا ضاعت الحقيبه او سرقت لاافقد فوق الحقيبه والاوراق والتليفون المحمول نقودا ، يعورني ، ضياعها !!!! 

لو اقترب مني احدهم وطالبني بالحقيبه ساتركها له واجري ، لن اقاومه ، ولماذا افعل ، لن اقوي عليه ولااملك في حقيبتي مسدسا لاقتله به ولا مطوه لاضربه بها ولا سبراي فلفل احرق عينيه به ، لن اقاومه ، ولمااعرض نفسي لطعنه طائشه او قلم مدوي ، او ركلتين يكسرا ضهري الذي اصلبه بالادويه المسكنه !!!! 

ربما يضرب زجاج السياره بقالب طوب ويستوقفني عنوة وانا اسير علي طريق موحش مظلم في الليل لااملك غيره سبيلا لبيتي ، ربما يضرب زجاج السياره بقالب طوب وينزلني منها ويسرق السياره التي طفحت الكوته لاسدد ثمنها وبقيه اقساطها ، ربما سيسرق حقيبه يدي وتليفوني المحمول ، وقتها ساقف في الظلمه وحيده لااعرف كيف اتصل بااحد لاخبره ينقذني ، ربما سانام حتي مطلع النهار مكاني ، ربما ساجري علي الطريق زي المجنونه ابحث عن من يساعدني !!!! 

اه منها المخاوف والهلاوس والمشاعر الموحشه التي تنتابني وانا خارج بيتي !!!! 

البلطجي المجرم الذي يستبيح شوارع مدينتنا ويستبيحنا يعرف ان الحكومه ماتت ، والحكومه ليس وزير الاقتصاد والزراعه ، الحكومه عند البلطجي ، هي العسكري وامين الشرطه ومامور القسم والقاضي والسجان ، يعرف البلطجي ان هؤلاء ماتوا ، ولن ينالوا منه ولن يعاقبوه ولن يردعوه ، يعرف ان هذا الوقت الجميل بالنسبه له هو فرصته الاساسيه ليسرق ويعيش اجرامه كما يحلو له ، فالحكومه لن تظل ميته الي الابد ، لكنها ستعود للحياه في وقت ما ، وحتي تعود للحياه عليه انتهاز فرصه موتها ليفعل مايحلو له !!!! 

وهذا البطلجي المجرم ، يقف معه الثوار ويحموه من المحاكمات العسكريه لانه مدني ، ولايجوز طبقا لقواعد حقوق الانسان محاكمه المدنيين امام محاكم عسكريه ، لذا يطالب الثوار بحمايه البطلجي من سطوه القضاء العسكري والمحاكم العسكريه ، اذن لامحاكمات عسكريه للمدنيين حتي لو كانوا بطلجيه يروعوا المواطنين المسالمين ، ولا حكومه لانها ماتت مؤقتا ، اذن هذه هي ايام البطلجيه ، ايام سعدهم وهناهم واللي مش عاجبه يحبس نفسه جوه بيته لغايه مايطق يموت من الرعب !!!! 

لذا لاااشعر بالطمأنينه خارج بيتي !!! 

اري هلاوس وهواجس رهيبه ، اري بطلجي يحمل في يده اليمين سنجه وفي يده الشمال لافته لالمحاكمه المدنيين امام المحاكم العسكريه واسمعه يهنئني بقفل المحاكم بالجنازير لان المحامين غاضبين من مشروع قانون السلطه القضائيه ويهنئني لان الجمعيه العموميه للقضاه قررت تعليق العمل بالمحاكم لمده شهر ، ويهنئني لان الضباط في اقسام الشرطه يعيشوا رعبا لان اهالي البطلجيه يقتحموا الاقسام بالمولوتوف ويحرروا السجناء من الحجز .... اري البطلجي سعيدا بكل مايحدث في الوطن مبتسما هانئا راضيا وهو يقترب مني يسرق حقيبه يدي ونظراته المتحديه وكانها تقول لي ، وريني بقي حتعملي ايه !!! واكاد اهمس ، مش حاعمل حاجه ، خد الشنطه وسيبني اروح لبنتي !!!! 

لااشعر بالطمأنينه خارج بيتي !!!! 

وربما احيانا اخاف وانا في بيتي !!!! 

اتصور جرسا سيدق، سافتح الباب ، ساجد بطلجي او عشره ، يطالبوني بالرحيل ، وقتها ساصرخ انادي بنتي وسنجري من الشقه ، هل ساقاومهم ، بالطبع لا ، لااملك قوه بدنيه ولا اسلحه لمقاومتهم ، والامر لايختلف عمااذ كان في منزلي رجل من عدمه ، فالرجل الذي ستوجعه رجولته ليقاوم البلطجيه سيموت سعيدا لانه دافع عن رجولته وعن بيته لكنه سيموت باسلحتهم غير المرخصه ويترك زوجته واطفاله يجروا في الشوارع وسيترك البطلجيه خلفه ينظفوا ارض الشقه التي استولوا عليها من دماءه التي وسخت الارض ويفتحوا التلفزيون ويشربوا شاي علي روحه الطاهره !!!! 

اتصور جرسا سيدق ، ويطالبني احدهم بالرحيل ، لن يقنعه منطقي بان مايفعله جريمه ، سيسخر من كلامي ، لن يقنعه منطقي ان القانون سيطاله في يوما ما ، سيسخر مني ومن القانون وربما يصدر من انفه اصوات تفصح عن تربيته الواطيه وعن استخفافه بتلك النصوص التي عطلها اضراب امناء الشرطه وقرارات الجمعيه العموميه للقضاءه وغضب المحامين وجنازيرهم !!!! ساقول له ان هناك فارق بين الثوره والفوضي ، سيسخر مني بالطبع لان الثوره التي يراها منذ لحظه اندلاعها هي الفوضي الجميله التي اتاحت له ولزملائه من المجرمين البطلجيه سرقه مايحلو له سرقته ، وضرب ضباط الشرطه والامناء اذا لزم الامر ، وحرق القسم بالمولوتوف اذا احتاج ذلك ، وضرب القضاه في المحكمه وتكسير القفص وقاعه الجلسه اذا لزم الامر ، الثوره التي عرفها منذ اندلعت هي ان حسني مبارك مشي والشعب خد حريته والحرية من وجه نظره لان الحكومه ماتت ، انه يعلي دورين بدون ترخيص ويرمي الردش فوق الكباري ويشرب حشيش قدام باب بيته ويسرق النسوان في الشوارع ويضرب اللي هو متغاظ منه ، الثوره بالنسبه له هي الحريه والحريه انه يعمل مابدا له واكتر حاجه هو عايز يعملها النهارده ، ده حسب ماحيقولي البلطجي ، انه يطردني من الشقه ويقعد فيها !!!! 

اه منها الهلاوس والهواجس وانعدام الطمأنينة !!!! 

كان لازم اتعمل اضرب نار ، ده اللي بقوله لروحي طول الوقت ، وكان لازم اشتري طبنجه ايام ماكان السلاح رخيص ، وكان لازم اعمل حديد علي كل الشبابيك والبلكونات وكان لازم اشتري كلب متوحش ياكل اللي يخوفني ، وكان لازم اعمل حساب الايام السوده واسافر من مصر قبل ماتسود ، كان لازم اتجوز راجل يعرف يحميني ، ويكون هو كمان بطلجي وبيعرف يضرب نار ، لانه لو مؤدب وابن ناس ودكتور ولا محاسب كان حيبقي حوسته من حسوستي ويمكن اكتر !!!! 

لااشعر بالطمأنينه خارج بيتي واحيانا كثيره داخلها !!!! 

لما الحكومه تموت ، والاقسام تقتحم ومديريات الامن تتضرب بالمولوتوف وتتحاصر بالبلطجيه ، ولما المحاكم تتكسر قاعتها والقضاه يتضربوا وعربيات الترحيله تتوقف في الشارع وينزل منها المحابيس احرار ، لما اهل المحكوم عليهم مايعجبهومش الحكم فيضربوا القاضي او يحبسوه لغايه مايغير حكمه ، لما قاعات المحاكم تتكسر لان القاضي بيعمل اللي مش عاجبنا !!! لما كل ده يحصل ، يبقي البطلجي الحرامي مايسرقنيش ازاي ومايضربنيش ازاي ومايعتديش علي ازاي !!! وهو عارف ومتطمن ومبسوط انه حتي لو سرقني او ضربني وبعدين راح المحكمه العسكريه لان المحاكم المدنيه متعطله ، عارف انه حيبقي بطل والناس هتهتف باسمه وتعمل يفط تطالب بالافراج عنه وعدم محاكمته امام القضاء العسكري حتي لو مااتحاكمش خالص ويمكن يطلع في التلفزيون  هو واهله ويعيط ويشرح انه مجرد بطلجي مدني لايحق للمجلس العسكري المتعسف يحاكمه امام القضاء العسكري لانه لاسرق دبابه ولا اقتحم وحده عسكريه ولا هو مجند فيه الجيش ، هو يعيط والناس كلها تعيط معاه علي الظلم اللي بيتعرض له البلطجي المدني بمحاكمته قدام المحاكمه العسكريه ، ومش بعيد ويعمل احاديث في التلفزيون والنت ، ليه كل ده ، لانه ضحيه للمجلس العسكري المجرم اللي مش مصمم يحيل المدنيين للمحاكمات العسكريه وعايز يعاقب البلطجي اللي سرقني او ضربني او اعتدي علي ، هو انت عسكريه ياست انت ، لا والله ، انت مدنيه والبطلجي مدني ، يبقي نحاكمه قدام القضاء العسكري ليه ، اما نحاكمه فين ، لما الحكومه تصحي من الموت نبقي نحاكمه وخليكي متمدينه واحترمي حقوق الانسان ومواثيقه !!! 

لا ............. البطلجي يسرق ويضرب ويهدد ويروع ، وبعدين مافيش محاكمه عسكريه لانه مدني ومافيش محاكمه مدنيه لان الحكومه ودراعها الرادع شرطه وقضاء وسجون واحكام ماتت والي حين اشعار اخر !!! 

انها ايام البطلجيه والحراميه والمجرمين !!!! وهنيئا لهم ايامهم الجميله وجاتنا نيله في حظنا الهباب !!!! 

وعلي راي المثل ، اللي ماسرقش الايام دي عمره ماحيسرق واللي مابلطجش الايام دي عمره حاحيبلطج !!!! 

طيب واحنا .................؟؟؟

احنا ندفع ثمن الثورة ، ماهو مافيش حلاوه من غير نار ، ومافيش ديمقراطيه من غير فوضي !!!! 

ندفع الثمن ، لان اللي مش حياخد حاجه دلوقتي عمره ماحياخد حاجه !!!! 

ندفع الثمن ، نخاف وايه يعني مانخاف !!!! 

ندفع الثمن واحنا مبسوطين وبنقول يارب الثوره تنجح !!! ويارب المليونيات تنجح !!! ويارب الثوار ينجحوا !!!! 

ندفع الثمن ، عادي جدا ماكل الشعوب دفعت الثمن !!!! 

طيب ............. ربنا ينجح الثوره واحنا ندفع الثمن !!!! 

بس ........ اؤكد واؤكد .... اني لااشعر بالطمأنينه الا داخل بيتي واحيانا كثيره لااشعر بها حتي داخل البيت !!! 

طبعا دي مشكلته انا النفسيه لكن مصر بخير والثوره بخير وكله بخير !!!ا

و................ لم اعد اشعر بالطمأنينة !!! 

وطالما لااشعر بالطمأنينه فلاافكر في اي شيء اخر !!! 

الديمقراطيه رفاهيه لاافكر فيها ، الحريه رفاهيه لاافكر فيها ، الثوره رفاهيه لاافكر فيها !!! 

كل ماافكر فيه الطمأنينه علي نفسي وحياتي وبنتي وشغلي !!! 

اعرف ان كلماتي ستغضب بعض الاصدقاء ، فقط اطالب من يعيش منهم خارج الوطن ومتحمس للثوره ويطالبني بدفع ثمنها ، اطالبه بالا يغضب مني و اذكره انه ينام هانئا في بلاد امنه لاتنتابه الكوابيس والهلاوس والمخاوف ولايشعر بالتهديدات التي اشعر بها ، اطالبه الا يغضب مني لاني وقتما طالبني بدفع الثمن ولم يدفعه هو لم اغضب منه وتفهمت وطنيته وحبه للوطن مثلما اتمني منه يتفهم وطنيتي وحبي للوطن وانا لااشعر بالطمأنينة !!!! 

عادي !!!ا

سؤال بريء ...
هو لسه فيه حاجه اسمها قومية عربية ؟؟؟
حد فاكرها ، القومية العربية ، الي كانت بتقول العرب امه واحده خالده من المحيط الثائر للخليج الهادر يجمع بينهم لغه الضاد والتاريخ المشترك والجغرافيا ؟؟؟
القومية العربية بتاعت ، امجاد ياعرب امجاد !!!
هو الكلام ده لسه موجود ولا خلص !!!!
ليه باسال ، اصل بتوع القوميه العربية ، كانوا بيقولوا ان اسرائيل هي شوكه زرعتها امريكا في قلب الامه العربية !!!
شوكه ، زرعتها امريكا الامبريالية الاستعماريه في قلب الامه العربيه !!
وكان بتوع القوميه العربية بيطالبوا بوحدة كل الشعوب العربية ، باعتبارها مصير استراتيجي لابد منه ، بدل التفتت والتشرذم الذي صنع بيد الاستعمار بوضع حدود مصطنعه بين ابناء الشعب الواحد ، اللي هو الشعب العربي !!!!
طيب ... الناصريين والقوميين العرب ، اللي طبعا مؤمنين بفكره القوميه العربية !!!
اللي ماشيين علي طريق الزعيم الخالد جمال عبد الناصر رايهم ايه في كل اللي بيحصل في المنطقه العربية النهارده ؟؟؟
يعني رايهم ايه في حزب الناتو اللي بيضرب الشعبي العربي الليبي واللي بيقتل عملاءه الرئيس العربي الليبي معمر القذافي واللي بيطلب المجلس الانتقالي الليبي منه البقاء في ليبيا حتي اخر العام ، رايهم ايه ؟؟ عادي ، عادي ان حزب الناتو واوربا وامريكا يقرروا يحتلوا ليبيا عن طريق عملائهم للاستيلاء علي البترول " العربي " الليبي !!! عادي ؟؟
طيب رايهم ايه في الدعوات التي تطالب بضرب بشار الاسد ونظامه حمايه للشعب السوري ، وطبعا لان مش بابا وماما اللي حيضربوا سوريا لكن طبعا اللي حيضربهم حزب الناتو وعملاءه والطائرات الامريكيه اللي طالعه من القاعده العسكريه بقطر !! رايهم ايه ، هل ده يعتبر اعتداء علي شعب عربي يلزم في اقل الحدود الادانه والاستنكار والشجب ولا برضه عادي !!! عادي حزب الناتو يضرب بشار الاسد ويحرر سوريا الغلبانه من النظام الديكتاتوري ؟؟ عادي ولا ايه ؟؟؟
طيب ايه رايكم في القاعده الامريكيه في قطر ، القاعده العسكريه الامريكيه في قطر ، لو نظريه يعني ان قطر نفسها في قاعده عسكريه علشان تعمل لنفسها قيمه ومنظر وسط الدول وهي مجرد 2 متر مربع من الارض طلع ليهم قناه اخباريه ، افهم ، لكن لما القاعده العسكريه الامريكيه في قطر يطلع منها طيارات تضرب ليبيا والشعب " العربي " الليبي ، وبتستعد دلوقتي علشان تضرب سوريا والشعب " العربي " السوري ، يبقي ايه رايكم ؟؟؟؟
طيب ... ايه رايكم في الدعم الامريكي لمنظمات المجتمع المدني المصري من حركه حقوق الانسان لائتلافات الثورة لغيرها وغيرها ، ايه رايكم ان امريكا بتمول المنظمات والائتلافات دي علشان يعلموا الشعب المصري الديمقراطيه وحقوق الانسان !!! ايه رايكم ، ولا برضه عادي ؟؟؟؟؟؟؟؟؟ طيب انتم مصدقين ان امريكا اللي كانت امبريالية واستعمارية بتحب المصريين بحيث بتصرف فلوسها علي منظماتهم لتعليم الديمقراطيه وحقوق الانسان ، ولا مش مصدقين ، واذا كنتم مش مصدقين وشايفين ان في الامور امور ليه ساكتين وليه مابتتكلموش وليه مابتفضحوش اللي بيحصل !!!!
اذا كانت القوميه العربيه كفكر وعقيده لسه موجوده وكل اللي بيحصل بيحصل وانتم ساكتين تبقي مصيبه !!!
واذا كنتم اتخليتم عن فكركم واحلامكم ومشروعكم القومي وبقيت مجرد شويه معارضين بتقولوا كلام فاضي وبس تبقي المصيبه اعظم!!
ايه الحكايه بقي ، حد حيشرح ؟؟؟ ولا برضه عادي !!!!!ا

الاعلام الحمراء

سؤال بريء ؟؟؟
هما اهل اليسار بيبرروا لنفسهم ازاي التعاون مع امريكا رأس الامبريالية ؟؟
يعني لما يعملوا جمعيات ومنظمات ايشي حقوق انسان وايشي عماليه وايشي توعيه قانونيه وايشي نفسيه وتتمول من امريكا - الحكومة  او المؤسسات التابعه لها - راعيه الديمقراطيه وحاميه الحريات ، بيقولوا لروحهم ايه ؟؟
بيقولوا لروحهم امريكا خلاص مابقيتش امبريالية وربنا تاب عليها ؟؟
ولا بيقولوا اللي تلعب به اغلب به واللي يجيي منها احل من عينيها ؟؟؟
مصدقين ايه ، انها امريكا يعني فعلا بقت محبه للديمقراطيه وحقوق الانسان وحريات الشعوب علشان كده بتدعمهم ؟؟
ولا مصدقين انها كانت وستظل امريكا الدوله الاستعماريه الكبري وراس الامبرياليه لكن شايفين انهم اشطر منها وبيضحكوا عليها وبياخدوا فلوسها علشان يعلموا الشعب الحريه والديمقراطيه والاستقلال الوطني والسياده الوطنيه ؟؟؟
بتقولوا لروحكم ايه يااهل اليسار ؟؟؟
ولا جبتوها من الاخر وقلتم يسار ايه ماخلاص الشيوعيه في العالم هزمت ومافاضلش الا النظام العالمي الجديد !!!
يعني انتم لسه شايفين روحكم يسار بس بيعمل انشطه بفلوس امريكا !!!
ولا شايفين ان امريكا مابقيتش دوله امبرياليه استعماريه عايزه تمص دم الشعوب وتحقق مصالحها !!!
ولا مابقيتوش يسار اساسا والفيلم خلص واحنا مش واخدين بالنا !!!
ماتنورنا الله يخليكم !!!!
ملحوظة ( السؤال ده محيرني من زمااااااان ، من ايام مالشيوعين العراقيين دخلوا بغداد مع القوات الامريكيه وعلقوا اعلامهم الحمرا فوق مدافع الدبابات الامريكاني ، من ساعتها باحاول افهم وبادور علي اجابه لهذا السؤال البريء !!!!) 

البيع !!!!ا

لاافهم لماذا يغضب هذا المجتمع المتخلف من العهر والعاهرات !!!
انهن يبعن اجسادهن وهن احرار في اجسادهن !!!!
ولا المجتمع ضد مبدأ البيع ؟؟؟
واذا كنتم ضد مبدأ البيع ، انتم ضد مبدأ بيع ايه ؟؟؟
الضمير الاخلاق الشرف الدين الوطن ؟؟؟؟
ولا ده كله ممكن يتباع ويتقبض تمنه عادي وجسم العاهره بس اللي بتزعلوا عليه ؟؟؟؟؟؟؟؟؟؟؟؟؟؟؟؟؟؟؟
وحدوا المعايير وحاسبوا كل من باع ويبيع او اتركوا العاهرات في شأنهم !!! 
فهن لايجلبن العار الا لانفسهن ، اما الاخرين فيجلبوا العار لنا جميعا !!!!!

الحريق

بين الحرية الشخصيه والانفلات الاخلاقي ... فارق يبدو بسيط  !!! 

بين الحريه السياسية والفوضي .... فارق يبدو بسيط  !!! 

بين المطالبة بالحقوق والبلطجة ..... فارق يبدو بسيط  !!!

لكن في هذه الايام ضاعت الفوارق واشتعل الحريق !!!! 

رباعية العبث الجميل

( 1 )

امل 

كفاك لُعبا ولهوا

كفاك مراوغة ووجع

كفاك تستخف بي وتحبني

وتغيب عني وتعود وقت تشتاق لي

وتصم اذنيك عن ندائي الا حين تحتاجني

وتهرع صوبي بكل الحب وقت تفتقدني

وكأنك اللاعب الوحيد علي رقعه الشطرنج

وفي مربعاتها السوداء تعتقلني !!!

وحين اهم بالفرار تقبض علي قلبي  وتستبقيني

وتبكي بدمع ساخن وتعتذر لي وانت تناديني

وحين اغفر لك وجعي تبتسم وترحل

وانت تتصورني سانتظر واصبر

وحين يفيض بي واتمني لا تعود

تفاجئني وبكل القسوة والرقة تعود

وقلبي يتأرجح بين امل وعذاب

وبين اياب وذهاب

وبين رغبه في الفرار وامنيه في البقاء

وبين وهم اكرهه وواقع افهمه ولا اتحمله

قلبي يتأرجح بين حبك الذي لااملكه

ولن املكه ...

اما ترحل اما تبقي

وكفاك لعبا ولهوا

فالقلوب لم يخلقها الله للعبث ولا للجنون

ولا للمحبين القساة ولا للخرس والسكون

القلوب خلقها الرب للحب

وانت قلبك من حجر لم تدب فيه الروح بعد

والحجر يذبحني كل ليله الف مرة

وحين اكاد القيه بعيدا يعود ثانيه وينبض

واظن الحياه قد دبت فيه واتفائل واصبر

فيعود حجرا ساكنا

ومعه دموعي تجتاحني وتجتاحه فيظل اجدب

من قال ان ملح العين يروي الاحجار فتنب ولو صبارة بشوك

من قال ان ملح العين يداوي الجروح او يمنح الاحجار حياة ؟؟؟؟

( 2 ) 

الم 

كفاك لعبا ولهوا 

كفاك عبثا 

كفاك تلعب بقلبي كأنه حجر اصم 

تحت قدميك تقذفه بعيد 

وتضحك كالاطفال وكانك لم تسحقه وتسحقني 

وتصفق بكفيك انتشاءا 

كفاك لعبا ولهوا 

كفاك تسكن ليلة مبتسما في الحلم الجميل 

وتختبيء بقيه السنة في اوجع الكوابيس

كفاك تأتيني لحظة وتهجرني دهور وقرون

كفاك تبتسم فاحيا وتختفي فاعقف قلبي واموت

كفاك تزرعني ازهار وتحصدني مرا وصبارا

كفاك تهدهدني وحين اطمئن ترحل وتفزعني

كفاك تكتب شعرا في غرامي وقبلما احفظه تمحوه وتنساني

كفاك مراوغة ووجع ، فقلبي تفتت وانت مثل الصنم قاسي لاتبالي

كفاك لعبا ، فلست دميتك لتكسرها ولست سيدي لاخضع له  !!!

كفاك لعبا ، لقد مللت اللعبه واوشكت امزق الاوراق ووجهك وانساك !!!

كفاك اعتذرات كاذبه لااصدقها ولا تعنيها 

وحجج فارغه تبرر بها غيابك 

وحجج فارغه تفسر بها رجوعك 

كفاك كلام 

فالحروف فرت من كلماتك والمعاني 

والصخب لايرمم القلوب المحطمه 

واللعب العابث لا يبني جسورا ولا يمد حبال الوصل 

والمشاعر الفاره لاتعود الا حين تلمح في العيون دفئا 

وعيونك رخام بارد تميت ولاتحيي 

فكفاك لعب وعبث !!! 

( 3 ) 

رحيل 

كفاك لعبا وتلاعب فالوحشه صارت قانون اللعبه وهدفها

كلما استبد اليأس بروحي

واستسلمت للهم واسودت الايام

وحجبت الشمس خلف غيم الحزن

وكسرت النايات واخرست صوت الفرح

كلما استبد اليأس بروحي ورفعت رايتي البيضاء

واستعديت للبكاء

واحببت همي  

وكتبت مرثيات العشق ووجع الايام

كلما دخلت في الحزن واستعديت لطعناته

اتيت مبتسما وكأنك حبيبي

اتيت لي بزهورك وابتسامتك الحنونه وقوس قزح

تقدمه لي في محارة صدف وتزينه بابتسامات البحر اللؤلؤية

ومددت حبال الوصل وابسطه الشوق وحملتني علي ذراعيك للقمر

وزينت شعري بالنجوم وجيدي بالكواكب

ورسمت لي قلبا علي وجه السماء وزينته بقبلاتك وغرامك ...

وناديتني باسمي فاحببته واحببتك وكدت اسكن للطمأنينة !!

وسرعان ماافيق علي وحشه وظلام 

وكأن نهاري الطويل قد رحلت ساعاته ولم يبقي لي منك الا الظلام 

والقمر غاب وخافت النجوم 

وبقي الليل طويلا موحشا 

( 4 ) 

صبر 

كفاك لعبا وعبثا 

كفاك لهوا وسخفا 

كفاك لعب 

هرمنا علي لعب الصغار 

نضجنا علي التراشق بالنبال 

ورش الماء فوق القلوب عداوة 

والهيام مع كلمات الاغاني 

والبكاء بعد النهايات الحزينه 

نضجنا فلما تبدد طاقتك في العوده لالاعيب الطفولة 

والذبح بالقسوه وكأنك لاتقصد 

وبراءه الاطفال فوق ملامح وجهك تحذرني اصدقك 

وتغلق في وجهك كل الدروب 

فتعود من البوابه الخلفيه مبتسما وكان كل الهزائم لم تنالك 

تعود تلعب وسكينك خلف ظهرك تعده لحفله الوداع 

كفاك لعبا وتلاعب 

فالامل لايكاد يبزغ حتي يتلاشي 

والخوف لايكاد يرحل حتي يعود

والحب صارا صبارا ومرا

والموت في حبك عقاب والعيش في بعدك عقاب

والفكر هام في الاماني والاماني تاهت في الغياب

وصرت  كمثل الزنزانه البارده تعتقل روحي تواقه للفرار منك

وحين افر منك اشفي من عذابي وحين اشفي لاافكر الا فيك

ووقتما يستبد الشوق بي اناديك بحب 

واصبر علي غيابك حتي تأتي 

وحين تأتي اخافك واتمناك ترحل

وحين ترحل اناديك  لتعود

ووقتما تعود ابكي لاني رغم كل الوجع لم اشفي منك

وانت تضحك وتعود وانت تضحك وتغيب

والضحك علي وجهك نصال

وملامح بليده لاتكترث بحبي

والضحك علي وجهي بلاهه

اوجعتني فضحكت ببلادة وسالت دموعي

سافر منك لان الغرق في حبك متاهه

وحيره تعذب 

وحين اغيب عنك لاتتمني رجوعي

وحين اعود لاتسالني عن سر غيابي 

وحين اسالك حبك تندهش لاني لااشعر بحبك 

وحين ابادلك حبك تفر لبدايه الحدوته وكأن لاتحب 

ومابين كر وفر ترتفع قهقهاتك عالية 

بلامبالاة لعينة 

وتناديني بصوت اجش عودي 

وانت تستعد للرحيل 

ومازالت لعبتك السخيفه مستمرة 

ومازلت فوق رقعه الشطرنج السوداء اسيرة 

ومازال هناك وقت احتاجه لابرء منك 

ومازلت تملك وقتا لتشفيني بسخفك وصدك وبرودك اللعين 

ومازلت اناشدك تكف عن لعبك وعبثك 

فصبري نفذ او كاد ينتحر يأسا 

مازلت اناشدك تكف عني 

وتتركني لحالي

لكنك مازلت تلاحقني 

ومازلت افر واعود 

ومازال الغالب مستمر 

انها ايام العار ....ا

بمناسبه قتل القذافي والتمثيل بجثته نهار الخميس 20 اكتوبر 2011
كتبت مجموعه من الجمل القصيره علي الفيس بوك تعبر عن انفعالي وغضبي ...


الخميس 20 اكتوبر عصرا 

( 1 )

انا في منتهي الحزن لقتل القذافي علي يد المواليين لحزب الناتو ... لعنه الله علي البترول العربي الذي تسبب ويتسبب في احتلالنا واستباحتنا !!! لعنه الله علي حزب الناتو واسلحته القذرة وعلي عملاءه والموالين له !!! عار عليكم مايحدث ، عار عليكم مايحدث ، عار عليكم مايحدث !!!

( 2 ) 

اعدم الامريكان صدام حسين ، ثم قتل حزب الناتو القذافي ، عار علي العرب مايعيشوه ، لايقوا علي مناهضه حكامهم الا بالاستقواء بامريكا التي تحررهم من الديكتاتوريه وتحتلهم وتقتل رؤسائهم وتستولي علي خيرات بلادهم وتعاملهم كالعبيد ا!!! عار علي العرب مايعيشوه ، ورحمه الله علي جمال عبد الناصر وعلي العروبة

( 3 ) 

انا من زمن قديم وخلص وترك لي كل احزانه !!!!

( 4 ) 

ليست المرة الوحيده التي اقف في جانب وكل الناس في جانب اخر ، لكن مالذي يفيدني ان سايرتكم وخسرت نفسي ! الوحدة اختيار واعي هنا وفي تلك اللحظة!!!

( 5 ) 

انتظر راي الناصريين والقوميين العرب في مقتل القذافي علي يد عملاء والمواليين لحزب الناتو ورجال القاعده في ليبيا .... حتتكلموا ولا دولارات امريكا الذ واطعم وابقي !!!!!!!!! عار عليكم مانعيشه

( 6 ) 

امجاد ياعرب امجاد !!!! لم نعد عرب ، اصحبنا مسلمين ووهابيين وشيعه وسنه وسلفيين وصوفيين واكراد واقباط ومسيحين ومارونيين وبربر وزنوج وبدو ومواطنين وبدون وعلويين ودروز و!!!! لم نعد عرب ، صرنا ميت مليون مله وجنس ودين ، وبقينا نتضرب بالجزمه بمنتهي السهوله واليسر من غير حد مايعمل حسابنا ولا يعيط علينا ، حتي احنا شخصيا !!!! امجاد ياعرب امجاد !!!!ا

( 7 ) 

يسقط عملاء الامريكان وعملاء حزب الناتو ، الخونه في كل اوطانا العربية ، قصدي اللي كانت عربيه قبل مايحتلونا ويقسمونا ويهزئونا !!!! يسقط عملاء الامريكان الخونه عملاء الناتو في بلادنا !!! العار كل العار لهم علي الجرائم التي يقترفوها في حق شعوبنا واوطاننا ... 

( 7 مكرر) 

مقاومه الحكام والثورة عليهم حق للشعوب ، لكن الاستقواء بامريكا وحزب الناتو خيانه للشعوب وللتاريخ ، وعار بجد عار 

( 8 ) 

كان فيه زمان عرب !!!! وبعدين انقرضوا !!!! 

ومازالت الحفريات تنقب عن اثارهم وهل كانوا بشر ام لا ؟؟؟؟؟؟؟؟؟؟؟؟؟؟

( 8 مكرر ) 

لقد تبلدتم لحد انكم لاتشعروا بالعار ولا بالخذلان ولا بانعدام الكرامة !!!!ا

( 9 ) 

حزن ويس

( 10) 

الناس اللي عماله تقارن بين مصر وليبيا وتونس .... بتقارنوا علي اساس ايه الجغرافيا ولا التاريخ ولا الحضارة ولا الثقل ولا الدور الاقليمي ولا ايه ؟؟؟؟

مافيش مجال مقارنه ، مصر دوله مركزيه كبري موجوده علي خريطه العالم من سبعه الاف سنه حضاره وتاريخ وثقل ودور اقليمي ، والدول التانيه خلقها مستر سايكس ومستر بيكو لما رسموا بقلمهم حدود لتفتيت المنطقه ....مصر بتحاكم رئيسها امام قضاء عادل نحترمه بعد ما رفض اختيار الهروب لاي دوله عربيه وكان ممكن ، وقال حاعيش واموت في مصر حتي لو اتحكم عليه بالاعدام ، ليبيا عملاء الناتو ضربوا القذافي بالرصاص ورموه زي الكلب في عربيه اسعاف لغايه مامات ووفقوا يصوروه ، تونس بن علي هرب منها وجري زي الحرامي الجربان ,,مصر خمسه وثمانين مليون عقول وثقافه وحضاره وموقع استراتيجي وقوه بشريه عمرت المنطقه العربيه كلها ومازالت تعمر وتبني وتتفاوض ، دوله قويه مهابه ، ليبيا مع احترامنا شويه قبائل قاعده فوق بترول الغرب طمعان فيه وتونس زي اصغر محافظه في مصر عشرين نفر نصفهم متفرنسين والنصف الاخر متأسلم وحكمهم بورقيبه لغايه مامات وهم سكتم بكتم ولاحد فتح بقه قبل ربيع الثورات العربيه !!!! مافيش مجال مقارنه مصر حاجه والدول دي حاجه تانيه وعلي راي ايهاب سمره الكبير كبير !!! اسفه لشوفينيتي وانحيازي لمصر التاريخ والثورة والحضارة !!!!ا

( 11 ) 

ثورة حزب الناتو وعملائها قتلوا القذافي بالرصاص بعد القبض عليه حيا 

ليبيا في بحار الدماء الان وغدا وافتكروني !!!!ا

( 12 ) 

هؤلاء ليسوا ثوار ، انهم قتلة ، والقتله لايحررون بلاد ، بل يخربوها !!! 

عملاء الناتو قتلوا القذافي بعد القبض عليه حيا ومثلوا بجثته !!!!

اي خير تنتظروه علي ايديهم لليبيا ؟؟؟؟؟؟؟؟؟؟؟؟؟؟؟؟؟؟؟؟؟؟

لاتكلموني عن الثوره ارجوكم ، ولا تكلموني عن الحريه والديمقراطيه ، فقط اخبروني من سيشرب بترول ليبيا ودمها !!!!

الجمعه 21 اكتوبر صباحا 

( 13 ) 

في نهاريات قليله من حياتي استيقظت اشعر بالعار مثلما نمت اشعر بالعار .... في نهاريات قليله من حياتي استيقظت قليله الحيله مثلما نمت قليلة الحيلة .... انها ايام الهزيمه الفجه التي لااقوي فيها حتي علي خداع نفسي ولا الهرب منها .... انها ايام العار .........

علبة الوان

من قال ان الحياة عادلة ؟؟؟
الحياة توزع ظلمها علي كل البشر بمنتهي العدل !!! 
فلاتشكو من قدر مايصيبك ، نفس القدر يصيب الجميع بالوان مختلفه !!! 
مالحياة الا علبة الوان موزعة الوانها علي الجميع كل واحد قلم !!!!

وقتها .....

مازالت روحي تبحث عن نصفها التائه 
تبحث عن بقيتها 
مازال كلي يبحث عن نصفه الغائب 
وحين يتكامل النصفين 
وتسكن الروح لروحها 
ستتلون الاوراق وتشدو العصافير ويتسع البراح  
ويخرج الحلم من ظلمه الاوهام للحقيقة ..
وقتها ستبدأ الحياة التي ادخرت كل حياتي لها ...

لحظة حلوة

عندما رحلت الايام وتركتني ... 
واختفي الاحباء وصمتوا ...
وامتطت الجبال كتفي ورسخت ...
ودرت في الدوامات اصرخ ولااحد يسمعني ..
وجفت دموعي بعدما وشم الملح روحي بمرارته ..
وبحثت عن كفي امي ينقذني من حيرة الطفولة ووهن اليأس 
وتمنيت حلم دافء يهديء روعي ويطمئني ..
وقتها .... 
احسست الحياة جافة كمثل ورقه الخريف التي تتأرجح في مهب الريح ... 
وسعيت للدفء بعيدا عن حضنك !!!
بعيدا عن وجودك بعدما اصبحت غربتي وكل همي ووجعي !!!
عندما رحلت الايام وتركتني قررت ارحل واتركها 
ولادع الماضي كله خلف ظهري بحلوه بمره بقهره بعذابه بامله المذبوح بتفائله الكاذب بفرحه المزيف 
لادع الماضي كله خلف ظهري وانظر للامام ..
هناك ، بعيدا ، يوجد امل لايبدو كاذب ككل الامال 
هناك حلم لم تنتهكه الاكاذيب يبدو جميلا 
هناك وهم لم اكتشف زيفه بعد 
هناك ........... بقيه الحياة التي تستحق تعاش حتي لو اكتشف في نهايتها ان ايامها هي بقيه الاوهام ..
هناك ..... بضعه امل لااملك الا اقتنصه !!! 
والقلم والاوراق والدموع والمرارة موجودين دائما لارثي حالي ..
ومابين الكلمه والكلمه ، والسطر والسطر ، والدمعه والدمعه ، لحظه حلوه علي الا اضيعها !!! 

الوجع !!!!ا

غيابك يوجعني ...
وحضورك يوجعني اكثر ...
الوجع هو ماتمنحه لي بمنتهي الاجادة ...
الا تجيد شيء اخر ؟؟؟؟؟

لاتفرح !!!ا

ياحبيبي .. 
لاتفرح لاني لم اعد اتشاجر معك !!! 
لم اعد اتشاجر معك لانك ببساطه لم تعد تهمني !!!!
الم اقل لك .... لاتفرح !!!!!!!!
الحقيقة افرح او لاتفرح .... لم اعد اكترث !!!
لم اعد اكترث ... لانك لم تعد حبيبي !!!! 

الطينة غير العجينه !!!ا

الطينة غير العجينة !!!!
باختصار جداااااااااااااااااااااااااااااا
النخب السياسية المثقفه شايفه الشعب اولاد البلد بطلجيه وصيع ...
طبعا مش لابسين بنطلونات ساقطه ولا بدل وكرفاتتات ولا عاملين شعرهم ديل حصان ولاحاطين برفان ولا بيتكلموا فرنساوي وانجليزي
وبيشتموا ويقولوا كلام ابيح ويضربوا بالسنجه والسافوريا ودمهم حامي ومابيعرفوش يفكروا كويس !!!
والشعب شايف النخب السياسيه المثقفه خواجات ..
لا بيتكلموا بلغتهم ولا بيقولوا كلام يفهموه والا فرنكه وبيرطنوا بكلام محدش بيفهمه ...
علشان كده
المسلمين ماشيين ورا امام الجامع والسنيه والشيخ ابو دقن اللي بيفهموا له !!!
والمسيحين بيسمعوا كلام ابونا اللي بيفهموا له !!!
وعلشان كده الشعب والجيش ايد واحده لان الشعب من شبرا والدرب الاحمر والجيش من مصر العتيقة وبولاق الدكرور
والجيش من مشتول القاضي مركز زقازيق والشعب من بني حسن مركز كفر صقر
والشعب من قنا وسوهاج والجيش من المنيا واسيوط
والنخب السياسيه المثقفه حتي لو جايه من الدرب الاحمر او شبرا ، قلعت جلدها ولبست وش الخواجات وبقت تشبهم وبتاكل بالشوكه والسكينه وبتطلع في التلفزيون وبتقول كلام تخين !!!
ولو جايه من الدقي والزمالك وخريجه الجامعه الامريكيه فهي مش شبه الجيش اللي جاي من عزبه ولاد علام ومن تحت كوبري باغوص ومهمشة ...........
الشعب والجيش ايد واحدة  ، لكن النخب السياسيه والجيش مش ايد واحدة !!!
الفرق بين النخب السياسية المثقفه والشعب والجيش ، زي الفرق بين جمهور المقصورة وجمهور الدرجة التالثه في مباراة للفريق القومي الاتنين بيشجعوا مصر لكن في الحقيقه مصر بتاعت كل واحد منهم غير مصر بتاعته التاني !!!!
الفرق بين النخب السياسية المثقفه والشعب والجيش ، زي الفرق بين اللي يفطر بطبق فول علي العربية في الشارع ويضرب معاه فحل بصل وبين اللي ياكل كرواسان ويشرب لبن منزوع الدسم وقهوة بدون كافيين في البلكونة البحري !!!
المصيبة كبيرة قوي شكلها !!!!!ا
وسلم لي علي الدوله المدنية وعلي الديمقراطية !!!!