الايام السودا حتخلص حتخلص
وبر الامان جاي جاي
الرحله السودا والايام الغبرا
مش عارفه مفروض الوم مين ولا اشتم مين ولا ادين مين !!!!
مش عارفه بجد مش عارفه مين عايز ايه ؟؟؟؟
كده حيخشوا الجنه !!!! متصورين كده !!! وهما مصدقين الكلام ده بجد ولا ده شغل ونصبايه كبيرة بس باسم ربنا!!!!هي قصه ربنا والجنه ، ولا قصه سياسه ومصالح ولابسين العبايه والدقن علشان يعرفوا يلعبوا في دماغ الناس براحتهم !!!!
طيب هما يرتاحوا امتي لما يحصل ايه !!!!
لما النسوان تربي دقنها والرجاله تلبس طرح !!!
ده اللي حيريحهم !!!
النسوان تقعد في البيوت وتبطل شغل وتلبس خيم بعين واحده زي بتوع طالبان !!!
والرجاله تلبس جلاليب قصيره ويربوا دقنهم ، ده كده اللي يريحهم !!!
طيب الاقباط اهل ذمه ومايخشوش الجيش ويدفعوا الجزيه !!! ده كده اللي حيريحهم !!!
كده حيبطلوا قنابل وتفجيرات وعربيات مفخخه وانتحاريين !!!
نبقي طالبان او السودان او زفت الطين ، ده اللي حيريحهم !!!!
مش حيتخانقوا مع بعض ويقولوا علي بعض - مسلمين في مسلمين يعني - دول كفره ودول زنادقه ودول زفت الطين وينزلوا قتل في بعض !!! طيب باماره ايه اصدق الكلام ده ، دول بيكفروا بعض ويكفروا المسلمين اللي مش بيعجبهم كلامهم وبيكفروا الحكومات والشعوب والتاريخ والجغرافيا ...
طيب هي فعلا قصه ربنا والجنه ولا قصه سياسه ومصالح وتمويل ودول وقرف وزفت ازرق !!!!
طيب هو اللي عايز يخش الجنه يعمل كده برضه !!!
يموت الابرياء !!! ويفجر قنابل !!! ويقتل النفس التي حرم الله قتلها !!!!
دول عمرهم ماحيوردوا علي جنه !!!!
طيب هما عايزين ايه بقي !!!!!
انا حزينه وموجوعه وقلبي محروق !!!
اه محروق قلبي ومرعوبه علي مصر والمصريين ...
اصل اصعب حاجه لما تحس ان حواليك شر ماانتاش عارف جاي لك منين !!!
ايه الفكر ده !!!! ايه التطرف الديني ده !!! ايه الحكايه دي !!!!
الناس دول ، اللي انا مش عارفاهم ، جم منين وعايزين ايه !!!!
رحله طويله وايام سودا عشتها تلاتين سنه لحظه لحظه !!!!
كنت في اولي حقوق 1976، لما جماعه التكفير والهجره خطفت الشيخ الدهبي ، الشيخ الدهبي كان من شيوخ الازهر وساكن في حلوان ، شيخ معمم وازهري ، معرفش قال ايه ولا عمل ايه ، زعلوا منه ليه ، زعلوا منه ليه بالضبط واشمعني هو .. المهم انهم زعلوا منه ، خطفوه ، راحوا بيته خطفوه ، والامن قامت والدنيا هاجت ، يومين تلاته ، ولقوا جثته ، مش فاكره فين ، مضروب رصاصه في عينه الشمال !!! وليه الشمال بالذات ، بعدها بسنين قريت حكم المحكمه العسكريه اللي حكمت علي الجماعه دي بالاعدام والسجن ، كنت اتخرجت من الكليه واشتغلت في مكتب الاستاذ نبيل الهلالي المحامي ، شفت الحكم ، قريته ، واترعبت ... افكارهم طريقه تصرفاتهم ، ده مش وقته ، لكن عرفت ليه ضربوه رصاصه في عينه الشمال ، لان الشيطان قاعد تحت عينه الشمال !!!!
هما كانوا مسلمين والشيخ الدهبي مسلم ازهري معمم ، لكن قتلوه لانه قال حاجه ماعجبتهومش !!! فادوا نفسهم الحق يقتلوه !!!
مش ده الدين الاسلامي اللي اعرفه ولا دي احكام القرأن اللي قريتها !!!
مين الناس دول وجابوا افكارهم منين !!! مين اللي قال لهم الكلام ده وعلمهم الكلام ده !!!
مين اللي خلاهم يكفروا الناس ويهاجروا بعيد عن حياتهم لانها كافره !!!
المشكله ان لما عيل يشم هيروين اهله بياخدوا بالهم !!! لما بيسكر ويتأخر مع اصحابه ويصيع بره البيت اهله بياخدوا بالهم ، لكن لما عيل ، ربنا بيهديه ، طبعا ماهو بيقولوا كده ، بعد ماكان صايع ولا بتاع كوره ولا بتاع بنات ، فجأ ربنا هداه ، لما عيل من وجه نظرهم ربنا بيهديه ويطول دقنه ويقول قال الله وقال الرسول ، اهله بتفرح وحتي لو مافرحتش حتطنش ، ماهو مش معقول حنقول للعيل ابعد عن ربنا وسيب الهدايه ، ده حتي عيب ، طيب ربنا يهديه ، وفجأ يضرب الشيخ الدهبي في عينه الشمال بالرصاص !!! هدايه ايه دي !!!
فين الشعره بين الهداية وبين ضرب الرصاص !!!!
انا دلوقتي وانا عندي 52 سنه عارفه الشعره دي فين !!! لكن العيل الشاب المتمرد علي اهله بحكم تركيبته العمريه المحبط غالبا ومكبوت جنسيا اكيد ، لما يصيع واهله يصوتوا وهو مايسمعش كلامهم وبعدين ربنا يهديه ويهديه ويهديه وفجأ يضرب رصاص ويقول انتم كفره والتلفزيون حرام ويضرب شيخ بالرصاص في عينه الشمال ، العيل ده ماخدوش بالهم من الشعره اللي انا باتكلم عليها !!! ويمكن خدوا بالهم والعيل مارضيش يسمع كلامهم ، اولا لانهم كفره وبيقولوا كلام كفره ، ثانيا لانه متمرد علي اهله بحكم سنه !!!!
ازاي ده بيحصل ؟؟؟؟
المصيبه مش انه بيحصل ازاي !!! المصيبه انه الاهل مابيعرفش انه حصل غير لما يكون حصل خلاص ، والعيل راسه اتغسلت مره واتنين وقلعها ومشي حافي وخلاص اتظبط وكفر كل الناس وسلم راسه لواحد - انا شخصيا مش عارفاه - فهمه الواحد ده انه بيكلمه باسم ربنا وانه حيدخله الجنه ، وحد يكره !!! والدنيا خلاص باظت بقي ، مين يلحق مين !!!!
لما حصلت احداث اسيوط 1981 بعد قتل الرئيس السادات ، وقبضوا علي ناس كتير قوي بسبب احداث اسيوط واغتيال السادات ، وقتها كنت محاميه صغيره تحت التمرين ، بقالي سنه باشتغل ، لكني كنت عضوه في لجنه الدفاع عن الحريات بنقابه المحامين ، الناس كلها وقتها كانت ملهيه علي عينيها ، قبل الاغتيال حصل التحفظ علي حوالي 1500 شخصيه عامه وسياسيه ، وبعدين السادات اتقتل والدنيا ولعت ، ناس كتير اتقبض عليها ، لجنه الدفاع عن الحريات كانت بتقوم بجهد رهيب ، مابين قضيه الاغتيال ومابين الناس التانيه المحبوسه علي ذمه تنظيمات ، الجهاد وغيره ، المهم ، انا زي العبيطه روحت في محكمه شمال القاهره الابتدائيه بالعباسية علشان احضر جلسات تجديد حبس بتاعت الناس المقبوض عليها ، انا وغيري من المحامين ، كان عندي 22 سنه وسخنه بقي وواخده الدنيا علي صدري ....
المهم دخلت القاعه ، الاهالي كلها بدقون والستات كلها او معظمها منقبات ، دول اسر المتهمين ، مافهمتش لكن ماحطيتش في راسي ، القفص كان فاضي ، دخل المتهمين القفص ، اطفال ، معظمهم اطفال ، بجد ، يعني 17 و18 سنه والكبير فيهم في الجامعه ، دلوقتي شايفاهم اطفال ، لكن وقتها كنا كلنا اطفال قد بعض اكبر سنه اتنين مش مهم ، دخل القفص شباب صغيرين ، لابسين ابيض ، مش فاكره جلاليب وبنطلونات ولا ايه ، المهم ، انا رحت زي العبيطه مع بقيه المحامين وقلت بصوت عالي ، انا فلانه المحاميه ، متطوعه من لجنه الدفاع عن الحريات للدفاع عنكم ، وفجأ ، الشباب كلهم ادوني ضهرهم ، صوتك عوره ولانقبل نساء تدافع عنها ، حد باينه اكبرهم ، قالي كده وهو مديني ضهره !!!
واكتشفت اني عبيطه واني راحه اترافع عنهم زي ماكنت باروح اترافع عن شباب المعرض الصناعي ولا معرض الكتب ولا عمال عاملين اضراب ، لا معاهم اكتشفت ان صوتي عورة وان سيده لن يقبلوا دفاعهم عنهم ..... كل ده مش مهم ، المهم انهم بجد كانوا اطفال صغيرين !!!! لدرجه ان النيابه احتاست فيهم لانهم مفروض احداث يتحاكموا قدام محاكم الاحداث ، لكن هما مش احداث بجد ، هما كبار وصغيرين ، كبار بافكارهم وتصرفاتهم والتنظيم اللي اعضاء فيه وتكفيرهم لكل الناس وصغيرين عندهم 17 و16 سنه !!!! النهارده وانا بنتي الصغيره عندها 17 سنه وباعتبرها عيلة صغيره وطايشه كمان وطول النهار اجري وراها واتكلم معاها واحاول انقذها من طيشها والخبرات المؤلمه التي قد تمر بها لو لوحدها من غير ماما صاحبتها ، النهارده باسال نفسي ، مين اللي لعب في رؤوس الشباب دول وخلاهم في السن الصغير ده بدل مايلعبوا كوره ويعاكسوا بنات ويعيشوا سنهم ، او حتي يذاكروا دروسهم وبس ، ايه اللي خلاهم يخشوا تنظيم ويكفروا الحكومه والدوله والاخرين ويربوا دقونهم الخضرا اللي مش راضيه تطلع !!!! مين اقنعهم بايه !!! دول لسه شباب ، لا اشتكوا من البطاله ولا من قله الشغل ولانفسهم يتجوزوا ومش لاقين شقه ومحبطين ولا عايزين يسافروا ومش عارفين ياخدوا فيزا ، دول شباب صغير ، اتلقط بسرعه وبدري بدري واتظبطت دماغهم وافكارهم و........... وانتهي الحال بيهم في السجن لسنين طويله ، وحياتهم ضاعت !!! مين اللي لعب في راسهم !!!
انا فاكرة لما الرئيس السادات قابل عمر التلمساني ، مرشد الاخوان المسلمين وقتها ، كنت صغيرة في ثانوي وداخله الجامعه ، قابله واتكلم معاه ، وسنه ودخلت الجامعه ولقيت اللي بيسموا نفسهم " الجماعه الاسلامية " زمايل لينا في الجامعه ، بس مكشرين وبيحاولوا يفرضوا اللي شايفينه صح علي الطلبه والمدرجات - يفرضوه ، بالذوق بالعافيه بالجنازير مش مهم - طيب هي الجماعه الاسلامية دي مش معناها اني باميز بين الطلبه علي اساس الدين وان بدام فيه جماعه اسلاميه يبقي مفروض يبقي فيه جماعه مسيحيه وننسي بقي " موضوع المصريين " لانهم في النهايه شويه مسلمين وشويه مسيحين ، مش مهم مين اكتر لكن هما فريقين مش وطن ... هل ياتري محدش خد باله ، ولا الناس خدت بالها وطنشت ، ولا ده كان مخطط مقصود ، وفجأ شباب الجماعات الاسلاميه بقي يعملوا معارض كتب اسلاميه ومعارض هدوم اسلامية والطلبه ربنا بقي بيهديهم وهو حد يزعل من الهدايه ؟؟ والهدايه ابتدت تظهر في الجماعه ، يضربوا جماعات الفكر الناصري والاشتراكي ويقطعوا مجلات الحيطه بتاعهم ويمنعوا فرق المسرح تمثل ويطالبوا بان البنات تقعد في حته والولاد تقعد في حته و.........محدش واخد باله وعادي ، او واخدين بالهم وعادي !!! هو الكلام ده مش كان معناه علي طول ، ان فيه مسلم وفيه مسيحي ، مش في الجامع والكنيسه ، لا في المدرج والكليه !!!
هما الطلبه اللي كانوا معايا في الجامعه من 30 سنه ، الي سمعوا كلام الجماعات الاسلاميه واشتروا الكتب منهم ووافقوهم ان المسرح حرام وقعاد البنات جنب الولاد حرام ، مش هما دول النهارده الابهات والامهات اللي ربوا عيالهم علي الافكار دي ، مش ده الجيل اللي عنده خمسين خمسه وخمسين سنه النهارده ، طيب دول لما كانوا في الجامعه وسمعوا الكلام ده من الجماعه الاسلاميه وربنا هداهم محدش قال لهم ان الكلام ده غلط ، النهارده عايزينا نقول لهم ايه ، نقول لهم ان المسلم زي المسيحي والمسيحي زي المسلم وكلنا مصريين !!! كنا فين من زمان طيب !!!! لما السادات لحسبه سياسيه طلع التلمساني من السجن وقابله وبقي الرئيس المؤمن !!!! كنا فين ، لما قرر يلعب لعبه سياسيه علشان يعرف يتصدي ل" العيال اللي لابسين قميص عبد الناصر والشيوعين " اللي بيعملوا مظاهرات ويقولوا له حنحارب امتي ؟؟؟ طيب هو ربي اسد في عبه والاسد اكله ، واتقتل علي ايد الاسلامبولي وزمايله اللي كانوا شايفينه كافر لان مراته باست كارتر ولانه استضاف شاه ايران اللي ضد الدوله الاسلاميه الايرانيه ولانه قبض علي الشيوخ وقال علي الشيخ المحلاوي في 5 سبتمبر 1981 ( اهو مرمي في السجن زي الكلب) طيب اللعبه اللي ابتديتها قلبت عليك ، والاسد اللي ربيته تخوف بيه الناس كلك ياسياده الرئيس !!!! وبعدين !!!!
هي ايه الحكايه ..... الاول ربنا يهديهم !!! وبعدين يبقي المسرح حرام !!!! وبعدين يبقي المسيحي من اهل الذمة ومافيش وطن فيه امه اسلامية !!! وبعدين يبقي في ( طظ في مصر ) و......... وبعدين تولع طبعا !!!! هو ده السيناريو والطريق الاسود !!!!
علشان كده بجد مش عارفه ااقول ايه ولا الوم مين ولا ادين مين !!!!
لكن حياة الانسان كلها اشكاليات ومصايب ، يحتاس فيها ومايبقاش عارف يتصرف !!!!
وهي الحياه رحله سودا ومتنيله بستين نيله !!! لكن لازم نعيشها !!! مافيش خيار تاني !!!!
لما حصلت الفتنه الطائفيه الاولي في تاريخ حياتي ، نعم في تاريخ حياتي انا ، اللي سموها احداث الزاويه الحمرا ، كنت عمري ماسمعت عن فتنه طائفيه قبل كده ، اه شفنا نكسه 67 وانتصار 73 ، شفنا الزعيم البطل جمال عبد الناصر والرئيس المؤمن انور السادات ، سمعنا ارفع راسك يااخي انتهي عهد الاستعمار وسمعنا ميه في الميه من اوراق اللعبه في ايد امريكا ، سمعنا اننا حنرمي اسرائيل في البحر وسمعنا ان المشكله بينا وبين اسرائيل حاجز نفسي ......... علي مادخلت الجامعه كنت سمعت حاجات كتيرة وعكسها ، والدنيا ملخبطه والافكار ملخبطه ، لكن ماكناش سمعنا عن موضوع الفتنه الطائفيه ده خالص ، الا في كتب التاريخ لما حاول الانجيز يطبقوا سياسه فرق تسد والشعب المصري رد عليهم في ثوره 19 بشعار وحده الهلال مع الصليب ومشيوا الشيوخ والقساوسه في المظاهرات جنب بعض ، وقتها ماكانوش بيعملوا كده علشان يتصوروا ، لا كان بيعملوا كده لانهم مصدقين بجد انهم شعب واحد ومصير واحد ومستقبل واحد ، اذن مافيش حاجه اسمها فتنه طائفيه !!! لكن احداث الزاويه الحمرا عرفتنا بحاجه جديده ماكانش جيلي عرفها قبل كده ، عفريت الفتنه الطائفيه ، عفريت الفتنه الطائفيه خرج من القمقم - بعد العيال ماربنا هداهم وبعد ماضربوا الشيخ الدهبي برصاصه في عينه الشمال وبعد ماقعدوا البنات في حته والولاد في حته في الجامعه وقالوا المسرح حرام - خرج العفريت من القمقم ومارجعش تاني لسه !!!!
ايه احداث الزوايه الحمرا دي ، ست نشرت غسيل ، الغسيل نقط علي غسيل جارتها ، عادي ياما بيحصل ، دي شتمت دي ، دي ردت علي دي ، فجأ بقت الحكايه مسلمين ومسيحين وده غسيل مسيحي وده غسيل مسلم واضرب ياجدع وعنها الدنيا ولعت !!! ايامها طنط نوال الست الصعيديه المسيحيه صاحبة عمتي صفيه ، ايامها طنط نوال اترعبت هي وكل الناس حواليها ، اصل اول مره تعرف انها مسيحيه وانها اقلية وان الغسيل المسيحي وسخ الغسيل المسلم !!!! ايامها قالوا الاقباط غضبوا من اللي حصل والكنايس ضربت الاجراس والبابا اعلن الصيام وعلقوا علي اسقف الكنايس اعلام كبيره عليها صلبان حمرا !!!! هل الكلام ده صح ولا غلط ، حصل ولا محصلش ، معرفش ، لكن وقتها المصريين فتحوا عينهم علي عفريت بيحرق في هدومهم !!! فيه حاجه اسمها مسلمين ومسيحين ، مش نظريه مصريين !!! واكتشفنا ان جورج سيدهم الراجل التخين اللطيف في فرقه ثلاثي اضواء المسرح مسيحي وان الضيف احمد مسلم !!!! يانهار اسود هي وصلت لفرقه ثلاثي اضواء المسرح كمان نعرف مين فيهم مسيحي ومين مسلم!!!!
احداث الزاويه الحمرا كانت سنه 1980 يعني من 31 سنه ، خلال ال31 سنه ، عشنا ايام وزمن الفتنه الطائفيه ، هنا هناك ، تولع هنا ، تشعلل هناك ، واللي كانوا طلبه في الجامعه في السبعينيات بقوا ابهات وامهات بيربوا عيالهم علي ان المسلم غير المسيحي والمسيحي غير المسلم و............ العيال صدقت اهاليها لان محدش قال حاجه تانيه ، وبعد ماصدقت اهاليها صدقت الجماعه الاسلاميه في الجامعه وصدقت امام الجامع في صلاه الجمعه و............. العفريت بقي عفاريت !!!
اتنين جيران يتخانقوا علي حدود الارض ، واد يعاكس بت ، مره تهرب من جوزها ، بياع يغش اللبن ، غسيل ينقط ، عيل يضرب عيل في الحارة ، راجل يعاكس مرات جاره ، احداث طبيعيه في الحياه البشريه ، زمان الناس كان بتتخانق وتشتم واحيانا تضرب وبس خلاص الصلح خير ، لكن فجأ بقي كل ده احداث طائفيه ، مسيحين ومسلمين و.............الدنيا تولع !!!!
بقت الفتنه الطائفيه جزء للاسف من نسيج حياتنا !!!! وكل يوم الافكار بتعشش في الدمغة اكتر واكتر !!!
المثقفين بيقولوا كلام فاضي محدش بيسمعه !!!!
والشيوخ بيقولوا اللي نفسهم فيه وبراحتهم والعيال ربنا هداها وبتروح الجامع تصلي وحد يكره ، طبعا لا !!!!
ومابقناش مصريين وبس لا !!!
بقينا مسلمين مصريين ومسيحين مصريين !!!
العيال بقي اسمها اسلام وعبد الرحمن وفاطمه وعائشه !!!
العيال بقي اسمها مينا وجرجس وتريزا وماري !!!
طب ماهو كل حر يسمي عياله زي ماهو عايز !!! صح .... لكن ... الناس بتسمي عيالها كده علشان تقول احنا مسلمين واقويا واحنا مسيحين وموجودين و........... بقت الاسامي مظاهرات مش اسامي !!!!!
الطم علي وشي طيب !!!!
وحتي لما الطم حاعمل ايه وحيفيد بايه !!!!
لما الواد الكهربائي رفعت وهو راجل مخلص قوووووووووي ومحترم قووووووووي وشاطر في شغله اوي ، لما جه يعمل عندي شغل في البيت وهو بالمناسبه بقاله خمس سنين بييجي لي البيت والمكتب مره كل اسبوع ، النسوان الشغالين قرروا " يعلموا الكوبايه " اللي بيشرب فيها علشان مايشربوش مطرحه !!!! الواد بمنتهي الادب سكت واعتبرهم نسوان مجانين وخلاص ، لكن انا ولعت الدنيا ومسحت بيهم البلاط وصرخت وشتمت وقلت كلام ابيح وسخ بصوت عالي مصر كلها سمعته ، قلت ده بيتي يا شر.......... والراجل ده اخويا وضيفي واللي مش عاجبه يغور في ستين داهيه و............صريخ صريخ والنسوان بتبص لي بصه استغراب رهيبه ، مال الاستاذه العاقله اتجننت كده ، هو احنا قلنا حاجه ، قلنا مايشربش ولا ماياكلش ، ماقلناش حاجه !!!! الفتنه الطائفيه دخلت بيتي شخصيا !!!! عايزه ااقول كلام ابيح لكن مش حاقول .... صالحت رفعت واعتذرت له ، رفعت تقبل موقفهم بسماحه وتفهم ، اصله صعيدي ، ابوه جه مصر وجاب عيلته كلها لان في بلدهم البياعين المسلمين ماكانوش بيرضوا يبيعوا لهم حاجه لان الجنيه ده " جبطي " !!!!
رفعت ساب الصعيد وعاش في مصر ، طبعا تفهم موقف النسوان اكتر مني ، لان شاف المر والايام السودا في الصعيد قبل ماينزلوا مصر ، شاف اصحابه يمشوا معاه من المدرسه لغايه قبل البلد بعشرين متر ويسيبوه ويشموا لانهم مش مفروض يبقوا اصحاب لانه " جبطي " ولانهم " مسلمين " !!! رفعت تفهم موقف النسوان ، انا مافهمتش وشتمتهم وخربت الدنيا .... بس لما هديت بعدها قعدت افكر في سلوكهم وسببه !!! صعبوا علي ، ماهم الشيوخ بتوعهم قالوا لهم الكلام ده ، والفضائيات اللي بيتفرجوا عليها قالت لهم الكلام ده ، هما - قصدي النسوان الشغالين - دماغهم بيضه وعلي عضمها ، مش متعلمين ولا بيعرفوا يفكروا واللي يقوله الشيخ صح واللي يقوله التلفزيون صح !!!! صعبوا علي لكن حسيت بمصيبه سودا كبست علي نفسي وراسي وقلبي !!!! ماهم النسوان دول اللي جايين من بولاق الدكرور وصفت اللبن وكرداسه وغيرها ، هما دول المصريين !!! دول اللي عيالهم في المدارس وبناتهم بياعين في المحلات ، دول الاغلبيه الساحقه الماحقه للاسف ، يبصوا لي باندهاش واعجاب لاني استاذه قد الدنيا لكن مابيفهموش انا بقول ايه ، ولا يقروا مقالاتي لانهم خرجوا من المدارس ونسيوا الالف وكوز الدره ، النسوان دي هي الاغلبيه ، اللي شيوخ التطرف لعبوا في دماغهم وافكارهم وشخبطوا ليهم علي الصفحات البيضا ، هما اللي مسلمين امرهم لله ونفسهم يعيشوا كويس وطبعا نفسهم يخشوا الجنه والجنه مايقدروش يخشوها الا لما يسمعوا كلام الشيخ ، والشيخ قال المسلمين حاجه والمسيحين حاجه و..... ياسنه سودا ومطينه بطين !!!!
حكايه قديمه وغبرا !!!!
ورحلة سودا .....
في بدايات التسعينيات ، كنت عضوه في المنظمه المصريه لحقوق الانسان ، ورشحت نفسي لمجلس الامناء ونجحت في الانتخابات دورتين ، في نص الدوره الثانيه استقلت ... ليه ؟؟؟ في الفتره دي كانت تفجيرات الارهابيين ، قنبله عند مدرسه ، يضربوا ضابط في عز شبابه ويموتوه ، يفجروا اتوبيس سياح ، وهكذا ، لما كان بيتقبض عليهم او علي الناس اللي معاهم في التنظيمات الارهابيه ، طبعا البوليس كان بيضغط عليهم بكل الطرق علشان يعترفوا بالجرايم ومين عمل ايه وليه وحتعملوا ايه تاني .... ( يضغط ده لفظ مهذب لحاجات كتيره كلنا فاهمينها ) !!!!
طبعا اهالي المتهمين كانوا يجييوا المنظمه ويعملوا بلاغات علشان اولادهم اتعذبوا في المباحث وفي السجن ، الاولاد دول بالمناسبه هما اللي كان ربنا هداهم زي ماانا قلت في اول النوت ، المهم ، هما يعملوا بلاغات واحنا كمنظمه نبلغ النائب العام ونجري ورا الموضوع ونعمل بلاغات صحفيه للجرائد العالميه ونبعت محامين يحضروا معاهم التحقيقات وجلسات المحاكمه !!!!
الحقيقه ماخبيش عليكم ، كان فيه في عبي ديناصور ، يعني هما يعملوا تنظيمات سريه واسلحه وقنابل وتفجيرات ، براحتهم ، ولما البوليس يمسكهم لازم يحترمهم وحضرتك وسعادتك اعترف من فضلك ، ناوي تحرق ايه تاني ، طبعا سعادته مايرضاش يعترف ، فالبوليس يضربه علشان يعترف ، فاحنا نشتم البوليس وندافع عنهم !!! كان فيه في عبي ديناصور ، مش قادره استوعب المنطق ده ، ماهو يا كلنا نحترم القانون ، فانتم ماتفجروش قنابل والبوليس مايضربكوش !!! يااما انتم مابتحترموش القانون والبوليس مابيحترمش القانون والبادي اظلم !!!! طبعا الكلام ده في اوساط حقوق الانسان مصيبه سودا ، لان من حق المتهم مايحترمش القانون ويطلع عينه وعين امه ويفجر قنابل براحته لكن مش من حق البوليس يضربهم ، لا من واجب البوليس يحترم القانون وضمانات التحقيق والحريات العامه ومواثيق حقوق الانسان !!!!
الديناصور فضل يكبر في عبي ، مش قادره ابلع اللي بيحصل ، حاسه اني لما بساعدهم بشاركهم في جرايمهم ، لاني باشجع غيرهم يعمل تنظيمات سريه ويفجر قنابل ومايعترفش ويفضل يعرضنا ويعرض حياتنا للخطر واحنا ندافع عنهم ونطلعهم في الجرايد ونعملهم ابطال وقاده!!!
طيب وحقوق الضحايا ، حقوق الضحايا يااستاذه يجيبها القانون ، طيب القانون عاجز قدام الاجرام المنظم والارهاب ، معلش يااستاذه ، ابتسامه صفرا في وشي من حد دمه بارد !!! طيب بلاش حقوق الضحايا ، حقوقنا احنا نعيش مش مهددين بقنابل وتفجيرات ، صمت ، احنا مالناش حقوق والضحايا مالهاش حقوق بس المتهمين اللي عاملين تنظيمات سريه وبيفجروا قنابل هما اللي ليهم حقوق !!!! ... كلمه ابيحه من تلت حروف اولها الف واخرها الف وربنا يسامحني بقي علي قله ادبي !!!!!
فضل الديناصور يكبر في عبي وياكلني لغايه يوم اسود ، كان يوم خميس وانا نازله من المنظمه بعد اجتماع نهاري، ومدافعين عن حقوق المتهمين وشاتمين البوليس والتعذيب وكل حاجه ميه ميه ، خلصت الاجتماع ونزلت اركب العربيه ، ورايحه اجيب بنتي اللي عندها عشر سنين من المدرسه ، اصل يوم الخميس اليوم الوحيد اللي بجيبها من المدرسه ونعمل حاجات لطيفه سوا لاني مابروحش المكتب ، كانت الساعه حوالي واحده ونصف الضهر ، فتحت الراديو ، عرفت ان فيه قنبله انفجرت عند مدرسه او جنب مدرسه واطفال اتعوروا واطفال ماتو ........... والله العظيم والله العظيم كنت باترعش من راسي لرجلي ، وسناني بتخبط في بعض ، انهي مدرسه دي اللي انتم ياولاد الكلب فجرتوا القنابل بتاعتكم عندها ، وانهي اطفال اتعورت وانهي اطفال ماتت ، افتكرت بنتي وابتسامتها السعيده البريئه ، تصورتها متقطعه حتت مرميه جنب سور المدرسه ، تصورت المجرمين اللي بادافع عنهم وباضيع وقتي لصالحهم دفاعا عن حقوقهم القانونيه والدستورية وعدم التعذيب فجروا قنبله في مدرستها وبنتي الجميله البريئه ماتت ، حسيت ان دفاعي عنهم ماشفعش لبنتي علشان مايموتوهاش ، حسيت اني معاهم قتلت بنتي ، ماانا دافعت عن حقهم يقتلوا بنات الناس ويفجروا قنابل براحتهم ........... سبحان من وصلني مدرسه بنتي ، لقيتها واقفه قمر قدام المدرسه بريئه جميله ، خدتها في حضني وقعدت اعيط عياط هسيتيري !!!! بليل في التلفزيون شفت ابو شيماء رايح المستشفي يجري لما قالوا له بنته انصابت في القنبله ، شفته بيكلم امه في التليفون بيعيط ويلطم ويقول لها ، شيماء ماتت ياامه ، فرقعوا فيها بمبه ياامه ......... ويصوت ويلطم وانا وكل المفترجين نعيط ونتشحتف ، لما استضافوا امها في التلفزيون وسالوها سؤال غبي من نظام ايه رايك في اللي حصل ، او حاجه كده غبيه مش فاكراها قوي ، قالت اه كنت عارفه ان فيه ارهاب لكن ماكنتش عارفه انه ممكن يوصل لغايه عندي ، اهو وصل ياست الحاجه وشيماء ماتت ، تلميذه عندها عشر سنين ، اتفجرت فيها قنبله وجسمها البريء اتقطع جنب سور المدرسه و............... يلعن ابو حقوق الانسان !!!
رحت استقلت من المنظمه ومن مجلس الامناء وقلت بوضوح ، معنتش قادره اتحمل التناقض ، انا باشاركهم في جرايمهم وقتلهم للابرياء والاطفال ، ياكلنا نحترم القانون ، ياكلنا نخالفه ، مايبقوش هما بيضربوا القانون وبيضربونا بالجزمه ويموتوا عيالنا بالقنابل وترجعوا تقولوا حقوق انسان .................. يلعن ابو حقوق الانسان !!!!
طبعا انا اللي مشيت لوحدي ، انا اللي حسيت بالتناقض ، انا اللي حسيت اني بشارك المجرمين في جرايمهم ، بقيه الناس وكل الناشطين في حقوق الانسان فضلوا ناشطين بل وازدادوا نشاطا ، القنابل تتفجر وهما يعملوا بلاغات للنائب العام ضد تعذيب المتهمين و..... سلم لي علي الامم المتحده ومواثيق حقوق الانسان !!!!!!!
طيب هما الشباب الصغيرين اللي بيفجروا قنابل وينضموا لتنظيمات ويموتوا الناس ومعتبرينا كفره وولاد كلب ، الشباب الصغيرين دول بقت افكارهم كده ازاي !!! مين قال لهم ايه !!!! اتعلموا ايه في المدرسه !!!! سمعوا ايه من امام الجامع !!! بابا وماما قالوا ليهم ايه !!!! ازاي فقدوا البراءه والوطنيه وباعوا الدنيا وقرروا يشتروا الجنه علي جثث الاطفال والابرياء مسلمين ومسيحين !!!!!
مش بقول حكايات قديمه وغبرا !!!!
مش بقول رحلة سودا !!!
طبعا بقيت متخاذله وحكوميه وبنت كلب ... زملائي بتوع حقوق الانسان يبصوا لي بصات مريبه !!!! سبت لجنه الدفاع عن الحريات في نقابه المحامين اللي اتفرغت بالكامل للدفاع عن شباب التنظيمات الاسلاميه " زي مابيسموا نفسهم " ، محامين اليسار واليمين اتفرغوا للدفاع عن الشباب دول ، وحقهم في محاكمه عادله وضمانات حقوقيه والبراءه ، طيب والدم اللي اتسفح علي الارض والقنابل اللي انفجرت !!! محدش بيرد علي ، وانا خلاص مش عايزه حد يرد علي ، انا مصالحه نفسي وموقفي متسق مع قناعاتي ، انا باعمل اللي مقتنعه بيه وانا مابقيتش مقتنعه بالفيلم ده كله ........ مش مقتنعه لكن باتابع اللي بيحصل ، باتابع القنابل والتفجيرات وقتل السياح وباتابع بيانات الادانه وبلاغات النائب العام وباتابع المحامين اللي بتجري تدافع متطوعين عن شباب التنظيمات اللي بيفجروا قنابل تدفاع عن حقهم في محاكمه عادله ومعامله انسانيه وحقهم يعملوا تنظيمات ويفرقعوا قنابل !!!!
في يوم كده قابلت الاستاذ نبيل الهلالي المحامي الشيوعي اليساري في محكمه مجلس الدوله ، بعد البراءه في قضيه المحجوب اللي اترافع فيها بكل براعته القانونيه وخبرته وجاب براءه للمتهمين اللي اعترفوا بانهم ضربوا رفعت المحجوب بالرصاص ، يومها القاضي قال للمتهمين اشكروا الاستاذ نبيل الهلالي لان هو اللي جاب لكم البراءة !!! قابلته في المحكمه صدفه ، كنت باحبه وباحترمه ، استاذي وقعدت في مكتبه سبع سنين ، قلت له بمنتهي الجديه ، ازاي بتترافع عن ناس عايزين دوله دينيه وبينكروا حقوق وحريات الاخرين ، ازاي بتترافع عن ناس لايؤمنوا بالوطن انما يؤمنوا بالامه الاسلاميه وفقط ، ازاي بتترافع عن ناس بيموتوا الابرياء عن قناعه فكريه بانهم كفرا ويغوروا في ستين داهيه .. الحقيقه الاستاذ نبيل الهلالي كان رجل مؤدب جدااااااا ، سمعني وابتسم وماردش علي ، انا مش اسكت بقي ، لا !!!!
كنت زعلانه منه بجد ، ده انت مفروض راجل تؤمن بالدوله المدنيه وبالحريات وبحقوق الشعب وبالديمقراطيه الحقيقيه ، ما سكتش ، قلت له ، دول زي هلتر ، فاشيين ، الفرق ان هلتر حتي كان سايب الناس تعيش حريتها الشخصيه وتلبس وتقلع براحتها ، دول فاشيين اكتر من هلتر وبيتدخلوا كمان الناس بلتبس وتقلع ايه ، الاستاذ نبيل الهلالي الراجل الهادي ، انفجر في غاضبا ، لايعجبه كلامي ، طبعا ، مافيش شيوعي ينفع يدافع عن هلتر اللي موت الشيوعين وخرب اوربا كلها ، التشبيه بتاعي ضايقه جدا ، انفجر في غاضبا ، لا لا لا يااستاذه ، ايه الكلام ده ، كلام ماينفعش خالص وسابني ومشي ، وخلصت علاقتنا الحقيقيه ، بقي بعد كده لما يشوفني يبتسم في وشي ويمشي ....لما كنت ماشيه في جنازته ، كنت لسه مستنيه اجابته علي سؤالي الرخم اللي نرفزه ، ازاي بتدافع عنهم وهما قتله ومجرمين لايحترموا القانون ولا يحترموا الاخر ولايؤمنوا بالوطنيه ، ازاي بتدافع عنهم وهما بيموتوا الناس الابرياء العزل بقنابلهم !!!! لكن في الجنازه برضه رفض يرد علي زي مارفض يرد علي وهو عايش !!!!!!!!!
طيب الشباب دول ، اللي بيفجروا قنابل في المسلمين الابرياء العزل لانهم بيخضعوا لحكومه كافره او هم شخصيا كفره ، حيفكروا ازاي في المسيحين ، ايه حياخدوهم بالحضن والبوس ويتصوروا معاهم !!! طيب الشباب دول اللي كانوا اطفال ابرياء ازاي بقوا كده !!!! ايه ارجع احكي من الاول ؟؟؟؟؟؟؟؟؟؟؟
انا حزينه وزعلانه وقلبي مهموم ومحروق !!!!
انا مابحسش بالامان بالضبط زي المسيحين واكتر !!!
انا مؤمنه بالله العظيم الواحد الاحد وبالاسلام دينا وباحاول ارضي ربنا واعمل اللي علي ونفسي طبعا اخش الجنه!!!
لكن انا ضد الافكار الارهابية الوهابيه المتطرفه ...
انا مصرية جدا ، الوطن عندي فوق كل حاجه ، والوطن عندي مسلمين ومسيحين ، الوطن عندي مصريين !!!
اي حاجه او اي حد يقول طظ في الوطن مايلزمنيش !!!
اي حاجه او اي حد يقول المسيحين حاجه والمسلمين حاجه مايلزمنيش !!!!
ربنا بقي يبقي يتصرف معانا ويحاسبنا !!!
لكن في الدنيا وفي مصر كلنا مصريين !!!!
دي افكاري انا ، لكن انا اقليه اقليه !!!!
لما الواد السباك اللي حاول يقتل نجيب محفوظ قال انه طبعا ماقراش له حرف وانهم قالوا له انه كافر !!! عرفت ان مصيبتنا كبيرة !!!
لما الواد الطبال بتاع امبابه ساب الغوازي والرقاصين وبقي امير جماعه وفرض علي امبابه الضبط والربط وجري ورا الناس يامرهم بالمعروف وينهاهم عن المنكر واللي مايسمعش الكلام يقيم عليه الحد !!!! عرفت ان مصيبتنا سودا !!!!
لما قتلوا فرج فوده ، اللي كان بيقول دوله مدنيه ، لانه كافر زي ما قالوا لهم ، عرفت ان مصيبتنا كبيرة وسودا وتقيله !!!!
لما احد الشيوخ في حلوان جري ورا البنات والشباب يسالهم عن بطايقهم ويضربهم لانهم ماشين في الشارع سوا والشيطان ثالثهم ، عرفت ان مصيبتنا سودا وتقيله وكبيره ومهببه بهباب !!!!
لما حد اتجرأ يوم وقال ان اثار الفراعنه العظيمه اصنام !!!! عرفت ان مصيبتنا سودا ومهببه بطين !!!!
لما ابتدوا يقولوا اغلبيه واقلية ، عرفت ان فيه ناس نفسها تقهر ناس ، ماهو لو احنا متفقين مش حيبقي فيه مجال نفكر بعض مين اكتر من مين ، لكن لما نفكر بعض احنا كام وانتم كام ، كاننا بنقول ، اخضعوا لينا لاننا اكتر !!! فكره فاشيه حقيره قائمه علي فكره القهر والخضوع والانسحاق والذل !!! لما ابتدينا نتوصف احنا المصريين بان مين اقليه ومين اغلبيه ، عرفت ان فيه مصيبه سودا جايه وايام اسود حنعيشها !!!!
لما واحد صديقي صايع وبتاع نسوان وبيرافق علي مراته ومدخل عياله مدراس خواجاتي ويعرف من الدين الصلاه والصوم بس ، لما هذا الصديق مايرضاش يشرب ميه عند المسيحين ولا ياكل عندهم ، لانه روحه بتسيخ وبيبقي حيغمي عليه !!!! عرفت ان مصيبتنا سودا وطين وزفت وقطران ومهببه بهباب !!!!
لما بقت فيه مدارس اسلاميه ومدراس مسيحيه !!!
ولما بقت فيه شركات اسلاميه وشركات مسيحيه !!!!
لما جبت تورتايه في مكتبي بمناسبه الكريسماس وحد من المحامين مارضيش ياكل منها ، رغم انه شاب لطيف ودمه خفيف وطول النهار يرقص ويضحك ويكذب ومعندوش اي مشاكل مع حاجه ، يومها عرفت ان الحكايه ابوظ مما اتصور !!!!
افكار التطرف ماشيه وافكار التخلف ماشيه - باصرار والحاح وقوة ومحدش بيتصدي ليها بجد - والدنيا بتغمق كل يوم والعيال ربنا بيهديها وبعدين تنضم لتنظيمات سريه ويكفروا المجتمع والناس ويشتموا المسيحين ويفجروا قنابل ان لزم الامر وبعدين بتوع حقوق الانسان يدافعوا عنهم !!!!
وعفريت الفتنه الطائفيه ماشي ومابينصرفش !!!
والخناقات بقت طائفيه واللي عايز يهدد حد ، مسيحي مسلم ، يقوله حابلغ امن الدوله !!!
كل ده احنا عايشينه وشاربينه سم لغايه كيعانا يوم ورا يوم وسنه ورا سنه !!!!
المشكله مش مشكله اقباط ولا مسلمين ، المشكله مشكله مصر كلها ، مشكله التقدم والحضاره مع التخلف والجهل !!!
المشكله مشكلتنا كلنا ، ان انتصرنا حننتصر كلنا وان هزمنا حنهزم كلنا مسلمين واقباط !!!!
لكن بحاول ، ايوه انا بحاول ، ولازم كل واحد منا يحاول يتصدي للمصيبه السوده دي !!!
مش الحل نكتئب ولا نتقهر ولا نتطق ولا نموت !!!!
مش الحل نمشي ونسيب البلد يسرقوها منا ويولعوا فيها !!!
مش الحل نسكت وننحني للعاصفه لغايه ماتقلعنا من جدورنا !!!
الحل نقاوم !!!
نقاوم !!!!
نقاوم .... بكل الطرق والسبل والوسائل...
بالكلام مع الناس ، بضرب القدوه ، بالمقالات ، بالتصدي للفكر ده كل ماينفع نتصدي ، بالانتباه لخطوره مايحدث والتصدي له !!!!
نقاوم لما ننسي اننا مسلمين ومسيحين ، نفتكر بس اننا مصريين ,,
الحل نقاوم .... انا شخصيا لا حاستسلم ولا حاتقهر واسكت ولا حامشي واسيب البلد !!!!
الحل نقاوم ...... لان مافيش حل تاني !!!!
وطول مااحنا عايشين والمصيبه بتكبر والخطر بيهددنا مافيش قدامنا غير اننا نقاوم !!!
نحاول نفهم اللي بيحصل ونحاول نقاومه !!!!
نحاول .......... جايز نموت قبل ما ننتصر لكن حنبقي مشينا خطوه في طريق طويل لازم مصر تمشيه واحنا معانا علشان توصل لبر الامان !!!! اللي عايز يكتئب براحته واللي عايز يتقوقع برضه براحته !!!! لكن مصر حتوصل لبر الامان حتوصل لبر الامان وان طال الزمن وان طال الطريق !!!!
وافتكروا اوربا ايام القرون الوسطي ومحاكم التفتيش ، 400 سنه من الايام السودا وفي النهايه الايام السودا خلصت وبقت مجرد سطور في كتاب التاريخ ، اه سطور بتنقط دم وبتوجع وناس كتير دفعت تمن غالي حياتها وعمرها وافكارها ، لكن الايام السودا خلصت !!!!
افتكروا امريكا ايام المكارثيه والتفتيش في عقول الناس ، وجلسات الاستماع والكونجرس واللي هرب واللي طفش واللي بطل شغل واللي طق مات ، لكن الايام السودا خلصت !!!!!
الايام السودا بتخلص مهما طولت وتصورنا انها ما بتخلصش !!!
كل واحد بس يعمل اللي عليه ويقاوم بكل الطرق وبر الامان جاي اكيد !!!!
