27 فبراير 2014

من الفيس بوك ..... احنا الجيل العرة ..





الثورجيه ...ولاد الثوار ، قالوا علي جيلنا " عرة " فالدكتور محمد المصري قالك نقول لهم يعني ايه جيلنا العرة وانا سخنت وراه ، يالا كلكم العبوا علي صفحاتكم ، وروهم شكل جيلنا العره وحياته الجميله .... وخلي ليهم هما الثورة بتاعتهم وجيلهم اللي مش عرة :)....

  • انا من الجيل العرة ، اللي كان عنده في المدرسه حصه رسم وكانت مدارسنا بتشترك في مسابقة " شنكار " الهنديه لرسم الاطفال وكنا بنتعلم تدبير منزلي وتفصيل وطبيخ وزراعه وعندنا حصتين العاب في الاسبوع  ...
  • انا من الجيل العرة ، اللي كان عنده في المدرسه حصص موسيقي ، واخر السنه نعمل حفله مشتركه لكل المدارس في نفس المنطقه التعليمية ويبقي فيها موسيقي وغنا ورقصات ...
  • انا من الجيل العرة ، عشت ايامت جدتي في بيتنا اللي في البلد ، كانت بتخبز في فرن البيت من الفجر قراقيش وفطير مشلتت وعيش مرحرح وملدن ، وبتعمل شعريه علي دولاب الشعرية وتحمرها بسمنه بلدي ونفطر بيها الصبح ، وتلم ورد الجنينه الاحمر وتعمله مربي ، وتسيح زبده وتخزنها للسنه كلها ، وتجهز شربات افراح الاحفاد علي ايدها قبل الفرح بشهر من الفاكهه الطبيعيه ..
  • احنا من الجيل العرة ، ماعرفتش ان طنط نيلي نصيف اخت امي وزميلتها من الحضانه قبطيه الا لما ابوها مات ورحنا الكنيسة نعزيها .. ومافرقش معانا ابدا لادينها ولادينا فكلنا مصريين .. 
  • انا من الجيل العرة ، اللي كان فيه الجيران اخوات واكتر ، وابواب الشقق كلها مفتوحه في الخير ولما واحده تعمل حاجه حلوه ، تودي لكل جيرانها، اللي يرجعوا لها الاطباق مليانه بالخير ..
  • انا من الجيل العرة ، اللي كنا نروح مدراسنا الابتدائي والاعدادي والثانوي بعد ماخرجنا منها نسلم علي المدرسين والمدرسات ونحكي ليهم اخبارنا ونفرح بنجاحنا ونبقي رايحين ليهم وهما واحشنا قوي ونمشي معيطين ... وكنا بنعتبر نجاحنا فخر ليهم ودايما عايزين نفرحهم .. 
  • انا من الجيل العرة ، اللي شاف في التلفزيون اعلان " ست سنيه سايبه الميه ترخ ترخ من الحنفية " واتعلمنا نقفل الحنفيات ونحافظ علي ثروة المية في بلدنا اللي تخصنا كلنا ، وشاف في التلفزيون اعلان " انا جامد ومتين انا الملامين " فكلنا في الاطباق البلاستيك بمنتهي الفخر لانها صناعه وطنيه ..
  • انا من الجيل العرة ، اللي كنت باخاف من اعمامي اخوات ابويا واعمل حسابهم زي ابويا واكتر واخاف من خيلاني اخوات امي واعمل حسابهم زي ابويا واكتر ، الجيل اللي كان مؤمن بأن الخال والد والعم يشيل الهم والعيله الكبيرة عزوة وهيبه وفخر وشرف ..
  • انا من الجيل العرة ، اللي قرا احسان عبد القدوس ويوسف السباعي وانيس منصور وهو في اعدادي ، وقرا نجيب محفوظ ويوسف ادريس وهو في ثانوي ، وكان بيعتبر رحله معرض الكتاب مكافأه النجاح ويشتري الكتب الجديده وياخدها في حضنه فرحان بيه لانه حيعرف ويفهم ...
  • انا من الجيل العرة اللي كنت اخرج يوم العيد الف علي بيوت العيله عماتي واعمامي ونعيد عليهم وناخد عيديه وناكل كحك وقراقيش بيتي ونضحك واحنا مبسوطين ، وفضلت اعمل كده مع بناتي وحفيدي كمان لغايه النهارده ..
  • انا من الجيل العرة اللي كان لازم يحتفل بالعيد بشكل اسري ونتغدي مع بعض وعمر ماحد منا سافر يوم العيد يحتفل بيه لوحده ، واعتبرنا العيد ورمضان وشم النسيم وليله نص شعبان مناسبات عائلية تحتفل بيها الاسرة والعيله مع بعض..
  • انا من الجيل العرة ، اللي كنت باروح الساعه 8 ونصف بليل وانا في الجامعه ، ولما اتأخرت للساعه 9 خاصمتني امي لاني بقيت " زي الارتيستات " بارجع البيت في " انصاص الليالي "..
  • انا من الجيل العرة ، اللي كان بيعتبر الجيران اهل وخلان ، وكان بيت طنط شوشو مرات المستشار سعد ايوب بيتنا ناكل ونشرب ونقعد ونلعب ونتشتم علي الشقاوه وكان بيت طنط صديقه جارة عمتي بيتنا ، وبيت ابله لولو جاره امي بيتنا...
  • انا من الجيل العرة ، اللي سمعت برنامج الي ربات البيوت مع امي وهي خلتني اسمع اغنيه غنوه وحدوته لابله فضيله وياولاد ياولاد توت توت تعالوا تعالوا علشان نسمع ابله فضيله راح تحكي لينا حكايه جميله كل يوم جمعه من الراديو الخشب الكبير اللي لما كان يسكت كنا نضربه بالبوكس فيشتغل :)
  • انا من الجيل العرة اللي كان مصروفي في ابتدائي تلاته تعريفه وقزازه اللمونجو بقرشين فاصرف يوم قرش واشيل التعريفه لليوم التاني واشرب لمونجو ودايما منظمه ميزانيتي وعمري مااشتكيت ..
  • انا من الجيل العرة ، اللي كل الكحك ابو سكر في العيد الصغير وعيد الميلاد وكل اللحمه في العيد الكبير وعيد القيامة وعلق الصلبان الغله علي ابواب الشقق في عيد الغطاس واتكحل في سبت النور وكل عاشورة يوم كربلاء وووزع صدقه رمضان اقباط ومسلمين ..
  • انا من الجيل العرة ، اللي اتعلم ان " العلم سلاح " و " العمل عبادة " و " التقوي تقوي القلب " و" النضافه من الايمان " وكانت كراريسنا مكتوب عليها من الغلاف الخلفي ، اغسل يديك قبل الاكل وبعده ..
  • انا من الجيل العرة ، اللي شرب من "القلة الفخار" المتعطره بالمورد مية ساقعه زي الشهدفي عز الحرب ، وشرب اللبن الرايب الطازة من "المترد" واتدفي علي " المنقد " الفخار في ليالي الشتا وعجن الكحك والقراقيش علي " الطبلية " واستحمي علي " وابور الجاز " ونور المطبخ بلمبة جاز نمرة 10 و بقيه البيت بتاع البلد بالكلوبات..
  • انا من الجيل العرة ، اللي ولع دستين شمع في مقام العدرا لاجل الغايب يرجع وكنس مقام السيده نفيسه علي العدا وولاد الحرام ...
  • انا من الجيل العرة ، اللي حضر ايام خياطه العيله وهي بتفصل لنا فساتين وقمصان نوم كستور وبيجامات ، امي تقص الباترون ومحبوبه تفصل ، واللي شاف امه وعماته وخلاته بيشتغلوا كروشيه وكنافاه وتريكوا مفارش وفساتين وبلوفرات وتابلوهات ، واحترم العمل اليدوي واعتبر الست اللي مابتعرفش تعمل حاجه من ده خايبه وخيبتها تقيلة ...
    • انا من الجيل العرة ، اللي كان في المدرسه بيحي العلم كل يوم ويهتف من قلبه " تحيا الجمهوريه العربيه المتحدة  " وبعدها " تحيا جمهوريه مصر العربية " وعيط وهو بيغني " الله واكبر فوق كيد المعتدي " ايام حرب اكتوبر وعاش ايام النكسه وطفي النور ولزق ورق ازرق علي قزاز البيت وبني سواتر طوب قدام مداخل العمارات كنا بنعتبرها " الامة " في لعبه الاستغمايه ...
  • انا من الجيل العرة ، اللي ايام حرب اكتوبر كان بيشتري الثلاث جرايد علشان يقرا فيها نفس البيان العسكري ويقعد قدام النشره يصقف لما نسمع عن انتصارتنا ونزغرد لما اسروا عساف ياجوري ونعيط من الفرحه يوم مالسادات خطب في مجلس الامه واشاد بقواتنا المسلحه ...
  • احنا من الجيل العرة ، اللي حب ربنا لان ربنا بيحبه وحب كل خلقه ربنا لانها خلقه ربنا واطعنا ربنا لانه بيحبنا وكرمنا بنعمه وتمنينا رضاه لاجل تدوم النعم وامنا بيه من شده الحب والامتنان علي كل شيء جميل عمله لينا ...
  • انا من الجيل العرة ، اللي كان يقفل التلفزيون 40 يوم لان الجيران عندهم ميت ويفتح باب بيته ويطبخ للمعزيين ويستضيفهم عنده في البيت ، وكان يلغي افراح بناته لو العماره فيها ميت لغايه مالاربعين يعدي ويقول برضا وقناعه ، العشره ماتهونش الا علي ولاد الحرام ... 
  • انا من الجيل العرة ، اللي عاش ايام تلات جرايد ، اهرام اخبار جمهوريه ومجله اخر ساعه وصباح الخير وروز اليوسف والمصور ، وشافت مجله الطليعه والمسرح واتفرج علي التلفزيون قناه اولي وثانيه وحضر الارسال التلفزيوني يبتدي الساعه 5 ، وكان فيه فيلم عربي واحد في الاسبوع يوم الخميس ونور علي نور يوم الجمعه وعالم الحيوان الساعه 1 كل يوم جمعه ................. وشفنا برنامج نافذه علي العالم . وكنا بنتعلم من التلفزيون نتعلم ونتثقف ... 
  • انا من الجيل العره اللي كانت بنات العيله الصغيرين ياخدوا فساتين بنات العيله الكبار بعد مالخياطه تأيفها ونبقي اخر سعاده وعمرنا ما تأففنا او عايرنا بعض او اتكسفنا ..
  • انا من الجيل العرة اللي كانت العيله كلها بتصيف مع بعض ، وكانت جدتي وامي وخالتي ينزلوا البحر الساعه 6 الصبح بالمايوه ويرجعوا يحضروا الفطار والسندوتشات لينا احنا علشان نروح البحر نقضي اليوم هناك .. 
  • انا من الجيل العرة اللي كان بيرفع سماعه التليفون فالحراره تيجي بعد ساعتين ، ويطلب الترنك علشان يتصل بالاقاليم ويتكلم مده ومدتين ...
  • انا من الجيل العرة اللي حضر نكسه يونيو ووجعها وانتصارات اكتوبر وفرحها ، اللي عيط يوم جنازه عبد الناصر ويوم قتل السادات ، اللي حضر طه حسين ونجيب محفوظ والفريد فرج ويوسف السباعي ولويس عوض ويوسف ادريس ، اللي سمع بابا شارو واحمد سعيد وامجاد ياعرب امجاد ، اللي عرف ان طريق الالف ميل يبدأ بخطوه ، اللي غني من المحيط الثائر للخليج الهادر ، اللي قال والله حنبي وادي احنا بنينا السد العالي وحلم بتمثال رخام علي الترعه واوبرا في كل قريه عربيه ..
  • احنا من الجيل العرة ، اللي خلل الخيار والفلفل والزتون واللمون والبصل الاورمة ، وخبز الكعك والقراقيش والكيك وعمل البتي فور والمنين وعمل مربي الفراوله والمشمش والبلح والتين واللارنج والجزر الاحمر وشربات المانجو والفراولة والبرتقال وحمص البن في البيت وشرب القهوه علي السربتايه وحمص لب البطيخ علي الصاجه في العصر في الصيف وشوي ابو فروة علي المنقد في عز الشتا ، كله في البيت ..
  • احنا الجيل العره اللي كان بيذاكر من نفسه وحاسس ان ديه مسئوليته وانه عيب يسقط علشان شكله قصاد اصحابه وقرايبه والستات تتباهي ان عيالها جابوا مجموع اكبر في الشهادات واتعلمنا في المدارس الحكوميه وكنا بنعتبر المدارس الخاصه للفشله والساقطين الي مش جايبين مجموع ومدارس اللغات للاثرياء والاقطاعيين ، الجيل اللي كان اهله يقوموه من علي المذاكره علشان كفايه عليه تعب ، وواثقين انه حينجح بس منتظر المجموع ، اللي اتعلم مايغشش في الامتحان لان كده بنسرق مجهود غيرها ومانغشش في الامتحان علشان كده بنعلم الناس تبقي خايبه ونساعدها علي خيبتها ....
  • احنا من الجيل العرة ، اللي حضر في عهد جمال عبد الناصر عيد العلم وتكريم كل المتفوقين علي مستوي مصر من الابتدائي لحمله الشهادات العليا ، كلهم في طوابير وكلهم فرحانين وكلهم بيتكرموا ، خلونا نحسدهم نغير منهم نتمني نكون زيهم ونتكرم زيهم لان العلم سلاح
  • احنا من الجيل العرة اللي حضر غلي الغسيل بالباستله وكنا بنقلب الغسيل بعصايه كبيرة مع الزهره والاومو ، واللي حضر تلميع الباركيه بالورنيش والترابنتينه والصوفه علشان يبرق ، واللي حضر تلميع القزاز بالجرايد وتلميع النحاس باللمونه المقلوبه وتلميع الفضه بطفيه السجاير ... اللي كنا بنساوي شراشيب السجاده قبل بابا مايوصل البيت ليبهدلنا كلنا لان البيت مش نضيف ...
  • احنا الجيل العرة ، اللي صيف في عشش راس البر وعام في الجربي وكل سمان مشوي اخر الصيف وحضر سردين الفيضان قبل مايخلصوا بنا السد العالي ....
  • احنا الجيل العرة ، اللي صيف في كباين بورسعيد ام عمدان ملونه ورقص علي نغمات بيانوا كازينو بالاس وكل ايس كريم في الجيانولا ، قبل نكسه 67 ..
  • احنا من الجيل العرة ، اللي كانت العيله فيه كلها تتكاتف لو حد حصل له مشكله او مصيبه والكل يلم فلوس ويدفع باعتباره واجب مش منتظر عليه شكر ويتكفل بالعيال الصغيرين ويكبرهم وسط عياله ويصرف عليهم ويجوزهم لانه كان مديون لابوهم ومش مستني شكر ...
  • احنا الجيل العرة ، اللي كنا نتباهي باصولنا الريفيه وعائلاتنا ومايهمناش الفلوس وندور علي ولاد الناس ولاد الاصول ونكره اللي يتباهوا بفلوسهم ونعتبرهم محدثين نعمه ومش شبعانين من بيوت اهاليهم ...
  • انا من الجيل العرة ، اللي اول مرتب لي وانا محاميه تحت التمرين كان 12 جنيه وكنت سعيده بيهم لاني باتعلم وعايزه اتعلم وفضلت اخد المرتب ده ثلاث سنين كامله وعمري مافكرت اطالب بزيادته رغم صعوبه الحياه ( كنت متجوزه ) لكن كنت سعيده ان الاستاذ الكبير فاتح لي مكتبه وبيعلمني ... الاستاذ احمد نبيل الهلالي..
  • احنا من الجيل العرة اللي كان مؤمن ان ربنا فوق وبابا وماما تحت ... واللي مالكوش خير في اهله مالوش خير في حد ، ومن زرع حصد ومن جد وجد .... الجيل اللي اتعلم ان الادب فضلوه عن العلم ، وان اللي يعمل خير يداريه واللي يتكلم عن نفسه حاسس بالنقص والغرور مرض وقله ربايه ..
  • احنا من الجيل العرة ، اللي كانت ايام حياته دفا وحب ووطنية وعلم واحترام باختصار كده...
  • احنا الجيل العرة اللي كان مؤمن بأن ، حب لاخيك ماتحب لنفسك ، وان النبي وصي علي سابع جار ، وان محمد نبي عيسي نبي موسي نبي وكل من له نبي يصلي عليه.....
  • احنا الجيل العرة اللي امن بان اللي مالوش كبير يشتري له كبير وان الانسان اللي مالوش اهل يترجع لهم صايع وضايع وان الواحد لازم يخاف علي نفسه ومايغلطش احتراما لاهله علشان مايجيبش لهم الكلام ..
  • احنا الجيل العره اللي بيحترم اللي اكبر منه لانه بيفهم عنه ، واكبر منك بيوم يفهم عنك بسنة !!! ولاننا احترمنا الكبير ، اتعلمنا وفهمنا واتربينا وعرفنا نربي اولادنا وتلامذتنا ..
  • احنا الجيل العرة اللي  كان اغلي حلفان احلفه ، وغلاوة امي عندي ، لما كانت عايشه ولما ماتت ااقول ورحمه امي ، دي اغلي حلفانات لايمكن احلف بيها الا عن حق وصدق ، طول عمري ، اصل احنا الجيل العرة اللي بيحب امه ويحترمها عايشه وغايبه ..
  • انا من الجيل العرة .. اللي اتعلم ما يقولش علي الشغالة خدامة . ومايقولهاش يابت لأن ليها اسم . ولأن مش علي راسنا ريشة . ويقول لها شكرا لما تقضي له أي حاجة . ويقول للدادة الكبيرة الي في البيت ياامه ..
  • احنا الجيل العرة .. اللي اتعلمنا نشكر اللي نتصدق عليه بحب لأنه ادانا فرصه نعمل حاجة كويسة في حياتنا ..
  • احنا الجيل العرة اللي كان أكبر عقاب لينا أن امي تخاصمنا أو بابا يقولي انت مش محل ثقة ... واكبر مديح لنا انهم يقولوا علينا انتم مسئولين وكبار ..
  • احنا الجيل العرة اللي كنا نشتري الفاكهة في نص الموسم علشان نكون رخصت ... ونبقي شاكرين لأهلنا لأنهم ماببحرموناش من حاجة ..
  • احنا الجيل العرة اللي اتعلم مايبصش لحد لأنه احسن منه ويشكر ربنا علي كل نعمه وأنه يسعى يكون احسن لأن ربنا بيسعي معاه وأنه يجتهد لأن لكل مجتهد نصيب ...
  • احنا الجيل العرة ... اللي كان يتهزء لما يقول اشمعني ...
  • احنا الجيل العرة اللي كانت امي تعاقبني بالقرص من " لباليبي " وتقولي مش حاقرصك لا في وشك ولا في دراعك علشان كرامتك ومحدش يعرف انك غلطتي و بتتعاقبي ..
  • انا من الجيل العرة اللي اتعلم يحوش من مصروفه ومن العيدية ومكافأة النجاح علشان يشتري اللي نفسه فيه ومايحملش علي أهله كتر خيرهم ...
  • احنا الجيل العرة اللي كان ومازال بيحب مصر ، وماكناش مستنين منها حاجه بالعكس كنا بنفخر اننا نعرف نعمل لها اي حاجه ، ولما الجيش اتهزم في سبعه وستين انكسرنا والستات قلعت الدهب من ايديها علشان المجهود الحربي والناس اتبرعت بتحويشه العمر وجهاز البنات وثمن الكفن علشان الجيش وقالوا نربط الحزام وناكل طقه واتنين لا وقالوا الهزيمه عار والنصر رد كرامه وكل حاجه تهون علشانه..
  • احنا الجيل العرة اللي حلمنا نبني مصر وكانت احلامنا الشخصيه جزء من احلامنا الوطنيه واتعلمنا ان بقرش الادخار حنحارب الاستعمار وغنينا ياهلا بالمعارك يابخت مين يشارك بنارها نستبارك ونرجع منصورين ..
  • احنا الجيل العرة ، اللي عمر ماشاب فيه عاكس اخت صاحبه واللي بنت العيله كانت تخص العيله كلها ولو واحده فينا زوغت من المدرسه تعمل حساب كل نفر في العيله من الكبير للصغير ولو قفشها تترن علقه موت واتعلمنا ان الكدب خيبه والصدق منجي واللي يعترف بغلطه يتعلم واللي يكذب وينكر غلطه يتعاقب مرتين لان غلط ولانه كداب ...
  • احنا الجيل العرة ، اللي كانت بيوت كل اسره في العيله مفتوحه لكل العيله ، ولما كان بعض ابناء العيله في اسكندريه او القاهره ، فاي حد مسافر هناك ينزل علي بيوت العيله ، يتعلم يتعالج يجهز البنات ، كله في بيوت العيله وسريره موجود وملايته الجديده كمان .....
  • احنا الجيل العره اللي كنا نصيف في بيت خالتنا او عمتنا عادي جدا الثلاث شهور وامي تبعتنا من غير فلوس لان عيب تشتم اختها او اخت جوزها وهي متكفله بيكم وكأنها انا بالضبط والحياه سلف ودين ونردها ليها في الافراح ...
  • احنا الجيل العرة اللي كان يركب اتوبيس درجه تانيه بقرش علشان يوفر قرش مالوش لزمه نصرفه غير المنظره الفارغه ، اللي اتعلمنا ان الانسان بقيمته لابفلوسه ولا بشكله ولا بعنده ايه ...
  • احنا الجيل العرة ، اللي كان يقف في الاتوبيس علشان نقعد ست كبيره او راجل عجوز ونعمل نبطشيات من الشباب لرعايه الكبير العيان ، كل واحد منا يشيله يوم بليلة ، والكبير يذاكر للصغير والكبيرة تسرح شعر الصغيره وتضفره ونعمل مقابله عائليه كل شهر مره علي الاقل علشان نتطمن علي بعض ...
  • احنا الجيل العرة ، اللي كنا نقول لزوج الاخت ياخال ، ولاخت الجوز ياعمة ونعتبر المصاهره زي الدم نسب مايتحلش  ... 
  • احنا الجيل العرة اللي كنا نروح السينما يوم الخميس من 3 ل6 مره في الشهر وبعدها ناكل سندوتشات في جروبي وايس كريم ونروح مبسوطين واللي يسقط او يجيب نمر وحشه يتحرم من الخروجه ويتقال اصله عيان علشان مانحرجوش وسط العيله ..
  • احنا الجيل العرة اللي اتعلمنا ان الشغالين ياكلوا زينا اللي ناكل منه ياكلوا منه  ، لاياكلوا بقايا الاكل ولا الاكل اللي حيترمي لانهم بني ادمين وكمان بيساعدونا ويريحونا ولان ربنا حيحاسبنا علي معاملتهم والدعوة منهم علينا تدخلنا جهنم ..
  • احنا الجيل العرة اللي كنا بنستني في المواسم والاعياد خيرات القريه وخيرها ، بلح زغلول في الخريف ومانجو في الصيف وبرتقال وسفندي في الشتا ، ده غير القراقيش والكحك والعيش المرحرح والمرته والسمنه والزبده والبط والفراخ المدبوحه ، وكانت قريتنا هي الخير واهلها هم الطيبه وهي مصر وهي الاصل ...
  • انا من الجيل العرة اللي شفت ابويا بيعيط بالدموع ايام 67 وسمعت زغروده امي اللي مابتعرفش تزغرط ايام انتصار اكتوبر وسمعتها بتتحسر ان اختها ماتت قبل الانتصار فمافرحتش معانا بالنصر  ...
  • احنا من الجيل العرة ، اللي ربط حياته بمصر واعتبر انتصارنا انتصاره وفخره وهزيمتها نكسته ووكسته وحلم بيها اجل البلاد ورضعنا الوطنيه من العيله والمدرسه والاعلام والزعماء السياسين ودرسنا تربيه قوميه وعرفنا ابطالنا الوطنين من مينا موحد القطرين لاحمس هازم الهكسوس لرمسيس الثاني هازم الحيثين لمحمد علي باشا باني نهضه مصر الحديثه لعمر مكرم اللي قاوم الفرنسيين واتنفي لدمياط لعبدالله النديم اللي هرب من الانجليز لاحمد عرابي اللي وقف في وش الخديوي اسماعيل لسعد زغلول اللي خرج المصريين يطالبوا بالاستقلال لمصطفي كامل اللي قال كلمته العظيمه لو لم اكن مصريا لوودت ان اكون مصريا لجمال عبد الناصر اللي قال ارفع راسك يااخي انتهي عهد الاستعمار ، اللي كان بيحس انه ينتمي لشعب عظيم وحضاره عظيمه ووطن عظيم يستحق كل شيء جميل في الدنيا واتعلم ان المؤامرات الاستعماريه حاصرته وحاولت تحتل ارضه وتكسرارادته وتهزم روحه المعنويه واللي امن ان مصر مقبره الغزاه وان مصر هبه المصريين وان اللي يجي علي مصر مايكسبش وان مصر ام الدنيا وان طال الزمن ...
الحاجه الوحيده اللي اقدر اقولها بضمير مستريح ... ان احنا الجيل اللي عاش مصر الجميله الحميمه الدافيه الوطنيه المشرقه المبهجه ، الجيل اللي حب مصر زي امه وابوه وعيلته واتشرف بيها وسعي يشرفها وعيط بدموع عينه يوم هزايمها ورقص علي واحده ونص يوم فرحها وماقبلش عليها كلمه وخانق واتخانق علشانها واتكحل بترابها وشالها علي راسه .. اذا كنا ، زي العرة ولاد العره مابيقولوا علينا جيل العرة ، فنحن نفخر بأن جيلنا غير جيلهم وان جيلهم متسمم بروح غريبه وجدوره مقطوعه من الارض الطيبه وراسه مركوبه بالخرافات والهرطقه ولايعرف لادين ولا دنيا ولا وطن ولا اهل ولا عيب ولا اصول ،جيلنا غير جيلهم ونفتخر ، وعلي فكره حنفضل وراهم لما نعدل راسهم ونضبط بوصلتهم ونرجع وطنيتهم ونعدل طريقهم المعووج حبا في مصر وكرامه ليها لاننا مش حنسيب لها من ورانا اجيال معووجه تضيعها ... احنا وراكم والزمن طويل ...

هناك 11 تعليقًا:

عصمت الراجحى يقول...

انا من جيل العزه اللى من اولى ابتدائى كان بيروح المدرسه لوحده ويعدى الطريق ومش يخاف!!
انا من جيل العزه اللى حضر القسم المخصوص وكنا نمشى لغايه الاستاد علشان نتدرب على العروض !!
انا من جيل العزه اللى كان وهو فى ابتدائى او اعدادى وماشى يسمع خطبه عبد الناصر فى راديو القهوه يقف انتباه لغايه مايخلص!!!
انا من جيل العزه اللى كنا بنسابق بعض علشان نشترك فى الشرطه المدرسيه وفى ثانوى ننتظر حصه الفتوه كل اسبوع ونحاول نبقى ااقرب ما يكون من الضابط!!!
انا من جيل العزه اللى كان ينادى على الجيران من الشارع التانى علشان ليهم تليفون من ابن مسافر او قريب متغرب!!!
انا من جيل العزه اللى كان شقتهم فصل دراسى لابناء الحى بدون مقابل !!
انا من جيل العزه اللى كنت بأقضى بالساعات اقرأ الخطابات واكتب الرد للجيران اللى ابناؤهم فى الجيش فى اليمن او على الحدود !!!
انا من جيل العزه اللى كنا نقف طوا النهار امام ميناء اسكندريه منتظرين جيشنا وهو عائد من اليمن !!!
انا من جيل العزه اللى شفت عمامى المتجوزين وعندهم اولاد لا يمكن يشرب سيجاره امام والدى علشان اكبرهم !!
انا من جيل العزه اللى والدتى لما تعمل حاجه حلوه ااقوم بتوزيعها على كل الجيران !!!
انا من جيل العزه اللى لما كنت فى سنه دراسيه مسابق ولاد الجيران الصغيرين اخدهم اوصلهم للمدرسه !!!
انا من جيل العزه اللى كان لما يشوف عسكرى او طالب كليه عسكريه او ضابط فى الشارع يروح يحكى لباقى زمايله واسرته !!!
انا من جيل العزه اللى لو كان عندى سؤال صعب او كلمه مش فاهمها اروح للمدرس فى حجره المدرسيين يشرحها لى !!!
انا من جيل العزه اللى اهالينا كانت بتشترى الخرزانه للمدرس علشان يضرب بيها البليد !!
انا من جيل العزه اللى كنا بنسابق السنين علشان نروح الجيش او ندخل كليات عسكريه !!
انا من جيل العزه اللى كان لايمكن ينزل من البيت من غير فطار ولا يمكن يرجع بعد ميعاد الغداء مع الاسره كلها ولايمكن يدخل البيت بعد والده بعد المغرب !!!
انا من جيل العزه اللى كل البيت او العماره كان يتجمع على التليفزيون باى 17 او تليمصر 19يوم الجمعه علشان يتفرج على الشيخ الشعراوى وعالم الحيوان والماتش وبالليل العلم والايمان لمصطفى محمود..!!!
انا من جيل العزه اللى كانت كراسه المدرسه على غلافها 11 مبدأ للسلوكيات بتوقيع كمال الدين حسين !!
ممكن يا نكسجى يا بتاع الجيل العره اللى بيشتم جيشه تقول لى موقفك ايه من التجنيد
احنا الجيل اللى حب مصر ببلاش

عصمت الراجحى يقول...

انا من جيل العزه اللى من اولى ابتدائى كان بيروح المدرسه لوحده ويعدى الطريق ومش يخاف!!
انا من جيل العزه اللى حضر القسم المخصوص وكنا نمشى لغايه الاستاد علشان نتدرب على العروض !!
انا من جيل العزه اللى كان وهو فى ابتدائى او اعدادى وماشى يسمع خطبه عبد الناصر فى راديو القهوه يقف انتباه لغايه مايخلص!!!
انا من جيل العزه اللى كنا بنسابق بعض علشان نشترك فى الشرطه المدرسيه وفى ثانوى ننتظر حصه الفتوه كل اسبوع ونحاول نبقى ااقرب ما يكون من الضابط!!!
انا من جيل العزه اللى كان ينادى على الجيران من الشارع التانى علشان ليهم تليفون من ابن مسافر او قريب متغرب!!!
انا من جيل العزه اللى كان شقتهم فصل دراسى لابناء الحى بدون مقابل !!
انا من جيل العزه اللى كنت بأقضى بالساعات اقرأ الخطابات واكتب الرد للجيران اللى ابناؤهم فى الجيش فى اليمن او على الحدود !!!
انا من جيل العزه اللى كنا نقف طوا النهار امام ميناء اسكندريه منتظرين جيشنا وهو عائد من اليمن !!!
انا من جيل العزه اللى شفت عمامى المتجوزين وعندهم اولاد لا يمكن يشرب سيجاره امام والدى علشان اكبرهم !!
انا من جيل العزه اللى والدتى لما تعمل حاجه حلوه ااقوم بتوزيعها على كل الجيران !!!
انا من جيل العزه اللى لما كنت فى سنه دراسيه مسابق ولاد الجيران الصغيرين اخدهم اوصلهم للمدرسه !!!
انا من جيل العزه اللى كان لما يشوف عسكرى او طالب كليه عسكريه او ضابط فى الشارع يروح يحكى لباقى زمايله واسرته !!!
انا من جيل العزه اللى لو كان عندى سؤال صعب او كلمه مش فاهمها اروح للمدرس فى حجره المدرسيين يشرحها لى !!!
انا من جيل العزه اللى اهالينا كانت بتشترى الخرزانه للمدرس علشان يضرب بيها البليد !!
انا من جيل العزه اللى كنا بنسابق السنين علشان نروح الجيش او ندخل كليات عسكريه !!
انا من جيل العزه اللى كان لايمكن ينزل من البيت من غير فطار ولا يمكن يرجع بعد ميعاد الغداء مع الاسره كلها ولايمكن يدخل البيت بعد والده بعد المغرب !!!
انا من جيل العزه اللى كل البيت او العماره كان يتجمع على التليفزيون باى 17 او تليمصر 19يوم الجمعه علشان يتفرج على الشيخ الشعراوى وعالم الحيوان والماتش وبالليل العلم والايمان لمصطفى محمود..!!!
انا من جيل العزه اللى كانت كراسه المدرسه على غلافها 11 مبدأ للسلوكيات بتوقيع كمال الدين حسين !!
ممكن يا نكسجى يا بتاع الجيل العره اللى بيشتم جيشه تقول لى موقفك ايه من التجنيد
احنا الجيل اللى حب مصر ببلاش

(احمد سكر ) يقول...

تسلميلنا يا ام المصرررين على راى دكتور مجدى ..اتشرف انى لحقت الجيل الرائع دا

manoola يقول...

أميره
ايوه احنا عشنا الايام دي
احنا من الجيل ده .... الجيل العره
المشكله كلها في "."
ايوه .... نقطه وقعت من الكلمه
لاننا المفروض نقول احنا " جيل العزه"

اللي انضربنا بالقلم لما صوتنا كان بيعلى و بابا نايم
واللي ركبنا الاتوبيسات الحمراء هيئة النقل العام اللي كانت بخمس قروش واحنا رياحين الكليه علشان احنا مش على راسنا ريشه حالنا حال الناس كلها
واللي كنا بنجمع هدايا مجلة سمير و ميكي في صندوق كرتون ونلعب بيها مع اولاد عماتنا لما نتقابل
واللي كنا بنقول لو لم اكن مصريا لوددت ان اكون مصريا
واللي كنا بنتجمع في البلكونه نسمع الاخبار مع العيله حوالين صينية الشاي المنعنع ونبقى حاسين بالسعاده بلمة العيله

قلتي كتير يا آميره
و كل اللي قلتيه ولسه اكتر عشناه
عشنا مصر بخيرها بحزنها بكربها بنصرها
عشنا الوطن وللوطن

الله عليكي يا اميره
فين جيل دلوقتي من الهنا اللي عشناه

منال آبوزيد

اسكندراني اوي يقول...

ليا الشرف ان انتمي للجيل العرع اللي بيعايرونا بيه كل القيم اللي بنفتخر بيها دلوقتي هي بعينها اللي كل الجيل العره بيفتخر بيها
امثله عبقريه من حياه حقيقيه كل فرج فينا عاشاها وبيفتكر ذكراها دلوقتي

اسكندراني اوي يقول...

ليا الشرف ان انتمي للجيل العرع اللي بيعايرونا بيه كل القيم اللي بنفتخر بيها دلوقتي هي بعينها اللي كل الجيل العره بيفتخر بيها
امثله عبقريه من حياه حقيقيه كل فرج فينا عاشاها وبيفتكر ذكراها دلوقتي

غير معرف يقول...

مجدي السباعي
فكره د/نحمد المصري كانت اكثر من رائعه وتلقفتيها يا ام المصريين
بقلملك الساحر وحسك الوطني
افخر ونفخر اننا من الجيل العره اللي عاش حياته بتقاليده ووطنيته وفطرته المصريه
فعاش سعيدا بما اعطاه ربنه وبلده
قدر اعتزازي بهذذا الجيل العره
قدر حزني علي جيل ضاع في زحمه الحلم الامريكي المضلل

احمد الجدامى يقول...

انا من الجيل العره اللى بيستنى خميس كل اول شهر يسنع ام كلثوم
انا من الجيل العره اللى كان قلبه يدق بصوت عبد الحليم وبيسمع فيروز وبعدين يسال عن معنى الكلمه
انا من الجيل العره اللى اشترى اللبان عشان ريحه السجاير متظهرش فى فمه
انا من الجيل العره اللى ابوه بنظره واحده منه يجعلك تفكر انت غلطت فى ايه
انا من الجيل العره اللى حوش مصروفه وتبرع للمجهود الحربى
انا من الجيل العره لو نسيت الهمزه على الالف كانى ارتكبت جريمه لغويه فى حق مدرس العربى
انا من الجيل العره اللى بحترم الناس وبساعهدهم ولا ينتظر مقابل
اخدمهم مهما كانت ظروفهم
انا من الجيل العره لو لقيت جار تعبان فى اخر الحاره اجرى معاه للمستشفى
انا الجيل العره اللى يشوف جارته فى مكان غريب يعمل نفسه مش شايفها
انا من الجيل العره لو بنت سالتنى اصب عرق من كل حته
انا من الجيل العره الى كان بيحب بشرايط الكاسيت
انا من الجيل العره اما ادخل بيت عمرى ما انظر لااهله ويعتبرهم اهله
انا من جيل عرهاللى بيسال على جاره

عصمت الراجحى يقول...

تكمله سلسله انا من جيل العزه::
====================
-انا من جيل العزه اللى كان فى الحى كله خط تليفون ارضى او اثنين وكل الحى بيستعمله.!!
انا من جيل العزه اللى كان بيروح السنترال ينتظر بالساعات علشان يعمل مكالمه ترنك !!
انا من جيل العزه اللى كان بيعمل كل العمليات الحسابيه والجبر والتفاضل من غير آله حاسبه!!
انا من جيل العزه اللى كان لازم فى رمضان يفصل بيجامات كستور علشان يلبسها يوم الوقفه !!
انا من جيل العزه اللى كان فيه على مستوى الجمهوريه كلها واحد مجرم بيتسمى سفاح !!
انا من جيل العزه اللى حضر عسكرى الدرك بيلف على اقفال ابواب المحلات بالليل علشان يتأكد!!
انا من جيل العزه اللى كان له شيخ حاره عارف اسامى الحى كله وتواريخ ميلادهم وموقفهم من التجنيد!!
انا من جيل العزه اللى كان عنده البوسطجى بالزى الكامل والكاب وعارف اسماء الحى وممكن يسلمك الخطاب فى شارع تانى لو اقابلك !!
انا من جيل العزه اللى حضر الساتر الرملى امام البيت وودهان الزجاج باللون الازرق علشان غارات العدو الوحيد للشعب اسرائيل !!
انا من جيل العزه اللى كنا نضبط الساعات على سيارات القمامه وبعدها سيارات الصرف ثم سيارات الكلاب الضاله !!
انا من جيل العزه اللى حضرمواقف التاكسيات والحنطور وكنت اروح استحضرها لوالدتى او الجيران!!
انا من جيل العزه اللى الفران كان يوصلك طاوله العيش لغايه البيت 20 رغيف ب10 قروش !!
انا من جيل العزه اللى كان بيقرأ التلات جرايد كل يوم بملاحقها ب3 تعريفه !!
انا من جيل العزه اللى كان لا يمكن يقعد فى المواصلات العامه لو فيه حريم او كبار سن !!
انا من جيل العزه اللى كان الجلوس على القهوه للكبار فقط والعيب والعار ان الشاب يقعد عليها !!
انا من جيل العزه اللى كان هناك فى السينما حفلات مخصصه للسيدات فقط وافلام للكبار فقط!!
انا من جيل العزه اللى كان بيشترى من مصروفه ورنيش الهلب البنى والاسود علشان يوميا يلمع حذاؤه وانبوبه بلانكو لسلبس باتا بتاع الرياضه .
انا من جيل العزه اللى ما عرفش المكواه الكهربائيه واستعملها الا فى منتصف الستينات بعد بناء السد العالى !!
انا من جيل العزه اللى كانت رحله الاقصر واسوان اجباريه فى الثانويه العامه واولويه للمتفوقيين !!
انا من جيل العزه اللى اكل سندوتشات محمد احمد والتابعى الدمياطى لا ماكدونالز ولامؤمن ولاكنتاكى!!
انا من جيل العزه اللى كان فيه اتحاد طلاب ثانوى احرار وليهم نشاط وبيناقشوا مشاكلهم مع المدرس امين الفصل الاول من غير لا حقوق انسان ولا كان فيه سبوبه !!
انا من جيل العزه اللى ما عرفش الوان القمصان الا اللينوه الابيض واللبنى والرمادى والتيشرت البولو بتاع جيل الكريم واللبنى واسبدرين باتا ابو نعل رباط سواء كحلى او بيج لا اديداس لا اديداس ولا ريبوك ولا بيركارديان !!
انا من جيل العزه اللى كان بيشترى القصص والمجلات من مصروفه الشخصى !!
انا من جيل العزه اللى كان بيطلب من والده فى لبس العيد بدله ضابط او بحار !!!
انا من جيل العزه اللى كان فيه المدارس الخاصه للفاشلين واللى بياخد مجموعه درس خصوصى يبقى بالليل ومتدارى من زمايله !!

ها اقولك ايه ولا ايه ولا ايه يا جيل عره ما عرفش حتى يحترم الكبير وقيمته وتاريخه ؟؟؟؟

غير معرف يقول...

وانا من الجيل العره اللى كنت باخد اخواتي الصغيرين من الحضانه وانا راجعه من المدرسه الفحهم على قلبي واروح البيت اسخن الاكل واكل بعد ما ااكل اخواتي وانيمهم على ما ابويا وامي يرجعوا من الشغل
انا من الجيل العره اللى كنت بلبس مايوه البحر وعليه شورت وبلوزه واروح البحر انزل الميه من غير ما حد يعاكسني او يقلادبه عليا
انا من الجيل العرع اللى كنا نحط شمسيتنا على شاطي البحر عليها لبينا وادواتنا وفلوسنا وفى ركن الشمسيه ايجار الشمسيه ولما يجي المحصل ياخد الفلوس ويحط مكانها ايصال اسداد على مارنوح نتغدي ونرجع نلاقي كل شئ زي ما هو
احنا من الجيل العره اللى كان بيلعب فى الشارع ويخترع ويتكر العاب ومش بخاف من اي حد فى شارعنا عشان كلهم اهلنا ولو اي ععمو او طنط قالونا صوتكم عالي نقوله آسفين ياعمو ونتهامس عشان صوتنا ما يعلاش
احنا من الجيل العره اللى كان ابن الجيران لو بص لبنت بصه معزه كل الشارع يبقي عارف ومتاكد انهم حيتجوز ومافيش شاب يقدر يضحك على بنت حتة اة قريبه او اخت صاحبه او صحبة اخته

غير معرف يقول...

لما تكون دى كلها مواصفات جيل العرة امال احنا هنبقى اية بس......
لالالالالالا يا استاذة اميرةانتم جيل العزة جيل ابويا وامى ,اللى اتعلمت منهم القيم والاخلاق والمبادئ تعلمت احترام الكبير,تعلمت منهم اشياء كثيرةمثل التى ذكرتيها وبتشرف بها,حتى بعد ان رحل ابى لسة صوتة فى اذنى اسمع حكمة وافتكر كلامةوالمبادئ والقيم التى ربانى عليها,انتم حقا جيل العزة الذى نتعلم منه ونتشرف به ونتسند علية,بنتعلم من خبراتكم فى الحياةونستفيد من خبراتكم,وبنتسند عليكم دائما.. ربنا يخليكم لينايارب
Nashwa abd el halim