نصوص مبتورة ......

خلاااااااااااص 

بقالي سنه ونص تقريبا مش عارفه اكتب حاجه ...

ليه ؟؟؟

كل يومين تلاته اسبوع ، يحصل مصيبه ما ، انفعل ، اكتب سطرين تلاته عشره عشرين وفقا لاحساسي ورؤيتي وقت المصيبه وقبل مااخلص كتابه ، يحصل حاجه تانيه ، انفعالي يتغير واحاسيسي تتغير والدنيا تهيص ، معرفش اكمل النص اللي ابتديته ، اسيبه واقول حارجع له بعدين ، مالحقش ارجع ، بسرعه يحصل نصيبه تانيه ، اكتب حاجه تانيه ، ابتدي فيها وقبل ماتخلص ، بسرعه الدنيا تتغير تتنيل تتزفت ، انفعالي يتغير وبؤره اهتمامي تتغير و............ وبقي عندي ميت جثه مش راضيه تكمل !!! 

خلااااااااااااااص 

حاسه اني راكبه اسانسير طالع نازل نازل طالع ، فجأ يقف ، احس انه حيقع ، اتطمن اخاف ، طالع نازل ، شويه يطقطق واقول حيقع وشويه يجري واقول وصلنا وشويه يتهز ويعطل واقول حنموت !!! 

انفعل بطريقه ما وقبل الانفعال مايكمل ، الدنيا تتلخبط ، انفعل بطريقه تانيه ، وبعدين تالته وبعدين عاشره !!! 

اجمع ماده علشان اكتب منها بسبب حدث ما ، قبل مااقري اللي جمعته ، تحصل نصيبه ، اجمع ماده جديده وقبل مااقراها الدنيا تتزفت تاني و............... طبعا اكتئب وافك ، واتفائل وانسي ، واقول حاكتب وبعدين اقول ليه ، ولا حد عايز يقرا ولا حد فارق معاه ، وبعدين اقول لا حاكتب لروحي ، وبعدين ازهق واقول يفرق ايه ، ههههههههههههه شكلي اتهبلت !!!! 

طيب .......... 

فجأ قررت اعمل حاجه غريبه قوي ، اطلع كل الجثث وارصها جنب بعض ، جايز تقول حاجه او تفهمنا حاجه !!! 

نصوص مبتوره مش كامله ، افكار لم تتضح ، كانت مجرد بدايات ولم تكتمل لها النهايات ، لكنها تعبر عن ازمه هذه السنه ونصف ، ازمه التفكير المبتور واللخبطه والتوهه وضياع الطرق واضطراب البوصله !!! 

هذه النصوص المبتوره تكشف في ذاتها عن حاله ، اظني لم اعشها وحدي ، بل اظن عاشها كثيرين ، عدم الاتزان وعدم التوازن ، التوهه فوق الدروب المزدحمه ، الامل واليأس و............مازالت الدوامه تجذبنا للاسفل ونغرق ونقاوم ، ومازال الاعصار يحاول اقتلاعنا من جذورنا ويكاد يفلح لكنا نتشبث بالارض ونتبعثر ونتبعثر !!! 

اظني جننت ، لاني انشر نصوصا مبتوره بلا نهايات ولا افكار واضحه !!! 

هكذا قلت لنفسي ، ثم ابتسمت ، وماله وايه يعني ، ماله الجنان ، مش وحش ، علي الاقل بيقول اني لسه عايشه ولسه باحس !!! 

طيب نجرب ... ونشوف النصوص دي حتقول اي حاجه وهي مبتورة ومبعثرة كده ولا مش حتقول !!!!

  

النص الاول 

في 6 ابريل 2011 كتبت .........

ام التصوير واللي اخترع الموبيلات بالكاميرات !!!

الله يخرب بيت كده بجد !!!!

الناس خلاص مابقيتش تفكر في حاجه غير التصوير !!!

والقصه بدأت يوم فرح بنتي ، في الزفه لقيت المعازيم سايبين الرقص والطبل والتصقيف والشمع وكله عمال يصور ، فاتح الموبيل وعمار يصور ، محدش راضي يندمج في حاجه لانه منشغل بالتصوير !!! واللي مصمم يعيش اللحظه يعيشها وهو بيصور برضه ، يرقص وهو بيصور ، ورافع ايده فوق راسه بالموبيال !!! وقتها مافهمتش حاجه !!! هو الاحتفاظ باللحظه مهم لكن اننا نعيشها اجمل !!! لكن تقول لمين ، صور صور صور صور!!!!!!!

وخلصنا من فرح البت والعروسه للعريس والجري للمتاعيس وخلاص سلامتك !!!

ولما ابتدي العام السعيد 2011 ، واحداثه السعيده تلاحقت علي راسنا ، واضطريت مره تانيه اتنيل علي عيني ااقعد قدام محطات الاخبار اتابع اشي اخبار كنيسيه القديسين ثم مظاهرات الاقباط في امبابه وعند ماسبيرو ثم بعدها من اول ايام الثورة ومظاهراتها وانا لاحظت ان جزء كبير من الجمهور يقف يصور !!!

الناس ماشيه في المظاهره فاتحه الكاميرات وهاتك ياتصوير ، مش مركزه في الشعارات اللي بتتقال لان تركيزها في التصوير !!!

خناقه في الشارع ، صور صور !!!

نزلت التحرير بعد مافضوا اعتصام يوم الجمعه اللي الجيش اعتذر عنه لان رصيده يسمح ، صور صور !!!

المناوي بيطرد من التلفزيون ، صور صور !!!

الناس بتقطع ضابط مباحث قبضوا عليه ولا امين شرطه مفتري ، بيقطعوه بالسكاكين والدم يطرطش ، صور صور !!!!

اقتحام مقرات مباحث امن الدوله والوثائق مرمية والناس بتأدن وتكبر والضباط بتتضرب ، صور صور !!!

الجيش بيفض اقتحام كليه الاعلام ، صور صور !!!!

امبارح خناقه البلطجيه في ميدان الساعه في اسكندريه ، صور صور !!!!

الناس بتقف مخصوص علشان تصور !!!!

والافلام تتحمل علي اليوتيوب وهوب تبقي مشاع وكل الناس تشوفها !!!

ونسمع شتايم وصويت وصراخ وقله ادبه وكلام ابيح وتحليلات وشعارات ومش مهم ، المهم صور صور !!!!

هي ايه الفيلم ده !!!

ايه حكايه ان الناس ماشيه تصور بعض ، محدش له خصوصيه ولا راي ..................

الناس مشغوله بالتصوير ده من ناحيه و.......................

لم اكمل النص وتركته مبتورا !!!

  

النص الثاني 

في 13 ابريل 2011 كتبت ............

مارس 1954 ، 15مايو 1971 ، 13 ابريل 2011 ..

تواريخ تتشابه وحواديت تتكرر وميلاد فرعون جديد و وأد الديمقراطية وخداع الشعب ، صراع علي مقعد الفرعون تستخدم فيه كل الادوات السياسيه والدعائيه والقانونية والبوليسية والسجون والمحاكم والقضايا ينتهي بانتصار فريق علي الاخر وتأميم الصراع وانهاءه واقتناص المقعد الذهبي والتاج واعاده كتابه للتاريخ و احتفالات للشعب بالانتصار علي الفاسدين وتحقيق الديمقراطية ....

مااشبه اليوم بكل ماعشناه !!!

عن ازمة 1954

تيار متشدد.....
وتكشف أجزاء من مذكرات البغدادي وجود تيار داخل »الضباط الأحرار« كان مستعداً »لتدمير سلاح الفرسان« والدخول معه في معركة إذا ظل علي موقفه المطالب بعودة الحياة النيابية. إنه نفس التيار الذي توجه أفراد منه للقبض علي محمد نجيب في منزله ونقلوه إلي »ميس« سلاح المدفعية، بدون أوامر من مجلس الثورة.
في أول مارس ،1954 وأثناء الاستراحة بين جلستين من جلسات »محكمة الثورة« قام البغدادي بشرح وجهة نظره لحسن إبراهيم وأنور السادات عضوي مجلس الثورة، قال:
»لقد استقبل الشعب محمد نجيب استقبال الأبطال بعد عودته إلي السلطة، ولابد من دراسة موقفنا الذي لا يحسد عليه، وكأن الشعب والجيش قد سحبا ثقتهما منا.. وزاد تعلق الشعب بمحمد نجيب، بينما ركز الشعب كرهه في جمال عبدالناصر«. وتوصل البغدادي إلي أن الحل هو تكليف شخصية مدنية بتولي الوزارة للعمل علي إعادة الحياة النيابية أو تحديد مدة بقاء مجلس الثورة وإعلانها علي الشعب.
تطهير واعتقالات
وفي لقاء بين بعض أعضاء مجلس الثورة في مكتب عبدالناصر في اليوم التالي، أفصح البغدادي عن هواجسه، ولكن عبدالناصر حاول تهدئته قائلاً: »لا تتسرعوا، وكل ما اطلبه منكم أن تعطوني حق حرية التصرف دون الرجوع إليكم حتي لا يضيع الوقت في المناقشات، لأن الظروف تتطلب سرعة البت.. وعلي أنا أن أقف علي كل التيارات السياسية المختلفة في البلاد، وأنا مسئول عن تطهير البلاد من العناصر الرجعية بالقضاء عليها«.
ويقول البغدادي: ».. وعلمنا من جمال عبدالناصر أنه قد أمر باعتقال الكثيرين من الإخوان المسلمين والشيوعيين وأساتذة الجامعات، خاصة جامعة الإسكندرية، بصفته الحاكم العسكري«.. لأن الأساتذة هناك طالبوا بالديمقراطية، وقال إنه أمر بتشكيل محاكم عسكرية خاصة لمحاكمتهم.
في تلك الأيام شعر البغدادي بأن روح الانقسام بدأت تظهر بين أفراد مجلس قيادة الثورة، وأن البعض منهم قد تملكه الملل، وأصبح كمال الدين حسين يعتقد أنه من الأفضل لهم الانسحاب من الميدان، أما أنور السادات.. فإنه يتمني ترك البلاد لمحمد نجيب وأن يهاجر إلي الخارج!! وصلاح سالم.. يري أن الشعب جاحد وينكر كل جميل.
ويشكو البغدادي في مذكراته من الأوضاع داخل مجلس قيادة الثورة وانسياق الأغلبية وراء جمال عبدالناصر.
يقول إنه طرح مسألة أن تكون سلطة السيادة للمجلس ككل، وليست مقصورة علي قائد الثورة، ولكن المجلس عارض رأيه تضامناً مع عبدالناصر، ثم عاد المجلس ووافق علي رأي البغدادي في اليوم التالي دون مناقشة، لأن جمال عبدالناصر كان قد عاد وغير رأيه ليتفق مع رأي البغدادي بعد أن انفجرت مشكلة محمد نجيب.
ويقول البغدادي: ».. كان اعتراضه في البداية.. يرجع إلي أمله في أن تنقل تلك السلطة إليه في يوم من الأيام بعد استبعاد محمد نجيب، ولكن صدامه مع نجيب جعله يعدل عن موقفه«، لأن تأكيد سلطة مجموع أعضاء المجلس أصبح ضرورياً في مواجهة »القائد« محمد نجيب.
اقتراح بالانسحاب
في اجتماع 4 مارس ،1954 تقدم عبدالناصر باقتراح انسحاب مجلس الثورة علي أن يعمل كل فرد من أعضائه علي تشكيل فريق له يتكون من عشرة أفراد مهمته العمل علي التخلص من العناصر »الرجعية« والأفراد »الذين يناهضون الثورة« والذين يقفون في طريقها، مثل ساسة »الأحزاب القديمة« والإخوان المسلمين والشيوعيين.
ولم يوافق أعضاء المجلس علي الاقتراح.
وفي جلسة 14 مارس، قال عبدالناصر إنه سيختفي ويعمل بصورة سرية ثم يظهر ثانية في يوم من الأيام، ويقوم بثورة جديدة.
انفجارات
وفي اجتماع 20 مارس ،1954 أشار جمال عبدالناصر إلي أن هناك ستة انفجارات حدثت في نفس اليوم، وكلها في وقت واحد وفي أماكن متفرقة، واحد منها في مبني محطة السكة الحديد، وأثنان بالجامعة، وآخر بمحل جروبي، وكان غرضه من الإشارة إلي هذه الانفجارات ـ في رأي البغدادي ـ هو توضيح أن هذا قد حدث نتيجة لسياسة اللين والميوعة الظاهرة في موقف الحكومة.
وفي يوم 21 مارس، توجه البغدادي مع كمال الدين حسين وحسن إبراهيم لزيارة جمال عبدالناصر بالمنزل لمرضه، فأبلغهم بأن انفجارات اليوم السابق من تدبيره، لأنه كان يرغب في إثارة البلبلة في نفوس الناس ويجعلهم يشعرون بعدم الأمن والطمأنينة علي نفوسهم حتي يتذكروا الماضي أيام نسف دور السينما... إلخ، ويشعروا بأنهم في حاجة إلي من يحميهم، علي حد قوله.
تهريج وشغب!
وفي لقاء بمنزل عبدالناصر يوم 30 مارس، دارت المناقشة حول طلبة الجامعة واثارتهم للشغب ووقوفهم ضد إلغاء قرارات 25 مارس التي دعت إلي عودة الحياة النيابية.. فطلب عبدالناصر اعتقال الوفديين والشيوعيين، وقال في اجتماع مجلس الوزراء يوم 31 مارس إن هناك فئة من الطلبة محترفة للتهريج والشغب، وأنه يري فصل هؤلاء الطلبة المشاغبين حتي لا يكونوا مثار قلق باستمرار، وأن الجامعة لابد من تطهيرها من هؤلاء، وأنه كان لابد من عمل ذلك من أول الأمر، وأنها فرصة لاتخاذ هذه الخطوة الآن، وقام عبدالناصر بتكليف صلاح سالم وفتحي رضوان بوضع مشروع قانون لتطهير الصحافة »مذكرات البغدادي«.
وفي اجتماع مجلس الثورة يوم 4 ابريل، قال جمال عبدالناصر ـ وفق نص رواية البغدادي ـ إن الثورة ليست لها قاعدة شعبية تعتمد عليها، وليس هناك من يؤيدها، لا من الشعب ولا من الجيش، وأن الذين قاموا بهذه الثورة تسعون ضابطاً فقط، وأنهم في تناقص حتي أصبح عددهم خمسين ضابطاً.
وعلق البغدادي علي هذا الكلام، قائلاً: »معني هذا أننا نفرض أنفسنا علي هذا البلد«. ورد عبدالناصر بالإيجاب. كان محمد نجيب وخالد محيي الدين قد أصبحا خارج مجلس الثورة.
غياب القيادة الموحدة
كان اتجاه الحركة الوطنية في مصر، في تلك الفترة، هو إجراء انتخابات حرة تأتي بممثلي الشعب في مجلس نيابي دستوري، واستئناف الكفاح المسلح في القناة ضد جيوش الاحتلال الإنجليزي وتحرير الاقتصاد والثقافة من قبضة الاستعمار الأنجلو ـ أمريكي. وخرج عشرات الألوف من أبناء الشعب المصري في مظاهرات وطنية كانت شعاراتها الأساسية تعبر أصدق تعبير عن رغبتها الملحة في تحقيق مبدأ: الأمة مصدر السلطات.
ولكن التيار المناهض لعودة الحياة النيابية تحرك بقيادة الصاغ أحمد طعيمة ليوجه الدعوة إلي عمال مصر ليقوموا بإضراب عام يعلنون فيه تمسكهم ببقاء مجلس قيادة الثورة وتأجيل الانتخابات البرلمانية، وقد رفض عمال الترام هذا التوجيه، رغم موقف سكرتير النقابة الموالي لما يسمي بهيئة التحرير، ولكن البوليس تدخل ليأمر بإغلاق مخازن العربات، كما وقع هجوم من عمال موالين لهيئة التحرير علي العمال الرافضين للإضراب، ثم قامت شركة الترام بقطع التيار الكهربائي فتوقفت الحركة، وفي المحلة الكبري، وجد عمال من شركة مصر.. المصنع مغلق الأبواب، فاتخذوا قراراً بتنحية رئيس النقابة، وفي مصر الجديدة، أمر البوليس بإعادة عربات الترام السائرة في طريقها.. إلي المخازن. وأبرز سكرتير النقابة أمراً حكومياً مكتوباً بتنفيذ الإضراب، وعندما تظاهر عمال النسيج في باب الشعرية ضد الإضراب الحكومي، ألقي القبض علي المتظاهرين، وهذه مجرد أمثلة محدودة.
غير أن الحركة الشعبية التي تطالب بالحياة النيابية منيت بالهزيمة، ويفسر »أبوسيف يوسف« هذه الهزيمة بأنها ترجع إلي غياب قيادة موحدة للقوي المطالبة بالحكم الدستوري الديمقراطي، وحتي القرارات التي اتخذها الطلاب والعمال والمحامون والصحفيون وأساتذة الجامعة.. لم تكن موحدة، ويقول »أبوسيف يوسف« في كتابه »وثائق ومواقف من تاريخ اليسار المصري« إنه علي الرغم من تحركات الجماهير الوفدية »إضراب المحامين والطلاب في المعاهد والجامعات«، إلا أن قيادة الوفد لم تستثمر هذه التحركات الشعبية.. كما أن الطبقة العاملة لم تلق بكل قوتها في المعركة أمام تدافع الأحداث، ولا جدال في أن اليسار المصري يتحمل مسئولية كبيرة في السماح لعناصر محددة بأن تتحرك باسم العمال وتعطي لنفسها حق التحدث باسمهم.

http://www.egyptianoasis.net/forums/showthread.php?t=8287

لم اكمل النص وتركته مبتورا !!!

النص الثالث 

في 16 ابريل 2011 كتبت

سؤال بديهي ..

هي الثورة ديمقراطية لحد لاتسمح معه الا بتأييد الثورة او تأييد الثورة ؟؟؟

ومن يخالفها موصوم بانه فلول الحزب الوطني

لم اكمل النص وتركته مبتورا !!!

النص الرابع 

في  23 ابريل 2011 كتبت

طيب ....

اشرح تاني ، بس المره دي اشرح بالكتابه ، علشان بجد لما باشرح بالكلام قلبي بيوجعني وباحس انه حيقف !!!!

ااقول ، انا مش متفائله يامصر !!!

مش متفائله !!! والتفائل مالوش علاقه برغباتي ولا مشاعري !!!

التفائل مسأله موضوعيه ، والتشاؤم ايضا ...

انا مش متفائله لاسباب موضوعيه .. طبعا نفسي اتفائل والحياه تبقي بمبي والعصافير تصوصو لكن انا مش شايفاها كده !!!

وخلوني اشرح من الاول ....

مع بدايات الثورة قلت ، هذه الثورة بلا رؤيه وبلا قياده !!!

قلت الناس متجمعه علي ""احنا مش عايزين ايه"" وهما عندهم حق في كل اللي هما مش عايزينه !!!

قلت لكن بعد السهل مايخلص - علي صعوبته - اللي هو اننا نهد اللي احنا مش عايزينه ، الصعب بقي حيبتدي !!!

والصعب هو ماذا بعد الهدم ، الصعب "" هو احنا عايزين ايه ؟؟""... خلاص اسقطنا النظام وحبسنا الريس وولاده ورئيسي مجلس الشعب والشوري واحمد عز مهندس تزوير الانتخابات البرلمانيه الاخيره وامين التنظيم في الحزب وغيرهم كتير ، وكمان المحكمه اصدرت حكمها بحل الحزب وتسليم مقراته للدوله !!!

خلاص ، او لسه ماخلاصش قوي ، لكن خلاص ، المأموريه اللي الناس اتفقت عليها خلصت ، بعد كده ، كل اللي حيحصل مافيش اتفاق عليه ولا حتي فيه تصور جماعي ليه....

ماذا بعد مصر حسني مبارك بكل عيوباها ومساوئها وفسادها ؟؟؟

ماهي شكل مصر الجديدة ..

حد عارف شكلها ايه او عايز يكون شكلها ايه ؟؟؟؟

الاول .... مصر الجديدة ، دوله مدنيه تحترم القانون وحقوق الانسان والمواطنه لاتفرق بين مسلم ومسيحي ، ام دوله دينيه تحكمها الشريعه والحدود والمسلمين حاجه واهل الجزيه حاجه تانيه ....

طبعا ناس كتير حترد تقول ،طبعا دوله مدنيه !!! وطبعا لا للدوله الدينيه !!!

انا برضه باقول لا زيكم كده بالضبط ، لا للدوله الدينيه ونعم للدوله المدنيه !!! لا لاهل الجزيه ومواطنين الدرجه الثانيه ونعم للمواطنه والمساوة بين المواطنين في الحقوق والواجبات !!! لا لحكم الائمه والملالي نعم لتداول السلطه وفقا لاليات الديمقراطيه !!!

انا باقول ده زي ناس كتير ، طيب كده مفروض ابقي متفائله !!!

لا ، ليه ؟؟ لان زي مافيه ناس كتير بتقول زيي كده ، فيه ناس اكتر منا بكتييييييييييييييير اما مش فارق معاها دوله دينيه او مدنيه ، يعني من منطق كله كويس وربنا يعمل اللي فيه الخير ، وناس قليله رايها اه دوله دينيه !!!!

طيب الناس اللي مش فارق معاها دوله دينيه او مدنيه ويمكن كمان مش فاهمين الفرق بين الاتنين ومعناه ، الناس دي وقت الانتخابات حتصوت مع مين !!! حتصوت مع دعاه الدوله المدنيه والتقدم والحضاره ولا حتصوت مع دعاه الدوله الدينيه ؟؟؟؟؟؟؟؟؟

انا شخصيا رايي وباختصار انهم حيتصوتوا مع دعاه الدوله الدينيه حتي لو هم مش واخدين بالهم ان التصويت ده معناه دوله دينيه ، حيصوتوا معاهم لاسباب مختلفه ، حاشرحها بعد شويه وبالتالي ......... حنصحي من النوم في يوم نلاقي الدوله بقت دينيه ، ومش احنا بس اللي حنتخض ، لا الناس كمان اللي مش فارقه معاها ولو بسبب الجهل ، الناس دي كمان حتتخض ، لانها حتدرك ان التصويت بتاعتها لصالح فلان او علان وادها في سكه تانيه !!! بس بعد مانتخض كلنا حيكون خلاص الفاس وقعت في الراس!!!!

طيب ... بتوع الدوله الدينيه موقفهم سهل وواضح ومفهوم ...

تيار الاسلام السياسي المصري بفصائله المختلفه ، بصرف النظر عن تصريحاتهم الملتبسه احيانا والواضحه احيانا اخري ، وبصرف النظر عن تقسيم الادوار بين فرقه وفصائله المختلفه وبين بعض ، بين الحزب السياسي والجماعه الدعوية ، وبين الاخوان والسلفيين والجهاد وغيرهم ، بصرف النظر عن ما كانوا احزاب مدنيه ذي مرجعيه دينيه وام احزاب دينية واما احزاب رافعة شعارات اسلامية ، هما في النهايه وبصرف النظر عن تصريحاتهم المتناقضه المتضاربه ، هما اللي ليهم وجود منظم وحقيقي في الشارع المصري !!! هما اللي ليهم قياده وجمهور وعاطفين واصوات انتخابيه منظمه وجمهور بيقدروا يخلوهم لاي سبب يصوتوا لصالح مرشحيهم وافكارهم !!!!

بقيه القوي السياسيه الكثيرة الموجوده في مصر متشرذمه متفرقه من ناحيه ومالهاش وجود جماهيري حقيقي من ناحيه تانيه واحزابها اما احزاب قديمة ضعيفه الوجود من ناحيه او احزاب جديدة مازالت تحت التشكيل من ناحيه اخري .. الليبراليين اليسارين الاشتراكيين الناصريين بصرف النظر عن عدد الاحزاب التي تعبر عن كل تيار فكري .... ايضا بصرف النظر عن سبب ذلك الضعف البنيوي وضعف تاثيرهم علي الجماهير من ناحيه اخري ، سواء كان نظام حسني مبارك هو المسئول الوحيد عن ذلك الضعف متمثلا في القيود القانونيه والواقعيه والامنيه من ناحيه او كانت تلك الاحزاب هي الاخري المسئوله عن ضعفها اما بسبب قياداتها او اعضائها او برامجها او افكارها او اسباب اخري ، لست في مجال لتفسير ذلك الضعف ، لكنه ضعف ظاهر باين واضح امام اعين الجميع ...

والحقيقه ان موضوع تيار الاسلام السياسي المصري ، بصرف النظر عن بعض افرعه التي كانت تتبني العنف من ضمن او علي راس اساليب عملها مع الاخرين المختلفين عنها ، فان تيار الاسلام السياسي افلح خلال سنوات طويله في طرح افكاره وقناعاته وقراءته للدين وتفسيراته علي عقول معظم الجمهور حتي من لا يوافق منهم اليوم علي فكره الدوله الدينيه !!!!

وافلح ايضا لاسباب كثيرة - اهمها انسحاب الدوله - في التغلل في حياه الشعب وتقديم الخدمات المختلفه له ، ابتداء من جمعيات دفن الموتي وحتي كفاله اليتيم وزواج الفتيات اليتامي وفصول التقويه ومستوصفات العلاج المجاني والاقتصادي من خلال المساجد وقاعات المناسبات ( للافراح والمياتم ) والجمعيات الاهلية ، وعمل تيار الاسلام السياسي داخل المجتمع بشكل راسي وافقي ، الجامعات واتحادات طلابها ونوادي هيئه التدريس ثم النقابات ومجالسها والحقيقه ان الاشتغال المنظم الدؤوب داخل الجامعات منح تيار الاسلام السياسي كوادره في جميع التخصصات والمواقع المهنيه والعملية ، فتاثيرهم علي اطفال المدارس بدأ من المدرسين والنظار التابعين لافكارهم ثم خلال مدارس خاصه اسلاميه انشأت باستثمارات مالية اسلامية طبقت قناعاتها في الفصل بين الاولاد والبنات من ناحيه وبين المسيحين والمسلمين من ناحيه اخري بشكل عملي وتخرج تلاميذ تلك المدراس وهم متشبعون بافكار وقناعات تيار الاسلام السياسي ورؤيته للدين وللحياه الدنيا وشكلها ،

ليه .........

مصر الجديده حتكون ناصرية زي ايام عبد الناصر ، قوميه عربيه واشتراكيه عربيه وتأميم وتمصير وحراسه وتعليم مجاني وخمسين في الميه من البرلمان عمال وفلاحين واقتصاد موجه وقطاع عام ولا حتكون اشتراكيه زي الاتحاد السوفيتي " اللي انهار " ودول المعسكر الاشتراكي ، ولا حتكون اسلاميه زي السودان والسعوديه ولا زي افغانستان وطالبان  ولا ايه ؟؟؟؟؟

لم اكمل النص وتركته مبتورا !!!

النص الخامس 

في 7 اكتوبر 2011 كتبت

  

حان وقت الكتابه في السياسه ...

شهور طويله باهرب من السياسه وام السياسه ... مش عايزه اكتب فيها

باتفرج وبراقب ومش عايزه اكتب

ساعات استهبل واقول مش شايفه ومش عايزه اشوف وساعات افقع عيني علشان مااشوفش

اصلي حاقول كلام حيزعل ناس كتير ... طيب ليه مااسكت وخلاص ، كلامي لاحيقدم ولا حيأخر !!!

لكن خلاص بقي .... استويت ، عايزه اكتب واقول ... بعد مااكتب واقول يحصل ايه ، ان شالله ماحصل حاجه !!!

بس ابقي قلت اللي في نفسي

لم اكمل النص وتركته مبتورا !!!

النص السادس 

في 25 اكتوبر 2011 كتبت

( 1 ) 

قال خامنئي في فبراير 2011 وهو يهنيء شعب مصر بثورته العظيمه ، قال باللغه العربية ، انه ميلاد الشرق الاوسط الاسلامي الجديد !!! ولم يأخذ احد ماقاله خامنئي بجديه ، فالفرحه التي تلت ذلك التصريح الصغير بتنازل " المخلوع " عن الحكم للقوات المسلحه وتفويضها لاداره البلاد والاحتفالات والرقص الذي عم ارجاء البلاد انسي الجميع - سهوا او عمدا - تصريح خامنئي !!!ا

( 5 )

نشر موقع جريده التحرير الالكتروني يوم 7 اكتوبر 2011 علي لسان ابو مسلم العبد رئيس رابطه الاسلام علم وعمل

بعد الثورة انتشرت الائتلافات والحركات والجماعات الإسلامية، منها ما يتلمس طريقه للمرة الأولى فى الحياة السياسية والاجتماعية، ومنها ما كان يعمل تحت الأرض لسنوات طوال، وكل من الطرفين له أحلامه الخاصة، وآخر الأحلام التى يصعب تحقيقها، وجود برلمان إسلامى فى مصر. حلم البرلمان الإسلامى ولد فى أذهان أعضاء «رابطة الإسلام علم وعمل»، التى سعت من قبل إلى تشكيل كيان يجمع بين القوى الإسلامية، وانتخاب أعضاء ورؤساء له، بفكرة تبدأ نواتها من إحدى المحافظات، ثم تعمم على مستوى الجمهورية، ليصبح للتيار الإسلامى كيان واحد يعبر عنه. البرلمان الإسلامى، الذى تسعى الرابطة إلى تحقيقه، معنى بالدرجة الأولى بقضايا الحركة الإسلامية فى مصر، من خلال الجوانب العلمية والتربوية والدعوية. مؤسس الرابطة أبو مسلم العبد قال لـ«التحرير»، أمس، إن هدف الرابطة من ذلك المشروع هو الدعوة إلى توحيد كلمة المسلمين، والتعرف على مشكلاتهم، على المستوى الدعوى والسياسى، والعمل على حلها، فى إطار من التعاون بين التيارات الإسلامية كافة، مضيفا أن الخطوة التالية لتأسيس البرلمان هى السعى إلى إيجاد إطار قانونى ورسمى له.

 لتفاصيل اكثر هذا الرابط

http://egyig.com/muntada/showthread.php?t=5155

( 4 ) 

«رابطة الإسلام علم وعمل»، تجمع ممثلين لتيارات إسلامية شتى، منها الأزهر والأوقاف والإخوان والدعوة السلفية والجماعة الإسلامية ودعاة مستقلون، إضافة إلى ممثلين للائتلافات والروابط والجبهات الإسلامية والأحزاب ذات التوجه الإسلامى.

أكد الدكتور  كمال الهلباوي –القيادي الاخواني الدولي والمتحدث باسم الجماعة في الغرب- أن الإخوان سيحكمون مصر لأنهم الأصلح لذلك، 

( 3 )

في 23 ابريل نشر علي موقع جريده المصري اليوم "" قال صبحي صالح، القيادي في جماعة «الإخوان المسلمين»: «نطالب بتطبيق الشريعة الإسلامية ولن نرضى عنها بديلا، ولو علم الأقباط ما لهم من حقوق في الإسلام لقالوا الإسلام هو الحل """ 

( 2 )

في 13 ابريل 2011 نشر علي موقع جريدة اليوم السابع أكد صبحى صالح عضو لجنة التعديلات الدستورية والمحامى الإخوانى، أنه لولا دعم الإخوان لفشلت الثورة ولأجهضت، ولولا انضمام الشعب إلى الميدان لاستطاع النظام الإطاحة بها، ولولا الجيش لفشلت الثورة.

لم اكمل النص وتركته مبتورا !!!

النص السابع 

في 28 اكتوبر 2011 كتبت

انا قررت احب امريكا ، احب الولايات المتحدة الامريكيه ، قررت احبها ، وده قرار سهل جدا ، لاني خلاص خلاص صدقت انها بتحبنا ، بتحبنا احنا المصريين وبتحب مصر ، وعلي راي المثل " من حبنا حبناه وكان متاعنا متاعه " علشان كده انا قررت احب امريكا !!!

احب امريكا واصدقها ...

اصدق انها بتحب لينا الخير وانها تاعبه نفسها علشانا ، وانها بتدفع من اموال دافعي الضرائب الامريكين منح ومعونات وهبات لينا علشان نبقي احسن ، واحسن يعني اكثر ديمقراطيه وحريه ، وطبعا لما امريكا تدفع فلوس علشان نبقي احسن ، مانبقاش احنا بقي اوحش وولاد كلب ونعض الايد اللي بتحبنا ، خلاص ياامريكا انا بحبك وعلي راي من قال " احنا اسفين ياامريكا " !!!!

انا قررت احبك ياامريكا ، واحب افكارك الجميله عن الحريه والديمقراطيه ، وافهم جدا المجهود الفظيع اللي بتبذليه من اول مستر اوباما لغايه مسزززز كلينتون لغايه اصغر مواطن امريكي لطيف علشان نبقي احسن ، وافهم انك زهقتي منا لاننا ولاد كلب مش مقدرين مجهودك وتعبك ومش ممتنين ليكي لما بتدفعي فلوس للجمعيات والمنظمات الاهليه غير الحكوميه علشان تخلي حياتنا احسن واكتر ديمقراطيه ، لكن النبي علي قلبك ماتزعلي وتطولي بالك علينا شويه ، اصل في راسنا وتاريخنا ودراستنا ووجدانا شويه صراصير عايز تترش علشان تموت ، ولما الصراصير تموت ، حنبقي زي الصفحه البيضا شخبطي علينا زي ماانت عايزه ، ااقولك ، لا قطعي الورقه البيضا كمان زي ماانت عايزه ، ساعتها حنبقي طوع وحلوين ومن ايديك دي لايديك دي!!!

شويه صبر ياامريكا مايجراش حاجه واديني قلت وباقول " احنا اسفين ياامريكا " !!!

بصي بقي ياخالتي ، اه مااهو كده لما تحبينا كده تبقي خالتي ، خالتي لان مصر هي امي ، تبقي انت خالتي وحبيبتشششششي كمان ، بصي بقي ياخالتي .... انا قررت احبك واموت فيك كمان ، وانسي ، ايوه انسي ، انسي حاجات كتيره الناس الوحشين قالوها عليكي ، انت عارفه طبعا ان النسيان صعب ، يمكن اشرب علشان انسي ، ويمكن احشش علشان انسي ، ولو ماعرفتش انسي ، امانه عليكي تديني بالمرزبه علي راسي علشان افقد الذاكره واعرف انسي ...

حانسي خالص كل الحاجات اللي الوحشين بيقولوا عليكي ، ومش حاصدقهم وحاصدقك انت !!!

زماااااان ، قالوا عليكي دوله استعماريه وزعيمه الامبرياليه في العالم !!!

وده معقول برضه ، الوش السمح ده برضه يتقال عليه استعماريه وزعيمه الامبرياليه في العالم !!!

الوحشين ، قالوا انك بتمصي شعوب العالم وبتستعمريهم او تضربيهم او تستغليهم علشان مصالحك انت !!!

مش باقولك وحشين ، وحشين وولاد وحشين كمان ، بقي الوش السمح ده والعلم الازرق في احمر ده والافلام الحلوه والموزز بتوع هوليود دول بيمصوا شعوب العالم ، اخص علي اللي قال كده اخص !!!!

الناس الوحشين اللي بيقولوا انك دوله قامت علي افناء الهنود الحمر السكان الاصليين للارض الجديده اللي عمرها واستعمرها الحثاله والمساجين والمغامرين الاوربيين الافاقيين ، بيقولوا ان الحثاله والمجرمين دول ، نزلوا علي الارض الجديده اللي اعتبروها فاضيه ومستنياهم ، وهاتك ياقتل في السكان الاصليين ، الناس الوحشين دول نسيوا بس يقولوا لينا ان عمر السكان الاصليين خلص وان ربنا بيسبب الاسباب وان الحثاله والمجرمين ، اللي انتم بتسميهم جيل الاباء ، لما قتلوا وابادوا السكان الاصليين وسرقوا ارضهم ، ماارتكبوش اي جرائم ولا حاجه لكن كانوا بيعمروا الارض الجديده اللي عمر سكانها الاصليين خلص فجأ وفي نفس الوقت وباسلحه جيل الاباء!!

الناس الوحشين اللي بيقولوا انك دولة اتبنت علي تجاره العبيد لما راح جيل الاباء برضه واستورد الافارقه الزنوج " النيجرو " العبيد من افريقا زي الحيوانات وواقل ، استوردوهم واشتروهم واستعبدوهم وصدروهم من افريقيا للارض الجديده في المراكب علي الرفوف وقيدهم بالسلاسل الحديد من ايديهم ورجليهم ووادوهم  يزرعوا ويقلعوا في الارض الجديده عبيد بيتضربوا بالكرباج ويتعلقوا في الشجر ومالهمش سعر ولاقيمه ولا كرامه ولاحقوق ، الناس الوحشين دول اللي بيشوهوا سمعة حضارتك الجميله ، حضارتك الانسانيه ، ماقالوش طبعا - وهما قاصدين مايقولوش - انك اخدت الزنوج الغلابه من افريقا الفقيره وخلتيهم يعيشوا حياه احسن من عيشتهم اللي زي الحيوانات ، حتي لو كانوا عبيد ، فالاستعباد مع حضرتك ياخالتي امريكا احسن من الحريه في افريقيا مع الحيوانات !!!

مش بقولك ياخالتي ، راسنا مليانه بلاوي وصراصير عايزه تترش علشان نرجع صفحه بيضا تحبك وانت تعملي فيها اللي انت عايزاه !!!ا

لم اكمل النص وتركته مبتورا !!!

النص الثامن 

في 26 يناير 2012 كتبت

يسارية الهوي وكنت عضوة في حزب التجمع واؤمن بأن لازم " اخواتي تلبس وتاكل"!!

ليه كنت ومش لسه ؟؟؟ دي حكايه طويله قوي مالهاش لزمه تتحكي ولا منها فايده!!!

المهم ، من قبل ثوره 25 يناير كنت اعرف ان نظام حسني مبارك وتزاوج السلطه بالثروة وانحيازه للطبقات الاجتماعيه الاعلي علي حساب الطبقات المتوسطه والشعبيه وسياسه الافقار العمدي للشعب واستغلاله والفساد المستشري والواسطه والمحسوبية ، كنت اعرف بالضرورة ان كل هذا سيؤدي لغضب شعبي واحتقان ، ربما يؤدي لثورة ، ربما لكني لم اكن واثقه !!!

ليه ربما ، لاني كنت اؤمن - ومازلت - ان القياده السياسيه لتلك الثورة مش موجوده!!!

فالثورة ليست الغضب مهما بلغت حدته وليس الكراهيه والتذمر مهما بلغ مداه ، الثورة تغيير سياسي اقتصادي اجتماعي ، ماقبل هذا وماقبل حدوثه ليس بثورة مهما انفعلنا عاطفيا وقلنا انه " ثورة " !!!!

لكن الثورة حدثت ، او هكذا قالوا ، او هكذا صارت الروايه الرسمية ، ان ماحدث اعتبارا من 25 يناير 2011 هو " ثورة " !!! ثورة بلا قياده سياسيه ، هكذا ايضا قالوا ، المتحمسين والعاطفين والثائرين والغاضبين ، جميعهم قالوا " ثوره " قام بها الشباب الانقياء الطهر لاسقاط النظام ، لكنها - اي الثورة - بلا قياده سياسيه !!!

عظيم ............

لم اكمل النص وتركته مبتورا !!!

النص التاسع 

في 9 مارس 2012 كتبت

مش بحاول اقنع حد بحاجه !!! 

يعني اللي مقتنع باي حاجه يفضل مقتنع بيها !!! 

انا باكتب النوت ده علشان افضفض !!! فالفضفضه حق شرعي لكل مواطن صالح ومواطنه صالحه !!!! 

نبتدي الفضفضه ....

يحكي ان " الاخ الاكبر " شاف ان ماما امريكا بتستهبل !! 

قالت زمان " نااااااااو يعني ناااااااااااو " سكت وبلع لسانه وقاله الكلام مش بفلوس!!!! 

وبعدين لما دقق في الصورة لقي ان ماما امريكا كلامها بفلوس وفلوس كتيرة قوي !!! 

امريكا ، بتقول دي معونات لنشر الديمقراطيه ، الاخ الاكبر قال محدش ينشر الديمقراطيه عندنا الا بالادب وانتم قللات الادب !!! 

بترفعوا صوتكم وتقولوا ( ناااااااااااو يعني ناااااااااااااااو ) وبتلعبوا في الشارع ، مع ان اللعب في الشارع بيوسخ الهدوم ويجيب قله القيمه وممكن كمان وانت بتلعب في الشارع عربيه تدوسك ولا كلب يعضك ولا حد يرش عليك ميه وسخه !!!! 

الاخ الاكبر ، قال لماما امريكا ، روحي العبي في الشارع بتاعكم ، ماما امريكا قالت الشارع لمين الشارع لنا احنا كلنا !!!! 

الاخ الاكبر ، سكت وقعد يتفرج وقالك لابد من " قرص " ماما امريكا " من لباليبها " علشان تبطل تلعب في الشارع عندنا وتروح تلعب في اي شوراع تانيه سواء عندها شخصيا او عند اي حد تاني !!!! 

لم اكمل النص وتركته مبتورا !!!

النص العاشر 

في 25 مارس 2012 كتبت

عايزين ديمقراطية ....

عايزين حرية .....

حااااااااااااااااااضر ..... ادي الديمقراطيه والحرية جابت برلمان اغلبيته اسلاميه اخوانيه سلفية !!!

لا مش عاجبنا الديمقراطيه دي ولا الحرية دي ، لان الشعب الجاهل معرفش ينتخب صح!!!

مدنيه الدوله خط احمر

يسقط يسقط حكم العسكر

يسقط يسقط حكم العسكر

يالا امشو من هنا ، يالا روحوا ، يالا ارجعوا علي الحدود وبس

ومش موافقين علي المباديء فوق الدستورية

ومش موافقين علي وثيقه السلمي

يسقط يسقط حكم العسكر ....

ديمقراطيه .... انتخابات برلمانية .... اغلبيه اسلامية حريه وعداله وسلفيين وجماعه اسلامية و......عشرين تلاتين اربعين خمسين نايب يسار علي ليبرالي علي اشتراكي ديمقراطي وتسع نائبات منتخبات واتنين معينات ....

البرلمان ده لايعبر عنا ...

جايز !!! لكنه يعبر عن الشعب وعليكم احترام اراده الشعب !!!!

لا .... وكما قالت احداهن " ماانا قلت لكم ياجماعه من زمان الشعب ده اكبر خطر علي الثورة " !!!!!

يسقط يسقط حكم العسكر

يسقط يسقط حكم العسكر

ويسقط ليه ، مااحنا ماشيين ماشيين ، في نهايه المرحله الانتقالية

لا انتم كذابين ماحددتوش مواعيد

لا حددنا واهو الجدول اهو ....... فتح باب الترشيح ، قفل باب الترشيح ، انتخابات رياسه الجمهوريه ، الاعاده و........باي باي في الاول من يوليو 2011 ...

مبسوطين كده ،لا ، ليه ، كده

يسقط يسقط حكم العسكر

يسقط يسقط حكم العسكر

فيه مرشحين محتملين للرئاسه ، حازم ابو اسماعيل الذي شفي السيده المشلوله بلمسه يده لاذنها ، وعمرو موسي ، والعوا ، بسطاويسي ، شفيق ، حمدين صباحي ، الحريري ، وبيجمعوا التوكيلات واصوات النواب .. والبحث عن رئيس توافقي وبالونات اختبار " خيرت الشاطر " لا كنا بنهزر !!!

لم اكمل النص وتركته مبتورا !!!

النص الحادي عشر 

في 28 ابريل 2012  كتبت

تاني وعاشر

الغضب الشعبي لايصنع ثورة !!!

لان الثورة يعني تغيير كامل !!!

ولان الثائرين قبل مايثوروا لازم يعرفوا بيثوروا علشان ايه ، ضد ايه ومع ايه

الغضب الشعبي لايصنع ثورة !!!

الثورة يصنعها رؤيه وقياده ومشروع سياسي اقتصادي اجتماعي متكامل

مافيش حاجه اسمها ثوره كل الشعب

فيه حاجه اسمها ثوره من فئه من الشعب او طبقه من الشعب لصالح مشروعها هي مش اي مشاريع وخلاص

يعني الثوره البلشفيه كانت ثوره العمال والفلاحين علي الارستقراطيين والنبلاء

الثوره الخومينيه كانت ثوره رجال الدين والملالي لصالح مشروع الدوله الدينيه علي حساب الشاه والمواليين له والدوله المدنيه

الثوره ، مشروع تغيير كامل

ثوره يوليو ، بدأت انقلاب عسكري ، وحاولت ترضي جميع الاطراف السياسيه والطبقيه ضد الملك ومجتمع الارستقراطيه المصريه ثم سرعان ماحددت هويتها الطبقيه بانها ثوره الطبقه المتوسطه ولصالحها مع مراعاه الفلاحين والعمال ، مراعاتهم وليس تقديم مصالحهم الطبقيه علي حساب بقيه المجتمع ، وحددت هويتها في اطار الاستقلال الوطني عن الاحلاف الامبرياليه عن طريق مشروع وطني قومي عروبي علي حساب التابعين للغرب الامبريالي !!!

حكايه ثوره كل الشعب دي جديده علي !!!

وحكايه ثوره بلا قياده سياسيه واضحه ، وليها ميت قياده وكل الف واحد يمشوا ورا قائد وكل الف واحد يعملوا اللي همه عايزين وفي الاخر ثوره هيه !!! برضه جديده علي!!!

وحكايه اي حاجه احسن من اللي احنا فيه جديده علي لان فيه مليون حاجه اوسخ وارديء واقبح من اللي كنا فيه ، وبالتالي لازم نشوف احنا رايحين فين قبل مانتحرك بالعربيه ونجري واحنا مش عارفين اخر الطريق !!!

طيب ....... مين متحالف مع مين ضد مين !!!

مين اطراف الصراع اللي بيتحاربوا مع بعض علشان يكسبوا ارض بعد الثوره ماانتصرت علي حد زعمهم !!!

هل الصراع السياسي صراع راسمالي اشتراكي ؟؟

هل الصراع السياسي صراع ديني مدني ؟؟

هل الصراع السياسي صراع اغنياء وفقراء ؟؟

هل الصراع السياسي صراع طبقي مثلا رجال الاعمال والراسماليه من ناحيه والعمال والفقراء من ناحيه تانيه !!!

مين بيتخانق مع مين وعلشان ايه ؟؟؟؟؟؟

ماهو لما نعرف مين بيتخانق مع مين ، نعرف نحدد احنا حنأيد مين وحنرفض مين !!!

يعني مثلا ..........

اللي ضد الراسماليه ، ومتصورين انهم حيطلعوا كسبانين من الثوره شويه اشتراكيه خطوه خطوه ، يبقي مين حلفائهم ومين اعدائهم ، حلفائهم اللي بيدعموا الاشتراكيه والطبقات الاجتماعيه اللي بتعبر عنها واعداءهم اللي بيدعموا الرأسماليه والطبقات الاجتماعيه اللي بتعبر عنها !!!

طيب مثلا اليسارين والاشتراكيين ، عندهم شك ، ان حسني مبارك والطبقه التي كانت تسانده رأسماليه ، لا طبعا ماعندهومش ، طيب وايه رايهم في حزب الوفد والغد ، راسماليه ولا اشتراكيه ؟؟ طيب ايه رايهم في الاخوان المسلمين وخيرت الشاطر ، راسماليه ولا اشتراكيه ، طيب ايه رايهم في حزب النور والسلفيين ، راسماليه ولا اشتراكيه !!!

لم اكمل النص وتركته مبتورا !!!

النص الثاني عشر 

اليوم 29 ابريل 2012 كتبت

هذه نصوص مبتورة وافكار غير مكتمله !!! 

عندما رتبتها مع بعضها اكتشفت علاقه بينهم جميعا ، هي نصوص مبتورة تعبر عن الصراع والتخبط والفوضي ، الصراع والتخبط والفوضي الذي اعيشهم مثل المجتمع بالضبط ، المجتمع يعيش صراع وتخبط وفوضي وتبعثر الافكار وضياع البوصله وانا مثله ، انا مرآته التي تنعكس فيها صورته !!! 

فاذا جاءت الصورة مشوبه بالتخبط والبعثره وعدم الترتيب فهي تعكس طبيعه الاصل الذي يعاني التخبط والبعثرة وعدم الترتيب ...

 افصحت نصوصي المبتورة وافكارها غير المكتمله عن حالتي وحالة المجتمع المصري في هذه السنه ونصف تقريبا !!! 

اليكم تلك النصوص المبتورة بكل مافيها ومالها وماعليها !!

علها توصل لكم اي رساله او فكره او معني !!!! 

علها تقول شيئا لم افلح اقوله بمنتهي الوضوح !!!