09 أغسطس 2010

انا حرة جدا ...




يسقط حسين رياض يسقط يسقط يسقط
الي بنفسجه " نوت " من وحي اللحظه !!!!!!!!!!


انا حرة .... جمله من كلمتين بس لكن دفعنا تمنها بالغالي قوي !!!
انا حره ، افكر زي ماانا عايزه ، وكمان اعمل اللي انا عايزاه !!!
روح متمرده جوانا واحنا علي اعتاب المراهقة وتشتعل اكتر واكتر واحنا داخلين الجامعه وحاسين اننا بنكبر ونستقل واهالينا المفتريين مش عايزين يعترفوا اننا كبرنا وهما براحتهم بقي و............ لابد من الصدام ومش مهم فلتدق طبول الحرب!!!

انا حره .... لما لبني عبد العزيز طلعت في فيلم احسان عبد القدوس وقالت انا حره ، كلنا انبسطنا قوي ، هي دي الحريه والا فلا ، الاول ابقي حره البس زي ماانا عايزه ، واتخانق وعلي ايامنا عايزين نقصر الجيبات ونضيق البنطلونات وننكش شعرنا المسبسب !!!

وبعد مانخلص حريه اللبس ، نخش بقي علي حريه التفكير ومش حاذاكر انا حره ، ونقرا كتاب يمخول مخنا لكاتب فاشل نتقتنع قوي جدا بكلامه وندافع عن افكاره بمنتهي العصبيه والنرفزه ومانقبلش مناقشه ولا جدل وعلي طول الناس التانيه مش فاهمه وغالبا مش فاهمانا احنا وهما الغلطانين ، وحادرس طب وانا بيغمي علي لما اشوف نقطه دم ، وحاسهر اذاكر وانا بانام علي روحي ، وحاتفرج علي الفيلم وبعدين انام وحاعرف اصحي بدري وانا بانام الساعه 9 ، حاعمل اللي يعجبني وانا حره جدا .... والحريه يعني ابقي عصبيه ومقاوحه ولما ابويا يزعق في ولا امي تعاتبي اتقمص واتكتم واقرر اعاقبهم واخاصمهم ومااردش علي بابا ال ايه مش سامعه ومااجيبش كوبايه ميه لماما لاني بادور علي الشبشب واستهبل في كل حاجه ماانا حره بقي !!!! وازور بنت عم ابويا بالعافيه وانا متغصبه واتنيل علي عيني اخش المطبخ مع ماما وانا متغصبه وابتسم في وش بنت صاحب ابويا الرخمه اللي جايه تزورنا مع ابوها وانا متغصبه واقول استني علي يادنيا بس لما اكبر واستقل واشتغل ، ساعتها حابقي حره حريه رهيبه واعمل اللي انا عايزاه !!!


طب هو ايه اللي انا عايزاه ، مش عارفه ومش مهم ، ماانا حره حتي افكر او ماافكرش ايه اللي انا عايزاه او مش عايزاه ، المهم محدش يغصبني علي حاجه ولا يفرض علي حاجه ولا يقرر لي حاجه !!! لان ده بيتناقض مع الحريه والحريه دي حقي واي كلام تاني اعتداء علي لايمكن السكات عليه ، طبعا ده حواري الداخلي جداااااااااا وقبل ماانطق ابويا يزعق بعلو حسه ، يالا امشي يابت من هنا يلعن ابوكي بنت كلب !!! واجري طبعا قبل مالحوار غير الديمقراطي يتطور اكتر بس استني علي يادنيا !!!!


خلصنا حريه في اللبس وخلصنا حريه في المذاكره وجينا بقي للتقيل ، انا حره احب !!! اخرسي ، لا مااخرسش !!! ومش حاتجوز فلان لاني مابحبوش !!! ومش حاسمع الكلام !!! وعايزه اتجوز فلان لاني بحبه ، ليه ، هو ايه اللي ليه ، بحبه ( يابابا ) وخلاص !!! ومع اول قلمين اخدهم من ابويا الديمقراطي ، احب المذكور اكتر واكتر ويصبح الحب معركه نضاليه يلزم الانتصار فيها واسمع اسمي بيتغني علي الربابه انا والحبيب ، زي ناعسه وايوب وقيس وليلي وعنتر وعبله وفتحيه وعبد السلام ، مين فتحيه وعبد السلام ، دول جيرانا اللي حبوا بعض وقعدت فتحيه تتضرب من ابوها لغايه مانسيت اسم عبد السلام وكمان شكله !!! ماعلينا ، انا مش ااقل من فتحيه وباحبه يابابا !!!

و.............. انا حرة !!!!
وامي تتكلم وانا مااسمعش لاني حرة !!!
وابويا يزعق وانا مااسمعش لاني حره !!!
وعماتي ينصحوني لكن ابدا والله ماانا سامعه نصيحتهم لاني حره جدا !!!
ويعيش احسان عبد القدوس ولبني عبد العزيز يعيش يعيش يعيش ويسقط حسين رياض المستبد المفتري اللي كسر الكنجه ويسقط اي حسين رياض حيكسر الكمنجه !!!
وغوري ........... اعملي اللي انت عايزاه ، اه حاعمله ، ماانا حره !!!
غوري ............... بس لعلمك اللي بيشيل قربه مخرومه بتخر علي راسه هو !!
تخر علي وانا حره ، احسن ماما تخرش وانا مش حرة !!!!
ويسقط حسين رياض يسقط يسقط يسقط !!!

و ..................... اعيش حرة !!! اخد قرارات !!! بعضها صح ، بعضها غلط !!! والقربه مابتبطلش خر علي راسي !!! وهي تخر علي راسي وتبل هدومي وانا مستهبله واقول الله ايه الخر الحلو ده !!!!!!!!!!!! اخد قرارات ، واكتشف بعد فوات الاوان ، انها قرارات منيله ، لكن علي مين ، معقوله ارجع اقول انا عيله وغلطانه ، لا والف لا ، لابد من المكابره والمقاوحه والعناد والاستهبال علي النفس اساسا ، وانا حره يعني حره !!! وخري ياقربه علي راسي خري!!!!!


واخد قرارات عبيطه ، امي تقولي غلط !!! ااقول ياحرام مش فاهماني وغلبانه وتجربتها محدوده !!!! ابويا يزعق ويقول يابنت الكلب ماتبقيش حماره وتعندي ، وانا ااقول يسقط حسين رياض والاستبداد السياسي والخديوي اسماعيل ، وامشي في طريقي المنيل واتخبط علي راسي كل خبطه وخبطه .... صحيح باتعلم ، لكن التعليم تمنه غالي وعياط كتير وتقلصات في المعده لاني عصبيه وفين وفين .... بعد الهنا بميتين سنه ، اراجع نفسي واقول ، ايه الهبل اللي باعمله ده ، ماكنت سمعت كلام امي ولا حاولت افهم اعتراضات ابويا ، ايه الهبل ده ، مين اللي اقنعني اني باتنيل علي عيني بافهم احسن منهم ، اهي اهي ، واعيط واعيط ، ومناديل ورق علب ورا علب ، اعيط وامسح دموعي واضحك وسط العياط واقول ، اهم حاجه اني حره !!!!!!!!!!!!!

وساعات ربنا يهديني فاتراجع عن القرارات بتاعت انا حره ، وساعات افكر وابطل عند ، وساعات اتعلم من كتر التلطيش علي خد واحد ، و.......... الحياه بتمشي زي حمارتك العرجاء ولاسؤال اللئيم ، وانا حره جدا خالص مالص !!!!
وبعدين اكبر .... اه والله ... اكبر ، هرمونات المراهقه تتضبظ وتوتر الشباب يخلص وابقي ست عاقله ، او هكذا اظن ، وااقف مع نفسي ساعات واقول ايه اللي عملته في روحي ده ، والخناق كان ليه ، وليه مافكرتش افكر في معني كلامهم وليه ماحاولتش اسمعه !!! لكن اكتشف اني وانا صغيره وهرموناتي ملخبطه ، كان يستحيل اسمع ولا افكر ولا افهم ، ولما كبرت فهمت !!! بس كنت دفعت التمن الغالي !!!!

مليون مليون موضوع ، كانت الدنيا ممكن تمشي فيهم احسن ميت مره من الطريقه اللي انا مشيتها بيها ، لكن وقتها كنت صغيره وحره ومعرفتش اشوف غير اللي شفته ، ولما كبرت بقيت اشوف الدنيا بطريقه مختلفه !!!! لكن قبل مااكبر كنت باشوف الدنيا زي ماانا شايفاها ، والخبره ما بتتخدش لا حقن ولا كبسول !!!
الخبره لازم تخدها في الحياه ، انا حره وبعدين تلطيش تلطيش وبعدين عياط والقربه تخر علي راسك وهدومك وبعدين ياريت اللي جرا ماكان !!!!

بالمناسبه ، انا حره جدا دلوقتي بكل المقاييس والمعاير ، عندي 51 سنه وام وباشتغل وعندي دخلي الخاص واستقلالي الاقتصادي ، لكن لما بقيت حره بجد ، اكتشفت اني مش حره خالص ، لاني وانا بافكر وباتصرف ، بافكر في ابويا واللي يزعله وبافكر في بناتي واللي يناسبهم وبافكر في شغلي وعملائي واللي يقبلوه مني واللي مايقبلهوش ، نفسي اابقي حره واقعد علي الرصيف ماينفعش ، نفسي ابقي حره واصيع مع صحباتي يومين تلاته ماليش دعوه لابالعيال ولا بالبيت ولا بالشغل ، ماينفعش ، نفسي اصرف الفلوس اللي معايا في التهييس والهبل واشتري روج وبرنيطه بفوينكه كبيره والبس قبقاب بكعب وامشي اطقطق في الشارع ماينفعش ، مايصحش ، نفسي اروح الشغل بالبيجاما لانها اريح والجو حر ، ماينفعش ، طيب نفسي انام تلت ايام ومااروحش المحكمه ، برضه ماينفعش ، طيب اشتري فستان لي ولا فستان لبنتي ، لبنتي طبعا ، بس انا حره وهي لا ، ماهو علشان انت حره وكبيره وعاقله ، هي اولي بالفستان وانت لا ....


طيب ينفع اشخبط علي الحيطه ، طول عمري نفسي اشخبط علي الحيطه ، والحيطه اللي في بيتي دلوقتي بتاعتي انا ولو شخبطت عليها محدش حيزعق لي وحابقي حره خالص ، ههههههههه ، طبعا لا ماينفعش ، ده كمان اللي حيشخبط علي حيطه بيتي اموته !!!
طيب ............... بس بقي ولا طيب ولا حاجه !!!

انا حره لدرجه اني ماابقاش حره !!!! حره لدرجه اني اقرر افقد حريتي لصالح اخرين باحبهم وباحترمهم ، واروح المكتب بالتايير واسرح شعري وماانكشوش ، واروح البيت اشوف التلاجه فيها ايه وادي بنتي فلوس الكافيه وهديه عيد ميلاد صاحبتها وازور صاحبه امي العيانه مع ان دمها تقيل لكن لازم ، واروح المياتم وانا نفسي اخش السينما لكن ده واجب ماينفعش ، ولما اروح فرح ااقعد محترمه زي الستات المحترمه اللي عندهم 51 سنه مش ااقوم اترقص زي العيال الصغيرين ................. اهي اهي ... حابقي حره امتي بقي !!!!

وبعد العمر مايعدي ، واللسع علي الدماع يشتغل وخدي يورم من كتر الاقلام بتاعت الدنيا وبعد ماعيطت وخلصت عياط وبعد مااتوجعت لما اتفرتكت وبعد مالومت نفسي علي اللي عملتها فيها وبعد ماغنيت وانا باعيط كنت فين يالا لما قلت اه ، بعد ده كله ، اكتشفت ان الحريه اللي كنت عايزاها ماطلعتش حريه ولا حاجه ، والحقيقه مافيش حد حر ، كلها اوهام !!!! مش بس كده ، لا كمان ، الحريه اللي اتخانقت علشان اخدها وانا صغيره لانها حقي ، طلعت هي حريه الغلط وطبعا حريه الغلط حريه عظيمه جدا ، لكن للاسف لسه بادفع تمنها لغايه دلوقتي !!!

وتلف الدايره ، وتيجي بنتي تقولي انا حره ، واضحك في كمي ، واقول لها ليه بس كده ، واحاول اعقلها ما تعقلش واحاول انصحها ما تتنصحش واسمعها في سرها بتهتف ، يسقط حسين رياض يسقط حسين رياض ، واضحك واقول بكره تندم ياجميل !!! لكن الجميل مش عايز يسمع والخبره ما بتتاخدش حقن ، الخبره تيجي بعد الغلط والوجع والتلطيش !!! وياحرام يابنتي والله انت صعبانه علي واشوف في عينها نظره انت مش فاهماني انت مش حاسه بي ، طيب ، انا حاقول وانت مش حتسمعي ، ده القانون ، انا اقول وانصح وانت تقولي انا حره وبعدين ، لما خدودك تورم من التلطيش والعياط يبقي انهار انهار ياولدي ، وبعد القربه ماتغرقك وتغرق راسك وهدومك بكره تفتكري كلامي .......... وانا مش زعلانه منها ، انا فاهمه ان الامر فيه هرمونات وتمرد وشباب ............و لبني عبد العزيز !!!!

طيب ايه حل الفيلم ده يعني ، ولا ليه اي حل !!!
انا حره !!! حره اجرب اغلط اتنيل علي عيني !!! وبعد ماااخلص حريه اكتشف اني عمري ماكنت حره ولما ينفع ابقي حره ماابقاش حره ، ولما الشعر الابيض يكتر والصبغه ماتعرفش تخبيه ، افهم ، بس بعد فوات الاوان !!!
ومين العبقري اللي قال ، اللي ماربتوش الاهالي تربيه الايام والليالي !!! ده غالبا حد القربه خرت علي راسه لما غرق !!! حد كان حر جدااااااااااااااااااا وبعدين اكتشف لما بقي حر ان ام الحريه اللي كان متصورها واتخانق عليها هي حريته انه يغلط !!! طبعا الكلام ده بينمي الشخصيه ويعلم ويخلي الانسان زي العمود الخرسانه يتضرب باللوكميات مايقولش اي!!!1

ماشي ............. انا حره حتي اشعار اخر !!!!
انا حره جدا !!!!!!!!!!!
وبنتي حرة جدا !!!!!
وبنتها ان شاءالله حره جدااااااااااااا !!!
وهي دي سنه الحياه ودورتها الطبيعيه !!!
حريه حتي تخر القربه المخرومه كل اللي فيها علي راسنا كلنا !!!

و................. لازم ااقوم اتنيل علي عيني اكمل شوبنج رمضان ، رغم اني مانفسيش خالص انزل في الزحمه ولا اصرف فلوسي ولا اجيب اي حاجه ، ورغم اني حره جدا ، لازم ااقول وبمنتهي الحريه اعمل اللي كل اللي علي واللي مااقدرش اهرب منه !!!!
وياربي ............ هي القربه مش حتبطل تخر بقي ؟؟؟؟؟؟؟؟؟؟ ولا حتفضي وترحمني !!!!!!!!!!!!!!

هناك 7 تعليقات:

مها جمال يقول...

كل سنة وانتى طيبة ورمضان كريم
انا ماقلتش انا حرة ابدا ولا عملت غير اللى اهلى عايزينه ومع ذلك باتلطش واخد على دماغى ليييييه ماعرفش
كل سنة وانتى طيبة ونوتاتك الجميلة تفرحنا وتبسطنا

غير معرف يقول...

Really very nice written,
No one is free, only those without desires are free,

Sharm يقول...

كل عام وانتم بخير

بنت القمر يقول...

انا حره لدرجه اني ماابقاش حره !!!! حره لدرجه اني اقرر افقد حريتي لصالح اخرين باحبهم وباحترمهم ، واروح المكتب بالتايير واسرح شعري وماانكشوش ، واروح البيت اشوف التلاجه فيها ايه وادي بنتي فلوس الكافيه وهديه عيد ميلاد صاحبتها وازور صاحبه امي العيانه مع ان دمها تقيل لكن لازم ، واروح المياتم وانا نفسي اخش السينما لكن ده واجب ماينفعش ، ولما اروح فرح ااقعد محترمه زي الستات المحترمه اللي عندهم 51 سنه مش ااقوم اترقص زي العيال الصغيرين ................. اهي اهي ... حابقي حره امتي بقي !!!!
=================
انت حرة ... وانا بحبك
:)))

manal يقول...

عزيزتي اميرة
ما بين " انا حرة" و "الوسادة الخالية" وغيرهم كتير كتير من السيناريوهات.... قاوحتي وقاوحنا كلنا تقريبا بنفس العبارة التي اقتبسناها من هنا او من هناك... الدماغ اللي عاملة زي الزلط وعبارة انا حرة... وفارس الاحلام اللي ما كناش شايفين الدنيا حلوة الا بيه...
سيناريوهات من كل لون يا بطستا
لكن, تبقى مسألة مهمة جدا....
بجد بجد... هو امتى ها نبقى احرار؟
طب ما انا دلوقتي قاعدة مافيش ورايا حاجة..وممكن ببساطة أنزل اركب عربيتي واروح على جبل المقطم اشوف في كل لمبة نور حكاية بيت واسمع موال بالليل
او مثلا ممكن اروح على شط النيل... حاجة كمان كان نفسي اعملها زمان وانا لسة بضفيرة وشريطة... اروح على الكورنيش بعد نص الليل.... اسمع وشوشة الموجة.....
ممكن اعمل كل دا وببساطة شديدة... يمكن علشان فعلا افتتحنا سن الخمسين
لكن,,,,,,,
ايوة لكن.......
ايه اللي مكتفني... وايه اللي مقعدني
عندي الحرية... لكن القرار نايم ومتدفي تحت الكوفرتة
علشان ما يصحش انزل..ليه؟
علشان الاصول...
علشان مش طالبة غلاسة الضمير اللي ياما كسرت له العصاية اللي ماسكهاوهو بيقول لي اسمعي الكلام .. كبير عنك بيوم يفهم عنك بسنة
كل اللي قاله ابويا وامي في سنين عمري
بقى في دمي من بلاش كدا... اعقلي... انتي بجد مجنونة الخ الخ.... كل دا بقى بيجري في دمي وبقيت بسمعه حتى في حلمي
مش حاجة تمخول يا اميرة؟

قوس قزح يقول...

و الله ضحكت ضحك على كلامك

تصدقى عندك حق
احنا ليه عملنا كده فى نفسنا
انا فضلت ازن على العربية و لما جيبتها مش قادرة اسوق فى الزحمة دى و طبعا دلوقتى بيتقال لى ما انتى معاكى عربيتك اعملى مشاويرك بنفسك بعد ما كنت باطلب بس اروح حتة يودينى
واضح انها بتخر علينا كلنا

كل سنةو انتى طيبة ..رمضان كريم

نيبال السمري يقول...

الحريه لما تكون سبب ان القربه تخر عليكي وحدك ده مش مشكله "اتحملي نتيجه اصرارك" ولكن المشكله بتكون لما تطلبي وتصري علي الحريه ونتيجه هذه الحريه حتخلي القربه تخر عليكي وعلي اللي حواليكي وحتغرقكم معاكي وقتها بس ماتبقاش حريه تبقي فوضه تؤدي الي هرجله تودي في مصيبه سوده، وواجب علي المسئول عنك يقولك كخ كده غلط ابوس ايدك كفايا حتغرقينا
نوت من ايام رمضان ولكن وقتها دلوقتي فعلا