دماغ صيام !!!! من حقي اخرف !!!!

لما الواحد يبقي عامل دماغ صايم ، والنيكوتين مسحوب من الدم ، والاملاح تحت الصفر ومعاها الضغط والحر جميل ، ساعتها تطلع الافكار عبقريه ، بنار الهذيان ، مافيش سيطره عليها ، وتحس ان الافكار صور والوان وخيالات ، وتفهم ليه العيال السوابق بيضربوا برشام وصراصير في الحجز ، علشان تبقي الحياه بمبي من قله الاحساس !!!

ايوه هنا كل المشكله ، الاحساس والتركيز في الاحساس بيخلي الحياه كحلي ومنيله بستين نيله !!! لان اسم الله يعني حنحس بايه ، كل حاجه غامقه جدا ، واحنا بنقاوح ونهيس ونقاوم ونعمل اننا مش واخدين بالنا ، قوم ايه ، قوم ربنا يبعت لينا رمضان كل سنه ، وفي الشهر الكريم ، ربنا يكرمنا بان دماغنا تتعطل ، ولما تتعطل دماغنا ، الدنيا تبقي بعيده ، كانها واقفه علي الرصيف التاني ، تحس انك في وادي والدنيا في وادي ، وساعتها تبتسم من غير سبب ، تبتسم ليه ، لانك مش عارف تفكر وطبعا قله التفكير احسن ، لان التفكير مصيبه بتجيب الصداع ووجع الدماغ ، و.............. علي طول وفورا تبقي الحياه بمبي مسخسخ !!!

لانفكر في الشغل ولا مشاكله ، بالكتير نتاوب وعينا تدمع لاننا عايزين ننام والاكسوجين قليل ، والنيكوتين منعدم والكافيين منسحب !!! لانفكر في الشغل ولا في مشاكل الحياه ، لان الحياه كلها بتتعطل والناس تبتسم وتقولك كل سنه وانت طيب!!! طبعا ، كل سنه وانت طيب ، طيب يعني راسك متعطله والحياه بمبي !!!

محدش يفوق نفسه بقي ، ويقرر وهو صايم يقرا الجرنان ، لان كل اللي مكتوب فيه من ناحيه مالوش اي لزمه ولان المكتوب يغم ويقرف ولانه يفوق بلد ، محدش يفوق نفسه ويقرر يناقشنا في قضايا جاده ويحرمنا من متعه الدروخه ولا يتفرج علي نشرات الاخبار ولا حتي يقرر يتابع المسلسلات وبعدين يقول وحشه ومقرفه !!! ولنا في العيال السوابق بتوع قسم قصر النيل قدوه ، احنا حنعمل دماغ من غير صراصير ونحافظ علي الدماغ دي ، محدش بقي يتكلم جد ولا يفكر يناقشنا في حاجه مهمه ولا يستني منا كلام بحق وحقيقي ، لان دماغ الصايم ما تصلحش لتلك المناقشات والجديه ، دماغ الصايم صممت خصيصا للروحنه ، والروحنه يعني ماتفكرش وحتي لو حاولت تفكر وعصرت مخك ( زي زينب في انا وهو هي ) حتلاقي فراغ وبياض ، زي ماتفعص في عينك تشوف الدنيا بيضا وانت مغمض ، في الصيام بقي ، تشوف الدنيا بيضا وفاضيه علي الاخر وانت مفتح !!!!

ولان ربنا كريم ورحيم بعباده ، قالك الصيام شهر واحد بس ، بعد كده كله يفوق ويركز في الدنيا والعيشه واللي عايشنها وكل واحد يشوف وراه ايه ، فنقعد حادشر شهر فايقين ومركزين ونقاوح في الدنيا والدنيا تقاوح فينا ، ولما نقرب نتعب ونفرهد والموتور يتحرق ، يجيي رمضان والتتنيح وراحه الدماغ وابتسامه بلهاء وكل سنه وانت طيب !!!!!! وماله برضه !!! دماغ الصايم نعمه من عند ربنا ولطف بالعباد ، اللي راسهم بتلف زي الموتور اللي قرب يتحرق ، فقبل مايتحرق ، ربنا يجيب رمضان يعطل الموتور ويبرده ويخليه جاهز للحرب بقيه السنه !!!!

مش عارفه انا بخرف ولا ايه ، لكن حتي لو بخرف وايه يعني ، ماانا غالبا طول السنه باقول كلام عاقل مافيهوش اي تخريف ، والتخريف حق لكل مواطن في الدنيا المفرمه دي ، اخرف حبه من نفسي ، ماهي الناس طول الوقت تخرف ، بس الفرق ، انها وهي بتخرف متصوره ياحرام انها بتقول درر والماظ وياقوت وكل مغاره علي بابا ، لكن انا بخرف واقول ياجماعه انا باخرف وده حقي ومن حقوق الانسان طبعا !!!!

انا عامله دماغ صيام ، وراسي متعطله والدنيا بعيده بعيده بعيده !!! فمحدش من فضلكم يفوقني !!!! وسيبوني في حالي مبسوطه مع نفسي من غير سبب غير اني صايمه والدنيا بعيده !!! واوعدكم ، لما شهر رمضان يخلص ونعيد ، حارجع افوق وامسك راسي واقبض علي افكاري واتكلم جد !!! ولو ان يعني خبرتي بتقولي ، ان في البلد دي للاسف مابقاش فيه فرق بين الكلام الجد والتخريف !!! الناس بتستقبل كل الكلام بنفس واحده ، مسدوده ، واللي بيخرف زي اللي مابيخرفش كله عند الجمهور مايفرقش اطلاقا!!!

اذن من حقي اخرف !!!! دماغ صيام وتتنيح وروحنه وكثير من التخريف وكله تمام التمام !!!
ورمضان جانا وفرحنا به اهلا رمضان !!!!!!!!!