04 نوفمبر 2014

عيد حب بالمصري ..... من الفيس بوك



في يوم عيد الحب بالمصري 
كانت هذه العبارات ..... 
احتفالا بالحب علي الطريقة المصرية ..

( 1 ) 
فيه ناس بتستفز قوي من احتفالات المصريين باي مناسبه سعيده او نفسهم يحسوا فيها بسعاده ، نظريه قاسم السماوي بتاعت جتنا نيله في حظنا الهباب ...
بيتصوروا ان المصريين وهما بيحتفلوا الاحتفالات دي ، متجاهلين واقعهم بقي وعايشين محلقين ، ويقعدوا يدوهم نصايح ، ماتشوفوا حياتكم النيله قبل ماتحتفلوا ، وبيعتروا الاحتفالات دي نوع من البلاده ، بنظريه وكمان ليك نفس تحتفل ...
لهؤلاء اقول ، لابتفهموا في المصريين ولا في الحياه ..
المصريين فاهمين كويس ان الحياه صعبه وبيحاولوا يمشوا مراكبهم فيها رغم صعوبتها ، واقول مايلاقوا مناسبه او وقت ممكن يكون سعيد ، او يهون عليهم الصعب ، يشبطوا فيه ، يعيشوا اللحظه علشان يهونوا علي نفسك اللي هما اساسا عايشينه ...
وهو ده التعامل الناجح مع الحياه ، انت عارف صعوباتها ومشاكلها ، وبتحاول تتحمل وتتصدي وتحل بمنتهي الجديه بمنتهي الدأب ، لكن ده مايمنعش ، انك تسرق لحظه تنبسط فيها وكأنك طاير محلق ولا في اي مشاكل في حياتك ، تسرق لحظه تعيشها تسعدك وقتيا وبعدين ترجع تكمل صراع مع الحياه ...
فمحدش يقعد ينصحنا شوفوا عيشتكم ، احنا شايفينها كويس ، بس بنحاول نهونها علشان تعدي ، وانت معقدها في وش نفسك ووش الاخرين علشان الحياه ترسخ علي القلب زي الحجر تقتل ...
الحياه محتاجه مقاوحه والمقاوحه محتاجه بعض الفرحه ولو كانت وقتيا علشان نعرف نعيشها ونستحملها ...

( 2 ) 
هو الحب ينفع الا بالمصري ؟؟
حنحب بالخواجاتي يعني ؟؟ بالعربي المكسر ؟؟ من الشمال لليمين ؟؟؟
الحب ماينفعش الا بالمصري ، من جوه معاميع القلب !!! 
واوعي حد يقولي يعني ايه معاميع 
عيد حب بالمصري منقرش بسكر الكحك ومبهج يامصريين
عيد حب مصري بريحة النعناع الاخضر 

( 3 ) 
عيد حب مصري 
محوج بالفرحة ....

( 4 ) 
مغنيين مصريين كتير غنوا للحب وقالوا واتعذبوا واشتاقوا 
لكن كلهم كوم ، والست ام كلثوم ، وعبد الحليم .. كوم تاني ...
ام كلثوم وعبد الحليم ، حبهم بالمصري قوي 
من الحته الجوانية اللي ليها ريحه وشكل ووجع وهم وفرحه مصر ...
علشان كده ، حتي اغانيهم الوطنيه ، كلها حب ، اه والله ، حب بالمصري

( 5 ) 
عيد حب مصري ...
بالشطه واللمون 
انبسطوا يامصريين

( 6 ) 
وتظل اخطر كلمات الحب المصري 
" بولوبيف ... بولوبيف " 
نسمعها ونصدق انها كلمات حب 
ونبتسم كمان ...
انها العبقريه المصريه في التجلي والتألق ...


ليست هناك تعليقات: