العيد

فلوس جديدة وعيدية !!! 

فستان جديد وشرايط ستان جديدة وجزمه جديدة !!! 

حماية العيد وتسليك الشعر ونقطتين برفان ورا الودن ونقص ضوافرنا ونام مبسوطين ..

كنا اطفال ، وبعدين شباب وبعدين امهات ، والنهارده جدات ، لكن العيد هو العيد 

تيته نبوية وحضن كبير ونشاط في البيت الكبير اكل وشرب وشوكولاته وبوس واحضان وهيصه وفرحة 

نينه مديحه وحضن دافي وبوس ودعا لربنا يفرح قلبكم ياحبايبي ..

امي كوكي ، هدوم جديده وحضن ولااحن منه ولااروع ..

بناتي وهما صغننين ، فساتين للعيد اول يوم وتاني يوم وشرايط وشنط للعيدية وبوس واحضان ورقص وطبل 

والعيد فرحة ...

عيد في مشتول بلد ابويا وعماتي واعمامي وسهريات في البلكونه البحرية وفي الشتا حوالين المنقد وريحه الخبيز ومرقه الخروف والمنين والكحك 

وعيد في الجيزة بيت اهل امي وخالتي وخيلاني وبنات خالتي والشوكولاته في الطبق السيفر والطباخ بيطبخ واحنا ناكل وننبسط ونتسلي في البلكونه الشتوي ناكل خس وقصب وفي البلكونه البحري ناكل بطيخ ونقزز اللب المتحمص علي الصفيحه !!! 

العيد في بيوت الحبايب هو العيد فرحه ودفا ..

100 عيد مر علي واكتر ، طقوس واحده مش مهم كنت صغيره ولا كنت كبيرة ، لكن هي نفس الطقوس ونفس الفرحه 

الصبح زيارات وبعد الضهر نقعد فبيتنا نستني الزيارات ، الحبايب بيزوروا بعض ويعيدوا علي بعض 

عائلات ونسب ومصاهره وقرايب من بعيد وحبايب واصحاب اكتر من الاخوات ، وكله بعيد علي كله ..

العيد الصبح ، الف علي بيوت اهلي الاول وانا صغيره في ايد ابويا ولما كبرت اخد بناتي في ايدي ..

الم عيديه وبعدين اكبر فاوزعها ..

وبيوت تتملي وبيوت تفضي و........العيديه هي هي ، فلوس جديده تسعد الاطفال والكبار 

وناس تروح الجنه وناس جديده تشرفنا في الدنيا والكوره الارضيه لسه بتلف 

والعيد مره في الشتا ومره في الصيفا 

والسنين بتكتب ارقامها علي الحيطان 

بيوت تتفتح وبيوت تتقفل ، واهل يفضلوا اهل واهل مايفضلوش 

والصغيرين يكبروا والجدود يموتوا 

وعماتي يموتوا لكن بنتي تبقي خالة لابن اختها الصغير 

وبيوت تفضي وبيوت تتملي 

وناس تروح وناس تيجي 

والصغير يكبر ، والكبير يروح الجنه 

والطفله تبقي ماما والماما تبقي جدة والحفيد يبوس تيته ونينه وجدو وانتي وهاتك يابوس واحضان 

والعيد ده حنتغدي هنا ، والعيد الجاي حنتعشي هناك 

وزمان تليفون ترنك والنهارده موبيل وسكاي بي ، والحب هو هو والعيد هو هو بس الدنيا اللي بتتغير !!! 

والبنات صغيره تبقي امهات ووالامهات تبقي جدات والجدات يروحوا الجنه ومن هناك يبعتوا ليها ذكريات تونسنا وبوس واحضان 

وشوكولاته وبومبوني !!! 

و...........يا كل حبايبي ، اللي رحتم الجنه وسبتوني ، وياللي كبرتم وياللي سافرتم وياللي رجعتكم ، عايزه اطمنكم بس ، ان العيد حيفضل عيد طول مااحنا عايزينه عيد ، وبنجهز فلوس جديده ونشتري شوكولاته وبومبوني وطول مابنشتري هدوم جديده وشرايط ستان جديده ، وطول مااحنا قادرين نفتح احضانا لكل الحبايب وطول مااحنا بنسمع صوت اهل الجنه وهما معيدين ومبسوطين وبيبعتوا لينا حبهم بوس واحضان وذكريات جميله ..

ومالحياه الا شويه ذكريات ، احنا وشطارتنا بقي نعملها للاخرين جميله ونحتفظ بها من الاخرين جميلة واجمل !!!! 

وياحبايب قلبي في الدنيا وفي الجنه ، انا لسه باحتفل بالعيد بيكم ومعاكم وعلشانكم ...

ولكم مني ولي منكم ، بوس واحضان وذكريات سعيدة في يوم العيد وكل عيد !!!