في ذكري 25 يناير .. عايزه اقول كلمتين مهمين من وجه نظري بس لازم وانا باقولهم ، لازم اميز بين موضوعين كبار قوي ...
الموضوع الاول .... بين ناس مصريين وطنيين نزلوا يوم 25 يناير ومابعدها لانهم بيحبوا مصر وكانوا بيحلموا لها بمستقبل اجمل ، وعارفين ان مافيش قياده سياسيه لكن نازلين وبيرددوا شعارات سياسيه فضفاضه محدش يختلف عليها ... ده موضوع...
و
الموضوع التاني ..... بين مؤامرة امريكيه اخوانيه ، كانت عارفه انها مستحيل تتنفذ الا بنزول الملايين الوطنيين الشوارع ، علشان كده عملوا كل حاجه لحشدهم في الشوارع ، من اول اخفاء هويتهم السياسيه لغايه رفع شعارات عامه مجمعه محدش يختلف عليها ، لغايه استخدام كل التقنيات الفنيه للتزوير والتزييف بشأن عدد اللي نزلوا وتحميس اللي مانزلوش ينزلوا ، مؤامره امريكيه لتقسيم الشرق الاوسط ومصر ، مؤامرة استخدموا فيها الاخوان في كل حته ( مصر ، سوريا ، ليبيا ، تونس ، اليمن) لتنفيذ المخطط والمؤامرة ...
لما بنقول مؤامرة امريكيه اخوانيه مش بنقصد اي اهانة للملايين المصريين الوطنيين اللي نزلوا الشارع واللي استخدموا من الاخوان لتنفيذ المؤامره الامريكية بالعكس خالص احنا بنقول لهم انتبهوا انتم شاركتم في مؤامره ضد وطنكم من غير ماتنتبهوا ومن غير ماتاخدوا بالكم ، انتبهوا علشان ماتستخدموش تاني ضد بلدكم اللي بتحبوها ..
بس والله والله ، المؤامره الامريكيه الاخوانيه استخدمت الملايين الوطنية اللي بتحب مصر وبتحلم لها بمستقبل اجمل لتنفيذ المؤامرة والمؤامره دي كانت عارفه انه يستحيل تتنفيذ في الشارع وعلي الارض بدون نزول ملايين المصريين فعلا واستخدامهم بعد كده ، الملايين دول هما اللي حماس قتلتهم بدم بارد يوم موقعه الجمل وقبلها والعربيه الدبلوماسيه الامريكيه قتلهم بدم بارد علشان تلزق التهمه في مبارك وتسخن المتظاهرين عليه اكتر واكتر ....
المشكله ان الملايين دول ، كانوا في الشارع ومش عارفين ايه اللي بيحصل حواليهم الا من الجزيرة ومن مصادر معلومات المؤامرة الي بتروج اكاذيب تسخن الناس وترفع سقف مطالبها وتبقيهم في الشارع ... ماكانوش شايفين الصورة كامله ولا حتي جزء منها ، كانوا شايفين بس اللي اطراف المؤامره عايزينهم يشوفوه وبس ..
المشكله ان الملايين الوطنيين دول ، لغايه النهارده رافضين كلامنا ورافضين يصدقوا ان كان ومازال فيه مؤامره امريكيه اخوانيه ، رافضين يصدقوا او يعترفوا بده ، ليه لان عازز عليهم الاحساس بأنهم استخدموا من قبل الاخوان والامريكان ، رافضين كلامنا لان عازز عليهم ان يكون كل اللي قالوه لغايه مالصوره اتضحت بالنسبه لهم ( بحكم خالد محجوب واللي بين المؤامره العسكريه علي مصر من حماس وحزب الله والاخوان ) كلام مش مضبوط ، رافضين كلامنا لانه عازز عليهم يطلع اللي قتل المصريين في الميادين وفي موقعه الجمل هما حماس ، واللي فتح السجون وقتل الضباط هما حماس بالتنسيق مع الاخوان ومليشياتهم الارهابييه ...
للملايين الوطنيين دول احب اقول ، ان الاعتراف بالكلام ده مش معناه انكم مش وطنينن ولا مخلصين ولا مابتحبوش مصر ، الاعتراف بالكلام ده معناه انه تم التلاعب بحماسكم وطنيتكم واحلامكم بمؤامره حقيرة امريكيه اخوانية اشترك فيها مصريين سوا عملاء او خونه او ارهابيين ...
انتم زي الفل وحتفضلوا زي الفل ، بس بطلوا مكابرة واعترفوا بالمؤامره علشان نعرف كلنا ايد في ايد وكتف في كتف نعرف نقاومها ونكسرها ونحافظ علي وطننا ....
ليست هناك تعليقات:
إرسال تعليق