كانوا زمان اصحابي بيقولوا علي " فشارة " !!! فشاره بامعر كتير !!!
طبعا " فشارة " كانت شتيمه ، وكانوا لما يقولوا علي كده ، كنت باعيط واحلف ميت مره اني مش "فشارة" ولا حاجه !! بس الحقيقه اني كنت فشاره فعلا !!!! كنت باحكي حواديت غريبه ، واقول انها حصلت !!! حواديت غريبه نفسي تحصل او بيتهيالي انها حصلت او نفسي الناس تسمعها مني ، طيب وحيسمعوها ازاي غير لو قلت لهم انها حقيقيه!!!!
كان قصاد بيت خالتي بيت للطلبه المسيحين ، كان بيت كبير وله سلم كبير وشباب طالع وداخل ، وانا عندي 7 سنين ، ونفسي اخش البيت ، اولا لانه كله شباب اشوف بيعملوا ايه ، عايشين ازاي ، ثانيا لانه بيت مسيحين ، وشايفه الصليب الكبير باين علي حيطه الصاله من الشارع ، عايزه اخش البيت اتفرج عليه ، وطبعا دخلته واتفرجت عليه ، لكن في خيالي ، وفي خيالي رحب بي القسيس وقالي " اهلا بالاميرات " وخدني في جوله جوه البيت ووراني مكان المذاكره ومكان الطبيخ ومالقتهمش بياكلوا عيال ولا بيشربوا من دمهم ، بياكلوا زينا بطاطس ولوبيا بعين سوده وفاصوليا بيضا ورز وسلطه ، القسيس رحب بي وقالي " اهلا بالاميرات " وكنت لابسه فستان ابيض دانتيل وحط لي من عنده طرحه بيضا زي بتاعت العرايس وكان ريحه الصاله بخور حلو قوي وقالي انت ليه ماجتيش من زمان ، وخدني معاه طلعني علي السطوح ووقفني اتفرج علي الشارع والميدان والجناين فشفت بيت خالتي وشفت بناتي خالتي قاعدين في الخيمه الكبيرة اللي عاملينها في البلكونه وشفتهم بيلعبوا ربات بيوت ، وكان الشباب بيلعب العاب علي السطوح ، ده اللي شفته لما دخلت البيت في خيالي ، وشفتهم بيهزروا مع بعض وواحد رش التاني بالميه وسمعتهم بيتكلموا صعيدي لان معظم المسيحين صعايده زي ماخالتي قالت ، وواحد منهم كان طيب خالص واداني حته شوكولاته ، هو كمان كان حليوة وعينه كحيله شبه الفراعنه اللي صورهم منشورة علي النتيجه الكبيرة في صاله خالتي ، اداني حته شوكولاته وقالي عجبتك قلت له اه ، قالي لما تعوزي تاني تعالي !!!!!!! وخرجت من البيت في خيالي ونزلت الشارع وكلهم بيعملوا لي باي باي ، القسيس الطيب والواد الحليوه وجيبي مليان شوكولاته وفضلت يومين تلاته اسمع تحيتهم لي " اهلا بالاميرات " ورحت حكيت لبنات خالتي ، طبعا ضحكوا واتريقوا علي وبهدلوني وقالوا علي فشارة وفضلوا سنين وسنين يعايروني باني فشارة ولما يحبوا يكسفوني قدام حد يقولوا لي " اهلا بالاميرات " !!!
انا ماكنتش فشاره ، انا كنت عايزه احكي الحكايه اللي شفتها في خيالي عن بيت الطلبه المسيحين وانا صغيرة قوي وعندي سبع سنين وطبعا ماكانش حد منهم حيسمعني لو قلت لهم انا حاحكي ليكم حكايه من خيالي !!!! لما قلت لهم اسكتوا معرفتوش مش وانا راجعه من البقاله عديت علي بيت المسيحين وحصل وحصل ، سمعوني وبعدين اتريقوا علي وعايروني !!! زعلت لما اتريقوا علي وزعلت لما عايروني لكن كنت مبسوطه اني حكيت الحكايه اللي شفتها في خيالي !!!!
المشكله اني فضلت احكي حواديت باشوفها في خيالي ، وكل مااحكي حدوته اصحابي في المدرسه الوحشين الشريرين يتريقوا علي ويقولوا فشاره وولاد عمي في البلد يقولوا لي حتخشي النار لانك بتكدبي ويشتكوني لجدتي لاني بامعر ليل ونهار ، لكن رغم كل ده ، رغم التريقه والمعايره عمري ماصدقت اني حاخش النار ، هو ربنا هيدخلني النار لاني بحكي حكايه شفتها في خيالي ، انا معملتش حاجه غلط ولا اذيت حد بس باحكي حكايه شفتها في خيالي !!!
مره حكيت لولاد عمي في البلد ، اني سمعت عود قصب بيتكلم !!!! قلت لهم كنت ماشيه في الجنينه بليل وستي راصه اعواد القصب فوق بعض في البلكونه القبليه ، قلت لهم اني سمعت عود القصب بيتكلم ، البت الشغاله صرخت وقالت بسم الله الرحمن الرحيم البيت فيه عفاريت ، البت كانت حتبوظ لي الحكايه ، انا ماشفتش في خيالي عفاريت ، انا شفت عود قصب بيتكلم ، زعلان ان الناس بتتريق عليه وتقوله ياابو زعزوعه ، زعلان لان الناس بتاخد حلاوته تمصها وتف الباقي ، لما حكيت لولاد عمي حكايه عود القصب اللي بيتكلم فضحوني وقالوا لستي البت اتهبلت وبتخرف وبتقول ان القصب بيتكلم ، جدتي خدتني في اوضتها وقالت لي احلفي علي المصحف ان عود القصب اتكلم ، قلت لها اتكلم في خيالي وسمعت حدوته في خيالي ، ضحكت جدتي وقالت لما تسمعي حاجه تاني في خيالك ماتقوليش لحد لان محدش حيصدقك ، قلت لها حاضر ، لاني كنت خايفه قوي من اوضتها الضلمه ، لكن فضلت احكي للناس عن اللي بشوفه في خيالي ، اما يعني لما اشوف حاجه في خيالي اعمل ايه ، اكتمها وانساها واسكت !!!!
مرة طرت مع العصافير وقعدت في العش القش فوق التوته الكبيرة اغني وارقص وعملت بي بي فوق كتف عم بدوي بتاع الحقن !!!
ومره رحت بيت بابا جمال عبد الناصر وقالي تعالي يامرمر ده انا مستنيك من زمان وقالي اننا حنغلب اسرائيل واني مااخافش وبعد مانغلبها حنرجع نروح كباين بورسعيد ام عواميد ملونه زي ماكنا بنروح زمان !!
ومرة سافرت مع الفيل للبلد بتاعته وشفت التعابين فوق الشجر وشفت الفيل بيدوسها برجليه ، كنا في جنينه الحيوانات لما حكيت الحكايه دي ، قلت لهم ده زي الفيل اللي داس التعابين بالضبط ، بنات خالتي قالوا لي فيل ايه ، وحكيت حكايه الفيل الطيب اللي كان بيموت التعابين اللي بتاكل العصافير من فوق الشجر ، ضحكوا بنات خالتي وقالوا يافشاره لاعمرك سافرت ولاعمر الفيل داس التعابين ولا عمر التعابين كلت العصافير من فوق الشجر !!!
هو ده بقي الفشر اللي بيقولوا عليه !!!!!
ليه فشر طيب !!! هي صحيح الحدوته اللي بحكيها ماحصلتش بجد !!! لكن حصلت في خيالي وبابقي شفتها وعشتها بالضبط زي ماحكيتها !! ليه فشر بقي !!!!
مرة قلت لاصحابي في المدرسه اني دخلت مسابقه ملكه جمال الشاطيء ، كان عندي خمس سنين لما دخلت المسابقه ، دي بجد بقي ، دخلت المسابقه ، لكن لطعوني كتير قوي انا وكل البنات علشان نشترك في المسابقه وفجأ عيطت لاني زهقت وقلت لماما عايزه اروح وقعدت اعيط ماسكتش ، وصممت اروح البيت ولما روحت قلعت الفستان اللي بيشوك ولبست المايو وقلت لها عايزه العب في الرمل !!!! بس انا ماقلتش لاصحابي كده ، انا حكيت لهم ايه اللي حصل زي ماشفته في خيالي وانا قاعده العب في الرمل ، قلت لهم اننا مشينا علي سجاده حمرا طويله ، واد غلس قالي يافشاره هو فيه سجاجيد حمرا علي البلاج ، قلت اه وقعدت اعيط ، ماهو في خيالي كان فيه سجاده حمرا وانا مشيت عليها وفستاني اللي كان بيشوك في الحقيقه بقي في الخيال حرير في حرير ، قلت لهم اني انا وبقيت البنات مشينا فوق السجاده الحمرا وان البت الغلسه اللي كانت قدامي وقعت واتكعبلت ، ضحكوا علي العيال في المدرسه ، بس هي بجد في خيالي وقعت واتكعبلت اصلي كنت باكرهها ، انا مازقيتهاش في خيالي هي اللي وقعت ، قلت لهم ان الناس صقفوا لينا جامد قوي واني رقصت علي السجاده الحمرا وكرانيش الفستان طارت ، بت غلسه قالت لي فستانك ماكانش له كرانيش ، بس في خيالي كان له كرانيش وجميله كمان ، قلت لهم ان لجنه التحكيم اختارت بنت تانيه اكبر مني علشان تكون ملكه جمال الشاطيء لكن اختارتني انا باعتباري امورة وادتني شوكولاته ، العيال في المدرسه اتريقوا علي وقالوا لانتي اموره ولاحاجه وانت فشاره !!!! فشاره !!! فشاره !!!!
وكبرت بقي ..... بقي عندي عشر سنين وفي الابتدائية وبطلت احكي اللي بيحصل في خيالي علشان الناس تبطل تقولي يافشاره !!!
لكن فضلت الحكايات تحصل في خيالي !!!
وفضلت الناس رغم اني بطلت احكي ، فضلت برضه تقولي يافشارة !!!!
وشويه شويه الناس نسيت حكايه الفشر دي !!!!
لكن برضه فضلت الحكايات تحصل في خيالي !!!
لما امشي في شارع ، اشوفه في خيالي وكاني مشيته قبل كده واسمع حواديت من الناس ومن الجيران واشوف حادثه ويصعب علي الناس ومره شفت قطه داستها عربيه وسمعت القطه بتتكلم !!!
لما اشوف حد اول مره اشوفه ، اعرف اني شفته قبل كده ، ويطلع لي معاه ميت حدوته وحدوته ، ساعات يبقي طيب فاحبه في خيالي ونرقص سوا وساعات يبقي غلس فيضربني في خيالي فاعضه واخاصمه ومره اشتكيته للبوليس!!! كل واحد اشوفه ليه عندي في خيالي ميت حدوته ، ابقي عارفاه لان قعد معايا في خيالي وحكي لي حكايته وحبيته او كرهته !!!!
وشويه شويه بقي خيالي دولاب حواديت ، وبعدين مخزن وبعدين عماره حواديت وبعدين بلد حواديت !!!!
ولسه كل حاجه بتحصل في خيالي ، لكن بطلت احكيها للناس علشان مايقولوش علي فشاره !!!!
بس تصدقوا بحب الفشر قوي ، ومش عارفه الناس بتزعل منه ليه ، لاباذيهم ولا بضايقهم وبسليهم بحواديت جميله بشوفها في خيالي !!!
ولما كبرت عرفت وفهمت ان القصه مش قصه فشر !!!
دي قصه خيال بيولد حواديت !!!
وحدوته اكتبها وحدوته انساها !!!
ولما كبرت اكتر ، عملت مدونه للحواديت !!!
احكي فيها اللي خيالي بيشوفه ، بس ساعتها الناس بتقرا الحواديت ومحدش بيقولوا يافشاره !!! مع ان والله الموضوع هو هو !!! زمان كنت باحكي ودلوقتي باكتب والحكايه اولها واخرها حصل في خيالي !!!!
ماعلينا ............ تصدقوا حبيت القسيس قوي لما قالي " اهلا بالاميرات " !!!!
لسه لغايه دلوقتي سامعه صوته في ودني ولسه فاكره احساسي بالسعاده ولسه باحبه !!!!
بس خدوا بالكم ، هو قالي كده في خيالي ، لحسن حد يرجع يقول علي فشاره !!!!
والله ماانا فشاره ولا حاجه !!!
كله من خيالي ابن اللذين اللي احرجني وانا طفله صغيره من بنات خالتي وولاد عمي واصحابي في المدرسه !!!
ااقولكم سر ............. بحب خيالي وكل الحواديت اللي بتحصل فيه !!!!
ااقولكم سر تاني ................... ساعات ادور في الشارع علي الواد ابو عيون كحيله اللي اداني شوكولاته ، نفسي اقابله فاقوله هات حته كمان ، مع ان كل ده حصل في خيالي !!!!!
ااقولكم اخر سر .............. ياما خيالي بسطني بحواديته ولسه ياما بيبسطني !!!!
بس زعلت لما قالوا لي يافشاره وبازعل اكتر لما اشوف حد يقول علي حد ، ده فشار !!!
ااقول لا ، فشار لا ، لكن عنده حدوته في خياله حصلت ونفسه يحكيها !!!
واه منها الحواديت واللي حصل لي من وراها وبسببها !!!
ياتري مين منكم كان بيقولوا عليه فشار وهو صغير هو كمان !!!
وعلي راي الاعلان ، الفشارين بيحكوا حواديت واحنا معاهم !!!!!
