عصفورة الاحلام !!!ا

كنت عايشه حلم جميل وخلاص صحيت من النوم حلم مصبرني علي العيشه والصعب مقويني علي روحي وعلي الهم ساندني في اللحظات القاسية لكنه حلم !!! انا مقدرش افضل نايمه علشان احلم حتي لو حلم جميل ، وانا عمري ماحلمت وانا صاحيه وانا صاحيه باجري في الحياه واتعب واقاوح واقول لما ارجع تعبانه هانام ولما هانام حاحلم حلم جميل حلقه ورا حلقه والحلم بيكبر وبيسعد وبيتعب وبيوجع وبيفرح لكن عمري ماحاعيش الحلم ولا الحلم حيعيشني ، عمره ماخدعني ولا شوفته حقيقه ، عمري ماصدقته ، عمري ماسكرت وقلت مااحلي حياه الحلم ، فالحلم مالوش حياه ، الحلم لحظه في الوهم جميل وخلاص ، نعيشها حبه ونفوق بعدها نرجع لحياتنا اللي حافظينها وفاهمينها وعارفين غلبها....

الحلم مهما كان جميل يفضل حلم وانا مقدرش افضل نايمه علشان احلم ولازم اصحي لان ورايا مليون حاجه مهمه صحيح الحلم زي البومبونه في القلب زي الشجره الضل ونسيم البحر زي بق الميه الساقعه في عز الحر زي ونس الدفا في الليل البرد زي قوس قزح الالوان وسط الاسود زي الحضن ، ياخساره كان حلم جميل وحيفضل حلم ، ولاعمره حيبقي حقيقه ولا واقع ، ومهما الليل طال حيخلص والشمس حتطلع ، والحلم حيمشي ويتبدد ، والواقع يجي برزالته بحلاوته بحقيقته ويقولك عيش وتعيش ، وتمشي في الحياه ولما التعب قوي يزيد ، وتكون وحدك يوم العيد ، والدنيا تبرد وماتدفاش ، ساعتها تفتكر الحلم وتضحك اصل الدنيا ساعات رغم قسوتها تصالحك علي الحياه وتديك امل وتسرقه منك ، وتقولك فوق ده كان مجرد حلم جميل !!!

ليل طويل عشته احلم بالسعاده ، والسعاده لما تحلم بيها تيجي ، ولما تمسك فيها تقعد ولما تاخد عليها ، الديك يأدن ويفوقك ويقولك الحلم خلص ، وخلاص حلمي خلص وباصحي منه ، والنهار شأقشق وجاي ، والعيون المفتوحه ماتعرفش تحلم ، معدش فاضل عندي منه غير شوية مشاهد وذكريات ، وابيات شعر تحت جلدي بتوجع لما افتكرها اكتر من كل اللي فات ، وورده صبرتها في كتابي وضاعت ريحتها وفراشه قصصت اجنحتها ودفنتها تحت المخده علشان تطير في الحلم ، معدش فاضل عندي غير عقد فل كان نفسي البسه في رقبتي وانا ماشيه بضحك ، معدش فاضل غير حلاوته في قلبي زي حته السكر اللي دابت اصلها مهما دابت برضه سكر!!!

وياعصفوره الاحلام هنتيني ، وبصوتك غناكي قوتيني ، وبضربه جناحك سندتيني ، ولما تطيري في السما الواسعه ابقي دايما افتكريني انا اللي كنت بحلم بيك ، وعشت معاكي اجمل احلامي وسعدتيني ، وغردي طول ماانت طايره واعرفي ان هناك بعيد واحده حايره ، مستنيه الغنا الجميل يفكرها بكل اللي كان ، والسعاده اللي كانت ، والونس اللي كان والقعده الحلوة اللي طالت ، والغروب والشروق والحنان ، غردي طول ماانت طايره ، صحيح الحلم خلص ، لكن لسه حلاوته في قلبي ، اصله السكر مهما داب يفضل ياعصفورة سكر!!!